25 июня.
Канон преподобному Арсению Коневскому
![Преподобному Арсению, Коневскому Преподобному Арсению, Коневскому](img_i/065.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 1:
Боже́ственною любо́вию возгоре́вся, мирска́я пристра́стия от души́ отве́ргше, те́сным путе́м по́стничества во сле́д Христа́ невозвра́тным умо́м ше́ствовал еси́, Арсе́ние всеблаже́нне, от Него́ же и мзду́ трудо́в твои́х на небесе́х восприи́м, помина́й на́с, чту́щих святу́ю па́мять твою́ и вопию́щих: сла́ва Да́вшему ти́ кре́пость, сла́ва Венча́вшему тя́, сла́ва Де́йствующему тобо́ю все́м исцеле́ния.
Ин тропа́рь, гла́с 4:
Ду́хом Бо́жиим наставля́емый, возлюби́л еси́ безмо́лвие, в не́м же ева́нгельски подвиза́ющуся, пречу́дный Афо́нский да́р — Богома́тере ико́на, дарова́ся ти́, всеблаже́нне, и, о́браз доброде́телей бы́в ста́ду твоему́, Арсе́ние о́тче на́ш, к го́рнему торжеству́ возше́л еси́, иде́же со Ангелы ликовству́я, моли́ Христа́ Бо́га спасти́ся душа́м на́шим.
Велича́ние:
Ублажа́ем тя́, преподо́бне о́тче Арсе́ние, и чте́м святу́ю па́мять твою́, наста́вниче мона́хов и собесе́дниче Ангелов.
Кано́н преподо́бнаго Арсе́ния, гла́с 8.
Пе́снь 1.
Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.
Припев: Преподо́бне о́тче Арсе́ние, моли́ Бо́га о нас.
Соде́телю Ангелов и све́та Пода́телю, Иису́се, Бо́же мо́й, у́м и се́рдце мое́ просвети́, да земна́го Ангела — свята́го Арсе́ния воспою́, ра́дуяся сла́ве Твое́й.
Припев: Преподо́бне о́тче Арсе́ние, моли́ Бо́га о нас.
Якоже кри́н се́льный, красе́н бы́л еси́, Арсе́ние, в ю́ности доброде́тельми и я́ко избра́нный Бо́жий, по́лн сы́й любве́ и благода́ти, удали́лся еси́ от ми́ра.
Сла́ва Отцу́ и Сы́ну и Свято́му Ду́ху:
Простра́ннаго пути́ бе́гая, пу́ть те́снаго жития́, по́двиги и труды́ по́стническия возлюби́л еси́, богому́дре, и́миже вни́ти сподо́бился еси́ в ве́чный поко́й.
И ны́не и при́сно и во ве́ки веко́в. Ами́нь.
Богородичен: Хва́лим, благослови́м, пое́м и велича́ем Тя́, Богоро́дице, я́ко рождество́м Твои́м от пре́лести ми́р изба́влен бы́сть и подаде́ся отпуще́ние грехо́в и спасе́ние душа́м на́шим.
Пе́снь 3.
Ирмос: Ты́ еси́ утвержде́ние притека́ющих к Тебе́, Го́споди, Ты́ еси́ све́т омраче́нных, и пое́т Тя́ ду́х мо́й.
Припев: Преподо́бне о́тче Арсе́ние, моли́ Бо́га о нас.
Яже на горе́ оби́тель бы́сть тебе́, Арсе́ние, я́ко ле́ствица, на го́ру доброде́телей возводя́щая и го́рняго ра́зума и мудрова́ния хода́тайственна.
Припев: Преподо́бне о́тче Арсе́ние, моли́ Бо́га о нас.
Кро́ткому и смире́нному се́рдцем Го́споду Иису́су подража́я, смире́н мудрова́нием, кро́ток и послушли́в ты́ бы́л еси́, от Него́же и благода́ть тебе́, Арсе́ние, дарова́ся.
Сла́ва Отцу́ и Сы́ну и Свято́му Ду́ху:
Якоже Гедео́н иноплеме́нники, ты́ па́губныя стра́сти воздержа́нием победи́л еси́, досточу́дне, и ничто́же успе́ вра́г диа́вол, при́сно о́ными ра́тующий.
И ны́не и при́сно и во ве́ки веко́в. Ами́нь.
Богородичен: Оскверне́но се́рдце и устне́ име́я, припа́даю, и лобыза́ю, Пречи́стая, о́браз Тво́й святы́й, и со слеза́ми молю́ Тя́, Влады́чице: росо́ю благода́ти и ду́шу и те́ло мое́ очи́сти.
Седа́лен, гла́с 5:
Ма́нием Боже́ственным, а́ще и нехотя́щаго, внеза́пу бу́ря ве́треная к сему́ о́строву на ладии́ обрати́ тя́, свя́те Арсе́ние, иде́же все́льшися, духо́в нечи́стых страхова́ния потреби́л еси́ и оби́тель созда́л еси́, в не́й же, я́ко ма́слина, плодови́т бы́л еси́ доброде́тельми и душепита́тельными словесы́. И ны́не во оби́телех небе́сных Христа́ Бо́га моли́ от грехопаде́ний изба́вити ны́ и спасти́ ду́ши на́ша.
Сла́ва, и ны́не, богоро́дичен, гла́с то́йже:
Благоутро́бия исто́чниче, Ма́ти Госпо́дня, не пре́зри ны́, во глубину́ грехо́вную впа́дшия, но моли́ Сы́на Твоего́ и Бо́га на́шего, е́же не погуби́ти на́с со беззако́ньми на́шими, но поми́ловати и спасти́ ду́ши на́ша.
Пе́снь 4.
Ирмос: Услы́шах, Го́споди, слу́х Тво́й и убоя́хся, разуме́х неизрече́нное Твое́ смотре́ние и просла́вих, Сло́ве, снизхожде́ние Твое́.
Припев: Преподо́бне о́тче Арсе́ние, моли́ Бо́га о нас.
Аще и соверше́н бы́л еси́ в дея́нии и виде́нии, но сокро́вище духо́вных даро́в умно́жити жела́я, я́ко рачи́тельный купе́ц, поше́л еси́, Арсе́ние, от се́вера на восто́к.
Припев: Преподо́бне о́тче Арсе́ние, моли́ Бо́га о нас.
Го́рняго Сио́на иски́й, я́ко жа́ждущий еле́нь на исто́чники во́дныя, во Афо́нскую го́ру ты́ ше́ствуеши, богому́дре, и на́с научи́, мо́лим тя́, го́рняя му́дрствовати, а не земна́я.
Сла́ва Отцу́ и Сы́ну и Свято́му Ду́ху:
Во Афо́нстей горе́, я́ко богоза́рный свети́льник, возсия́л еси́, Арсе́ние, доброде́тельми: по́двиги бо и труды́ твоя́ светови́дна и сла́вна тя́ сотвори́ша.
И ны́не и при́сно и во ве́ки веко́в. Ами́нь.
Богородичен: Не оста́ви погружа́тися лю́тыми скорбьми́ ду́шу мою́, о Ра́досте, Ра́дость роди́вшая, Богоневе́сто! Но те́мныя скорбе́й о́блацы от се́рдца отжени́ и да́руй ми́ све́т и весе́лие.
Пе́снь 5
Ирмос: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче.
Припев: Преподо́бне о́тче Арсе́ние, моли́ Бо́га о нас.
Богоизбра́нному сосу́ду — Па́влу, труда́ми, Арсе́ние, ревну́я, са́м бы́л еси́, я́ко сосу́д зла́т, че́стен, богоизбра́н, небе́сным мѵ́ром испо́лнен, благоуха́яй при́сно до́брыми де́лы и словесы́.
Припев: Преподо́бне о́тче Арсе́ние, моли́ Бо́га о нас.
Свя́та и пра́ведна, духо́вных плодо́в испо́лнена и небе́сным сокро́вищем ода́рствованна, необита́емому о́строву дарова́ тя́ Бо́г, Арсе́ние, на прославле́ние и́мене Своего́ свята́го.
Сла́ва Отцу́ и Сы́ну и Свято́му Ду́ху:
Еже при исхо́де от Горы́ Святы́я проро́чески рече́ а́вва Иоа́нн, сие́ тобо́ю, о́тче, испо́лнися: оби́тель бо во стране́ се́верней устро́ил еси́ и хра́м ди́вен в че́сть Хра́му одушевле́нному.
И ны́не и при́сно и во ве́ки веко́в. Ами́нь.
Богородичен: Взира́юще на святу́ю ико́ну Твою́, Влады́чице, зри́м вели́чие и сла́ву Твою́ и благоче́стно сла́вим Тя́, я́ко покро́в, заступле́ние и спасе́ние ду́ш на́ших.
Пе́снь 6.
Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя.
Припев: Преподо́бне о́тче Арсе́ние, моли́ Бо́га о нас.
Проро́ческий гла́с во уме́ имы́й, — се́, что́ добро́ или́ что́ красно́, но е́же жи́ти бра́тии вку́пе, — купножи́тие, еди́но се́рдце и ду́шу иму́щее, во оби́тели твое́й уста́вил еси́, му́дре, в назида́ние и спасе́ние ду́ш на́ших.
Припев: Преподо́бне о́тче Арсе́ние, моли́ Бо́га о нас.
Яко избра́нный Бо́жий, святы́й и возлю́бленный, возлю́блен бы́л еси́, Арсе́ние, святы́м Евфи́мием, богому́дрым па́стырем Вели́каго Нова́града, и́же, во оби́тели твое́й бы́в, просла́ви Бо́га, святы́я Своя́ прославля́ющаго.
Сла́ва Отцу́ и Сы́ну и Свято́му Ду́ху:
Образ доброде́телей бы́л еси́ ста́ду твоему́, богопросвеще́нный наста́вниче на́ш Арсе́ние, от вся́кия злы́я ве́щи удале́н: я́ко да изба́вишися от собла́зна, преткнове́ния и козноде́йства вра́жия.
И ны́не и при́сно и во ве́ки веко́в. Ами́нь.
Богородичен: Хра́ме одушевле́нный, Богоро́дице Де́во! Предста́тельством Твои́м мене́, жили́ще бесо́в и страсте́й, претвори́ во хра́м Ду́ху Пресвято́му, да воспою́, ра́дуяся, Твое́ Ма́тернее благоутро́бие.
Конда́к, гла́с 8:
Трисия́тельнаго Божества́ сия́нием просвети́в се́рдце твое́, преподо́бне, светови́ден ве́сь яви́лся еси́ доброде́тельми, я́ко и го́ру Афо́нскую све́т трудолю́бия твоего́ озари́, иде́же святу́ю ико́ну Со́лнца и́стиннаго, Христа́, и Его́ Пречи́стыя Ма́тере в да́р прии́м, на о́стров Нева́ е́зера прише́д, оби́тель устро́ил еси́, всеблаже́нне. Те́м, ве́рою и любо́вию к целе́бной ра́це твое́й притека́юще, ра́достно вопие́м ти́: ра́дуйся, пресве́тлый свети́льниче, Арсе́ние, о́тче на́ш.
Икос:
Ка́ко тя́ восхвали́ти, недоуме́ю? Ты́ са́м безпло́дный у́м мо́й, преподо́бне о́тче, сотвори́ благопло́ден и научи́ язы́к до́бре глаго́лати твоя́ по́двиги и труды́, и́миже восто́к и се́вер, я́ко луча́ми све́тлыми, озари́л еси́. Сего́ ра́ди ны́не ве́сь собо́р празднолю́бцев хва́лит тя́, вопию́щи: ра́дуйся, блага́го ко́рене богоизбра́нное прозябе́ние; ра́дуйся, плодови́тая ма́слино Вели́каго Нова́града; ра́дуйся, зерца́ло в ю́ности благонра́вия; ра́дуйся, Христо́ва и́га рачи́телю всеизря́дный; ра́дуйся, светоза́рное и́ноков удобре́ние; ра́дуйся, горы́ Афо́нския посети́телю трудолю́бный; ра́дуйся, чуде́с сокро́вищем, о́бразом Богома́тере, одарова́нный; ра́дуйся, в чудесе́х от Бо́га просла́вленный пресла́вно; ра́дуйся, страхова́ний де́монских потреби́телю; ра́дуйся, обурева́емых на мо́ри спаси́тельное окормле́ние; ра́дуйся, боля́щих безме́здное врачева́ние; ра́дуйся, я́ко ра́ка твоя́ то́чит исцеле́ния. Ра́дуйся, Коне́вское пресве́тлое свети́ло, Арсе́ние, о́тче на́ш!
Пе́снь 7.
Ирмос: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.
Припев: Преподо́бне о́тче Арсе́ние, моли́ Бо́га о нас.
Мы́сленному куми́ру — греху́, води́м сы́й Ду́хом Святы́м, ты́, о́тче, не послужи́л еси́, и от огня́ страсте́й невреди́ма тя́ сохрани́ Вседе́тель, пою́ща: отце́в Бо́же, благослове́н еси́.
Припев: Преподо́бне о́тче Арсе́ние, моли́ Бо́га о нас.
Не име́ша в труде́х поко́я ру́це твои́, Арсе́ние, ни у́м в тре́звенной моли́тве, ниже́ о́чи твои́ воздрема́ша когда́ от бде́ния, ни коле́на твоя́ изнемого́ста от поста́, я́ко Бо́га помо́щника себе́ име́л еси́, поя́ Ему́: отце́в Бо́же, благослове́н еси́.
Сла́ва Отцу́ и Сы́ну и Свято́му Ду́ху:
Оби́тель твоя́, Арсе́ние, от ску́дости и гла́да изба́вися, возвра́щшуся ти́ второ́е от Афо́нския горы́. И ны́не, Даю́щаго пи́щу а́лчущим моли́, хле́б насу́щный дарова́ти пою́щим: отце́в Бо́же, благослове́н еси́.
И ны́не и при́сно и во ве́ки веко́в. Ами́нь.
Богородичен: Врачу́ ду́ш и теле́с, Христе́ Бо́же, моли́твами Тебе́ ро́ждшия не́мощи на́ша уврачу́й, просвети́ и укрепи́ ны́ в за́поведех Твои́х, пою́щия: отце́в Бо́же, благослове́н еси́.
Пе́снь 8.
Ирмос: Царя́ Небе́снаго, Его́же пою́т во́и Ангельстии, хвали́те и превозноси́те во вся́ ве́ки.
Припев: Преподо́бне о́тче Арсе́ние, моли́ Бо́га о нас.
Царя́ сла́вы Христа́, не иска́в сла́вы челове́ческия, на небесе́х зре́ти лице́м к Лицу́ сподо́бился еси́, Арсе́ние, во вся́ ве́ки.
Припев: Преподо́бне о́тче Арсе́ние, моли́ Бо́га о нас.
Царя́ ца́рствующих Бо́га в небе́сном Ца́рствии не преста́й моли́ти, Арсе́ние, е́же на супоста́ты побе́ду и одоле́ние дарова́ти.
Сла́ва Отцу́ и Сы́ну и Свято́му Ду́ху:
Царя́ Небе́снаго моли́, преподо́бне, дарова́ти ми́р Це́ркви, оби́лие бла́г земны́х, отпуще́ние грехо́в и спасе́ние душа́м на́шим.
И ны́не и при́сно и во ве́ки веко́в. Ами́нь.
Богородичен: Царю́ Небе́сных си́л, Иису́се Всеси́льне, моли́твами Ма́тере Твоея́ Пречи́стыя от обдержа́щих мя́ страсте́й изба́ви, я́ко Благоутро́бен.
Песнь 9
Ирмос: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.
Припев: Преподо́бне о́тче Арсе́ние, моли́ Бо́га о нас.
Яко избра́нный во́ин Христо́в, благоче́стно по́двиги соверша́я и те́снаго пути́ тече́ние скончава́я, упова́нием ты́ ра́довался еси́, Арсе́ние, о воздая́нии на небесе́х.
Припев: Преподо́бне о́тче Арсе́ние, моли́ Бо́га о нас.
Яко благи́й вои́стинну, от блага́го сокро́вища се́рдца своего́ словеса́ бла́га при исхо́де изне́сл еси́, богому́дре, наказу́я ученики́ своя́ е́же благоугожда́ти Го́сподеви благоче́стием и доброде́телей де́ланием.
Сла́ва Отцу́ и Сы́ну и Свято́му Ду́ху:
О, Боже́ственнаго раче́ния! Яко в ча́с исхо́да от земли́ святы́й Арсе́ний быва́ет прича́стник Боже́ственных Та́ин Христо́вых и а́бие ду́х сво́й в ру́це Его́, ра́дуяся, предае́т.
И ны́не и при́сно и во ве́ки веко́в. Ами́нь.
Богородичен: От святы́я ико́ны Твоея́, Влады́чице, благода́тию озаря́еми, ра́достно вопие́м Ти́: ра́дуйся, исто́чниче воды́ живо́тныя, ра́дуйся, земноро́дных ра́досте, прибе́жище и спасе́ние ду́ш на́ших.
Свети́лен:
Якоже зве́зды многосве́тлыя, доброде́тели твоя́, свети́льниче на́ш Арсе́ние, помышле́ния на́ша дне́сь озаря́ют и сердца́ ра́дости исполня́ют, я́же воспева́юще, тя́ при́сно ублажа́ем.
Сла́ва, и ны́не, Богородичен:
Всесве́тлая заре́ у́мнаго Со́лнца, возсия́й ми́ све́т ра́зума, е́же пе́ти и сла́вити Твое́, Влады́чице, Ма́тернее о на́с смотре́ние.
Моли́тва преподо́бному Арсе́нию.
О, всеблаже́нне и богоно́се Арсе́ние, о́тче на́ш! Сы́й во сла́ве небе́снаго Царя́ Христа́ Бо́га, предстоя́ престо́лу Его́ со все́ми Его́ святы́ми, не пре́зри на́с, до́лу су́щих, гре́шных и недосто́йных, при честне́й ра́це твое́й со слеза́ми тебе́ моля́щихся, но приими́ серде́чное стена́ние и бре́нных усте́н моле́ние сие́ на́ше. Тебе́ бо вси́ мо́лимся, о преподо́бне о́тче, и тебе́ умиле́нно про́сим: бу́ди о на́с хода́тай и моли́твенник тепле́йший ко Всеблаго́му Бо́гу. Моли́ бла́гость Его́, е́же спасти́ на́с от прегреше́ний на́ших, и́миже ве́сть судьба́ми. Моли́ся щедро́там Его́, е́же подава́ти ще́дро оби́тели се́й и всему́ ми́ру потре́бная. Моли́ся Даю́щему все́м ми́р, низпосла́ти ми́р це́рквам, собира́я расточе́нныя во еди́но, сохрани́ти держа́ву нашу в ми́ре и тишине́, и вся́кому ве́рному в до́ме, и на пути́, и на мо́ри, и повсю́ду дни́ бла́ги и безмяте́жны дарова́ти; благослови́ти труды́ отце́в и бра́тий на́ших, и прости́ти все́х согреше́ния во́льная и нево́льная, я́ко да сподо́бимся и мы́, гре́шнии, вку́пе с тобо́ю сла́вити Отца́ и Сы́на и Свята́го Ду́ха в безконе́чныя ве́ки. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Преподобному Арсению, Коневскому Преподобному Арсению, Коневскому](img_b/065.jpg)