19 июня.
Канон преподобному Илариону Новому Далматскому
![Висариону чудотворцу и преподобному Илариону Новому Висариону чудотворцу и преподобному Илариону Новому](img_i/051.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 4:
Бо́же оте́ц на́ших, творя́й при́сно с на́ми по Твое́й кро́тости, не отста́ви ми́лость Твою́ от на́с, но моли́твами и́х в ми́ре упра́ви живо́т на́ш.
Кано́н преподо́бнаго Иларио́на, гла́с 8.
Пе́снь 1.
Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.
Припев: Преподо́бне о́тче Иларио́не, моли́ Бо́га о нас.
В све́т невеще́ственный и разу́мный от тмы́ су́щих веще́й востеки́й, Иларио́не преподо́бне, моли́твами твои́ми к Бо́гу мя́ просвети́.
Припев: Преподо́бне о́тче Иларио́не, моли́ Бо́га о нас.
От младе́нства сса́в доброде́тель, воздержа́ния боле́зньми и по́ты по́стными в му́жа дости́гл еси́ и в ме́ру духо́вную во́зраста Христо́ва.
Сла́ва Отцу́ и Сы́ну и Свято́му Ду́ху:
Страсте́й пучи́ну преше́д и треволне́ния де́монов избе́г, во приста́нище устреми́лся еси́ немо́кренно безстра́стия, о́тче преподо́бне.
И ны́не и при́сно и во ве́ки веко́в. Ами́нь.
Богородичен: Сло́во без ма́тере из Отца́, без отца́ Сего́ напосле́док богому́жно родила́ еси́, еди́на Богома́ти, я́ко превы́шши всея́ тва́ри.
Пе́снь 3.
Ирмос: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й.
Припев: Преподо́бне о́тче Иларио́не, моли́ Бо́га о нас.
Попали́л еси́ у́глем воздержа́ния, преподо́бне, страсте́й те́рние и прохлажда́еши ве́рных мудрова́ния.
Припев: Преподо́бне о́тче Иларио́не, моли́ Бо́га о нас.
Стре́лы изощре́ны доброде́тели стяжа́в ду́хом, я́ко си́лен, уязви́л еси́ се́рдце лю́таго ратобо́рца.
Сла́ва Отцу́ и Сы́ну и Свято́му Ду́ху:
Ору́жием воздержа́ния и моли́твою, я́ко броня́ми, преподо́бне, вооружи́вся, враго́в неви́димых победи́л еси́ полки́.
И ны́не и при́сно и во ве́ки веко́в. Ами́нь.
Богородичен: Ми́лостиву бы́ти ми́, Тя́ молю́, Твои́ми, Влады́чице, дерзнове́ньми, из Тебе́ ро́ждшемуся, в де́нь Су́дный.
Седален Иларио́на, гла́с 4.
Бо́гу освяти́л еси́ твою́ жи́знь, всеблаже́нне, бы́в изря́ден священноде́йственник вои́стинну Христо́в, свяще́нниче. Те́мже по мно́гих по́тех и боле́знех, ра́дуяся, в невеще́ственная преста́вился еси́ селе́ния. И ны́не источа́еши на́м струи́ исцеле́ний.
Пе́снь 4.
Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.
Припев: Преподо́бне о́тче Иларио́не, моли́ Бо́га о нас.
Насажде́н бы́в при вода́х воздержа́ния, о́тче блаже́нне, лоза́ яви́лся еси́ благора́слена, благоче́стия гро́здие предлага́ющая.
Припев: Преподо́бне о́тче Иларио́не, моли́ Бо́га о нас.
Ве́сь боже́ствен бы́в и духоно́сен, ве́сь изше́л еси́ к Бо́гу, Иларио́не всеблаже́нне, те́мже со Ангелы лику́еши при́сно.
Сла́ва Отцу́ и Сы́ну и Свято́му Ду́ху:
На ка́мени ве́ры поста́вил еси́ стопы́ се́рдца твоего́ и непоколеби́мь пре́был еси́, прило́г де́монских не ужаса́яся.
И ны́не и при́сно и во ве́ки веко́в. Ами́нь.
Богородичен: Херуви́м превы́шшую Тя́ и серафи́м пое́м, Пречи́стая: Его́же бо трепе́щут, носи́ла еси́ пло́тию Бо́га на́шего на руку́ Твое́ю.
Пе́снь 5
Ирмос: Утренююще, вопие́м Ти́: Го́споди, спаси́ ны, Ты́ бо еси Бо́г на́ш, ра́зве Тебе́, ино́го не ве́мы.
Припев: Преподо́бне о́тче Иларио́не, моли́ Бо́га о нас.
Око серде́чное неусы́пно в боже́ственных за́поведех соблю́л еси́ незазо́рно, сла́вне.
Припев: Преподо́бне о́тче Иларио́не, моли́ Бо́га о нас.
На го́ру доброде́телей воздержа́нием, богоно́се, де́тельно восте́кл еси́ к боговиде́нию восхожде́ния.
Сла́ва Отцу́ и Сы́ну и Свято́му Ду́ху:
Еле́й расточи́в ни́щим, от се́рдца, Иларио́не преподо́бне, бога́тство небе́сное поче́рпл еси́.
И ны́не и при́сно и во ве́ки веко́в. Ами́нь.
Богородичен: Сло́ва ковче́г Тя́ показа́, Богоро́дице, зако́на Госпо́дь, в о́ньже несказа́нно всели́ся.
Пе́снь 6.
Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.
Припев: Преподо́бне о́тче Иларио́не, моли́ Бо́га о нас.
Мы́сленнаго Голиа́фа, зло́бою вознося́щагося безору́жным твои́м сплете́нием, ве́рно пра́щею уби́л еси́ и сего́, исто́рг победи́тельная ору́жия, я́ко вельми́ хва́лящася, посе́кл еси́.
Припев: Преподо́бне о́тче Иларио́не, моли́ Бо́га о нас.
Вели́кому в доброде́телех поревнова́л еси́ Иларио́ну и, сего́ духо́вно стопа́м возсле́дуя, воздержа́нием, преподо́бне, верхо́вен яви́лся еси́ и ста́ду воображе́ние.
Сла́ва Отцу́ и Сы́ну и Свято́му Ду́ху:
По́ты воздержа́тельными у́глие стре́л врага́ погаси́л еси́ до конца́ и, о́гнь ве́ры вже́г, попали́л еси́ неве́рия ерети́ческая шата́ния.
И ны́не и при́сно и во ве́ки веко́в. Ами́нь.
Богородичен: Зачала́ еси́ вои́стинну Бо́жия Сло́ва во утро́бе Твое́й и Сего́ па́че естества́, Всенепоро́чная, родила́ еси́. Его́же моли́твами умоли́ о и́же вои́стинну Богоро́дицу воспева́ющих Тя́.
Конда́к Иларио́на, гла́с 2.
Огра́ды живоно́сныя твоея́ па́жити, па́стырски невреди́мо ста́до соблю́л еси́ и яви́лся еси́ высото́ю де́л вели́к, но́вый Иларио́не, по благоче́стии мно́ги му́ки и ско́рби прие́м: те́м во всера́достный живо́т всели́лся го́рняго Сио́на, моли́ за ны́, преподо́бне.
Пе́снь 7.
Ирмос: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.
Припев: Преподо́бне о́тче Иларио́не, моли́ Бо́га о нас.
В зла́це вы́шняго Ца́рства ста́до, о́тче, воспита́л еси́ и, жезло́м уче́ний зве́ри отгна́в ерети́ческия, пе́л еси́: оте́ц на́ших Бо́же, благослове́н еси́.
Припев: Преподо́бне о́тче Иларио́не, моли́ Бо́га о нас.
Чуде́с зарю́ просте́р, разоря́еши неду́гующих мглу́ и здра́вия лучи́ подае́ши дне́сь и цельбы́ зову́щим: оте́ц на́ших Бо́же, благослове́н еси́.
Сла́ва Отцу́ и Сы́ну и Свято́му Ду́ху:
В вы́шнюю вше́л еси́ бра́чную трапе́зу Царя́ Христа́, во оде́жду оде́ян, досто́йно зову́щему. Те́м и возле́гл еси́, вопия́: оте́ц на́ших Бо́же, благослове́н еси́.
И ны́не и при́сно и во ве́ки веко́в. Ами́нь.
Богородичен: Па́че естества́ и сло́ва Влады́ку все́х родила́ еси́ и пита́еши от сосцу́ Твое́ю все́м во бла́го вре́мя гото́вящаго трапе́зу. Его́же приле́жно, Пречи́стая, о на́с моли́.
Пе́снь 8.
Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.
Припев: Преподо́бне о́тче Иларио́не, моли́ Бо́га о нас.
Сле́зными струя́ми страсте́й взыгра́ния и неуста́вныя по́мыслы потопи́л еси́ и пучи́на бы́л еси́ долготерпе́ния, преподо́бне, к тишине́ веды́й ти́хостней вопию́щия: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.
Припев: Преподо́бне о́тче Иларио́не, моли́ Бо́га о нас.
Якоже терпели́ва адама́нта, воздержа́нию иму́ще твоя́ наказа́ния, Иларио́не преподо́бне, сердца́ утвержда́ем и страсте́й полки́ побежда́ем, язы́ком ве́рно вопию́ще: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.
Сла́ва Отцу́ и Сы́ну и Свято́му Ду́ху:
Воздержа́нием, преподо́бне, пло́ти благостра́стие удержа́нием изнури́в, прему́дре, испо́лнил еси́ Ду́ха душе́вное де́йство и к безстра́стия стезя́м дости́гл еси́, зовы́й: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.
И ны́не и при́сно и во ве́ки веко́в. Ами́нь.
Богородичен: Под кро́в, Влады́чице, святы́х кри́л Твои́х вси́ прибега́ем, озло́бленнии лю́тыми согреше́нии, и напа́стьми, и скорбьми́. Тя́ бо Предста́тельницу иму́ще, вопие́м: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.
Песнь 9
Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.
Припев: Преподо́бне о́тче Иларио́не, моли́ Бо́га о нас.
Исто́чника тя́ чуде́с я́ко вои́стинну Христо́с показа́, блаже́нне, боле́зненныя скве́рны очища́юща страсте́й и неду́гов боле́зни потопля́юща удо́бь. Те́мже и реку́ тя́ душе́вных очище́ний нарица́ем вси́, преблаже́нне.
Припев: Преподо́бне о́тче Иларио́не, моли́ Бо́га о нас.
Процве́т, я́ко фи́никс, духо́вно в дому́ Бо́жии, пресла́вне, пло́д прине́сл еси́ воздержа́ния, я́коже сла́дость, и́мже сердца́, прему́дре, наслади́л еси́ ста́да твоего́ слове́снаго. Те́мже и венцы́ небе́сныя сла́вы, о́тче, восприя́л еси́, приснопа́мятне.
Сла́ва Отцу́ и Сы́ну и Свято́му Ду́ху:
Воздержа́ния показа́лся еси́, о́тче, пра́вило, и кро́тости яви́лся еси́ о́браз, и ти́х все́м, Иларио́не, наста́вник, и мою́ мольба́ми ко Го́споду укроти́ бу́рю страсте́й и пода́ждь прося́щему глубо́кий ми́р, я́ко да досто́йно ублажа́ю тя́.
И ны́не и при́сно и во ве́ки веко́в. Ами́нь.
Богородичен: Тя́ ору́жие в беда́х и напа́стех, приста́нище и сте́ну в ско́рбех, и щи́т во бране́х и́мамы разу́мный, и вели́ко очисти́лище в лю́тых согреше́ниих и нахожде́ниих. Те́м Тя́, Богоро́дицу, по до́лгу чти́м и велича́ем Рождество́ Твое́.
Молитва
О свяще́нная главо́, преподо́бне о́тче, преблаже́нне о́тче Иларио́не, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Висариону чудотворцу и преподобному Илариону Новому Висариону чудотворцу и преподобному Илариону Новому](img_b/051.jpg)