20 июня.
Канон священномученику Феодоту, епископу Анкирскому.
![Святому священномученику Феодоту, епископу Анкирскому Святому священномученику Феодоту, епископу Анкирскому](img_i/052.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 4:
И нра́вом прича́стник, и престо́лом наме́стник апо́столом бы́в, дея́ние обре́л еси́, богодохнове́нне, в виде́ния восхо́д; сего́ ра́ди, сло́во и́стины исправля́я, и ве́ры ра́ди пострада́л еси́ да́же до кро́ве, священному́чениче Феодо́те, моли́ Христа́ Бо́га спасти́ся душа́м на́шим.
Кано́н, гла́с 6.
Пе́снь 1.
Ирмос: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.
Припев: Священному́чениче Феодо́те, моли́ Бо́га о нас.
Богосия́нную тя́ звезду́ мы́сленное показа́в Со́лнце на высоте́ Своея́ Це́ркве, всю́ зе́млю блиста́ньми, блаже́нне, твои́х страда́ний уясни́.
Припев: Священному́чениче Феодо́те, моли́ Бо́га о нас.
От ю́на во́зраста возложе́н бы́в Бо́гу, Феодо́те, богода́нными доброде́тельми ду́шу просвети́л еси́ я́ве и ми́р честны́ми страда́нии украси́л еси́.
Сла́ва Отцу́ и Сы́ну и Свято́му Ду́ху:
Сла́вный му́ченик, смотря́я льсти́ваго мре́жи, просте́рты на земли́, всю́ду прохожда́ше, ду́ши уче́ньми благочести́вых утвержда́я благода́тию.
И ны́не и при́сно и во ве́ки веко́в. Ами́нь.
Богородичен: Премно́гим милосе́рдием небеса́ прекло́нь, сни́де Сы́н Бо́жий и из Тебе́ воплоти́ся, Чи́стая, спаса́я челове́ка от пре́лести змии́ны.
Пе́снь 3.
Ирмос: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.
Припев: Священному́чениче Феодо́те, моли́ Бо́га о нас.
Вы́ну взира́я к Бо́гу очесы́ у́мными, приснопа́мятне му́чениче, не чу́л еси́ ра́н, телеси́ приближа́ющихся, и му́ками всю́ду одержи́мь.
Припев: Священному́чениче Феодо́те, моли́ Бо́га о нас.
Ника́коже, му́чениче, прило́ги боле́зненными поколеба́лся еси́, ни ласка́нии беззако́нных, на ка́мени тве́рдыя ве́ры Христо́вы водруже́н, сла́вне Феодо́те.
Сла́ва Отцу́ и Сы́ну и Свято́му Ду́ху:
Сокруша́я те́ло мно́гими ра́нами, гони́тель не возмо́же отню́д твоея́ кре́пости душе́вныя разсла́бити, боже́ственною любо́вию Спа́са, блаже́нне, утвержда́емь.
И ны́не и при́сно и во ве́ки веко́в. Ами́нь.
Богородичен: Ви́дев Твоего́ издале́ча ли́к проро́ческий богогла́сный та́инства глубину́, многообра́зными гла́сы Бо́гу Ма́терь Чи́стую Тя́ пропове́дует, Пречи́стая Богоневе́сто.
Пе́снь 4.
Ирмос: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.
Припев: Священному́чениче Феодо́те, моли́ Бо́га о нас.
Му́дростию слове́с твои́х и де́л благода́тию тмы́ предста́теля я́ве посрами́л еси́, Феодо́те, и побе́ду взя́л еси́ на него́, сла́вно подви́гся.
Припев: Священному́чениче Феодо́те, моли́ Бо́га о нас.
Огне́м страда́ний твои́х я́ве запали́л еси́ многобо́жную ле́сть и, я́ко свеща́, Ду́хом Святы́м, му́чениче, вже́гся та́йно, подсо́лнечную просвети́л еси́.
Сла́ва Отцу́ и Сы́ну и Свято́му Ду́ху:
Кре́пко, сла́вне, в ре́бра стру́жемь и зе́льными боле́зньми я́ко вои́стинну всю́ду окруже́н, непоколе́блемь умо́м позна́лся еси́ ве́ры ра́ди, приснопа́мятне.
И ны́не и при́сно и во ве́ки веко́в. Ами́нь.
Богородичен: Сохрани́в нетле́нну Тя́ по рождестве́, я́коже пре́жде рождества́, Де́во, Соде́тель всели́ся в ложесна́ Твоя́ и истле́вшия мно́гими согреше́нии обнови́.
Пе́снь 5
Ирмос: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.
Припев: Священному́чениче Феодо́те, моли́ Бо́га о нас.
Терпе́нием твои́м, му́чениче му́дре, беззако́ннующих стремле́ния, и му́к озлобле́ния, и опале́ния я́ве терпе́л еси́, Боже́ственным посо́бием огражде́н.
Припев: Священному́чениче Феодо́те, моли́ Бо́га о нас.
Пропове́дуя сло́во благочести́вое, пу́тная ше́ствия дале́че, му́чениче богому́дре, ше́ствовал еси́ и заблужде́нныя к све́ту обрати́л еси́, тмо́ю води́мыя су́етства.
Сла́ва Отцу́ и Сы́ну и Свято́му Ду́ху:
Воздви́жен бы́в, я́коже а́гнец, му́чениче, на дре́во, желе́зных ногте́й терпи́ши терза́ния, я́коже безпло́тен, блаже́нне, умерщвле́ния дебельство́ совлача́я.
И ны́не и при́сно и во ве́ки веко́в. Ами́нь.
Богородичен: Воплоще́нно вои́стинну Сло́во Отчее от чи́стых, Чи́стая Де́во, крове́й Твои́х родила́ еси́, во двою́ соверше́нну естеству́, еди́ной же Ипоста́си, Богора́дованная.
Пе́снь 6.
Ирмос: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.
Припев: Священному́чениче Феодо́те, моли́ Бо́га о нас.
Пома́зал еси́ словесы́ твои́ми свяще́нными чи́стыя к подвиго́м жены́, и, низло́жше, му́чениче, врага́ му́жескими боре́нии, нетле́ния венцы́ исплето́ша.
Припев: Священному́чениче Феодо́те, моли́ Бо́га о нас.
Кре́постию ду́ха ду́шу огради́в, лука́вствия ду́хи терпе́нием ра́н низложи́л еси́ и побе́ды вене́ц от Бо́га прия́л еси́, досточу́дне.
Сла́ва Отцу́ и Сы́ну и Свято́му Ду́ху:
Ка́плями крове́й твои́х и́дольский пла́мень, му́чениче Христо́в, погаси́л еси́ и росо́ю боле́зней твои́х благочести́вых ду́ши ороси́л еси́, от пла́мене пре́лести изба́вив.
И ны́не и при́сно и во ве́ки веко́в. Ами́нь.
Богородичен: Иже все́й отню́д разу́мней я́ко Бо́г и ви́димей тва́ри во утро́бу Твою́ всели́ся вои́стинну и пло́ть бы́сть, челове́ки назида́я, Присноде́во.
Седа́лен, гла́с 1.
Многосве́тлая звезда́, дарова́нии чуде́сными и страда́нии свяще́нными озаря́я тва́рь, Феодо́те блаже́нне, вои́стинну бы́л еси́. Те́мже дне́сь светоно́сную твою́ па́мять пра́зднующе, в весе́лии се́рдца Христа́ велича́ем.
Сла́ва, и ны́не, Богородичен:
Безневе́стная Чи́стая Богоро́дице Де́во, еди́на ве́рных предста́тельнице и покро́ве, бе́д, и скорбе́й, и лю́тых обстоя́ний все́х изба́ви, на Тя́ упова́ние, Отрокови́це, иму́щих, и ду́ши на́ша спаси́ боже́ственными моли́твами Твои́ми.
Пе́снь 7.
Ирмос: Росода́тельну у́бо пе́щь соде́ла Ангел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.
Припев: Священному́чениче Феодо́те, моли́ Бо́га о нас.
Огне́м, богоблаже́нне, боле́зней твои́х запале́ние и́дольское угаси́л еси́, кро́вными же пото́ки погрузи́л еси́ враги́ безпло́тныя, Феодо́те, вопия́: благослове́н еси́, Бо́же оте́ц на́ших.
Припев: Священному́чениче Феодо́те, моли́ Бо́га о нас.
Яко фимиа́м благово́нен, прине́слся еси́, му́дре, Подвигополо́жнику твоему́, Боже́ственною благода́тию злосмра́дную ле́сть низлага́я. Те́м пое́ши ра́достно: благослове́н еси́, Бо́же оте́ц на́ших.
Сла́ва Отцу́ и Сы́ну и Свято́му Ду́ху:
Соблю́д твоя́ словеса́ Фо́рт святы́й, богоно́сному Фо́ртону отдаде́ тя, хра́му на воздви́жение че́стну, на очище́ние все́х благочести́вых, в снабде́ние душа́м, му́чениче Феодо́те.
И ны́не и при́сно и во ве́ки веко́в. Ами́нь.
Богородичен: Еди́ну Нося́щаго Ипоста́сь родила́ еси́ Сло́ва, Ма́ти Де́во, сугу́ба иму́ща хоте́ния и есте́ственная Его́ сво́йства я́ве: Бо́г бо е́сть и Челове́к, на́с ра́ди воплоти́выйся.
Пе́снь 8.
Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.
Припев: Священному́чениче Феодо́те, моли́ Бо́га о нас.
Непоколеби́мь сто́лп, забра́ло непрекло́нно, непобеди́мая стена́, степе́нь ве́ры, да́ние боже́ственное, благоче́стия побо́рник, пре́лести губи́тель показа́лся еси́, страстоно́сче.
Припев: Священному́чениче Феодо́те, моли́ Бо́га о нас.
Правле́нием Боже́ственныя благода́ти, прему́дре, му́к преше́л еси́ вели́кую пучи́ну и ти́хая, ра́дуяся, дости́гл еси́, сла́вне, приста́нища го́рняго Ца́рствия.
Сла́ва Отцу́ и Сы́ну и Свято́му Ду́ху:
Ше́ствия и стези́ твоя́ напра́вишася ко Христу́, все́х Бо́гу и Го́споду, Ему́же в ру́це ду́х тво́й пре́дал еси́, му́чениче страстоно́сче, Феодо́те треблаже́нне.
И ны́не и при́сно и во ве́ки веко́в. Ами́нь.
Богородичен: Ри́торов язы́к та́инства Твоего́ недоуме́нную глубину́ изрещи́ не мо́жет: Сло́во бо Бо́жие па́че сло́ва родила́ еси́, Пречи́стая Де́во, во спасе́ние все́х.
Песнь 9
Ирмос: Бо́га челове́ком невозмо́жно ви́дети, на Него́же не сме́ют чи́ни Ангельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.
Припев: Священному́чениче Феодо́те, моли́ Бо́га о нас.
Да сла́вы улучи́ши о́ныя, страстоте́рпче, ви́димую, ра́дуяся, преоби́дел еси́ и, боже́ственным ма́нием к ра́нам отлучи́вся, не ужа́слся еси́ мучи́тельных ви́д и сме́рти го́рькия. Те́мже с му́ченики венча́лся еси́, подви́гся.
Припев: Священному́чениче Феодо́те, моли́ Бо́га о нас.
Яви́лся еси́ хра́м, му́чениче, чи́ст Тро́ицы зда́нием дея́ний, Феодо́те пребога́те, боже́ственных, страда́ний же све́тлых сия́нием укра́шен. Те́мже хра́мы де́монския истука́нныя, му́дре, боже́ственною Уте́шителя си́лою я́ве низве́ргл еси́.
Сла́ва Отцу́ и Сы́ну и Свято́му Ду́ху:
Иска́пающая гора́ боже́ственную сла́дость яви́лся еси́, исто́чник чуде́с, пучи́на же, сла́вне, боже́ственных дарова́ний, струя́ светла́ Свята́го Ду́ха, ду́ши напоя́я, и потопля́я стра́сти, и все́м хода́тайствуя, му́чениче, благоче́стно пою́щим тя́, ра́дование.
И ны́не и при́сно и во ве́ки веко́в. Ами́нь.
Богородичен: Гла́сом Ангела родила́ еси́ Безнача́льнаго Сло́ва, прие́мшаго пло́ть у́мну же и одушевле́нну, Де́во Всечи́стая, от чи́стых крове́й Твои́х, и безпло́тныя враги́ низло́жшаго, и спа́сшаго на́с все́х, и́стинную Богоро́дицу испове́дающих Тя́.
Молитва
О пречестна́я и свяще́нная главо́ и благода́ти Свята́го Ду́ха испо́лненная, Спа́сово со Отце́м обита́лище, вели́кий архиере́е, те́плый наш засту́пниче, священному́чениче Феодо́те, предстоя́ у Престо́ла всех Царя́ и наслажда́яся све́та единосу́щныя Тро́ицы и херуви́мски со А́нгелы возглаша́я песнь трисвяту́ю, вели́кое же и неизсле́дованное дерзнове́ние име́я ко всеми́лостивому Влады́це, моли́ спасти́ся па́ствы Христо́вы лю́дем, благостоя́ние святы́х церкве́й утверди́: архиере́и благоле́пием святи́тельства украси́, мона́шествующыя к по́двигом до́браго тече́ния укрепи́, ца́рствующий град и вся гра́ды и страны до́бре сохрани́, и ве́ру святу́ю непоро́чну соблюсти́ умоли́, мир весь предста́тельством твои́м умири́, от гла́да и па́губы изба́ви ны, и от нападе́ния иноплеме́нных сохрани́, ста́рыя уте́ши, ю́ныя наста́ви, безу́мныя умудри́, вдови́цы поми́луй, си́роты заступи́, младе́нцы возрасти́, пле́нных возврати́, немощству́ющыя и моля́щияся тебе́ от всех напа́стей и бед хода́тайством твои́м свободи́: моли́ о нас Всеще́драго и Человеколюби́ваго Христа́ Бо́га на́шего, да и в день Стра́шнаго Прише́ствия Его́ от шу́ияго стоя́ния изба́вит нас, и ра́дости святы́х прича́стники сотвори́т со все́ми святы́ми во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Святому священномученику Феодоту, епископу Анкирскому Святому священномученику Феодоту, епископу Анкирскому](img_b/052.jpg)