26 июня.

Канон Святой мученице Акилине Старшей.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Агница Твоя́, Иису́се, Акили́на, зове́т ве́лиим гла́сом: Тебе́, Женише́ мо́й, люблю́, и Тебе́ и́щущи, страда́льчествую, и сраспина́юся, и спогреба́юся креще́нию Твоему́, и стражду́ Тебе́ ра́ди, я́ко да ца́рствую в Тебе́, и умира́ю за Тя́, да и живу́ с Тобо́ю; но, я́ко же́ртву непоро́чную, приими́ мя, с любо́вию поже́ршуюся Тебе́. Тоя́ моли́твами, я́ко Ми́лостив, спаси́ ду́ши на́ша.

Кано́н. Гла́с 8.

Пе́снь 1.

Ирмос: Посе́ченый несеко́маго пресече́, и ви́де со́лнце зе́млю, ю́же не ви́де, лю́таго врага́ вода́ потопи́, и непроходи́мое про́йде Изра́иль, пе́снь же вспева́шеся: Го́сподеви пои́м, сла́вно бо просла́вися.

Припев: Святая му́ченице Акили́но, моли́ Бо́га о нас.

Препросла́влена, Христу́, Жениху́ твоему́, на небесе́х вои́стинну, ра́дующися, предстои́ши. Те́мже тя́ на земли́ благоче́стно сла́вящия моли́твами твои́ми воспросла́ви, честна́я, и себе́ прича́стники сотвори́, Го́сподеви пою́щия: сла́вно бо просла́вися.

Припев: Святая му́ченице Акили́но, моли́ Бо́га о нас.

В тя́ все́льшися, благода́ть Ду́ха твою́ ду́шу чи́сту, сла́вная, соверши́, и ра́нами те́ла красне́йши была́ еси́. Те́мже тя́ Жени́х ду́ш, чи́сту до конца́ нетле́нну су́щу, Себе́ обручи́, прехва́льная.

Сла́ва Отцу́ и Сы́ну и Свято́му Ду́ху:

Зиме́ ле́стней, земны́я концы́ испо́лншей дре́вле лю́те, испо́лнена су́щи Ду́ха, я́ко му́ченица неле́стная Го́спода Вседержи́теля, дости́гла еси́ ве́сну жи́зненную и побе́ду взяла́ еси́ победи́тельную, Акили́но сла́вная, богому́драя, досточу́дная.

И ны́не и при́сно и во ве́ки веко́в. Ами́нь.

Богородичен: Иже Безнача́льному Отцу́ ссу́щный вни́де во утро́бу Твою́, Челове́к бы́в, и спасе́ ны, зло́бою прекло́ншияся и ле́стию врага́ порабоще́нныя, Мари́е Богоневе́сто. Сего́ ра́ди ве́рою Тя́ и любо́вию ублажа́ем.

Пе́снь 3.

Ирмос: Ты́ еси́ утвержде́ние притека́ющих к Тебе́, Го́споди, Ты́ еси́ све́т омраче́нных, и пое́т Тя́ ду́х мо́й.

Припев: Святая му́ченице Акили́но, моли́ Бо́га о нас.

Истка́ла еси́ ри́зу све́та благода́тию, сла́вная, кро́вию твое́ю, Акили́но му́ченице, свяще́нно обагри́вши.

Припев: Святая му́ченице Акили́но, моли́ Бо́га о нас.

Уязви́лася еси́ любо́вию боже́ственною я́ве, всечестна́я, те́мже тве́рдо я́звы же и боле́зни лю́тыя претерпе́ла еси́.

Сла́ва Отцу́ и Сы́ну и Свято́му Ду́ху:

Всю́ тя́ освяти́ Изба́витель, честна́я, Госпо́дь, все́ю кре́постию Сего́, Акили́но, от души́ возлюби́вшу.

И ны́не и при́сно и во ве́ки веко́в. Ами́нь.

Богородичен: Неве́сту Тя́ безневе́стну и чи́сто, Чи́стая, селе́ние Иису́сово, святе́йшу херуви́м ве́мы.

Седа́лен святы́я, гла́с 8.

Доброде́телей осия́вшися Боже́ственным све́том, страда́льческим украси́лася еси́, пресла́вная, честна́я, венце́м и, красна́ добро́тами бы́вши, ве́рою все́х Влады́це уневе́стилася еси́ вои́стинну, нескве́рная, нетле́нная. Те́мже небе́сным сподо́билася еси́ черто́гом, до́бре пострада́вши и льсти́ваго победи́вши, Акили́но богому́драя, моли́ Христа́ Бо́га согреше́ний оставле́ние дарова́ти чту́щим любо́вию святу́ю па́мять твою́.

КрестоБогородичен:

Нескве́рная Агница Сло́ва, нетле́нная Де́ва Ма́ти, на Кресте́ зря́щи пове́шена из Нея́ без боле́зни прозя́бшаго, ма́терски подо́бно рыда́ющи, вопия́ше: увы́ Мне́, Ча́до Мое́, ка́ко стра́ждеши во́лею, хотя́ изба́вити от страсте́й безче́стия челове́ка?

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Святая му́ченице Акили́но, моли́ Бо́га о нас.

Го́рдаго зми́я ты́ не́мощию те́ла низложи́ла еси́, воева́вши све́тло и томи́телей на́глость потреби́вши.

Припев: Святая му́ченице Акили́но, моли́ Бо́га о нас.

Муче́ния све́тлостию и де́вства боже́ственными добро́тами, Акили́но, была́ еси́ Влады́це неве́ста изря́дная.

Сла́ва Отцу́ и Сы́ну и Свято́му Ду́ху:

Тече́ния крове́й твои́х многобо́жия о́гнь погаси́ша, чуде́с же струи́ челове́ков омыва́ют неду́ги.

И ны́не и при́сно и во ве́ки веко́в. Ами́нь.

Богородичен: Дрема́нием уны́ния мя́ со́н грехо́вный, Отрокови́це, пости́же, бо́дренною моли́твою Твое́ю возста́ви мя́ к покая́нию.

Пе́снь 5

Ирмос: От но́щи неве́дения богове́дением просвети́вый концы́, просвети́ мя у́тром человеколю́бия Твоего́, Го́споди.

Припев: Святая му́ченице Акили́но, моли́ Бо́га о нас.

Волну́емей, я́коже свире́пеющуся мо́рю, ле́сти иногда́, яви́лася еси́ окормля́ема, Акили́но му́ченице, Христо́вою благода́тию.

Припев: Святая му́ченице Акили́но, моли́ Бо́га о нас.

Смотря́ющи, му́ченице, к венце́м, подъя́ла еси́ тве́рдо растерза́ния удо́в твои́х и ну́ждную сме́рть.

Сла́ва Отцу́ и Сы́ну и Свято́му Ду́ху:

Светоявле́нно украси́лася еси́, сопоста́ты са́мыя уди́вльши, кра́сною твое́ю добро́тою и душе́вным воста́нием.

И ны́не и при́сно и во ве́ки веко́в. Ами́нь.

Богородичен: Изба́вленнии вси́ прароди́тельнаго осужде́ния Рождество́м Твои́м, — ра́дуйся, — Тебе́ приглаша́ем, Обра́дованная Препе́тая.

Пе́снь 6.

Ирмос: Ио́ну в ки́те, Го́споди, еди́наго всели́л еси́, мене́ же, свя́заннаго мре́жами вра́жиими, я́ко от тли́ о́наго, спаси́.

Припев: Святая му́ченице Акили́но, моли́ Бо́га о нас.

После́довати Христо́вым сла́вным вожделе́ла еси́ страда́нием, де́во, и мужему́дренно претерпе́ла еси́ бие́ния и расторга́ния свята́го твоего́ телесе́.

Припев: Святая му́ченице Акили́но, моли́ Бо́га о нас.

Многови́дныя боле́зни претерпе́ла еси́, огня́ же небрегла́ еси́ боле́зни. Те́мже, Акили́но, и боле́зни на́ша вся́ облегча́еши моли́твами твои́ми.

Сла́ва Отцу́ и Сы́ну и Свято́му Ду́ху:

Смотря́я свы́ше, чудя́шеся ли́к Ангельский, сла́вная де́во, терпе́нию твоему́, ка́ко безпло́тныя враги́ с пло́тию побежда́ла еси́ благода́тию.

И ны́не и при́сно и во ве́ки веко́в. Ами́нь.

Богородичен: Да бо́г челове́к бу́дет, Бо́г ви́ден бы́сть Челове́к, Де́во, из Твои́х ложе́сн несказа́нно ро́ждся, и е́же бе́, пребы́в неизме́нен.

Конда́к, гла́с 2.

Де́вства твоего́ добро́тами предочи́стивши ду́шу твою́, на высоту́ муче́нием востекла́ еси́, Акили́но всечестна́я, любо́вию Жениха́ твоего́ Христа́ уязви́вшися, Ему́же со Ангелы предстои́ши, веселя́щися, с ни́миже не преста́й моля́ся о все́х на́с.

Пе́снь 7.

Ирмос: Отроцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Припев: Святая му́ченице Акили́но, моли́ Бо́га о нас.

Телеси́ стра́ждущу, богому́драя, неради́ла еси́, смотря́ющи су́щая та́мо воздая́ния, и све́т, и сла́ву, Акили́но, и Бо́жию красоту́, и Боже́ственное весе́лие.

Припев: Святая му́ченице Акили́но, моли́ Бо́га о нас.

Нескве́рно нося́щи те́ло, и се́рдце Го́сподеви соедине́но, пред суди́щем, чи́стая, мучи́телей предста́ла еси́, неразуме́юща мучи́теля облича́ющи, богому́драя.

Сла́ва Отцу́ и Сы́ну и Свято́му Ду́ху:

Ми́ра измени́ла еси́ тле́ннаго преми́рныя ра́ди жи́зни нетле́нныя, и вре́менныя пи́щи пребыва́ющею, де́во, и теле́сным обру́чником безсме́ртнаго Жениха́.

И ны́не и при́сно и во ве́ки веко́в. Ами́нь.

Тро́ичен: Пе́сньми Боже́ственное Единонача́лие, Тричи́сленное у́бо Ли́цы пресла́вно, естество́м же про́сто су́ще, почита́ем, вопию́ще: Го́споди Бо́же, благослове́н еси́ во ве́ки.

Пе́снь 8.

Ирмос: Богоглаго́ливии о́троцы в пещи́, со огне́м пла́мень попира́юще, поя́ху: благослови́те, дела́ Госпо́дня, Го́спода.

Припев: Святая му́ченице Акили́но, моли́ Бо́га о нас.

Просвеще́на сия́нием чистоты́ и обагре́нии кро́вными испещре́нна, предстои́ши, Акили́но деви́це, Христу́ Бо́гу на́шему.

Припев: Святая му́ченице Акили́но, моли́ Бо́га о нас.

Чиста́ же́ртва принесла́ся еси́, и приноше́ние пресве́тло, и я́ко благово́нный фимиа́м, Акили́но богому́драя, Христу́ Бо́гу на́шему.

Сла́ва Отцу́ и Сы́ну и Свято́му Ду́ху:

Неду́ги разли́чныя челове́ком цели́т и отгоня́ет де́монский вре́д свято́е те́ло твое́, Акили́но, во гро́бе, пресла́вная, лежа́щее.

И ны́не и при́сно и во ве́ки веко́в. Ами́нь.

Богородичен: Нетле́нное Сло́во, па́че сло́ва тле́ния на́с вся́каго избавля́юща, родила́ еси́, сего́ ра́ди Тя́ вси́, Де́во, сла́вим.

Песнь 9

Ирмос: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Припев: Святая му́ченице Акили́но, моли́ Бо́га о нас.

На Кресте́ пригво́ждшемуся Спа́су де́ва сраспя́тся нра́вом пра́вым, и зми́еву главу́ попра́вши.

Припев: Святая му́ченице Акили́но, моли́ Бо́га о нас.

Красна́ добро́та твоя́ и вели́ко твоея́ души́ благоро́дие, пребога́тая, богови́дно, Акили́но, ны́не явле́нно бы́сть.

Припев: Святая му́ченице Акили́но, моли́ Бо́га о нас.

Совоку́пльшися с ли́ки безпло́тных и с му́ченическими собо́ры, прехва́льная, о на́с все́х Бо́га моли́.

Сла́ва Отцу́ и Сы́ну и Свято́му Ду́ху:

Пресла́вная твоя́ па́мять все́х созыва́ет ра́достно, Акили́но, пе́ти твоя́ сла́вныя, му́ченице, боле́зни и страда́ния.

И ны́не и при́сно и во ве́ки веко́в. Ами́нь.

Богородичен: Гла́с Тебе́ Ангелов, Пречи́стая, вопие́м: ра́дуйся, спасе́ние все́х челове́ков и сла́вных му́ченик боже́ственное венча́ние.

Молитва

О свята́я му́ченице Акили́но. По́двигом до́брым подвиза́вшися на земли́, восприя́ла еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́щи Престо́лу Бо́жию, приими́ моле́ния на́ша и ко всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.