22 июня.

Канон первый преподобному Кириллу, игумену Белоезерскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 1:

Яко кри́н, в пусты́ни Дави́дски процве́л еси́, о́тче Кири́лле, злостра́стия те́рние искореня́я, и собра́л еси́ в не́й учени́к мно́жество, стра́хом Бо́жиим и уче́нием твои́м наставля́емых, и́хже и до конца́, я́ко чадолюби́вый оте́ц, не оста́вил еси́, посеща́я, да вси́ вопие́м: сла́ва Да́вшему ти́ кре́пость, сла́ва Венча́вшему тя́, сла́ва Де́йствующему тобо́ю все́м исцеле́ния.

Кано́н свята́го Кири́лла. Гла́с 6.

Пе́снь 1.

Ирмос: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Припев: Преподо́бне о́тче Кири́лле, моли́ Бо́га о нас.

Прекра́сная лоза́ виногра́да Христо́ва бы́л еси́, прему́дре Кири́лле, и гро́зд пресла́дкий яви́лся еси́, боже́ственную сла́дость ве́рным источа́еши, блаже́нне, ку́пно же и ра́дование пою́щим тя́.

Припев: Преподо́бне о́тче Кири́лле, моли́ Бо́га о нас.

Отче Кири́лле, не терпя́, вра́г в нача́ле твоего́ жития́ бу́рю воздви́г, дре́вом напра́сно хотя́ умертви́ти тебе́, а́ще не бы́ боже́ственный гла́с возгласи́л тя́, богому́дре.

Сла́ва Отцу́ и Сы́ну и Свято́му Ду́ху:

Христа́, на́с ра́ди смири́вшагося, подража́в и кре́ст тво́й взе́м, преподо́бне, Того́ стопа́м после́довал еси́, вся́ко мирско́е пристра́стие от тебе́ оттря́сл еси́, пребога́те.

И ны́не и при́сно и во ве́ки веко́в. Ами́нь.

Богородичен: Во двою́ естеству́ Еди́н от Святы́я Тро́ицы, от чи́стых крове́й Твои́х воплоти́ся, боголе́пно про́йде, и́же от Ада́ма спаса́я, Пречи́стая, бла́гостию.

Пе́снь 3.

Ирмос: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Припев: Преподо́бне о́тче Кири́лле, моли́ Бо́га о нас.

Аще и в ми́ре су́щая, о́тче, преоби́дел еси́, но та́мо преми́рная и нетле́нная стяжа́л еси́, иде́же гла́с пра́зднующих и ра́йское наслажде́ние.

Припев: Преподо́бне о́тче Кири́лле, моли́ Бо́га о нас.

Льсти́вый вра́г хотя́ тебе́ па́кость сотвори́ти, преподо́бне, лука́выя челове́ки на тя́ вооружа́ет, тебе́ же прирази́вся, постыде́ся, Христу́ бо тя́ соблюда́ющу.

Сла́ва Отцу́ и Сы́ну и Свято́му Ду́ху:

Уже́ пресла́вное твое́ житие́ всю́ду, преподо́бне, прославля́ется, и чудеса́ твоя́ в конце́х пропове́даются, те́мже, в па́мять твою́ соше́дшеся, почита́ем тя́.

И ны́не и при́сно и во ве́ки веко́в. Ами́нь.

Богородичен: Пло́ти бре́нней соедини́вся, Иже от Отца́ единоро́дный, в ложесна́х Твои́х, еди́н от двою́ про́йде без истле́ния и соблюде́ невреди́мо де́вство Твое́, Всепе́тая.

Седа́лен, гла́с 4.

Приспе́ пра́здник честна́го твоего́ успе́ния, блаже́нне Кири́лле, просвеща́я все́х пра́зднующих па́мять твою́ све́тло и Христа́ непреста́нно пе́сньми всегда́ сла́вящих.

Сла́ва, и ны́не, Богородичен:

Иже на престо́ле херуви́мстем седя́й и в не́дрех Отчих водворя́яся я́ко на престо́ле святе́м седи́т Свое́м, Влады́чице, в не́дрех Твои́х; вопло́щся бо Бо́г вои́стинну, воцари́ся над все́ми язы́ки, и разу́мно ны́не пои́м Ему́, Его́же умоли́ спасти́ся рабо́м Твои́м.

Пе́снь 4.

Ирмос: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.

Припев: Преподо́бне о́тче Кири́лле, моли́ Бо́га о нас.

Отче преподо́бне, сна́ твои́ма очи́ма не да́л еси́, ни ве́ждома дрема́ния, до́ндеже сподо́бился еси́ ви́дети пра́ведных селе́ния, я́же угото́ва Бо́г лю́бящим Его́.

Сла́ва Отцу́ и Сы́ну и Свято́му Ду́ху:

Уже́ не ктому́ врази́, ниже́ челове́цы лука́вии, мо́гут к тебе́ прибли́житися, Кири́лле преподо́бне: ви́деша бо благода́ть Бо́жию, тебе́ всегда́ соблюда́ющую.

И ны́не и при́сно и во ве́ки веко́в. Ами́нь.

Богородичен: На Тя́ упова́ние мое́ возложи́х, Ма́ти Присноде́во, спасе́ния моего́ и Тя́ Предста́тельницу име́ю живота́ моего́, тве́рду же и непоколеби́му.

Пе́снь 5

Ирмос: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Припев: Преподо́бне о́тче Кири́лле, моли́ Бо́га о нас.

Изря́дно твое́ житие́ в после́дния ро́ды и пресла́вно яви́ся, чудеса́ же твоя́ всю́ду ве́рным излия́шася. Те́мже тя́ вси́, о́тче, ублажа́ем.

Припев: Преподо́бне о́тче Кири́лле, моли́ Бо́га о нас.

Ра́йския добро́ты жела́я, преподо́бне Кири́лле, и тоя́ ра́ди в слеза́х и воздыха́ниих, бде́ниих же и моли́твах твою́ жи́знь препроводи́л еси́ и отту́ду насле́дил еси́ жела́емое тебе́ блаже́нство.

Сла́ва Отцу́ и Сы́ну и Свято́му Ду́ху:

Пресве́тлый тво́й пра́здник, о́тче, благоче́стно пра́зднующим подава́й свы́ше спасе́ние и избавле́ние, да тя́ вси́, блаже́нне Кири́лле, непреста́нно воспева́ем.

И ны́не и при́сно и во ве́ки веко́в. Ами́нь.

Богородичен: Лю́дем я́ко вои́стинну ти́хое приста́нище Христо́с Тебе́ яви́, ве́рою и любо́вию Тя́, и́стинную Влады́чицу, Всенепоро́чная, от со́вести чи́сты Богоро́дицу испове́дающим.

Пе́снь 6.

Ирмос: Ят бы́сть, но не удержа́н в пе́рсех ки́товых Ио́на: Тво́й бо о́браз нося́, страда́вшаго и погребе́нию да́вшагося, я́ко от черто́га, от зве́ря изы́де. Приглаша́ше же кустоди́и: храня́щии су́етная и ло́жная, ми́лость сию́ оста́вили есте́.

Припев: Преподо́бне о́тче Кири́лле, моли́ Бо́га о нас.

Влады́ку у́м поста́вил еси́ над страстьми́ теле́сными, блаже́нне, те́мже и Пресвята́го Ду́ха селе́ние, богоно́се, бы́л еси́. Его́же моли́ и на́с свободи́ти от страсте́й, да тя́ почита́ем.

Припев: Преподо́бне о́тче Кири́лле, моли́ Бо́га о нас.

Яко победи́в ве́ка сего́ кня́зя тмы́, возше́л еси́ к небе́сным, побе́ды вене́ц нося́ от вседержи́тельныя руки́ Бо́га на́шего, моли́ от бе́д спасти́ся тебе́ почита́ющим.

Сла́ва Отцу́ и Сы́ну и Свято́му Ду́ху:

Плотско́е мудрова́ние, е́же на земли́, о́тче, умертви́л еси́ и на небесе́х житие́ стяжа́л еси́, иде́же святы́х ду́си ра́дуются, пою́ще с тобо́ю Влады́ку твоего́.

И ны́не и при́сно и во ве́ки веко́в. Ами́нь.

Богородичен: Пречи́стая Влады́чице, ро́ждшая челове́ком ко́рмчию и Го́спода, страсте́й мои́х непостоя́нное и лю́тое отжени́ смуще́ние и тишину́ пода́ждь се́рдцу моему́.

Конда́к, гла́с 8.

Яко преоби́дев тле́нная и до́лу влеку́щая мудрова́ния, о́тче, к вы́шнему тече́нию ра́достно устреми́лся еси́, и та́мо со святы́ми Пресвяте́й Тро́ице предстоя́, моли́ от вра́г сохрани́тися ста́ду твоему́, я́ко да, свято́е твое́ успе́ние пра́зднующе, вопие́м: ра́дуйся, преблаже́нне Кири́лле, о́тче на́ш.

Икос:

Аще и челове́к, о́тче, бы́л еси́ по естеству́, но па́че челове́ка житие́ соверши́л еси́: вся́ бо, я́же в ми́ре сла́дкая и кра́сная, преоби́дев, после́довал еси́ Христу́. Те́мже и от все́х слы́шиши: ра́дуйся, я́ко, Пречи́стою наставля́емь, пусты́ню дости́гл еси́; ра́дуйся, я́ко в то́й прече́стен хра́м Бо́жии Ма́тери воздви́гнувый; ра́дуйся, я́ко в не́м Бо́г прославля́ется; ра́дуйся, собра́вый та́мо учени́к мно́жество; ра́дуйся, я́ко с те́ми приле́жно Го́сподеви рабо́тал еси́; ра́дуйся, удиви́вый Ангелы житие́м твои́м; ра́дуйся, я́ко тобо́ю челове́цы по́льзовашася; ра́дуйся, и́же чудесы́ все́х удиви́вый; ра́дуйся, преше́дый от земны́х на небе́сная; ра́дуйся, я́ко, Тро́ице предстоя́, о на́с мо́лишися; ра́дуйся, исто́чниче чуде́с неисчерпа́емый; ра́дуйся, ве́рных пле́нник изба́вителю; ра́дуйся, преблаже́нне Кири́лле, о́тче на́ш.

Пе́снь 7.

Ирмос: Росода́тельну у́бо пе́щь соде́ла Ангел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Припев: Преподо́бне о́тче Кири́лле, моли́ Бо́га о нас.

Очи́стив от страсте́й, преподо́бне о́тче, у́м тво́й и Вседержи́телю с преподо́бных ли́ки и пра́ведных предстоя́, всегда́ вопие́ши: благослове́н Бо́г оте́ц на́ших.

Припев: Преподо́бне о́тче Кири́лле, моли́ Бо́га о нас.

Вра́чь преизря́дный ми́ру яви́лся еси́, блаже́нне, исцеля́я все́х, ве́рою притека́ющих ко хра́му твоему́ свято́му и Христу́ от души́ вопию́щих непреста́нно: благослове́н Бо́г оте́ц на́ших.

Сла́ва Отцу́ и Сы́ну и Свято́му Ду́ху:

Посто́м и воздержа́нием лице́ твое́ украси́л еси́, преподо́бне, светле́йши наипа́че яви́лся еси́ многоразли́чными бра́шны пита́ющихся. Те́мже и Христу́ вопие́ши: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богородичен: Тя́, Пресвята́я Ма́ти Присноде́во, позна́хом, земни́и, спасе́ние, и́бо в не́дрех Отца́ неразлу́чно живы́й из Тебе́ воплоща́ется. Те́мже благослове́на еси́ в ро́д и ро́д.

Пе́снь 8.

Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Припев: Преподо́бне о́тче Кири́лле, моли́ Бо́га о нас.

Гро́б, иде́же положено́ бы́сть честно́е те́ло твое́, преподо́бне, освяти́ все́х, к нему́ притека́ющих, исто́чник исцеле́ния источа́я от души́ Христу́ вопию́щим и превознося́щим Его́ во ве́ки.

Припев: Преподо́бне о́тче Кири́лле, моли́ Бо́га о нас.

Во вре́мя гла́да, раздробля́я, преподо́бне, ни́щим хле́б тво́й, те́х а́лчбу уста́вил еси́, и мене́, та́ющаго гла́дом, боже́ственных дея́ний напита́й: да возмогу́ и а́з со все́ми пе́ти Го́спода во вся́ ве́ки.

Сла́ва Отцу́ и Сы́ну и Свято́му Ду́ху:

Иже с тобо́ю ученицы́ твои́, уче́нию твоему́ повину́ющеся, преподо́бне, земна́я оста́вльше, во сле́д тебе́ к небе́сным преидо́ша, и с тобо́ю пою́т Христу́, и превозно́сят Его́ во ве́ки.

И ны́не и при́сно и во ве́ки веко́в. Ами́нь.

Богородичен: В рождестве́ боле́зни избежа́ла еси́, Пречи́стая, и, ро́ждши, па́ки Де́вою пребыла́ еси́: вся́ бо твори́т Иису́с, Бо́г и Челове́к, Его́же превозно́сим во ве́ки.

Песнь 9

Ирмос: Бо́га челове́ком невозмо́жно ви́дети, на Него́же не сме́ют чи́ни Ангельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.

Припев: Преподо́бне о́тче Кири́лле, моли́ Бо́га о нас.

Жития́ сего́ непостоя́нную пучи́ну немяте́жно преше́л еси́, преподо́бне, ко́рмчию Ма́терь Бо́жию име́я, на сие́ наставля́ющую тя́. Те́мже и ко приста́нищем приста́л еси́ Ангельскаго пребыва́ния.

Припев: Преподо́бне о́тче Кири́лле, моли́ Бо́га о нас.

Яко зре́лая и чисте́йшая пшени́ца, кроме́ все́х зло́бных пле́вел, в небе́сных жи́тницах соблю́лся еси́, преподо́бне, хле́б сла́дкий жела́я принести́ся небе́сному Царю́, Его́же ра́ди вся́ в ми́ре преоби́дел еси́.

Сла́ва Отцу́ и Сы́ну и Свято́му Ду́ху:

Вели́ким отце́м, дре́вле в посте́х и по́двизех просия́вшим, подо́бяся, о́тче, вся́ дни́ жи́зни твоея́ в слеза́х и труде́х препроводи́л еси́, до́ндеже дости́гл еси́ блаже́нную кончи́ну, ю́же и они́ насле́доваша.

И ны́не и при́сно и во ве́ки веко́в. Ами́нь.

Богородичен: Сы́на Безле́тна, от Отца́ возсия́вша, Ты́, во утро́бе несказа́нно заче́нши, родила́ еси́, Богома́ти Чи́стая Де́во, моли́ непреста́нно о рабе́х Твои́х Того́, я́ко Человеколю́бца Бо́га, спасти́ ро́д на́ш.

Свети́лен.

Пречестну́ю и свяще́нную па́мять твою́ соверша́ющих, преподо́бне Кири́лле, и мно́гия труды́ твоя́ пою́щих, не преста́й, моля́ Изба́вителя от напа́стей избавля́ти на́с и селе́нию святы́х сподо́бити.

Сла́ва, и ны́не, Богородичен:

Почита́ют Рождество́ Твое́ безпло́тных чи́ни, ра́дости бо земны́я Ты́ еди́на испо́лнила еси́. Те́мже Тя́, Всенепоро́чная, ве́рнии, сла́вим, пе́сньми славосло́вяще: Све́т бо су́щим во тме́ возсия́ла еси́ и Со́лнце незаходя́щее.

Молитва преподобному Кириллу, игумену Белоезерскому, чудотворцу

О, священная главо, преподобне и Богоносне Отче Кирилле! Припадаем к тебе с верою и любовию, и просим тя, небеснаго Заступника нашего: яви велие милосердие твое нам, смиренным и грешным, и пролей теплыя молитвы твои о нас ко Господу Богу. Свойственно есть тебе благосердие, святче Божий, ибо живущу ти на земли, едино бысть у тебе попечение, еже спасати от погибели греховны души человеческий, и вся твоя жизнь святая бысть зерцалом добрых дел, о нихже прославляшеся в тебе Отец Небесный, к Немуже велие дерзновение стяжав, испроси нам у благости Его: веру праву, благочестие нелицемерное, покаяние истинное, братолюбие совершенное и преуспеяние во всех благих делех. Исходатайствуй нам здравие душевное и телесное, земли плодоносие, воздуха благорастворение, мирное и безмятежное житие, непостыдную христианскую кончину и добрый ответ на страшнем Суде Христовом. Сохрани Церковь Святую и Державу Российскую от браней и нестроений. Огради обитель твою честную от всякаго зла, и вся правоверныя люди, к тебе приходящыя и мощем твоим покланяющиеся, осени небесным твоим благословением, и вся прошения их во благо исполни. Ей, Отче, не презри молитв наших, со умилением тебе возносимых, но буди о нас теплый предстатель ко Господу, и сподоби нас помощию твоею святою спасение вечное получити, и Царствие Небесное унаследовати, да славословим великия щедроты и неизреченныя милости Отца и Сына и Святаго Духа, в Троице покланяемаго Бога, и твое Отеческое заступление, во веки веков, аминь.