17 июня.

Канон святителю Митрофану, патриарху Константинопольскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Пра́вило ве́ры и о́браз кро́тости, воздержа́ния учи́теля яви́ тя ста́ду твоему́ Яже веще́й Истина: сего́ ра́ди стяжа́л еси́ смире́нием высо́кая, нището́ю бога́тая, о́тче Митрофа́не, моли́ Христа́ Бо́га спасти́ся душа́м на́шим.

Кано́н. Гла́с 6.

Пе́снь 1.

Ирмос: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Припев: Святи́телю о́тче Митрофа́не, моли́ Бо́га о нас.

С вы́шними ли́ки я́ко святи́тель, я́ко Бо́жий служи́тель предстоя́, о на́с приле́жно моли́ся, получи́ти на́м ве́чная блага́я моли́твами твои́ми.

Припев: Святи́телю о́тче Митрофа́не, моли́ Бо́га о нас.

Избра́н бы́в Го́сподеви служи́ти честно́му Ева́нгелию, блаже́нне Митрофа́не, во благоразу́мии лю́ди уче́нии прему́дрыми, о́тче, возрасти́л еси́.

Сла́ва Отцу́ и Сы́ну и Свято́му Ду́ху:

Ра́зумом Бо́жиим обога́щся, сло́во живо́тное от се́рдца источи́л еси́, напоя́я ду́ши, оляде́вшия страстьми́, прему́дре святи́телю Бо́жий, Митрофа́не богоблаже́нне.

И ны́не и при́сно и во ве́ки веко́в. Ами́нь.

Богородичен: Свяще́нный ли́к проро́ческий проявля́ше издале́ча хотя́щую Тя́ бы́ти Бо́жию и́стинную Роди́тельницу, Чи́стая, вы́шшую херуви́м и всея́ тва́ри.

Пе́снь 3.

Ирмос: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Припев: Святи́телю о́тче Митрофа́не, моли́ Бо́га о нас.

Иска́пая боже́ственную сла́дость из усте́н твои́х, о́тче, и го́рькаго безбо́жия изсуши́л еси́ ка́пли, напои́в благочести́вых питие́м Бо́жияго ра́зума, блаже́нне.

Припев: Святи́телю о́тче Митрофа́не, моли́ Бо́га о нас.

Бо́жиим судо́м произбра́н бы́в, святи́тель показа́лся еси́, безкро́вны же́ртвы Бо́гу принося́, поже́ршемуся на́с ра́ди, о́тче святи́телю Митрофа́не.

Сла́ва Отцу́ и Сы́ну и Свято́му Ду́ху:

Гро́б, иде́же лежи́т честно́е те́ло твое́, благово́ние источа́ет, я́ко ра́й Бо́жий, облагоуха́я ве́рныя, святи́телю пресла́вне и всече́стне Митрофа́не.

И ны́не и при́сно и во ве́ки веко́в. Ами́нь.

Богородичен: Разуме́ти рождества́ Твоего́, Чи́стая, неизрече́нныя глубины́ недоуме́ет у́м челове́чь: Бо́г бо, Себе́ смири́в щедро́т ра́ди, во чре́ве Твое́м всего́ мя́ обнови́.

Конда́к, гла́с 2.

Ве́ру Христо́ву я́сно ты́ пропове́дал еси́ и, сию́ соблюда́я, во мно́жество вои́стинну возрасти́л еси́ ве́рное твое́ ста́до. Те́мже со Ангелы, Митрофа́не, сра́дуешися, Христу́ моля́ся непреста́нно о все́х на́с.

Та́же седа́лен, гла́с 8.

Над страстьми́ ца́рствовав плотски́ми, святи́тель яви́лся еси́ богоподо́бен и ца́рствующий гра́д пресла́вно упа́сл еси́, отгна́в полки́ ерети́ческия, преподо́бне, па́лицею слове́с боже́ственных, богодохнове́нне, те́мже по кончи́не неконча́емую благода́ть досто́йно насле́довал еси́, святи́телю блаже́нне. Сего́ ра́ди вопие́м ти́: моли́ Христа́ Бо́га грехо́в оставле́ние дарова́ти чту́щим всечестну́ю твою́ па́мять.

Сла́ва, и ны́не, Богородичен:

В напа́сти многоплете́нныя впа́д от вра́г ви́димых и неви́димых, бу́рею одержи́мь безчи́сленных согреше́ний мои́х, и я́ко к те́плому заступле́нию и покро́ву моему́, Чи́стая, ко приста́нищу притека́ю Твоея́ бла́гости. Те́мже, Пречи́стая, Иже из Тебе́ воплоще́нному без се́мени, моли́ся приле́жно о все́х рабе́х Твои́х, непреста́нно моля́щих Ти ся, Богоро́дице Пречи́стая, моля́щи Его́ при́сно согреше́ний оставле́ние дарова́ти воспева́ющим досто́йно сла́ву Твою́.

Пе́снь 4.

Ирмос: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.

Припев: Святи́телю о́тче Митрофа́не, моли́ Бо́га о нас.

Ты́ испо́лнен Свята́го Ду́ха, свяще́нный о́тче Митрофа́не, лука́выя ду́хи от челове́к отгна́л еси́, ве́рны же духо́вными уче́нии твои́ми сотвори́л еси́.

Припев: Святи́телю о́тче Митрофа́не, моли́ Бо́га о нас.

Еди́ницу несозда́нную богосло́вил еси́, Треми́ Ли́цы разделя́ему, непресеко́му и несме́сну, просвеща́я благочести́выя свяще́нными богосло́вии твои́ми.

Сла́ва Отцу́ и Сы́ну и Свято́му Ду́ху:

Умертви́в пе́рвее плотска́я мудрова́ния воздержа́нием и труды́, святи́тель боже́ствен показа́лся еси́ и предста́тель Тро́ице всесвяще́н.

И ны́не и при́сно и во ве́ки веко́в. Ами́нь.

Богородичен: Кля́тва разори́ся пра́бабняя Тобо́ю, Богома́ти: Ты́ бо на́м, Пречи́стая, Исто́чника породила́ еси́ святы́ни, присносу́щнаго Живота́.

Пе́снь 5

Ирмос: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Припев: Святи́телю о́тче Митрофа́не, моли́ Бо́га о нас.

Бо́жия боже́ственне соверша́я и чисте́йшим по́мыслом чи́стым прикаса́яся, непоро́чен яви́лся еси́, служа́ Бо́гу, я́ко Бо́жий святи́тель свяще́ннейший.

Припев: Святи́телю о́тче Митрофа́не, моли́ Бо́га о нас.

Идольстии уго́дницы бы́ша уго́дницы Бо́гу твои́ми уче́нии честны́ми, и́хже от недосто́йных изыма́я, досто́ин яви́лся еси́ уго́дник Бо́гу Вседержи́телю.

Сла́ва Отцу́ и Сы́ну и Свято́му Ду́ху:

Благода́тию призва́н бы́в, разруши́л еси́ безбо́жия и́дольская одожде́нием слове́с твои́х, преподо́бне, олядене́вшая сердца́ плодоно́сна соде́лал еси́ Бо́жиею благода́тию.

И ны́не и при́сно и во ве́ки веко́в. Ами́нь.

Богородичен: По рождестве́ Твое́м стра́ннем пребыла́ еси́ Де́вою, я́коже пре́жде: Бо́г бо бе́ рожде́йся и претворя́яй вся́ во́лею, безму́жная Мари́е Богоневе́стная.

Пе́снь 6.

Ирмос: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.

Припев: Святи́телю о́тче Митрофа́не, моли́ Бо́га о нас.

Язы́к тво́й, Ду́хом изощре́н разу́мно, я́ко тро́сть скоропи́сца, написа́ в сердца́х благочести́вых сло́во благода́тное, всесвяще́нне о́тче, Бо́жиим манове́нием.

Припев: Святи́телю о́тче Митрофа́не, моли́ Бо́га о нас.

Боже́ственным поуча́яся, я́ко входя́ в мы́сленная Свята́я святы́х, ве́рных соверша́еши Ду́хом, Тро́ическою заре́ю, свяще́нный о́тче всесоверше́ннейший Митрофа́не.

Сла́ва Отцу́ и Сы́ну и Свято́му Ду́ху:

Струя́ми веле́ний твои́х загради́в му́тная нечести́вых веле́ния, я́ко река́ показа́лся еси́ ми́рная, благоче́стием напоя́я составле́ния ве́рных, святи́телю всече́стне.

И ны́не и при́сно и во ве́ки веко́в. Ами́нь.

Богородичен: Сло́во во чре́ве Твое́м всели́ся без се́мене, и Челове́к яви́ся соверше́н, обновля́я естество́ боголе́пно, я́коже Са́м ве́сть еди́н, Богоприя́тная Отрокови́це Всенепоро́чная.

Конда́к, гла́с 4.

От младе́нства яви́лся еси́ че́стен сосу́д, святи́тель бы́в избра́н Бо́гу, Ему́же с весе́лием взыва́л еси́: ра́вен еси́, Христе́, Отцу́ и Ду́ху.

Икос:

Тако́в подоба́ше на́м архиере́й, и таи́нник Сло́ва, и служи́тель, я́коже Па́вел взыва́ет, боже́ственный орга́н Христо́в, слу́жбы принося́ всегда́ Бо́гу, я́ко непоро́чен и че́стен: те́лом у́бо тле́нным ви́димь обложи́мь, со безпло́тными же бесе́дуя в служе́нии и лю́дем согреше́ния отъе́мля ме́рилом пра́ведным, я́коже вели́кий святи́тель ны́не Митрофа́н яви́ся на́м, пропове́дав со дерзнове́нием: ра́вен еси́, Христе́, Отцу́ и Ду́ху.

Пе́снь 7.

Ирмос: Росода́тельну у́бо пе́щь соде́ла Ангел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Припев: Святи́телю о́тче Митрофа́не, моли́ Бо́га о нас.

Просвеща́емь духо́вною благода́тию я́же к боже́ственному манове́нию причаще́нии, светода́тельная бы́л еси́ звезда́, просвеща́я, му́дре, пою́щия: благослове́н Бо́г оте́ц на́ших.

Припев: Святи́телю о́тче Митрофа́не, моли́ Бо́га о нас.

Святе́йшая це́рковь бы́в, озаря́ема доброде́тельными дея́нии, живу́щу име́л еси́ в тебе́, свяще́нне, Тро́ицу несозда́нную, вопия́: благослове́н Бо́г оте́ц на́ших.

Сла́ва Отцу́ и Сы́ну и Свято́му Ду́ху:

Дрема́ние от о́чию отри́нув боже́ственными бодростьми́, Бо́жия сия́ния прия́л еси́ от Ангела све́та, сто́лп и подпо́р ве́рным, святи́теля и́стинна соверша́юща тя́.

И ны́не и при́сно и во ве́ки веко́в. Ами́нь.

Богородичен: Седя́й в не́дрех Роди́теля неопи́сан, в не́дрех Твои́х, Пречи́стая, ны́не седи́т опи́сан, Твои́м обложе́н зра́ком, за спасе́ние Ада́мле опи́сан бы́в.

Пе́снь 8.

Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Припев: Святи́телю о́тче Митрофа́не, моли́ Бо́га о нас.

Го́рдаго зми́я смире́нием твои́м смири́л еси́, блаже́нне, возвыша́емь к Бо́гу чи́стыми твои́ми ра́зумы, те́мже тя́ чти́м, Христа́ превознося́ще во ве́ки.

Припев: Святи́телю о́тче Митрофа́не, моли́ Бо́га о нас.

Воплоще́нно Сло́во богосло́вил еси́ и лю́ди от рабо́тныя ле́сти спа́сл еси́; отгоня́я и́дольская нече́стия, о́тче святи́телю Митрофа́не, прему́дре и богоно́се.

Сла́ва Отцу́ и Сы́ну и Свято́му Ду́ху:

Житие́ твое́ Влады́це твоему́ име́я подо́бно и сло́во житию́ име́я подо́бящееся, испо́лнен бы́в дне́й духо́вных, о́тче, в вы́шняя преше́л еси́ поко́ища.

И ны́не и при́сно и во ве́ки веко́в. Ами́нь.

Богородичен: Изба́вльшеся пе́рвыя кля́твы Твои́м Рождество́м, Преблагослове́нная Отрокови́це Богора́дованная, гла́с Гаврии́лов возсыла́ем Ти́: ра́дуйся, вина́ все́х спасе́ния.

Песнь 9

Ирмос: Бо́га челове́ком невозмо́жно ви́дети, на Него́же не сме́ют чи́ни Ангельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.

Припев: Святи́телю о́тче Митрофа́не, моли́ Бо́га о нас.

В зе́млю кро́тких ты́ всели́лся еси́, святи́телю, кро́ток и незло́бив бы́в, с вы́шними совокупля́яся во́инствы, ве́сь укра́шен доброде́тельными светлостьми́ и све́том доброде́телей преоде́ян.

Припев: Святи́телю о́тче Митрофа́не, моли́ Бо́га о нас.

Зри́ши Бо́жия и Ангельския све́тлости, патриа́рх и му́ченик, и апо́стольския красоты́, моля́ с ни́ми Человеколю́бца оставле́ние грехо́в и жития́ исправле́ние дарова́ти на́м, преподо́бне, хва́лящим тя́.

Сла́ва Отцу́ и Сы́ну и Свято́му Ду́ху:

Яве престо́л пе́рвее украси́л еси́ све́тло все́х председя́щих градо́в, в не́мже пожи́в, я́ко Ангел, и, святи́тельством се́й украси́в, пома́зав, освяти́л еси́, соверши́в лю́ди богому́дры.

И ны́не и при́сно и во ве́ки веко́в. Ами́нь.

Богородичен: Якоже ка́пля небе́сная, во Твое́ чре́во, Де́во, До́ждь сни́де и изсуши́ пото́ки ле́стныя, одожди́ нетле́ние все́м челове́ком, и избавле́ние Тобо́ю, Богора́дованная, дарова́ся.

Свети́лен.

Звезду́ тя́ многосве́тлую Це́ркве зна́ем, Митрофа́не святи́телю, патриа́рхов све́тлость: Ариево бо хуле́ние собо́рне низложи́л еси́, правосла́вными уче́нии Це́рковь уясни́в. Те́мже ве́рно тя́ пое́м.

Сла́ва, и ны́не, Богородичен:

Прему́дрость Ипоста́сную, и Сло́во Пресу́щное, и Врача́ ду́ш и теле́с ро́ждшая, гное́ние и я́звы души́ моея́ исцели́ лю́тыя и ле́тныя, и се́рдца моего́ уста́ви боле́зни, Де́во.

Молитва

О пречестна́я и свяще́нная главо́ и благода́ти Свята́го Ду́ха испо́лненная, Спа́сово со Отце́м обита́лище, вели́кий архиере́е, те́плый наш засту́пниче, святи́телю Митрофа́не, предстоя́ у Престо́ла всех Царя́ и наслажда́яся све́та единосу́щныя Тро́ицы и херуви́мски со А́нгелы возглаша́я песнь трисвяту́ю, вели́кое же и неизсле́дованное дерзнове́ние име́я ко всеми́лостивому Влады́це, моли́ спасти́ся па́ствы Христо́вы лю́дем, благостоя́ние святы́х церкве́й утверди́: архиере́и благоле́пием святи́тельства украси́, мона́шествующыя к по́двигом до́браго тече́ния укрепи́, ца́рствующий град и вся гра́ды и страны до́бре сохрани́, и ве́ру святу́ю непоро́чну соблюсти́ умоли́, мир весь предста́тельством твои́м умири́, от гла́да и па́губы изба́ви ны, и от нападе́ния иноплеме́нных сохрани́, ста́рыя уте́ши, ю́ныя наста́ви, безу́мныя умудри́, вдови́цы поми́луй, си́роты заступи́, младе́нцы возрасти́, пле́нных возврати́, немощству́ющыя и моля́щияся тебе́ от всех напа́стей и бед хода́тайством твои́м свободи́: моли́ о нас Всеще́драго и Человеколюби́ваго Христа́ Бо́га на́шего, да и в день Стра́шнаго Прише́ствия Его́ от шу́ияго стоя́ния изба́вит нас, и ра́дости святы́х прича́стники сотвори́т со все́ми святы́ми во ве́ки веко́в. Ами́нь.