24 июня.

Канон святому апостолу Варнаве.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 3:

Апо́столи святи́и, моли́те Ми́лостиваго Бо́га, да прегреше́ний оставле́ние пода́ст душа́м на́шим.

Кано́н свята́го Варна́вы, гла́с 2.

Пе́снь 1.

Ирмос: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Припев: Святы́й апо́столе Варна́во, моли́ Бо́га о нас.

Яко му́ж сы́й бла́г и утеше́ния сы́н я́влься, души́ моея́ озлобле́ние и греха́ душегу́бную печа́ль отжени́, я́ко да, весе́лия испо́лнен бы́в, воспою́ тя.

Припев: Святы́й апо́столе Варна́во, моли́ Бо́га о нас.

Одержи́мь, блаже́нне, чи́стым сия́нием, прозя́бшаго от коле́на Иу́дова, пребога́те, Христа́ Всецаря́, от леви́тска сро́дства прише́дша свяще́нна, зако́на же преложе́ние пропове́дал еси́.

Сла́ва Отцу́ и Сы́ну и Свято́му Ду́ху:

Све́тлая твоя́, прему́дре, жи́знь, пе́рвыя бла́гости и есте́ственнаго существа́ показа́ бо́га тя́ втора́го, е́же отту́ду ублажа́ема благода́тьми, сла́вне Варна́во, порожде́ние боже́ственнаго утеше́ния.

И ны́не и при́сно и во ве́ки веко́в. Ами́нь.

Богородичен: Отрокови́ц боже́ственный ли́к боже́ственно в жена́х Тя́ до́брую воспева́ет, Богоро́дице Влады́чице, добро́тами укра́шену Божества́: добротвори́тельное бо Сло́во па́че сло́ва родила́ еси́.

Пе́снь 3.

Ирмос: Процвела́ е́сть пусты́ня, я́ко кри́н, Го́споди, язы́ческая неплодя́щая це́рковь, прише́ствием Твои́м, в не́йже утверди́ся мое́ се́рдце.

Припев: Святы́й апо́столе Варна́во, моли́ Бо́га о нас.

Облак во́льный, на́м до́ждь нося́щий от исто́чника благода́ти, ви́ден бы́л еси́, Варна́во сла́вне, и пи́щный пото́к напая́ющий.

Припев: Святы́й апо́столе Варна́во, моли́ Бо́га о нас.

Разли́чными одарова́на сия́нии ви́дящи Всеси́льнаго Ду́ха вла́сть, та́йнам Христо́вым служи́теля, отлучи́ тя́, прехва́льне.

Сла́ва Отцу́ и Сы́ну и Свято́му Ду́ху:

Просвеща́еми благода́тию Креста́ Твоего́, Влады́ко, благосла́внии апо́столи тебе́ язы́ки ве́рою приведо́ша, Варна́ва и Па́вел богому́дрии.

И ны́не и при́сно и во ве́ки веко́в. Ами́нь.

Богородичен: Яви́лася еси́ чистото́ю, я́ко кри́н, Влады́чице, посреде́ те́рния возсия́вши заря́ми де́вства Твоего́, Богоро́дице Всечи́стая.

Седа́лен, Варна́вы, гла́с 4:

Слове́сен показа́лся еси́, я́ко небе́сную пове́дуя сла́ву Бо́жию чуде́с све́тлостию и си́лы луча́ми, неразу́мия но́щь отгоня́ благода́тию, богоразу́мия же лучи́ облиста́я конце́м. Те́мже светоно́сную и святу́ю твою́ па́мять сла́вим дне́сь, ве́рнии, и вопие́м ти́: Варна́во всехва́льне, моли́ Христа́ Бо́га грехо́в оставле́ние дарова́ти чту́щим любо́вию святу́ю па́мять твою́.

Пе́снь 4.

Ирмос: Прише́л еси́ от Де́вы, не хода́тай, ни Ангел, но Са́м, Го́споди, вопло́щся, и спа́сл еси́ всего́ мя челове́ка. Те́м зову́ Ти́: сла́ва си́ле Твое́й, Го́споди.

Припев: Святы́й апо́столе Варна́во, моли́ Бо́га о нас.

После́дуя повеле́нием Влады́ки, апо́столе Варна́во прехва́льне, ни́щим разда́л еси́ все́ твое́ име́ние, и Христо́в пропове́дник бы́в велегла́сен.

Припев: Святы́й апо́столе Варна́во, моли́ Бо́га о нас.

Дости́гл еси́ доброде́телей све́тлость коне́чную и, Па́вла обре́т, богогла́снаго апо́стола, с ни́мже все́м возвести́л еси́ та́инства глубину́ неизрече́нную.

Припев: Святы́й апо́столе Варна́во, моли́ Бо́га о нас.

Яко со́лнце, претека́я ми́ра концы́, Варна́во всече́стне, зарелу́чными сия́нии, Па́влу после́дуя, просвеща́еши сло́вом благода́ти.

Сла́ва Отцу́ и Сы́ну и Свято́му Ду́ху:

Соприча́стник страсте́й Спа́са бы́в, Варна́во прехва́льне, в небе́сных се́лех с Ни́м прославля́ешися, па́че ума́ весе́лия насыща́яся.

И ны́не и при́сно и во ве́ки веко́в. Ами́нь.

Богородичен: Евы прама́тере кля́тва упраздни́ся Тобо́ю, Всенепоро́чная: воплоще́ннаго бо Сло́ва родила́ еси́ Присносу́щнаго, благослове́ньми ми́р венча́вшаго.

Пе́снь 5

Ирмос: Хода́тай Бо́гу и челове́ком бы́л еси́, Христе́ Бо́же: Тобо́ю бо Влады́ко, к светонача́льнику Отцу́ Твоему́, от но́щи неве́дения, приведе́ние и́мамы.

Припев: Святы́й апо́столе Варна́во, моли́ Бо́га о нас.

Зако́на се́нь преше́д и благода́тию сия́я, язы́ком исполне́ние благовеству́я, просвети́л еси́, богому́дрый Варна́во, Христо́вым пропове́данием.

Припев: Святы́й апо́столе Варна́во, моли́ Бо́га о нас.

Кре́постию держа́вною Свята́го Ду́ха, апо́столе, я́ве обложе́н, лука́вствия ду́хи низложи́в, от те́х злоде́йства ми́р изба́вил еси́.

Сла́ва Отцу́ и Сы́ну и Свято́му Ду́ху:

Вопию́щаго гла́с в пусты́х язы́цех бы́л еси́, му́дре, боже́ственнаго воплоще́ния непостижи́мое та́инство возвеща́я все́м, Варна́во пребога́те.

И ны́не и при́сно и во ве́ки веко́в. Ами́нь.

Богородичен: Се́ во утро́бе, Богоро́дице Пречи́стая, Христа́ Бо́га па́че сло́ва име́ла еси́, я́коже Иса́ия предрече́, вы́ше естества́ же Сего́, Богороди́тельнице, родила́ еси́.

Пе́снь 6.

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же мя́ возведи́.

Припев: Святы́й апо́столе Варна́во, моли́ Бо́га о нас.

Возсия́в ми́ру, Христе́ Бо́же, Пра́вды Со́лнце, Влады́ко, я́коже лучи́ сия́ющия, Варна́ву и Па́вла возблиста́л еси́.

Припев: Святы́й апо́столе Варна́во, моли́ Бо́га о нас.

Кореносе́чна секи́ра бы́л еси́, олядене́вшую пре́лесть секу́щи па́че сло́ва чудесы́, богоглаго́ливе Варна́во чу́дне.

Сла́ва Отцу́ и Сы́ну и Свято́му Ду́ху:

Законополо́жник показа́лся еси́ благода́ти, я́ко ве́тхаго заве́та о́бразы ко и́стинному явле́нию прелага́я, Варна́во богоприя́тне.

И ны́не и при́сно и во ве́ки веко́в. Ами́нь.

Богородичен: Небеса́ Простры́й во́лею, не́бо земно́е друго́е показа́ Тя́, Богома́ти Пречи́стая, и, из Тебе́ возсия́в, яви́ся.

Конда́к, гла́с 3.

Госпо́день бы́л еси́ всеи́стинный служи́тель, апо́столов же яви́лся еси́ седми́десятих пе́рвый, озари́л еси́ и с Па́влом про́поведь твою́, все́м возвеща́яй Христа́ Спа́са, сего́ ра́ди песнопе́нии боже́ственную па́мять твою́, Варна́во, соверша́ем.

Икос:

Сы́н Бо́жий, соприсносу́щный Ду́ху, благоволе́нием на земли́ пло́ть прие́мь, я́ко Челове́к, и стра́стию честно́ю безстра́стие да́в, тя́ полага́ет, блаже́нне, апо́стола и вити́я ве́ры, му́дра в сло́ве и досточу́дна, пропове́дника че́стна, язы́ков учи́теля, Варна́во блаже́нне, и Тро́ицы и́стинна покло́нника. Те́мже возсия́ ве́рным честна́я денни́ца све́тлая, озаря́ющая твоя́ боже́ственная па́мять, ю́же досто́йно соверша́ем.

Пе́снь 7.

Ирмос: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен.

Припев: Святы́й апо́столе Варна́во, моли́ Бо́га о нас.

Свя́то Свята́го, во святы́х почива́ющаго, Варна́во, пропове́дал еси́ Сы́на, собезнача́льна Отцу́ и сопресто́льна, Челове́ка бы́вша, на́м спасе́ние содева́юща.

Припев: Святы́й апо́столе Варна́во, моли́ Бо́га о нас.

Лучи́, блиста́ющия боже́ственное сия́ние, Варна́ва всечестны́й и Па́вел богоприя́тный, я́ко све́т, исхо́дят, просвеща́ющия сло́вом благода́ти язы́к всенасле́дие, христопропове́дницы.

Сла́ва Отцу́ и Сы́ну и Свято́му Ду́ху:

Ра́дуется дне́сь воспита́вый тя́, Варна́во, цвету́щаго сло́во благода́тное, Христо́ви тя́ прозя́бши, богоблаже́нне. Его́же измени́в, ны́нешняго плене́ния изба́ви моли́твами твои́ми.

И ны́не и при́сно и во ве́ки веко́в. Ами́нь.

Богородичен: Направля́ющи, Всечи́стая, мою́ жи́знь, ко Твоему́ благоути́шному приста́нищу наста́ви, Бо́га ро́ждшая, благи́х исто́чника, все́м подаю́ща ве́рным незави́стную бла́гость.

Пе́снь 8.

Ирмос: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те вся́ дела́ Госпо́дня Го́спода.

Припев: Святы́й апо́столе Варна́во, моли́ Бо́га о нас.

Мо́ре язы́ческое возмути́ти Твоя́ ко́ни, я́ко Благоде́тель, наве́л еси́ — Варна́ву сла́внаго и Па́вла чу́днаго, пре́лесть многобо́жную уче́ньми, Живода́вче, благоче́стия отгоня́щия.

Припев: Святы́й апо́столе Варна́во, моли́ Бо́га о нас.

Положи́, я́ко Бо́г, Уте́шителю Ду́ше вседе́тельный, в Це́ркви Твое́й свети́ла сия́ющая, Твою́ си́лу пропове́дающая, Сы́ну же и Роди́телю зову́щая: благослови́те, вся́ дела́ Госпо́дня, Го́спода.

Припев: Святы́й апо́столе Варна́во, моли́ Бо́га о нас.

Облиста́л еси́ све́тло, я́ко со́лнце, в ми́ре, мы́сленному бесе́довав я́ве Со́лнцу, богоприя́тне: разже́гся бо сия́нием, све́т вторы́й бы́л еси́, все́м явля́я та́инства си́лу.

Сла́ва Отцу́ и Сы́ну и Свято́му Ду́ху:

Зе́млю всю́ уче́ньми просвети́в, е́же па́че ума́ блаже́нство досто́йно улучи́л еси́, в небе́сных се́лех, Варна́во всече́стне, вене́ц благоле́пия от Влады́ки прие́м.

И ны́не и при́сно и во ве́ки веко́в. Ами́нь.

Богородичен: Да кля́тву пе́рвую погуби́ши и сме́рти осужде́ние дре́вния прама́тере, от Де́вы Богома́тере Сло́во Бо́жие роди́ся, все́м дарова́ безсме́ртие неги́блющее.

Песнь 9

Ирмос: Безнача́льна Роди́теля Сы́н, Бо́г и Госпо́дь, вопло́щься от Де́вы, на́м яви́ся, омраче́нная просвети́ти, собра́ти расточе́нная, те́м Всепе́тую Богоро́дицу, велича́ем.

Припев: Святы́й апо́столе Варна́во, моли́ Бо́га о нас.

Све́т бы́вше доброде́телию, апо́столи, и Све́ту вели́кому ны́не предстоя́ще, ми́ру ми́р пода́ти и на́шу спасти́ Це́рковь, ю́же соста́висте, Влады́ку умоли́те.

Припев: Святы́й апо́столе Варна́во, моли́ Бо́га о нас.

Вити́йскую лю́тость прему́дрости твоея́ пла́менем, богоявле́нне Варна́во, я́ве погаси́л еси́, сия́ний боже́ственных, я́ко исто́чник, вну́трь име́я. Те́мже всесвяще́нный пра́здник тво́й почита́ем.

Сла́ва Отцу́ и Сы́ну и Свято́му Ду́ху:

Ве́рою па́мять твою́ соверша́юще ны́не, апо́столе, моли́твенника ко Влады́це тя́ предлага́ем, разреше́ния прося́ще согреше́ний твои́м прия́ти хода́тайством, Варна́во всече́стне, богопропове́дниче свяще́нне.

И ны́не и при́сно и во ве́ки веко́в. Ами́нь.

Богородичен: Яко у́тро обре́теся у́треннее, в жите́йстей но́щи де́вства заря́ми сия́ющи, восто́к Со́лнца разу́мнаго пра́вды на́м я́вльши, Богома́ти Всечи́стая.

Свети́лен.

Апо́столы Христо́вы прииди́те, лю́дие, воспои́м, боже́ственнаго Варфоломе́я и Варна́ву му́драго, пропове́дники ве́ры, я́ко моля́щияся Христу́ о душа́х на́ших.

Молитва

Святы́й сла́вный и всехва́льный апо́столе Христо́в Варна́во, мо́лим тя с ве́рою и любо́вию: умоли́ Христа́ Го́спода претвори́ти ду́ши на́ша из грехолюби́вых в боголюби́выя; сохрани́ и соблюди́ нас моли́твами твои́ми от искуше́ний диа́вольских и паде́ний грехо́вных, и испроси́ нам свы́ше по́мощь во вре́мя уны́ния и беспо́мощия на́шего; да не преткне́мся о ка́мень собла́зна, но неукло́нно ше́ствуем спаси́тельным путе́м за́поведей Христо́вых, до́ндеже дости́гнем о́ных блаже́нных оби́телей ра́йских, иде́же ты ны́не водворя́ешися и весели́шися. Ей, апо́столе Спа́сов! Не посрами́ нас, кре́пце на тя упова́ющих, но бу́ди нам помо́щник и покрови́тель во всем житии́ на́шем и помози́ нам благоче́стно и богоуго́дно житие́ сие́ вре́менное сконча́ти, благу́ю и ми́рную христиа́нскую кончи́ну получи́ти и до́браго отве́та сподо́битися на Стра́шнем Суде́ Христо́ве; да избежа́вше мыта́рств возду́шных и вла́сти лю́таго мироде́ржца, унасле́дуем Ца́рство Небе́сное и просла́вим великоле́пное и́мя Отца́ и Сы́на и Свята́го Ду́ха, во ве́ки веко́в. Ами́нь.