25 июня.
Канон преподобному Петру Афонскому.
![Преподобному Онуфрию и преподобному Петру Афонскому Преподобному Онуфрию и преподобному Петру Афонскому](img_i/068.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 4:
Бо́же оте́ц на́ших, творя́й при́сно с на́ми по Твое́й кро́тости, не отста́ви ми́лость Твою́ от на́с, но моли́твами и́х в ми́ре упра́ви живо́т на́ш.
Кано́н преподо́бнаго Петра́. Творе́ние Ио́сифово, гла́с 2.
Пе́снь 1.
Ирмос: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты Еги́петския, я́ко просла́вися.
Припев: Преподо́бне о́тче Пе́тре, моли́ Бо́га о нас.
Друга́го тя́ на́м Петра́ предлага́ет Це́рковь дне́сь, просвеща́юща на́ша мы́сли па́мятию твое́ю боже́ственною, о́тче пребога́те.
Припев: Преподо́бне о́тче Пе́тре, моли́ Бо́га о нас.
Ка́ла страсте́й очи́щ о́чи у́мныя, преподо́бне, я́сно ви́дел еси́ безме́рную добро́ту Христа́ Царя́, тя́ просла́вльшаго.
Сла́ва Отцу́ и Сы́ну и Свято́му Ду́ху:
Просия́в тебе́, Трисо́лнечнаго Божества́, преблаже́нне, невече́рний све́т, соде́ла тя́ чи́сто прия́телище боже́ственных дарова́ний, о́тче богому́дре.
И ны́не и при́сно и во ве́ки веко́в. Ами́нь.
Богородичен: Иже на́с ра́ди из Тебе́, Де́во, в челове́ка премно́гою бла́гостию обо́лкся, преподо́бных собо́ры Того́ возлю́бльших препросла́влен е́сть.
Пе́снь 3.
Ирмос: Утверди́ на́с в Тебе́, Го́споди, дре́вом умерщвле́й гре́х, и стра́х Тво́й всади́ в сердца́ на́с, пою́щих Тя́.
Припев: Преподо́бне о́тче Пе́тре, моли́ Бо́га о нас.
Умертви́в я́же на земли́ у́ды, преподо́бне, поуче́нии оживи́л еси́ ду́шу боже́ственными и получи́л еси́ ве́чную жи́знь и све́тлость.
Припев: Преподо́бне о́тче Пе́тре, моли́ Бо́га о нас.
Совокупи́лся еси́, я́ко до́бре пожи́в, с вы́шними, преблаже́нне, ликостоя́нии, в безмо́лвии пребыва́я и на добро́ту боже́ственную взира́я.
Сла́ва Отцу́ и Сы́ну и Свято́му Ду́ху:
В гора́х я́ве скрыва́емь, челове́к совокупле́ния удали́лся еси́ и у́м ве́сь впери́л еси́ к небе́сней добро́те, веселя́ся.
И ны́не и при́сно и во ве́ки веко́в. Ами́нь.
Богородичен: Пала́ту красну́ неизрече́ннаго бога́тства, Де́во, зна́юще, по до́лгу Тя́ сла́вим, спа́сшиися Рождество́м Твои́м, Всенепоро́чная.
Седа́лен, гла́с 1.
Погре́бл еси́ страсте́й всевоста́ние умерщвле́нием пло́ти, свяще́нный о́тче, и жи́знь безконе́чную по сме́рти прия́л еси́. Те́мже дне́сь Христо́ва Це́рковь пра́зднует твою́ досточу́дную па́мять, преподо́бных украше́ние.
Пе́снь 4.
Ирмос: Прише́л еси́ от Де́вы не хода́тай, ни Ангел, но Са́м Го́споди вопло́щся, и спа́сл еси́ всего́ мя челове́ка; те́м зову́ ти́: сла́ва си́ле Твое́й, Го́споди.
Припев: Преподо́бне о́тче Пе́тре, моли́ Бо́га о нас.
В гора́х и пеще́рах, му́дре, быва́я, боже́ственное восхожде́ние в се́рдцы поло́жь, вся́ изсуши́л еси́ страсте́й то́ки Боже́ственною благода́тию.
Припев: Преподо́бне о́тче Пе́тре, моли́ Бо́га о нас.
Стреля́ния де́монов, и стре́л, и ловле́ния до конца́ отбе́гл еси́, щито́м ве́ры, преподо́бне, покрыва́емь.
Сла́ва Отцу́ и Сы́ну и Свято́му Ду́ху:
Пове́ржена при ногу́ твое́ю льсти́ваго зми́я и сме́х ви́дяще, су́рово свире́пеющагося, Пе́тре всесла́вне, вели́чие Го́сподеви возсыла́ем.
И ны́не и при́сно и во ве́ки веко́в. Ами́нь.
Богородичен: Госпо́дь, из Тебе́ роди́вся, Госпоже́ Всенепоро́чная, облада́юща врага́ ми́ром изба́ви вся́, преподо́бныя же, я́ко возлю́бльшия Сего́, возвели́чи.
Пе́снь 5
Ирмос: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем.
Припев: Преподо́бне о́тче Пе́тре, моли́ Бо́га о нас.
На го́ры честны́х за́поведей восте́к, я́коже Моисе́й, преподо́бне, ви́дел еси́ Бо́га я́ве, я́коже вмеща́л еси́, и, все́ми просве́щся душе́вными чу́вствы, вельми́ просла́вился еси́.
Припев: Преподо́бне о́тче Пе́тре, моли́ Бо́га о нас.
Манове́нии боже́ственными при́сно удобря́емь, му́дре, пребы́л еси́ стра́сти вся́кия неприча́стен, Пе́тре, и безстра́стием, я́ко оде́ждею, обле́клся еси́, преподо́бне.
Сла́ва Отцу́ и Сы́ну и Свято́му Ду́ху:
Ле́ты мно́гими сокрыва́емо те́ло твое́ в просвеще́ние на́ше яви́ся, источа́я ре́ки на́м исцеле́ний и мѵ́ро благода́ти.
И ны́не и при́сно и во ве́ки веко́в. Ами́нь.
Богородичен: Свяще́нными гла́сы Тя́, добро́ту Иа́ковлю, пое́м, пло́тски ро́ждшую ми́рови Све́т, Иже от Све́та, просвеща́ющь преподо́бных собо́р.
Пе́снь 6.
Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.
Припев: Преподо́бне о́тче Пе́тре, моли́ Бо́га о нас.
Утве́рждься кре́постию Ду́ха, всю́ вра́жию кре́пость смири́л еси́ и, победи́тель бы́в, ко Христу́ венцено́сец восте́кл еси́.
Припев: Преподо́бне о́тче Пе́тре, моли́ Бо́га о нас.
Стопа́м после́дуя бы́л еси́, преподо́бне, Петру́ верхо́вному, ка́меню ве́ры, его́же и зва́ние име́л еси́ и ве́рою бога́тно обогати́лся еси́.
Сла́ва Отцу́ и Сы́ну и Свято́му Ду́ху:
По́двигом боже́ственным подвиза́лся еси́, о́тче, и ве́ру подо́бно соблю́л еси́, про́чее тебе́ предлежи́т до́браго де́лания вене́ц.
И ны́не и при́сно и во ве́ки веко́в. Ами́нь.
Богородичен: Во утро́бу Твою́ всели́ся, и все́ челове́ческое существо́ обожи́, и преподо́бных, Чи́стая, мно́жество свяще́нно привлече́.
Конда́к преподо́бнаго Петра́, гла́с 2.
Удали́в себе́ челове́ческаго сожи́тельства, в пеще́рах ка́менных и разсе́линах пожи́л еси́, жела́нием боже́ственным и любо́вию, Пе́тре, Го́спода твоего́, от Него́же вене́ц прия́л еси́. Моли́ непреста́нно спасти́ся на́м.
Икос:
Мирски́х мо́лв избе́г и бу́ри жите́йския, я́ко бе́гательны и уко́рны, непроходи́мая места́ дости́гл еси́ и осо́бь, я́коже пти́ца, еди́н ле́та мно́га пожи́л еси́, в пеще́рах и про́пастех, и разсе́линах кры́яся, ко Го́споду взира́я и Того́ исполня́я повеле́ния; от Него́же прия́т благода́ть, преподо́бне, я́ко со́лнце, о́тче, возсия́л еси́, моля́ непреста́нно о все́х на́с.
Пе́снь 7.
Ирмос: Те́лу злато́му прему́дрыя де́ти не послужи́ша, и в пла́мень са́ми поидо́ша, и бо́ги и́х обруга́ша, среди́ пла́мене возопи́ша и ороси́ я́ Ангел: услы́шася уже́ у́ст ва́ших моли́тва.
Припев: Преподо́бне о́тче Пе́тре, моли́ Бо́га о нас.
Тве́рдым по́мыслом на ра́мо кре́ст взе́м, Распе́ншемуся после́довал еси́, я́ко мона́х освяще́н, опаля́я, я́ко хвра́стие, стра́сти и вопия́, преблаже́нне: благослове́н еси́, Го́споди, Бо́же оте́ц на́ших.
Припев: Преподо́бне о́тче Пе́тре, моли́ Бо́га о нас.
Тя́, ле́ты мно́гими сокрове́на, я́ко сокро́вище, явля́ет та́йно Боже́ственное Сло́во, Пе́тре преподо́бне, в явле́нно снабде́ние все́м, вта́йне стяжа́вшим грехо́вныя скве́рны, явле́нна тя́ моли́твенника, ка́ющимся я́сно.
Сла́ва Отцу́ и Сы́ну и Свято́му Ду́ху:
Благово́нно Христу́ обе́том доброде́телей яви́ся кажде́ние, мѵ́ро излива́емо благово́нно от честны́х моще́й твои́х все́м зря́щим во удивле́ние излива́я: с пло́тию бо Ангельское житие́ пожи́л еси́.
И ны́не и при́сно и во ве́ки веко́в. Ами́нь.
Богородичен: Красну́ обре́т и добру́ в жена́х Тя́, Пресвята́я, прекра́сное Сло́во всели́ся в пресвято́е чре́во Твое́, вся́ ли́ки преподо́бных осве́щь, зову́щия: благослове́н еси́, Го́споди, Бо́же оте́ц на́ших.
Пе́снь 8.
Ирмос: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки.
Припев: Преподо́бне о́тче Пе́тре, моли́ Бо́га о нас.
Блаже́нства боже́ственнаго сподо́бился еси́ вои́стинну, Пе́тре богому́дре, во́лею обнища́в и всегда́, му́дре, пла́кав, и, кро́ток бы́в, насле́дил еси́ зе́млю кро́тких.
Припев: Преподо́бне о́тче Пе́тре, моли́ Бо́га о нас.
Бо́др име́я по́мысл, успи́л еси́ страсте́й воста́ния и, усну́в, со́н до́лжный ны́не пра́ведным, все́м, пребога́те, неусыпа́ющь яви́лся еси́, тя́ чту́щим моли́твенник.
Припев: Преподо́бне о́тче Пе́тре, моли́ Бо́га о нас.
Зимо́ю и ва́ром, му́дре, победи́в зи́му де́монскую, духо́вною теплото́ю потребля́еши я́ве и стра́сти умерщвля́еши теле́сныя, безстра́стия облиста́я сия́нием.
Сла́ва Отцу́ и Сы́ну и Свято́му Ду́ху:
В горе́ Афо́нстей всели́лся еси́, я́коже на Карми́льстей иногда́, Пе́тре богому́дре, Фесви́тянин Илия́, в безмо́лвии Бо́га усе́рдно ища́й, досточу́дне, и Сего́ зре́ния, я́ко преподо́бен, сподо́бился еси́.
И ны́не и при́сно и во ве́ки веко́в. Ами́нь.
Богородичен: Уны́л име́я по́мысл и ду́шу, сластьми́ отягче́ну, к Тебе́ прибега́я, Богороди́тельнице Чи́стая, вопию́ Ти: воздви́гни и спаси́ мя, отча́яннаго и осужде́ннаго.
Песнь 9
Ирмос: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем.
Припев: Преподо́бне о́тче Пе́тре, моли́ Бо́га о нас.
Кре́постию и держа́вою Христо́с Бо́г тя́ препоя́сав, укрепи́ победи́ти хи́трости де́монския, пребога́те, я́ко возлю́бльша Сего́ от всего́ се́рдца и души́. Сего́ ра́ди тя́ ве́рою ублажа́ем и любо́вию.
Припев: Преподо́бне о́тче Пе́тре, моли́ Бо́га о нас.
Яви́лся еси́ в дому́ Госпо́дни, я́ко ма́слина, богому́дре, еле́ем по́тов твои́х на́ша умаща́я ли́ца, творя́щих тво́й се́й сла́вный и боже́ственный пра́здник, мона́хов украше́ние, преподо́бных верхо́вник.
Припев: Преподо́бне о́тче Пе́тре, моли́ Бо́га о нас.
Твое́ пресла́вное, источи́вшее, всесла́вный Пе́тре, те́ло благово́нно и красно́ мѵ́ро, ве́рныя благово́ния испо́лни, благово́ние бо Бо́гу и жи́в, и по кончи́не я́ве показа́лся еси́. Те́мже тя́ досто́йно ублажа́ем.
Сла́ва Отцу́ и Сы́ну и Свято́му Ду́ху:
Освяще́нный Го́споду Бо́гу на́шему сосу́де, му́чеником, и апо́столом, и Ангелом собесе́дниче, о все́х моли́, ве́рою тя́ чту́щих на земли́, да обря́щем вси́ согреше́ний оставле́ние.
И ны́не и при́сно и во ве́ки веко́в. Ами́нь.
Богородичен: Пощади́ мя, Го́споди, пощади́, егда́ хо́щеши ми́ суди́ти, и не осуди́ мене́ во о́гнь, ниже́ я́ростию обличи́ши мене́, мо́лит Тя́ Де́ва, Тебе́ ро́ждшая, Христе́, и Ангельстии собо́ри, и преподо́бных совокупле́ния.
Свети́лен.
Петру́ тезоимени́таго верхо́вному вси́, по́стников похвалу́ и преподо́бных сла́ву, столпа́ небе́снаго, цве́та афо́нскаго велегла́сно пе́сньми почти́м по до́лгу, я́ко моли́твенника на́м все́м.
Молитва
О свяще́нная главо́, преподо́бне о́тче, преблаже́нне а́вво о́тче Пе́тре, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Преподобному Онуфрию и преподобному Петру Афонскому Преподобному Онуфрию и преподобному Петру Афонскому](img_b/068.jpg)