24 июня.
Канон первый на перенесение мощей преподобного Ефрема Новоторжского
![на перенесение мощей преподобного Ефрема Новоторжского на перенесение мощей преподобного Ефрема Новоторжского](img_i/109.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 1:
Боже́ственною свы́ше благода́тию просвети́вся, Богому́дре,/ и по сме́рти яви́ тя све́тлость жития́ твоего́,/ те́мже источа́еши ми́рови благоуха́ние,/ и́же с ве́рою притека́ющим к ра́це моще́й твои́х, Ефре́ме преподо́бне./ Тем вопие́м ти:/ сла́ва Да́вшему ти чудесе́м благода́ть,/ сла́ва Просла́вльшему тя в чудесе́х,/ сла́ва Де́йствующему тобо́ю всем исцеле́ния.
Кано́н, гла́с 6.
Пе́снь 1.
Ирмос: Помо́щник и Покрови́тель/ бы́сть мне во спасе́ние,/ Сей мой Бог,/ и просла́влю Его́,/ Бог отца́ моего́,/ и вознесу́ Его́,/ сла́вно бо просла́вися.
Припев: Преподо́бне о́тче Ефре́ме моли́ Бо́га о нас.
Бо́же, Спа́се мой,/ отве́рзи ми устне́ и язы́к мой уясни́,/ я́ко да воспою́ па́мять преподо́бнаго Твоего́,/ его́же на земли́ удиви́л еси́ славосло́вити Тя,/ сла́вно бо просла́вися.
Припев: Преподо́бне о́тче Ефре́ме моли́ Бо́га о нас.
Па́мять твоя́, преподо́бне, пребыва́ет в род и род,/ сию́ почита́юще и Боже́ственныя твоея́ сла́вы насыща́ющеся,/ досто́йно Бо́жия дарова́ния, де́тели, тебе́ воздае́м,/ Го́сподеви пою́ще, сла́вно бо просла́вися.
Сла́ва Отцу́ и Сы́ну и Свято́му Ду́ху:
К Боже́ственней ра́це твое́й, веселя́щеся, приближа́емся/ и хва́лим Боже́ственный твой зрак, и́же в Вы́шних поко́ищех пребыва́ет,/ Го́сподеви пою́ще, сла́вно бо просла́вися.
И ны́не и при́сно и во ве́ки веко́в. Ами́нь.
Богородичен: Окова́нных Свободи́теля, Богоро́дице,/ и те́мных Просвети́теля чре́во Твое́ пресвято́е вмести́,/ Его́же рождество́м и́дольския льсти́ свобо́ждшеся,/ и и́стинную Тя навыко́хом воспева́ти Бо́жию Ма́терь.
Пе́снь 3.
Ирмос: Утверди́, Го́споди,/ на ка́мени за́поведей Твои́х/ подви́гшееся се́рдце мое́,/ я́ко Еди́н Свят еси́ и Госпо́дь.
Припев: Преподо́бне о́тче Ефре́ме моли́ Бо́га о нас.
Па́мять твоя́ пребыва́ет в век ве́ка, свя́те,/ кре́пость се́рдца твоего́, в род и род,/ ти уподобля́ющеся и Боже́ственныя твоея́ сла́вы насыща́ющеся,/ досто́йно тя воспева́ем.
Припев: Преподо́бне о́тче Ефре́ме моли́ Бо́га о нас.
Вод от исто́чника ева́нгельскаго пив досто́йно,/ от чре́ва ны́не ре́ки чуде́с источа́еши/ и напая́еши ве́рою притека́ющия ти.
Сла́ва Отцу́ и Сы́ну и Свято́му Ду́ху:
Кре́пкую с высоты́ по́мощь и просвеще́ние посли́ ра́зума,/ я́ко ра́вно тя А́нгелом похва́лим, преподо́бне Ефре́ме,/ ты бо исто́чник чудесе́м бы́сть.
И ны́не и при́сно и во ве́ки веко́в. Ами́нь.
Богородичен: Свет Боже́ственный из чре́ва Твоего́ возсия́, ве́рныя благоуха́я,/ Сего́ благово́ния получи́вше,/ омраче́ния свободи́хомся Тобо́ю, Богоро́дице Пречи́стая.
Седа́лен, гла́с 4:
Приспе́ пра́здник све́тлаго твоего́ торжества́, блаже́нне Ефре́ме,/ просвеща́я всех, пра́зднующих па́мять твою́, све́тло./ Блиста́нием Боже́ственнаго све́та, преподо́бне о́тче, при́сно озаря́емь,/ ве́сь светови́ден был еси́,/ мно́гими укра́шен от Бо́га дарова́ньми,/ во оби́тели дости́гл еси́ Небе́сныя,/ в ни́хже мо́лишися о и́же ве́рою пою́щих тя/ и Христа́ непреста́нно сла́вящих.
Сла́ва, и ны́не, Богородичен:
И́же на Престо́ле херуви́мстем седя́й, в не́дрех О́тчих водворя́емь,/ я́ко на престо́ле святе́м Свое́м, седи́т, Влады́чице, в не́дрех Твои́х./ Бог бо вои́стинну воцари́ся над все́ми язы́ки,/ и разу́мно пое́м Ему́,/ Его́же моли́ спасти́ся рабо́м Твои́м.
Пе́снь 4.
Ирмос: Услы́ша проро́к прише́ствие Твое́, Го́споди, и убоя́ся,/ я́ко хо́щеши от Де́вы роди́тися/ и челове́ком яви́тися, и глаго́лаше:/ услы́шах слух Твой и убоя́хся;/ сла́ва си́ле Твое́й, Го́споди.
Припев: Преподо́бне о́тче Ефре́ме моли́ Бо́га о нас.
Чудеса́, и́хже Влады́кою сподо́блен бы́сть, преподо́бне, зря́ще,/ приходя́щии к ра́це твое́й, духо́вный сла́дости насыща́емся,/ предста́теля тя иму́ще ко Влады́це,/ и свобо́ду прича́стия Боже́ственнаго улучи́ти мо́лимся, пою́ще:/ си́ле Твое́й сла́ва, Человеколю́бче.
Припев: Преподо́бне о́тче Ефре́ме моли́ Бо́га о нас.
Восприи́м житие́, и́же на Небесе́х пребыва́ние,/ со А́нгелы лику́еши,/ я́ко, оста́вив зе́млю и оте́чество свое́,/ пресели́лся еси́ та́мо су́щему пребыва́нию.
Сла́ва Отцу́ и Сы́ну и Свято́му Ду́ху:
Облиста́л еси́, я́ко невече́рнее со́лнце,/ град Торже́к просвеща́я, преподо́бне Ефре́ме,/ тьмы́ изба́ви страсте́й, и́же на нас наве́туемых,/ возста́ви от враг непреткнове́нным бы́ти,/ тем пое́м твою́ святу́ю па́мять.
И ны́не и при́сно и во ве́ки веко́в. Ами́нь.
Богородичен: Чре́во деви́ческое но́сит Своего́ Созда́теля,/ еде́мская две́рь отверза́ется,/ а́бие ве́рных со́нми дерзнове́нно вхо́дят,/ и́стинную Богоро́дицу ве́рно восхваля́ют, Рожде́нному от Нея́ зову́ще:/ си́ле Твое́й сла́ва, Человеколю́бче.
Пе́снь 5
Ирмос: Мир мног лю́бящим Тя, Христе́,/ и но́щь просвеще́ния в пи́щи слове́с Твои́х,/ сего́ ра́ди, от но́щи у́тренююще,/ про́сим ми́лости от Тебе́, Человеколю́бче.
Припев: Преподо́бне о́тче Ефре́ме моли́ Бо́га о нас.
Пра́зднующим све́тло честну́ю па́мять твою́, преподо́бне Ефре́ме,/ и чту́щим честны́я мо́щи твоя́,/ мир испроси́, усо́бныя же ра́ти укроти́, мо́лимтися, преподо́бне,/ боле́зни на́ша уврачу́й моли́твами твои́ми.
Припев: Преподо́бне о́тче Ефре́ме моли́ Бо́га о нас.
Мо́лниями чуде́с твои́х, преподо́бне всебога́те Ефре́ме,/ це́рковь твою́ озари́, град Торже́к и лю́ди бо в нем осия́й,/ пра́зднующия любо́вию па́мять твою́.
Сла́ва Отцу́ и Сы́ну и Свято́му Ду́ху:
Преблаже́нне преподо́бне Ефре́ме, моли́ся приле́жно,/ отгна́ти от оби́тели сей належа́щую ско́рбь на́шу и премину́ти,/ и грехо́м проще́ние испроси́, и язы́ческое преще́ние и о́блак разгна́ти,/ да тя, преподо́бне, велича́ем.
И ны́не и при́сно и во ве́ки веко́в. Ами́нь.
Богородичен: Пра́дедняя кля́тва разреши́ся/ и прама́терняя боле́знь исцели́ся, Пречи́стая, чре́ва Твоего́ рождество́м,/ без се́мене бо заче́нши Сло́во, родила́ еси́,/ Ему́же приле́жно моли́ся спасти́ся нам.
Пе́снь 6.
Ирмос: Возопи́х всем се́рдцем мои́м/ к Ще́дрому Бо́гу,/ и услы́ша мя/ от а́да преиспо́дняго,/ и возведе́/ от тли живо́т мой.
Припев: Преподо́бне о́тче Ефре́ме моли́ Бо́га о нас.
Честна́я твоя́ ра́ка, преподо́бне,/ возжже́нием свещи́ в Торже́к собира́ющихся просвеща́ет:/ гряди́те, вои́стинну просвеща́емся, ве́рнии.
Припев: Преподо́бне о́тче Ефре́ме моли́ Бо́га о нас.
Гра́ду наше́ствие тече́т,/ провосхища́я прири́нувших на честну́ю твою́ па́мять, преподо́бне,/ по гла́су Ева́нгелия, я́коже рече́ Госпо́дь:/ прииди́те ко Мне, вси тружда́ющиися и обремене́ннии,/ я́ко кро́ток е́смь и смире́н се́рдцем,/ и обря́щете поко́й душа́м ва́шим.
Сла́ва Отцу́ и Сы́ну и Свято́му Ду́ху:
Я́коже неистекомый исто́чник, источа́еши исцеле́ний ре́ки от честны́я своея́ ра́ки,/ подае́ши врачева́ние страсте́м неисце́льным,/ слепы́м дае́ши свет, и глухи́м слы́шание,/ и хромы́м хожде́ние, разсла́бленным здра́вие/ и всем благода́ть излива́еши, я́ко ми́ро на главе́, сходя́щее на браду́ Ааро́ню,/ ра́дости же свещу́ возжига́я у цельбоно́снаго гро́ба своего́, о́тче Ефре́ме.
И ны́не и при́сно и во ве́ки веко́в. Ами́нь.
Богородичен: Искони́ проро́чествия о Тебе́ прореко́шася,/ ны́не же на Тебе́ испо́лнися, Пречи́стая:/ ов бо Тя руно́ пронарече́, на него́ сни́де Сло́во Бо́жие,/ ны́не же Ты Де́вою род́и Го́спода.
Конда́к, гла́с 8:
Светоза́рную лучу́ похва́лим, преподо́бне,/ твою́ честну́ю ра́ку,/ многосве́тлою свеще́ю просвеща́ет бо Госпо́дь це́рковь твою́ от цельбоно́снаго гро́ба твоего́/ и озаря́ет омраче́нная на́ша се́рдца./ Я́коже со́лнце незаходи́мое, о́тче,/ подо́бие о́браза твоего́ возсия́ нам,/ и град Торже́к тобо́ю благода́ть прие́млет,/ обогаща́ющу ти всех нас добро́тою чуде́с,/ соде́янием благода́ти пою́щих ти: аллилу́ия.
Икос:
Пе́сньми похва́лим преподо́бнаго Ефре́ма,/ и с благоче́стием притеце́м к ра́це моще́й его́,/ и почерпа́ем дарова́ния я́ко от исто́чника исцеле́ния,/ и ра́достию возвесели́мся, усе́рдно обстоя́ще,/ светоно́сными пе́сньми просла́вим, глаго́люще:/ ра́дуйся, я́ко, Бо́гом наставля́емь, в сие́ ме́сто дости́гл еси́;/ ра́дуйся, я́ко пречестны́й храм страстоте́рпцем воздви́гл еси́,/ в не́мже тобо́ю Бог прославля́ется;/ ра́дуйся, я́ко оби́тель свою́ просвеща́еши чудесы́ свои́ми и учени́к мно́жества собра́л еси́;/ ра́дуйся, и́ноком смире́нию высото́;/ ра́дуйся, свети́льниче многосве́тлый;/ ра́дуйся, гра́ду Торжку́ утвержде́ние и оби́тели сей похвало́;/ ра́дуйся, облиста́в на гора́х, я́ко со́лнце;/ ра́дуйся, гра́ды и се́ла просвеща́я чудесы́;/ ра́дуйся, страны́ озаря́я добро́тами;/ ра́дуйся, гра́ду на́шему тве́рдое основа́ние;/ ра́дуйся, стране́ на́шей побе́дный ве́нче;/ ра́дуйся, свети́ло пресве́тлое, о́тче преподо́бне Ефре́ме.
Пе́снь 7.
Ирмос: Неизрече́нное чу́до:/ в пещи́ Изба́вивый преподо́бныя о́троки из пла́мене/ во Гро́бе мертв, бездыха́нен полага́ется/ во спасе́ние нас, пою́щих:/ Изба́вителю Бо́же,/ благослове́н еси́.
Припев: Преподо́бне о́тче Ефре́ме моли́ Бо́га о нас.
Благода́тию Бо́жиею нетле́нны сохранены́ бы́ша честны́я мо́щи твоя́, преподо́бне Ефре́ме,/ разли́чная исцеле́ния источа́ют ве́рою чту́щим па́мять твою́./ Те́мже вопие́м, ве́рнии:/ благослове́н Бог оте́ц на́ших.
Припев: Преподо́бне о́тче Ефре́ме моли́ Бо́га о нас.
Призыва́ющих и́мя твое́ во вся́ком ме́сте, преподо́бне,/ изба́ви от вся́каго зла и лю́тых нахожде́ний,/ да не одоле́ет нас сме́рть лю́тая, вопию́щих:/ благослове́н Бог оте́ц на́ших.
Сла́ва Отцу́ и Сы́ну и Свято́му Ду́ху:
Манове́нием Боже́ственным исцеле́ния подаю́т разли́чная мо́щи твоя́, преподо́бне,/ соде́йствует бо Дух Святы́й косте́м твои́м,/ исцеля́я во стра́се Бо́жий пою́щих:/ благослове́н Бог оте́ц на́ших.
И ны́не и при́сно и во ве́ки веко́в. Ами́нь.
Богородичен: Две́рь Тя затворе́нную нарече́ проро́к, Чи́стая,/ е́юже никто́же про́йде, то́кмо Бог Еди́н,/ отверза́ющий еде́мския вхо́ды ве́рно сла́вящим Тя.
Пе́снь 8.
Ирмос: За зако́ны оте́ческия/ блаже́ннии в Вавило́не ю́ноши предбе́дствующе,/ царю́ющаго оплева́ша повеле́ние безу́мное/ и, совоку́плени, и́мже не свари́шася огне́м,/ Держа́вствующему досто́йную воспева́ху пе́снь:/ Го́спода по́йте, дела́,/ и превозноси́те во вся ве́ки.
Припев: Преподо́бне о́тче Ефре́ме моли́ Бо́га о нас.
Све́том Боже́ственным и благоуха́нием цвету́щи,/ свяще́нная па́мять твоя́, преподо́бне Ефре́ме,/ просвеща́ет ве́рных, созыва́ющи вопи́ти:/ Го́спода по́йте, дела́, и превозноси́те Его́ во ве́ки.
Припев: Преподо́бне о́тче Ефре́ме моли́ Бо́га о нас.
Жела́емыя сы́тости Боже́ственная твоя́ ча́да напо́лнишася, прося́ще,/ благоукраше́нною твое́ю па́мятию прохлажда́еми,/ и, веселя́щеся, ве́рно пою́т пресла́вную па́мять твою́, преподо́бне, взыва́юще:/ Го́спода воспева́йте, дела́, и превозноси́те Его́ во ве́ки.
Сла́ва Отцу́ и Сы́ну и Свято́му Ду́ху:
Весе́лие приснотеку́щее твоя́ ра́ка то́чит, о́тче Ефре́ме сла́вне,/ приходя́щих очища́ет скве́рны плотски́я, вку́пе и душе́вныя,/ благода́тию всех Царя́ и Бо́га на́шего, пою́щих:/ Го́спода воспева́йте, дела́, и превозноси́те Его́ во ве́ки.
И ны́не и при́сно и во ве́ки веко́в. Ами́нь.
Богородичен: Неоску́дныя пото́ки милосе́рдия источа́ющи/ призыва́ющим Тя, Влады́чице, и пе́сньми хва́лящим Тя, Пречи́стая,/ не оста́ви моля́щихся, Ца́рствию Сы́на Твоего́ сподо́би пою́щих:/ Го́спода воспева́йте, дела́, и превозноси́те Его́ во ве́ки.
Песнь 9
Ирмос: Стра́нствия Влады́чня/ и Безсме́ртныя Трапе́зы/ на Го́рнем ме́сте высо́кими умы́,/ ве́рнии, прииди́те, наслади́мся,/ возше́дша Сло́ва,/ от Сло́ва научи́вшеся, Его́же велича́ем.
Припев: Преподо́бне о́тче Ефре́ме моли́ Бо́га о нас.
Све́тлое торжество́, се па́мять свяще́нна,/ се благода́ть соше́дшимся ве́рно, оби́льно целова́ние точа́щим,/ присту́пим, ве́рнии, источа́ет бо нам всечестна́я ра́ка блаже́ннаго Ефре́ма/ просвеще́ние приснотеку́щее безсме́ртия.
Припев: Преподо́бне о́тче Ефре́ме моли́ Бо́га о нас.
Вои́стинну ты, преподо́бне, богоизбра́н на прославле́ние святы́м страстоте́рпцем,/ це́рковь бо воздви́гл еси́ Бори́са и Гле́ба,/ в не́йже ты, блаже́нне, непреста́нно Бо́га сла́виши/ и по успе́нии свое́м чуде́с све́тлостию просвеща́еши у ра́ки моще́й твои́х.
Сла́ва Отцу́ и Сы́ну и Свято́му Ду́ху:
Чудеса́ твори́ши мно́зи вои́стинну, преподо́бне, от цельбоно́снаго гро́ба твоего́/ и исцеле́ния безчи́сленная незави́стно подава́еши/ с те́плою ве́рою притека́ющим к честне́й ра́це твое́й,/ Ефре́ме преблаже́нне, соблюди́ град Торже́к и святу́ю оби́тель сию́.
И ны́не и при́сно и во ве́ки веко́в. Ами́нь.
Богородичен: Дре́вним преступле́нием введе́ в па́губу пра́баба естества́ земна́го,/ рождества́ Твоего́ прижи́тием, Пречи́стая, па́ки Бо́гу примири́хомся,/ Его́же сла́вяще, Тебе́, Де́во, велича́ем.
Свети́лен.
Весели́теся, вси земни́и ро́ди, ра́дуйся, гра́де Торже́к,/ лику́йте, и́нок мно́жества, прииди́те, празднолю́бцы,/ я́ко да наслади́мся ны́нешняго торжества́,/ пе́сньми и хвала́ми почти́м ди́внаго и сла́внаго в чудесе́х преподо́бнаго Ефре́ма/ и любо́вно соверши́м па́мять его́, прося́ще:/ блаже́нне, помяни́ нас, хва́лящих твою́ па́мять.
Сла́ва, и ны́не, Богородичен:
Ра́дуйся, ве́рным похвало́;/ ра́дуйся, преподо́бным утвержде́ние./ Ра́дуйся, пра́ведным сла́во;/ ра́дуйся, све́те су́щим во тьме́./ Ра́дуйся, хра́ме пресвяты́й;/ ра́дуйся, Бо́жий раю́./ Ра́дуйся, кля́твы разреше́ние, Благослове́нная Мари́е.
Молитва
О священная главо, великий и предивный чудотворче, отче наш Ефреме! К тебе скорому помощнику и усердному о нас молитвеннику смиренно прибегаем, и молитвенно просим тя: нас скорбных и обремененных грехи многими, не остави помощию твоею и заступлением благодатным. Не забуди нас чад твоих, отче священнейший, но поминай нас присно в небесных богоприятных молитвах твоих у престола Пресвятыя Троицы, идеже со ангелы и всеми святыми предстоиши, и зриши вся нашя нужды и беды, яко обуреваемся страстьми и не имамы дерзновения ко Творцу, просити Его о помиловании и спасении. Темже тебе предлагаем яко умилостивителя пред Господом, и тобою уповаем милость Божию и прощение грехов наших от Вседержителя получити, и спасение вечное унаследовати, да славим и поем величие, и благодать и человеколюбие Отца и Сына и Святаго Духа, и твое отеческое заступление, ныне и присно, и во веки веков. Аминь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![на перенесение мощей преподобного Ефрема Новоторжского на перенесение мощей преподобного Ефрема Новоторжского](img_b/109.jpg)