23 июня.
Канон собору Сибирских святых
![собору Сибирских святых собору Сибирских святых](img_i/108.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, глас 5:
Це́ркве Христо́вы свети́льницы,/ всея́ Росси́и украше́ние,/ святи́и вси, в земли́ Сиби́рстей просия́вши,/ Влады́ку всех моли́те/ мир вселе́нней дарова́ти/ и душа́м на́шим ве́лию ми́лость.
Тропа́рь, глас 4:
Це́ркве Христо́вы свети́льницы,/ всея́ Росси́и украше́ние,/ страны́ Сиби́рския просвети́телие,/ от тьмы́ дре́вняго неве́рия и пре́лести и́дольския лю́ди изба́вльшии,/ наста́вницы благоче́стия, святи́телие Христо́вы:/ Дими́трие, Инноке́нтие, Иоа́нне,/ Софро́ние, Па́вле, Меле́тие/ и апо́столе Инноке́нтие/ с пра́ведными Васи́лием страстоте́рпцем и Симео́ном Верхоту́рским,/ Престо́лу Го́спода Вседержи́теля предстоя́ще,/ Влады́ку всех моли́те/ мир вселе́нней дарова́ти/ и душа́м на́шим ве́лию ми́лость.
Велича́ние:
Велича́ем вас,/ святи́и вси, в земли́ Сиби́рстей просия́вшии,/ и чтим святу́ю па́мять ва́шу,/ вы бо моли́те о нас/ Христа́ Бо́га на́шего.
Кано́н, глас 1.
Песнь 1
Ирмос: Пе́снь побе́дную пои́м вси Бо́гу,/ сотво́ршему ди́вная чудеса́ мы́шцею высо́кою/ и спа́сшему Изра́иля,/ я́ко просла́вися.
Припев: Вси святи́и земли́ Сиби́рския, моли́те Бо́га о нас.
Сло́ве Бо́жий, помози́ нам досто́йно воспе́ти Собо́р Сиби́рских святы́х,/ све́том Ева́нгелия Христо́ва зе́млю Сиби́рскую просвети́вших/ и всех научи́вших пе́ти Тебе́ побе́дную пе́снь, я́ко просла́вися.
Припев: Вси святи́и земли́ Сиби́рския, моли́те Бо́га о нас.
О́трасль честна́я роди́телей твои́х благочести́вых Макси́ма и Евфроси́нии был еси́, о́тче Иоа́нне,/ кни́жному науче́нию во гра́де Ки́еве и́ми определе́н/ и, преуспева́я му́дростию, уразуме́л еси́ глаго́лы жи́зни ве́чныя,/ учи́телем и наста́вником подвиза́яся, поуча́л еси́ всех воспева́ти Го́сподеви пе́снь, я́ко просла́вися.
Припев: Вси святи́и земли́ Сиби́рския, моли́те Бо́га о нас.
Бла́го е́сть му́жу, егда́ во́змет яре́м в ю́ности свое́й, глаго́лет Свято́е Писа́ние./ Сему́ после́дуя, с ра́достию и́го Госпо́дне от ю́ности восприя́л еси́, блаже́нне Иоа́нне,/ роди́тели, и вся, я́же в ми́ре, оста́вил еси́,/ в Ки́ево-Пече́рскую Ла́вру прише́д, а́нгельский о́браз восприи́м,/ по́двигом до́брым подвиза́лся еси́, ку́пно со и́ноки воспева́я пе́снь Бо́гу, я́ко просла́вися.
Припев: Вси святи́и земли́ Сиби́рския, моли́те Бо́га о нас.
О́трок сый от гра́да Яросла́вля в зе́млю Сиби́рскую, в преде́лы Мангазе́и прише́д,/ иде́же за целому́дрие и благоче́стие от господи́на своего́ пострада́в,/ венце́м му́ченическим от Бо́га венча́лся еси́,/ на земли́ нетле́нием просла́вился еси́ и чудесы́./ Престо́лу Госпо́дню с Собо́ром Сиби́рских святы́х предстоя́, первому́чениче Сиби́рския страны́, свя́те Васи́лие,/ моли́ся о нас, да вси воспое́м пе́снь побе́дную Христу́ Бо́гу на́шему, я́ко просла́вися.
Сла́ва Отцу́ и Сы́ну и Свято́му Ду́ху:
Ро́да зна́тнаго и оте́чества твоего́ устрани́лся еси́, блаже́нне Симео́не,/ и ма́нием Бо́жиим возведе́н был еси́ в страну́ Сиби́рскую,/ иде́же близ гра́да Верхоту́рья подвиза́яся, в шве́нии оде́жд труди́лся еси́ во бла́го неиму́щим,/ помышля́я одея́ние души́ твоея́, в не́мже да вни́деши в черто́г Спа́сов,/ Ему́же со все́ми святы́ми, в Сиби́ри просия́вшими, побе́дную пе́снь пое́ши, я́ко просла́вися.
И ны́не и при́сно и во ве́ки веко́в. Ами́нь.
Богородичен: Се вре́мя благоприя́тно, и де́нь спасе́ния,/ в не́мже зна́мение ико́ны Твоея́, Пречи́стая, показа́ся,/ е́же пра́зднующе, све́тло духо́вне торжество́ соверша́ем.
Песнь 3
Ирмос: Да утверди́тся се́рдце мое́ в во́ли Твое́й, Христе́ Бо́же,/ И́же над вода́ми не́бо утвержде́й второ́е/ и основа́вый на вода́х зе́млю, Всеси́льне.
Припев: Вси святи́и земли́ Сиби́рския, моли́те Бо́га о нас.
Иера́рси Христо́вы, Сиби́рския страны́ просвети́телие,/ со все́ми святы́ми, в ней просия́вшими, моли́теся за ны ко Го́споду,/ да утвердя́тся се́рдца на́ша в во́ли Его́, во е́же по́двигом до́брым подвиза́тися,/ ве́ру соблюсти́ и насле́довати Ца́рствие Небе́сное.
Припев: Вси святи́и земли́ Сиби́рския, моли́те Бо́га о нас.
Бра́тию Ла́вры умиля́л еси́ по́двиги твои́ми, о́тче Иоа́нне,/ непреста́нно пропове́дуя сло́во Бо́жие, и́мже всех приходя́щих поуча́л еси́,/ да в Го́споде утвердя́тся се́рдца их,/ во е́же благоугожда́ти Христу́ Бо́гу и твори́ти святу́ю во́лю Его́.
Припев: Вси святи́и земли́ Сиби́рския, моли́те Бо́га о нас.
Иоа́нне Богому́дре, ты, име́я любо́вь ко оте́честву и Ла́вре,/ я́ко муж свят, доброде́телию и му́жеством укра́шен,/ а́ще и юн лета́ми, в Вели́кую Росси́ю по́слан был еси́ защи́ты от наше́ствия ту́рок проси́ти,/ и не то́кмо по́мощь оте́честву твоему́ в бе́дственное, во́инских бра́ней вре́мя,/ но и приста́нище и́ноком Ки́ево-Пече́рския Ла́вры получи́л еси́,/ да в нем новопече́рскую Све́нскую оби́тель устро́иши/ и научи́ши всех непреста́нно сла́вити Христа́, Спа́са душ на́ших.
Припев: Вси святи́и земли́ Сиби́рския, моли́те Бо́га о нас.
Росси́йский Златоу́сте, ри́торе изя́щнейший, правосла́вных архиере́ев удобре́ние,/ Це́ркве Тобо́льския и Росто́вский украше́ние,/ благоче́стия свети́льниче пресве́тлый, святи́телю о́тче Дими́трие,/ ты отгоня́л еси́ душевре́дных волко́в от Христо́вы огра́ды твои́ми богодухнове́нными уче́нии,/ назира́й и ны́не, да не ка́ко суему́дрия возмутя́т тишину́ церко́вную,/ но па́че моли́ Человеколю́бца Бо́га, да еди́ными усты́ и еди́ным се́рдцем восхва́лим Его́ благоутро́бие.
Сла́ва Отцу́ и Сы́ну и Свято́му Ду́ху:
Сохрани́, святи́телю Дими́трие, оте́чество твое́ ненаве́тно от враго́в/ и да́руй на сопроти́вных побе́ду и одоле́ние,/ да тя со всем Собо́ром Сиби́рских святы́х пе́сньми прославля́ем.
И ны́не и при́сно и во ве́ки веко́в. Ами́нь.
Богородичен: Ку́ю Ти досто́йную похвалу́ на́ше принесе́т коне́чное неможе́ние,/ я́ко явле́нием пречи́стыя Твоея́ Боже́ственныя ико́ны/ незави́стныя исто́чники целе́бныя источа́еши ве́рно прибега́ющим к Тебе́ рабо́м Твои́м.
Седа́лен, глас 4:
О всех сла́вных, Це́ркви Святе́й благода́тию Бо́жиею от вас быва́емых,/ благода́рственная Бо́гу воздаю́ще/ и Того́ боголе́пное снизхожде́ние сла́вяще,/ мо́лим вас, святи́и вси, в Сиби́ри просия́вшии,/ помози́те и нам обрести́ благода́ть и ми́лость в Де́нь Су́дный.
Сла́ва, и ны́не, Богородичен:
Под кров Твой, Влады́чице, вси земноро́днии прибега́юще,/ вопие́м Ти, Богоро́дице, упова́ние на́ше:/ изба́ви ны от безме́рных прегреше́ний и спаси́ ду́ши на́ша.
Песнь 4
Ирмос: Ду́хом прови́дя, проро́че Авваку́ме, Словесе́ воплоще́ние,/ пропове́дал еси́, вопия́:/ внегда́ прибли́житися ле́том – позна́ешися,/ внегда́ приити́ вре́мени – пока́жешися./ Сла́ва си́ле Твое́й, Го́споди.
Припев: Вси святи́и земли́ Сиби́рския, моли́те Бо́га о нас.
И́стиннии храни́телие апо́стольских преда́ний, Ду́ха облиста́ющии зари́,/ зе́млю на́шу освети́вшии сия́нием до́брых дел ва́ших,/ святи́и вси, в Сиби́ри просия́вшии, и нас научи́те пе́ти:/ сла́ва си́ле Твое́й, Го́споди.
Припев: Вси святи́и земли́ Сиби́рския, моли́те Бо́га о нас.
Храм Ду́ха Свята́го был еси́, всеблаже́нне Иоа́нне,/ рука́ма свои́ма прия́л еси́ у́зды правле́ния оби́тели Све́нския/ и ко спасе́нию подвиза́ющихся в ней призыва́л еси́, помышля́я:/ я́ко вене́ц без побе́ды, побе́да без по́двига,/ по́двиг без бра́ни, бра́нь без враго́в не быва́ет./ И та́ко во оби́тели четырена́десять лет подвиза́яся, научи́л еси́ всех пе́ти:/ сла́ва си́ле Твое́й, Го́споди.
Припев: Вси святи́и земли́ Сиби́рския, моли́те Бо́га о нас.
Све́нстей новопече́рстей оби́тели ре́вностно служа́,/ Ки́ево-Пече́рстей Ла́вре утвержде́ние был еси́, преподо́бне Иоа́нне,/ егда́ пе́рвую благослове́нную гра́моту наме́стнику ея́ прине́сл еси́,/ ю́же Патриа́рх Моско́вский тебе́ вручи́./ Отсе́ле и бы́сть нача́ло присоедине́ния митропо́лии Ки́евския к Москве́,/ на ра́дость Це́ркве Христо́вы, да вси, ча́да ея́, еди́ными усты́ пою́т:/ сла́ва си́ле Твое́й, Го́споди.
Припев: Вси святи́и земли́ Сиби́рския, моли́те Бо́га о нас.
Ве́лия ра́дости исполня́ются дне́сь лю́дие Сиби́рстии,/ ви́дяще, я́ко зве́зды, сия́ющия святы́я своя́, в ни́хже и святи́тель Филофе́й, в схи́ме Фео́дор, прославля́ется;/ благода́тию Бо́жиею храни́мый в опа́сности сме́ртней,/ язы́ческая куми́рни со и́долы их сокруши́ и научи́ всех пе́ти:/ сла́ва си́ле Твое́й, Го́споди.
Сла́ва Отцу́ и Сы́ну и Свято́му Ду́ху:
Я́ко ко́нь хра́брейший, подо́бяся Па́влу апо́столу,/ спаси́тельное ежде́ние и богопропове́дничество в суро́вей се́вере Сиби́ри соверша́л еси́, Богопросвеще́нне Филофе́е,/ прее́мнику твоему́ святи́телю Иоа́нну в труде́х сподви́жник был еси́/ и, по преставле́нии его́ Тобо́льскую митропо́лию па́ки восприи́м,/ хра́мы, шко́лы просвеще́ния и оби́тели и́ноческия созида́я, тече́ние свое́ соверши́л еси́./ Во оби́тели Святы́я Тро́ицы гра́да Тюме́ни те́лом почи́л еси́, на небеси́ воспева́еши Бо́гу:/ сла́ва си́ле Твое́й, Го́споди.
И ны́не и при́сно и во ве́ки веко́в. Ами́нь.
Богородичен: Те́плая Засту́пнице к Тебе́ прибега́ющих и ненаде́ющихся наде́ждо,/ ви́ждь ско́рбь люде́й Твои́х/ и пода́ждь по́мощь, в зна́мении Твое́м, Пречи́стая.
Пе́снь 5
Ирмос: Све́тлый нам возсия́й Свет Присносу́щный,/ у́тренюющим о судьба́х за́поведей Твои́х,/ Влады́ко Человеколю́бче, Христе́ Бо́же наш.
Припев: Вси святи́и земли́ Сиби́рския, моли́те Бо́га о нас.
Исцеле́ния всем подае́те, творя́щим па́мять ва́шу,/ святи́и вси, в земли́ Сиби́рстей просия́вшии./ Моли́теся за ны ко Го́споду, да возсия́ет и нам свет Свой присносу́щный, я́ко Человеколю́бец.
Припев: Вси святи́и земли́ Сиби́рския, моли́те Бо́га о нас.
Христо́с Госпо́дь чрез святи́теля Феодо́сия в Черни́гов тя призыва́ет, блаже́нне Иоа́нне,/ и архимандри́том Еле́цкия оби́тели поставля́ет,/ та́же по кончи́не его́ и на высоту́ святи́тельства возво́дит,/ да па́ству черни́говскую упасе́ши и уче́нием богосло́вия обогати́ши ю,/ во е́же непреста́нно славосло́вити Го́спода Человеколю́бца.
Припев: Вси святи́и земли́ Сиби́рския, моли́те Бо́га о нас.
Любо́вь Бо́жию тебе́, святи́телю о́тче Иоа́нне, на одре́ сме́ртнем лежа́щу,/ святи́тель Феодо́сий явля́ет и в чу́дном виде́нии ра́достно веща́ет:/ не скорби́, бра́те! Госпо́дь услы́ша моли́тву твою́ и ты бу́деши здрав,/ возста́ни от одра́, гото́в бу́ди служи́ти Литурги́ю Боже́ственную, се зна́мение тебе́./ И бы́сть та́ко, да вси прославля́ют Го́спода, посети́вшаго тя человеколю́бием Свои́м.
Припев: Вси святи́и земли́ Сиби́рския, моли́те Бо́га о нас.
Ю́же от обурева́ний Це́рковь Христо́ву/ благовествова́нием и́стин Ева́нгельских и святооте́ческих преда́ний ре́вностно огражда́я/ и па́ству Сиби́рскую му́дре управля́я,/ вся находя́щия ти ско́рби сла́дце терпе́л еси́, святи́телю Па́вле,/ разсужда́я рече́нное, я́ко недосто́йни су́ть стра́сти ве́ка сего́ к хотя́щей яви́тися в нас сла́ве.
Сла́ва Отцу́ и Сы́ну и Свято́му Ду́ху:
Боже́ственным жела́нием о благоле́пии до́му Бо́жия горя́,/ всеусе́рдное попече́ние о просвеще́нии па́ствы твоея́ име́л еси́,/ Богому́дре святи́телю Па́вле;/ обре́тению моще́й пе́рваго архипа́стыря Ирку́тскаго споспешеству́я, ра́довался еси́./ Столе́тие митропо́лии Тобо́льския заверши́в,/ в Ки́ево-Пече́рскую Ла́вру, на ме́сто пе́рвых по́двигов твои́х, пресели́лся еси́,/ иде́же те́лом нетле́нно почива́я, от но́щи неве́дения всех богове́дением просвеща́еши.
И ны́не и при́сно и во ве́ки веко́в. Ами́нь.
Богородичен: О Всенепоро́чная Де́во, что Ти благодаре́ние принесе́м?/ Я́ко светоза́рным явле́нием пречи́стыя Твоея́ ико́ны и Преве́чнаго Младе́нца,/ всех от неве́дения к све́ту богоразу́мия возвела́ еси́.
Песнь 6
Ирмос: Проро́ка Ио́ну подража́я, вопию́:/ живо́т мой, Бла́же, свободи́ из тли/ и спаси́ мя, Спа́се ми́ра, зову́ща: сла́ва Тебе́.
Вси в пе́снех духо́вных воспои́м согла́сно в благоче́стии просия́вшия, отцы́ на́ша,/ я́же изнесе́ Сиби́рская страна́ и я́же Це́рковь воспита́./ К ни́мже, могу́щим моли́твами свои́ми к Бо́гу из глубины́ грехо́вныя спасти́ нас, взыва́ем:/ моли́те Человеколю́бца Бо́га, да возведе́т от тли живо́т наш.
Припев: Вси святи́и земли́ Сиби́рския, моли́те Бо́га о нас.
И́стинен и ве́рен страж Черни́говския Це́ркве четырена́десять лет был еси́, святи́телю Иоа́нне, попече́ние о всех име́я./ Об оте́честве твое́м ко Го́споду из глубины́ души́ моли́лся еси́/ и прозорли́во Петру́ Пе́рвому на шве́ды побе́ду предре́к:/ преда́ст бо Госпо́дь Бог враги́ твоя́, сопротивля́ющияся тебе́, сокруше́ны пред лице́м твои́м./ Я́ко сын оте́чествия своего́, возсоедине́нию Ма́лой Росси́и с Вели́кою труды́ твои́ прилага́л еси́,/ благода́рно воспева́я Го́спода Человеколю́бца.
Припев: Вси святи́и земли́ Сиби́рския, моли́те Бо́га о нас.
Ю́жный Росси́йския земли́ преде́л оста́вив, во́ле Бо́жией повину́яся,/ в хла́дную Сиби́рь прише́л еси́, святи́телю Иоа́нне,/ я́ко муж просвеще́н и благочести́в, во бла́го Це́ркве Христо́вы на ве́лия тяготы́ и же́ртвы себе́ вдал еси́,/ да просвети́ши све́том Христо́вым лю́ди иноро́дныя,/ и́мже благослове́ние Ла́вры – ико́ну Богома́тере прине́сл еси́,/ пред не́юже за па́ству свою́ и ве́сь мир моли́лся еси́ Спа́су ми́ра, взыва́я: сла́ва Тебе́.
Припев: Вси святи́и земли́ Сиби́рския, моли́те Бо́га о нас.
Благода́ть Боже́ственная в тя всели́ся, святи́телю Инноке́нтие,/ апо́стол язы́ков был еси́, я́коже и Па́вел./ Те́мже восхище́н был еси́ на высоту́ Боже́ственнаго лицезре́ния, иде́же мо́лишися,/ да Бог возрасти́т, е́же твое́ю руко́ю му́дре насади́ и напои́ во гра́де Ирку́тске и в Сиби́рстей земли́.
Сла́ва Отцу́ и Сы́ну и Свято́му Ду́ху:
Любы́ николи́же отпа́дает, глаго́лет Боже́ственный Дух./ И́стина сия́ в чудесе́х любве́ твоея́ извести́ся, святи́телю Христо́в Инноке́нтие,/ я́ко боля́щим исцеле́ния и скорбя́щим утеше́ние источа́еши./ Па́ствы ирку́тския украше́ние и земли́ Сиби́рския храни́телю, монго́льских язы́ков просвети́телю,/ моли́ся ко Го́споду, да спасе́т всех, я́ко Человеколю́бец.
И ны́не и при́сно и во ве́ки веко́в. Ами́нь.
Богородичен: Абала́тстей ве́си многобога́тный дар и неистощи́мое сокро́вище дарова́л еси́,/ зна́мение Ма́тере Твоея́, Сло́ве,/ и Сия́ по́мощию и предста́тельством святи́теля Никола́я и преподо́бныя ма́тере Мари́и Еги́петския/ проти́вныя низлага́ем.
Конда́к, глас 3:
Дне́сь Собо́р Сиби́рских святы́х предстои́т в Це́ркви/ и неви́димо за ны мо́лится Бо́гу./ А́нгели со архиере́и славосло́вят,/ апо́столи же с му́ченики ликовству́ют,/ святи́и вси Це́ркве Христо́вы ра́дуются/ и па́ства Сиби́рская весели́тся:/ вси бо ку́пно мо́лят Преве́чнаго Бо́га.
И́кос:
А́нгельски на земли́ пожи́вших и со а́нгельскими чи́нми на Небеси́ ны́не све́тло лику́ющих/ святы́х, в земли́ Сиби́рстей просия́вших, пе́сньми почти́м:/ ра́дуйтеся, святи́телие Некта́рие, Дими́трие, Иоа́нне, Филофе́е, Анто́ние, Па́вле, Варлаа́ме и Филаре́те,/ гра́да Тобо́льска и всея́ Сиби́ри просвети́телие./ Ра́дуйтеся, архипа́стыри Ирку́тстии Инноке́нтие, Меле́тие, Софро́ние и Меле́тие,/ земли́ Сиби́рския сла́ва и украше́ние./ Ра́дуйся, Инноке́нтие, Сиби́ри и полу́нощных стран апо́столе,/ указа́ние пути́ в Ца́рство Небе́сное, я́ко завеща́ние, всем нам оста́вивый./ Ра́дуйся, Симео́не, Тобо́льское прозябе́ние и па́ствы Смоле́нския святи́телю./ Ра́дуйся, Гера́симе, из Ирку́тска в А́страхань на святи́тельство при́званный./ Ра́дуйся, Васи́лие, великому́чениче Мангазе́йский, цве́те целому́дрия и чистоты́,/ зе́млю Сиби́рскую кро́вию свое́ю освяти́вый./ Ра́дуйтеся, преподо́бнии отцы́ Богоно́снии Ге́рмане, Сине́сие, Мака́рие, Аре́фо, Варлаа́ме, Андре́е и Мисаи́ле,/ по́двиги и моли́твами ва́шими, я́ко зве́зды, тьму́ полу́нощных стран озари́вшии./ Ра́дуйтеся, пра́веднии Симео́не, Дании́ле, Стефа́не, Пе́тре и Фео́доре,/ ма́нием Бо́жиим в Сиби́рь прише́дший и свя́тостию жития́ ва́шего ю просвети́вшии./ Ра́дуйтеся, Христа́ ра́ди юро́дивии Иоа́нне, Космо́ и блаже́нная ма́ти До́мно,/ в Сиби́ри подвиза́вшиися и Бо́гу угоди́вшии./ Ра́дуйтеся, уго́дницы Бо́жии, явле́ннии вси и неявле́ннии,/ ве́рою свое́ю Бо́га просла́вившии и страда́нии свои́ми ми́лость Его́ обре́тшии:/ вси бо вы моли́те о нас Преве́чнаго Бо́га.
Песнь 7
Ирмос: Пе́щь, Спа́се, ороша́шеся,/ о́троцы же, лику́юще, поя́ху:/ отце́в Бо́же, благослове́н еси́.
Припев: Вси святи́и земли́ Сиби́рския, моли́те Бо́га о нас.
Глас Ева́нгельский услы́шавше,/ апо́стольскою ре́вностию к науче́нию неве́рных язы́ков устреми́шася,/ святи́и вси, в Сиби́ри просия́вшии,/ зе́млю сию́ по́двиги свои́ми освяти́вшии, научи́те пе́ти всех: Бо́же, благослове́н еси́.
Припев: Вси святи́и земли́ Сиби́рския, моли́те Бо́га о нас.
Оте́ц сиро́т и вдов защи́тник, бога́тство ни́щих и боля́щих врач безме́здный,/ ста́рости жезл и науче́ние ю́ности,/ мона́шествующим доброде́телей пра́вило яви́лся еси́, святи́телю Иоа́нне,/ о па́стве свое́й попече́ние всеусе́рдное име́я, поуча́л еси́ всех ве́рных пе́ти:/ благослове́н еси́, Бо́же оте́ц на́ших.
Припев: Вси святи́и земли́ Сиби́рския, моли́те Бо́га о нас.
Четы́ре ле́та оте́чески па́ству Сиби́рскую окормля́я, всем был еси́ вся, святи́телю Иоа́нне,/ святоле́пно пожи́в, от Го́спода сподо́блен да́ра прозре́ния,/ вре́мя кончи́ны своея́ прови́дя, Го́сподеви предугото́вал еси́ себе́/ и пред о́бразом Пречи́стыя Де́вы коленопреклоне́ние преста́вися,/ восприя́л еси́ поко́й Бо́га благослове́ннаго.
Припев: Вси святи́и земли́ Сиби́рския, моли́те Бо́га о нас.
Еди́нством ве́ры, наде́жды и любве́ сою́зом,/ от ю́ности твоея́ в духо́вном просвеще́нии ду́шу твою́ утверди́л еси́, святи́телю Софро́ние,/ глас свы́ше в Золотоно́шестей оби́тели Богома́тере бы́сть тебе́:/ егда́ бу́деши епи́скоп, сози́жди храм во и́мя всех святы́х./ Е́же и испо́лни, внегда́ про́мыслом Бо́жиим Ирку́тстей па́стве апо́стольски служи́л еси́,/ да и на ме́сте пе́рвых по́двигов твои́х и в Сиби́рстей земле́ ве́рныя прославля́я тя, вопию́т:/ отце́в Бо́же, благослове́н еси́.
Сла́ва Отцу́ и Сы́ну и Свято́му Ду́ху:
Стра́хом Госпо́дним утвержда́емь, терпе́нием стяжа́л еси́ ду́шу твою́, святи́телю Софро́ние,/ путе́м те́сным, еди́ным веду́щим в жи́знь ве́чную, с Сине́сием преподо́бным, сподви́жником твои́м, ше́ствовал еси́,/ взира́я на кре́стный пу́ть Подвигополо́жника Христа́./ Научи́ и нас стра́ху Госпо́дню,/ да, благоче́стно пожи́в на земли́, сподо́бимся воспева́ти и на Небеси́:/ благослове́н еси́, Бо́же оте́ц на́ших.
И ны́не и при́сно и во ве́ки веко́в. Ами́нь.
Богородичен: Та́йна глубины́ рождества́ Твоего́ ум а́нгельский ужаса́ет, Де́во,/ и пречи́стая Твоя́ ико́на Каза́нская в Тобо́льске де́моны прого́нит,/ и ли́ца нечести́вых омрача́ет, и в студ порева́ет:/ не терпя́т бо взира́ти на си́лу ея́, бе́гают же и исчеза́ют./ Мы же любе́зно покланя́емся и Тя, Богоро́дицу, велича́ем.
Песнь 8
Ирмос: Его́же ужаса́ются А́нгели и вся во́инства,/ я́ко Творца́ и Го́спода,/ по́йте, свяще́нницы, просла́вите, о́троцы,/ благослови́те, лю́дие,/ и превозноси́те во вся ве́ки.
Ны́не вре́мя торжества́, ны́не ра́дость духо́вная яви́ся,/ возвесели́мся у́бо, христоимени́тии лю́дие, и Христу́ ра́достно воспое́м:/ Твой мир да́ждь нам, да Тя, Безнача́льнаго Царя́ сла́вы,/ хва́лим и превозно́сим во вся ве́ки.
Припев: Вси святи́и земли́ Сиби́рския, моли́те Бо́га о нас.
О часе́ преставле́ния твоего́, святи́телю Иоа́нне,/ извести́ Госпо́дь и сподви́жника твоего́ блаже́ннаго Филофе́я,/ в да́льнем Ко́ндинстем кра́е апо́стольское служе́ние соверша́вшаго./ Той бо, Бо́жиим Ду́хом води́мь, спу́тником свои́м возвести́:/ брат наш Иоа́нн у́спе, пре́йдем отсю́ду./ И та́ко по шести́ ме́сяцех пути́ возврати́ся во град Тобо́льск и те́ло твое́ погребе́нию предаде́./ Ви́дя же его́ нетле́нным взыва́ше:/ лю́дие, Безнача́льнаго Царя́ сла́вы Христа́ Бо́га/ по́йте и превозноси́те во вся ве́ки.
Припев: Вси святи́и земли́ Сиби́рския, моли́те Бо́га о нас.
О́тче всеблаже́нне Меле́тие, апо́стольских уче́ний ве́рный подража́телю/ и Ева́нгельския и́стины в Сиби́рстей земли́ вку́пе с преподо́бным Варлаа́мом Чико́йским всеусе́рднейший глаша́таю,/ Пастыренача́льника Го́спода на́шего Иису́са Христа́ ве́рный служи́телю,/ моли́ Его́ дарова́ти душа́м на́шим мир и ве́лию ми́лость.
Сла́ва Отцу́ и Сы́ну и Свято́му Ду́ху:
Смире́ние – охрани́тельный меч,/ с ним безопа́сно про́йдеши зе́млю и ад и Не́ба дости́гнеши, –/ поуча́л еси́ спаса́ющихся, святи́телю Меле́тие, явля́я о́браз кро́тости житие́м свои́м./ Апо́стольски в стране́ Сиби́рстей подвиза́лся еси́,/ от Ирку́тска до Охо́тска, на Кури́льских и Алеу́тских острове́х язы́чники просвеща́я./ Коне́ц же земна́го жития́ твоего́ па́стве Ха́рьковстей прине́сл еси́,/ воспева́я Безнача́льнаго Царя́ сла́вы во вся ве́ки.
И ны́не и при́сно и во ве́ки веко́в. Ами́нь.
Богородичен: Храм Тя Бо́жий, Влады́чице, ве́дуще,/ во святе́м хра́ме Твое́м ру́ки на́ша возно́сим на моли́тву:/ ви́ждь озлобле́ние на́ше и пода́ждь нам по́мощь.
Песнь 9
Ирмос: Живоприе́мный исто́чник приснотеку́щий,/ светоно́сный свети́льник благода́ти,/ храм одушевле́нный, се́нь пречи́стую,/ Небесе́ и земли́ простра́ннейшую,/ Богоро́дицу, ве́рнии, велича́ем.
Припев: Вси святи́и земли́ Сиби́рския, моли́те Бо́га о нас.
Вои́стинну а́нгел храни́тель яви́лся еси́ па́стве твое́й Сиби́рстей, любобоже́ственне Иоа́нне,/ в годи́ну бе́дствий и во вся дни оте́чески посеща́я ю./ В зало́г любве́ твоея́, я́ко ми́лость Бо́жию, святы́я мо́щи твоя́ ве́рным лю́дем оста́вил еси́,/ да вси, покланя́ющеся им, велича́ют Христа́ Бо́га и Пренепоро́чную Ма́терь Его́.
Припев: Вси святи́и земли́ Сиби́рския, моли́те Бо́га о нас.
А́ще и на Небеси́ пребыва́еши, оба́че и земны́х не оставля́еши, святи́телю Иоа́нне,/ мы же, ча́да твоя́, любо́вию дви́жимии, вене́ц похвалы́ тебе́ прино́сим/ и с благослове́ния Первосвяти́теля Росси́йския Це́ркве в де́нь па́мяти твоея́ собо́р Сиби́рских святы́х прославля́ем,/ Христа́ Бо́га и Пренепоро́чную Ма́терь Его́ велича́юще.
Припев: Вси святи́и земли́ Сиби́рския, моли́те Бо́га о нас.
Любосмире́нне Инноке́нтие, прозябе́ние гра́да Ирку́тска,/ ты и в по́двиге твое́м соиме́нне апо́столу Сиби́ри, чудотво́рцу Ирку́тскому был еси́,/ во сла́ву Це́ркве и оте́чества твоего́ в просвеще́нии Сиби́ри и полу́нощных стран,/ я́коже и преподо́бный Ге́рман Аля́скинский, труди́лся еси́,/ поуча́я всех воспева́ти Христа́ и Пречи́стую Ма́терь Его́.
Припев: Вси святи́и земли́ Сиби́рския, моли́те Бо́га о нас.
Явле́ние свя́тости твоея́, я́ко луч Боже́ственный, возсия́ Це́ркви Христо́вей в на́ши дни,/ и сло́во наставле́ния твоего́ о указа́нии пути́ в Ца́рство Небе́сное/ подвиза́ет ду́ши на́ша ко спасе́нию, святи́телю Инноке́нтие,/ в до́ме Живонача́льныя Тро́ицы, оби́тели преподо́бнаго Се́ргия, те́лом почива́я,/ ты све́тиши и Сиби́рстей земли́, иде́же со все́ми святы́ми, в ней просия́вшими, апо́стольски труди́лся еси́,/ ны́не же на Небеси́ восхваля́еши Го́спода и Пресвяту́ю Ма́терь Его́.
Сла́ва Отцу́ и Сы́ну и Свято́му Ду́ху:
Его́же возлюби́ли есте́, Его́же возжела́ли есте́, Его́же ра́ди подвиза́лися есте́,/ святи́и вси, в земли́ Сиби́рстей просия́вшии, моли́те Христа́ Бо́га,/ да ми́рное даст стоя́ние Це́ркви Святе́й, оте́честву на́шему и всем лю́дем земли́/ и проба́вит ми́лость Свою́ почита́ющим па́мять ва́шу.
И ны́не и при́сно и во ве́ки веко́в. Ами́нь.
Богородичен: Ма́ти Всепе́тая, Влады́чице ми́ра, умилосе́рдися на моле́ние на́ше,/ Твое́ бо есмы́ достоя́ние./ Всех спаси́ и поми́луй, да Тя, вси ро́ди, непреста́нно велича́ем.
Свети́лен:
Пло́тию а́ще и почи́ли есте́, святи́и вси, в земли́ Сиби́рстей просия́вшии,/ но ду́хом жи́ви есте́, в Ца́рствии Небе́снем со Христо́м ца́рствуете/ и моли́теся Ему́ о почита́ющих ве́рою и любо́вию па́мять ва́шу.
Сла́ва, и ны́не, Богородичен:
Умири́ мир, Христе́, мольба́ми Чи́стыя Богоотрокови́цы/ и низложи́ вра́жия си́лы,/ и тишину́ неизглаго́ланную устро́й и во ве́ки сохрани́.
Молитва
К вам, о святи́и земли́ Сиби́рския, я́ко путево́дным свети́льникам, дея́ньми свои́ми освети́вшим путь Небе́снаго восхо́да, аз многогре́шный смире́нно коле́на се́рдца моего́ преклоня́ю и из глубины́ души́ взыва́ю: умоли́те о мне Человеколю́бца Бо́га, да не попу́стит ми еще́ блужда́ти по распу́тиям греха́, но да просвети́т мои́ ум и се́рдце све́том благода́ти Своея́, я́ко да то́ю озаря́ем и подкрепля́ем, возмогу́ про́чее вре́мя земна́го жития́ пра́вою стезе́ю непреткнове́нно преити́ и хода́тайством ва́шим к Преблаго́му Го́споду сподо́блюся, поне́ вма́ле прича́стник бы́ти духо́вныя ва́шея трапе́зы в Небе́сном черто́зе Царя́ сла́вы. Ему́же со Безнача́льным Его́ Отце́м и Пресвяты́м, Благи́м и Животворя́щим Ду́хом бу́ди сла́ва, честь и поклоне́ние во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![собору Сибирских святых собору Сибирских святых](img_b/108.jpg)