18 июня.

Канон второй преподобному Петру Коришскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь преподобнаго, гла́с 1:

Пусты́нный жи́тель, и в телеси́ Ангел, и чудотво́рец яви́лся еси́, богоно́се о́тче на́ш Пе́тре: посто́м, бде́нием, моли́твою небе́сная дарова́ния прии́м, исцеля́еши неду́жныя и ду́ши ве́рою притека́ющих ти́. Сла́ва Да́вшему тебе́ кре́пость, сла́ва Венча́вшему тя́, сла́ва Де́йствующему тобо́ю все́м исцеле́ния.

Кано́н иной свята́го, гла́с 4.

Пе́снь 1.

Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Припев: Преподо́бне о́тче Пе́тре, моли́ Бо́га о нас.

Трисо́лнечным све́том просвети́вся му́дре, озаря́я твою́ мы́сль, бесо́в же помрача́я зла́я шата́ния, я́ко бо паучи́ну звере́й наси́лования вменя́я, боже́ственным разжига́емь жела́нием, о́тче преподо́бне.

Припев: Преподо́бне о́тче Пе́тре, моли́ Бо́га о нас.

Все́ жела́ние ко Го́споду возложи́в от ю́ности, и к Нему́ востече́ ра́дуяся, плотска́я взыгра́ния до конца́ увяди́л еси́, и страсте́й вся́ нахо́ды, воздержа́нием украси́лся еси́, Пе́тре богоно́се, прехва́льне.

Сла́ва Отцу́ и Сы́ну и Свято́му Ду́ху:

Победи́в и́же плодо́м, скве́рнаго зми́я попра́л еси́, и того́ се́ти легко́ кресто́м боже́ственным премину́л еси́, благоче́стия крилы́ впери́вся, о́тче, живо́т же, ра́дуяся, прия́л еси́ от са́да кре́стнаго.

И ны́не и при́сно и во ве́ки веко́в. Ами́нь.

Богородичен: Содержа́й концы́ земли́, я́ко Бо́г, Твои́ма рука́ма, Чи́стая, держи́мь е́сть, описа́нием те́ла, Иже Боже́ственным зра́ком Неопи́санный.

Пе́снь 3.

Ирмос: Твоя́ песносло́вцы, Богоро́дице, живы́й и незави́стный Исто́чниче, ли́к Себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би.

Припев: Преподо́бне о́тче Пе́тре, моли́ Бо́га о нас.

Кре́пкими прило́ги бесо́вскими и зве́рскими о́бразы устраша́емь, о те́х немощне́й си́ле неради́л еси́, кре́пкаго бо име́яше во бране́х Христа́ засту́пника, преподо́бне о́тче Пе́тре, всеблаже́нне.

Припев: Преподо́бне о́тче Пе́тре, моли́ Бо́га о нас.

Ум влады́ку над страстьми́ поста́вил еси́, пребога́те Пе́тре, вене́чник преди́вен я́влься, и́бо ху́дшее, му́дре, лу́чьшему повину́л еси́, те́мже я́ко фи́никс, о́тче, в пусты́нях процве́л еси́.

Сла́ва Отцу́ и Сы́ну и Свято́му Ду́ху:

Ника́коже сна́ твои́ма очи́ма по́дал еси́, сего́ ра́ди хра́м яви́ся Пресвяте́й Тро́ице, прему́дрости сокро́вищем ми́р обогати́л еси́, преблаже́нне о́тче.

И ны́не и при́сно и во ве́ки веко́в. Ами́нь.

Богородичен: Пресвята́я Де́во, Ма́ти Христа́ Бо́га на́шего, приими́ моле́ние рабо́в Твои́х и изба́ви на́с от вся́каго наси́лия вра́жия.

Седа́лен, гла́с 8.

Ду́шу твою́ связа́в любо́вию Христо́вою, земна́я вся́ возненави́дев, му́дре, водвори́лся же еси́, о́тче преподо́бне, в пусты́нях и гора́х. Разу́мнаго бо оби́лия вкуша́я, сла́вне, я́ко от незаходи́мых, таи́нниче, просия́л еси́ Ангельски, те́мже и мра́к проше́д пло́ти твоея́, тму́ отгна́л еси́ и бе́сы ужаси́л еси́, богоно́се преблаже́нне Пе́тре, моли́ Христа́ Бо́га грехо́в оставле́ние пода́ти, чту́щим любо́вию святу́ю па́мять твою́.

Сла́ва, и ны́не, Богородичен:

Небе́сную две́рь и киво́т, всесвяту́ю го́ру, светоза́рный о́блак воспои́м, небе́сную ле́ствицу, слове́сный ра́й, Евино избавле́ние, вселе́нныя всея́ вели́кое сокро́вище, я́ко спасе́ние в Не́й соде́лася ми́рови и оставле́ние дре́вних согреше́ний. Сего́ ра́ди вопие́м Ти́: моли́ся Сы́ну Твоему́ и Бо́гу прегреше́ний оставле́ние дарова́ти, благоче́стно покланя́ющимся Всесвято́му Рождеству́ Твоему́.

Пе́снь 4.

Ирмос: Седя́й в сла́ве на Престо́ле Божества́ во о́блаце ле́гце, при́иде Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

Припев: Преподо́бне о́тче Пе́тре, моли́ Бо́га о нас.

Иже на тя́, о́тче, лю́те разсвире́пев прелука́вый зми́й, потребле́н бы́сть, я́коже Авиро́н, моли́твою твое́ю, тебе́ бо неви́димо Боже́ственная благода́ть осеня́ет духо́вне, мно́гим подая́ исцеле́ния, всеблаже́нне Пе́тре, богому́дре.

Припев: Преподо́бне о́тче Пе́тре, моли́ Бо́га о нас.

Душе́вное чи́сте устрое́ние и разшире́ние, Боже́ственными виде́ньми, вмести́вся в сию́ пусты́ню, стяжа́л еси́. Боже́ственным же да́ром, цельбы́ мно́гия творя́, подо́бник бы́в твоему́ Влады́це, о́тче преподо́бне.

Сла́ва Отцу́ и Сы́ну и Свято́му Ду́ху:

Ве́сь Бо́гови освяти́вся, Пе́тре, еди́н Еди́ному совокупля́яся, прему́дре, доброде́тельми приближа́яся Ему́, мно́гих даро́в от Него́ сподобля́емь.

И ны́не и при́сно и во ве́ки веко́в. Ами́нь.

Богородичен: Бо́га из Тебе́ воплоще́ннаго моли́ непреста́нно, Иже в Тебе́ пребы́вша естество́м ра́вна Отцу́, и Ду́хови единосу́щна. Те́м Тя́, я́ко Ма́терь Соде́теля, ублажа́ем.

Пе́снь 5

Ирмос: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая.

Припев: Преподо́бне о́тче Пе́тре, моли́ Бо́га о нас.

Бо́гом да́нная ти́ благода́ть, преподо́бне, богодохнове́нне прослу́ся повсю́ду, подая́ исцеле́ния все́м ве́рою прося́щим: я́ве творя́щи чудесе́м явле́ния, Боже́ственным де́йством.

Припев: Преподо́бне о́тче Пе́тре, моли́ Бо́га о нас.

Неукло́нною мы́слию к тебе́ Жела́емому простира́яся, от Него́же благода́ть чуде́с прие́м, исцеле́ние подава́я неду́гом, ве́рою притека́ющим к ра́це моще́й твои́х, о́тче преподо́бне.

Припев: Преподо́бне о́тче Пе́тре, моли́ Бо́га о нас.

Исцеле́ний благода́ть тебе́ даде́ся разли́чныя прогони́ти неду́ги: естество́ бо победи́в, о́тче, па́че естества́ даро́в сподо́бися, Ду́ха Боже́ственнаго благода́тию.

Сла́ва Отцу́ и Сы́ну и Свято́му Ду́ху:

Ум тво́й воззре́нием е́же к Бо́гу, о́тче, просвеща́емь, богови́ден ве́сь бы́л еси́, я́коже зерца́ло Боже́ственнаго Ду́ха невеще́ственно, явле́ние бу́дущих бла́г прие́мля.

И ны́не и при́сно и во ве́ки веко́в. Ами́нь.

Богородичен: Тебе́ сте́ну иму́ще, заступле́нием Твои́м соблюда́емся, Твое́ю же боже́ственною сла́вою хва́лящеся, Тя́, Де́во, ублажа́ем.

Пе́снь 6.

Ирмос: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Припев: Преподо́бне о́тче Пе́тре, моли́ Бо́га о нас.

Прему́дрости поро́д яви́вся, нача́ло прему́дрости возжеле́л еси́ — стра́х Бо́жий, укрепля́емь к соверше́нию вме́стному челове́ком, о́тче, дости́гл еси́.

Припев: Преподо́бне о́тче Пе́тре, моли́ Бо́га о нас.

Любо́вь к Бо́гу и бли́жнему стяжа́в, зако́на и проро́ков исполня́я глави́зну, преиму́щую во все́м неоску́дно доброде́тель, о́тче, испра́вил еси́.

Сла́ва Отцу́ и Сы́ну и Свято́му Ду́ху:

Иму́ще тя́ к Бо́гу моли́твенника кре́пка, всеблаже́нне Пе́тре, предста́теля же во вся́ких ну́ждах и засту́пника те́пла, от вся́ких бе́д спасе́мся, приснопа́мятне.

И ны́не и при́сно и во ве́ки веко́в. Ами́нь.

Богородичен: Спа́са и Изба́вителя, Бо́га все́х и Го́спода, Де́во, ро́ждши пло́тию, на́м прибли́жшася, спаси́ от бе́д, призыва́ющих Тя́, Пречи́стая Влады́чице.

Конда́к, гла́с 2:

Удали́в себе́ челове́ческаго сожи́тельства, в пеще́рах ка́менных и разсе́линах пожи́л еси́, жела́нием боже́ственным и любо́вию, Пе́тре, Го́спода твоего́. От Него́же вене́ц прия́л еси́, моли́ непреста́нно спасти́ся на́м.

Икос:

Христо́в гла́с улы́шав, ше́ствовал еси́ всле́д Того́ за́поведей, отве́рг жите́йская попече́ния и пристра́стия мирска́я и, стяжа́в любо́вь, еди́н в пусты́нях бесе́дуя Бо́гови чи́сте, ра́зума дарова́ние прия́л еси́. Еже ми́ посли́, в пе́снех пою́щему ти́: моли́ непреста́нно спасти́ся на́м.

Пе́снь 7.

Ирмос: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Припев: Преподо́бне о́тче Пе́тре, моли́ Бо́га о нас.

В гора́х — я́ко во граде́х, в де́брех — я́ко в до́мех пребыва́я, сла́дкую пи́щу и питие́, по́ст со слеза́ми себе́ предлага́я, и ны́не со Ангелы на небесе́х ве́чныя пи́щи досто́йно, Пе́тре, насыща́ешися.

Припев: Преподо́бне о́тче Пе́тре, моли́ Бо́га о нас.

Нагото́ю, о́тче, удруча́емь, о оде́жде теле́сней не попе́чся; поуче́нием бо Христа́ твоего́, ра́дуяся, на кри́ны у́мно взира́я, бу́дущих добро́т оде́жди возжделе́л еси́, и́хже ны́не прие́мля, весели́шися.

Сла́ва Отцу́ и Сы́ну и Свято́му Ду́ху:

Хвалы́ тще́тныя бе́гая, в пусты́нях кры́яся, Бо́гу еди́ному ве́домь, и ны́не я́вственно чуде́с благода́ть твори́ти, тебе́ дарова́л е́сть.

И ны́не и при́сно и во ве́ки веко́в. Ами́нь.

Богородичен: Засту́пницу Тя́ и сте́ну необори́мую, Богома́ти Чи́стая, иму́ще раби́ Твои́ всегда́, ве́рою вопие́м Ти́: ра́дуйся, Руководи́тельнице ве́рных к Бо́гу и Покро́ве душа́м на́шим.

Пе́снь 8.

Ирмос: Отроки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Припев: Преподо́бне о́тче Пе́тре, моли́ Бо́га о нас.

На стене́ пребы́л еси́, псало́мски, я́ко пти́ца осо́бящаяся на зде́, ве́сь де́нь поноси́мь враги́ и бори́мь, терпе́нием же горды́ню и́х низложи́л еси́, Христу́ укрепля́ющу тя́.

Припев: Преподо́бне о́тче Пе́тре, моли́ Бо́га о нас.

Сла́дость духо́вная, Иже на́с ра́ди же́лчи вкуси́вый, укрепи́ тя́, го́рькая бы́лия, Его́ ра́ди сла́достне я́сти, до́ндеже благода́тию Его́ в ма́нну претвори́шася.

Сла́ва Отцу́ и Сы́ну и Свято́му Ду́ху:

Пеще́ра твоя́, преподо́бне, Боже́ственная це́рковь устро́ися, мироизли́тием ти́ освя́щшиися, ду́ши умаща́ющии, с ве́рою в ню́ притека́ющих и пою́щих свято́е твое́ торжество́, приснопа́мятне.

И ны́не и при́сно и во ве́ки веко́в. Ами́нь.

Богородичен: Ору́жие, е́же дре́вле обраща́емо, плещи́ ны́не, Де́во, дае́т: я́ко Бо́га Сло́ва родила́ еси́, пло́тию обложе́ннаго, во двою́ же естеству́ разумева́ема, Его́же трепе́щут Ангельстии чи́нове, и земни́и славосло́вим во вся́ ве́ки.

Песнь 9

Ирмос: Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Припев: Преподо́бне о́тче Пе́тре, моли́ Бо́га о нас.

Христо́вы стра́сти помина́я, Пе́тре, кре́пко сраспя́лся еси́ Ему́, блаже́нне, те́мже и прича́стник Боже́ственныя сла́вы Его́, я́ве сподо́бися.

Припев: Преподо́бне о́тче Пе́тре, моли́ Бо́га о нас.

Ели́ко от ни́щаго ми́ ума́ посты́жно, хвале́ния пе́снь приими́, преподо́бне, и ми́лость от Христа́ испроси́, моля́щися Ему́, в покая́нии до́бре пожи́ти на́м. И та́ко к себе́ оте́чески на́с приими́, а́ще и вели́ко е́сть проси́мое.

Припев: Преподо́бне о́тче Пе́тре, моли́ Бо́га о нас.

Наста́ светоно́сный тво́й пра́здник, преблаже́нне о́тче, испо́лнь ра́дости и весе́лия духо́внаго, испо́лнь благоуха́ния и свяще́ния, ны́не иму́ще тя́ воздержа́ния пра́вило, и твердотерпели́ва стоя́теля, Пе́тре преподо́бне и равноа́нгельне.

Сла́ва Отцу́ и Сы́ну и Свято́му Ду́ху:

Благоуха́ет твоя́ ра́ка духо́вное благово́ние, преподо́бне о́тче Пе́тре, бога́тно веселя́щи твоя́ сы́ны; моли́ о пою́щих тя́ любо́вию, и помина́ющия, блаже́нне, Ангельское твое́ пребыва́ние, и тебе́ да́нную све́тлость и сла́ву, и присносу́щную красоту́.

И ны́не и при́сно и во ве́ки веко́в. Ами́нь.

Богородичен: Яко все́х превы́шши земноро́дных несравне́нными, Чи́стая, пе́рвенствы: Бо́га бо, все́х тва́рей Творца́, во утро́бу Твою́ вмести́ла еси́. Того́ моли́, я́ко Ми́лостива, единомышле́ние, ми́р и благостоя́ние ти́хое Це́рквам дарова́ти.

Свети́лен:

Пусты́ню гра́д сотвори́л еси́ любому́дрыми нра́вы, отце́в красото́, Пе́тре, о́тче богому́дре, и сию́ соверши́л еси́ мы́сленный ра́й, цвету́щь цве́ты боже́ственными, единонра́вных мно́жества, досто́йно соверша́ющих твою́ честну́ю па́мять.

Сла́ва, и ны́не, Богородичен:

Яко иму́щи сострада́тельное и ми́лость ве́лию, при́зри, Всепе́тая Богоро́дице Де́во, на мое́ смире́ние, и страсте́й молву́, и собла́знов жития́ разори́, Отрокови́це, и огня́ гее́нскаго изба́ви мя́ моли́твами Твои́ми.

Молитва

О свяще́нная главо́, преподо́бне о́тче, преблаже́нне о́тче Пе́тре, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.