23 июня.
Канон Святому священномученику Мисаилу, епископу Рязанскому
![священномученику Мисаилу, епископу Рязанскому священномученику Мисаилу, епископу Рязанскому](img_i/061.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, глас 5:
Богому́дре о́тче Мисаи́ле,/ архиере́ев сла́во и си́рых защи́тниче,/ безбоя́зненный пропове́дниче уче́ния Боже́ственнаго,/ ты, в ве́ре пра́вей сердца́ притека́ющих к тебе́ утверди́в/ и свяще́нную оде́жду в кро́ви муче́ния омочи́в,/ я́ко му́ченик и па́стырь до́брый яви́лся еси́./ Моли́ся приле́жно Влады́це Христу́// о спасе́нии душ на́ших.
Велича́ние:
Велича́ем тя,/ священному́чениче Мисаи́ле,/ и чтим честна́я страда́ния твоя́,/ я́же за Христа́// претерпе́л еси́.
Стихи́ра, глас 6:
Благоче́стно пожи́в, я́ко святи́тель,/ па́ству Ряза́нскую зело́ возлюби́л еси́/ и, путь спасе́ния неве́дущим указу́я,/ до́брый па́стырь ста́ду твоему́ яви́лся еси́,/ вене́ц же му́ченический за Христа́ прие́м,/ кро́вию твое́ю зе́млю обагри́л еси́./ И ны́не предстоя́ Престо́лу Сла́вы,/ не забу́ди сро́дников твои́х// и моли́ся о душа́х на́ших.
Кано́н, глас 6.
Песнь 1
Ирмос: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,// Бо́гу побе́дную песнь пои́м, вопия́ше.
Припев: Священному́чениче Мисаи́ле, моли́ Бо́га о нас.
Лю́дие христоимени́тии земли́ Ряза́нския,/ спра́зднуйте с на́ми торжество́ церко́вное,/ па́мять священному́ченика Мисаи́ла соверша́юще,/ да его́ моли́твами в ве́ре правосла́вней утверди́мся.
Припев: Священному́чениче Мисаи́ле, моли́ Бо́га о нас.
Мисаи́ле чу́дне и архиере́ю сла́вне,/ ста́до Христо́во, я́ко па́стырь до́брый, упа́сл еси́, ду́шу свою́ за него́ полага́я,/ моли́ся приле́жно о душа́х на́ших.
Сла́ва Отцу́ и Сы́ну и Свято́му Ду́ху:
Житие́м непоро́чным и благоче́стием твои́м возсия́л еси́, свя́те Мисаи́ле,/ и, ре́вностию по Бо́зе распаля́емь, поклоне́ние тва́ри упраздни́л еси́,/ моли́ся о чту́щих тя благоче́стно,/ да в любви́ Бо́жией пребу́дем.
И ны́не и при́сно и во ве́ки веко́в. Ами́нь.
Богородичен: А́нгели лику́ют на Небеси́, ви́дяще о́браз Твой, Пречи́стая,/ принесе́нный из Му́рома во град Ряза́нь первосвяти́телем Васи́лием,/ и́же, пучи́ну ре́чную с ним безбе́дно преплы́в,/ благослове́ние па́стве Ряза́нстей дарова́л есть.
Песнь 3
Ирмос: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени// испове́дания Твоего́.
Припев: Священному́чениче Мисаи́ле, моли́ Бо́га о нас.
Прииди́те, лю́дие Ряза́нстии,/ па́стыря до́браго, ду́шу свою́ за лю́ди положи́вшаго, почти́м и с любо́вию ему́ возопии́м:/ святи́телю Мисаи́ле, предста́тельствуй о нас пред Бо́гом,/ во е́же спасти́ся нам.
Припев: Священному́чениче Мисаи́ле, моли́ Бо́га о нас.
Христа́, А́гнца Бо́жия, измла́да возлюби́в/ и всего́ себе́ в послуша́ние наста́внику твоему́ вручи́в,/ архипа́стырь добр гра́ду Ряза́ни показа́лся еси́, Мисаи́ле пресла́вне./ Помози́ и нам от си́лы в си́лу восходи́ти.
Сла́ва Отцу́ и Сы́ну и Свято́му Ду́ху:
Му́дрость Бо́жию разуме́в,/ я́ко пра́веден Госпо́дь и пра́вды возлюби́,/ И́стине был еси́ служи́тель ве́рный,/ Мисаи́ле священному́чениче./ И ны́не о нас приле́жно моли́ся.
И ны́не и при́сно и во ве́ки веко́в. Ами́нь.
Богородичен: О Пренепоро́чная Де́во, Ма́ти Творца́ вся́ческих,/ Спаси́теля ми́ра неизрече́нно ро́ждшая!/ Того́ моли́ спасти́ся душа́м на́шим.
Седа́лен, глас 4:
Огнь Боже́ственныя любве́ в се́рдце свое́м име́я/ и чистоту́ стяжа́в серде́чную, адама́нте ве́ры Христо́вы,/ научи́ нас ше́ствовати путе́м спасе́ния.
Сла́ва, и ны́не, Богородичен:
Богора́дованная Влады́чице,/ ро́ждши Спа́са Христа́, Бо́жию Си́лу и Бо́жию Прему́дрость,/ спаси́ град сей и лю́ди, на Тя упова́ющия.
Песнь 4
Ирмос: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,// от смы́сла чи́ста о Го́споде пра́зднующи.
Припев: Священному́чениче Мисаи́ле, моли́ Бо́га о нас.
Христа́ да восхва́лим, ве́рнии,/ святи́теля ди́внаго яви́вшаго,/ моля́щася о душа́х на́ших.
Припев: Священному́чениче Мисаи́ле, моли́ Бо́га о нас.
Я́ко свети́ло небе́сное, Мисаи́ле чу́дне и архиере́ю сла́вне,/ кро́вию твое́ю свиде́тельство Сло́ва Бо́жия просия́./ Моли́ся приле́жно о нас.
Сла́ва Отцу́ и Сы́ну и Свято́му Ду́ху:
Любо́вь к Бо́гу стяжа́в и Пастыренача́льнику Христу́ подража́я,/ па́стырь до́брый яви́лся еси́, святи́телю Мисаи́ле./ Моли́ся о нас, да любо́вию Ева́нгельскою обогати́мся.
И ны́не и при́сно и во ве́ки веко́в. Ами́нь.
Богородичен: Изба́ви от бед к Тебе́ прибега́ющих, Ма́ти и Де́во Пречи́стая,/ Христа́ Бо́га ро́ждшая,/ моля́щи Того́ спасти́ ду́ши на́ша.
Пе́снь 5
Ирмос: Бо́жиим Све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,// от мра́ка грехо́внаго взыва́юща.
Припев: Священному́чениче Мисаи́ле, моли́ Бо́га о нас.
Лю́ди, не ве́дущия Го́спода, неле́ностно просвеща́л еси́, святи́телю,/ Отца́ и Сы́на и Ду́ха Свята́го,/ Еди́наго Бо́га в Трие́х Ли́цех, пропове́дуя.
Припев: Священному́чениче Мисаи́ле, моли́ Бо́га о нас.
Наста́вника тя и моли́твенника те́пла иму́ще, священному́чениче Мисаи́ле,/ мо́лимся ти усе́рдно:/ не забу́ди нас, сро́дников твои́х,/ избавля́я от наве́т вра́жиих и вся́кия печа́ли.
Сла́ва Отцу́ и Сы́ну и Свято́му Ду́ху:
Благода́рное пе́ние, тебе́ приноси́мое, святи́телю Мисаи́ле, не пре́зри,/ но приими́ и ра́дости духо́вныя испо́лни сердца́ моли́твенник твои́х,/ Христа́ приле́жно о нас умоля́я.
И ны́не и при́сно и во ве́ки веко́в. Ами́нь.
Богородичен: Ра́дуйся, Ра́досте на́ша,/ покры́й нас от вся́каго зла/ честны́м Твои́м покро́вом.
Песнь 6
Ирмос: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:// возведи́ от тли живо́т мой, Многоми́лостиве.
Припев: Священному́чениче Мисаи́ле, моли́ Бо́га о нас.
Ра́зум име́яй Бо́гом просвеще́нный,/ до́брый де́латель за́поведей Христо́вых яви́лся еси́, свя́те Мисаи́ле,/ и ду́шу твою́ Бо́гу прине́сл еси́,/ я́ко же́ртву чи́сту и непоро́чну.
Припев: Священному́чениче Мисаи́ле, моли́ Бо́га о нас.
Смире́нием се́рдца украси́вся,/ во оби́тели Небе́сныя вшел еси́, священному́чениче,/ иде́же нас помяни́, почита́ющих тя при́сно.
Сла́ва Отцу́ и Сы́ну и Свято́му Ду́ху:
Любо́вь ко Христу́ Пастыренача́льнику запечатле́л еси́ кро́вию твое́ю/ и ду́шу, я́ко же́ртву чи́стую, Бо́гу прине́сл еси́,/ путь спасе́ния нам указу́я.
И ны́не и при́сно и во ве́ки веко́в. Ами́нь.
Богородичен: Ма́ти Све́та яви́лася еси́, Влады́чице,/ Те́мже моли́м Тя, Богоневе́сто:/ озари́ ду́ши на́ша Све́том Сы́на Твоего́.
Конда́к, глас 5:
Весели́тся ра́достне Це́рковь Ру́сская,/ во обре́тении честны́х твои́х моще́й,/ священному́чениче Мисаи́ле,/ ты бо, заве́т Пастыренача́льника исполня́я/ и о лю́дех, не ве́дущих Го́спода, се́рдцем боле́знуя,/ ду́шу твою́ за па́ству положи́л еси́./ И нам простри́ ру́ку по́мощи хода́тайством твои́м// и упра́ви наш путь ко спасе́нию.
И́кос:
Ди́внаго уго́дника Бо́жия просла́вим,/ и́же, от ю́ности Христа́ возлюби́в,/ Тому́ рабо́тати пла́менне вожделе́/ и, путь ве́рным освяща́я,/ ра́ною сме́ртною уязви́ся./ Те́мже вси зове́м ему́:/
Ра́дуйся, во смире́нии Ду́хом Христо́вым обогати́выйся;/
ра́дуйся, во свиде́тельстве Сло́ва Бо́жия любо́вь Христо́ву яви́вый./
Ра́дуйся, в уране́нии твое́м не устраши́выйся;/
ра́дуйся, священному́чениче Мисаи́ле, помо́щниче наш,/ упра́ви наш путь ко спасе́нию.
Песнь 7
Ирмос: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:// благослове́н еси́, Бо́же оте́ц на́ших.
Припев: Священному́чениче Мисаи́ле, моли́ Бо́га о нас.
Па́стырю до́брый, ду́шу свою́ за о́вцы положи́вый, священному́чениче Мисаи́ле,/ моли́твами твои́ми помози́ па́стырем ста́до Христо́во упасти́,/ да приведу́т его́ во оби́тели ве́чныя, во е́же зва́ти:/ благослове́н Бог оте́ц на́ших.
Припев: Священному́чениче Мисаи́ле, моли́ Бо́га о нас.
Не преста́й, святи́телю, моли́тися о сро́дницех твои́х,/ во е́же нам по за́поведем Госпо́дним ходи́ти, зову́ще:/ благослове́н Бог оте́ц на́ших.
Сла́ва Отцу́ и Сы́ну и Свято́му Ду́ху:
Ре́вностию по Бо́зе распаля́емый, святи́телю Христо́в Мисаи́ле,/ па́ству свою́ поуча́л еси́,/ да оста́вят вси нече́стие и да пою́т:/ благослове́н Бог оте́ц на́ших.
И ны́не и при́сно и во ве́ки веко́в. Ами́нь.
Богородичен: Всепе́тая Ма́ти,/ приими́ мольбы́ упова́ющих на Тя,/ да с Тобо́ю воспева́ем Го́спода во ве́ки.
Песнь 8
Ирмос: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти.// Тя превозно́сим во вся ве́ки.
Припев: Священному́чениче Мисаи́ле, моли́ Бо́га о нас.
Днесь пресве́тло озаря́емся, пречу́дный Мисаи́ле,/ творя́ще па́мять твою́ ве́рно, песнь отроко́в пою́ще:/ вся дела́, благослови́те, по́йте Го́спода.
Припев: Священному́чениче Мисаи́ле, моли́ Бо́га о нас.
Бо́дренным ума́ трезве́нием и те́плым ко Христу́ моле́нием, свя́те Мисаи́ле,/ ду́шу твою́ устроя́л еси́, непреста́нно поя́:/ вся дела́, благослови́те, по́йте Го́спода.
Сла́ва Отцу́ и Сы́ну и Свято́му Ду́ху:
Огне́м духо́вным, су́щим в тебе́, блаже́нне Мисаи́ле,/ пла́мень грехо́вный в душа́х ве́рных в ро́су претворя́шеся./ Те́мже, ра́дуяся на Небесе́х со святи́телем Васи́лием, взыва́еши:/ вся дела́, благослови́те, по́йте Го́спода.
И ны́не и при́сно и во ве́ки веко́в. Ами́нь.
Богородичен: Чи́стую сла́вно почти́м, Де́ву Богоро́дицу,/ я́ко свет сердца́м на́шим/ и покро́в всеси́льный от напа́стей вра́жиих.
Песнь 9
Ирмос: Бо́га/ челове́ком невозмо́жно ви́дети,/ на Него́же не сме́ют чи́ни а́нгельстии взира́ти;/ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,// с Небе́сными во́и Тя ублажа́ем.
Припев: Священному́чениче Мисаи́ле, моли́ Бо́га о нас.
Хва́лится тобо́ю, священному́чениче Мисаи́ле, град Ряза́нь,/ име́я тя моли́твенника и хода́тая пред Бо́гом,/ Его́же моли́ спасти́ся душа́м на́шим.
Припев: Священному́чениче Мисаи́ле, моли́ Бо́га о нас.
Предстоя́ у Престо́ла Царя́ Сла́вы, священному́чениче,/ проле́й те́плую моли́тву о нас ко Го́споду/ и испроси́ нам ве́лия ми́лости.
Сла́ва Отцу́ и Сы́ну и Свято́му Ду́ху:
По́двиг твой, святи́телю, зерца́ло благ ве́чных яви́ся,/ я́ко ду́шу свою́ положи́л еси́ за дру́ги своя́,/ те́мже помози́ нам за́поведи Госпо́дня испо́лнити.
И ны́не и при́сно и во ве́ки веко́в. Ами́нь.
Богородичен: Взыва́ем вси к Тебе́, Цари́це Небе́сней:/ Ма́ти Бо́жия,/ спаси́ род христиа́нский.
Свети́лен:
Сла́внаго священному́ченика Мисаи́ла пе́сньми восхва́лим,/ я́ко ду́шу свою́ за лю́ди положи́вшаго/ и све́том ве́ры Христо́вы их просвети́вшаго.
Сла́ва, и ны́не, Богородичен:
Пресвята́я Влады́чице,/ просвети́ нас Све́том Сы́на Твоего́/ и спаси́ ду́ши на́ша.
Моли́тва
О избра́нниче и уго́дниче Христо́в, священному́чениче Мисаи́ле, Це́ркве Ру́сския сто́лпе непоколеби́мый и сро́дников твои́х предста́телю и наста́вниче! Ты, от ю́ности Христа́ возлюби́в и Тому́ рабо́тати пла́менне вожделе́в, пропове́дал еси́ Ева́нгелие лю́дем, не ве́дущим и́стины, и, стрелы́ летя́щия не убоя́вся, да́же до кро́ве пострада́л еси́ и путь ве́рным освяти́л еси́. Ны́не у́бо при́зри на нас, умиле́нною душе́ю и сокруше́нным се́рдцем тя призыва́ющих, и утверди́ в ве́ре святе́й, научи́ нас всегда́ твори́ти во́лю Бо́жию и храни́ти за́поведи Госпо́дня. Бу́ди, о́тче, па́стырем на́шим пра́вило ве́ры, во́ином вождь духо́вный, боля́щим врач изря́дный, печа́льным уте́шитель, гони́мым засту́пник, ю́ным наста́вник, всем же благосе́рдый оте́ц и те́плый моли́твенник, я́ко да предста́тельством твои́м ве́ра правосла́вная утвержда́ется во Оте́честве на́шем и непреста́нно сла́вится в нем и́мя Пресвяты́я Тро́ицы, Отца́, и Сы́на, и Свята́го Ду́ха, во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![священномученику Мисаилу, епископу Рязанскому священномученику Мисаилу, епископу Рязанскому](img_b/061.jpg)