26 июня.

Канон преподобным Андронику, Савве, Александру, Даниилу и Андрею Московским.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, глас 2:

Плоды́ доброде́телей на земли́ прине́сше,/ преподо́бнии отцы́,/ в Небе́сных черто́зех ны́не благоуха́ете, я́ко ра́йстии цве́ти,/ и лице́м к лицу́ зри́те Пресвяту́ю Тро́ицу,/ Ю́же дерзнове́нно моли́те/ спасти́ся душа́м на́шим.

Ин тропа́рь, глас 8:

От ю́ности свое́й, преподо́бнии отцы́ Андрони́че и Са́вво,/ в пусты́ни всели́стеся Се́ргия вели́каго,/ того́ житию́ после́дующе,/ плоды́ смире́ния и послуша́ния возрасти́ли есте́,/ сего́ ра́ди сподо́бившеся бы́ти строи́тели и первонача́льники/ обе́тныя оби́тели святи́теля Алекси́я,/ с ни́мже испроси́те у Христа́ Бо́га ве́рным лю́дем здра́вие и спасе́ние/ и душа́м на́шим ве́лию ми́лость.

Ин тропа́рь, глас 1:

Безмо́лвие от ю́ности возлюби́в,/ на го́ру Ма́ковец прише́л еси́, Андрони́че блаже́нне,/ оби́тель о́бщаго жития́ устро́ил еси́ в земне́м гра́де Москве́,/ во оби́тели Небе́снаго гра́да ны́не ликовству́еши,/ моли́ся Христу́ Бо́гу/ спасти́ся душа́м на́шим.

Кано́н. Гла́с 8.

Пе́снь 1.

Ирмос: Ди́вному Бо́гу вели́чия принесе́м,/ и великоле́пно с на́ми/ да воспое́т земля́ и не́бо/ я́сно сла́ву Его́.

Припев: Преподо́бнии отцы́, моли́те Бо́га о нас.

Андрони́че преподо́бне, по́мощь пода́й уму́ моему́/ просла́вити тя сло́вом,/ да и про́чии ви́дят сла́ву, е́юже украси́ тя Бог на земли́.

Припев: Преподо́бнии отцы́, моли́те Бо́га о нас.

Возлюби́л еси́ Боже́ственное безмо́лвие па́че молвы́ челове́ческия,/ молча́ние па́че слове́с,/ кро́тость па́че де́рзости, Андрони́че блаже́нне.

Сла́ва Отцу́ и Сы́ну и Свято́му Ду́ху:

От ю́ности, преподо́бне Андрони́че,/ кро́ткаго учи́теля благоразу́мный учени́к яви́ся,/ во вся́цем воздержа́нии, моли́тве и безмо́лвии пребыва́я.

И ны́не и при́сно и во ве́ки веко́в. Ами́нь.

Богородичен: Исцели́, Благода́тная, я́звы души́ мое́й,/ уврачу́й попече́нием те́плым,/ ны́не проше́ния услы́ши и Сама́ заступи́.

Пе́снь 3.

Ирмос: Утверди́ мя, Го́споди, си́лою кре́стною/ и да́руй мне се́рдце чи́стое,/ да о Тебе́ хвалю́ся, Бла́же.

Припев: Преподо́бнии отцы́, моли́те Бо́га о нас.

Прови́дев преподо́бный Се́ргий твое́ послуша́ние,/ повеле́ ти еди́ному жи́ти в ке́ллии,/ зело́ бо возлюби́л еси́ безмо́лвие, Андрони́че блаже́нне.

Припев: Преподо́бнии отцы́, моли́те Бо́га о нас.

В но́щех воздвига́ше ру́це твоя́ во свята́я/ и благословля́ше Го́спода, преподо́бне Андрони́че,/ днем же в послуша́ниих пребыва́л еси́.

Сла́ва Отцу́ и Сы́ну и Свято́му Ду́ху:

Зря святы́й Се́ргий доброде́тель, в тебе́ множа́щуюся, преподо́бне Андрони́че,/ зело́ Бо́га моля́ше,/ да да́рует ти кре́пость до конца́ соверши́ти тече́ние.

И ны́не и при́сно и во ве́ки веко́в. Ами́нь.

Богородичен: Искорени́ бесо́в лука́вства, о Помо́щнице,/ разруши́ по́мыслы страсте́й,/ очи́сти се́рдце и моли́твы дар возгре́й.

Седа́лен, гла́с 4.

Жите́йское мо́ре мно́гими по́двиги воздержа́ния и труды́ преплы́вше,/ ко приста́нищу Свята́го Ду́ха дости́гли есте́, преподо́бнии отцы́ и богому́дрии,/ моли́те и нам Того́ благода́ть стяжа́ти.

Сла́ва, и ны́не, Богоро́дичен:

Тебе́, Ма́ти сла́дкаго моего́ Христа́, Хода́таицу предлага́ем, раби́ Твои́,/ Ты бо еси́ всем спаси́тельное упокое́ние, и очисти́лище,/ и благоути́шное приста́нище обурева́емым во гресе́х.

Пе́снь 4.

Ирмос: Я́ко Петру́, ру́ку простры́й в по́мощь/ и мене́ поми́луй/ и спаси́, я́ко Человеколю́бец.

Припев: Преподо́бнии отцы́, моли́те Бо́га о нас.

Се, что добро́ или́ что красно́,/ но е́же жи́ти бра́тии вку́пе,–/ сие́ помышля́я во уме́ свое́м, Андрони́к рече́:/ а́ще бу́дет уго́дно Бо́гу, се мо́жет и на де́ло произвести́.

Припев: Преподо́бнии отцы́, моли́те Бо́га о нас.

От запреще́ния Твоего́, Го́споди, побе́гнут во́ды,/ от гла́са гро́ма Твоего́ убоя́тся,–/ си́це моля́шеся святи́тель Алекси́й,/ да изба́вится морска́го волне́ния и належа́щия ско́рби.

Сла́ва Отцу́ и Сы́ну и Свято́му Ду́ху:

Егда́ обеща́ся святи́тель Алекси́й це́рковь созда́ти,/ преста́ мо́ре от волне́ния своего́/ и в тишину́ ве́лию преложи́ся.

И ны́не и при́сно и во ве́ки веко́в. Ами́нь.

Богородичен: Отврати́ нахожде́ния го́рьких бесо́в,/ прожени́ их Твои́ми моли́твами, Де́во,/ ны́не си́лу пода́й на моли́тву/ и кре́пость на по́двиг, о Ма́ти.

Пе́снь 5

Ирмос: У́тренюет дух мой к Тебе́, Бо́же,/ зане́ свет повеле́ния прише́ствия Твоего́,/ и́миже у́бо озари́ ум наш, Влады́ко,/ и наста́ви на стезю́ жи́зни.

Припев: Преподо́бнии отцы́, моли́те Бо́га о нас.

Не возбраня́й, его́же ви́диши могу́ща пасти́ ста́до Христо́во, сан прия́ти,–/ рече́ святи́тель Алекси́й преподо́бному Се́ргию,/ си́це прозрева́я Андрони́ка блаже́ннаго.

Припев: Преподо́бнии отцы́, моли́те Бо́га о нас.

Обре́тше ме́сто близ Я́узы реки́, иде́же монасты́рь созда́ти,/ преподо́бный Андрони́к с ра́достию помышля́ше в себе́:/ сей поко́й мой во век ве́ка,/ зде вселю́ся, я́ко изво́лих и́.

Сла́ва Отцу́ и Сы́ну и Свято́му Ду́ху:

Преподо́бный Се́ргий, благослови́в оби́тель Спа́сову, рече́:/ Го́споди, при́зри с Небесе́, и виждь, и посети́ ме́сто сие́,/ его́же благоизво́ли созда́ти во сла́ву свята́го и́мене Твоего́.

И ны́не и при́сно и во ве́ки веко́в. Ами́нь.

Богородичен: Низпосли́ нам благода́ть Твою́, Влады́чице,/ моли́твами на Не́бо возведи́,/ щедро́т испо́лни, Всеблага́я,/ и к Сы́ну ми́лости проле́й.

Пе́снь 6.

Ирмос: Ри́зу мне пода́ждь све́тлу,/ одея́йся Све́том, я́ко ри́зою,/ Многоми́лостиве, Христе́ Бо́же наш.

Припев: Преподо́бнии отцы́, моли́те Бо́га о нас.

Созда́л еси́ це́рковь прекра́сну во И́мя Го́спода Бо́га и Спа́са на́шего, преподо́бне Андрони́че,/ да благословя́т Го́спода вси раби́ Госпо́дни,/ стоя́щии во хра́ме Госпо́дни.

Припев: Преподо́бнии отцы́, моли́те Бо́га о нас.

До́бре управля́я ста́дом множа́щимся,/ преподо́бный Андрони́к по́двиги вя́щия приима́ше на ся,/ коего́ждо, я́ко о́тец, наказу́я и о́бще соглаше́ние в бра́тии творя́.

Сла́ва Отцу́ и Сы́ну и Свято́му Ду́ху:

Запреща́я и моля́,/ воставля́я на неви́димыя враги́ и тя́готы всех нося́,/ преподо́бный Андрони́к бя́ше о́бразом кро́ток,/ кро́ткаго учи́теля благоразу́мный учени́к.

И ны́не и при́сно и во ве́ки веко́в. Ами́нь.

Богородичен: Ду́шу мою́, Богоро́дице, грехо́м омраче́нную,/ ны́не очи́сти, Пречи́стая,/ све́та испо́лни, Пресве́тлая,/ сле́зы пода́й, Милосе́рдая.

Конда́к, гла́с 3.

Вас мо́лим, преподо́бнии отцы́ на́ши,/ те́лом почива́ющия на земли́,/ ду́хом же Бо́жию престо́лу предстоя́щия:/ моли́теся о гра́де Москве́/ и о всех, почита́ющих честну́ю па́мять ва́шу.

И́кос:

Ка́ко воспои́м вас, преподо́бнии отцы́,/ Андрони́че, Са́вво и Алекса́ндре, всечестни́и игу́мени,/ Дании́ле и Андре́е, изя́щнии иконопи́сцы,/ или́ ки́я благодаре́ния и хвалы́ принесе́м в па́мять ва́шу?/ Вы бо есте́ при́снии Небе́снии хода́таи, и покрови́телие, и моли́твенницы о гра́де Москве́/ и о всех, почита́ющих честну́ю па́мять ва́шу.

Пе́снь 7.

Ирмос: Подража́тели трие́х Твои́х, Го́споди, отроко́в сотвори́ ны,/ сопротивля́ющияся греху́,/ и огнь страсте́й попира́ющия, и пою́щия:/ благослове́н еси́, Бо́же оте́ц на́ших.

Припев: Преподо́бнии отцы́, моли́те Бо́га о нас.

Бра́тству умножа́вшуся премно́гу,/ бысть монасты́рь вели́к, сла́вен благода́тию Бо́жиею/ и строе́нием доброде́тельна му́жа Андрони́ка, воспева́вшему:/ благослове́н еси́, Бо́же оте́ц на́ших.

Припев: Преподо́бнии отцы́, моли́те Бо́га о нас.

Процве́л еси́, я́ко крин, посреде́ бра́тии, преподо́бне Андрони́че,/ прине́сл еси́ плоды́ доброде́телей,/ сего́ ра́ди да́рует ти Бог благода́ть чуде́с, пою́щему:/ благослове́н еси́, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Разуме́в е́же ко Го́споду свое́ исхожде́ние, преподо́бный Андрони́к/ вручи́ па́ству своему́ ученику́, Са́вве и́менем,/ в доброде́телех зело́ сия́ющу,/ и, наказа́в о по́льзе, ко Го́споду оты́де, поя́:/ благослове́н еси́, Бо́же оте́ц на́ших.

И ны́не и при́сно и во ве́ки веко́в. Ами́нь.

Богоро́дичен: В Го́рняя, Пречи́стая Де́во, се́рдце напра́ви,/ си́лу к мо́литве пода́й,/ ум собери́ и Сама́ в чистоте́ сохрани́.

Пе́снь 8.

Ирмос: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.

Припев: Преподо́бнии отцы́, моли́те Бо́га о нас.

Почита́ем бысть преподо́бный Са́вва/ от вели́ких князе́й и все́ми людьми́/ ра́ди вели́ких его́ доброде́телей и чу́днаго и изря́днаго жити́я.

Припев: Преподо́бнии отцы́, моли́те Бо́га о нас.

Наипа́че умно́жися ста́до доброде́тельных учени́к преподо́бнаго Са́ввы,/ муже́й вели́ких, че́стных,/ от ни́хже мно́зи произведе́ни бы́ша на игу́менства,/ о́ви же на епи́скопства.

Сла́ва Отцу́ и Сы́ну и Свято́му Ду́ху:

Не́мощь душе́вную на́шу исцели́ ны́не, преподо́бне Са́вво,/ я́коже не́когда по отше́ствии к Бо́гу свободи́л еси́ от блу́дныя стра́сти священнои́нока Ефре́ма.

И ны́не и при́сно и во ве́ки веко́в. Ами́нь.

Богородичен: Свободи́ от теле́сных страсте́й, о Влады́чице,/ в покая́ние дух приведи́,/ обрати́ помышле́ние к Не́бу и грехо́вных дел отврати́.

Песнь 9

Ирмос: Неви́димаго зра́ком Боже́ственным прие́мшая,/ Неискусобра́чная Де́во и Ма́ти,/ пе́сньми Рождество́ Твое́ велича́ем.

Припев: Преподо́бнии отцы́, моли́те Бо́га о нас.

Ста́рец Андре́й, иконопи́сец преизря́дный,/ всех превосходя́щий в прему́дрости зе́льне и седи́ны честны́ име́я,/ подписа́нием чу́дным свои́ма рука́ма/ украси́ в па́мять оте́ц свои́х це́рковь Спа́са Христа́.

Припев: Преподо́бнии отцы́, моли́те Бо́га о нас.

Не оста́вите нас си́ры, преподо́бнии Дании́ле и Андре́е,/ но моли́те Бо́га, Творца́ и Худо́жника ми́ра,/ да просла́вит ико́ны ва́ша чудесы́.

Сла́ва Отцу́ и Сы́ну и Свято́му Ду́ху:

О́тче Алекса́ндре преподо́бне,/ муж доброде́телен, мудр и изря́ден зело́ был еси́,/ по́мощь пода́й, не оста́ви посеща́ти чад твои́х моли́твами свои́ми.

И ны́не и при́сно и во ве́ки веко́в. Ами́нь.

Богородичен: Ра́дуйся, прино́сим Ти, Чи́стая,/ ра́дуйся, преподо́бных оте́ц огражде́ние кре́пкое,/ нас на моли́тву ско́ро возста́ви и в беда́х помози́.

Светилен

По́двиги и труды́ у́бо пе́рвее до́бре искуси́вшеся,/ второ́е умноже́нием тала́нта на Небеса́ возшли́ есте́, преподо́бнии отцы́,/ иде́же, све́тле осиява́еми, предстоя́ще Спа́су Христу́,/ моли́теся те́пле о пою́щих вас.

Сла́ва, и ны́не, Богоро́дичен:

Тя пе́сньми немо́лчными ублажа́ем, Де́во,/ я́ко от Тро́ицы Еди́наго родила́ еси́, Богоро́дице,/ и но́сиши на боже́ственную руку́ Пребога́тое Сло́во, непреста́нно и неизме́нно.

Моли́тва

О преподо́бнии и Богоно́снии отцы́, па́стырие и учи́телие и неле́ностнии наста́вницы на́ши! О земны́х небре́гше, в зе́млю кро́тких всели́лися есте́, из нея́же израсти́ли есте́ плоды́ доброде́телей; тле́нныя тала́нты не сокро́виществовавше, нетле́нныя тала́нты преумно́жили есте́ во сто крат и мно́жае; челове́ческия сла́вы теку́щия не иска́вше, возда́ли есте́ сла́ву Бо́гу и Спа́су всех и сего́ ра́ди прославля́етеся ны́не на Небесе́х в Це́ркви перворо́дных. Моли́те Человеколю́бца Спа́са Христа́, да просвети́т ны, помраче́нныя, покая́нием, да освяти́т ны, гре́шныя, си́лою, наи́тием и де́йствием благода́ти Свята́го Ду́ха, чрез достопокланя́емыя ико́ны подае́мою, да поми́лует ны, немощны́я, моли́твами ва́шими и предста́тельством Пренепоро́чныя Его́ Ма́тере и сподо́бит узре́ти сла́ву пречи́стаго ли́ка Своего́ во Ца́рствии Небе́снем. Ами́нь.