25 июня.

Канон преподобному Онуфрию Великому, пустынножителю.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 1:

Жела́нием духо́вным пусты́ни дости́гл еси́, богому́дре Ону́фрие, и, я́ко безпло́тен, в не́й многоле́тне подвиза́лся еси́ трудолю́бне, соревну́я проро́ком Илии́ и Крести́телю, и, от руку́ Ангельску Та́ин Боже́ственных наслади́вся, ны́не во све́те Святы́я Тро́ицы ку́пно с ни́ми весели́шися, моли́ спасти́ся на́м, твою́ па́мять почита́ющим.

Кано́н, гла́с 4.

Пе́снь 1.

Ирмос: Колесни́цы фарао́новы и си́лу его́ вве́рже в мо́ре Кре́пкий во бра́нех; воспое́м пе́снь но́вую, я́ко просла́вися.

Припев: Преподо́бне о́тче Ону́фрие, моли́ Бо́га о нас.

Зари́ трисве́тлыя осия́емь све́том, мра́ка мя́ исхи́ти смертоно́снаго согреше́ний твои́ми, о́тче, моли́твами, Ону́фрие, я́ко да пою́ па́мять твою́.

Припев: Преподо́бне о́тче Ону́фрие, моли́ Бо́га о нас.

Ми́ра отве́ргся, прилепи́лся еси́ Христу́, пло́ть покори́л еси́ по́мыслу и прия́телище яви́лся еси́ Свята́го Ду́ха, о́тче [богому́дре] Ону́фрие.

Сла́ва Отцу́ и Сы́ну и Свято́му Ду́ху:

Столпо́м боже́ственнаго све́та наставля́емь, Еги́пет оста́вил еси́ стра́стный, и к высоте́ дости́гл еси́ безстра́стия, и Бо́гу бесе́довал еси́.

И ны́не и при́сно и во ве́ки веко́в. Ами́нь.

Богородичен: Родила́ еси́ пре́жде Тебе́ ро́ждшагося из Отца́, пребыла́ же еси́ нетле́нна, и по рождестве́ Де́ва: те́мже Богоро́дицу Тя́ и́стинную испове́дуем, Препе́тая.

Пе́снь 3.

Ирмос: Утвержда́яй гро́м и созида́яй ду́х, утверди́ мене́, Го́споди, да Тя́ пою́ и́стинно и творю́ во́лю Твою́: я́ко не́сть свя́т, я́ко Ты́, Бо́же на́ш.

Припев: Преподо́бне о́тче Ону́фрие, моли́ Бо́га о нас.

Ангельскому после́дуя зре́нию, пусты́ню дости́гл еси́ и, воздержа́нием плотски́я сла́сти увяди́в, Ангельски пожи́л еси́ в то́й, блаже́нне.

Припев: Преподо́бне о́тче Ону́фрие, моли́ Бо́га о нас.

Насажде́нно дре́во при исхо́дищах яви́вся воздержа́ния во́д, во бла́го, о́тче, вре́мя благопло́дие доброде́телей я́ко вои́стинну по́дал еси́, Ону́фрие, дея́нием.

Сла́ва Отцу́ и Сы́ну и Свято́му Ду́ху:

Всесве́тлая звезда́ вселе́нней от пусты́ни возсия́л еси́, уясни́л еси́ ве́рных, заря́ми по́двигов, благочести́вых собо́ры, о́тче на́ш Ону́фрие преподо́бне.

И ны́не и при́сно и во ве́ки веко́в. Ами́нь.

Богородичен: Пра́отец разори́ла еси́ печа́ль, ра́дость на́м ро́ждши, Жизнода́вца и Изба́вителя, Пресвята́я Богоро́дице, Его́же приле́жно моли́ спасти́ ста́до Твое́.

Седа́лен, гла́с 4.

Удали́лся еси́, преподо́бне, и в пусты́нях я́ве водвори́лся еси́, Го́спода, изба́вльшаго тя́ от лю́т, при́сно ожида́я. Те́мже, благоугоди́в Влады́це, всеблаже́нне, прия́л еси́ нестаре́ющееся небе́сное Ца́рство, в не́мже ны́не водворя́яся, помина́й чту́щия тя́.

Сла́ва, и ны́не, Богородичен:

Наста́ви на́с на пу́ть покая́ния, укло́ншияся при́сно к безпу́тием зо́л и Преблага́го прогне́вавшия Го́спода, Неискусобра́чная благослове́нная Мари́е, прибе́жище отча́янных челове́ков, Бо́жие жили́ще.

Пе́снь 4.

Ирмос: Услы́шах, Бо́же, слу́х Тво́й и убоя́хся, разуме́х дела́ Твоя́ и ужасо́хся, Го́споди, я́ко Твоего́ хвале́ния испо́лнь земля́.

Припев: Преподо́бне о́тче Ону́фрие, моли́ Бо́га о нас.

Совле́кл еси́ тле́нную греха́ ри́зу, о́тче, пра́вды, Ону́фрие, во оде́жду обле́клся еси́ и вну́трь черто́га всели́лся еси́.

Припев: Преподо́бне о́тче Ону́фрие, моли́ Бо́га о нас.

Моли́твами непреста́нными све́т боже́ственнаго ра́зума собра́л еси́ в се́рдце твое́м, о́тче на́ш, неразу́мия же отбе́гл еси́ мра́чныя ле́сти, Ону́фрие.

Сла́ва Отцу́ и Сы́ну и Свято́му Ду́ху:

Те́сный ше́ствовав пу́ть и приско́рбный на земле́, богому́дре, к широ́кому дости́гл еси́ и ра́дости испо́лнен небе́сных наслажде́ний, преподо́бне.

И ны́не и при́сно и во ве́ки веко́в. Ами́нь.

Богородичен: Спасе́ние Тя́ на вся́ко вре́мя и ме́сто призыва́ю: не пре́зри мене́, Всенепоро́чная, Яже Бо́га ро́ждшая, Изба́вителя вку́пе и Спа́са моего́.

Пе́снь 5

Ирмос: Возсия́й ми́, Го́споди, све́т повеле́ний Твои́х, я́ко к Тебе́ ду́х мо́й у́тренюет и пое́т Тя́: Ты́ бо еси́ Бо́г на́ш, и к Тебе́ прибега́ю, Царю́ ми́ра.

Припев: Преподо́бне о́тче Ону́фрие, моли́ Бо́га о нас.

Ангелом единожи́теля Пафну́тий обре́т в пусты́ни тя́, вели́каго равноа́нгельнаго свети́льника, благоче́стно жития́ твоего́ все́м яви́ исправле́ния, му́дре.

Припев: Преподо́бне о́тче Ону́фрие, моли́ Бо́га о нас.

Возсия́ тебе́ Госпо́дь, Его́же от души́ вожделе́л еси́, безстра́стия Све́т невече́рний, Ону́фрие, и ми́р в по́вестех непоро́чнаго жития́ твоего́ ве́сь просвети́л еси́, му́дре.

Сла́ва Отцу́ и Сы́ну и Свято́му Ду́ху:

Яко благопропове́дуя, Ону́фрие блаже́нне, е́же прилепля́тися Бо́гу на́шему, на Того́ упова́ние от души́ возложи́л еси́ и Того́ хвалу́ име́л еси́ во усте́х при́сно.

И ны́не и при́сно и во ве́ки веко́в. Ами́нь.

Богородичен: Возсия́й ми́, Влады́чице, зарю́ ми́лости Твоея́, во тме́ прегреше́ний мои́х су́щу, Де́во, и к све́ту наста́ви покая́ния, молю́ся, и спасе́ния жи́зни.

Пе́снь 6.

Ирмос: Бу́ря мя́ помышле́ний пости́гши, во глубину́ низвлачи́т мя́ безме́рных грехо́в, но Ты́, Упра́вителю Благи́й, предвари́в, упра́ви, я́ко проро́ка, и спаси́ мя.

Припев: Преподо́бне о́тче Ону́фрие, моли́ Бо́га о нас.

Мра́зом померза́емей пло́ти твое́й, теплото́ю Ду́ха гре́яшеся тво́й ду́х; зно́ем же опаля́емь, му́дре, роса́ прохлажда́ше небе́сная тя́ благода́тию.

Припев: Преподо́бне о́тче Ону́фрие, моли́ Бо́га о нас.

Ходя́щу тебе́ в пусты́ни, от Бо́га предвожда́лся еси́, сла́вне, светозаре́нием, та́мо хотя́щаго све́та прия́ти тя́ ны́не пропису́я и сла́ву, при́сно пребыва́ющую.

Сла́ва Отцу́ и Сы́ну и Свято́му Ду́ху:

В верте́пе роди́выйся и на руку́ ста́рца я́ко Младе́нец прия́ти сподо́блься, младе́нствующа де́лы благи́ми, ста́рца в верте́пе тя́ учиня́ет к лу́чшим.

И ны́не и при́сно и во ве́ки веко́в. Ами́нь.

Богородичен: Бе́здну ми́лости ро́ждшая, страсте́й мои́х бе́здну пучи́ною щедро́т Твои́х пото́пльши, ту́чу от души́ пода́ждь мне́ сле́з, Богороди́тельнице Всенепоро́чная.

Конда́к, гла́с 3.

Сия́нием Ду́ха Пресвята́го, богому́дре, просве́щся, оста́вил еси́ я́же в житии́ молвы́, пусты́ню же дости́г, преподо́бне о́тче, возвесели́л еси́ и́же над все́ми Бо́га и Зижди́теля, сего́ ра́ди прославля́ет тя́ Христо́с, блаже́нне, вели́кий Дарода́тель.

Икос:

Кто́ изрече́т твоя́ по́двиги, всеблаже́нне? Или́ кто́ от земноро́дных досто́йно похва́лит твое́ житие́, Ону́фрие о́тче? Якоже безпло́тен, пожи́л еси́, бы́лии пита́емь, пи́щу же име́л еси́ — Христа́ Бо́га, на Него́же твою́ наде́жду положи́л еси́, на́г ходя́ в пусты́нях, сту́день и мра́з, я́ко безпло́тен, терпя́. Сего́ ра́ди То́й тя́ свети́льника показа́, блаже́нне, вели́кий Дарода́тель.

Пе́снь 7.

Ирмос: Глаго́лавый на горе́ с Моисе́ом и о́браз де́вства явле́й в купине́, благослове́н еси́, Бо́же оте́ц на́ших.

Припев: Преподо́бне о́тче Ону́фрие, моли́ Бо́га о нас.

На горе́ Илию́ препита́вый вра́ном, То́й тебе́ Ангелом пи́щу посыла́ет, тя́ велича́я, преподо́бне, Того́ возвели́чившаго.

Припев: Преподо́бне о́тче Ону́фрие, моли́ Бо́га о нас.

Якоже фи́никс, при исхо́дищих прозя́б водны́х воздержа́ния, пи́щу име́л еси́ фи́ники, пита́вся пи́щею боле́зней твои́х.

Сла́ва Отцу́ и Сы́ну и Свято́му Ду́ху:

Виде́нии разширя́яся, о́тче, боле́зньми пита́лся еси́ воздержа́ния и ны́не получи́л еси́ го́рнее благопита́ние, Ону́фрие.

И ны́не и при́сно и во ве́ки веко́в. Ами́нь.

Богородичен: Иже во чре́во Де́вы всели́выйся и сие́ небе́с ши́рши показа́вый, благослове́н еси́, Го́споди, Бо́же оте́ц на́ших.

Пе́снь 8.

Ирмос: Земля́ и вся́, я́же на не́й, мо́ре и вси́ исто́чницы, небеса́ небе́с, све́т и тма́, мра́з и зно́й, сы́нове челове́честии, свяще́нницы, благослови́те Го́спода и превозноси́те Его́ во ве́ки.

Припев: Преподо́бне о́тче Ону́фрие, моли́ Бо́га о нас.

Зе́млю до́льную премину́в, небе́сную стяжа́л еси́ жи́знь, и безпло́тных лико́м счи́слился еси́, нося́ пло́ть, Ону́фрие блаже́нне, и зе́млю кро́тких насле́довал еси́, ю́же тебе́ подаде́ Христо́с во ве́ки.

Припев: Преподо́бне о́тче Ону́фрие, моли́ Бо́га о нас.

Сле́зныя ка́пли гаси́ло стяжа́л еси́ вои́стинну стра́стным разгоре́нием и любо́вию огня́ боже́ственнаго росе́ совокупи́лся еси́ безстра́стия — Христу́ Бо́гу на́шему, те́мже тя́ чти́м, Ону́фрие богому́дре.

Сла́ва Отцу́ и Сы́ну и Свято́му Ду́ху:

Ангельскому житию́ поревнова́вша непреста́нными моли́твами, руко́ю Ангела Святы́м Та́йнам прича́стника, о́тче, Христо́с тя́ показа́, Вели́каго Сове́та вои́стинну Ангел, Его́же превозно́сим во ве́ки.

И ны́не и при́сно и во ве́ки веко́в. Ами́нь.

Богородичен: Земле́ свята́я, из Нея́же Христо́с прозябе́, кла́с жи́зни, и иста́явшее гла́дом назда́ челове́ческое естество́ дре́вния зло́бы, Богома́ти Всенепоро́чная, те́мже Тя́ пое́м во ве́ки.

Песнь 9

Ирмос: Яко сотвори́ Мне́ вели́чие Си́льный, и свя́то и́мя Его́, и ми́лость Его́ в ро́д и ро́д боя́щимся Его́.

Припев: Преподо́бне о́тче Ону́фрие, моли́ Бо́га о нас.

Взира́нии непреста́нными, я́же к Бо́гу, о́тче богому́дре, обожа́емь, прича́стием Его́ бы́л еси́ бо́г и, со Ангелы служа́, Сего́ сла́виши при́сно.

Припев: Преподо́бне о́тче Ону́фрие, моли́ Бо́га о нас.

Умертви́в пло́ть, победи́л еси́ врага́, преста́вился еси́ к невече́рней зари́, небе́сных бла́г ты́ насле́дник бы́в, о́тче Ону́фрие.

Сла́ва Отцу́ и Сы́ну и Свято́му Ду́ху:

Любо́вию творя́щих святы́й тво́й пра́здник от вся́каго треволне́ния страсте́й мольба́ми твои́ми избавля́й при́сно, я́ко дерзнове́ние обре́т у Спа́са, Ону́фрие.

И ны́не и при́сно и во ве́ки веко́в. Ами́нь.

Богородичен: Наде́жду Тя́ и сте́ну стяжа́вше, Пречи́стая, упова́ем улучи́ти блага́я моли́твами Твои́ми, Чи́стая, я́же обеща́ Христо́с, воплоти́выйся из Тебе́ на́с ра́ди.

Свети́лен.

Ангельстии удиви́шася чи́ни твои́м подвиго́м, я́же в пусты́ни твори́л еси́, Ону́фрие богоно́се: три́ бо к шести́десятим ле́та, о́тче, пости́лся еси́. И ны́не, всеблаже́нне преподо́бне, со Христо́м ца́рствуеши в непроходи́мыя ве́ки.

Сла́ва, и ны́не, Богородичен:

Богоро́дицу Тя́ вои́стинну испове́дуем, Влады́чице, Тебе́ ра́ди спа́сшиися, и́бо Бо́га неизрече́нно родила́ еси́, разру́шшаго кресто́м сме́рть и к Себе́ привле́кша преподо́бных собо́ры, с ни́миже Тя́ восхваля́ем, Де́во.

Молитва преподобному Онуфрию

О преизящный и превеликий пустынножителю, преподобне отче Онуфрие! Похваляю твоя неизреченная чудотворения и житие пресветлое, еже еси препроводил от юности твоей даже и до старости: никтоже бо изчести возможет терпений и подвигов твоих, пречестне. Удивися преподобный Пафнутий твоему жестокому, еже в пустыни, житию, вкупе же и зело возрадовася, обрет тя единаго толиких подвигов и совершенства суща образ. Сего ради и подлинно испыта о трудех твоих святых и о еже колико имел еси временнаго жития. Темже и написа, яко шестьдесят лет и три в трудолюбии пребывая, в наготе претерпевая мраз и зной, в глубоцей пустыни со зверьми и птицы обитая, молитвы непрестанно творя, пожил еси. Сего ради ныне радость тебе приношу от недостойных устен моих, преподобне отче, преподобному Пафнутию радосте великая: сподобися бо при кончине со львы послужити тебе, погребсти тело твое и с тобою на Небеси жити, Илии Фесвитянину ревнителю, Иоанну Крестителю наследниче, друже Христов и снаследниче истинный, Египту умная красото, фивеом великое светило, Ливии красная доброто, финиксе краснопроцветающий, орле высокопарный, летающий в поднебесная, на Небесех гражданство обретый, идеже и водворися у Престола Владыки славы, с двадесять четырьми старцы жилище обретый, с ними же и пребываеши. И ныне молю тя, пречудный гражданине Небесный, святых ликов Ангельских совсельниче: услыши мя, грешнаго и недостойнаго раба твоего, в час сей и приими сие малое моление мое, великий заступниче, скорый помощниче притекающим к тебе усердно; заглади рукописание дел моих скверных и нечистых, яже держат демонския полки, покрый мя твоим заступлением, причти мя ко уготованному месту молитвами твоими и сподоби мя Вышняго Иерусалима, ибо по Преблагословенней Владычице нашей Богородице и Приснодеве Марии тебе между теплейшими помощниками и заступниками моими почитаю. Присещаеши бо и даеши руку помощи припадающим к тебе в храме твоем повсюду. Темже и аз, недостойный, ныне тебе молюся и призываю: умоли Милостиваго Бога, да отпустит ми вся прегрешения моя вольная и невольная, сотворенная вся злая дела моя и да избавит мя твоим предстательством от вечных мук, научит мя творити добрая дела, наставит мя на путь ко спасению истинному и сподобит мя купно радости вечныя насладитися со всеми святыми ныне, и присно, и во веки веков. Аминь.