21 июня.

Канон великомученику Феодору Стратилату.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Воинствосло́вием и́стинным, страстоте́рпче, небе́снаго Царя́ воево́да предо́брый бы́л еси́, Фео́доре: ору́жиями бо ве́ры ополчи́лся еси́ му́дренно, и победи́л еси́ де́монов полки́, и победоно́сный яви́лся еси́ страда́лец. Те́мже тя́ ве́рою при́сно ублажа́ем.

Кано́н свята́го, гла́с 4.

Пе́снь 1.

Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Припев: Священному́чениче Фео́доре, моли́ Бо́га о нас.

Му́ченик, я́ве светлостьми́ украша́емь, Добротво́рцу предстои́ши Христу́, от Него́ удобря́емь, я́ко даро́в тезоимени́т боже́ственных, му́чениче Фео́доре.

Припев: Священному́чениче Фео́доре, моли́ Бо́га о нас.

Боже́ственными вооружи́вся, Фео́доре, ору́жии ве́ры, вра́жия ссе́кл еси́ тве́рдо душетле́нныя полки́ и, победи́тель бы́в, с му́ченики венча́лся еси́.

Сла́ва Отцу́ и Сы́ну и Свято́му Ду́ху:

Све́тлое твоея́ души́ хра́брство показу́я злочести́вому, богому́дре, царю́, прему́дростию слове́с твои́х и благода́тию де́л, сего́ посрами́л еси́, Фео́доре.

И ны́не и при́сно и во ве́ки веко́в. Ами́нь.

Богородичен: Без се́мене Отчею во́лею от Боже́ственнаго Ду́ха Бо́жия зачала́ еси́ Сы́на и пло́тию родила́ еси́, Иже из Отца́ без ма́тере, на́с же ра́ди из Тебе́ без отца́.

Пе́снь 3.

Ирмос: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Припев: Священному́чениче Фео́доре, моли́ Бо́га о нас.

Ополче́ние злочести́вое, я́ко воево́да си́лен, победи́л еси́ и стропти́ваго зми́я вся́ хи́трости попра́л еси́.

Припев: Священному́чениче Фео́доре, моли́ Бо́га о нас.

Яко усе́рден душе́ю, умышле́нием благочести́вым, сла́вне, злочести́вых погуби́л еси́ прелюбоде́йственная чти́лища.

Сла́ва Отцу́ и Сы́ну и Свято́му Ду́ху:

Кре́постию по́мысла лю́тых наноше́ния претерпе́л еси́, животво́рней ме́ртвости Подвигополо́жника подо́бяся.

И ны́не и при́сно и во ве́ки веко́в. Ами́нь.

Богородичен: Ты́ еди́на, су́щим на земли́, па́че естества́, благи́х Хода́таица, Ма́ти Бо́жия была́ еси́. Те́мже Ти́, ра́дуйся, вопие́м.

Седа́лен, гла́с 8.

Боже́ственное всеору́жие восприи́м и и́дольскую ле́сть низложи́в, Ангелы возста́вил еси́ восхвали́ти по́двиги твоя́, и́бо, боже́ственною любо́вию у́м распали́в, на о́гненную сме́рть до́блественно дерзну́л еси́. Те́мже тезоимени́тно прося́щим тя́ дае́ши боже́ственная дарова́ния, страстоте́рпче Фео́доре. Сего́ ра́ди вопие́м ти́: моли́ Христа́ Бо́га грехо́в оставле́ние пода́ти чту́щим любо́вию па́мять твою́.

Сла́ва, и ны́не, Богородичен:

В напа́сти многоплете́нныя впа́д от вра́г ви́димых и неви́димых, бу́рею одержи́мь безчи́сленных согреше́ний мои́х, и я́ко к те́плому заступле́нию и покро́ву моему́, Чи́стая, ко приста́нищу притека́ю Твоея́ бла́гости. Те́мже, Пречи́стая, из Тебе́ воплоще́нному безсе́менно моли́ся приле́жно о все́х рабе́х Твои́х, непреста́нно моля́щих Ти ся, Богоро́дице Пречи́стая, моля́щи Его́ при́сно согреше́ний оставле́ние дарова́ти воспева́ющим досто́йно сла́ву Твою́.

Пе́снь 4.

Ирмос: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Припев: Священному́чениче Фео́доре, моли́ Бо́га о нас.

Уязви́л еси́ зми́я, уязви́ти тя́ хотя́щаго, и терпели́выми сопротивле́нии му́ченик яви́лся еси́, поя́ приле́жно тя́ Укре́пльшему: сла́ва си́ле Твое́й, Го́споди.

Припев: Священному́чениче Фео́доре, моли́ Бо́га о нас.

Изнури́в пло́ть мно́гими ра́нами, по́мысл непрекло́нен поста́вил еси́, треблаже́нне, поя́ усе́рдно тя́ Укре́пльшему: сла́ва си́ле Твое́й, Го́споди.

Сла́ва Отцу́ и Сы́ну и Свято́му Ду́ху:

Украси́лся еси́ страда́ньми Влады́ки, твоя́ честна́я страда́ния, прему́дре, совоку́пль, и сподо́бился еси́ Того́ све́тлости и жела́емыя красоты́.

И ны́не и при́сно и во ве́ки веко́в. Ами́нь.

Богородичен: Неискусобра́чно родила́ еси́, о Де́во, и по рождестве́ яви́лася еси́ де́вствующи па́ки. Те́мже немо́лчными гла́сы, е́же ра́дуйся, Тебе́, Влады́чице, ве́рою несумне́нною взыва́ем.

Пе́снь 5

Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Припев: Священному́чениче Фео́доре, моли́ Бо́га о нас.

Кропле́нием плотски́х крове́й уста́вил еси́ де́монскую на па́губу приноси́мую кро́вь, непобеди́ме Фео́доре.

Припев: Священному́чениче Фео́доре, моли́ Бо́га о нас.

О, нра́ва благочести́ва! О, до́блественна ра́зума! О, ве́ры тепле́йшия честна́го страстоте́рпца, е́юже Бо́га получи́!

Сла́ва Отцу́ и Сы́ну и Свято́му Ду́ху:

Ум име́я, све́том Бо́жиим осия́емь, побо́рника зло́бы омрачи́л еси́, зми́я, богоно́се Фео́доре.

И ны́не и при́сно и во ве́ки веко́в. Ами́нь.

Богородичен: Тя́ ору́жие непобеди́мое на враги́ предлага́ем, Тя́ утвержде́ние и наде́жду на́шего спасе́ния, Богоневе́сто, стяжа́хом.

Пе́снь 6.

Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Припев: Священному́чениче Фео́доре, моли́ Бо́га о нас.

Победи́л еси́ усе́рдием де́рзостным низлага́ющих, на кресте́ просте́рт и гвоздьми́ пробода́емь, блаже́нне, изобража́я спаси́тельную стра́сть Зижди́теля.

Припев: Священному́чениче Фео́доре, моли́ Бо́га о нас.

Зако́нно стра́ждущему, Христо́с тебе́ явля́ется, в темни́це затворе́ну, воздвиза́я я́ко Подвигополо́жник к подвиго́м на враги́ боре́ния, пресла́вне.

Сла́ва Отцу́ и Сы́ну и Свято́му Ду́ху:

Же́ртву чи́сту, и свя́ту, и непоро́чну тебе́ ра́ди во́лею Себе́ же́ртву прине́сшему, приве́л еси́ себе́, страстоте́рпче Фео́доре.

И ны́не и при́сно и во ве́ки веко́в. Ами́нь.

Богородичен: О, чу́до, все́х чуде́с нове́йшее! я́ко Де́ва, во утро́бе вся́ Содержа́щаго неискусому́жно заче́нши, не тесновмести́.

Конда́к, гла́с 2.

Му́жеством души́ в ве́ру оболки́йся и глаго́л Бо́жий, а́ки копие́, в ру́ку взе́м, врага́ победи́л еси́, му́чеников преве́лий Фео́доре, с ни́ми Христу́ Бо́гу моля́ся не преста́й о все́х на́с.

Икос:

Страда́льцев пресве́тлую добро́ту, прииди́те вси́, пе́сненными венцы́, ве́рнии, Фео́дора венча́ем: да́р бо Бо́жий вели́к ми́ру яви́ся сия́ньми чуде́с. Врага́ бо побе́ждь велиа́ра страда́нии честны́ми, одождя́ет вме́сто кро́вных ка́плей исцеле́ний то́ки, с си́ми у́бо все́ми ра́дуется Христу́ и дае́т ми́р неоскуде́н. Те́м вопие́м ему́: моли́ непреста́нно о все́х на́с.

Пе́снь 7.

Ирмос: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Припев: Священному́чениче Фео́доре, моли́ Бо́га о нас.

В пещи́ твои́х подвиго́в, му́чениче сла́вне, ве́щь злоче́стия попали́л еси́ и свети́ло благоче́стия, поя́, бы́л еси́: благослове́н еси́ в хра́ме сла́вы Твоея́, Го́споди.

Припев: Священному́чениче Фео́доре, моли́ Бо́га о нас.

Яко воево́да, я́ко смы́слен и тре́звеник де́лом, царя́ несмы́слена и злочести́ва премо́гл еси́ и показа́л еси́ сего́ некре́пка, укрепи́вся си́лою духо́вною.

Сла́ва Отцу́ и Сы́ну и Свято́му Ду́ху:

Зако́н побежда́ется похвала́ми вели́чества твоего́: ты́ бо пресве́тлыми просия́л еси́ облиста́нии муче́ния, Влады́це твоему́ вопия́, Фео́доре: благослове́нна держа́ва Твоего́ влады́чества.

И ны́не и при́сно и во ве́ки веко́в. Ами́нь.

Богородичен: Вы́шняго освяще́нное боже́ственное селе́ние, ра́дуйся, Тобо́ю бо даде́ся ра́дость, Богоро́дице, зову́щим: благослове́на Ты́ в жена́х еси́, Всенепоро́чная Влады́чице.

Пе́снь 8.

Ирмос: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Припев: Священному́чениче Фео́доре, моли́ Бо́га о нас.

На Тя́ упова́в, мене́ ра́ди Кре́ст и сме́рть претерпе́вшаго, на кре́ст воздвиго́хся, Влады́ко, и уязвля́емь стреля́ньми, и лю́тым прикаса́яся ра́нам, Го́споди, — вопия́л еси́, му́чениче, стражда́, доблему́дренне Фео́доре.

Припев: Священному́чениче Фео́доре, моли́ Бо́га о нас.

Приве́л еси́ же́ртву чи́сту себе́ Зижди́телю твоему́, ра́дуяся, Фео́доре, и отлучи́вся, сла́вне, к Ца́рству небе́сному, с му́ченики свяще́нно взыва́я всегда́: благослови́те, вся́ дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Яко кри́н, я́ко ши́пок разу́мный, воня́ми страда́ний твои́х благоуха́еши на́с, отгоня́ благода́тию всегда́ злосмра́дие страсте́й на́ших и понужда́я вопи́ти благово́нною душе́ю: благослови́те, вся́ дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богородичен: Ты́ еди́на во все́х роде́х, Де́во Пречи́стая, Ма́ти яви́лася еси́ Бо́жия, Ты́ Божества́ была́ еси́ жили́ще, Всенепоро́чная, не опа́льшися огне́м непристу́пнаго Све́та. Те́мже вси́ Тя́ благослови́м, Мари́е Богоневе́сто.

Песнь 9

Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Припев: Священному́чениче Фео́доре, моли́ Бо́га о нас.

Ны́не со блаже́нными собо́ры и му́ченическими ли́ки, я́ко укра́шен страда́ньми, соводворя́яся и свеселя́ся, вене́ц нося́, предстои́ши Жела́емому тебе́, Фео́доре.

Припев: Священному́чениче Фео́доре, моли́ Бо́га о нас.

К высоте́ небе́сней взя́тся, о земны́х небре́г, и жела́емаго тебе́ конца́ сподо́бился еси́, то́ са́мое соверше́ние жела́ний, Фео́доре, восприе́м, ра́дуяся.

Припев: Священному́чениче Фео́доре, моли́ Бо́га о нас.

Имы́й к Бо́гу дерзнове́ние, я́ко до́бль и му́др страда́лец, восхваля́ющим тя́ любо́вию согреше́ний оставле́ние проси́, от страсте́й и скорбе́й все́х на́с избавля́я.

Сла́ва Отцу́ и Сы́ну и Свято́му Ду́ху:

Еди́наго Тя́, безсме́ртна Сло́ва, пло́тию пострада́вша и уме́рша, му́ченик богому́дрый возжела́в, безсме́ртия Твоего́ получи́в, на небеса́ всели́ся, к Зижди́телю все́х Всеси́льну.

И ны́не и при́сно и во ве́ки веко́в. Ами́нь.

Богородичен: Благослове́нную Мари́ю и Бо́жию Ма́терь Де́ву, прииди́те вси́, ве́рою и любо́вию непреста́нно восхва́лим, Ея́же ра́ди обре́тше ве́чное ра́дование.

Свети́лен.

Ты́, красе́н добро́тою, и воево́да благомо́щен, и сла́вный во страда́льцех во́ин, прине́слся еси́ Христу́ и ми́ру да́р боже́ственный, Фео́доре, показа́лся еси́.

Сла́ва, и ны́не, Богородичен:

Держа́вным Твои́м кро́вом от вра́г наве́та на́с, Чи́стая, Твоя́ рабы́, сохраня́й вся́ невре́дны: Тя́ бо стяжа́хом еди́ну прибе́жище в ну́ждах.

Молитва великомученику Феодоpу Стpатилату

О, святы́й, сла́вный и всехва́льный великому́чениче Фео́доре Стратила́те! Мо́лим тя пред ико́ною твое́ю свято́ю: моли́ с на́ми и о нас, раб Бо́жиих (имена), умоля́емаго от Своего́ благосе́рдия Бо́га, да ми́лостивно услы́шит нас, благосты́ни у Него́ прося́щих, и вся на́ша ко спасе́нию и житию́ ну́жная проше́ния да испо́лнит. Еще́ же мо́лим тя, святы́й победоно́сче Фео́доре Стратила́те, разруши́ си́лы возстаю́щих на ны враго́в, ви́димых и неви́димых. Умоли́ же Го́спода Бо́га, всея́ тва́ри Созда́теля, изба́вити нас от ве́чнаго муче́ния, да всегда́ прославля́ем Отца́ и Сы́на и Свята́го Ду́ха и твое́ испове́дуем предста́тельство, ны́не и при́сно и во ве́ки веко́в. Ами́нь.