22 июня.
Канон праведному Алексию Мечёву, пресвитеру Московскому
![Святому праведному Алексию, пресвитеру Московскому Святому праведному Алексию, пресвитеру Московскому](img_i/057.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, глас 5:
Па́стырю Христо́в, о́тче Алекси́е,/ по́двигом до́брым подвиза́вся,/ ве́ру правосла́вную во мра́це беззако́ния испове́дал еси́/ и, я́ко уте́шитель и врач духо́вный,/ всех, притека́ющих к тебе́, врачева́л еси́./ Помози́ и нам, ве́рою чту́щим тя,// в любви́ к бли́жнему утверди́тися.
Стихи́ра, глас 6:
Днесь наста́ светоно́сное торжество́!/ Прииди́те, вси ве́рнии,/ восхва́лим уго́дника Бо́жия, вопию́ще си́це:/ ра́дуйся, благода́тный пра́ведниче,/ озаря́яй нас чуде́с светлостьми́;/ ра́дуйся, ди́вный уте́шителю,/ бу́рю страсте́й утиша́яй;/ ра́дуйся, те́плый моли́твенниче,/ ве́рныя посреде́ гоне́ний укрепля́яй;// ра́дуйся, пра́ведне Алекси́е, Моско́вский чудотво́рче.
Кано́н, глас 4.
Песнь 1
Ирмос: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,// и воспою́ ра́дуяся Тоя́ чудеса́.
Припе́в: Святы́й пра́ведный о́тче Алекси́е, моли́ Бо́га о нас.
Се ны́не приступа́ю восхвали́ти свети́льника Бо́жия Алекси́я,/ ста́рца Моско́вскаго./ Укрепи́, Влады́ко Христе́, и напра́ви се́рдце и ум/ воспе́ти досто́йно свята́го уго́дника Твоего́.
Припе́в: Святы́й пра́ведный о́тче Алекси́е, моли́ Бо́га о нас.
Кто возглаго́лет труды́ и по́двиги твоя́, о́тче Алекси́е,/ ты бо, при́сно в служе́нии бли́жним пребыва́я,/ Всевы́шнему неизме́нно ду́хом предстоя́л еси́/ и, в ми́ре пожи́в, преми́рен яви́лся еси́.
Сла́ва Отцу́ и Сы́ну и Свято́му Ду́ху:
С безпло́тными ли́ки пе́сньми немо́лчными Святу́ю Тро́ицу воспева́ти сподо́бился еси́,/ Ца́рствия Небе́снаго насле́дниче Алекси́е,/ те́мже и о прославля́ющих тя моли́, во е́же спасти́ся нам.
И ны́не и при́сно и во ве́ки веко́в. Ами́нь.
Богородичен: Его́же трепе́щут Херуви́ми и Серафи́ми,/ во объя́тиих носи́ла еси́, Де́во Пречи́стая,/ Того́ со дерзнове́нием моли́ спасти́ любо́вию пою́щих Тя.
Песнь 3
Ирмос: Твоя́ песносло́вцы, Богоро́дице,/ живы́й и незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве// венце́в сла́вы сподо́би.
Припе́в: Святы́й пра́ведный о́тче Алекси́е, моли́ Бо́га о нас.
На ми́лость Бо́жию упова́я,/ святи́тель Филаре́т о рожде́нии твое́м усе́рдно моля́шеся у Престо́ла Влады́чня,/ избра́нника тя Христо́ва прови́дя, о́тче,/ еще́ бы́вшу ти во утро́бе ма́терней.
Припе́в: Святы́й пра́ведный о́тче Алекси́е, моли́ Бо́га о нас.
Я́ко до́брая о́трасль,/ от роди́телей благочести́вых прозя́бл еси́, пресла́вне,/ от ни́хже ве́ру кре́пкую и любо́вь нелицеме́рную к Бо́гу и бли́жним восприя́л еси́.
Сла́ва Отцу́ и Сы́ну и Свято́му Ду́ху:
Ревну́я вели́кому наста́внику,/ пла́менному свети́льнику Бо́жию Филаре́ту,/ и подвиго́м и трудо́м того́ после́дуя,/ Спа́су Христу́ благоугоди́л еси́, о́тче пра́ведне.
И ны́не и при́сно и во ве́ки веко́в. Ами́нь.
Богородичен: Глаго́лы благове́щения ра́доватися Пречи́стей Де́ве Арха́нгел повеле́,/ ра́дость бо Тоя́ Рождества́ растворя́ет печа́ль Ада́мову/ и весь род челове́ческий возво́дит к весе́лию ве́чному.
Ин конда́к, глас 2:
Ве́лия труды́ любве́ и милосе́рдия подъя́л еси́,/ пра́ведный о́тче Алекси́е,/ и, от свята́го па́стыря Кроншта́дтскаго благослове́ние на по́мощь стра́ждущим прие́м,/ беды́ и ско́рби людски́я, я́ко вери́ги, на ра́мо свое́ возложи́л еси́./ Мы же, ве́дуще тя моли́твенника дерзнове́нна ко Го́споду,/ со умиле́нием зове́м ти:// моли́ Христа́ Бо́га спасти́ся душа́м на́шим.
Седа́лен, глас 8:
Яви́ Госпо́дь ве́лию ми́лость лю́дем Ру́сския земли́/ и посла́ тя, о́тче Алекси́е, избра́нника Своего́,/ луча́ми све́та Боже́ственнаго просвеща́ющаго сердца́,/ во отча́янии и ско́рбех су́щая.
Сла́ва, и ны́не, Богородичен:
О Ма́ти Бо́га Сло́ва,/ ка́ко возмо́жем изглаго́лати Пречи́стое Твое́ Рождество́,/ или́ ки́ими словесы́ просла́вим непости́жное милосе́рдие Бо́жие/ и Твою́, Пренепоро́чная, любо́вь к ро́ду на́шему,/ ко спасе́нию возведе́нному Кресто́м Сы́на Твоего́.
Песнь 4
Ирмос: Седя́й в сла́ве, на Престо́ле Божества́/ во о́блаце ле́гце,/ прии́де Иису́с Пребоже́ственный,/ нетле́нною дла́нию, и спасе́ зову́щия:// сла́ва, Христе́, си́ле Твое́й.
Припе́в: Святы́й пра́ведный о́тче Алекси́е, моли́ Бо́га о нас.
Измла́да Христа́ возлюби́в и всеце́ло ду́шу в ру́це Его́ преда́в,/ кро́ток и послушли́в был еси́,/ во́лю же ма́тере твоея́ исполня́я, на путь свяще́нства вступи́л еси́/ и в нем трудолю́бно подвиза́лся еси́.
Припе́в: Святы́й пра́ведный о́тче Алекси́е, моли́ Бо́га о нас.
А́нгели сослужа́ху ти, о́тче,/ егда́ в безлю́днем хра́ме неуста́нно моли́твы возноси́л еси́ у Престо́ла Бо́жия./ Те́мже, укрепля́яся ду́хом и распала́яся любо́вию Боже́ственною,/ даро́в вы́шших сподо́бился еси́.
Сла́ва Отцу́ и Сы́ну и Свято́му Ду́ху:
Ра́доватися повеле́ ти па́стырь Кроншта́дтский,/ егда́ свет помрачи́ся во очесе́х твои́х от рыда́ний го́рьких и слез по успе́нии супру́жницы ве́рныя,/ то́йже, к по́двигу ста́рчества тя призыва́я, рече́:/ отве́ржися себе́ и отве́рзи се́рдце прия́ти тя́жкия ско́рби и беды́ людски́я.
И ны́не и при́сно и во ве́ки веко́в. Ами́нь.
Богородичен: К Засту́пнице и Влады́чице, и Ма́тери Спа́са на́шего сле́зно возопии́м:/ разреши́, Пресвята́я, боле́зни и ско́рби, утоли́ вся́кия ну́жды и печа́ли,/ да возра́дуемся и возвесели́мся о Го́споде.
Пе́снь 5
Ирмос: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га,/ и родила́ еси́ Безле́тнаго Сы́на,/ всем воспева́ющим Тя// мир подава́ющая.
Припе́в: Святы́й пра́ведный о́тче Алекси́е, моли́ Бо́га о нас.
Яре́м ста́рчества в терпе́нии носи́вше/ и любо́вь ко Христу́, бли́жним и друг ко дру́гу име́вше,/ пра́ведне Алекси́е и преподо́бне Анато́лие О́птинский,/ ны́не в несконча́емей ра́дости торжеству́ете/ и мо́лите спасти́ся сла́вящим вы.
Припе́в: Святы́й пра́ведный о́тче Алекси́е, моли́ Бо́га о нас.
Ви́дя по́двиги и труды́ твоя́, ста́рче Алекси́е,/ скитонача́льник О́птинский Феодо́сий восклица́ше:/ еди́ному сие́ не под си́лу есть;/ Госпо́дь ти помога́ет, о́тче.
Сла́ва Отцу́ и Сы́ну и Свято́му Ду́ху:
Дре́вним отце́м насле́дниче и О́птинским подви́жником собесе́дниче,/ светозаре́нием доброде́телей сия́я,/ во гра́де, я́ко в пусты́ни безво́дней, подвиза́лся еси́,/ слеза́ми и моли́твами ту́ю ороша́я.
И ны́не и при́сно и во ве́ки веко́в. Ами́нь.
Богородичен: Де́во Пречи́стая, Ду́ха Свята́го Прия́телище,/ приими́ моли́твы нас гре́шных,/ очи́сти вся́кую скве́рну душе́вную,/ да просвети́мся непристу́пным све́том сла́вы Сы́на Твоего́.
Песнь 6
Ирмос: Боже́ственное сие́ и всечестно́е/ соверша́юще пра́зднество,/ богому́дрии, Богома́тере,/ прииди́те рука́ми воспле́щим,// от Нея́ ро́ждшагося Бо́га сла́вим.
Припе́в: Святы́й пра́ведный о́тче Алекси́е, моли́ Бо́га о нас.
Ра́дости испо́лнишася Моско́встии лю́дие,/ обре́тше в тебе́ засту́пника непрело́жнаго:/ пла́чущаго с пла́чущими и вражду́ющих примиря́ющаго,/ взе́млющаго на плещи́ своя́ не́мощи челове́ческия и утоля́ющаго скорбь и печа́ль.
Припе́в: Святы́й пра́ведный о́тче Алекси́е, моли́ Бо́га о нас.
Егда́ приспе́ вре́мя испыта́ний и во́лны нече́стия обыдо́ша зе́млю Ру́сскую,/ тогда́, Боже́ственныя любве́ испо́лнен,/ омраче́нная сердца́ просвеща́л еси́/ и науча́л еси́ лю́ди во Христе́ обрета́ти спасе́ние.
Сла́ва Отцу́ и Сы́ну и Свято́му Ду́ху:
Оте́ческую любо́вь явля́я ча́дом твои́м, о́тче блаже́нне,/ моли́твою неду́жныя исцеля́л еси́ и от гла́да, сме́рти и напа́сти защища́л еси́./ Не преста́й и ны́не моли́тися за ны,/ укрепи́ во испыта́ниих, изба́ви от не́нависти и вся́кия зло́бы,/ милосе́рдие Бо́жие призыва́я.
И ны́не и при́сно и во ве́ки веко́в. Ами́нь.
Богородичен: Гряду́щия беды́ оте́честву на́шему предвозвеща́хуся,/ из оче́с бо ико́ны Пречи́стыя Богоро́дицы Фео́доровския сле́зы истека́ху,/ пра́ведным Алекси́ем и все́ми предстоя́щими во хра́ме на моли́тве зри́мыя.
Конда́к, глас 8:
Простото́ю ве́ры высоты́ смире́ния дости́гл еси́,/ в мо́литве же и доброде́лании подвиза́яся,/ дара́ми духо́вными обогати́лся еси́/ и све́том Христо́вым просвети́лся еси́,/ помо́щниче и уте́шителю о́тче Алекси́е./ Те́мже ве́ру на́шу укрепи́,/ любви́ ко Го́споду и бли́жним научи́// и ко спасе́нию приведи́ моли́твами твои́ми.
И́кос:
Пра́ведне о́тче Алекси́е, ста́рче Моско́вский и всех правосла́вных ра́дование!/ Кто, зря светоле́пное лице́ твое́ и сия́ние оче́с твои́х, благогове́ния не испо́лнися./ Или́ кто, слы́ша смиренному́дрыя ре́чи твоя́, не умили́ся, возжела́я в де́лании угоди́ти Богу./ Или́ кто, во мрак отча́яния впады́й и уте́шен тобо́ю быв, не пока́яся./ Или́ кто, гневли́в и злоречи́в сый, ти́хостию нра́ва твоего́ не преложи́ся./ Те́мже, свяще́нную па́мять твою́ пра́зднующе, мо́лим тя:/ ве́ру на́шу укрепи́, любви́ ко Го́споду и бли́жним научи́/ и ко спасе́нию приведи́ моли́твами твои́ми.
Песнь 7
Ирмос: Не послужи́ша тва́ри богому́дрии/ па́че Созда́вшаго,/ но о́гненное преще́ние му́жески попра́вше,/ ра́довахуся, пою́ще:// препе́тый отце́в Госпо́дь и Бог, благослове́н еси́.
Припе́в: Святы́й пра́ведный о́тче Алекси́е, моли́ Бо́га о нас.
На вся́кое проше́ние моли́твою отвещава́л еси́, ста́рче богому́дре,/ душе́ю сокруше́нною и ду́хом смире́нным Милосе́рдому Влады́це предстоя́./ Моли́ся и ны́не, хода́таю наш, о вопию́щих ве́рно:/ препе́тый отце́в Госпо́дь и Бог, благослове́н еси́.
Припе́в: Святы́й пра́ведный о́тче Алекси́е, моли́ Бо́га о нас.
Душа́ твоя́ чистото́ю и све́тлостию сия́я,/ о́тче незло́биве, да́ром сле́зным обогати́ся:/ Бог ми́лостив, ча́до, и мы сы́нове Его́ есмы́,/ – со умиле́нием глаго́лал еси́, науча́я взыва́ти:/ препе́тый отце́в Госпо́дь и Бог, благослове́н еси́.
Сла́ва Отцу́ и Сы́ну и Свято́му Ду́ху:
Бог даде́ мне тве́рду де́тску ве́ру, – в простоте́ пове́дал еси́, о́тче пра́ведне./ Вои́стину, посреде́ злонра́вия богоме́рзкаго ве́ра твоя́ мно́гия ко спасе́нию приведе́ и научи́ воспева́ти:/ препе́тый отце́в Госпо́дь и Бог, благослове́н еси́.
И ны́не и при́сно и во ве́ки веко́в. Ами́нь.
Богородичен: Милосе́рдая Ма́ти, не пре́зри недосто́йная моле́ния на́ша,/ со святы́ми покрови́тели хра́ма сего́ моля́щи Сы́на Твоего́/ спасти́ всех, воспева́ющих Тя.
Песнь 8
Ирмос: О́троки благочести́выя в пещи́,/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,// и превозноси́те Его́ во вся ве́ки.
Припе́в: Святы́й пра́ведный о́тче Алекси́е, моли́ Бо́га о нас.
В погребе́нии мое́м ра́дость обря́щете, – проро́чески рекл еси́, о́тче./ Сие́ же испо́лнися, егда́ у гро́ба твоего́ патриа́ршее благослове́ние препо́дано бысть ча́дом твои́м, взыва́ющим:/ Го́спода по́йте, дела́, и превозноси́те Его́ во вся ве́ки.
Припе́в: Святы́й пра́ведный о́тче Алекси́е, моли́ Бо́га о нас.
И́щущим тебе́ обрета́ешися ско́рый помо́щник и подае́ши благода́тную по́мощь,/ ты бо не́когда боля́щаго Алекса́ндра здра́ва сотвори́л еси́,/ и сы́на ма́тери возврати́л еси́ и от напра́сныя сме́рти изба́вил еси́./ Посети́ и нас, о́тче, твое́ю по́мощию, пою́щих:/ Го́спода по́йте, дела́, и превозноси́те Его́ во вся ве́ки.
Сла́ва Отцу́ и Сы́ну и Свято́му Ду́ху:
Святы́я Твоя́, Го́споди, с со́нмом безпло́тных а́нгельски воспева́ют Тя./ С ни́миже но́вый уго́дник, ста́рец Моско́вский Алекси́й, совозсия́л есть, вопия́:/ Го́спода по́йте, дела́, и превозноси́те Его́ во вся ве́ки.
И ны́не и при́сно и во ве́ки веко́в. Ами́нь.
Богородичен: Ма́ти Бо́жия Всенепоро́чная,/ я́звы души́ моея́ исцели́, сла́сти пло́ти утоли́, ум от вся́каго вре́да умири́/ и вра́жиих напа́стей изба́ви превознося́щих Тя во ве́ки.
Песнь 9
Ирмос: Всяк земноро́дный/ да взыгра́ется Ду́хом просвеща́емь,/ да торжеству́ет же безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,// Чи́стая Присноде́во.
Припе́в: Святы́й пра́ведный о́тче Алекси́е, моли́ Бо́га о нас.
Помози́, те́плый моли́твенниче наш,/ не малоду́шествовати во испыта́ниих кре́стных и сохрани́ти ве́рность Христу́,/ Его́же ра́ди ты гото́в был еси́ му́ки и смерть прия́ти,/ я́коже и священному́ченик Се́ргий, сын твой.
Припе́в: Святы́й пра́ведный о́тче Алекси́е, моли́ Бо́га о нас.
Бу́ди нам па́стырь до́брый,/ науча́я любви́ и ве́ре, и па́дающия не уста́ни воздвиза́ти,/ приведи́ ны, о́тче пра́ведный, во оби́тели Небе́сныя,/ иде́же ты в ра́дости непреста́нней пребыва́еши.
Сла́ва Отцу́ и Сы́ну и Свято́му Ду́ху:
Воспева́ем богоуго́дное житие́ твое́, о́тче Алекси́е,/ в не́мже, я́ко ве́рный раб Госпо́день, ве́рен был еси́./ Научи́ нас, лука́вых и злонра́вных, неле́ностно Христу́ рабо́тати,/ да вни́дем в ра́дость Го́спода на́шего.
И ны́не и при́сно и во ве́ки веко́в. Ами́нь.
Богородичен: Воспева́ем Сы́на Твоего́ и Бо́га на́шего,/ Ма́ти Всесвята́я, Де́во Пречи́стая,/ Его́же без истле́ния родила́ еси́ на спасе́ние на́ше и обновле́ние.
Свети́лен:
Во све́те незаходи́мем, о́тче Алекси́е досточу́дне,/ ны́не предстои́ши Престо́лу Святы́я Трои́цы со А́нгелы и все́ми святы́ми/ и мо́лиши о нас, ве́рою ублажа́ющих тя.
Сла́ва, и ны́не, Богородичен:
Благода́тная Богоро́дице Де́во,/ предстоя́щи Престо́лу Сы́на и Бо́га Твоего́,/ моли́ о нас, на ми́лость Его́ упова́ющих.
Моли́тва
О всечестны́й и преблаже́нный о́тче наш Алекси́е, ди́вный ста́рче Моско́вский и Це́ркве Ру́сския похвало́ и ра́дование! Ты, ве́лию любо́вь ко Го́споду име́я и за́поведи ева́нгельския непрело́жно исполня́я, ду́шу твою́ за па́ству полага́л еси́. Приими́ ма́лое сие́ моле́ние на́ше, и я́ко в земно́м житии́ твое́м вся́ку скорбь облегча́л еси́, та́ко и ны́не, милосе́рдый моли́твенниче и хода́таю наш, испо́лни стра́ждущая сердца́ ра́достию, умоли́ Человеколю́бца Бо́га о проще́нии прегреше́ний на́ших, да, очи́стивше ду́ши покая́нием, к доброде́тельному житию́ обрати́мся.
Ей, пра́ведне о́тче Алекси́е, бу́ди нам па́стырь до́брый, на стезю́ спасе́ния наставля́яй, да моли́твами твои́ми безпоро́чно про́йдем путь жития́ на́шего и обря́щем Оте́чество Небе́сное, иде́же ты со А́нгелы и все́ми святы́ми предстои́ши Престо́лу Святы́я Тро́ицы, прославля́я Безнача́льнаго Отца́ со Единоро́дным Его́ Сы́ном и Пресвяты́м, и Благи́м, и Животворя́щим Его́ Ду́хом во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Святому праведному Алексию, пресвитеру Московскому Святому праведному Алексию, пресвитеру Московскому](img_b/057.jpg)