24 июня.
Канон святым первомученикам земли Китайския.
![Святым первомученикам земли Китайския Святым первомученикам земли Китайския](img_i/064.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь святы́м первому́чеником Кита́йским, гла́с 5:
В стране́ язы́честей ве́рою Правосла́вною просвети́стеся / и вма́ле в ве́ре пожи́вше, Ца́рствие ве́чное насле́довасте, / чистото́ю нра́вов христиа́нских / лжеблагоче́стие конфуциа́нское посрами́сте, / и бесодохнове́нный будди́зм попра́сте я́ко уме́ты, / кро́вию ва́шею зе́млю Кита́йскую освяща́юще, / те́мже, мо́лимся, Влады́ку все́х моли́те, / страну́ ва́шу в после́дняя времена́ ве́рою Правосла́вною просвети́ти, / и на́с в не́й укрепи́ти.
Кано́н святы́м первому́чеником земли́ Кита́йския, гла́с 6.
Пе́снь 1.
Ирмос: Волно́ю морско́ю скры́вшаго дре́вле, гони́теля мучи́теля — под земле́ю скры́ша спасе́нных о́троцы; но мы́ я́ко отрокови́цы, Го́сподеви пои́м, сла́вно бо просла́вися.
Припе́в: Святи́и первому́ченицы кита́йстии, моли́те Бо́га о на́с!
Пра́вду Твою́, Христе́ Бо́же, в се́рдце мое́м не скры́ю, и спасе́ние Твое́ во все́х язы́цех воспою́; прикосни́ся у́бо усто́м мои́м, у́глием Ду́ха Твоего́ скве́рну мою́ очища́я, Сло́ве, да доброслове́сне воспою́ первому́ченик кита́йских по́двиг кра́сный.
Припе́в: Святи́и первому́ченицы кита́йстии, моли́те Бо́га о на́с!
Святы́й апо́столе Фомо́, Ева́нгелия в земли́ импера́тора же́лтаго пе́рвый пропове́дниче, ра́дуйся ны́не, досто́йное ро́ждие Христо́во зря́: новому́чеников ли́к, ве́ры Правосла́вныя, тобо́ю дре́вле пропове́данныя, но́вая хвала́, ве́рным же ра́дование.
Припе́в: Святи́и первому́ченицы кита́йстии, моли́те Бо́га о на́с!
Седя́щим ва́м во тьме́ и се́ни сме́ртней, све́том Правосла́вия озари́стеся и к и́стинному Бо́гу, в Тро́ице Еди́ному, все́м се́рдцем притеко́сте, отону́дуже и светоно́сием ва́шим ве́рнии ны́не просвеща́ются.
Припе́в: Святи́и первому́ченицы кита́йстии, моли́те Бо́га о на́с!
Свяще́ннейшее и́мя Христо́во в Кита́и ва́ми ны́не возвели́чися, прехва́льнии страстоте́рпцы, и́бо во испове́дании ва́шем до конца́ непоколе́блемо пребы́вше, Ангелов возра́довасте и челове́ков удиви́сте.
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Богородичен: Вои́стинну Тя́, Де́во Преблагослове́нная, вси́ ро́ди велича́ют, се́ бо и земля́ Кита́йская Тебе́ новому́ченик усты́ благода́рственная воспису́ет: ра́дуйся, Спа́са на́шего нетле́нно ро́ждшая.
Пе́снь 3.
Ирмос: Тебе́, на вода́х пове́сившаго всю́ зе́млю неодержи́мо, тва́рь, ви́девши на ло́бнем ви́сима, у́жасом мно́гим содрога́шеся, не́сть свя́т, ра́зве Тебе́, Го́споди, взыва́ющи.
Припе́в: Святи́и первому́ченицы кита́йстии, моли́те Бо́га о на́с!
Аще и в стране́ безбо́жней роди́стеся, богорачи́тельне и́стину взыска́сте и во́ду живу́ю в живо́т ве́чный теку́щую в Це́ркви Правосла́вней обрето́сте.
Припе́в: Святи́и первому́ченицы кита́йстии, моли́те Бо́га о на́с!
Сни́де неча́янно до́ждь испыта́ний, приидо́ша ре́ки гне́ва, язы́ков бу́ри нападо́ша на вы́, христому́ченицы до́блии, и́хже небу́рно, я́ко ве́рнии Христу́ до сме́рти, претерпе́сте до конца́.
Припе́в: Святи́и первому́ченицы кита́йстии, моли́те Бо́га о на́с!
Кра́сное ва́ше к Го́рнему Иерусали́му ше́ствие воспева́ем, мужедо́блестию диви́мся, боголю́бием ва́шим ду́ши на́ша, досточу́днии, услажда́ются, те́м у́бо бу́дите на́м и в ра́достех и в ско́рбех соше́ственники.
Припе́в: Святи́и первому́ченицы кита́йстии, моли́те Бо́га о на́с!
Аще посреде́ те́рний кри́ну прозя́бшему диви́мся, кольми́ па́че све́тлым си́м звезда́м, в бе́здне язы́ческаго мра́ка я́сно возблиста́вшимся, ва́с пое́м, восто́ка да́льняго богоза́рнии свети́льницы.
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Богородичен: Бо́г посреди́ Тебе́ всели́вся, ника́ко де́вства Твоего́ ключи́ поколеба́, Чи́стая, Его́же приле́жно моли́, утверди́ти вся́ пою́щия Тя́.
Седа́лен, гла́с 8:
Све́том небе́сным сия́ет дне́сь хра́м се́й: недугоцели́тельный кла́дязь неисчерпа́емый, новому́ченик собо́р, во́д свои́х подае́т живоро́дную сла́дость, любо́вию чту́щим я́, и сласте́й напое́ние го́рькое су́шит.
Сла́ва, и ны́не, Богородичен:
Земна́го жития́ преле́стных отто́ргшеся, и пло́ти му́ками креству́емы отре́шшеся, крестоно́сному Бо́гу на́шему ве́рны до сме́рти пребы́ша, от Тебе́ пло́тию Рожде́нному, Ма́ти Де́во; и́х моли́твами, я́ко Блага́я, очи́сти ны́ от вся́каго греха́, Кресто́м Боже́ственным.
Пе́снь 4.
Ирмос: На Кресте́ Твое́ Боже́ственное истоща́ние прови́дя, Авваку́м, ужа́сся, вопия́ше: Ты́ си́льных пресе́кл еси́ держа́ву, Бла́же, приобща́яся су́щим во а́де, я́ко Всеси́лен.
Припе́в: Святи́и первому́ченицы кита́йстии, моли́те Бо́га о на́с!
Му́ченицы преблаже́ннии, са́ми себе́ на во́льное преда́сте заколе́ние, и зе́млю Кита́йскую кровьми́ свои́ми освяти́вше, и ны́не о все́х, любо́вию па́мять ва́шу пра́зднующих, моли́те Христа́ Бо́га.
Припе́в: Святы́й му́чениче Па́вле, моли́ Бо́га о на́с.
Па́влу, вели́кому язы́к апо́столу, тезоимени́те, му́чениче Па́вле, ра́дости испо́лнь, про́поведи послужи́л еси́ ева́нгельстей, и с моли́твою во усте́х ду́шу свою́ Бо́гу возлю́бленному от тебе́ преда́л еси́.
Припе́в: Свята́я му́ченице Ие, моли́ Бо́га о на́с.
Ие, блаже́нная ве́ры наста́внице, не убоя́лася еси́ за Христа́ пострада́ти, и два́жды заму́чена бы́вши, кра́сное по́прище, я́ко а́гница Христо́ва непоро́чная, в чи́стей ве́ре сконча́ла еси́.
Припе́в: Святы́й му́чениче Иоа́нне, моли́ Бо́га о на́с.
Отроче Иоа́нне, о́смь ле́т от рождества́ твоего́ в ми́ре се́м пожи́в, ме́ру во́зраста Христо́ва дости́гл еси́, я́ко за Христа́ закла́н бы́л еси́, та́же я́ко а́гнец всесожже́н. Ра́дуйся ны́не, но́вый Исаа́че, ра́дуйся, му́чениче всечу́дне!
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Богородичен: Богороди́тельнице пречу́дная, Просвеще́ние ми́ру ро́ждшая, не преста́й моля́щи вку́пе с новому́ченики, ны́не прославля́емыми, Сы́на и Бо́га Твоего́, дарова́ти и ро́ду кита́йскому, в идолослуже́нии угле́бшему зело́, поне́ наконе́ц просвеще́ние.
Пе́снь 5
Ирмос: Богоявле́ния Твоего́, Христе́, к на́м ми́лостивно бы́вшаго, Иса́ия, Све́т ви́дев Невече́рний, из но́щи у́треневав взыва́ше: воскре́снут ме́ртвии, и воста́нут су́щии во гробе́х, и вси́ земноро́днии возра́дуются.
Припе́в: Святи́и первому́ченицы кита́йстии, моли́те Бо́га о на́с!
Сия́ет па́мять ва́ша, рабы́ Христо́вы ве́рнии, и ве́рных сердца́ те́пле озаря́ет, покланя́ющихся любо́вию о́бразу честно́му ва́шему и пою́щих ва́м: ра́дуйтеся, ве́лия бо есте́ ве́ры Правосла́вныя похвала́!
Припе́в: Святи́и первому́ченицы кита́йстии, моли́те Бо́га о на́с!
О, преблаже́ннии Христо́вы уго́дницы! Не забу́дите оте́чества ва́шего земна́го: мра́к Богопротивле́ния отжени́те, в неве́дении косня́щия просвети́те, и покая́ния вре́мени все́м дарова́тися у Христа́ неотсту́пно проси́те.
Припе́в: Святи́и первому́ченицы кита́йстии, моли́те Бо́га о на́с!
Воспои́м све́тлыя о́троцы кита́йския, от возбесне́вшихся язы́чник за Христа́ закла́нныя; те́х па́мять ны́не соверша́ем, вифлее́мское по́двига и́х подо́бие тайнозря́ще: таце́х бо е́сть Ца́рствие небе́сное!
Припе́в: Святы́й му́чениче Иоа́нне, моли́ Бо́га о на́с.
Отроче Иоа́нне, пред сме́ртию осклабля́яся, мучи́телем ре́кл еси́, я́ко не́сть тя́жко за Христа́ страда́ти. О, чу́дное земли́ Кита́йския прозябе́ние! Благоуха́нием кро́тости твоея́ испо́лни и на́ша сердца́!
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Богородичен: Все́х Творца́, Бо́га же и Соде́теля, Всенепоро́чная Чи́стая, Ду́хом Боже́ственным в ложесна́х зачала́ еси́, Его́же сла́вяще, Тя́ воспева́ем, Де́во, я́ко пала́ту Царя́ все́х, и ми́ра заступле́ние.
Пе́снь 6.
Ирмос: Я́т бы́сть, но не удержа́н в пе́рсех ки́товых Ио́на: Тво́й бо о́браз нося́, Страда́вшаго, и погребе́нию да́вшагося, я́ко от черто́га от зве́ря изы́де. Приглаша́ше же кустоди́и: храня́щии су́етная и ло́жная, ми́лость сию́ оста́вили есте́.
Припе́в: Святы́й священному́чениче Митрофа́не, моли́ Бо́га о на́с.
Досто́йно е́сть хвале́ние осо́бь тебе́ воспе́ти, пе́рвый в Кита́и священному́чениче ве́ры Правосла́вныя; благослови́ ны свы́ше, о́тче достохва́льне, и моли́тву на́шу Бо́гу принеси́.
Припе́в: Святы́й священному́чениче Митрофа́не, моли́ Бо́га о на́с.
В дому́ христиа́н правосла́вных ро́ждься, во благоче́стии до́бре воспита́н бы́л еси́, и от ю́ности твоея́ и́стинную ве́ру возлюби́л еси́, Митрофа́не достоблаже́нне.
Припе́в: Святы́й священному́чениче Митрофа́не, моли́ Бо́га о на́с.
В ве́ре Христо́ве непоколеби́м пребы́в, удосто́ился еси́ до сме́рти за Христа́ пострада́ти, те́мже ра́дуйся, пра́вило ве́ры, о́бразе кро́тости, благоче́стия похвало́!
Припе́в: Святы́й священному́чениче Митрофа́не, моли́ Бо́га о на́с.
Свяще́ннаго зва́ния а́ще и недосто́йна себе́ непщева́л еси́, возведе́ тя́ апо́стол Япо́нии вели́кий Никола́й на го́ру па́стырскаго ро́ду твоему́ служе́ния; ны́не же с равноапо́столом Тро́ице ку́пно предстоя́ща, моли́тася усе́рдно спасти́ся душа́м на́шим.
Припе́в: Святы́й священному́чениче Митрофа́не, моли́ Бо́га о на́с.
Пе́рвее по́ты служе́ния ни́ву ду́ш напая́я, по́слежде кро́ве проли́тием зла́ки немощны́я укрепля́я, и по сме́рти о ро́де твое́м пече́шися, сла́вне.
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Богородичен: Святе́йшу Ангелов и всея́ тва́ри Вы́шшу, из Тебе́ пло́тию Роди́выйся, Тя́ соде́ла, те́мже, я́ко Влады́чица, с новому́ченики земли́ Кита́йския, о на́с Сы́на и Бо́га Твоего́ моли́.
Конда́к, гла́с 1:
Му́ченицы после́дних време́н, / в кро́ви Агнчей ри́зы своя́ убели́ли есте́, / любве́ ра́ди ко Христу́ кро́вь ва́шу пролия́ли есте́, / сего́ ра́ди ны́не в Це́ркви небе́сней де́нь и но́щь Ему́ слу́жите; / те́мже за ны́ Христа́ моли́те, му́ченицы сла́внии, / от прельще́ния анти́христа да сокры́ет ма́лое ста́до свое́, / и от ско́рби вели́кия да на́с все́х приведе́т / ко стране́ невече́рняго све́та.
Икос:
Ангельстии во́и возра́дувахуся, егда́ от мра́ка язы́чества к све́ту Правосла́вия притеко́сте, святы́м креще́нием ду́ши и телеса́ ва́ша от грехо́в ощища́юще. Мы́ же, жре́бий тя́жкий в ве́це се́м но́ваго язы́чества Христу́ служи́ти улучи́вше, пред ико́ною ва́шею пе́ние возно́сим сицево́е: ра́дуйтеся, испове́дницы Христо́вы в ве́це се́м богоху́льнем; ра́дуйтеся, све́тлыя зве́зды восто́ка; ра́дуйтеся, Истинному Бо́гу покло́нницы ве́рнии; ра́дуйтеся, си́льнии бесо́м сопротивобо́рцы; ра́дуйтеся, свети́льницы, тьму́ язы́ческую разгна́вшии; ра́дуйтеся, и́долы скве́рныя попра́вшии; ра́дуйтеся, земли́ Кита́йския кри́ны пречу́днии; ра́дуйтеся, о просвеще́нии ро́да ва́шего те́пле моля́щиися; ра́дуйтеся, о́вцы многострада́льныя Па́стыря за ны́ закла́вшагося; ра́дуйтеся, терпе́ния столпы́ богорачи́тельнаго; ра́дуйтеся, Боже́ственныя любве́ со́лнца огнезра́чная; ра́дуйтеся, от но́щи неве́дения ко у́тру богозна́ния дости́гшии; ра́дуйтеся, сла́внии первому́ченицы кита́йстии, на́с до конца́ претерпе́ти укрепля́ющии!
Пе́снь 7.
Ирмос: Неизрече́нное чу́до: в пещи́ Изба́вивый преподо́бныя о́троки из пла́мене, во гро́бе ме́ртв бездыха́нен полага́ется, во спасе́ние на́с пою́щих: Изба́вителю Бо́же, благослове́н еси́.
Припе́в: Свята́я м́ченице Татиа́но, моли́ Бо́га о на́с.
Новому́ченицу Татиа́ну, во главу́ за Христа́ усече́нную восхва́лим, та́ бо за на́с хода́тайствует пред престо́лом Тро́ицы Боже́ственныя, е́же спасти́ся все́м пою́щим ю́.
Припе́в: Святы́й м́чениче Иса́ие, моли́ Бо́га о на́с.
Ре́вность проро́ческую ко Христу́ име́я, блаже́нне Иса́ие, не пощади́л еси́ тле́нныя пло́ти твоея́, недосто́йны непщу́я стра́сти вре́менныя ко хотя́щей по ни́х яви́тися сла́ве небе́сней.
Припе́в: Свята́я м́ченице Мари́е, моли́ Бо́га о на́с.
Иса́ия пресла́внаго обру́чнице, ди́вная новому́ченице Мари́е, Пречи́стей Богома́тери тезоиме́нна су́щи, близ це́ркве Ея́, иде́же и роди́лася еси́, умре́ти восхоте́ла еси́.
Припе́в: Святи́и первому́ченицы кита́йстии, моли́те Бо́га о на́с!
Ра́дуйтеся, адама́нты тве́рдии, Христо́вы испове́дницы; ра́дуйтеся, ве́рным храни́телие неотсту́пнии; ра́дуйтеся, ча́ши Христо́ве прича́стницы, креще́нием Его́ крести́вшиися; вели́кую ва́шу к Бо́гу любо́вь вся́ Це́рковь ны́не воспева́ет.
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Богородичен: Нов Ада́м за пе́рваго Ты́ бы́л еси́, от Де́вы за прама́терь, Изба́витель все́х и Спа́с, за сме́рть — и́стинная Жи́знь безсме́ртная, те́мже Тя́ ро́ждшую Богоро́дицу ве́дуще, по достоя́нию вси́ ве́рнии ублажа́ем.
Пе́снь 8.
Ирмос: Ужасни́ся, боя́йся, Не́бо, и да подви́жатся основа́ния земли́: се́ бо в мертвеце́х вменя́ется в Вы́шних Живы́й, и во гро́б ма́л странноприе́млется. Его́же о́троцы благослови́те, свяще́нницы воспо́йте, лю́дие превозноси́те во вся́ ве́ки.
Припе́в: Святи́и первому́ченицы кита́йстии, моли́те Бо́га о на́с!
Богоизбра́ннии новому́ченицы, ве́рою несомне́нною в рука́х мучи́телей вда́стася: младе́нцы с ма́терьми, о́троцы и отрокови́цы, ю́ноши и де́вы, ста́рцы с ю́нотами, имени́тии и безъиме́ннии, Бо́гу же Истинному покло́нницы ве́рнии, Го́спода пою́ще и превознося́ще во вся́ ве́ки.
Припе́в: Святи́и первому́ченицы кита́йстии, моли́те Бо́га о на́с!
Сла́вный по́лче бра́нник неустраши́мых, удо́в растерза́нием диа́вольския се́ти растерза́сте, и я́ко зве́зды златоза́рныя зе́млю Кита́йскую озари́сте, сия́нием ва́шим и на́с просвети́те, Го́спода прославля́ющия и превознося́щия в хра́ме ва́шем.
Припе́в: Святи́и первому́ченицы кита́йстии, моли́те Бо́га о на́с!
Прославля́ем ва́с, новому́ченицы всехва́льнии, прозна́тельне Человеколю́бцем Го́сподем избра́ннии, и мо́лимся: светоза́рный со́нме, просвети́тельне возсия́йте, те́плыми к Бо́гу моли́твами, зари́ Правосла́вия и стране́ ва́шей.
Припе́в: Святи́и первому́ченицы кита́йстии, моли́те Бо́га о на́с!
Прорцы́ ны́не, Дави́де богогла́сне, я́ко от стра́н собра́ Госпо́дь, и́хже изба́ви из руки́ врага́, от восто́к, и за́пад, от се́вера и мо́ря, во́ду бо жи́ву сло́ва Бо́жия обре́тше напая́ют ду́ши любо́вию пою́щих я́.
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Богородичен: Ра́дуйся, Со́лнце пра́вды ми́ру возсия́вшая, Звездо́ златоза́рная, ра́дости луча́ми му́чеников первозва́нных земли́ Кита́йския ны́не озаря́ющая, с ни́миже моли́ Сы́на Твоего́ дарова́ти вселе́нней ми́р и ве́лию ми́лость.
Песнь 9
Ирмос: Не рыда́й Мене́, Ма́ти, зря́щи во гро́бе, Его́же во чре́ве без се́мене зачала́ еси́ Сы́на: воста́ну бо, и просла́влюся, и вознесу́ со сла́вою, непреста́нно я́ко Бо́г, ве́рою и любо́вию Тя́ велича́ющия.
Припе́в: Святи́и первому́ченицы кита́йстии, моли́те Бо́га о на́с!
О, ра́досте на́ша, собо́ре святы́х ди́вных! Вели́кия му́ки ва́ша, и сле́зы, и крове́й излия́ние почита́юще, все́ю душе́ю ва́с умоля́ем: не оскудева́йте, моля́щеся Царю́ Христу́, дарова́ти все́м в хра́ме ва́шем сте́кшимся спасе́ние.
Припе́в: Святи́и первому́ченицы кита́йстии, моли́те Бо́га о на́с!
Столпы́ Це́ркве Правосла́вныя на восто́це да́льнем утвержде́нныя, ва́с воспева́ем, прехва́льнии, те́м и на́с в ве́ре утвержда́ете и заступле́ний ре́ки ве́рным источа́ете.
Припе́в: Святи́и первому́ченицы кита́йстии, моли́те Бо́га о на́с!
Стеле́сники челове́ком су́ще, естества́ не́мощное превзыдо́сте и Ангелом дивле́ние бы́сте, те́м и немощны́я укрепля́ете, боле́зни ве́рою к ва́м притека́ющих врачу́ете, страсте́й ва́м моля́щихся потребля́ете, я́ко страстоно́сцы пречу́днии.
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Богородичен: Яко все́х предста́тельнице христиа́н, Богома́ти всенепоро́чная Влады́чице, я́ко ми́лостива, изба́ви от бе́д и искуше́ний стра́ждущия рабы́ Твоя́, и неду́гующия — лю́тых прегреше́ний, ра́нами и боле́зньми тя́жкими одержи́мыя, изврачу́й.
Свети́лен, гла́с 2.
Дне́сь тве́рдь небе́сная / зве́зды но́выми красу́ется, / и́хже блиста́ньми мо́ре земно́е / ра́дости лучи́ испуща́ет, / и ве́рнии озаре́ннии лику́ют, / Светода́вцу пе́снь побе́дную пою́ще.
Сла́ва, и ны́не, Богородичен:
Умоле́на бы́вши, Всецари́це Де́во, / мольба́ми честны́х новому́ченик кита́йских, / мра́к душе́вный от на́с отъими́, / я́ко Светода́теля еди́наго все́м ро́ждшая.
Молитва
К вам, о святи́и первому́ченицы кита́йстии, я́ко путево́дным свети́льникам, дея́ньми свои́ми освети́вшим путь Небе́снаго восхо́да, аз многогре́шный смире́нно коле́на се́рдца моего́ преклоня́ю и из глубины́ души́ взыва́ю: умоли́те о мне Человеколю́бца Бо́га, да не попу́стит ми еще́ блужда́ти по распу́тиям греха́, но да просвети́т мои́ ум и се́рдце све́том благода́ти Своея́, я́ко да то́ю озаря́ем и подкрепля́ем, возмогу́ про́чее вре́мя земна́го жития́ пра́вою стезе́ю непреткнове́нно преити́ и хода́тайством ва́шим к Преблаго́му Го́споду сподо́блюся, поне́ вма́ле прича́стник бы́ти духо́вныя ва́шея трапе́зы в Небе́сном черто́зе Царя́ сла́вы. Ему́же со Безнача́льным Его́ Отце́м и Пресвяты́м, Благи́м и Животворя́щим Ду́хом бу́ди сла́ва, честь и поклоне́ние во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Святым первомученикам земли Китайския Святым первомученикам земли Китайския](img_b/064.jpg)