Шрифт

27 июня.

Канон святителю Мефодию, патриарху Константинопольскому.

Святителю Мефодию, патриарху Константинопольскому
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь Мефо́дия, гла́с 4:

Пра́вило ве́ры и о́браз кро́тости, воздержа́ния учи́теля яви́ тя ста́ду твоему́ Яже веще́й Истина. Сего́ ра́ди стяжа́л еси́ смире́нием высо́кая, нището́ю бога́тая, святи́телю Мефо́дие, моли́ Христа́ Бо́га спасти́ся душа́м на́шим.

Кано́н свята́го Мефо́дия, гла́с 4.

Пе́снь 1.

Ирмос: Порази́вый Еги́пта и фарао́на мучи́теля погрузи́вый в мо́ри, лю́ди спа́сл еси́ из рабо́ты, Моисе́йски пою́щия пе́снь побе́дную: я́ко просла́вися.

Припев: Святи́телю о́тче Мефо́дие, моли́ Бо́га о нас.

В посте́х, преподо́бне, порабоща́я те́ло твое́, ума́стил еси́ ду́шу твою́ восхожде́нии боже́ственными и пи́щу прия́л еси́ вы́шняго Ца́рства неиждива́емую.

Припев: Святи́телю о́тче Мефо́дие, моли́ Бо́га о нас.

Слове́сным мече́м вооружи́вся Ду́ха и, я́коже во броня́, ве́рою оде́явся, и му́жески еретико́в полки́ пресе́кл еси́, всеблаже́нне Мефо́дие о́тче.

Сла́ва Отцу́ и Сы́ну и Свято́му Ду́ху:

Река́ приснотеку́щая Це́ркви бы́ша уста́ твоя́ боже́ственная, ерети́ческая моря́ я́ко вои́стинну, преподо́бне Мефо́дие, изсуша́я и напоя́я ве́рныя.

И ны́не и при́сно и во ве́ки веко́в. Ами́нь.

Богородичен: Се́нь одушевле́нну, и ковче́г, и трапе́зу, го́ру, от нея́же усече́ся без руку́ челове́чу Ка́мень, Иже все́х Госпо́дь, Мари́ю Пречи́стую пе́сньми почти́м.

Пе́снь 3.

Ирмос: Утвержда́яй гро́м и созида́яй ду́х, утверди́ мене́, Го́споди, да Тя́ пою́ и́стинно и творю́ во́лю Твою́, я́ко не́сть свя́т, я́ко Ты́, Бо́же на́ш.

Припев: Святи́телю о́тче Мефо́дие, моли́ Бо́га о нас.

Тучено́сный бы́сть о́блак язы́к тво́й, Мефо́дие, сердца́ бо благочести́вых напоя́ющь сло́вом, нечести́вых же всегда́ подавля́ющь пле́велы.

Припев: Святи́телю о́тче Мефо́дие, моли́ Бо́га о нас.

Исправля́я ве́ры сло́во, ра́н иску́с прия́л еси́ и в мра́чней, о́тче, темни́це седе́ти осужде́н бы́л еси́. Те́мже к Све́ту невече́рнему преста́вился еси́, веселя́ся.

Сла́ва Отцу́ и Сы́ну и Свято́му Ду́ху:

Му́чеников страда́ния воспе́л еси́, си́х причасти́лся еси́ неотъе́млемыя, о́тче, ра́дости, я́ко сугу́бо пострада́в непреста́нными скорбьми́ и ра́нами, Мефо́дие.

И ны́не и при́сно и во ве́ки веко́в. Ами́нь.

Богородичен: Гаврии́л, — ра́дуйся, — Де́ве пове́дуя, веща́ше, — Ду́х Святы́й на Тя́ на́йдет, Де́во, и Спа́са Го́спода зачне́ши во чре́ве Твое́м.

Седа́лен преподо́бнаго, гла́с 4.

Яко све́тлое со́лнце, возсия́в, о́тче, уче́ньми твои́ми всю́ вселе́нную, свяще́нне, просвеща́еши, Мефо́дие, и отгоня́еши мглу́ ерети́ческую.

Слава и ны́не, Богородичен:

Пречи́стеи ру́це Твои́, Де́во Ма́ти, просте́рши, покры́й упова́ющия на Тя́ и Сы́ну Твоему́ зову́щия: все́м пода́ждь, Христе́, ми́лости Твоя́.

Пе́снь 4.

Ирмос: Услы́шах, Бо́же, слу́х Тво́й и убоя́хся, разуме́х дела́ Твоя́ и ужасо́хся, Го́споди, я́ко Твоего́ хвале́ния испо́лнь земля́.

Припев: Святи́телю о́тче Мефо́дие, моли́ Бо́га о нас.

Му́дрости разу́мною ча́шею омочи́в устне́, о́тче, ре́ки на́м источи́л еси́ уче́ний, преподо́бне, благоче́стно творя́щим па́мять твою́.

Припев: Святи́телю о́тче Мефо́дие, моли́ Бо́га о нас.

Ты́ пропове́датель возжеле́нен, сла́док сло́вом, про́ст нра́вы, духо́вными дарова́нии, святи́телю преподо́бне, пребога́т яви́лся еси́, Мефо́дие.

Сла́ва Отцу́ и Сы́ну и Свято́му Ду́ху:

Копие́м мы́сленным Боже́ственнаго Сло́ва е́же в ме́рзости ерети́честей су́щую пострека́в, уста́вил еси́ нече́стия на́глость, Мефо́дие.

И ны́не и при́сно и во ве́ки веко́в. Ами́нь.

Богородичен: Ра́дуйся, две́ре мы́сленная, из нея́же про́йде неизрече́нным сло́вом Ца́рь Небе́сный и, соблю́д непоро́чну, запеча́тану па́ки оста́ви.

Пе́снь 5

Ирмос: Возсия́й ми́, Го́споди, све́т повеле́ний Твои́х, я́ко к Тебе́ ду́х мо́й у́тренюет и пое́т Тя́: Ты́ бо еси́ Бо́г на́ш, и к Тебе́ прибега́ю, Царю́ ми́ра.

Припев: Святи́телю о́тче Мефо́дие, моли́ Бо́га о нас.

Све́том просвеща́емь Трисо́лнечным, сла́вне, мра́чную и те́мную е́реси мглу́ благоче́стно отгна́л еси́ и звезда́ бы́л еси́, ве́рными блиста́я сия́нии.

Припев: Святи́телю о́тче Мефо́дие, моли́ Бо́га о нас.

Изощре́на тро́сть Ду́ха язы́к тво́й, я́ко скоропи́сца кни́жника, Мефо́дие, показа́ся, на скрижа́ли начерта́я серде́ц благода́ти Боже́ственный зако́н нело́жно.

Сла́ва Отцу́ и Сы́ну и Свято́му Ду́ху:

Сле́зныя то́ки всено́щными стоя́нии, я́ко би́серие, нося́, преподо́бне, си́ми грехо́вныя пото́ки изсуши́л еси́ и Боже́ственнаго Ду́ха прия́телище яви́лся еси́ чи́сто.

И ны́не и при́сно и во ве́ки веко́в. Ами́нь.

Богородичен: Избавля́еши моли́твами Твои́ми от вся́каго обстоя́ния прибега́ющия в покро́в Тво́й, Мари́е Богоро́дице: Ты́ бо чту́щих Тя́ Предста́тельница еси́ и упова́ние с Бо́гом.

Пе́снь 6.

Ирмос: Бу́ря мя́ помышле́ний, пости́гши, во глубину́ низвлачи́т мя́ безме́рных грехо́в, но Ты́, Упра́вителю Благи́й, предвари́в, упра́ви, я́ко проро́ка, и спаси́ мя.

Припев: Святи́телю о́тче Мефо́дие, моли́ Бо́га о нас.

Пчеле́ трудолю́бней поревнова́в, пи́сменныя собра́л еси́ цве́ты, я́коже в со́те, се́рдцем твои́м сие́ состроя́я и все́м источа́я реку́ уче́ний твои́х.

Припев: Святи́телю о́тче Мефо́дие, моли́ Бо́га о нас.

Слове́с духо́вных напо́лнився, язы́к тво́й, прему́дре, языкобо́лия низложи́ ху́льников, пропове́дающь Христо́во воплоще́ние почита́ти и плотско́е подо́бие.

Сла́ва Отцу́ и Сы́ну и Свято́му Ду́ху:

Пе́рвее у́бо на седа́лищи ста́рец похвали́в Го́спода, на святи́тельсте престо́ле, напосле́док же возне́слся еси́ са́м, упа́с богоуго́дно избра́нныя, о́тче, сия́ лю́ди.

И ны́не и при́сно и во ве́ки веко́в. Ами́нь.

Богородичен: Еди́ну Тя́ Бо́га на́шего Ма́терь, Богоро́дице Влады́чице, тва́рь вся́ познава́ет, я́ко еди́на вмести́ла еси́ Бо́га несказа́нно во утро́бе Твое́й, Боже́ственным не опали́вшися огне́м.

Конда́к Мефо́дия, гла́с 2.

На земли́ подвиза́лся еси́, я́ко безпло́тный, и небеса́ насле́довал еси́, Мефо́дие, я́ко изъясни́вый в конце́х ико́н поклоне́ние, в труде́х бо и боле́знех вя́щше пребы́в, не преста́л еси́ дерзнове́нием, облича́я отмета́ющияся ико́ны Христо́вы.

Икос:

Грехо́в ми́ разреше́ние пода́ждь, е́же пе́ти по достоя́нию по́двиги твоя́, Мефо́дие пресла́вне: в ро́в бо глубо́к вве́ржен бы́л еси́, да я́же пре́жде ду́ши, во глубине́ погребе́нныя неве́дения, разреши́ши к сия́нию Боже́ственнаго светоли́тия, научи́в я́ве подсо́лнечную Боже́ственному вои́стинну неизрече́нному Христо́ву покланя́тися воображе́нию, облича́я отмета́ющияся ико́ны Христо́вы.

Пе́снь 7.

Ирмос: В пещи́ Авраа́мстии о́троцы Перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Припев: Святи́телю о́тче Мефо́дие, моли́ Бо́га о нас.

Росо́ю Боже́ственныя любве́ погаси́л еси́ страсте́й, пресла́вне, разжже́нную пе́щь, иску́шся же я́ко зла́то напа́стьми горни́лом, я́ко со́лнце, блистаеши.

Припев: Святи́телю о́тче Мефо́дие, моли́ Бо́га о нас.

Адама́нтское се́рдце в ско́рбех име́л еси́ и в гоне́ниих, Мефо́дие, и ны́не блиста́еши луча́ми небе́сными и огнедохнове́нными усты́, те́мже тя́ восхваля́ем.

Сла́ва Отцу́ и Сы́ну и Свято́му Ду́ху:

Якоже необори́мь сто́лп, неподви́жимь пребы́л еси́ напа́стными прило́ги, пре́лести утвержде́ние низлага́я, святи́телю, си́лою твои́х слове́с, Мефо́дие преблаже́нне.

И ны́не и при́сно и во ве́ки веко́в. Ами́нь.

Богородичен: Пречу́дный Ты́ черто́г, соеди́ншаго Себе́ челове́честву, Бо́га еди́на породила́ еси́ и Де́вою пребыла́ еси́, Богоневе́стная Ма́ти, Мари́е Де́во.

Пе́снь 8.

Ирмос: Земля́ и вся́, я́же на не́й, мо́ре и вси́ исто́чницы, небеса́ небе́с, све́т и тма́, мра́з и зно́й, сы́нове челове́честии, свяще́нницы, благослови́те Го́спода и превозноси́те Его́ во ве́ки.

Припев: Святи́телю о́тче Мефо́дие, моли́ Бо́га о нас.

Ты́ низложи́л еси́ ерети́ческая шата́ния, е́же пои́стинне злочести́вая, и совозне́сл еси́ ве́рных Це́ркве, о́тче, ро́г, Христо́ву наказу́я ико́ну чести́, Мефо́дие. Те́мже тя́ пое́м и любо́вию почита́ем.

Припев: Святи́телю о́тче Мефо́дие, моли́ Бо́га о нас.

Тя́ звезду́ всесве́тлую Со́лнце показа́ Христо́с на тве́рди, прему́дре, церко́вней, и твои́ми сия́нии честны́х уче́ний концы́, о́тче, озари́л еси́ во вся́ ве́ки.

Сла́ва Отцу́ и Сы́ну и Свято́му Ду́ху:

Твое́ сло́во, я́коже гро́м, Мефо́дие, возшуме́ на земли́, мамо́ны соде́йственника и роди́теля пре́лести, я́коже зми́я, связа́в, отсла́л еси́ тме́ ве́чней, я́ко су́ща насле́дника.

И ны́не и при́сно и во ве́ки веко́в. Ами́нь.

Богородичен: Еди́н еси́ Единоро́ден горе́, Еди́н и до́ле То́йже: без ма́тере горе́ от Отца́ и без отца́ из Ма́тере до́лу, в Не́йже вообрази́лся еси́ в чужде́е, Сло́ве, обнища́в, в мое́ смири́вшееся естество́ от греха́.

Песнь 9

Ирмос: Яко сотвори́ Мне́ вели́чия Си́льный, и свя́то и́мя Его́, и ми́лость Его́ в ро́д и ро́д боя́щимся Его́.

Припев: Святи́телю о́тче Мефо́дие, моли́ Бо́га о нас.

Святи́телей красота́, мона́хов удобре́ние, все́х ве́рных о́браз, Це́ркве па́стырь и правосла́вных степе́нь, ты́ еси́, Мефо́дие.

Припев: Святи́телю о́тче Мефо́дие, моли́ Бо́га о нас.

Илиину́ ре́вность стяжа́в, испо́лнил еси́ студа́ беззако́нныя иере́и, воплоще́ния Госпо́дня непокланя́ющихся о́бразу, му́дре Мефо́дие.

Сла́ва Отцу́ и Сы́ну и Свято́му Ду́ху:

Лику́я со Ангелы пред лице́м Изба́вителя и сла́вы Его́ наслажда́яся, моли́твами твои́ми на́с от вся́ких искуше́ний изба́ви, Мефо́дие.

И ны́не и при́сно и во ве́ки веко́в. Ами́нь.

Богородичен: Пое́м Твое́ рождество́ и сла́вим из Тебе́ Рожде́ннаго, я́ко Бо́га же и Челове́ка, Ма́ти Де́во Чи́стая, Его́же моли́ приле́жно поми́ловати на́с.

Свети́лен святи́теля.

Прииди́те, ве́рнии, пое́м боже́ственную па́мять святи́теля дне́сь Мефо́дия, в ро́ве преиспо́днем вве́ржена, да ду́ши изба́вит, погребе́нныя во тме́, от лука́ваго нече́стия.

Молитва

О пречестна́я и свяще́нная главо́ и благода́ти Свята́го Ду́ха испо́лненная, Спа́сово со Отце́м обита́лище, вели́кий архиере́е, те́плый наш засту́пниче, святи́телю Мефо́дие, предстоя́ у Престо́ла всех Царя́ и наслажда́яся све́та единосу́щныя Тро́ицы и херуви́мски со А́нгелы возглаша́я песнь трисвяту́ю, вели́кое же и неизсле́дованное дерзнове́ние име́я ко всеми́лостивому Влады́це, моли́ спасти́ся па́ствы Христо́вы лю́дем, благостоя́ние святы́х церкве́й утверди́: архиере́и благоле́пием святи́тельства украси́, мона́шествующыя к по́двигом до́браго тече́ния укрепи́, ца́рствующий град и вся гра́ды и страны до́бре сохрани́, и ве́ру святу́ю непоро́чну соблюсти́ умоли́, мир весь предста́тельством твои́м умири́, от гла́да и па́губы изба́ви ны, и от нападе́ния иноплеме́нных сохрани́, ста́рыя уте́ши, ю́ныя наста́ви, безу́мныя умудри́, вдови́цы поми́луй, си́роты заступи́, младе́нцы возрасти́, пле́нных возврати́, немощству́ющыя и моля́щияся тебе́ от всех напа́стей и бед хода́тайством твои́м свободи́: моли́ о нас Всеще́драго и Человеколюби́ваго Христа́ Бо́га на́шего, да и в день Стра́шнаго Прише́ствия Его́ от шу́ияго стоя́ния изба́вит нас, и ра́дости святы́х прича́стники сотвори́т со все́ми святы́ми во ве́ки веко́в. Ами́нь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.

Святителю Мефодию, патриарху Константинопольскому