18 июня.

Канон страстотерпцу благоверному великому князю Игорю Черниговскому и Киевскому, в крещении Георгию.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Наста́ дне́сь всечестна́я па́мять страстоте́рпца, благове́рнаго кня́зя Игоря, созыва́ющая лю́ди в пречестны́й хра́м Спа́сов, иде́же, ра́достно соше́дшеся, благочести́вых мно́жество моли́твенно пра́зднуют святу́ю па́мять твою́ и с ве́рою взыва́ют ти́: моли́ся, свя́те, стране́ Росси́йстей, гра́ду Черни́гову и все́м правосла́вным христиа́ном в ми́ре и благоде́нствии спасти́ся.

Велича́ние:

Велича́ем тя́, страстоте́рпче святы́й, кня́же Игоре, и чте́м святу́ю па́мять твою́, ты́ бо мо́лиши о на́с Христа́, Бо́га на́шего.

Кано́н свята́го, гла́с 8.

Пе́снь 1.

Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припев: Благове́рный кня́же Игоре, моли́ Бо́га о нас.

Во́ду нече́стия тиме́нну оста́вивши, к воде́ чисти́тельней прите́кл еси́, свя́те Игоре, и на́ша очи́сти сердца́ чи́сто пе́ти твоя́ страда́ния.

Припев: Благове́рный кня́же Игоре, моли́ Бо́га о нас.

Водо́ю креще́ния омы́вшись, перворо́днаго греха́ изба́вился еси́ и чи́стому Влады́це Христу́ присво́ился еси́, Ему́же и на́с чи́сто присво́й моли́твами твои́ми.

Сла́ва Отцу́ и Сы́ну и Свято́му Ду́ху:

В воде́ Потопи́вшему зми́я лука́ваго подо́бящися, кро́вию твое́ю страда́льческою вра́жию погрузи́л еси́ си́лу, страстоте́рпче, от него́же и на́м изба́витися Спа́са умоли́.

И ны́не и при́сно и во ве́ки веко́в. Ами́нь.

Богородичен: Во́ду сле́з очища́ющую, Пречи́стая, пода́ждь ми́ и, очи́стивши мя́ от ка́ла беззако́ний, чи́ста предста́ви, Богороди́тельнице, Сы́ну Твоему́ и Бо́гу.

Пе́снь 3.

Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Припев: Благове́рный кня́же Игоре, моли́ Бо́га о нас.

Небе́снаго кру́га Верхотво́рцу все́ житие́ свое́ отда́вши, возлюби́л еси́ Того́ до конца́; сподо́би и на́с моли́твами твои́ми, страстоте́рпче, люби́ти Го́спода до конца́ дне́й на́ших.

Припев: Благове́рный кня́же Игоре, моли́ Бо́га о нас.

Небе́сныя жи́зни жела́я, в земне́м житии́ твое́м вся́ пренебре́гл еси́; сподо́би и на́с, свя́те, моли́твами твои́ми небе́сныя жи́зни сподо́битися.

Сла́ва Отцу́ и Сы́ну и Свято́му Ду́ху:

Небе́снаго черто́га жела́ющи, чистоту́ де́вства твоего́ соблю́л еси́ и ны́не с де́вственники в небе́сных черто́зех лику́еши.

И ны́не и при́сно и во ве́ки веко́в. Ами́нь.

Богородичен: Небе́снаго Творца́, Богоро́дице Всепе́тая, ро́ждши, небе́с простра́ннейшая яви́лася еси́; мене́ от простра́ннаго пути́ поги́бельна укло́нши, на небе́сный пу́ть наста́ви, молю́ся.

Седа́лен, гла́с 5:

Доброде́тельными светлостьми́ просвеща́емь и муче́ния све́том украша́емь, па́че со́лнца, прему́дре, сия́еши тве́рде и просвеща́еши вои́стину творя́щих ве́рно па́мять твою́ светоно́сную, пресла́вный страстоте́рпче Игоре, спаса́й моли́твами твои́ми.

Сла́ва, и ны́не, Богородичен:

Ужа́сно чу́до зача́тия и несказа́нен о́браз Рождества́ в Тебе́ позна́ся, Присноде́во Чи́стая, ужаса́ет мо́й у́м и удивля́ет помышле́ние, сла́ва Твоя́, Богоро́дице, во все́х простре́ся, ко спасе́нию ду́ш на́ших.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Благове́рный кня́же Игоре, моли́ Бо́га о нас.

Услы́шав, Игоре, небеса́ пове́дающа сла́ву Бо́жию, на земли́ Бо́га сла́вити возжеле́л еси́, Его́же сла́вы и на́с сподо́би.

Припев: Благове́рный кня́же Игоре, моли́ Бо́га о нас.

Услы́шав, я́ко врази́ твои́ воста́ша на тя́, не убоя́лся еси́ свире́пства и́х, но кро́тце в ру́це и́х скве́рныя вда́лся еси́, Го́сподеви взыва́я: не поста́ви и́м греха́ сего́.

Сла́ва Отцу́ и Сы́ну и Свято́му Ду́ху:

Услы́шавши преще́ния вра́жеская и му́ки от ни́х терпя́ще, непоколеби́м пребы́л еси́; и мене́ непоколеби́ма в доброде́телех сотвори́.

И ны́не и при́сно и во ве́ки веко́в. Ами́нь.

Богородичен: Услы́ши, Пречи́стая Влады́чице, моле́ние мое́, и изба́ви мя́ от зо́л, и гла́с, благослове́нных призыва́ющий в Ца́рство, слы́шати удосто́й.

Пе́снь 5

Ирмос: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче.

Припев: Благове́рный кня́же Игоре, моли́ Бо́га о нас.

Просвети́в стезю́ жи́зни твоея́ све́том богоразу́мия, Христа́ Го́спода вседу́шне возлюби́л еси́; сподо́би и мене́, страстоте́рпче, в си́х бы́ти подража́телем.

Припев: Благове́рный кня́же Игоре, моли́ Бо́га о нас.

Просвеща́хуся ве́рнии лю́дие, ви́дяще тя́, нестерпи́мыя му́ки до́бльственне терпя́ща, сподо́би и мене́, страда́льче, бы́ти терпели́ву.

Сла́ва Отцу́ и Сы́ну и Свято́му Ду́ху:

Просвети́ мя, о Игоре, омраче́ннаго мгло́ю грехо́вною, и све́том невече́рним осиява́тися, све́тлый му́чениче, молю́ся, сотвори́.

И ны́не и при́сно и во ве́ки веко́в. Ами́нь.

Богородичен: Просвети́ла еси́ потемне́нное естество́, Богоро́дице, Све́т Истинный ро́ждши, те́мже и мене́, све́том просвети́вши, от мра́чных вра́г свободи́.

Пе́снь 6.

Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя.

Припев: Благове́рный кня́же Игоре, моли́ Бо́га о нас.

Моли́тву твою́ страда́льческую услы́шав Христо́с, Игоре, кре́пость и си́лу ко страда́ниям тебе́ подаде́; сподо́би и мя́ моли́твами твои́ми в страда́ниих жите́йских бы́ти тве́рду.

Припев: Благове́рный кня́же Игоре, моли́ Бо́га о нас.

Моли́твою пред о́бразом Пречи́стыя себе́ укрепи́в, изше́л еси́ ко враго́м твои́м, и́щущим тя́, и, я́ко а́гнец незло́бив, пострада́л еси́ от ни́х, непра́ведно умерщвля́емь.

Сла́ва Отцу́ и Сы́ну и Свято́му Ду́ху:

Моли́тву вся́к принося́й ти́ с ве́рою, страда́льче, душе́вных страсте́й и теле́сных исцеле́ние ско́ро прие́млет; е́же и на́м бога́тно подава́й, мо́лимся.

И ны́не и при́сно и во ве́ки веко́в. Ами́нь.

Богородичен: Моли́тву на́шу приими́, Пречи́стая, и моли́твою Ти́ всемо́щною изба́вити на́с вра́г ви́димых и неви́димых, от грехо́в же и вся́кия му́ки моли́, Его́же родила́ еси́, Человеколю́бца Бо́га.

Конда́к, гла́с 6:

Измени́л еси́ земна́го княже́ния сла́ву во и́ночества о́браз смире́нный и, страда́льчески земно́е житие́ сконча́в, ны́не на небесе́х ра́дуешися, усе́рдне моля́ся о чту́щих тя́, Игоре, страда́льцев похвало́.

Ин конда́к, гла́с 8:

Кня́жескую диаде́му обагри́л еси́ кро́вию твое́ю, богому́дре страстоте́рпче Игоре, за ски́птр кре́ст в ру́ку прии́м, яви́лся еси́ победоно́сец, и же́ртву непоро́чну Влады́це прине́сл еси́ себе́. Яко бо а́гнец незло́бив, от ра́б убие́н бы́л еси́, и ны́не, ра́дуяся, предстои́ши Святе́й Тро́ице, моли́ся спасти́ся душа́м на́шим.

Икос:

Ангельски пожи́вше на земли́, от ю́ности бо возлюби́л еси́ Боже́ственное уче́ние и сему́ после́довав до́брым житие́м, немо́лчно прославля́л еси́ и́мя Госпо́дне чте́нием святы́х кни́г и пе́нием церко́вным. Сего́ ра́ди тебе́, на небеси́ и на земли́ просла́вленному, вопие́м си́це: ра́дуйся, от рожде́ния твоего́ Бо́гом избра́нный; ра́дуйся, се́мя сло́ва Бо́жия от ю́ности восприя́вый; ра́дуйся, вели́кий уго́дниче Бо́жий, благочести́вую жи́знь на земли́ возлюби́вый; ра́дуйся, от Царя́ Небе́снаго, вене́ц му́ченический прие́мый; ра́дуйся, за Сладча́йшаго Иису́са Христа́ ду́шу твою́ положи́вый; ра́дуйся, путе́м тру́дным и те́сным жи́знь земну́ю сконча́вый. Ра́дуйся, святы́й благове́рный кня́же Игоре, во смире́нии за и́стину терпя́щим ско́рый помо́щниче.

Пе́снь 7.

Ирмос: Отроцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Припев: Благове́рный кня́же Игоре, моли́ Бо́га о нас.

Де́ти евре́йския Ангел от огня́ неопа́льна сохрани́вый, и тебе́, Игоре, во страда́нии укрепи́, пою́ща: благослове́н еси́, Го́споди Бо́же, во ве́ки.

Припев: Благове́рный кня́же Игоре, моли́ Бо́га о нас.

Де́тское игра́лище вменя́ющи му́ки, не пощади́л еси́ те́ла твоего́, но стра́сти му́жественне терпя́щи, пе́л еси́: благослове́н еси́, Го́споди Бо́же, во ве́ки.

Сла́ва Отцу́ и Сы́ну и Свято́му Ду́ху:

Де́тем му́чимым подража́я, Игоре, хвалю́ и а́з Христа́, да́вшаго тебе́ кре́пость; ты́ же мя́, на по́двиг доброде́телей укре́пльши, сподо́би пе́ти с тобо́ю: благослове́н еси́, Го́споди Бо́же, во ве́ки.

И ны́не и при́сно и во ве́ки веко́в. Ами́нь.

Богородичен: Деторо́дию Твоему́, Де́вою и по Рождестве́ пребы́вшу, дивлю́ся, Богоро́дице. Удиви́ у́бо и на мне́ ми́лость Сы́на Твоего́, да поми́лован Тобо́ю, пою́: благослове́н еси́, Го́споди Бо́же, во ве́ки.

Пе́снь 8.

Ирмос: Победи́тели мучи́теля и пла́мене благода́тию Твое́ю бы́вше, за́поведем Твои́м зело́ прилежа́ще, о́троцы вопия́ху: благослови́те, вся́ дела́ Госпо́дня, Го́спода.

Припев: Благове́рный кня́же Игоре, моли́ Бо́га о нас.

Победи́тель яви́лся еси́, сла́вне Игоре, враго́в, му́чащих тя́, и́бо в лю́тых му́ках стражда́, непреста́нно взыва́л еси́: благослови́те, вся́ дела́ Госпо́дня, Го́спода.

Припев: Благове́рный кня́же Игоре, моли́ Бо́га о нас.

Победи́л еси́ му́жеством твои́м, страстоте́рпче сла́вне Игоре, вся́ мучи́тельская ухищре́ния. Моли́ у́бо Влады́ку Христа́, мо́лим тя́, все́м ве́рным на враги́ побе́ду да́ти, пою́щим: благослови́те, вся́ дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Победи́телем жестокосе́рдых уби́йц яви́лся еси́, сла́вне Игоре: они́ бо небе́сным огне́м во а́дский о́гнь низведо́шася, ты́ же на не́бо возше́л еси́, иде́же ны́не со Ангелы пое́ши: благослови́те, вся́ дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богородичен: Победи́, Пречи́стая, враго́в ви́димых и неви́димых, низложи́ти на́с тща́щихся, и страсте́й мя́ вся́ких изба́ви, да пою́ торже́ственне: благослови́те, вся́ дела́ Госпо́дня, Го́спода.

Песнь 9

Ирмос: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Припев: Благове́рный кня́же Игоре, моли́ Бо́га о нас.

Вои́стину Бо́га испове́дующи, страстоте́рпче, черто́г небе́сный насле́довал еси́, его́же и на́с сподо́би, да с тобо́ю Христа́ ве́чно велича́ем.

Припев: Благове́рный кня́же Игоре, моли́ Бо́га о нас.

Вои́стину на тебе́, Игоре блаже́нне, испо́лнися Христо́во прорече́ние: вся́ претерпе́вый до конца́ спасе́н бу́дет; ны́не бо со все́ми спасе́нными Христа́ ве́чно велича́еши.

Сла́ва Отцу́ и Сы́ну и Свято́му Ду́ху:

Вои́стину никто́же притека́яй к тебе́, страстоте́рпче, то́щь благода́ти твоея́ отхо́дит, ея́же и мене́ испо́лни, да тя́ велича́ю.

И ны́не и при́сно и во ве́ки веко́в. Ами́нь.

Богородичен: Вои́стину Истиннаго Бо́га пло́тию, Богоро́дице, родила́ еси́, Его́же ми́лостива на́м в де́нь Суда́ соде́лай, да безконе́чно с Ни́м Тя́ велича́ем.

Свети́лен:

Якоже со́лнце, светоно́сно возсия́ ны́не, страстоте́рпче, па́мять твоя́, вся́ ве́рныя веселя́ще, и́же моли́твенно взыва́ют ти́: моли́ся приле́жно, во е́же спасти́ся на́м.

Молитва благоверному великому князю Игорю Черниговскому и Киевскому

О святый угодниче Божий, страстотерпче благоверный, княже Игоре! Ты из млада Бога возлюбил еси, мудрования плотская, честь и славу княжескую ни во что же вменил еси и монашескаго образа, еще юный леты, достигл еси, к Богу единому всею душею твоею прилепился еси, и благое иго Христово на ся взем, путем спасительным неуклонно шествовал еси даже до смерти мученическия. Сего ради венча тя Господь, блаженне Игоре, венцем славы и прият в Своя Небесныя селения, идеже ты ныне, неизреченныя славы и радости наслаждающеся в невечернем дни Царствия Христова, с лики святых страстотерпцев и всех святых Бога о нас умоляеши. Молимся тебе, святче Божий, припадая к честному образу твоему: молися о нас грешных и непотребных, испроси молитвами твоими мира державе нашей, граду сему (и святому храму сему) благодати и милости. Церковь святую огради молитвами твоими от ересей и расколов, пастырем ея испроси ревность и благочестие, всем же нам любовь нелицемерную и терпение даруй, грехов наших прощение, болезней и всяких недугов исцеление. Покрый и сохрани всех нас от всяких бед, скорбей и напастей, да, благодаряще, прославим Святую Живоначальную Троицу, Отца и Сына и Святаго Духа, во веки веков. Аминь.