В Неде́лю 3-ю по Пятидеся́тнице

Канон всех святых, в земли Санкт-Петербуржстей просиявших

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь святы́х, глас 4:

Днесь све́тло красу́ется град свята́го Петра́,/ я́ко наста́ день честна́го торжества́,/ во́ньже лю́дие христоимени́тии славосло́вят Бо́га Вседержи́теля,/ на брега́х Невы́ опло́т держа́вы Росси́йския утверди́вшаго,/ и мно́гия святы́я в нем яви́вшаго,/ и́же моли́твы ко Пресвяте́й Тро́ице возно́сят,// да поми́лует Госпо́дь лю́ди Своя́, я́ко Милосе́рд.

Велича́ние:

Велича́ем вас,/ вси святи́и, в земли́ Петербу́ржстей просия́вшии,/ и чтим святу́ю па́мять ва́шу,/ вы бо мо́лите за нас// Христа́ Бо́га на́шего.

Кано́н всем святы́м, в земли́ Санкт-Петербу́ржстей просия́вшим, глас 4.

Песнь 1

Ирмос: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,// и воспою́, ра́дуяся, Тоя́ чудеса́.

Припе́в: Вси святи́и земли́ Петербу́ржския, моли́те Бо́га о нас.

Прииди́те, в пе́снех воспои́м собо́р свяще́ннейший,/ всех святы́х, в земли́ Петербу́ржстей просия́вших,/ и свои́ми по́двиги всю зе́млю на́шу освяти́вших.

Припе́в: Вси святи́и земли́ Петербу́ржския, моли́те Бо́га о нас.

Восхва́лим Андре́я Первозва́ннаго и свята́го равноапо́стольнаго Влади́мира,/ вку́пе же и вели́кую княги́ню О́льгу,/ я́ко тех труда́ми в земли́ Росси́йстей ве́ра насади́ся,/ и доны́не благода́тию Бо́жиею напая́ется и плод стори́чный прино́сит.

Припе́в: Вси святи́и земли́ Петербу́ржския, моли́те Бо́га о нас.

Днесь соше́дшеся, ве́рнии,/ восхва́лим по достоя́нию благове́рнаго и венцено́снаго кня́зя Алекса́ндра,/ я́ко защи́тника земли́ Ру́сския и чуде́с пода́теля оби́льнаго,/ при́сно Го́споду о всех нас моля́щася.

Припе́в: Вси святи́и земли́ Петербу́ржския, моли́те Бо́га о нас.

Всемогу́щий Госпо́дь си́лою на брань ве́рныя Своя́ препоясу́яй, о кня́же Алекса́ндре,/ злочести́выя враги́ под но́зе твои́ покори́ и на све́щнице высо́це поста́ви тя,/ те́мже град Петра́ тобо́ю хва́лится и свята́я ла́вра велича́ется.

Припе́в: Вси святи́и земли́ Петербу́ржския, моли́те Бо́га о нас.

Благове́рный кня́же Алекса́ндре, Престо́лу Бо́жию со все́ми святы́ми ны́не предстоя́,/ прославля́еши Триипоста́снаго Бо́га,/ сего́ ра́ди подава́й нам благода́ть исцеле́ний/ и моли́ся о спасе́нии душ на́ших.

Припе́в: Вси святи́и земли́ Петербу́ржския, моли́те Бо́га о нас.

Свети́льниче земли́ Росси́йския пресве́тлый,/ чудесы́ мно́гими сия́я,/ просвеща́еши ди́вно ду́ши соверша́ющих любо́вию па́мять твою́, Алекса́ндре блаже́нне.

Припе́в: Вси святи́и земли́ Петербу́ржския, моли́те Бо́га о нас.

Прииди́те, лю́дие благочести́вии,/ архиере́и и свяще́нницы, мона́си и мирсти́и, ста́рии и млади́и,/ просла́вим кня́зя благове́рнаго Алекса́ндра,/ и́же всякому во́зрасту и чи́ну засту́пник ве́рный и наста́вник до́брый бысть.

Сла́ва Отцу́ и Сы́ну и Свято́му Ду́ху:

Пе́сньми и пе́нии духо́вными восхва́лим блаже́ннаго кня́зя Алекса́ндра/ и, припа́дающе к честне́й и многоцеле́бней ра́це его́,/ с любо́вию облобыза́им ю́ и си́це воспои́м:/ ра́дуйся, о Оте́честве на́шем преди́вный моли́твенниче.

И ны́не и при́сно и во ве́ки веко́в. Ами́нь.

Богородичен: Чу́дно украси́ся град наш ико́ною Твое́ю, Богоро́дице Влады́чице, Скоропослу́шницею имену́емою,/ ю́же благоволи́ла еси́ да́ти ве́рным в по́мощь и утеше́ние,/ ско́ро бо слы́шиши мольбы́ в ско́рбех Тя призыва́ющих/ и па́че луче́й со́лнечных всех освеща́еши благода́тию Твое́ю.

Песнь 3

Ирмос: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве// венце́в сла́вы сподо́би.

Припе́в: Вси святи́и земли́ Петербу́ржския, моли́те Бо́га о нас.

Вмени́стеся я́ко о́вцы заколе́ния, о ца́рственнии страстоте́рпцы,/ и, я́коже а́гнцы непоро́чнии, Бо́гу поже́ршеся, за уби́йцы ва́ша кро́тко моли́стеся./ Сего́ ра́ди и А́гнец Бо́жий, взе́мляй грехи́ ми́ра,/ прия́т вас во дворы́ Своя́.

Припе́в: Вси святи́и земли́ Петербу́ржския, моли́те Бо́га о нас.

О страстоте́рпче святы́й царю́ Нико́лае, ро́да ца́рскаго ве́нче и похвало́!/ Безако́ннии лю́дие оболга́ша и преда́ша тя на смерть лю́тую,/ си́лою же Бо́жиею укрепля́емь, вся му́жественне претерпе́л еси́.

Припе́в: Вси святи́и земли́ Петербу́ржския, моли́те Бо́га о нас.

О страстоте́рпице цари́це Алекса́ндро,/ смире́нием свои́м, всю зе́млю Ру́сскую удиви́вшая!/ Ты, боля́щия и стра́ждущия во́ины утеша́ющи/ и ра́ны их, я́ко ма́ти чадолюби́вая, омыва́ющи,/ я́ко Самому́ Христу́ Бо́гу послужи́ла еси́.

Припе́в: Вси святи́и земли́ Петербу́ржския, моли́те Бо́га о нас.

О святи́и царю́ Нико́лае и цари́це Алекса́ндро!/ Вы до́браго супру́жества и дете́й воспита́ния благочести́ваго о́браз яви́сте/ и дом свой, я́ко цветни́к духо́вный, соде́ласте./ Сего́ ра́ди ны́не вку́пе со ча́ды свои́ми Престо́лу Бо́жию предстои́те.

Припе́в: Вси святи́и земли́ Петербу́ржския, моли́те Бо́га о нас.

О ча́да царе́ва, святи́и му́ченицы, ве́рнии раби́ Христо́ви:/ Алекси́е, О́льго, Татиа́но, Мари́е и Анастаси́е!/ Вы, за убива́ющия вас Го́споду кро́тко моля́щеся,/ кровь свою́ неви́нную я́ко дар многоце́нен Бо́гу принесли́ есте́./ Сего́ ра́ди вас ны́не ублажа́ем.

Припе́в: Вси святи́и земли́ Петербу́ржския, моли́те Бо́га о нас.

О преподобному́ченице Елисаве́то, вели́чием по́двигов твои́х мно́гия удиви́вшая!/ Ты, я́коже Мари́я, Христу́ Бо́гу всем се́рдцем внима́ющи,/ и, я́коже Ма́рфа, Ему́ с любо́вию служа́щи,/ о́браз де́ятельнаго благоче́стия нам яви́ла еси́/ и ве́ру свою́ да́же до сме́рти непоро́чно сохрани́ла еси́.

Сла́ва Отцу́ и Сы́ну и Свято́му Ду́ху:

Ра́дуйся, гра́де свята́го Петра́,/ в тебе́ бо ны́не прославля́ются пе́сненно ча́да твоя́,/ я́же, ри́зы своя́ мно́гими страда́нии убели́вше и сла́ву Небе́сную зако́нно стяжа́вше,/ побе́дную песнь Бо́гови возсыла́ют.

И ны́не и при́сно и во ве́ки веко́в. Ами́нь.

Богородичен: Возвы́силася еси́, Богоро́дице Де́во, па́че лик Небе́сных,/ восприи́мши во утро́бе Твое́й непристу́пный Свет Божества́,/ И́мже сердца́ и умы́ на́ша просвети́/ и к жи́зни непоро́чней наста́ви.

Седа́лен святы́х, глас 3:

Днесь па́мять святы́х земли́ Петербу́ржстей соверша́юще,/ припаде́м ко Го́споду и возопии́м:/ Христе́ Бо́же, тех моли́твами умири́ мир Твой, и спаси́ ду́ши на́ша,/ я́ко Благ и Человеколю́бец.

Сла́ва, и ны́не, Богоро́дичен, глас то́йже:

О Неве́сто Неневе́стная! Ты неизрече́нно зачала́ еси́ во утро́бе Твое́й Христа́ Бо́га на́шего./ Те́мже Тя я́ко Ма́терь Бо́жию и Пречи́стую Присноде́ву правосла́вно велича́ем.

Песнь 4

Ирмос: Седя́й в сла́ве, на Престо́ле Божества́,/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:// сла́ва, Христе́, си́ле Твое́й.

Припе́в: Вси святи́и земли́ Петербу́ржския, моли́те Бо́га о нас.

По́двигом моли́твы, труда́ и юро́дства Христа́ ра́ди/ во гра́де свята́го Петра́ просия́вши, Ксе́ние блаже́нная,/ моли́ся и нам в Небе́снем Ца́рствии Безсме́ртныя трапе́зы сподо́битися.

Припе́в: Вси святи́и земли́ Петербу́ржския, моли́те Бо́га о нас.

Небе́сныя жи́зни возжела́вши,/ в житии́ твое́м вся земна́я отри́нула еси́, ма́ти Ксе́ние,/ те́мже сподо́би и нас моли́твами твои́ми Го́рних Черто́гов дости́гнути.

Припе́в: Вси святи́и земли́ Петербу́ржския, моли́те Бо́га о нас.

Мона́хов наста́вниче, цевни́це духо́вная,/ моли́твы учи́телю, Игна́тие богому́дре,/ святи́тельским твои́м омофо́ром покрыва́й ста́до твое́ от вся́каго зла.

Припе́в: Вси святи́и земли́ Петербу́ржския, моли́те Бо́га о нас.

Пра́вды Христо́вы взыску́я, Игна́тие блаже́нне,/ во́ли Бо́жией покори́лся еси́/ и, в пу́стынь Се́ргиеву всели́вся,/ житие́м многоско́рбным сию́ освяти́л еси́.

Припе́в: Вси святи́и земли́ Петербу́ржския, моли́те Бо́га о нас.

Чудотво́рче Кроншта́дтский Иоа́нне,/ моли́твою твое́ю па́дшия возставля́л еси́, неду́жныя исцеля́л еси́,/ и ны́не, во сла́ве Небе́сней пребыва́я,/ не оста́ви нас, почита́ющих па́мять твою́.

Сла́ва Отцу́ и Сы́ну и Свято́му Ду́ху:

Ло́жная мудрова́ния сыно́в ве́ка сего́,/ возстаю́щих проти́ву и́стины святы́я Це́ркве Христо́вы,/ неле́ностно облича́я, свя́те Иоа́нне,/ сло́вом и житие́м Правосла́вие утвержда́л еси́, поя́:/ сла́ва си́ле Твое́й, Го́споди.

И ны́не и при́сно и во ве́ки веко́в. Ами́нь.

Богородичен: Пресвята́я Госпоже́ Мари́е Богоро́дице,/ Бо́га Твоего́ и Созда́теля во чре́ве носи́вшая,/ освяти́ сердца́ рабо́в Твои́х, Пречи́стая,/ я́ко да всегда́ Тобо́ю хва́лимся.

Пе́снь 5

Ирмос: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя// мир подава́ющая.

Припе́в: Вси святи́и земли́ Петербу́ржския, моли́те Бо́га о нас.

Новому́чениче Петрогра́дский,/ ка́меню драги́й и сла́вный Це́ркве Росси́йския,/ Пе́тре, ве́рный служи́телю Цари́цы Богоро́дицы, достохва́льне,/ ты, ре́вностию Боже́ственною распала́емь,/ безу́мие безбо́жник изобличи́л еси́/ и кровь за Христа́ пролия́л еси́.

Припе́в: Вси святи́и земли́ Петербу́ржския, моли́те Бо́га о нас.

Добропобе́днии священному́ченицы Нико́лае и Иоа́нне, соу́зницы Ти́хфинстии,/ стрел разжже́нных лука́ваго и огня́, в лице́ вам ды́шущаго, не убоя́вшеся,/ Христа́ пропове́дасте,/ и на страда́ние му́жественно потеко́сте,/ те́мже и ны́не со святы́ми водворя́етеся.

Припе́в: Вси святи́и земли́ Петербу́ржския, моли́те Бо́га о нас.

Богодухнове́нне пропове́дниче, священному́чениче Филосо́фе,/ хра́ма Каза́нскаго похвало́, из се́рдца твоего́ благотворя́щаго ре́ки воды́ живы́я истеко́ша,/ ду́ши и телеса́ жа́ждущих росо́ю благода́ти напая́ющи.

Припе́в: Вси святи́и земли́ Петербу́ржския, моли́те Бо́га о нас.

Ча́да до́бре воспита́л еси́, па́стырю блаже́нне Филосо́фе,/ я́же с тобо́ю вку́пе на по́двиг востеко́ша/ и венце́м му́ченическим от Христа́ Влады́ки украси́шася,/ Никола́й и Бори́с прехва́льнии.

Припе́в: Вси святи́и земли́ Петербу́ржския, моли́те Бо́га о нас.

Бра́тства церко́вная устроя́яй и утвержда́яй, преподобному́чениче Льве,/ благоде́тель неусы́пный и помо́щник ни́щим, стра́нным, си́рым и стра́ждущим показа́лся еси́,/ те́мже Ца́рствие Небе́сное унасле́довал еси́.

Припе́в: Вси святи́и земли́ Петербу́ржския, моли́те Бо́га о нас.

Бо́льши сея́ никто́же любве́ и́мать,/ да кто ду́шу свою́ положи́т за дру́ги своя́./ Си́це у́бо и ты, священному́чениче Алекси́е Кроншта́дтский, за собра́та жизнь свою́ отда́вый,/ в же́ртву Бо́гови прине́слся еси́.

Сла́ва Отцу́ и Сы́ну и Свято́му Ду́ху:

До́блестный страда́льче и христоподража́тельный му́чениче Иоа́нне Царскосе́льский,/ моли́ Влады́ку Христа́ Бо́га/ и нам ве́чныя му́ки изба́витися.

И ны́не и при́сно и во ве́ки веко́в. Ами́нь.

Богородичен: О Всепе́тая, Всехва́льная Мари́е,/ раб Твои́х моле́ний не пре́зри,/ но от бед изба́ви, Непоро́чная,/ всех к Тебе́ усе́рдно притека́ющих.

Песнь 6

Ирмос: Боже́ственное сие́ и всечестно́е/ соверша́юще пра́зднество,/ богому́дрии, Богома́тере,/ прииди́те, рука́ми воспле́щим,// от Нея́ ро́ждшагося Бо́га сла́вим.

Припе́в: Вси святи́и земли́ Петербу́ржския, моли́те Бо́га о нас.

Же́ртвенную любо́вь яви́л еси́, святи́телю Вениами́не,/ тве́рдостию ума́ показа́лся еси́ неколеби́м,/ егда́ клевета́ху на тя врази́ твои́./ Те́мже к све́ту невече́рнему прише́л еси́, священному́чениче, ра́дуяся.

Припе́в: Вси святи́и земли́ Петербу́ржския, моли́те Бо́га о нас.

Смире́нием, я́ко ри́зою, обле́клся еси́, священному́чениче Вениами́не,/ егда́ клеветницы́ без вины́ осуди́ша тя./ Те́мже велича́ем страда́ния твоя́/ и песносло́вим кончи́ну твою́.

Припе́в: Вси святи́и земли́ Петербу́ржския, моли́те Бо́га о нас.

Святи́телю Вениами́ну после́довали есте́, Се́ргие, Ю́рие и Иоа́нне достохва́льнии,/ и вку́пе му́ченическими венцы́ увенча́лися есте́,/ те́мже ны́не па́мять ва́шу соверша́ем.

Припе́в: Вси святи́и земли́ Петербу́ржския, моли́те Бо́га о нас.

Я́ко оте́ц милосе́рдый всем вся был еси́:/ вдови́цам пита́тель, скорбя́щим уте́шитель, оби́димым засту́пник,/ гра́ду Петро́ву па́стырь и храни́тель, священному́чениче Вениами́не./ Те́мже и ны́не приле́жно моли́ся Влады́це Христу́ о чту́щих па́мять твою́.

Припе́в: Вси святи́и земли́ Петербу́ржския, моли́те Бо́га о нас.

Престо́лу Бо́жию предстоя́, святи́телю Христо́в Вениами́не,/ не преста́й приле́жно моли́ти о нас, рабе́х твои́х,/ да твои́м хода́тайством огня́ ве́чнаго изба́вимся/ и вся́каго озлобле́ния, на ны от враг находя́щаго.

Припе́в: Вси святи́и земли́ Петербу́ржския, моли́те Бо́га о нас.

Све́тлым лице́м на беззако́ннем суди́лищи предста́в, священному́чениче Вениами́не,/ смире́нием, кро́тостию и му́дростию непра́ведных суди́й посрами́л еси́/ и ра́достне за Христа́ пострада́л еси́, глаго́ля:/ сла́ва Бо́гу за вся.

Сла́ва Отцу́ и Сы́ну и Свято́му Ду́ху:

Па́мять твоя́ светоно́сне возсия́вши, досточу́дне Вениами́не,/ просвеща́ет ду́ши благогове́йно сию́ соверша́ющих,/ муче́ния бо, страда́ния и смерть му́жественне претерпе́л еси́./ Те́мже благоче́стно пе́сньми тя велича́ем.

И ны́не и при́сно и во ве́ки веко́в. Ами́нь.

Богородичен: Возсия́й в сердца́х на́ших, Влады́чице Пречи́стая, Сы́на Твоего́ нетле́нный свет,/ о́чи на́ши мы́сленныя просвети́/ и уста́ на́ша отве́рзи ко хвале́нию Твоему́.

Конда́к святы́х, глас 3:

Дне́сь святи́и земли́ Петербу́ржския/ вку́пе с на́ми предстоя́т в Це́ркви и неви́димо за ны мо́лятся Бо́гу,/ да изба́вит нас от враг ви́димых и неви́димых,/ от неду́га и гла́да, от внеза́пныя сме́рти и от вся́каго зла// и спасе́т ду́ши на́ша.

И́кос:

А́нгельским чино́м подража́юще на земли́,/ просия́ли есте́ в по́двизех многоразли́чных, святи́и./ Восприи́мше и́го благо́е Христо́во на ра́мена своя́,/ востеко́сте к Небе́сному Иерусали́му./ Сего́ ра́ди моли́те Христа́ о нас, вопию́щих вам:/ ра́дуйтеся, неусы́пнии на́ши моли́твенницы;/ ра́дуйтеся, пречу́днии хода́таи о нас ко Го́споду./ Ра́дуйтеся, я́ко труда́ми ва́шими ве́ра насажда́ется;/ ра́дуйтеся, я́ко кровьми́ ва́шими Це́рковь утвержда́ется./ Ра́дуйтеся, я́ко со А́нгелы Святе́й Тро́ице предстоите́;/ ра́дуйтеся, я́ко с ни́ми трисвяту́ю пе́снь Ей воспева́ете./ Ра́дуйтеся, свети́ла незаходи́мая Це́ркве на́шея.

Песнь 7

Ирмос: Не послужи́ша тва́ри богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:// препе́тый отце́в Госпо́дь и Бог, благослове́н еси́.

Припе́в: Вси святи́и земли́ Петербу́ржския, моли́те Бо́га о нас.

В вертогра́де духо́внем земли́ Петербу́ржския взраще́н,/ Це́рковь Ру́сскую во дни лю́тых гоне́ний возгла́вил еси́, святи́телю Ти́хоне,/ и, Ка́мень живы́й, Христа́, во основа́ние жи́зни твоея́ положи́в, воспе́л еси́:/ отце́в на́ших Бо́же, благослове́н еси́.

Припе́в: Вси святи́и земли́ Петербу́ржския, моли́те Бо́га о нас.

Священному́чениче Кири́лле Каза́нский,/ собесе́дниче сла́внаго па́стыря Кроншта́дтскаго и благогове́йне его́ погре́бший!/ Ты, лесть вра́жию му́жески попра́в,/ в темни́цу за Христо́м после́довал еси́, с ве́рою воспева́я:/ отце́в на́ших, Бо́же, благослове́н еси́.

Припе́в: Вси святи́и земли́ Петербу́ржския, моли́те Бо́га о нас.

И́же на высо́ких тя Поста́вивый, святи́телю Иларио́не,/ Боже́ственною му́дростию ум твой облагодати́./ Сего́ ра́ди Христа́ всем я́сно пропове́дал еси́ и Го́сподеви воспева́л еси́:/ отце́в на́ших, Бо́же, благослове́н еси́.

Припе́в: Вси святи́и земли́ Петербу́ржския, моли́те Бо́га о нас.

Ве́ру Христо́ву му́жественне защища́я, священному́чениче Иларио́не,/ у́зы за Христа́, ра́дуяся, восприя́л еси́/ и, сме́ртию твое́ю по́двиг твой запечатле́в,/ вся пе́ти научи́л еси́:/ отце́в на́ших, Бо́же, благослове́н еси́.

Припе́в: Вси святи́и земли́ Петербу́ржския, моли́те Бо́га о нас.

Святи́телю Ре́вельский Плато́не, о па́стве твое́й усе́рдный ревни́телю!/ А́ще преще́нием и запреща́ху тебе́ мучи́телие пропове́дати Ева́нгелие,/ ты, терпе́нием вооружи́вся, по́двиг испове́дничества до́бле соверши́л еси́, Го́сподеви поя́:/ отце́в на́ших, Бо́же, благослове́н еси́.

Припе́в: Вси святи́и земли́ Петербу́ржския, моли́те Бо́га о нас.

Священному́чениче Нико́лае,/ сподви́жника чудотво́рцу Кроншта́дтскому врази́ тя нареко́ша,/ ты же, любо́вию распала́емь, и́мене сего́ пред лице́м сме́рти не отве́рглся еси́./ И ны́не, во дво́рех до́му Бо́га на́шего водворя́яся,/ не забу́ди нас, пою́щих:/ отце́в на́ших, Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Священному́чениче Ка́рпе, тве́рдый адама́нте ве́ры Христо́вы!/ Ты, пе́рвее во оби́тели Пю́хтицтей диа́конское служе́ние до́бре соверша́вый,/ по́слежде в чи́не иере́йстем па́ству хра́ма Иси́доровскаго во гра́де Петрогра́де до́бре упа́сл еси́/ и, до́брое се́мя неуста́нно се́яв,/ за Христа́ му́жественне пострада́л еси́./ Ны́не же с ли́ки святы́х жне́ши ра́достию кла́сы присноживо́тия, воспева́я:/ отце́в на́ших, Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: Всеблага́я, Всеми́лостивая Влады́чице,/ моля́щияся Тебе́ рабы́ Твоя́ уте́ши и от ве́тров вра́жиих сохрани́,/ да непреста́нно Тя велича́ем.

Песнь 8

Ирмос: О́троки благочести́выя в пещи́/ Рождество́ Богоро́дичо спасло́ есть,/ то́гда у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,// и превозноси́те Его́ во вся ве́ки.

Припе́в: Вси святи́и земли́ Петербу́ржския, моли́те Бо́га о нас.

Преподо́бне Серафи́ме, Вы́рицкий чудотво́рче,/ день и нощь ру́це твои́ воздева́л еси́, Го́сподеви моля́ся,/ да изба́вит Оте́чество на́ше от наше́ствия иноплеме́нных./ Мы же, твои́ми моли́твами спасе́ние улучи́вше, Бо́гу вопие́м:/ благослови́те, вся дела́ Госпо́дня, Го́спода.

Припе́в: Вси святи́и земли́ Петербу́ржския, моли́те Бо́га о нас.

Лик серафи́мский Трисвяту́ю песнь Тро́ице воспева́ет,/ с ни́мже и преподо́бный чудотво́рец Вы́рицкий Бо́га славосло́вит, вопия́:/ благослови́те, вся дела́ Госпо́дня, Го́спода.

Припе́в: Вси святи́и земли́ Петербу́ржския, моли́те Бо́га о нас.

Саро́вскому чудотво́рцу поревнова́в,/ дух ми́рен стяжа́л еси́, преподо́бне о́тче Серафи́ме./ Сего́ ра́ди ты́сящи о́крест тебе́ спаса́ются и, благодаря́ще, Бо́гови вопию́т:/ благослови́те, вся дела́ Госпо́дня, Го́спода.

Припе́в: Вси святи́и земли́ Петербу́ржския, моли́те Бо́га о нас.

Фараони́ты мы́сленныя му́жески победи́в,/ чистоту́ серде́чную стяжа́л еси́, о́тче преподо́бне Серафи́ме,/ сего́ ра́ди, душе́вныма очи́ма Бо́га узре́в,/ с любо́вию воспева́л еси́:/ благослови́те, вся дела́ Госпо́дня, Го́спода.

Припе́в: Вси святи́и земли́ Петербу́ржския, моли́те Бо́га о нас.

Мно́гая чудеса́, преподо́бне чудотво́рче Вы́рицкий,/ си́лою Бо́жиею, в тебе́ бога́тно де́йствующею, сотвори́л еси́:/ слепи́и бо прозрева́ху, неми́и глаго́лаху,/ одержи́мии же от духо́в зло́бы свобожда́хуся./ Сего́ ра́ди Бо́гу, ди́вному во святы́х Свои́х, пое́м:/ благослови́те, вся дела́ Госпо́дня, Го́спода.

Припе́в: Вси святи́и земли́ Петербу́ржския, моли́те Бо́га о нас.

Любо́вию Христо́вою уязви́вшися, преподобному́ченице Мари́е Га́тчинская,/ к страда́нию востекла́ еси́, распе́нши плоть со страстьми́ и похотьми́,/ и, свещу́ душе́вную неугаси́му дея́нием храня́щи,/ в черто́г Жениха́ Небе́снаго возшла́ еси́,/ превознося́щи Его́ во ве́ки.

Припе́в: Вси святи́и земли́ Петербу́ржския, моли́те Бо́га о нас.

Да́ры Христу́ любо́вию принесла́ еси́, преподобному́ченице Мари́е,/ моли́тву, я́ко зла́то,/ поще́ние, я́ко лива́н,/ и страда́ние, я́ко сми́рну./ Тем тя благоче́стно велича́ем.

Сла́ва Отцу́ и Сы́ну и Свято́му Ду́ху:

О́бразе неизме́нный Оте́ч,/ Сия́ние сла́вы Присносу́щнаго Све́та,/ печа́ть Вы́шняго, Сло́ве, Си́ло и Му́дросте!/ Тя благословя́щим Благопремени́тель бу́ди.

И ны́не и при́сно и во ве́ки веко́в. Ами́нь.

Богородичен: О Де́во Богороди́тельнице, оби́димых Засту́пнице и всех скорбя́щих Ра́досте!/ Приими́ благода́рственное пе́ние, от души́ Тебе́ возноси́мое,/ и бу́ди нам те́плая Хода́таица в День стра́шнаго испыта́ния,/ егда́ Сын Твой и́мать суди́ти живы́х и ме́ртвых.

Песнь 9

Ирмос: Всяк земноро́дный/ да взыгра́ется, Ду́хом просвеща́емь,/ да торжеству́ет же безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,// Чи́стая Присноде́во.

Припе́в: Вси святи́и земли́ Петербу́ржския, моли́те Бо́га о нас.

Ра́дуйся, преподо́бне о́тче Алекса́ндре Сви́рский,/ Бог в Тро́ице воспева́емый яви́ся ти и сосу́д избра́нный соде́ла тя,/ те́мже, богоно́се, и доны́не чудоде́еши.

Припе́в: Вси святи́и земли́ Петербу́ржския, моли́те Бо́га о нас.

От роди́телей благочести́вых,/ испроси́вших сы́на у Святы́я Тро́ицы, прозя́бл еси́, Алекса́ндре треблаже́нне,/ и яви́лся еси́ та́ин Боже́ственных созерца́тель.

Припе́в: Вси святи́и земли́ Петербу́ржския, моли́те Бо́га о нас.

Всегда́шним к Бо́гу раче́нием и ми́ра отверже́нием,/ о́тче Анто́ние, Ды́мский чудотво́рче, Го́споду ве́рно послужи́л еси́,/ те́мже и досто́ин яви́лся еси́ услы́шати вожделе́нный глас Его́:/ благи́й ра́бе и ве́рный,/ вни́ди в ра́дость Го́спода твоего́.

Припе́в: Вси святи́и земли́ Петербу́ржския, моли́те Бо́га о нас.

Незло́бив, пра́веден и ми́лостив быв, Анто́ние богому́дре,/ блаже́нства Небе́снаго в земли́ кро́тких сподо́бился еси́,/ и та́мо вкуша́еши ве́чнаго утеше́ния.

Припе́в: Вси святи́и земли́ Петербу́ржския, моли́те Бо́га о нас.

Я́коже му́драя пчела́, преподо́бне о́тче Арсе́ние,/ мед духо́вный собира́я, Го́ру Афо́нскую обходи́л еси́,/ те́мже и оби́тель Коневе́цкая, тобо́ю устро́енная,/ сокро́вищница даро́в Свята́го Ду́ха яви́лася еси́.

Припе́в: Вси святи́и земли́ Петербу́ржския, моли́те Бо́га о нас.

Врага́ ро́да челове́ческаго и́менем Христо́вым отгна́в, преподо́бне Арсе́ние,/ язы́ческая жертвоприноше́ния на о́строве Коне́встем упраздни́л еси́/ и та́мо же́ртву хвалы́ Бо́гу приноси́л еси́.

Сла́ва Отцу́ и Сы́ну и Свято́му Ду́ху:

Пу́стынь Зелене́цкая, кресто́м зве́здным благослове́нная,/ по́двигом преподо́бнаго Марти́рия созда́ся и просла́вися,/ те́мже и ны́не моли́твами ве́рных утвержда́ется.

И ны́не и при́сно и во ве́ки веко́в. Ами́нь.

Богородичен: Во гра́де Каза́ни ико́ну Твою́ яви́ла еси́, Пречи́стая,/ очеса́ слепы́х отверза́ющи и ми́лости Своя́ на ве́рных излива́ющи,/ и ны́не, Засту́пнице Усе́рдная, просвети́ нас,/ во гра́де свята́го Петра́ честно́му о́бразу Твоему́ покланя́ющихся.

Свети́лен святы́х, глас 1:

Ра́дуйся, сла́вный гра́де свята́го Петра́,/ сла́ва бо святы́х твои́х в тебе́ возсия́,/ лику́йте ны́не и весели́теся, благочести́вии лю́дие,/ я́ко сонм ве́лий хода́таев Небе́сных и́мате пред Бо́гом.

Моли́тва

О Всеми́лостивый и Великодарови́тый Бо́же, утверди́вый во́лею Твое́ю зе́млю Росси́йскую и в ней град свята́го Петра́! При́зри с высоты́ святы́я Твоея́ на предстоя́щия лю́ди Твоя́ и приими́ благодаре́ние на́ше о Твои́х вели́ких благодея́ниих, я́же сотвори́л еси́ в ле́та дре́вняя со отцы́ на́шими! Услы́ши нас, прославля́ющих И́мя Твое́ Свято́е, я́ко благоволи́л еси́ просла́вити во святы́х избра́нныя Твоя́, и́хже земля́ Петербу́ржская произрасти́. Вонми́ гла́су моле́ния ве́рных чад Твои́х, славосло́вие вели́честву Твоему́ возсыла́ющих и умиле́нно к Тебе́ взыва́ющих. Посети́ нас ми́лостию и щедро́тами Твои́ми, я́ко и на бу́дущая времена́ пожи́ти нам во вся́ком благоче́стии и чистоте́. Утверди́ град сей и зе́млю сию́ моли́твами и предста́тельством сла́вныя Влады́чицы на́шея Богоро́дицы и Присноде́вы Мари́и, свята́го благове́рнаго и вели́каго кня́зя Алекса́ндра Не́вскаго, святы́х ца́рственных страстоте́рпцев Никола́я и Алекса́ндры со ча́ды их, святы́я блаже́нныя ма́тере на́шея Ксе́нии Петербу́ржския, свята́го пра́веднаго отца́ на́шего Иоа́нна Кроншта́дтскаго чудотво́рца, свята́го священному́ченика Вениами́на, митрополи́та Петрогра́дскаго, преподо́бнаго и богоно́снаго отца́ на́шего Серафи́ма Вы́рицкаго и всех уго́дников Твои́х, в земли́ Петербу́ржстей просия́вших, я́ко да, пожи́вше в ве́це сем по за́поведем Твои́м, в ве́чный поко́й дости́гнем, иде́же со все́ми святы́ми просла́вим Пресвято́е И́мя Твое́, Отца́, и Сы́на, и Свята́го Ду́ха, ны́не, и при́сно, и во ве́ки веко́в. Ами́нь.