24 июня.

Канон святому апостолу Варфоломею.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь  Варфоломе́я (Нафана́ила) и Варна́вы (Иоси́и), гла́с 3:

Апо́столи святи́и, моли́те Ми́лостиваго Бо́га, да прегреше́ний оставле́ние пода́ст душа́м на́шим.

Тропарь апостолам Варфоломею и Варнаве, глас 3

Язы́к огнедохнове́н в си́ле Ду́ха прие́мше,/ во пло́ти прише́дшее Сло́во пропове́дасте всю́ду,/ Его́же ра́ди ов во главу́ усече́н,/ ов же ка́мением побие́н,/ и есте́ апо́стольскому ли́ку украше́ние,/ Варфоломе́е и Варна́во,/ те́мже па́мять ва́шу почита́ем и про́сим:// моли́те Христа́ Бо́га пода́ти нам грехо́в оставле́ние.

Кано́н свята́го апо́стола Варфоломе́я, гла́с 2.

Пе́снь 1.

Ирмос: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Припев: Святы́й апо́столе Варфоломе́е, моли́ Бо́га о нас.

Прове́дец все́х и Бо́г, ума́ твоего́ богови́дно зря́, избра́ и тя́ сочета́ ли́ку апо́стольску, Варфоломе́е всехва́льне, благода́тию просвети́в се́рдце твое́.

Припев: Святы́й апо́столе Варфоломе́е, моли́ Бо́га о нас.

Доброде́телей на высоту́ возше́д, язы́ком огнедохнове́нным огневи́дно разделе́нием обогати́лся еси́, я́ко Христо́в апо́стол, прише́ствием Уте́шителя, пребога́те, нече́стия хвра́стие пояда́я, и неразу́мия.

Сла́ва Отцу́ и Сы́ну и Свято́му Ду́ху:

Богоно́сен у́гль вои́стинну, Боже́ственнаго Ду́ха заре́ю разжже́н, показа́лся еси́, пре́лести се́но попаля́я, Варфоломе́е прехва́льне, и просвеща́я ве́рою сердца́ пою́щих тя́.

И ны́не и при́сно и во ве́ки веко́в. Ами́нь.

Богородичен: Чи́стая, рцы́, ка́ко дои́ши? Ка́ко же Ма́ти была́ еси́, де́вственными печа́тьми сия́ющи? — Не пыта́й бе́здны, неприча́стна естество́м, испыта́яй еди́н все́х Бо́г и Госпо́дь, Его́же и пло́тию роди́х.

Пе́снь 3.

Ирмос: Процвела́ е́сть пусты́ня, я́ко кри́н, Го́споди, язы́ческая неплодя́щая це́рковь, прише́ствием Твои́м, в не́йже утверди́ся мое́ се́рдце.

Припев: Святы́й апо́столе Варфоломе́е, моли́ Бо́га о нас.

Яко до́ждь небе́сный, изсо́хшую, прему́дре, вселе́нную всю́ тмо́ю безбо́жия напои́л еси́, богови́дче досточу́дне.

Припев: Святы́й апо́столе Варфоломе́е, моли́ Бо́га о нас.

Исто́чник изы́де спаси́тельнаго пи́ва, Варфоломе́е всече́стне, и многосугу́б пло́д прине́сл еси́ язы́ком спасе́ния, досточу́дне.

Сла́ва Отцу́ и Сы́ну и Свято́му Ду́ху:

Со́лию благода́ти и́дольское уста́вил еси́ гное́ние, всему́дре, сла́дким сло́вом ве́ры сердца́ услажда́я чту́щих тя́.

И ны́не и при́сно и во ве́ки веко́в. Ами́нь.

Богородичен: Еди́ну Де́ву Тя́ и Ма́терь чти́м, я́ко спасе́ния Хода́таицу бы́вшую на́м, Непоро́чная, и ми́р избавля́ющую моли́твами Твои́ми.

Седа́лен, гла́с 8.

Мре́жею сло́ва возве́д из глубины́ неразу́мия, боголе́пно язы́ки приве́л еси́ ве́рою и, я́ко исто́чник сы́й во́д духо́вных, вселе́нную всю́ напои́л еси́ благода́тию. Те́мже и спа́сшиися тобо́ю, богогла́се, я́ко дру́га тя́ бли́жняго Христо́ва ублажа́ем, Варфоломе́е, вопию́ще ти́: моли́ Христа́ Бо́га согреше́ний оставле́ние дарова́ти чту́щим любо́вию святу́ю па́мять твою́.

Пе́снь 4.

Ирмос: Прише́л еси́ от Де́вы, не хода́тай, ни Ангел, но Са́м, Го́споди, вопло́щся, и спа́сл еси́ всего́ мя челове́ка. Те́м зову́ Ти́: сла́ва си́ле Твое́й, Го́споди.

Припев: Святы́й апо́столе Варфоломе́е, моли́ Бо́га о нас.

Упраздни́л еси́, кресто́м Госпо́дним огражда́емь, де́монское свире́пство, Варфоломе́е преизря́дне, и си́х душегуби́тельную пре́лесть отгна́л еси́ пропове́данием.

Припев: Святы́й апо́столе Варфоломе́е, моли́ Бо́га о нас.

Све́т ми́ра, сла́вы боже́ственныя сия́ние Христо́с тя́ показа́, Варфоломе́е богоприя́тне: всю́ бо просвети́л еси́ богоразу́мием тва́рь, всеблаже́нне.

Сла́ва Отцу́ и Сы́ну и Свято́му Ду́ху:

Возмути́л еси́ язы́ческая моря́, апо́столе, я́ко ко́нь преизря́ден, колесни́ца Сло́ва бы́в, ве́рою же погаси́л еси́ го́рькаго безбо́жия концы́.

И ны́не и при́сно и во ве́ки веко́в. Ами́нь.

Богородичен: Исцеля́я Евино ве́тхое преступле́ние, в Тя́, непоро́чную, Пречи́стая, всели́ся, всего́ мя́ челове́ка обнови́ па́дшаго Пребоже́ственный.

Пе́снь 5

Ирмос: Хода́тай Бо́гу и челове́ком бы́л еси́, Христе́ Бо́же: Тобо́ю бо Влады́ко, к светонача́льнику Отцу́ Твоему́, от но́щи неве́дения, приведе́ние и́мамы.

Припев: Святы́й апо́столе Варфоломе́е, моли́ Бо́га о нас.

Несозда́нну Све́ту, на́с ра́ди в зда́ниих я́вльшемуся Христу́, перводе́льно бесе́довал еси́, к Нему́ прише́д, апо́столе, и боже́ственными заря́ми от Него́ просвеща́емь.

Припев: Святы́й апо́столе Варфоломе́е, моли́ Бо́га о нас.

Яко роса́ Бо́жия, челове́ком исцеле́ние подаю́щи, в ми́ре бы́л еси́, о Варфоломе́е преблаже́нне, и зе́млю нече́стия проро́чески опрове́ргл еси́.

Сла́ва Отцу́ и Сы́ну и Свято́му Ду́ху:

К пе́рвому Све́ту присту́пль, бы́л еси́ све́т вторы́й: я́же отту́ду сия́нии и светоли́тии озаря́емь, я́ко самови́дец Сло́ва, Варфоломе́е всему́дре.

И ны́не и при́сно и во ве́ки веко́в. Ами́нь.

Богородичен: Глаго́лы Твоя́ по́мняще, Тя́ ны́не блажи́м: Тобо́ю бо, Непоро́чная, блаже́нство обрето́хом и жи́знию честно́ю и́стинною обогати́хомся.

Пе́снь 6.

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же мя́ возведи́.

Припев: Святы́й апо́столе Варфоломе́е, моли́ Бо́га о нас.

Чуде́с благода́ть прие́м и исцеле́ний обога́щся де́телию, Варфоломе́е всему́дре, язы́к стада́ улови́л еси́.

Припев: Святы́й апо́столе Варфоломе́е, моли́ Бо́га о нас.

Огненный тво́й язы́к, пресла́вне, вся́ку пре́лесть, я́ко се́но, попали́, ве́рных же просвети́ сердца́ боже́ственным пропове́данием.

Сла́ва Отцу́ и Сы́ну и Свято́му Ду́ху:

Исто́чника прему́дрости учи́теля име́я, пресла́вне, Сло́ва Безнача́льнаго, мирску́ю обуи́л еси́, богопропове́дниче, му́дрость благода́тию.

И ны́не и при́сно и во ве́ки веко́в. Ами́нь.

Богородичен: Па́че естества́, Де́во, родила́ еси́ и ве́чнуеши Де́вою, явля́ющи и́стиннаго Божества́, Сы́на и Бо́га Твоего́, о́бразы.

Конда́к, гла́с 4.

Яви́лся еси́ вели́кое со́лнце вселе́нней уче́ний сия́ньми и чуде́с стра́шных, световодя́ почита́ющия тя́, Варфоломе́е, Госпо́день апо́столе.

Икос:

Яко не́бо, сла́ву Бо́жию веща́я, ви́ден бы́л еси́ Ду́хом Святы́м, апо́столе богови́дче, и, я́ко со́лнце све́тло, яви́лся еси́ ми́ру, преле́стное помраче́ние разгоня́я Боже́ственною благода́тию. Те́м молю́ ти ся и ми́л ся де́ю: боже́ственными твои́ми луча́ми, души́ моея́ ослепле́нныя, всебога́те, просвети́ зе́ницы и сло́во тя́ пе́ти да́ждь во отверзе́ние усто́м мои́м в твое́й дне́сь па́мяти, в ню́же вся́к ве́рный, веселя́ся, хва́лит тя́, Варфоломе́е, Госпо́день апо́столе.

Пе́снь 7.

Ирмос: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен.

Припев: Святы́й апо́столе Варфоломе́е, моли́ Бо́га о нас.

Вели́кое та́инство, Варфоломе́е, Боже́ственнаго воплоще́ния ми́ру яви́л еси́, е́же все́м невмести́мое и непостижи́мое, еди́нем же вмести́мо ве́рным, несказа́емо и ве́руемо.

Припев: Святы́й апо́столе Варфоломе́е, моли́ Бо́га о нас.

Яко ка́мень, пресвяты́й Варфоломе́е, чи́сте валя́яся, пре́лести утвержде́ние кре́пко опрове́ргл еси́, Це́ркви же необори́мое основа́ние я́влься, сохраня́еши сию́ непоколеби́му.

Сла́ва Отцу́ и Сы́ну и Свято́му Ду́ху:

Боже́ственное подо́бие, Варфоломе́е, доброде́телей ша́ром, преблаже́нне, написа́л еси́, отсю́ду апо́стол боже́ствен бы́в, все́м пропове́дал еси́ Христо́во прише́ствие многопе́тое.

И ны́не и при́сно и во ве́ки веко́в. Ами́нь.

Богородичен: Гро́зд созре́вший, Его́же невозде́ланно, Чи́стая, возрасти́ла еси́, на дре́ве я́ко узре́вши пове́шена, вопия́ла еси́: Ча́до сла́дкое, мсто́ иска́пи, и́мже страсте́й пия́нство оты́мется.

Пе́снь 8.

Ирмос: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те вся́ дела́ Госпо́дня Го́спода.

Припев: Святы́й апо́столе Варфоломе́е, моли́ Бо́га о нас.

Ве́лие и ма́ло, мно́го же и ума́лено, Спа́сово Ева́нгелие прему́дро научи́л еси́. Ве́лия и пресла́вная сложе́нными глаго́лы все́м назна́менал еси́, Варфоломе́е богому́дре.

Припев: Святы́й апо́столе Варфоломе́е, моли́ Бо́га о нас.

Якоже река́, от Сио́на исходя́, церко́вныя со́нмы напоя́еши, пребога́те, и пото́к боже́ственныя пи́щи испусти́л еси́ явле́ннейше, зовы́й: благослови́те, вся́ дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Боже́ственных даро́в я́ве светле́йшими и вели́кими я́ко апо́стол боже́ственне украси́лся еси́. Превосхо́дит са́н благосла́вия всего́, блаже́нне, су́щее во челове́цех зри́мое благода́тию.

И ны́не и при́сно и во ве́ки веко́в. Ами́нь.

Богородичен: Ум безстра́стен в ложесна́х Твои́х едини́тся челове́чу уму́, Всечи́стая, пло́ти же дебельство́м подле́тен бы́в, веко́в превы́шший. Те́м Тя́, Богоро́дице, ве́рою и любо́вию сла́вим.

Песнь 9

Ирмос: Безнача́льна Роди́теля Сы́н, Бо́г и Госпо́дь, вопло́щься от Де́вы, на́м яви́ся, омраче́нная просвети́ти, собра́ти расточе́нная, те́м Всепе́тую Богоро́дицу, велича́ем.

Припев: Святы́й апо́столе Варфоломе́е, моли́ Бо́га о нас.

Сло́ва бы́в самови́дец и служи́тель, учени́к же и пропове́дник богови́ден, иде́же ны́не е́сть Сло́во, ты́ жи́ти вои́стинну сподо́бился еси́, я́коже Са́м обеща́ нело́жно Преблаги́й.

Припев: Святы́й апо́столе Варфоломе́е, моли́ Бо́га о нас.

Яко ны́не предстоя́ престо́лу Влады́ки твоего́ и отону́дными заря́ми осия́емь, о Варфоломе́е богому́дре, певцы́ твоя́ назира́я, страсте́й избавля́еши и разли́чных обстоя́ний.

Сла́ва Отцу́ и Сы́ну и Свято́му Ду́ху:

Сы́н ве́ры ра́ди сподо́блься бы́ти Бо́гу, оте́ческих насле́дник сокро́вищ бы́л еси́. О, великода́рныя дла́ни! О, дарова́ния, ны́не превосходя́щаго, Христа́, просла́вльшаго тя́, богови́дче всеблаже́нне!

И ны́не и при́сно и во ве́ки веко́в. Ами́нь.

Богородичен: Разуме́вше издале́ча прозорли́выма очи́ма, проро́цы Тя́ вси́ провозгласи́ша, хотя́щую Ма́терь бы́ти Вседе́теля и все́х Влады́ки. Те́м Тя́, Всепе́тую Богоро́дицу, возвеща́ем.

Свети́лен.

Апо́столы Христо́вы прииди́те, лю́дие, воспои́м, боже́ственнаго Варфоломе́я и Варна́ву му́драго, пропове́дники ве́ры, я́ко моля́щияся Христу́ о душа́х на́ших.

Сла́ва, и ны́не, Богородичен:

Чи́стая Влады́чице Свята́я и еди́на Муженеиску́сная, спасе́ние и упова́ние Ты́, моли́ из Тебе́ рожде́ннаго Изба́вителя на́шего спасти́ ми́р от ле́сти, бе́д и скорбе́й.

Молитва апостолу Варфоломею

О, преславный Апостоле Христов Варфоломее, душу за Христа предавший и кровию твоею пажить Его удобривший! Услыши чад твоих молитвы и воздыхания, сердцем сокрушенным ныне приносимыя. Се бо беззаконьми омрачихомся, и того ради бедами, якоже тучами, обложихомся, елея же добраго жития обнищахом зело, и не возможем противитися волком хищным, иже расхищати наследие Божие дерзостно тщатся. О, сильный! Понеси немощи наша, не отлучайся духом от нас, да не разлучимся в конец от любве Божия, но крепким заступлением твоим нас защити, да помилует Господь всех нас молитв твоих ради, да истребит же рукописание безмерных грехов наших, и да сподобит со всеми святыми блаженнаго Царствия и брака Агнца Своего, Емуже честь и слава, и благодарение и поклонение во веки веков. Аминь.