1 июня.

Канон преподобному Корнилию, игумену Палеостровскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 5:

От ю́ности, прему́дре, приле́жно подвиза́вся, от Бо́га наставля́емь, оте́чество свое́ оста́вль — гра́д Пско́в, и всели́ся в пусты́ню, во ото́це вели́каго е́зера Оне́га, и́ноки собра́ му́дре и извеще́нием Свята́го Ду́ха оби́тель согради́ и хра́м созда́ Пресвяте́й Богоро́дице в похвалу́ Рождества́ Ея́, струя́ми же сле́з твои́х безпло́тныя враги́ погрузи́л еси́ и жития́ твоего́ целому́дрием со Ангельскими ли́ки совокупи́ся, преподо́бне о́тче Корни́лие, с ни́миже Христа́ Бо́га моли́ спасти́ся душа́м на́шим.

Кано́н преподо́бному Корни́лию, гла́с 8.

Пе́снь 1.

Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припев: Преподо́бне о́тче Корни́лие, моли́ Бо́га о нас.

Человеколю́бче Христе́, да́ждь ми́ сло́во воспе́ти Твоего́ уго́дника, напосле́док дни́й я́вльшагося и всю́ на́шу страну́ житие́м удиви́вшаго.

Припев: Преподо́бне о́тче Корни́лие, моли́ Бо́га о нас.

Юности моея́ неве́жествие пощади́, и коле́блемыя по́мыслы стра́хом Госпо́дним укрепи́, о́тче, и не возгнуша́йся мене́, пе́ти тя́ начина́ющаго.

Сла́ва Отцу́ и Сы́ну и Свято́му Ду́ху:

Ди́вное твое́ житие́ челове́ки удиви́ло е́сть, и Ангели, ви́девше, возра́довашася, я́ко, пло́тян сы́й, к безпло́тным лико́м прише́л еси́.

И ны́не и при́сно и во ве́ки веко́в. Ами́нь.

Богородичен: Небе́сный Ца́рь, ви́дя челове́ка, преступле́нием ги́бнуща, благоизво́ли от Тебе́ воплоти́тися, Пресвята́я Де́во, и Тебе́ показа́ челове́ческому ро́ду покро́в и заступле́ние.

Пе́снь 3.

Ирмос: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й.

Припев: Преподо́бне о́тче Корни́лие, моли́ Бо́га о нас.

Ангельское житие́ во пло́ти пожи́л еси́, о́тче Корни́лие, сего́ ра́ди прославля́ешися ве́чно в небе́сных оби́телех.

Припев: Преподо́бне о́тче Корни́лие, моли́ Бо́га о нас.

Госпо́день Кре́ст от ю́ности взе́м на ра́мо свое́, о́тче, умертви́л еси́ стра́сти плотски́я воздержа́нием и моли́твами.

Сла́ва Отцу́ и Сы́ну и Свято́му Ду́ху:

От ю́ности твоея́ терпе́ния мече́м вооружи́вся, порази́л еси́, преподо́бне, главу́ велиа́рову и ко́зни его́ попра́л еси́.

И ны́не и при́сно и во ве́ки веко́в. Ами́нь.

Богородичен: Кто́ и́н в ро́дех родо́в просла́влен бы́сть, я́коже Ты́, Влады́чице? Бо́га бо небе́снаго Ма́ти и всея́ тва́ри Госпожа́ показа́ся.

Седа́лен, гла́с 3:

Ше́ствуя путе́м за́поведей Госпо́дних, обре́л еси́ кора́бль безстра́стия, на него́же все́д, преше́л еси́ жите́йскую пучи́ну, му́дре, и ны́не, веселя́ся, лику́еши со Ангелы во дво́рех небе́сных, и мо́лишися за ду́ши на́ша, хода́таю на́ш ди́вный, о́тче Корни́лие.

Сла́ва, и ны́не, Богородичен:

Непреста́нно погружа́ема мя́ зря́ волна́ми страсте́й мои́х, Влады́чице Всепе́тая, простри́ держа́вную Твою́ десни́цу и изба́ви мя́ от тиме́ния глубины́: мо́лится бо Тебе́ за мя́ хода́тай на́ш, ди́вный Корни́лий.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Преподо́бне о́тче Корни́лие, моли́ Бо́га о нас.

Ото́к среде́ вели́каго е́зера Оне́га обре́л еси́ и, в о́нь всели́вся еди́н, Христо́ви еди́ному живы́й, просла́вился еси́.

Припев: Преподо́бне о́тче Корни́лие, моли́ Бо́га о нас.

Подо́бяся пра́отцу Авраа́му, из гра́да Пско́ва, я́коже о́н иногда́ из оте́чества, отше́д, всели́лся еси́ в пусты́ню, Бо́гови живы́й.

Сла́ва Отцу́ и Сы́ну и Свято́му Ду́ху:

Ни теснота́ пеще́ры, ни пусты́ня ото́ка, ни бра́шна ску́дость к малоду́шию тя́ привести́ возмого́ша: вся́ бо сия́ терпе́нием победи́л еси́.

И ны́не и при́сно и во ве́ки веко́в. Ами́нь.

Богородичен: Имамы Тя́ наде́жду и те́плую о на́с Предста́тельницу к Сы́ну и Бо́гу Твоему́, Его́же моли́ти не преста́й, Влады́чице, при́сно.

Пе́снь 5

Ирмос: Утренююще, вопие́м Ти́: Го́споди, спаси́ ны, Ты́ бо еси Бо́г на́ш, ра́зве Тебе́, ино́го не ве́мы.

Припев: Преподо́бне о́тче Корни́лие, моли́ Бо́га о нас.

Лю́таго врага́ диа́вола терпе́ния стрела́ми устрели́в, главу́ его́ смире́ния мече́м порази́л еси́, Го́сподеви вопия́: ра́зве Тебе́, ино́го не зна́ю.

Припев: Преподо́бне о́тче Корни́лие, моли́ Бо́га о нас.

Неду́г разслабле́ния иногда́ явле́нием свои́м от стра́ждущаго му́жа отгна́в, во и́ночество приве́л его́, вопию́ща Христо́ви: ра́зве Тебе́, ино́го не зна́ю.

Сла́ва Отцу́ и Сы́ну и Свято́му Ду́ху:

Язы́к на славосло́вие, о́чи на бде́ние, мы́сль на моли́тву, главу́ с коле́нами на поклоне́ние вда́л еси́, Го́сподеви взыва́я: ра́зве Тебе́, ино́го не зна́ю.

И ны́не и при́сно и во ве́ки веко́в. Ами́нь.

Богородичен: Хра́м Тво́й, Богома́ти, его́же Ти́ созда́ Корни́лий, прия́ла еси́, я́ко Авелеву же́ртву Госпо́дь, приими́ и на́с, вопию́щих: ины́я, ра́зве Тебе́, Засту́пницы не зна́ем.

Пе́снь 6.

Ирмос: Ри́зу мне́ пода́ждь све́тлу, одея́йся све́том, я́ко ри́зою, многоми́лостиве Христе́ Бо́же на́ш.

Припев: Преподо́бне о́тче Корни́лие, моли́ Бо́га о нас.

Ве́сь в багряни́цу чистоты́, о́тче, оде́ялся еси́ и, в небе́сныя черто́ги всели́вся, Спа́су пое́ши: сла́влю Тя́, Христе́ Бо́же на́ш.

Припев: Преподо́бне о́тче Корни́лие, моли́ Бо́га о нас.

Аще земля́ и сокры́ тя́, но чудеса́, от ра́ки твоея́ излива́емая, убежда́ют на́с пе́ти Влады́це: сла́вим Тя́, Христе́ Го́споди, Бо́же на́ш.

Сла́ва Отцу́ и Сы́ну и Свято́му Ду́ху:

Любо́вию твое́ю прилепи́вся Влады́це, не преста́й моли́ти за ны́, рабы́ твоя́, да и мы́ с тобо́ю вопие́м: спаси́ ны, Христе́ Бо́же на́ш.

И ны́не и при́сно и во ве́ки веко́в. Ами́нь.

Богородичен: Юноши и де́вы, обурева́емии страсте́й волна́ми, прибега́ют в ти́хое приста́нище Твоего́ милосе́рдия и вопию́т: спаси́ ны, Многоми́лостивая Влады́чице.

Конда́к, гла́с 3.

Яко Ангел во пло́ти, на земли́ показа́ся, поще́нием насажде́н бы́в, преподо́бне о́тче Корни́лие, наста́вник и́ноком мно́гим бы́л еси́, сего́ ра́ди вопие́м ти́: моли́ Христа́ Бо́га спасти́ся душа́м на́шим.

Икос:

Ада́м за преступле́ние дре́вле из Еде́ма изгна́н бы́сть, и те́рние и волче́ц пожа́, и, нетле́нен сы́й, в тле́ние впаде́; ты́ же пусты́й ото́к насели́, и пеще́ру не́бо соде́ла, и, тле́нен сы́й, нетле́нную жи́знь насле́дова. Те́мже, притека́юще к ра́це твое́й, благочести́вии лю́дие вопию́т: о́тче Корни́лие, моли́ Христа́ Бо́га спасти́ся душа́м на́шим.

Пе́снь 7.

Ирмос: Отроцы евре́йстии в пещи́ попра́ша пла́мень дерзнове́нно, и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Припев: Преподо́бне о́тче Корни́лие, моли́ Бо́га о нас.

О тебе́, о́тче Корни́лие, хва́лящеся, обоне́жстии лю́дие притека́ют во хра́м Пречи́стыя Богома́тере и вопию́т Рожде́нному от Нея́: благослове́н еси́, Го́споди Бо́же, во ве́ки.

Сла́ва Отцу́ и Сы́ну и Свято́му Ду́ху:

Отрокови́ца, немощно́е о́ко иму́щи, притече́ к ра́це твое́й, с ве́рою моля́щися, и, получи́вши сла́дкий све́т, вопия́ше: благослове́н еси́, Го́споди Бо́же, во ве́ки.

И ны́не и при́сно и во ве́ки веко́в. Ами́нь.

Богородичен: Пресвята́я Де́ва роди́ Сы́на, вся́ку печа́ль потре́бльшаго, к Нему́же вопие́м: благослове́н еси́, Го́споди Бо́же, во ве́ки.

Пе́снь 8.

Ирмос: Богоглаго́ливии о́троцы в пещи́, со огне́м пла́мень попира́юще, поя́ху: благослови́те, дела́ Госпо́дня, Го́спода.

Припев: Преподо́бне о́тче Корни́лие, моли́ Бо́га о нас.

Пла́ванием твои́м Оне́го е́зеро освяти́ся, свя́те, живу́щии же при не́м лю́дие вопию́т: благослови́те, дела́ Госпо́дня, Го́спода.

Припев: Преподо́бне о́тче Корни́лие, моли́ Бо́га о нас.

Живу́щу ти́ в разсе́лине ка́менней, освяти́ся ото́к твои́ми моли́твами, и кинови́я, ра́дующися, с весе́лием вопие́т: благослови́те, дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Стремле́ния плотска́я, тя́жкими вери́гами и по́ясом желе́зным те́ло свое́ неми́лостивно связа́в, увяди́л еси́, поя́: благослови́те, дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богородичен: Кто́ за ны́ мо́лится Вы́шнему та́ко усе́рдно, я́коже Ты́, о Богома́ти! Те́мже вопие́м: да благослови́т предста́тельство Твое́, Госпоже́, Го́спода.

Песнь 9

Ирмос: Воспита́нная во свята́я святы́х и ро́ждшая Све́т вселе́нныя, Благода́тная, ра́дуйся, пе́сньми Рождество́ Твое́ велича́ем.

Припев: Преподо́бне о́тче Корни́лие, моли́ Бо́га о нас.

Уста́ твоя́, о́тче, не преста́ша благослови́ти Бо́га, ру́це же в рукоде́лии и коле́на в поклоне́нии не ослабе́ша никогда́же: те́мже и мы́ Укрепи́вшаго тя́ велича́ем.

Припев: Преподо́бне о́тче Корни́лие, моли́ Бо́га о нас.

Юже получи́ша сла́ву святи́и, возжеле́л еси́ и ты́ причасти́тися тоя́, в не́йже сы́й ны́не, помяни́ и на́с, почита́ющих святу́ю твою́ па́мять.

Припев: Преподо́бне о́тче Корни́лие, моли́ Бо́га о нас.

Земля́, име́ющи тя́, на себе́ живу́ща, ра́довашеся, и не́бо, прие́мшее тя́ в себе́, до́браго раба́ Влады́чня, весели́тся, мы́ же непреста́нно Бо́га велича́ем.

Сла́ва Отцу́ и Сы́ну и Свято́му Ду́ху:

Ра́ка — о́браз подо́бия твоего́; гра́д Пско́в — рожде́ние; пеще́ра — по́двиги; кинови́я — па́стырство; свя́тость — чудеса́ сказа́вше, все́м тя́ пропове́даша.

И ны́не и при́сно и во ве́ки веко́в. Ами́нь.

Богородичен: Юности моея́ не возгнуша́йся, Влады́чице, до конца́ бо о́ная оскверне́на е́сть, но покая́ния сле́зы ми́ да́ждь, и ве́ру мою́ к Тебе́ приими́, и спаси́ мя.

Свети́лен:

Насажде́н Бо́гом посреде́ ото́ка, я́ко фи́никс, о́тче, и пеще́ра израсти́ тя́ на́м, я́ко кри́на благоуха́нна, ра́ка же и о́браз тво́й цельбы́ то́чат всегда́ с ве́рою приходя́щим.

Сла́ва, и ны́не, Богородичен:

В похвалу́ Рождества́ Твоего́ воздви́же хра́м Корни́лий, Тво́й уго́дник, его́же Ты́ спа́сши, просла́вила еси́ во страна́х ру́сских; помози́ и на́м, Богома́ти, бе́дствующим лю́те, и все́х на́с поми́луй.

Стихи́ры, гла́с 8.

О, пресла́вное чу́до! Ко́ль прему́др купе́ц бы́сть Корни́лий и какову́ бога́ту сотвори́ ку́плю, ча́щею ле́са стяжа́ еде́мский ра́й, и ка́менным верте́пом небе́сное Ца́рство насле́дова. О, каковы́й на́м ди́вен оте́ц дарова́ся! Его́же ра́ди, Христе́, спаси́ ду́ши на́ша, я́ко Милосе́рд.

Принеси́те ве́ру, боля́щии, гряди́те, цельбу́ получи́ти и́щущии: се́ бо преподо́бный Корни́лий, я́ко со́лнце, сла́дкий све́т дарова́ и разсла́бленному те́лом ско́рое здра́вие соде́ла. О, каково́ свети́ло Обоне́жстей стране́ дарова́ся! Его́же ра́ди, Христе́, спаси́ ду́ши на́ша, я́ко Милосе́рд.

От шу́ма жите́йских во́лн удали́лся еси́ во о́стров Па́лей, иде́же ни глубина́ страсте́й, ни бу́ря духо́в проти́вных тве́рдости ума́ твоего́, о́тче Корни́лие, не возмо́же поколеба́ти, но, по́двигом до́брым в безмо́лвии подвиза́вся, благоуго́ден Христу́ яви́ся. В ра́дости су́ща пра́ведных, всеблаже́нне, мо́лим тя́, вся́ку печа́ль и го́ресть от ду́ш на́ших отгна́ти, благоче́стно пра́зднующих светоно́сную твою́ па́мять.

В небе́сных су́щи оби́телех, преподо́бне о́тче Корни́лие, Влады́ку все́х моли́ оби́тель сию́ и вся́ гра́ды и страны́ христиа́нския в ми́ре сохрани́ти, Обоне́жския же страны́ и все́х на́с све́том богоразу́мия просвети́ти, да, благоче́стно чту́ще па́мять твою́, после́дуем святы́м стопа́м твои́м.

Сла́ва, гла́с 8.

От пусты́ни ди́вен гра́жданин и от пеще́ры сла́вный чудотво́рец яви́лся еси́, о́тче Корни́лие: живы́й бо в ни́х, подвиза́ся терпели́вно и блаже́нство ра́йское насле́довал еси́, в не́мже ны́не сы́й, лику́я, помина́й на́с, чту́щих твою́ па́мять, и моли́ся о на́с, преподо́бне.

И ны́не, Богородичен:

Влады́чице, приими́ моли́твы ра́б Твои́х и изба́ви на́с от вся́кия ну́жды и печа́ли.

Моли́тва преподо́бному Корни́лию, игу́мену Палеостро́вскому, чудотво́рцу:

О, преподо́бне о́тче на́ш Корни́лие, вели́кий уго́дниче Бо́жий и ско́рый в беда́х предста́телю! Не забу́ди, я́коже обеща́лся еси́, посеща́ти на́с, ча́д свои́х: а́ще бо те́лом от на́с и отше́л еси́, но ду́хом с на́ми пребыва́еши. Мо́лимся у́бо тебе́, о преподо́бне о́тче Корни́лие, бу́ди предста́тель за ны́, гре́шныя рабы́ своя́, ко Го́споду Иису́су Христу́ и Пречи́стей Его́ Богома́тери, Влады́чице на́шей Богоро́дице, да изба́вимся от гла́да, губи́тельства, тру́са, пото́па, огня́ и меча́, от наше́ствия иноплеме́нных и междоусо́бный бра́ни, от напра́сныя сме́рти и от все́х враго́в ви́димых и неви́димых. О, преподо́бне о́тче Корни́лие! Услы́ши на́с, гре́шных рабо́в свои́х, моля́щихся тебе́, изря́днее же в ча́с се́й со слеза́ми припа́дающих к ра́це со святы́м изображе́нием твои́м. Не отри́ни на́с от своего́ заступле́ния, а́ще бо и гре́шнии есмы́, но с ве́рою притека́ем к честно́му твоему́ гро́бу и с любо́вию облобыза́юще честну́ю твою́ ико́ну, уми́льно зове́м: приими́ от на́с, недосто́йных, моли́тву сию́, я́ко кади́ло благово́нное, я́ко же́ртву благоприя́тну, и умерщвле́нныя на́ша ду́ши злы́ми де́лы и по́мыслы оживи́, преподо́бне, и просвети́ на́ша о́чи серде́чныя, я́коже и деви́це Ага́фии исцели́л еси́ десно́е о́ко, и зре́ти сотвори́л, и Бори́су стра́ждущему во сне́ яви́лся еси́, и, от разслабле́ния здра́ва соде́лавши, во и́ноческий о́браз приве́л еси́ его́, та́кожде и на́с, содержи́мых у́зами вра́жиими, и́миже связа́ на́с зло́е на́ше произволе́ние, исто́ргни из глубины́ прегреше́ний на́ших и к пути́ покая́ния наста́ви, и от се́ти диа́воли разреши́ ми́лостивным свои́м предста́тельством. Ами́нь.