23 июня.

Канон священномученику Тимофею, епископу Прусскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 4:

И нpа́вом пpича́стник,/ и пpесто́лом наме́стник апо́столом быв,/ дея́ние обpе́л еси́, Богодухнове́нне,/ в виде́ния восхо́д,/ сего́ pа́ди сло́во и́стины испpавля́я,/ и ве́pы pа́ди постpада́л еси́ да́же до кpо́ве,/ священному́чениче Тимофе́е,/ моли́ Хpиста́ Бо́га// спасти́ся душа́м на́шим.

Кано́н, гла́с 4.

Пе́снь 1.

Ирмос: Триста́ты кре́пкия, Рожде́йся от Де́вы, безстра́стия во глубине́, души́ трича́стное потопи́, молю́ся, да Тебе́, я́ко в тимпа́не, во умерщвле́нии телесе́ побе́дное воспою́ пе́ние.

Припев: Священному́чениче Тимофе́е, моли́ Бо́га о нас.

Непобеди́му кре́пость, неизме́нну держа́ву и непретво́рну я́ко име́я, Благи́й, неизрече́нною си́лою Твое́ю утверди́ моего́ язы́ка не́мощь в пе́снех Твои́х и моли́твами Тимофе́я уще́дри.

Припев: Священному́чениче Тимофе́е, моли́ Бо́га о нас.

Кре́постию богоде́льною свяще́ннаго су́щи ко́рене израсти́л еси́ свяще́нный, Тимофе́е, са́д, доброде́телей яви́лся еси́ благоукраше́ние: процве́л бо еси́ страда́ний плоды́ оби́льны и все́х Влады́це прине́сл еси́.

Сла́ва Отцу́ и Сы́ну и Свято́му Ду́ху:

Ума́ чистото́ю и души́ све́тлостию, твои́ми кро́вными омоче́нии испещре́н я́влься, богоно́се Тимофе́е, горе́ ны́не ца́рствуеши со Влады́кою тва́ри и ста́ду твоему́ ве́рою предста́л еси́.

И ны́не и при́сно и во ве́ки веко́в. Ами́нь.

Богородичен: Одушевле́нный Бо́жий и пресве́тлый до́м, Богоро́дице Блага́я, ми́ра Ра́досте, не отри́ни мене́ дале́че от Тебе́, уще́дри же и все́х искуше́ний изба́ви, я́ко да вну́трь лику́ю покро́ва Твоего́.

Пе́снь 3.

Ирмос: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Припев: Священному́чениче Тимофе́е, моли́ Бо́га о нас.

С му́ченики Христо́вы му́ченик я́влься све́тел, сла́вне, во свяще́нницех му́дрых яви́лся еси́ свяще́нником удобре́ние.

Припев: Священному́чениче Тимофе́е, моли́ Бо́га о нас.

Хра́м Христо́в, прему́дрости сокро́вище, дне́сь прииди́те, ве́рнии, воспое́м ста́до пру́сскаго первонача́льника.

Сла́ва Отцу́ и Сы́ну и Свято́му Ду́ху:

С по́ты доброде́тельными кро́вь твою́ растворя́я, чи́сто, прему́дре, пи́во Го́сподеви прине́сл еси́, боже́ственно и красно́, о Тимофе́е!

И ны́не и при́сно и во ве́ки веко́в. Ами́нь.

Богородичен: Мари́е, Ма́ти Бо́жия, вы́шшая херуви́м, Чи́стая и всея́ земли́ Влады́чице, спаси́ мя боже́ственными Твои́ми мольба́ми.

Седа́лен, гла́с 5.

Кро́вными ту́чами напоя́емь, священному́чениче Госпо́день, пло́д прине́сл еси́ в земли́ бла́зей се́рдца твоего́, неиждива́емую пи́щу, ю́же прия́л еси́ от Бо́га. Те́мже тя́ мо́лим изба́витися от бе́д творя́щим па́мять твою́.

Сла́ва, и ны́не, Богородичен:

Тя́ приста́нище, и сте́ну, и прибе́жище, и наде́жду, и покро́в, и заступле́ние те́плое обре́тше, ве́рнии, к Тебе́ притека́ем, и вопие́м приле́жно, и зове́м ве́рно: поми́луй, Богоро́дице, упова́ющих на Тя́ и от прегреше́ний изба́ви.

Пе́снь 4.

Ирмос: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Припев: Священному́чениче Тимофе́е, моли́ Бо́га о нас.

Небому́дренно житие́ я́ко стяжа́в и возгреме́нии Ду́ха ве́сь облиста́я, зми́я всепа́губнаго попали́л еси́, сла́вне, благода́тию Боже́ственною укрепля́емь.

Припев: Священному́чениче Тимофе́е, моли́ Бо́га о нас.

Виде́нием и дея́нием украша́емь, в леви́тсте о́бразе, ору́жием обою́ду о́стрым зми́я вну́тренняя ссеца́еши, о Тимофе́е, хле́бов свяще́нных покрыва́лом.

Сла́ва Отцу́ и Сы́ну и Свято́му Ду́ху:

Позна́в Христа́, Вели́каго Архиере́я, не чужде́ю кро́вию, но твое́ю, му́чениче, ко Отцу́ приводи́ма, я́ко собесе́дник Ему́, кро́вь твою́ принося́, поже́рл еси́.

И ны́не и при́сно и во ве́ки веко́в. Ами́нь.

Богородичен: Многоочи́тая, Твоея́ чистоты́ неусы́пно, Богороди́тельнице Чи́стая, побежда́ются зре́ти: си́х бо, я́ко Влады́чица, предваря́еши всегда́ и при́сно предви́диши рабы́ Твоя́.

Пе́снь 5

Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Припев: Священному́чениче Тимофе́е, моли́ Бо́га о нас.

Якоже секи́ра тверда́, я́ко си́льно ору́жие, к полко́м беззако́нных бра́нь соста́вль, побе́дою венча́ся.

Припев: Священному́чениче Тимофе́е, моли́ Бо́га о нас.

Свети́ло дневно́е светоно́сно показу́етя, озари́л еси́ цари́цу, ю́же во мра́це зло́бы скончава́ющу лице́, сла́вне.

Сла́ва Отцу́ и Сы́ну и Свято́му Ду́ху:

Зря́ и́дольских скверне́ний смеше́ние, пре́дал еси́ кро́ви излия́телем, я́ко а́гня, себе́, блаже́нне, и же́ртва Бо́гу прине́слся еси́.

И ны́не и при́сно и во ве́ки веко́в. Ами́нь.

Богородичен: Чи́стая Голуби́це, моли́тв Твои́х криле́ на рабы́ Твоя́, и́же в ми́ре, и покро́в просте́рши, Де́во, не пре́зри и мене́.

Пе́снь 6.

Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Припев: Священному́чениче Тимофе́е, моли́ Бо́га о нас.

Возвесели́ся вселе́нная дне́сь, ра́дующися о па́мяти твое́й, блаже́нне: просвеща́еши бо свы́ше чуде́с заря́ми ду́ши пою́щих тя́.

Припев: Священному́чениче Тимофе́е, моли́ Бо́га о нас.

Яви́лся еси́ ны́не не на земли́ су́щей трапе́зе служи́тель, но, в небе́сная входя́, пита́ешися на трапе́зе неизрече́нней, в не́йже пода́ждь и на́м твою́ пи́щу и наслажде́ние.

Сла́ва Отцу́ и Сы́ну и Свято́му Ду́ху:

Зако́нно свяще́нный по́двиг творя́, со дерзнове́нием, богому́дре, царя́ безу́мие изобличи́л еси́ и и́дольская разори́л еси́ тре́бища, Тимофе́е.

И ны́не и при́сно и во ве́ки веко́в. Ами́нь.

Богородичен: Пое́тся гла́сы Ангельскими, Богоневе́сто, Тво́й Сы́н, все́х Зижди́тель и Бо́г, Сы́й пре́жде ве́к, и с Ни́м у́бо ца́рствующи, спаси́ мя́, Влады́чице.

Пе́снь 7.

Ирмос: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Припев: Священному́чениче Тимофе́е, моли́ Бо́га о нас.

Достодо́лжно в доброде́телех бога́тное тя́ сокро́вище венча́ет пре́жде страда́ний благода́ть богоде́льная и, чуде́сными дарова́нии просвеща́ющи, све́тла в ми́ре соверши́. [Дважды.]

Сла́ва Отцу́ и Сы́ну и Свято́му Ду́ху:

Ору́жна преще́ния и огнено́сна пла́мене, му́чениче, зря́, ве́рою вооружи́в у́м тво́й и ду́шу, и безбоя́зненным ра́зумом Христа́ пропове́дал еси́, твоего́ Соде́теля, и Зижди́теля, и Го́спода.

И ны́не и при́сно и во ве́ки веко́в. Ами́нь.

Богородичен: Ты́, держа́щаго дла́нию вся́ческая, Ма́ти Бо́жия, вну́трь во чре́ве иму́щи боголе́пно, соблюда́еши зову́щия: благослове́нна Ты́ в жена́х еси́, Пренепоро́чная.

Пе́снь 8.

Ирмос: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Припев: Священному́чениче Тимофе́е, моли́ Бо́га о нас.

Си́лою боже́ственныя ве́ры укре́плься, му́дре Тимофе́е, но́в показа́лся еси́ я́коже Дании́л на́м, зми́я низлага́я всегуби́тельнаго, и, на высоте́ предста́в, зове́ши, поя́ при́сно: благослови́те, вся́ дела́ Госпо́дня, Го́спода.

Припев: Священному́чениче Тимофе́е, моли́ Бо́га о нас.

Вну́трь, я́ко ра́б свяще́нный, Го́спода твоего́ ра́дости бы́л еси́: ты́ бо тала́нт, сла́вне, ве́ры боле́зньми твои́ми израсти́л еси́ многосугу́бо, страда́нии и чудесы́, взыва́я: благослови́те, вся́ дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Неду́ги отгоня́ челове́ков, пома́зании твои́ми благоуха́еши, прему́дре, ду́ши, си́льным твои́м дарова́нием боле́зней отъе́млеши я́звы и от духо́в лука́вых избавля́еши при́сно вопию́щия: благослови́те, вся́ дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богородичен: Яко сла́вен вене́ц, естество́ прия́т боже́ственным рождество́м Твои́м, враго́в на бра́ни у́бо да́руй победи́телю бы́ти ми́, Твои́х дарова́ний све́тлым венце́м венча́тися и взыва́ти: благослови́те, вся́ дела́ Госпо́дня, Го́спода.

Песнь 9

Ирмос: Ева у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем.

Припев: Священному́чениче Тимофе́е, моли́ Бо́га о нас.

Ви́дехом пресла́вная в тебе́, Тимофе́е богоно́се, вои́стинну чудеса́: источа́ет бо моще́й твои́х ра́ка исцеле́ний исто́чники на́м и уставля́ет неду́гов боле́зни. Те́мже, чту́ще тя́, сла́вим.

Припев: Священному́чениче Тимофе́е, моли́ Бо́га о нас.

Ве́сь лику́я вои́стинну, Тимофе́е, со Ангельскими во́инствы, ра́дуяся с му́ченическими собо́ры и поя́ со свяще́нными чи́ны, моли́ непреста́нно Го́спода спасти́ ве́рою хва́лящия тя́.

Сла́ва Отцу́ и Сы́ну и Свято́му Ду́ху:

Пе́ний и моле́б гла́сы услы́ши, му́чениче Христо́в всече́стне, вонми́ к жела́нию и любви́, и воззри́ во гне́ве Непобеди́мому, и свы́ше покро́в тво́й да́руй все́м, ве́рою хва́лящим тя́.

И ны́не и при́сно и во ве́ки веко́в. Ами́нь.

Богородичен: Возвы́си благода́ть Твою́, Чи́стая, возвели́чи моли́тву и приведи́ чи́ны Ангельския ко Влады́це, ли́ки апо́стол и проро́к и вся́ пра́ведники с му́ченики, я́ко да спасе́мся, чту́щии Тя́.

Молитва

О святы́й уго́дниче Бо́жий, священному́чениче Тимофе́е! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.