22 июня.

Канон первый преподобному Александру Куштскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, глас 4:

Иже плотски́м дебе́льством Бо́гови рабо́тати изво́ли,/ в пусты́ню всели́вся,/ в не́йже мно́гими по́ты и труды́/ безтеле́снаго равноа́нгельнаго пребыва́ния возмо́же дости́гнути,/ та́же от Бо́га узре́н быв,/ сподо́бися вели́ких чуде́с в жи́зни и по преставле́нии,/ на нечи́стыя ду́хи си́лу восприи́м,/ изго́ниши от приходя́щих к тебе́ с ве́рою,/ те́мже, о́тче Алекса́ндре,/ за вся ны моли́,/ спасти́ся душа́м на́шим.

Ин тропа́рь, глас 8:

Во плоти́, я́ко А́нгел, на земли́ подвиза́ся,/ жела́нием духо́вным в пусты́ню всели́ся/ и, со зверьми́ живы́й, весь Христо́ви быв,/ Тому́ невозвра́тно ше́ствовал еси́, ведо́м к Небеси́,/ после́дуя Боже́ственным стезя́м, о́тче блаже́нне Алекса́ндре,/ я́ко чу́ден, чудеса́ источа́еши/ и отгоня́еши неду́ги к тебе́ приходя́щих с ве́рою,/ но я́ко имея дерзнове́ние ко Го́споду,/ помина́й нас, чту́щих честну́ю па́мять твою́.

Кано́н, глас 1.

Песнь 1

Ирмос: Го́рькия рабо́ты изба́влься Изра́иль,/ непроходи́мое про́йде, я́ко су́шу,/ врага́ зря потопля́ема,/ песнь я́ко Благоде́телю пое́т Бо́гу,/ чудоде́ющему мы́шцею высо́кою,/ я́ко просла́вися.

Припев: Преподо́бне о́тче Алекса́ндре, моли́ Бо́га о нас.

Лю́тыя рабо́ты вра́жия от младе́нчества возненави́дев,/ устреми́лся еси́ всем жела́нием к Еди́ному Благоде́телю,/ преподо́бне прему́дре Алекса́ндре.

Припев: Преподо́бне о́тче Алекса́ндре, моли́ Бо́га о нас.

Лю́тыя вра́жия по́мыслы нивочтоже вмени́в,/ в богоуго́дие еди́ное ум свой отлучи́л еси́,/ в не́мже без враще́ния кре́пце пребы́л еси́, Богоуго́дне Алекса́ндре.

Сла́ва Отцу́ и Сы́ну и Свято́му Ду́ху:

Лю́тых звере́й зия́ния кре́постию се́рдца не устраши́ся,/ сего́ ра́ди, Боже́ственною по́мощию вооруже́н,/ в пусты́ни тех, я́ко о́вцы, укроти́л еси́,/ му́же му́дре Алекса́ндре.

И ны́не и при́сно и во ве́ки веко́в. Ами́нь.

Богородичен: Лю́тых мук изба́ви нас, Богоневе́сто,/ Твои́ми бо пречи́стыми моли́твами вся спаса́еши,/ я́ко Ма́ти Бо́жия су́щи.

Песнь 3

Ирмос: Ка́мень, его́же небрего́ша зи́ждущии,/ сей бысть во главу́ у́гла:/ Той есть Ка́мень,/ на не́мже утверди́ Це́рковь Христо́с,/ ю́же от язы́к искупи́.

Припев: Преподо́бне о́тче Алекса́ндре, моли́ Бо́га о нас.

Ка́мень – Христо́с – утверди́ се́рдце твое́ ко стра́ху Своему́,/ те́мже до́блестию жития́ твоего́/ получи́л еси́ от Него́ несконча́емое блаже́нство.

Припев: Преподо́бне о́тче Алекса́ндре, моли́ Бо́га о нас.

Ка́мень ве́ры яви́ся, о́тче,/ и, ви́дев тя, вся́ческая Све́дый/ сподобля́ет чуде́сных даро́в, я́коже Сам рече́:/ прославля́ющия Мя просла́влю.

Сла́ва Отцу́ и Сы́ну и Свято́му Ду́ху:

Ка́менну плоть свою́ показа́л еси́, о́тче,/ о не́йже неради́в был еси́,/ но я́ко в чужде́м соста́ве нося́ ду́шу, во́лею я́звы терпя́,/ мня́ше ма́лы труды́ своя́, страда́ние, бде́ние же и моли́твы,/ сего́ ра́ди ра́дуешися во святы́х поко́их.

И ны́не и при́сно и во ве́ки веко́в. Ами́нь.

Богородичен: Ка́мень Боже́ственный де́вства,/ ка́менно се́рдце мое́ в нераде́нии мя иму́ща/ умягчи́ ма́нием Твои́м Боже́ственным, Богоро́дице,/ еди́на бо еси́ по́мощию Твое́ю Боже́ственною вся мра́чная просвеща́еши.

Седа́лен, глас 8:

Столп целому́дрия высо́к яви́ся, Алекса́ндре,/ в Небе́сная главо́ю честны́х твои́х уставле́ний досяза́ше,/ и вну́тренними твои́ми твердостьми́ бе́сы устраша́еши,/ вне́шними красо́тами наде́ющихся на тя удивля́еши,/ моли́твы принося́ Христу́ Бо́гу.

Сла́ва, и ны́не, Богородичен:

Я́ко Всенепоро́чная Неве́ста Творца́,/ я́ко Неискусому́жная Ма́ти Изба́вителя,/ прия́телище я́ко су́ща Уте́шителя, Всепе́тая,/ беззако́нию мя су́ща скве́рно жили́ще и де́монов игра́лище в ра́зуме бы́вша,/ потщи́ся от сих злоде́йствия мя изба́вити,/ све́тло жили́ще доброде́тельми соде́лавши,/ Светода́тельная, Нетле́нная, разжени́ о́блак страсте́й/ и Вы́шняго прича́стия сподо́би и Све́та Невече́рняго моли́твами Твои́ми.

Песнь 4

Ирмос: Ду́хом прови́дя, проро́че Авваку́ме, Словесе́ воплоще́ние,/ пропове́дал еси́, вопия́:/ внегда́ прибли́житися ле́том – позна́ешися,/ внегда́ приити́ вре́мени – пока́жешися./ Сла́ва си́ле Твое́й, Го́споди.

Припев: Преподо́бне о́тче Алекса́ндре, моли́ Бо́га о нас.

Ду́ху Пресвято́му дом показа́лся еси́, преподо́бне,/ сохраня́я вся Его́ повеле́ния,/ во всех исправле́ниих твои́х, досточу́дне Алекса́ндре, воспева́я Христа́ Бо́га.

Припев: Преподо́бне о́тче Алекса́ндре, моли́ Бо́га о нас.

Ду́хом Святы́м дви́жим, изше́л еси́, му́дре, ме́ста близ жили́ща взыска́ти,/ от Него́же наставля́емь, обре́те со земны́м, нижа́йшим поко́ищем вы́шнее, Небе́сное Ца́рство,/ воспева́я Христа́ Бо́га.

Сла́ва Отцу́ и Сы́ну и Свято́му Ду́ху:

Духо́вная и Боже́ственная му́дрствуя,/ ду́хи лука́выя под но́зе твои́ покори́л еси́,/ зако́ну Бо́жию уго́дник яви́ся,/ я́ко и ме́сто освяти́ся, иде́же лежи́т честно́е твое́ те́ло/ и всем ве́рным исцеле́ния источа́ет.

И ны́не и при́сно и во ве́ки веко́в. Ами́нь.

Богородичен: Ду́хи лука́выми прельща́ема мя, Чи́стая, соблюди́,/ отгоня́я скве́рныя их нало́ги, / запрети́ окая́нныя стези́ их, Цари́це и Влады́чице всего́ ми́ра,/ свободи́ мя, Госпоже́, от рабо́ты их и греха́.

Пе́снь 5

Ирмос: Све́тлый нам возсия́й Свет Присносу́щный,/ у́тренюющим о судьба́х за́поведей Твои́х,/ Влады́ко Человеколю́бче, Христе́, Бо́же наш.

Припев: Преподо́бне о́тче Алекса́ндре, моли́ Бо́га о нас.

К све́тлому и невеще́ственному потща́вся поко́ю,/ све́тлостию Боже́ственною на земли́ просвети́ся,/ ди́вен, прему́дре, показа́лся еси́,/ просвеща́я с ве́рою к тебе́ приходя́щих.

Припев: Преподо́бне о́тче Алекса́ндре, моли́ Бо́га о нас.

Све́тлых ра́ди по́двиг твои́х све́тлость в души́ стяжа́вшему,/ прииди́те, ве́рнии, принесе́м хвалу́ победи́телю вражде́бных полко́в,/ Алекса́ндру, на́шему предста́телю и от напа́стей вра́жиих изба́вителю.

Сла́ва Отцу́ и Сы́ну и Свято́му Ду́ху:

Светоно́сный душе́ю,/ от Бо́га прие́мый светоно́сную си́лу цели́ти неду́ги и отгоня́ти бе́сы,/ и све́тлый яви́ся безме́здный врач душа́м и телесе́м/ ве́рою притека́ющих к тебе́.

И ны́не и при́сно и во ве́ки веко́в. Ами́нь.

Богородичен: Све́та Преми́рнаго Ма́ти,/ просвети́ ду́ши на́ша моли́твами Твои́ми,/ еди́на к Бо́гу па́че всех дерзнове́ние иму́щи,/ те́мже ма́терним дерзнове́нием Твои́м я́ко Сы́на Твоего́, объе́мши, умоли́.

Песнь 6

Ирмос: Отве́ргл мя еси́ во глубины́ се́рдца морска́го,/ и спасл еси́ мя, Спа́се, от рабо́ты сме́ртныя,/ и разреши́л еси́ узы беззако́ний мои́х.

Припев: Преподо́бне о́тче Алекса́ндре, моли́ Бо́га о нас.

Отве́рже мятежи́ мирски́я и, вда́вся еди́ному Влады́це,/ Его́же крест на ра́мо взем, распе́нся ми́рови,/ страстьми́ по́стническими посрами́л еси́ велиа́ра/ и спа́слся еси́ у Христа́ в Ца́рствии Небе́снем.

Припев: Преподо́бне о́тче Алекса́ндре, моли́ Бо́га о нас.

Отве́ргл еси́ душему́дренно главы́ своея́ власы́,/ отве́ргл еси́ и плотска́я взыгра́ния,/ отве́ргл еси́ и мы́сленный томле́ния, наноси́мая от бесо́в,/ и, укрепи́вся на ня, бысть во́ин Небе́снаго Царя́ и Бо́га.

Сла́ва Отцу́ и Сы́ну и Свято́му Ду́ху:

Отве́ргшихся целому́дрия и привлече́нных к многоцеле́бному твоему́ гро́бу,/ от бесо́вских уз и чу́вственных разреша́еши/ си́лою Боже́ственнаго дарова́ния.

И ны́не и при́сно и во ве́ки веко́в. Ами́нь.

Богородичен: Отве́рзи, Богоро́дице, Небе́снаго Ца́рствия две́ри/ ве́рою испове́дающим Тя,/ еди́ну от ве́ка избра́нную Пречи́стую всех Бо́га Ма́терь.

Конда́к, глас 8:

Иже земна́я оста́вль,/ в пусты́ню всели́вся,/ Христо́вым стопа́м после́довал еси́, те́пле,/ и Того́, сла́вне, на ра́му свое́ю честны́й крест взем,/ умертви́л еси́ пло́ти взыгра́ния/ труды́ по́стническими и жела́нием духо́вным, всеблаже́нне,/ те́мже зове́м ти:/ ра́дуйся, Алекса́ндре, пусты́нный жи́телю.

И́кос:

Учи́телю кро́тости и смире́ния, предстоя́телю Престо́ла Христо́ва,/ при́зри на моля́щих ти ся от свяще́нных высо́т,/ услы́ши хва́лящих тя,/ а́ще и недоуме́ем, но по ми́лости твое́й вонми́, возлю́бленне,/ я́ко ма́терь де́тская немова́ния 24 , прии́м с ве́рою моля́щих тя:/ приими́ моле́ния на́ша, честны́й наш учи́телю;/ приими́, освяще́нный па́стырю, прибе́жище на́ше и утвержде́ние;/ приими́, те́плый к Бо́гу моли́твенниче и нело́жный о нас хода́таю,/ да благода́рственно вопие́м:/ ра́дуйся, Алекса́ндре, пусты́нный жи́телю.

Песнь 7

Ирмос: Су́щим в пещи́ отроко́м Твои́м, Спа́се,/ не прикосну́ся, ниже́ стужи́ огнь./ Тогда́ трие́, я́ко еди́неми усты́, по́яху/ и благословля́ху, глаго́люще;/ благослове́н Бог оте́ц на́ших.

Припев: Преподо́бне о́тче Алекса́ндре, моли́ Бо́га о нас.

И́же к Бо́гу положив по́мысл неизме́нный/ и быв нело́жный жела́тель безсме́ртнаго Живота́,/ пре́был еси́ в наде́жди Бо́жий,/ благословля́я и сла́вя Христа́:/ отце́в Бог, благослове́н еси́.

Припев: Преподо́бне о́тче Алекса́ндре, моли́ Бо́га о нас.

И́же в пусты́ни вся стра́сти теле́сныя умерщвля́я,/ и от враг озлобле́ния прие́мля,/ и искуше́ния вся терпя́, наде́жды ра́ди Боже́ственных и безконе́чных благ,/ во пло́ти, я́ко безпло́тен, яви́лся еси́, на свою́ плоть ра́тованием,/ и, Бо́гом спаса́емь, без ско́рби пре́был еси́.

Сла́ва Отцу́ и Сы́ну и Свято́му Ду́ху:

И́же от Бо́га по́мощь на бори́тельная враги́ прие́мый,/ пода́ждь нам по́мощь, я́ко да в благоугожде́нии свя́тости твое́я яви́мся,/ и моли́твами твои́ми получи́м от Бо́га ми́лость.

И ны́не и при́сно и во ве́ки веко́в. Ами́нь.

Богородичен: Я́же еди́на, Бо́га пло́тию ро́ждшая,/ к Сы́ну Твоему́ моли́твами оживи́ мя, уме́ршаго грехми́,/ Пречи́стая Ма́ти Де́во.

Песнь 8

Ирмос: Чу́да преесте́ственнаго/ показа́ о́браз огнеро́сная пещь дре́вле,/ огнь бо не опали́ ю́ныя де́ти,/ Христо́во явля́я безсе́менное от Де́вы Боже́ственное рождество́./ Тем, воспева́юще, воспои́м:/ да благослови́т тварь вся Го́спода/ и превозно́сит во вся ве́ки.

Припев: Преподо́бне о́тче Алекса́ндре, моли́ Бо́га о нас.

Чу́ден показа́в о́браз, преподо́бне о́тче, по́двиг доброде́телей твои́х,/ е́же к Бо́гу моле́ния со слеза́ми и воздыха́ниями,/ бде́ния же, и поще́ния, и трудо́в изволе́ния,/ рабо́ты же и вся́кия преоби́дения те́лу –/ вся бо, о́тче, вы́ше челове́ческаго терпе́ния во́лею претерпе́л еси́.

Припев: Преподо́бне о́тче Алекса́ндре, моли́ Бо́га о нас.

Чу́дна терпе́ния твоя́, чу́дна страда́ния,/ чу́дна во́льная твоя́ сокруше́ния пло́ти,/ те́мже и Христо́с ми́лостивно тя прия́т/ и ра́достна и поко́йна во Ца́рствии Свое́м устро́и;/ мо́лим тя, о́тче честны́й:/ о нас, рабе́х твои́х, помоли́ся.

Сла́ва Отцу́ и Сы́ну и Свято́му Ду́ху:

Чуде́сный от Бо́га дар прия́л еси́, о́тче Алекса́ндре,/ цели́ти неду́ги и отгоня́ти бе́сы,/ те́мже и ду́ши на́ша, от бесо́вских нало́г стра́ждущия, исцели́/ е́же к Бо́гу, о́тче, бо́дренными твои́ми моли́твами.

И ны́не и при́сно и во ве́ки веко́в. Ами́нь.

Богородичен: Чу́до еди́но в земны́х па́че всех преесте́ственных чуде́с показа́ся,/ пло́тию бо Отрокови́ца Преве́чному естеству́ Ма́терь бысть/ и Боже́ственным естество́м плоть Ея́ без истле́ния сохрани́ся,/ и, по рождестве́ де́вствующи, всем Небе́сным си́лам Госпожа́ и Цари́ца я́вльшися,/ моли́ Сы́на Твоего́ спасти́ ду́ши на́ша.

Песнь 9

Ирмос: Неизглаго́ланное Де́вы та́инство:/ Не́бо бо Сия́, и престо́л Херуви́мский/ и светоно́сный черто́г показа́ся/ Христа́ Бо́га Вседержи́теля./ Сию́ благоче́стно я́ко Богоро́дицу велича́ем.

Припев: Преподо́бне о́тче Алекса́ндре, моли́ Бо́га о нас.

Неизглагола́нно, отче, е́же к Бо́гу изволе́ние жития́ твоего́,/ преподо́бне о́тче Алекса́ндре,/ а́ще бо и тщи́мся воспева́ти тя,/ но превосше́ствия твоего́ ра́ди до́брых благодея́ний/ ни ма́ло стези́ каса́емся похвале́ния,/ но, о Богому́дре о́тче, сам на́ша неразу́мия испра́ви.

Припев: Преподо́бне о́тче Алекса́ндре, моли́ Бо́га о нас.

Неизглаго́ланным твои́м, о́тче, к Бо́гу моле́нием,/ исто́чники слез и понужде́нием те́ла/ утверди́лся еси́ в преди́вных доброде́телех;/ всех, я́же в ми́ре, удали́лся еси́, вся возненави́дев, и к Бо́гу прибли́жился еси́,/ Его́же моли́ о нас, чту́щих тя.

Сла́ва Отцу́ и Сы́ну и Свято́му Ду́ху:

Неизглаго́ланная от Бо́га, преподо́бне, чудеса́ сотво́ршаго, ка́ко тя восхва́лим,/ иму́щаго и от саме́х похвале́ние А́нгел,/ но недоуме́нием ели́ко мо́жем хвали́ти тя, почита́ем же и велича́ем,/ я́ко да Христа́ ми́лостиваго умоли́ши о нас, чту́щих тя.

И ны́не и при́сно и во ве́ки веко́в. Ами́нь.

Богородичен: Неизглаго́ланно заче́нши без се́мене/ и несказа́нно ро́ждши без истле́ния,/ и в рождестве́ и по рождестве́, я́коже и пре́жде рождества́, Де́ва пребыва́еши, Богоро́дице Мари́е:/ Бог бе рожде́йся и ро́ждшую Тя, я́ко Сам весть, сохрани́в,/ те́мже всяк язы́к челове́ческий, па́че же а́нгельский,/ не мо́жет по достоя́нию похвали́ти Рождества́ Твоего́ Боже́ственнаго, Богома́ти Всепе́тая.

Свети́лен:

Па́стырю до́брый, посеща́й моля́щихся тебе́ ве́рою/ и спаса́й твое́ ста́до, иму́щее тя те́пла предста́теля,/ и к Бо́гу хода́тая, и ско́раго побо́рника на враги́ на́ша.

Сла́ва, и ны́не, Богородичен:

Спаси́ нас, Благослове́нная Богоро́дице Де́во,/ да не поги́бнем от борю́щих нас неви́димых враг,/ к Тебе́ бо прибега́юще, невреди́мы пребыва́ем/ и, па́ки согреша́юще, и́мамы Тя тве́рду Моли́твенницу о душа́х на́ших

Молитва

О свяще́нная главо́, преподо́бне о́тче, преблаже́нне о́тче Алекса́ндре, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.