Шрифт

16 июня.

Канон Святому благоверному царевичу Димитрию на пренесение честных мощей.

Святому благоверному царевичу Димитрию

Тропа́рь, гла́с 3:

Дне́сь [вельми́] хва́лится ца́рствующий гра́д Москва́, име́я пра́ведныя твоя́ в себе́ мо́щи, блгове́рный царе́виче Дими́трие, я́ко цве́ти благоуха́ннии, пребыва́еми во святе́м хра́ме се́м, просвеще́ние подаю́щия душа́м и телесе́м на́шим. Те́м ра́достно тя́ восхваля́ем, и честно́е пренесе́ние моще́й твои́х ве́рно почита́ем и мо́лим тя́: моли́ Христа́ Бо́га, дарова́ти на́м ве́лию ми́лость.

Кано́н свято́му, гла́с 1.

Пе́снь 1.

Ирмос: Го́рькия рабо́ты изба́влься Изра́иль, непроходи́мое про́йде, я́ко су́шу, врага́ зря́ потопля́ема, пе́снь я́ко Благоде́телю пое́т Бо́гу, чудоде́ющему мы́шцею высо́кою, я́ко просла́вися.

Агнче Бо́жий, Отчее Сло́во, отве́рзи ми́ устне́ и вразуми́ ми смы́сл, да досто́йно воспою́ но́ваго Твоего́ вене́чника царе́вича Дими́трия, и вопию́ Ти, я́ко просла́вися.

Благода́ть прия́л еси́ от Бо́га, благоро́дне Дими́трие, я́ко обрето́шася мо́щи твоя́ це́лы и нетле́нны, благода́ти своея́ посли́ ми́ ка́плю, я́ко да досто́йно воспою́ тя, и возопию́ Го́сподеви моему́, я́ко просла́вися.

В пра́ведных ли́цех предстоя́ и неизрече́нно добро́ту Влады́чню зря́, блгоро́дне Дими́трие, моли́ за ны́ смире́нныя рабы́ своя́, я́ко да твои́ми моли́твами, получи́м вся́ блага́я и поле́зная.

Богородичен: Гора́ высо́кая, в ню́же всели́ся Христо́с, Ты́ еси́ Де́во Пречи́стая, я́коже Дави́д боже́ственный вопие́т; Ея́ же ра́ди мы́ вознесо́хомся к небеси́, усыновле́ни Ду́хом, Всеблаже́нная.

Пе́снь 3.

Ирмос: Не му́дростию и бога́тством да хва́лится сме́ртный свои́м, но ве́рою Госпо́днею, правосла́вно взыва́я Христу́ Бо́гу и поя́ при́сно: на ка́мени Твои́х за́поведей утверди́ мя, Влады́ко.

Ди́вен в высо́ких Госпо́дь, ди́вен и во святы́х, чу́до ве́лие в после́дняя на́ша времена́ показа́, я́ко мо́щи твоя́ сия́юще, исцеле́ние подаю́т все́м приходя́щим к ни́м с ве́рою, и Христу́ вопию́щим: на ка́мени за́поведей Твои́х, утверди́ ны́, Влады́ко.

Ей, ве́сть Госпо́дь просла́вити Своя́ уго́дники, и показа́ти на ни́х си́лу Свою́, та́ко и на тебе́, благоро́дне Дими́трие, показа́ благода́ть Свою́: мо́щи бо твоя́ такова́я де́йствуют, все́м приходя́щим к ни́м с ве́рою.

Жи́знь твоя́ на земли́, не во мно́зе вре́мени пребы́сть, благоро́дне царе́виче Дими́трие, в небе́сных же селе́ниих во ве́ки пребыва́еши, и мо́лиши Бо́га за ны́, рабы́ своя́, да получи́м ве́чных и неконча́емых бла́г.

Богородичен: Забра́ло име́я Ца́рский гра́д, Тя́ Цари́цу и Госпожу́, побежда́ет ва́рварская звери́ная стремле́ния, и избавля́ется вся́ких напа́стей и страсте́й, Де́во, Ма́ти, Всенепоро́чная.

Седа́лен, гла́с 8.

Яко цве́т прекра́сен процве́л еси́, во оте́чествии свое́м, блгоро́дне Дими́трие, име́я сия́ мо́щи своя́ во святе́м хра́ме се́м, лежа́щия в честне́й ра́це, я́коже рече́ся, це́лы и невреди́мы, я́ко кри́ни блгоуха́нни, и я́ко ши́пки доброво́нни, все́м приходя́щим к ни́м с ве́рою обонева́ют и удивля́ют все́х зря́щих на ня́, и вопию́щих: сла́ва Бо́гу, прославля́ющему Своя́ уго́дники.

Сла́ва и ны́не, Богородичен:

Помышля́ю су́д, боя́ся испыта́ния, и ужа́сныя му́ки и огня́, боле́зни, тмы́ же и та́ртара. Увы́, что́ сотворю́, ка́ко претерплю́ студа́, егда́ кни́ги разгну́тся и дея́ния облича́тся? Сего́ ра́ди припа́даю Ти́, Богоро́дице Пречи́стая: тогда́ предста́ни ми́, ну́жды о́ныя изыма́ющи, Тебе́ бо и́мам прибе́жище, Влады́чице.

Пе́снь 4.

Ирмос: Слы́ша дре́вле Авваку́м, Христе́, чу́дный Тво́й слу́х и стра́хом взыва́ше: от ю́га Бо́г прии́дет и Святы́й от горы́ приосене́нныя ча́щи спасти́ пома́занныя. Сла́ва си́ле Твое́й, Го́споди.

Земля́ Росси́йская вся́ хва́лится тобо́ю, благоро́дне Дими́трие, я́ко ца́рствующий гра́д Москва́, име́ет в себе́ мо́щи твоя́, я́ко не́кое сокро́вище дра́го, обогаща́юще ве́рныя лю́ди, и вопию́щия Христу́: сла́ва си́ле Твое́й, Го́споди.

Иже над все́ми ца́рствуяй, Ца́рь в вы́шних, То́й вдохну́ в се́рдце царю́, ца́рству тезоимени́ту, пренести́ честны́я твои́ мо́щи от гра́да Углеча в ца́ртвующий гра́д Москву́, я́ко не́кое бога́тство вели́кое. Яже тогда́ ви́девше вси́ лю́дие возра́довашася, и воспе́ша Христу́: сла́ва си́ле Твое́й, Го́споди.

Истинныя чудеса́ вои́стинну в прихо́д честны́х твои́х моще́й бя́ху свиде́тельством непра́веднаго твоего́ заколе́ния: мно́зи бо неду́жнии исцелева́хуся, и здра́вы быва́ху, и ра́дующеся в до́мы своя́ отхожда́ху, Христу́ вопию́ще: сла́ва си́ле Твое́й, Го́споди.

Богородичен: Кре́пость на́м и сто́лп непоколеби́м, бу́ди Богора́дованная, и щи́т и ору́жие непобеди́мое, мы́сленных враго́в полки́ от на́с отгоня́ющи, Богоро́дице Пречи́стая, ве́рою и любо́вию почита́ющих Тя́.

Пе́снь 5

Ирмос: Све́т Тво́й незаходи́мый возсия́й, Христе́, в сердца́ ве́рно пою́щих Тя́, ми́р подава́яй на́м па́че ума́; те́м, от но́щи неве́дения ко дню́ све́том Твои́м теку́ще, славосло́вим Тя́, Человеколю́бче.

Любо́вию притека́ющим к ра́це моще́й твои́х и любе́зно целу́ющим я́, благоро́дне Дими́трие, пода́ждь душа́м спасе́ние и телесе́м здра́вие и изба́ви лю́тых бе́д и обстоя́ний свои́ми к Бо́гу моли́твами.

Моли́тв ра́ди твои́х, я́же к Бо́гу, благоро́дне Дими́трие, лю́тое колеба́ние в Росси́йстей земли́ Бо́г укроти́л е́сть, от злы́х и растле́нных умы́ челове́к, хотя́щих зде́ вре́менныя сла́вы наслади́тися наноси́мое, я́же во о́ном ве́це, и́мут ве́чне му́читися.

Непостижи́мый Бо́г, недове́домыми Свои́ми судьба́ми вся содева́ет, и уго́дников Свои́х прославля́ет, я́коже и на тебе́, благоро́дне Дими́трие, неиспы́танным Свои́м смотре́нием сотвори́, и сицевы́м да́ром мо́щи твоя́ обогати́.

Богородичен: Освяти́ на́ша помышле́ния, утверди́ все́х ду́ши, Ма́ти Бо́жия, твори́ти до́бре оправда́ния за милосе́рдие неизрече́нное воплоще́ннаго из Тебе́, Де́во, Сло́во Безнача́льнаго Отца́.

Пе́снь 6.

Ирмос: Ве́сь от страсте́й безме́рных содержу́ся и ки́том зо́л снизпадо́х, но возведи́ из нетле́ния мя́, Бо́же, я́коже пре́жде Ио́ну, и ве́рою безстра́стие ми́ да́руй, я́ко да во гла́се хвале́ния и спасе́ния ду́хом пожру́ Ти.

Пренесе́нию моще́й твои́х, зело́ возра́довася са́м ца́рь, и архиере́й вели́кий, и вси́ моско́встии наро́ди ра́достно срето́ша я́, и вну́трь самаго́ ца́рствующаго гра́да Москвы́ несо́ша, и положи́ша я́, в честне́м хра́ме се́м, я́же и ны́не зря́тся.

Ре́вностию Боже́ственнною содержи́мь бы́в сро́дник тво́й, нося́й зва́ние ца́рское, и ца́рь над все́ю Росси́ею, прихо́дит к ра́це моще́й твои́х, и целу́я и́х любе́зно, отхо́дит благода́рно и ра́достно, сла́ву и хвалу́ Бо́гу возсыла́я.

Сове́т злы́х и лука́вых челове́к, хотя́щих насле́довати оте́чество твое́, благоро́дне Дими́трие, и се́сти на престо́л ца́рствия твоего́, Бо́г же моли́тв ра́ди твои́х разори́, и до конца́ все́х погуби́, и я́ко пра́х разве́я.

Богородичен: Тебе́, Всепе́тая, Пречи́стая, раби́ Твои́, всегда́ во дни́ и в нощи́ мо́лим, сокруше́нною мы́слию, прося́ще отпуще́ния грехо́в на́ших да́ти, Твои́ми моли́твами, Чи́стая.

Конда́к, гла́с 4.

Яко пресве́тлая звезда́, яви́лся еси́ дне́сь, в ца́рствующем гра́де Москве́, благове́рне царе́виче Дими́трие, сия́я пра́ведными свои́ми мощми́. К ни́мже притека́юще исцеле́ния да́р прие́млем, и глаго́лем: ра́дуйся, всекра́сне душе́ю, благоро́дне Дими́трие, я́ко прия́л еси́ от Бо́га ве́лий се́й да́р, и вене́ц нетле́нный.

Икос:

Прииди́те ве́рнии, соше́дшеся, восхва́лим но́ваго предста́теля и моли́твенника о на́с к Бо́гу, ца́рскую о́трасль, благове́рнаго царе́вича Дими́трия, и возопии́м к нему́ си́це, глаго́люще: ра́дуйся, но́вый вене́чниче, благове́рный царе́виче Дими́трие, я́ко предстои́ши Све́ту Трисо́лнечному, насыща́яся от Него́ Боже́ственнаго светосия́ния, и мо́лишися о держа́ве сро́дник твои́х, о е́же ненаве́тней е́й бы́ти в злы́х; ра́дуйся, я́ко мо́щи твоя́, толи́цеми дарми́ от Бо́га обогаще́ны су́ть, и просвеща́ют все́х приходя́щих к ни́м с ве́рою; ра́дуйся, я́ко моли́тв ра́ди твои́х, все́х враго́в, и наве́тных челове́к, нарица́ющихся и́менем твои́м во лжу́, и смуща́ющих держа́ву оте́чествия твоего́, до конца́ Бо́гу погуби́л е́сть, и лю́тое колеба́ние от ни́х в Ру́сстей земли́ укроти́л е́сть; ра́дуйся, оте́честву своему́ похвала́ и утверже́ние, и ца́рствующему гра́ду Москве́ кра́сное удобре́ние; ра́дуйся, я́ко прия́л еси́ от Бо́га ве́лий се́й да́р и вене́ц нетле́нный.

Пе́снь 7.

Ирмос: Образу служи́ти мусики́йскому согла́сию созыва́ющу лю́ди, от пе́сней сио́нских пою́ще оте́чески, о́троцы Дави́довы мучи́телево разори́ша злочести́вое веле́ние и пла́мень в ро́су преложи́ша, пе́снь воспева́юще: превозноси́мый отце́в и на́ш Бо́же, благослове́н еси́.

Удивля́ются вси́ росси́йстии наро́ди, зря́ще мо́щи твоя́, толи́кою сла́вою от Бо́га просла́влени, и такова́я де́йствующа исцеле́ния, и подаю́ща все́м приходя́щим к ни́м с ве́рою благода́ть, Христу́ вопию́щим: благослове́н Бо́г оте́ц на́ших.

Фимиа́м благово́нен обоня́ет челове́ком чу́вства, та́ко и твоя́ мо́щи, благоро́дне, объюха́ют на́с, а́ки не́киим обоня́нием сла́дким, и благода́ть свою́ подаю́т на́м, приходя́щим к ни́м с ве́рою, и Христу́ вопию́щим: благослове́н Бо́г оте́ц на́ших.

Храни́т Госпо́дь ца́рствующий гра́д Москву́, пребыва́ющих ра́ди в не́м чудотво́рных твои́х моще́й, благоро́дне царе́виче Дими́трие, сего́ ра́ди ра́дуются лю́дие, и веселя́щеся вопию́т Христу́: благослове́н Бо́г оте́ц на́ших.

От благочести́ваго ца́рскаго ко́рене, от благода́тнаго зва́ния рожде́н еси́, благоро́дне Дими́трие, и я́ко пе́рвенец яви́лся в ро́де свое́м, и ны́не хва́лятся тобо́ю сро́дницы твоя́, ви́дяще тя́ та́ко просла́влена от Бо́га, Ему́же пое́м: благослове́н Бо́г оте́ц на́ших.

Богородичен: Це́рковь освяще́нная Бо́гови яви́ся, в Тя́ все́льшемуся, Де́во, па́че ума́. Того́ моли́ грехо́в на́ших скве́рну очи́стити, я́ко да хра́мы пока́жемся, и жили́ще Свято́му Ду́ху.

Пе́снь 8.

Ирмос: Чу́да преесте́ственнаго показа́ о́браз огнеро́сная пе́щь дре́вле: о́гнь бо не опали́ ю́ныя де́ти, Христо́во явля́я безсе́менное от Де́вы Боже́ственное рождество́. Те́м, воспева́юще, воспои́м: да благослови́т тва́рь вся́ Го́спода и превозно́сит во вся́ ве́ки.

Честна́я ра́ка моще́й твои́х, благоро́дне, па́че сапфи́ра сия́ет, к не́й бо притека́юще, ца́рие и кня́зи, и мно́гое правосла́вное христиа́нство, бла́гостное осене́ние от моще́й твои́х прие́млют и пою́т: вся́ дела́ Госпо́дня, Го́спода по́йте и превозноси́те Его́ во вся́ ве́ки.

Шу́м пою́щих красе́н быва́ет, во святе́м хра́ме се́м, в де́нь честна́го пренесе́ния пра́ведных моще́й твои́х. Ца́рь же и архиере́й вели́кий, со свяще́нными собо́ры, све́тло пра́зднуют, и вси́ лю́дие сра́дуются, и веселя́тся, пою́ще: вся́ дела́ Госпо́дня, Го́спода по́йте, и превозноси́те Его́ во вся́ ве́ки.

Ще́дрый Госпо́дь на́ш и Бо́г, твои́х ра́ди к Нему́ моли́тв, ще́дрит и ми́лует на́с, и подае́т на́м вся́ блага́я и поле́зная; те́м ра́дуемся и весели́мся, и хвалу́ Ему́, я́ко Творцу́ своему́ воздае́м, пою́ще: вся́ дела́ Госпо́дня, Го́спода по́йте, и превозноси́те Его́ во вся́ ве́ки.

Яко свеща́ све́тлая, непоро́чная твоя́ душа́ Го́сподеви предста́, и во угото́ванное е́й ме́сто несе́на бы́сть, иде́же Он Са́м Жизнода́вец бы́сть, Ему́же ны́не пое́м и славосло́вим: вся́ дела́ Госпо́дня, Го́спода по́йте, и превозноси́те Его́ во вся́ ве́ки.

Богородичен: Иже дре́вле прама́терь Твою́ созда́вый, ны́не из Тебе́ зи́ждется, тоя́ преслуша́ние и осужде́ние исцеля́я, и разреша́я, я́ко Ще́др, и Влады́ка все́х, Богороди́тельнице Ма́ти Де́во.

Пе́снь 9.

Ирмос: Светоно́сный о́блак, в о́ньже все́х Влады́ка, я́ко до́ждь с небесе́ на руно́, сни́де и воплоти́ся на́с ра́ди, бы́в Челове́к, Безнача́льный, велича́ем вси́ я́ко Ма́терь Бо́га на́шего Чи́стую.

Кра́ткаго и недоуме́ннаго ума́ моего́, пе́ние приими́ благоро́дне, а́ще бо неле́по и гру́бо соста́вих ти́ сия́ ма́лыя пе́сни, но от любве́, я́же к тебе́ по Бо́зе, и Пречи́стей Его́ Ма́тери, а́ки две́ ца́ты, убо́гая моя́ душа́ прино́сит ти́ в да́р, ты́ же прие́м я́ и свои́м предста́телством, я́же к Бо́гу, преудо́бренны сотвори́, и во благо́е почти́ я.

Аще и недосто́йными устна́ми, сия́ ма́лыя краегране́сия прино́сим к тебе́, благоро́дне: но честны́я твоя́ мо́щи велми́ похваля́ем, и Христа́ Бо́га на́шего велича́ем, да́вшаго ти́ такову́ю благода́ть и си́лу.

Во дни́ на́ша яви́ Госпо́дь благода́ть Свою́ на лю́дех Свои́х, во все́й вели́цей Росси́и, я́ко мо́щи твоя́ сицевы́м да́ром от Него́ почте́ны су́ть, те́м вси́ лю́дие пою́т и велича́ют, и удивля́ются, и сла́вят Го́спода.

Аще Бо́г тя́ просла́ви на небеси́ и на земли́, благоро́дне Дими́трие, то мы́, гру́бии, ка́ко не воспое́м и не похва́лим сего́ вели́чия Бо́жия, сбы́вшагося на тебе́, благоро́дне. Те́мже ра́дуйся и весели́ся, предстоя́ Невече́рнему Све́ту.

Богородичен: Све́том Де́во, из Тебе́ возсия́вшим, у́м мо́й озари́, и се́рдце просвети́, тму́ отгоня́ющи грехо́вную, и уны́ния моего́ вся́кую мглу́.

Свети́лен:

Прославля́ет тя́ вся́ Росси́йская земля́, и восхваля́ет тя́ ца́рствующий гра́д Москва́, я́ко от ца́рскаго ко́рене произше́л еси́, и к Самому́ Царю́ царе́м возше́л еси́, и и́маши к Нему́ дерзнове́ние. Те́м вы́ну моли́ Его́ дарова́ти на́м ве́лию ми́лость.

Сла́ва, и ны́не, Богородичен:

Незаходи́маго Све́та носи́ло, Присноде́во, просвети́вшаго седя́щия во тме́ неве́дения пре́лести, озари́ и на́м гре́шным све́т Сы́на Твоего́.

Молитва благоверному царевичу Димитрию, Угличскому и Московскому

О, пресла́вный и ди́вный в чудесе́х, красото́ му́чеников, страстоте́рпче царе́вичу кня́же Дими́трие! Ско́ро предста́ни Небе́сному Царю́ и му́ченическия твои́ ру́це о нас, гре́шных, моле́бне к Нему́ простри́, я́ко име́яй дерзнове́ние вели́ко; сохрани́ же твои́ми моли́твами град сей, и вся гра́ды и ве́си правосла́вныя, и Святе́йшаго Патриа́рха (имя рек) и преосвяще́нныя митрополи́ты, архиепи́скопы, епи́скопы и весь свяще́нный чин церко́вный, и в пала́те бра́тию на́шу, и вся правосла́вныя христиа́ны; всех нас приими́ во твое́ заступле́ние, и от всех бед и зол избавля́я, и от наше́ствия ви́димых и неви́димых борю́щих нас враго́в свобожда́я, и тех всяк наве́т и злохи́трство погубля́я и отгоня́я; та́же прегреше́ний на́ших проще́ние испроси́, и в век бу́дущий Небе́снаго Ца́рствия нас сподо́би, и спасе́нных Бо́гу предста́ви, благода́тию и человеколю́бием Го́спода и Спа́са на́шего Иису́са Христа́, Ему́же честь и поклоне́ние подоба́ет, ны́не, и при́сно, и во ве́ки веко́в. Ами́нь.

Молитва вторая благоверному царевичу Димитрию, Угличскому и Московскому

О, святы́й му́чениче, благове́рный царе́вичу и кня́же Дими́трие! Я́ко а́гнец незло́бив от раба́ заколе́нный, венце́м ца́рским от Го́спода венча́лся еси́, и сын царе́в быв, му́ченик непобеди́м яви́лся еси́, и вме́сто земны́х и тле́нных на Небеси́ нетле́нное восприя́л еси́. И ны́не предстоя́ в ра́дости Святе́й Тро́ице, посеща́й творя́щыя ве́рно твою́ светоно́сную па́мять: соблюда́й оте́чествие твое́ и град твой невреди́м, тому́ бо еси́ утвержде́ние: утверди́ правосла́вных жи́тельство в ми́ре глубо́це: междоусо́бную брань укроти́, и вся поле́зная да́руй всегда́ лю́дем твои́м моли́твами твои́ми, да ве́рою и любо́вию вопие́м: ти ра́дуйся, свя́те Дими́трие, ве́рных люде́й те́плый засту́пниче и прибе́жище и земли́ Росси́йския украше́ние. Ами́нь.

Святому благоверному царевичу Димитрию