26 июня.
Канон преподобной Александре Дивеевской
![Канон преподобной Александре Дивеевской Канон преподобной Александре Дивеевской](img_i/087.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, глас 5:
Преподо́бная ма́ти Алекса́ндро,/ благослове́ние Цари́цы Небе́сныя испо́лнивши,/ оби́тель Диве́евскую основа́ла еси́,/ в не́йже, многотру́дное житие́ соверши́вши,/ о́браз Христо́ва смире́ния яви́ла еси́.// Те́мже помяни́ нас во Ца́рствии Небе́снем.
Кано́н, глас 8.
Песнь 1
Ирмос: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,// я́ко Еди́н сла́вно просла́вися.
Припев: Преподо́бная ма́ти Алекса́ндро, моли́ Бо́га о нас.
Преподо́бную уго́дницу и ма́терь на́шу Алекса́ндру,/ первонача́льницу оби́тели Диве́евския,/ Бо́жия Ма́тере рабу́ избра́нную,/ ны́не за ны на Небесе́х моля́щуюся,/ Го́споди, сподо́би воспе́ти разу́мно.
Припев: Преподо́бная ма́ти Алекса́ндро, моли́ Бо́га о нас.
Оби́тели Диве́евския первонача́льница яви́лася еси́, Алекса́ндро сла́вная,/ и, досто́йно послуша́ние Пресвяты́я Богоро́дицы испо́лнивши,/ Небе́сное Ца́рствие унасле́довала еси́./ Помози́ и нам доброде́тель послуша́ния стяжа́ти.
Слава: Воздержа́нием ди́вным и покая́нием сле́зным ду́шу твою́ очи́стивши/ и а́нгельскому житию́ поревнова́вши,/ храм Свята́го Ду́ха яви́лася еси́, преподо́бная Алекса́ндро.
И ныне: Пречи́стая Богоро́дице Де́во,/ па́че естества́ неизрече́нно ро́ждшая Присносу́щное и Пребоже́ственное Сло́во,/ досто́йно в пе́снех велича́ем Тя.
Песнь 3
Ирмос: Утвержде́й сло́вом Небеса́/ и зе́млю основа́вый на вода́х мно́гих,// утверди́ мя к пе́нию славосло́вия Твоего́, Го́споди.
Припев: Преподо́бная ма́ти Алекса́ндро, моли́ Бо́га о нас.
Мирска́я и тле́нная возненави́девши,/ плоть свою́ изнури́ла еси́, ма́ти Алекса́ндро,/ те́мже и, моли́тву к Бо́гу при́сно вознося́щи,/ Того́ Еди́наго возлюби́ла еси́.
Припев: Преподо́бная ма́ти Алекса́ндро, моли́ Бо́га о нас.
Просвеще́ние Ду́ха в се́рдце твое́м прие́мши, преподо́бная ма́ти,/ луча́ми доброде́телей страсте́й мглу я́ве отгна́ла еси́./ Помози́ и нам от омраче́ния страсте́й изба́витися.
Слава: Твоя́ моли́твы и труды́,/ я́ко кади́ло благово́нное, Влады́це и Богома́тери принесла́ еси́, преподо́бная,/ та́же и мно́ги хра́мы Бо́жия твои́м раче́нием и по́двиги воздви́гла еси́./ Ны́не же вознеси́ моле́ние о благостоя́нии Це́ркве Ру́сския.
И ныне: Утвержде́ние, покро́в и прибе́жище/ бу́ди с ве́рою к Тебе́ прибега́ющим, Де́во Богороди́тельнице,/ и Бо́жию Ма́терь Тя испове́дающим.
Седа́лен, глас 3.
Бога́тство тле́нное и сла́ву мимотеку́щую в млады́х ле́тех оста́вивши,/ Небе́сное бога́тство и сла́ву ве́чную восприя́ла еси́, преподо́бная Алекса́ндро./ Те́мже блажи́м свято́е твое́ преставле́ние и уми́льно вопие́м:/ помяни́ нас у Престо́ла Бо́жия, ма́ти честна́я.
Сла́ва, и ны́не, Богоро́дичен:
Я́же ра́дости прие́мшая исполне́ние,/ приими́ от нас, рабо́в Твои́х, целова́ние Арха́нгелово:/ ра́дуйся, Ра́дость ми́ру ро́ждшая,/ ра́дуйся, Ма́нно Небе́сная, Хле́бом жи́зни нас напита́вшая,/ ра́дуйся, Цари́це, в жена́х благослове́нная.
Песнь 4
Ирмос: Та́йно проро́к предзря́ от Де́вы Тя, Сло́ве, воплоща́ема,/ пе́сненно вопия́ше:// сла́ва си́ле Твое́й, Го́споди.
Припев: Преподо́бная ма́ти Алекса́ндро, моли́ Бо́га о нас.
Огне́м любве́ Бо́жия те́рние страсте́й попали́вши,/ глаго́лы ди́вныя Пресвяты́я Богоро́дицы о четве́ртом Ея́ жре́бии во вселе́нней услы́шати сподо́билася еси́./ Те́мже и оби́тель Диве́евскую воздви́гла еси́.
Припев: Преподо́бная ма́ти Алекса́ндро, моли́ Бо́га о нас.
Насажде́на в дому́ Бо́жия Ма́тере бы́вши,/ я́ко цве́ты кра́сныя, мно́гия доброде́тели израсти́ла еси́/ и, во основа́ние оби́тели ка́мень ве́ры положи́вши,/ мно́гим и́нокиням путь во оби́тели Небе́сныя указа́ла еси́.
Слава: Жезло́м доброде́тельныя твоея́ жи́зни/ мно́гия ду́ши в Ца́рствие Небе́сное упра́вила еси́, ма́ти Алекса́ндро,/ помози́ и нам доброде́тели ева́нгельския стяжа́ти/ и жи́зни блаже́нныя вку́пе со все́ми святы́ми дости́гнути.
И ныне: Ты еси́, Блага́я, ве́рным утвержде́ние,/ от лю́тых избавле́ние и просвеще́ние душ на́ших,/ и оби́тели Диве́евской стена́ и огражде́ние.
Песнь 5
Ирмос: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,// ра́зве Тебе́, ино́го не ве́мы.
Припев: Преподо́бная ма́ти Алекса́ндро, моли́ Бо́га о нас.
Те́сный путь па́че простра́ннаго предпочла́ еси́/ и, ра́дующися, мно́гия труды́ и боле́зни претерпе́ла еси́, преподо́бная Алекса́ндро./ Укре́пи и ны во обстоя́ниих жите́йских моли́твами твои́ми.
Припев: Преподо́бная ма́ти Алекса́ндро, моли́ Бо́га о нас.
В пе́ниих и поще́ниих, моли́твах же и бде́ниих пожи́вши, преподо́бная,/ Христу́ уневе́стилася еси́/ и о́браз и́ноческаго жития́/ сестра́м оби́тели Диве́евския яви́ла еси́.
Слава: Житие́ твое́ пра́ведно и преподо́бно бысть, Алекса́ндро блаже́нная,/ те́мже, сугу́баго по́двига взыску́ющи,/ вели́кую схи́му пред кончи́ною прия́ти сподо́билася еси́.
И ныне: От вся́каго прило́га проти́вна и ско́рби,/ и от враг лю́тых рабы́ Твоя́ свободи́, Всенепоро́чная,/ Тя бо держа́вное Предста́тельство стяжа́хом.
Песнь 6
Ирмос: Ри́зу мне пода́ждь све́тлу,/ одея́йся све́том, я́ко ри́зою,// Многоми́лостиве Христе́ Бо́же наш.
Припев: Преподо́бная ма́ти Алекса́ндро, моли́ Бо́га о нас.
Сла́ву ро́да твоего́ презре́вши/ и за́поведи ева́нгельския ре́вностне испо́лнивши, преподо́бная,/ Христа́ ра́ди обнища́ла еси́/ и мно́гими доброде́тельми обогати́лася еси́.
Припев: Преподо́бная ма́ти Алекса́ндро, моли́ Бо́га о нас.
Вели́каго подви́жника Саро́вскаго/ в ю́нем иеродиа́коне Серафи́ме предузре́ла еси́, Алекса́ндро му́драя,/ и попече́ние о оби́тели Диве́евской на него́ возложи́ла еси́./ Помози́те и нам, святи́и уго́дницы, насле́дники Ца́рствия Небе́снаго бы́ти.
Слава: По вся дни и но́щи Бо́гу благоугожда́ющи,/ в час кончи́ны твоея́ Святы́я Та́йны Христо́вы восприя́ла еси́./ Вознеси́, преподо́бная ма́ти, те́плыя моли́твы и о нас ко Го́споду,/ да христиа́нскую кончи́ну улучи́ти сподо́бимся.
И ныне: Пала́та Царя́ Сла́вы и Престо́л огнезра́чный была́ еси́, Де́во,/ Херуви́м превы́шши и Серафи́м сла́внейши,/ те́мже вся́кое дыха́ние сла́вит Тя,/ я́ко Ма́терь Христа́, Бо́га на́шего.
Конда́к, глас 3:
Воспои́м днесь, ве́рнии,/ преподо́бную ма́терь на́шу Алекса́ндру,/ ди́внаго уде́ла Пресвяты́я Богоро́дицы первонача́льницу,/ да ея́ моли́твами и предста́тельством Пречи́стыя Де́вы// Госпо́дь пода́ст нам грехо́в проще́ние и ве́лию ми́лость.
И́кос:
Кто дово́лен досто́йно воспе́ти труды́ и боле́зни,/ по́двиги и поще́ния твоя́, преподо́бная ма́ти Алекса́ндро?/ Оба́че благоприя́тными твои́ми к Бо́гу моли́твами/ пода́ждь нам ны́не благода́ть Свята́го Ду́ха,/ да просла́вим терпе́ние и смире́ние твоя́/ и любо́вь нелицеме́рную воспое́м,/ и́миже врага́ всезло́бнаго посрами́ла еси́./ Те́мже моли́ся ко Го́споду/ дарова́ти нам грехо́в проще́ние и ве́лию ми́лость.
Песнь 7
Ирмос: В нача́ле зе́млю основа́вый/ и Небеса́ Сло́вом утверди́вый,// благослове́н еси́ во ве́ки, Го́споди Бо́же оте́ц на́ших.
Припев: Преподо́бная ма́ти Алекса́ндро, моли́ Бо́га о нас.
Путе́м ше́ствующи, вводя́щим в Боже́ственный поко́й,/ уклони́лася еси́ се́тей де́монских, блаже́нная./ Те́мже, Боже́ственною благода́тию покрыва́ема, вопия́ла еси́:/ благослове́н еси́, Бо́же оте́ц на́ших.
Припев: Преподо́бная ма́ти Алекса́ндро, моли́ Бо́га о нас.
Повеле́ние Цари́цы Небе́сныя исполня́ющи/ и чу́дную оби́тель Ея́ созида́ющи,/ вы́ну в моли́тве пребыва́ла еси́, вопию́щи:/ благослове́н еси́, Бо́же оте́ц на́ших.
Слава: Ка́мень под главу́ твою́ полага́ющи и слез то́ки пролива́ющи,/ жесто́кое житие́ провожда́ла еси́, преподо́бная,/ и в ра́дости духо́вней воспева́ла еси́:/ благослове́н еси́, Го́споди Бо́же оте́ц на́ших.
И ныне: Вся светоно́сна еси́, Де́во, Свет незаходи́мый прие́мши,/ и просвеща́еши, Чи́стая, ве́рою Тебе́ вопию́щих:/ благослове́н, Пречи́стая, Плод чре́ва Твоего́.
Песнь 8
Ирмос: Безнача́льнаго Царя́ сла́вы,/ Его́же трепе́щут Небе́сныя си́лы,/ по́йте, свяще́нницы,// лю́дие, превозноси́те во вся ве́ки.
Припев: Преподо́бная ма́ти Алекса́ндро, моли́ Бо́га о нас.
Му́ченице цари́це Алекса́ндре поревнова́ла еси́, богому́драя,/ и жизнь твою́ в ру́це Бо́жии предала́ еси́,/ то́чию Еди́наго Христа́ ве́дущи и Сего́ ра́спята,/ пою́щи Его́ во вся ве́ки.
Припев: Преподо́бная ма́ти Алекса́ндро, моли́ Бо́га о нас.
Дар моли́твы чи́стыя, смире́ние и любо́вь соверше́нную име́ла еси́, богоблаже́нная./ Моли́ся и нам в доброде́тели сия́ облещи́ся/ и Го́спода воспева́ти во вся ве́ки.
Слава: За́поведем Христо́вым поревнова́вши,/ ни́щия, си́рыя и младе́нцы николи́же в беде́ оставля́ла еси́, досточу́дная,/ те́мже всели́лася еси́ во оби́тели Небе́сныя,/ иде́же с ли́ки жен честны́х Го́спода прославля́еши во вся ве́ки.
И ныне: Все упова́ние мое́ на Тя возложи́х, Влады́чице,/ не и́мам бо ины́я по́мощи ра́зве Тебе́./ Те́мже пода́ждь ми бога́тую Твою́ ми́лость.
Песнь 9
Ирмос: Неви́димаго зра́ком Боже́ственным прие́мшая,/ Неискусобра́чная Де́во и Ма́ти,// пе́сньми Рождество́ Твое́ велича́ем.
Припев: Преподо́бная ма́ти Алекса́ндро, моли́ Бо́га о нас.
Я́ко ве́лию в жена́х и избра́нницу Ма́тере Бо́жия,/ откры́ тя Бог преподо́бному Серафи́му,/ и́же и яви́ сугу́бое попече́ние о оби́тели Диве́евской./ Те́мже ку́пно с ним моли́ся о ча́дех твои́х, блаже́нная.
Припев: Преподо́бная ма́ти Алекса́ндро, моли́ Бо́га о нас.
Пред кончи́ною твое́ю, ма́ти преподо́бная,/ о́браз Каза́нския ико́ны Пресвяты́я Богоро́дицы на пе́рси твоя́ возложи́ла еси́/ и та́ко с ми́ром ду́шу твою́ Бо́гу предала́ еси́.
Слава: Моли́ ми́лостиваго Бо́га, преподо́бная ма́ти на́ша Алекса́ндро,/ я́ко дерзнове́ние к Нему́ иму́щая,/ да и мы с тобо́ю сподо́бимся сла́вити Его́ во Ца́рствии Небе́снем.
И ныне: Спаси́, Пречи́стая Влады́чице, к Тебе́ прибега́ющия от беды́ и напа́стей,/ от греха́ и бу́ри страсте́й плотски́х,/ от волне́ний и обстоя́ний жите́йских,/ и бу́дущаго осужде́ния.
Свети́лен:
Егда́ у́бо честны́я мо́щи твоя́, преподо́бная ма́ти Алекса́ндро, обрето́шася,/ тогда́ благоуха́ние из гро́ба твоего́ изы́де и благода́ть ве́лия яви́ся,/ неду́ги исцеля́ющи и ду́хи лука́выя отгоня́ющи.
Сла́ва, и ны́не, Богоро́дичен:
Сла́во вселе́нныя, Пресла́вная Де́во,/ Бо́га Пресла́внаго сла́вно ро́ждшая,/ сла́вы сподо́би Боже́ственныя,/ я́ко Богоро́дицу при́сно Тя сла́вящия.
Моли́тва
О свята́я уго́днице Бо́жия, преподо́бная ма́ти Алекса́ндро! Приими́ недосто́йныя моли́твы на́ша, с ве́рою и любо́вию к тебе́ возноси́мыя, и помози́ нам христиа́нския доброде́тели стяжа́ти, ве́ру кре́пкую и любо́вь к Бо́гу и бли́жним име́ти, крест скорбе́й и боле́зней с терпе́нием носи́ти. О блаже́нная ма́ти на́ша! Мно́гими труды́ и по́двиги благода́ть у Бо́га обре́тши, помяни́ нас во Ца́рствии Небе́снем, помоли́ся за нас, да твои́ми моли́твами спаса́еми в ны́нешнем ве́це, и в бу́дущем удосто́имся хвали́ти и воспева́ти всесвято́е и́мя Отца́, и Сы́на, и Свята́го Ду́ха, во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Канон преподобной Александре Дивеевской Канон преподобной Александре Дивеевской](img_b/087.jpg)