19 июня.

Канон преподобному Висариону чудотворцу обители Далматския

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Бо́же оте́ц на́ших, творя́й при́сно с на́ми по Твое́й кро́тости, не отста́ви ми́лость Твою́ от на́с, но моли́твами и́х в ми́ре упра́ви живо́т на́ш.

Кано́н свята́го Висарио́на. Творе́ние Ио́сифово, гла́с 2.

Пе́снь 1.

Ирмос: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися.

Припев: Преподо́бне о́тче Висарио́не, моли́ Бо́га о нас.

Пое́т Бо́гу Це́рковь, лику́ющи в па́мяти твое́й дне́сь, богодохнове́нне Висарио́не, и ве́рою сла́вит вели́кия, о́тче, по́двиги твоя́.

Припев: Преподо́бне о́тче Висарио́не, моли́ Бо́га о нас.

Ра́б Бо́гу я́влься, порабо́тил еси́ душе́вными си́лами стра́сти теле́сныя и свобо́дь вся́кия зло́бы яви́лся еси́, о́тче всечу́дне.

Сла́ва Отцу́ и Сы́ну и Свято́му Ду́ху:

Украси́вся добро́тами по́двиг твои́х, сосу́д яви́лся еси́ благопотре́бен Боже́ственнаго Ду́ха, Того́ де́йствия вмеща́ющь, Висарио́не блаже́нне.

И ны́не и при́сно и во ве́ки веко́в. Ами́нь.

Богородичен: Ду́ш льсте́ц мя́ привлече́ в поги́бельный ро́в, но мне́ простри́ держа́вную Твою́ ру́ку и ско́ро, Богоро́дице, к све́ту возведи́.

Пе́снь 3.

Ирмос: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́бося ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди.

Припев: Преподо́бне о́тче Висарио́не, моли́ Бо́га о нас.

Возше́л еси́ на высоту́ безстра́стия, вше́л еси́ во мра́к боговиде́ния, прия́л еси́ в се́рдцы твое́м боже́ственный зако́н, и́мже укре́плься, свети́льник пресве́тел мона́шествующих, преподо́бне, бы́л еси́.

Припев: Преподо́бне о́тче Висарио́не, моли́ Бо́га о нас.

Плодови́тая ма́слина, в дому́ боже́ственнем я́ве насажде́н, яви́лся еси́, о́тче, еле́ем по́двигов твои́х умасти́ на́ша ли́ца, восхваля́ющих твоя́, Висарио́не преподо́бне, чудеса́.

Сла́ва Отцу́ и Сы́ну и Свято́му Ду́ху:

Нестяжа́тельно пожи́в, блаже́нне, житие́, пти́цам подо́бно, о́тче, кри́лы же облегча́емь безстра́стия, вы́шния дости́гл еси́ оби́тели, ра́дуяся, сего́ ра́ди ве́рою тя́ ублажа́ем.

И ны́не и при́сно и во ве́ки веко́в. Ами́нь.

Богородичен: Ле́ностно живо́т мо́й изжи́в и страстьми́ се́рдце оскверни́в, приступа́ю к Тебе́, Влады́чице, умиле́нием души́ и молю́ся уще́дрити и спасти́ мя, покая́ния о́бразы мя́ утве́рждши.

Седа́лен Висарио́на, гла́с 1.

Воздержа́ния огне́м попали́в стра́сти, свеща́ светла́ безстра́стия яви́лся еси́, тму́ ду́ш на́ших отгоня́щи благода́тию. Те́мже дне́сь светоно́сную твою́ па́мять пра́зднуем весе́лием се́рдца, Висарио́не, о́тче на́ш.

Сла́ва, И ны́не, Богородичен:

Де́во Всенепоро́чная, Яже Пресу́щнаго Бо́га ро́ждшая, со безпло́тными Того́ непреста́нно моли́ оставле́ние прегреше́ний и исправле́ние жития́ да́ти на́м пре́жде конца́, ве́рою и любо́вию пою́щим Тя́ по до́лгу, еди́на Всепе́тая.

Пе́снь 4.

Ирмос: Пою́ Тя, слу́хом бо, Го́споди, услы́шах и ужасо́хся: до мене́ бо и́деши, мене́ ища́, заблу́ждшаго. Те́м мно́гое Твое́ снизхожде́ние, е́же на мя́, прославля́ю, Многоми́лостиве.

Припев: Преподо́бне о́тче Висарио́не, моли́ Бо́га о нас.

Ка́пли исцеле́ний прия́л еси́ от пучи́ны благода́тей, отсю́ду преложи́л еси́ во́ду морску́ю моли́твою твое́ю, му́дре, на сла́дость, исцеля́я ученику́ твоему́ жа́жду, досточу́дне.

Припев: Преподо́бне о́тче Висарио́не, моли́ Бо́га о нас.

Ника́коже да́же до ста́рости оскуде́л еси́, в житии́, богому́дре о́тче, в пусты́нях и гора́х заблужда́я хоте́нием, ища́й Бо́га, светлостьми́ па́че у́мных чуде́с тя́ просве́щша.

Сла́ва Отцу́ и Сы́ну и Свято́му Ду́ху:

Бы́л еси́ смире́н и охужде́н, возноси́мь безстра́стием. Те́мже разрази́л еси́ возноше́ния де́монов, свети́льник мона́шествующих, о́тче, бы́в, благоче́стно ве́рою восхваля́ющих тя́.

И ны́не и при́сно и во ве́ки веко́в. Ами́нь.

Богородичен: Стра́сти души́ моея́ исцели́, возраста́ющия ми́ преокая́нно, по́мысл просвети́, дале́че отгоня́щи тму́, Чи́стая, де́монов, оскорбля́ющих мя́ и всегда́ се́ти де́лающих ми́.

Пе́снь 5

Ирмос: Просвеще́ние во тме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ ми́ра, просвети́ мя сия́нием Твои́м, ино́го бо ра́зве Тебе́ Бо́га не зна́ю.

Припев: Преподо́бне о́тче Висарио́не, моли́ Бо́га о нас.

Просвеще́ние, все́льшееся, преблаже́нне, Уте́шителя вну́трь души́ твоея́, веду́щую к Ца́рству показа́ стезю́, в не́йже ше́ствуя, де́монов ловле́ния и помраче́ния душе́внаго уклони́лся еси́.

Припев: Преподо́бне о́тче Висарио́не, моли́ Бо́га о нас.

Но́в я́влься Иису́с, богоно́се, со́лнца тече́ние уста́вил еси́ мольбо́ю светосия́нною, боже́ственными словесы́ украша́емь, блаже́нне, и чуде́с заре́ю просвеща́емь, и Бо́жиими чудесы́ мно́гими удобря́емь.

Сла́ва Отцу́ и Сы́ну и Свято́му Ду́ху:

В кни́зе живо́тней написа́лся еси́ досто́йно, напи́санная вся́ сконча́в в боже́ственных кни́гах. Те́мже вопию́ ти: рукописа́ние, о́тче, зо́л мои́х твои́ми расто́ргни ко Всеви́дцу Бо́гу мольба́ми.

И ны́не и при́сно и во ве́ки веко́в. Ами́нь.

Богородичен: Стопа́м после́дуя, собо́р преподо́бных, из чре́ва Твоего́ Возсия́вшему неизрече́нным рождество́м, Де́во Ма́ти, с небе́сными ли́ки сочта́ся, с ни́миже моли́ся и испроси́ на́м очище́ние, чту́щим Тя́.

Пе́снь 6.

Ирмос: Ко Го́споду от ки́та Ио́на возопи́: Ты́ мя возведи́ из глубины́ а́да, молю́ся, да я́ко Изба́вителю, во гла́се хвале́ния, и́стины же ду́хом пожру́ Тебе́.

Припев: Преподо́бне о́тче Висарио́не, моли́ Бо́га о нас.

Не оскуде́л еси́, мно́гим приближа́яся подвиго́м: ноще́й бо, преподо́бне, и дне́й четы́редесять пребы́л еси́ стоя́, непрекло́нен ну́ждными ну́ждами естества́.

Припев: Преподо́бне о́тче Висарио́не, моли́ Бо́га о нас.

Умертви́в твоя́ у́ды, я́же на земли́, чу́дне, живы́м де́йством исцеле́ния обогати́лся еси́ и живе́ши на небесе́х, умерщвля́ющих всегда́ ду́ш на́ших стра́сти исцеля́я.

Сла́ва Отцу́ и Сы́ну и Свято́му Ду́ху:

Житие́ твое́, рыда́я, при́сно сконча́л еси́: жела́ние бо боже́ственное тя́, о́тче, вну́трь распали́. И ны́не на небесе́х обре́л еси́ утеше́ние, с преподо́бными ли́ки совокупля́яся.

И ны́не и при́сно и во ве́ки веко́в. Ами́нь.

Богородичен: Госпо́дь из Тебе́ пло́тию ражда́ется, все́х Госпожу́ Тя́ тва́рей соде́лав, Его́же моли́, Чи́стая, облада́ющаго изба́вити врага́ ду́ши на́ша.

Конда́к Висарио́на, гла́с 2.

Вы́шних си́л подража́в, преподо́бне, о́бразом пти́ц житие́ пожи́л еси́, вре́менная в забы́тии положи́в, непреста́нным жела́нием влеко́м к небе́сным добро́там Христа́ Царя́, до́ндеже Того́ дости́гл еси́, Висарио́не, моли́ непреста́нно о все́х на́с.

Пе́снь 7.

Ирмос: Те́лу злато́му прему́дрыя де́ти не послужи́ша, и в пла́мень са́ми поидо́ша, и бо́ги и́х обруга́ша, среди́ пла́мене возопи́ша и ороси́ я́ Ангел: услы́шася уже́ у́ст ва́ших моли́тва.

Припев: Преподо́бне о́тче Висарио́не, моли́ Бо́га о нас.

Обнови́в ду́шу воздержа́ния благочести́вым, о́тче, ра́лом, кла́с многопло́ден возде́лал еси́, в жи́тницах соблюда́емь небе́сных, и пита́еши ве́рно воспева́ющия: благослове́н еси́, Го́споди, Бо́же оте́ц на́ших.

Припев: Преподо́бне о́тче Висарио́не, моли́ Бо́га о нас.

Све́ту сраствори́вся невеще́ственному, чи́ст све́т бы́л еси́ и быстрину́ речну́ю преше́л еси́, омочи́в ника́коже стопы́ твоя́: по стезя́м же пра́вым, богому́дре Висарио́не, ходи́л еси́, греха́ му́тныя изсуши́в во́ды.

Сла́ва Отцу́ и Сы́ну и Свято́му Ду́ху:

О, чу́до стра́шно! Ка́ко непива́емыя иногда́ во́ды пие́мы сотвори́л еси́ боже́ственным назнамена́нием и речну́ю быстрину́ преше́л еси́, тече́ние же удержа́л еси́ со́лнечное, Висарио́не богому́дре, богозна́мении свяще́нными велича́емь.

И ны́не и при́сно и во ве́ки веко́в. Ами́нь.

Богородичен: Му́дрость Бо́жия Ипоста́сная из Тебе́, Чи́стая, роди́ся, и злове́рныя мудрецы́ потреби́, и умудри́ мно́жество мона́шествующих и преподо́бных воспева́ти благода́тию: Благослове́нная, Яже Бо́га пло́тию ро́ждшая.

Пе́снь 8.

Ирмос: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки.

Припев: Преподо́бне о́тче Висарио́не, моли́ Бо́га о нас.

Све́т тебе́ возсия́ я́ве, я́коже пра́веднику, и ра́дость, и весе́лие, я́ко пла́кавшу, о́тче, на земли́ приле́жно и стра́нну сея́ бы́вшу нестяжа́нием и вся́цем злострада́нием.

Припев: Преподо́бне о́тче Висарио́не, моли́ Бо́га о нас.

Ве́сь отню́д сраствори́вся коне́чными жела́нии, преподо́бне о́тче, гра́ды же и пусты́ни во умиле́нии мно́зе прохожда́л еси́, до́ндеже митропо́лию дости́гл еси́ вы́шнюю, све́тло украша́емь.

Сла́ва Отцу́ и Сы́ну и Свято́му Ду́ху:

Утро возсия́л еси́ на́м све́тлыми доброде́тели просвеще́нии, на́ша мы́сли просвеща́я при́сно. Те́мже твою́ светоно́сную дне́сь, о́тче Висарио́не, соверша́ем па́мять.

И ны́не и при́сно и во ве́ки веко́в. Ами́нь.

Богородичен: Но́ва родила́ еси́ Сы́на, Собезнача́льна, Чи́стая, Отцу́ Безнача́льному, и обнови́ла еси́ еди́на обетша́вшее на́ше естество́ лю́тыми преступле́нии, те́мже Тя́ согла́сно пое́м, Богоро́дице.

Песнь 9

Ирмос: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем.

Припев: Преподо́бне о́тче Висарио́не, моли́ Бо́га о нас.

Кре́пости низложи́л еси́ льсти́ваго, кре́постию препоя́сан духо́вною, и яви́лся еси́ си́лен на стра́сти, преблаже́нне, сего́ ра́ди чуде́с благода́ти прие́м от Бо́га, ве́рным исцелева́еши неисце́льныя неду́ги.

Припев: Преподо́бне о́тче Висарио́не, моли́ Бо́га о нас.

Яви́ся твоя́ ве́лия сла́ва, я́же по Бо́зе, все́й тва́ри, просвеща́я ве́рныя свяще́нными уподобле́нии непоро́чнаго твоего́ жития́, богому́дре Висарио́не, вои́стинну мона́хов украше́ние и отце́в верхо́вниче.

Припев: Преподо́бне о́тче Висарио́не, моли́ Бо́га о нас.

Стеня́, пла́ча и се́туя, умиле́нием сле́зным кропя́ зе́млю при́сно, о́тче богому́дре, соверша́л еси́, до́ндеже обре́л еси́ боже́ственное утеше́ние, во гра́де Бо́жии со все́ми святы́ми, преподо́бне, всели́вся.

Сла́ва Отцу́ и Сы́ну и Свято́му Ду́ху:

Процве́л еси́, о́тче, я́ко кри́н, доброде́тельными благово́нии на́ша облагово́нствуя ду́ши. Те́мже сотворя́ем па́мять твою́, злосмра́дия согреше́ний про́сим изба́витися тебе́ ра́ди, Висарио́не, и вся́каго де́монскаго озлобле́ния.

И ны́не и при́сно и во ве́ки веко́в. Ами́нь.

Богородичен: Умовре́дно согреша́я, неиспра́влен пребыва́ю, мно́гим нечу́вством объюроде́в. Те́мже зову́ Ти, Влады́чице: в такове́й ну́жди су́ща посети́ мя ны́не и уврачу́й стра́сти смире́ннаго се́рдца моего́.

Молитва

О свяще́нная главо́, преподо́бне о́тче, преблаже́нне о́тче Висарио́не, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.