23 июня.

Канон преподобному Силуану Печерскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь преподо́бному Силуа́ну, гла́с 3:

Мно́гаго ти́ ра́ди воздержа́ния и безме́рнаго поще́ния прие́мый свы́ше благода́ть чудотворе́ния и к Бо́гу ве́лие дерзнове́ние стяжа́вый, по́стником удобре́ние, Силуа́не, Тому́ моли́ся, да пода́ст на́м ми́р и ве́лию ми́лость.

Кано́н преподо́бнаго, гла́с 8.

Пе́снь 1.

Ирмос: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́да спасе́, пе́снь Бо́гови воспева́юща.

Припев: Преподо́бне о́тче Силуа́не, моли́ Бо́га о нас.

Христу́, на́с ра́ди смири́вшемуся, во смире́нии подража́л еси́, преподо́бне, во убо́зей и те́мней пеще́ре живы́й, посто́м, моли́твою и мно́гими слеза́ми ри́зу душе́вную убели́л еси́, и чистото́ю сия́я, возше́л еси́ во оби́тели го́рния, ра́достно пе́снь Го́сподеви воспева́я.

Припев: Преподо́бне о́тче Силуа́не, моли́ Бо́га о нас.

Яко звезда́ богосве́тлая, сия́еши на мы́сленнем небеси́ ла́вры Пече́рския, о́тче на́ш Силуа́не, и вся́ ны́ блгода́тно озаря́еши немерца́ющею заре́ю мно́гих чуде́с, те́мже, святу́ю па́мять твою́ любо́вию соверша́юще, пе́снь Бо́гови воспева́ем.

Сла́ва Отцу́ и Сы́ну и Свято́му Ду́ху:

Истинный и ве́рный ра́б Христо́в бы́л еси́, богоно́сне о́тче Силуа́не, святы́х первонача́льников Пече́рских Анто́ния и Феодо́сия подража́телю и доброде́телей и́х насле́дниче, с ни́миже ны́не во сла́ве невече́рней святы́х пе́снь Бо́гови воспева́еши.

И ны́не и при́сно и во ве́ки веко́в. Ами́нь.

Богородичен: Зако́нов кроме́ есте́ственных родила́ еси́ Законода́вца, Бо́га и Челове́ка, Того́, я́ко Бла́га, моли́, Всенепоро́чная, на́ша беззако́ния презре́ти, гла́сы хвале́бными пе́снь Ему́ воспева́ющих.

Пе́снь 3.

Ирмос: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т па́че Тебе́, Еди́не Человеколю́бче.

Припев: Преподо́бне о́тче Силуа́не, моли́ Бо́га о нас.

Тле́нную пло́ть неосла́бными труда́ми кре́пко изнури́л еси́, о́тче на́ш Силуа́не, и по кончи́не твое́й в нетле́ние та́ облече́ся благода́тию Христа́ Бо́га, Ему́же в го́рних оби́телех зове́ши, ра́дуяся: не́сть свя́т, па́че Тебе́, Еди́не Человеколю́бче.

Припев: Преподо́бне о́тче Силуа́не, моли́ Бо́га о нас.

Яко ма́слина благопло́дная, на горе́ Пече́рстей возра́сл еси́, преподо́бне Силуа́не, о́тче на́ш, и еле́ем трудо́в твои́х богоуго́дных сердца́ на́ша благода́тию умаща́еши, в мѵ́ро бо целе́бное сле́зы твоя́ по́стническия претвори́ Христо́с Бо́г, Ему́же зове́м: не́сть свя́т, па́че Тебе́, еди́не Человеколю́бче.

Сла́ва Отцу́ и Сы́ну и Свято́му Ду́ху:

Стра́сти душе́вныя мече́м моли́твы непреста́нныя изсе́кл еси́, преподо́бне, и кре́пко вооружи́лся еси́ на враги́ неви́димыя, и́хже ко́зни в пеще́рных огра́дах разруши́л еси́, зовы́й Подвигополо́жнику Христу́: не́сть свя́т, па́че Тебе́, Еди́не Человеколю́бче.

И ны́не и при́сно и во ве́ки веко́в. Ами́нь.

Богородичен: Херуви́мов и серафи́мов превы́шши яви́лася еси́, Богоро́дице, Ты́ бо еди́на прия́ла еси́ невмести́маго Бо́га во чре́ве Твое́м, Всечи́стая, те́мже Тя́, вси́ ве́рнии, пе́сньми ублажа́ем.

Седа́лен, гла́с 8:

Яко и́стиннаго по́стника Госпо́дня и ве́рнаго Христо́ва после́дователя ла́вра Пече́рская по до́лгу тя́ почита́ет, Силуа́не, о́тче на́ш, в не́й бо подвиза́лся еси́ богоуго́дно и сно́м пра́ведным почи́л еси́, и́бо сме́рть уго́дников Бо́жиих вои́стинну со́н е́сть и преселе́ние от ху́ждшия жи́зни на лу́чшую, в не́йже со святы́ми пребыва́я, моли́ Христа́ Бо́га спасти́ ду́ши на́ша.

Сла́ва, и ны́не, Богородичен:

Па́че естества́ заче́ншая и па́че естества́ ро́ждшая Зижи́деля Твоего́ и Бо́га, моли́ о на́с, при́сно согреша́ющих, да свобожде́ни су́ще, любо́вию воспое́м Тя́, Чи́стая Де́во Мари́е.

Пе́снь 4.

Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Припев: Преподо́бне о́тче Силуа́не, моли́ Бо́га о нас.

Ду́ха Свята́го наше́ствием в сосу́де души́ твоея́ богоно́сец бы́л еси́, преподо́бне о́тче, оби́тель Пече́рскую чудесы́ твои́ми просла́вил еси́, и ны́не со Ангелы пое́ши во святы́х почива́ющему Бо́гу: си́ле Твое́й сла́ва, Человеколю́бче.

Припев: Преподо́бне о́тче Силуа́не, моли́ Бо́га о нас.

Лице́ Христо́во пресве́тлое зре́ти жела́я, те́мная ли́ца де́монская кре́пким терпе́нием посрами́л еси́, о́тче на́ш Силуа́не, в пеще́ре ни́зу живы́й, я́ко гра́д верху́ стоя́, неуязви́м стрела́ми вра́жиими пребы́л еси́, отону́дуже удо́бно преше́л еси́ на го́ру небе́сную зва́ти в вы́шних Бо́гу: си́ле Твое́й сла́ва, Человеколю́бче.

Сла́ва Отцу́ и Сы́ну и Свято́му Ду́ху:

Благода́ть Бо́жия процвете́ на версе́ твое́м, преподо́бне, и яви́ тя чудоде́йственника пресла́вна, тобо́ю бо ла́вра Пече́рская вои́стинну красу́ется, стяжа́вши в не́дрех свои́х такова́го избра́нника, и́же в вы́шних селе́ниих лику́ет и зове́т святы́х Святе́йшему Сло́ву: си́ле Твое́й сла́ва, Человеколю́бче.

И ны́не и при́сно и во ве́ки веко́в. Ами́нь.

Богородичен: Очище́ние прегреше́ний на́ших испроси́, Влады́чице, ро́ждшая еди́наго безгре́шнаго Спа́са все́х, к Нему́же Ма́тернее дерзнове́ние иму́щи, не закосни́ ко умоле́нию, Всеблага́я, да, ра́дующеся, Тебе́ зове́м: сла́ва Тебе́, всеси́льная челове́ков Помо́щнице.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́, окая́ннаго, но обрати́ мя к све́ту за́поведей Твои́х пути́ моя́ напра́ви, молю́ся.

Припев: Преподо́бне о́тче Силуа́не, моли́ Бо́га о нас.

В поще́нии просия́л еси́, преподо́бне, хле́б и во́ду ме́рою вкуша́л еси́, мно́гажды же дни́ без пи́щи пребыва́я, те́мже пи́щи нетле́нныя ра́йския насыща́тися сподо́бился еси́, напра́вив пу́ть тво́й к Сио́ну небе́сному.

Припев: Преподо́бне о́тче Силуа́не, моли́ Бо́га о нас.

Ум тво́й впери́л еси́ к Бо́гу, Силуа́не, о́тче на́ш, и, на земли́ живы́й, о небе́сных при́сно промышля́л еси́, псало́мски глаго́ля: кто́ да́ст ми́ криле́, я́ко голуби́не, и полещу́, и почи́ю в небе́сных ски́ниях рая́ пресве́тлаго, иде́же и на́м бы́ти помоли́ся.

Сла́ва Отцу́ и Сы́ну и Свято́му Ду́ху:

Све́тло житие́ твое́ бы́сть, преподо́бне о́тче, во вся́ концы́ земли́ на́шея изы́де сла́ва доброде́телей твои́х, те́мже духо́вно возрасти́вшая тя́ ла́вра в па́мяти твое́й святе́й све́тло лику́ет и Христу́ зове́т: Светода́вче благи́й, моли́твами уго́дника Твоего́ на пу́ть спасе́ния вся́ ны напра́ви, я́ко Человеколю́бец.

И ны́не и при́сно и во ве́ки веко́в. Ами́нь.

Богородичен: Тя́ сте́ну иму́ще и заступле́нием Твои́м соблюда́еми, Твое́ю Боже́ственною сла́вою хва́лящеся, Тя́ ублажа́ем, Ты́ бо, Пречи́стая, душа́м на́шим при́сно источа́еши весе́лие и ра́дование.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и и́з глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Преподо́бне о́тче Силуа́не, моли́ Бо́га о нас.

Па́мять твоя́ с похвала́ми, о́тче Силуа́не, и и́мя твое́ свято́е призыва́ется ве́рными, и́же ве́дят тя́ богоно́сна и равноа́нгельна житие́м и с упова́нием прибега́ют к моли́твенному твоему́ заступле́нию. Си́х услы́ши, егда́ возопию́т к тебе́ моле́бно, и спасе́ния хода́тай и́м бу́ди вы́ну.

Припев: Преподо́бне о́тче Силуа́не, моли́ Бо́га о нас.

О Христе́ укрепля́емь, жи́знь твою́ до́блестно препроводи́л еси́, преподо́бне, безмо́лвием кра́йним, я́ко колесни́цею небовосхо́дною, на го́рняя восте́кл еси́ и та́мо со Ангелы лику́еши, и́бо услы́ша твоя́ моли́твы Бо́г спасе́ния твоего́.

Сла́ва Отцу́ и Сы́ну и Свято́му Ду́ху:

Неду́жная врачу́еши еди́ным прикоснове́нием с ве́рою к святы́м моще́м твои́м, преподо́бне Силуа́не, о́тче на́ш, и ми́лость мно́гу явля́еши те́м, и́же по Бо́зе упова́ние на тя́ возлага́ют и твою́ па́мять соверша́ют, я́ко и́стиннаго уго́дника Христо́ва.

И ны́не и при́сно и во ве́ки веко́в. Ами́нь.

Богородичен: Ве́сь ли́к проро́ческий от Бо́га науче́н Твоего́ Боже́ственнаго зача́тия провозгласити́ та́инство, Пречи́стая Ма́ти Де́во, Ты́ бо Све́т во открове́ние язы́ков родила́ еси́, Христа́, Царя́ и Бо́га, спа́сшаго от поги́бели ро́д челове́ческий.

Конда́к, гла́с 8:

В бде́нном и тре́звенном моле́нии и кре́пком всегда́шнем пребыва́я поще́нии, те́ло свое́ умерщвля́л еси́, Силуа́не преподо́бне, и мно́гих уче́нием твои́м в ты́яжде доброде́тели наставля́я, приве́л еси́ Христо́ви. Ему́же в весе́лии дне́сь предстоя́, помина́й на́с, чту́щих па́мять твою́.

Икос:

Ангелов подража́теля и безпло́тных си́л собесе́дника, Ангельскими язы́ки подоба́ет ублажи́ти тя́, преподо́бне, оба́че приими́, а́ще и от челове́ческих бре́нных усте́н, сию́ достодо́лжную тебе́ похвалу́: ра́дуйся, преподо́бне, во все́х за́поведех Госпо́дних пра́во ходи́вый; ра́дуйся, богоно́сне, и́го благо́е и ле́гкое на ра́менах твои́х носи́вый. Ра́дуйся, в моли́тве преуспе́вый; ра́дуйся, пеще́рною тесното́ю простра́нства небе́снаго дости́гнувый. Ра́дуйся, равноа́нгельно во пло́ти пожи́вый; ра́дуйся, нетле́нием благода́тным просла́вленный. Ра́дуйся, чудотворе́ния да́ром обогаще́нный; ра́дуйся, целе́бниче вся́ких неду́гов. Ра́дуйся, помо́щниче в беда́х и напа́стех; ра́дуйся, Анто́ния богоно́снаго подража́телю. Ра́дуйся, Феодо́сия богому́драго после́дователю; ра́дуйся, Силуа́не, моли́твенниче о душа́х на́ших.

Пе́снь 7.

Ирмос: Бо́жия снизхожде́ния о́гнь устыде́ся в Вавило́не иногда́. Сего́ ра́ди о́троцы в пещи́, ра́дованною ного́ю, я́ко во цве́тнице, лику́юще, поя́ху: благослове́н еси́, Бо́же оте́ц на́ших.

Припев: Преподо́бне о́тче Силуа́не, моли́ Бо́га о нас.

Ми́ра красоты́ душетле́нныя во уме́ты вмени́л еси́, о́тче преподо́бне Силуа́не, жесто́кое житие́ показа́л еси́ и неосла́бно в по́двизех жи́знь вре́менную препроводи́л еси́, немо́лчно воспева́я укрепи́телю Иису́су: благослове́н еси́, Бо́же оте́ц на́ших.

Припев: Преподо́бне о́тче Силуа́не, моли́ Бо́га о нас.

В ти́хом приста́нищи спасе́ния бы́в, ти́хими ве́тры Ду́ха Свята́го управля́емь, о́тче богому́дре Силуа́не, дости́гл еси́ жела́ний кра́я, пресве́тлаго Ца́рствия Христо́ва, иде́же, со святы́ми почива́я, причаща́ешися трапе́зы безсме́ртнаго Влады́ки Христа́ и зове́ши Ему́ ра́достно: благослове́н еси́, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Иму́щи тя́ ла́вра Пече́рская свети́льника немерца́ющаго Бо́жия благода́ти, твоя́ по́двиги пе́нии духо́вными прославля́ет, я́ко ма́ти, о ча́де свое́м веселя́щися, о́тче Силуа́не, мона́хов удобре́ние и по́стников похвало́, те́мже и зове́т в па́мяти твое́й боголе́пно: благослове́н еси́, Бо́же оте́ц на́ших.

И ны́не и при́сно и во ве́ки веко́в. Ами́нь.

Богородичен: Же́зл, из ко́рене Иессе́ева прозя́бший, и цве́т спаси́тельный, ми́ру процве́тший, познава́ем Тя́, Пречи́стая Де́во, ро́ждшая Христа́ Жизнода́вца, Имже упраздни́ся и́дольская пре́лесть благода́тию. Те́мже Тебе́, я́ко глави́зне спасе́ния на́шего, усе́рдно вопие́м: благослове́нна еси́ в жена́х, Пренепоро́чная Влады́чице.

Пе́снь 8.

Ирмос: Седмери́цею пе́щь халде́йский мучи́тель Богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, блгослови́те, свяще́нницы, воспо́йте, лю́дие, превозноси́те во вся́ ве́ки.

Припев: Преподо́бне о́тче Силуа́не, моли́ Бо́га о нас.

Светоли́тия небе́снаго испо́лнился еси́, преподо́бне, егда́, свя́то пожи́в, кончи́ною пра́веднаго преше́л еси́ от земли́ в го́рняя, на́м же честны́я мо́щи твоя́, я́ко насле́дие многоце́нное, оста́вил еси́, целе́бныя струи́ от ни́х источа́я, с ве́рою к тебе́ приходя́щим и Христа́ превознося́щим во вся́ ве́ки.

Припев: Преподо́бне о́тче Силуа́не, моли́ Бо́га о нас.

Моли́твою твое́ю богоприя́тною, о́тче, оби́тель Пече́рскую сохраня́еши от вся́каго зла́го обстоя́ния и в не́й живу́щия во благоче́стии наставля́еши о́бразом твои́м благи́м, ско́рый помо́щник явля́ешися лю́дем правове́рным, и́же по Бо́зе и Богоро́дице упова́ние на тя́ возлага́ют и тя́ просла́вльшаго Христа́ превозно́сят во вся́ ве́ки.

Сла́ва Отцу́ и Сы́ну и Свято́му Ду́ху:

В поще́ниих неосла́бен, в моли́твах бо́др, в труде́х терпеливоду́шный показа́лся еси́, о́тче на́ш Силуа́не, и я́ко во все́х благоиску́сен де́латель вертогра́да Христо́ва, мзду́ бога́тую восприя́л еси́ от небе́снаго Домовлады́ки, в Его́же черто́зе све́тлем упокое́ние блаже́нное обре́л еси́, зовы́й: лю́дие, превозноси́те Христа́ во вся́ ве́ки.

И ны́не и при́сно и во ве́ки веко́в. Ами́нь.

Богородичен: Златоза́рный Тя́ свети́льник, прие́мшую несказа́нно Све́т Непристу́пный, Имже озари́ся мра́к па́дшаго челове́ка, воспева́ем Тя́, Богоро́дице Де́во, Со́лнца о́блаче ле́гкий, Его́же луча́ми озаре́ни, благода́рно пое́м Тя́, Чи́стая, во вся́ ве́ки.

Песнь 9

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Припев: Преподо́бне о́тче Силуа́не, моли́ Бо́га о нас.

Вои́стинну тя́ учи́теля благоче́стия и́мать оби́тель Пече́рская, уче́ния духо́вная, ме́да сладча́йшая, излива́юща. Кто́ бо не умили́тся, слы́ша твоя́ по́двиги поще́ния, злострада́ния и непреста́нныя моли́твы, спасе́ния ра́ди душе́внаго? Те́мже тя́, о́тче на́ш Силуа́не, ве́рою и любо́вию ублажа́ем.

Припев: Преподо́бне о́тче Силуа́не, моли́ Бо́га о нас.

Любо́вию Христо́вою воспламени́в твое́ се́рдце, пла́мень нечи́стых страсте́й угаси́л еси́ росо́ю Ду́ха Боже́ственнаго, Его́же благода́тию соблюда́емь, о́тче на́ш Силуа́не, не оскверни́л еси́ чистоты́ души́ твоея́, сохрани́л еси́ непоро́чно и те́ло твое́, нетле́нием ны́не почте́нное, от него́же цельбы́ подае́ши неду́жным, я́ко таи́нник Бо́жия благода́ти.

Сла́ва Отцу́ и Сы́ну и Свято́му Ду́ху:

Живоно́сную си́лу Воскресе́ния Христо́ва на́м проявля́еши, преподо́бне, в твои́х тле́нию неприча́стных и многоцеле́бных моще́х. В се́м бо вои́стинну позна́хом, я́ко, душе́ю живы́й, престо́лу Госпо́дню со сла́вою предстои́ши, иде́же не забу́ди в моли́твах твои́х богоприя́тных гра́д и оби́тель, в ни́хже на земли́ подвиза́лся еси́, и все́х на́с, чту́щих любо́вию па́мять твою́.

И ны́не и при́сно и во ве́ки веко́в. Ами́нь.

Богородичен: Псало́мски воспева́ем Тя́, Обра́дованная, Чи́стая, и со арха́нгелом, благове́стником ра́дости всеми́рныя, немо́лчно, — ра́дуйся, — Тебе́ пое́м, Ты́ бо, Влады́чице, вои́стинну все́м источи́ла еси́ ра́дование, ро́ждши ра́дости вино́вное Сло́во.

Свети́лен:

Процве́л еси́, я́ко фи́никс, о́тче, и, я́ко ке́др, умно́жил еси́ дарова́ния благода́тная, я́же тя́ сла́вна в ла́вре Пече́рстей показа́ша. О на́с Христа́ Бо́га моли́, чудоде́йственниче Силуа́не, почита́ющих пречестну́ю па́мять твою́.

Сла́ва, и ны́не, Богородичен:

Ра́дуйся, неора́нная ни́во, возрасти́вшая кла́с несе́янный, из него́же хле́б спаси́тельный ми́ру сотвори́ся; си́м напита́й ду́ши любо́вию чту́щих пречи́стое зача́тие Твое́, Чи́стая Де́во.

Молитва

О свяще́нная главо́, преподо́бне о́тче, преблаже́нне о́тче Силуа́не, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.