15 июня.
Канон святителю Никифору, патриарху Константинопольскому, исповеднику.
![Святителю Никифору, патриарху Константинопольскому Святителю Никифору, патриарху Константинопольскому](img_i/041.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 4:
Пра́вило ве́ры и о́браз кро́тости, воздержа́ния учи́теля яви́ тя ста́ду твоему́ Яже веще́й Истина: сего́ ра́ди стяжа́л еси́ смире́нием высо́кая, нището́ю бога́тая, о́тче Ники́форе, моли́ Христа́ Бо́га спасти́ся душа́м на́шим.
Кано́н, гла́с 4.
Пе́снь 1.
Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.
Припев: Святи́телю о́тче Ники́форе моли́ Бо́га о нас.
Дея́ние виде́ния показа́л еси́, я́ве восхожде́ние: ду́шу бо согласи́л еси́ де́тельно, Ники́форе пребога́те, к виде́нию изря́дно кра́йнему возлете́л еси́.
Припев: Святи́телю о́тче Ники́форе моли́ Бо́га о нас.
Умертви́в я́же на земли́ мудрова́ния воздержа́нием, ты́ и ду́шу напра́вил еси́ прилежа́нием, Ники́форе богодохнове́нне, ко приста́нищем дости́гл еси́ невла́емаго наслажде́ния.
Сла́ва Отцу́ и Сы́ну и Свято́му Ду́ху:
Неду́говав мамо́ны е́ресию Ле́в окая́нный и к тве́рдому тебе́ ка́мени прира́жся, Ники́форе богоприя́тне, разсы́пася вско́ре при а́де пребезу́мный.
И ны́не и при́сно и во ве́ки веко́в. Ами́нь.
Богородичен: Исцели́ сокруше́ние, Пренепоро́чная, челове́чества, Творца́ ро́ждши, вся́ ны́ испра́вльшаго, низве́рженныя паде́нием пра́отец, Богоневе́стная.
Пе́снь 3.
Ирмос: Не му́дростию, и си́лою, и бога́тством хва́лимся, но Тобо́ю, Отчею Ипоста́сною Му́дростию, Христе́: не́сть бо свя́т, па́че Тебе́, Человеколю́бие.
Припев: Святи́телю о́тче Ники́форе моли́ Бо́га о нас.
Украси́в доброде́тельми твои́ми житие́ твое́ и свети́льник сло́ва жи́зни я́ве храни́тель бы́в, Христо́во всесвяще́нное ста́до наста́вль.
Припев: Святи́телю о́тче Ники́форе моли́ Бо́га о нас.
Богоглаго́ливый о́гненный язы́к тво́й боже́ственный огне́м разу́мным терно́вныя попали́ е́реси, богому́дре о́тче сла́вне.
Сла́ва Отцу́ и Сы́ну и Свято́му Ду́ху:
Любому́дрием прему́дрости глубину́ испыта́в, уче́ний твои́х плени́цами отмета́ющияся о́браза Христо́ва я́сно придави́л еси́, досточу́дне.
И ны́не и при́сно и во ве́ки веко́в. Ами́нь.
Богородичен: Испове́дающе Отцу́ Преве́чному Сы́на Собезнача́льна, напосле́док из Твоея́ утро́бы ро́ждшася, Пречи́стая, вои́стинну сла́вим Тя́, Бо́жию Ма́терь.
Седа́лен, гла́с 8.
Слове́с твои́х благода́ть разу́мных и уче́ний высота́ та́йных боже́ственнаго на́м бы́сть восхожде́ния ле́ствица: духо́вну бо, о́тче, стяжа́в трубу́, се́ю пропове́дал еси́ боже́ственная уче́ния. Те́мже и на ме́сте всели́лся еси́ зла́чне, зве́ря отгна́л еси́ пра́щею слове́с твои́х, Ники́форе блаже́нне, моли́ Христа́ Бо́га грехо́в оставле́ние пода́ти чту́щим всечестну́ю твою́ па́мять.
Сла́ва, и ны́не, Богородичен:
Яко де́ву и еди́ну в жена́х, Тя́, без се́мене ро́ждшую Бо́га пло́тию, вси́ ублажа́ем, ро́ди челове́честии: о́гнь бо всели́ся в Тя́ Божества́, и я́ко Младе́нца млеко́м пита́еши Зижди́теля и Го́спода. Те́м, Ангельский и челове́ческий ро́д, досто́йно сла́вим пресвято́е Рождество́ Твое́ и согла́сно вопие́м Ти́: моли́ Христа́ Бо́га согреше́ний оставле́ние дарова́ти покланя́ющимся ве́рою пресвято́му Рождеству́ Твоему́.
Пе́снь 4.
Ирмос: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.
Припев: Святи́телю о́тче Ники́форе моли́ Бо́га о нас.
Си́лою боже́ственною че́люсти, священноявле́нне, нечести́вых сокруши́л еси́, тве́рдым твои́м сло́вом си́х победи́в, и чествова́ти научи́л еси́ боже́ственный Спа́са о́браз.
Припев: Святи́телю о́тче Ники́форе моли́ Бо́га о нас.
Испове́данием боже́ственное свяще́нство све́тло уясни́л еси́, о́тче Ники́форе, Льво́во суровство́ загражда́я, таи́нниче неизрече́нных богоприя́тне.
Сла́ва Отцу́ и Сы́ну и Свято́му Ду́ху:
Юношески проти́влься, Ники́форе, благочести́выми уче́нии честны́я Це́ркве, ра́ною слове́с твои́х во́лки отгна́л еси́, ве́ру пра́вую корче́мствующия.
И ны́не и при́сно и во ве́ки веко́в. Ами́нь.
Богородичен: Воплоще́на Безпло́тнаго пе́рвее ро́ждши, Сло́ва Бо́жия, Всенепоро́чная Обра́дованная, ми́р обнови́ла еси́. Те́мже Тя́, Богоневе́сто, ве́рою правосла́вною почита́ем.
Пе́снь 5
Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.
Припев: Святи́телю о́тче Ники́форе моли́ Бо́га о нас.
Ум име́я чи́ст, на небеса́ восходя́щ, ра́зума и прему́дрости неувяда́ющий цве́т объя́л еси́, всеблаже́нне.
Припев: Святи́телю о́тче Ники́форе моли́ Бо́га о нас.
Исцеле́ние душа́м правосла́вным ороси́л еси́, слове́с твои́х, богоявле́нне, зе́млю же неразу́мных опрове́ргл еси́ твои́ми уче́нии.
Сла́ва Отцу́ и Сы́ну и Свято́му Ду́ху:
Сло́во де́ятельно и живо́т име́я неотъе́млемь, я́ко со́лнце облиста́я, честны́я Це́ркве просвеща́еши утвержде́ние.
И ны́не и при́сно и во ве́ки веко́в. Ами́нь.
Богородичен: Разреше́ние кля́твы прама́тере Ты́ была́ еси́, Пренепоро́чная, заче́нши на́с благослове́ньми боже́ственными Венча́вшаго.
Пе́снь 6.
Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.
Припев: Святи́телю о́тче Ники́форе моли́ Бо́га о нас.
Светоно́сно заря́ми сия́я духо́вными, Це́рквам, богому́дре, яви́лся еси́ сто́лп, небеси́ ра́вен, и о́блак, к насле́дию веды́й небе́сному.
Припев: Святи́телю о́тче Ники́форе моли́ Бо́га о нас.
Всю́ твою́ жи́знь Бо́гу освяти́л еси́, пребыва́я по все́й вселе́нней нача́льник, просла́вился еси́, священноявле́нне о́тче блаже́нне.
Сла́ва Отцу́ и Сы́ну и Свято́му Ду́ху:
Растерза́ет плете́ния безбо́жных ересе́й твое́ богодохнове́нное сло́во обою́ду о́стрым мече́м Уте́шителя, све́т же и́стины все́м предпоказа́.
И ны́не и при́сно и во ве́ки веко́в. Ами́нь.
Богородичен: Зако́ны пресла́вно естества́ разреша́ются: Де́ва бо ражда́ет и пита́ет Отрокови́ца, неискусобра́чно заче́нши все́х Зижди́теля и Го́спода.
Конда́к, гла́с 4.
Побе́ды вене́ц, о Ники́форе, с небесе́, пресла́вне, я́ко прие́м от Бо́га, спаса́й ве́рою почита́ющия тя́, я́ко священнонача́льника Христо́ва и учи́теля.
Икос:
Якоже невоева́н гра́д Бо́жий на горе́, вели́кий иера́рх стоя́ водруже́н яви́ся, соблюда́я ми́р моли́твами, полки́ безбо́жных победи́в, пребы́сть невреди́мь, от враго́в стреля́ний неуя́звен, все́х Царя́ и Го́спода вну́трь в се́рдцы нося́. Те́мже и уясня́ет чту́щия Христа́ на ико́не, с высоты́ доброде́телей и столпа́ де́л пра́щею мета́ет на полки́ враго́в, две́ри же милосе́рдием отверза́ет ве́рою пою́щим сего́, я́ко святи́теля Христо́ва и учи́теля.
Пе́снь 7.
Ирмос: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.
Припев: Святи́телю о́тче Ники́форе моли́ Бо́га о нас.
Це́рковь тя́ жи́ву Бо́га Жива́го ве́мы, вну́трь я́ко свети́льника иму́ща златоза́рна, Тро́ицы позна́ние: благослове́н еси́ в хра́ме сла́вы Твоея́, Го́споди.
Припев: Святи́телю о́тче Ники́форе моли́ Бо́га о нас.
Ерети́чествующих языкобо́лия низложи́л еси́, уверя́я чти́ти ико́ну Христо́ву, Ники́форе, взыва́ющия: благослове́н еси́ в хра́ме сла́вы Твоея́, Го́споди.
Сла́ва Отцу́ и Сы́ну и Свято́му Ду́ху:
Прему́дрости бога́тство и житие́ име́я боже́ственно, все́ премину́л еси́ чу́вство мы́сленно, Христу́ ны́не бесе́дуеши: благослове́н еси́ в хра́ме сла́вы Твоея́, Го́споди.
И ны́не и при́сно и во ве́ки веко́в. Ами́нь.
Богородичен: Не разделя́юще соедине́нная, ниже́ слива́юще, еди́наго Христа́ сла́вим, из Тебе́ воплоще́ннаго Сло́ва, зову́ще: благослове́н еси́ в хра́ме сла́вы Твоея́, Го́споди.
Пе́снь 8.
Ирмос: Отроки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.
Припев: Святи́телю о́тче Ники́форе моли́ Бо́га о нас.
Кро́вию Христо́вою изба́влен, ра́зумом и́же Его́ ра́ди подъя́т сме́рть, со́вести прине́сл еси́ муче́ние, испове́дания благода́тию сия́я: Го́спода по́йте, дела́, взыва́я, и превозноси́те Его́ во вся́ ве́ки.
Припев: Святи́телю о́тче Ники́форе моли́ Бо́га о нас.
Те́лом и душе́ю очище́н, Сло́ву Всеви́дцу сло́вом поже́рл еси́, Сие́ пре́жде безпло́тно и безнача́льно показу́я и ми́лостивна бы́вша Челове́ка по́слежде, Го́спода по́йте, дела́, взыва́я, и превозноси́те Его́ во вся́ ве́ки.
Сла́ва Отцу́ и Сы́ну и Свято́му Ду́ху:
Да насле́дие небе́сное и сла́ву неизме́нную улучи́ши, сла́вне, сла́ву увяда́емую, о́тче, оста́вил еси́, изгна́ние и озлобле́ние терпя́ до́блественне, му́дре, взыва́я: Го́спода по́йте, дела́, и превозноси́те Его́ во вся́ ве́ки.
И ны́не и при́сно и во ве́ки веко́в. Ами́нь.
Богородичен: Еди́ну Голуби́цу чи́сту Тя́ Жени́х мы́сленный обре́те, Всенепоро́чная, кри́н благово́ннейший, цве́т прекра́снейший и светоно́сен черто́г, Неве́сту приведе́. Те́мже Тя́, Де́ву, пое́м и превозно́сим во вся́ ве́ки.
Песнь 9
Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.
Припев: Святи́телю о́тче Ники́форе моли́ Бо́га о нас.
Обре́л еси́ блаже́нный коне́ц, преше́дшим зерца́лом, и́стине я́вльшейся, виде́нием нетле́нныя добро́ты, ея́же ны́не насыща́яся, твои́ми моли́твами на́с помина́й.
Припев: Святи́телю о́тче Ники́форе моли́ Бо́га о нас.
Ра́ку обступи́вше боже́ственную богоно́снаго Ники́фора, прииди́те, христоно́снии, усе́рдно я́ко победоно́сца сего́ воспои́м и того́ торжество́ с весе́лием пра́зднуим.
Сла́ва Отцу́ и Сы́ну и Свято́му Ду́ху:
Вся́ку доброде́тель удержа́в, при кончи́не подвиго́в испове́дания венце́м, священному́чениче, яви́лся еси́ укра́шен, и́мже удобре́н, твоему́ Влады́це ны́не предстои́ши.
И ны́не и при́сно и во ве́ки веко́в. Ами́нь.
Богородичен: Яко ко́рень, и исто́чник, и вину́ нетле́ния Тя́, Де́во, вси́ ве́рнии, ве́дуще, хвала́ми почита́ем: Ты́ бо Ипоста́сное Безсме́ртие на́м источи́ла еси́.
Свети́лен.
Яко победоно́сец изря́ден страсте́й, Ники́форе, вене́ц сугу́б прия́л еси́ от Христа́ Спа́са: я́ко е́ресь богобо́рную боже́ственныя ико́ны отмета́ющих, прему́дре, низлага́я, святи́телю, и страда́лец, я́ко благоче́стия побо́рник, о́тче. О на́с у́бо моли́, чту́щих тя́, блаже́нне.
Сла́ва, и ны́не, Богородичен:
Оте́ческих не оста́вль не́др, а́ще и воплоти́лся еси́ от Де́вы, Го́споди, и́бо спасти́ мене́, па́дшаго, преклони́в небеса́, соше́л еси́ и исхи́тити хотя́ от у́ст зве́ря мы́сленнаго и его́ удавле́нии держи́маго. Те́мже, изба́влься, сла́влю Твою́ си́лу.
Моли́тва
О пречестна́я и свяще́нная главо́ и благода́ти Свята́го Ду́ха испо́лненная, Спа́сово со Отце́м обита́лище, вели́кий архиере́е, те́лпый наш засту́пниче, святи́телю Ники́форе! Предстоя́ у Престо́ла всех Царя́, и наслажда́яся Све́та Единосу́щныя Тро́ицы, и херуви́мски со А́нгелы возглаша́я песнь Трисвяту́ю, вели́кое и неизсле́дованное дерзнове́ние име́я ко Всеми́лостивому Влады́це, моли́ся па́ствы Христо́вы спасти́ лю́ди, благостоя́ние святы́х церкве́й утверди́, архиере́и благоле́пием святи́тельства укра́си, мона́шествующих к по́двигам до́браго тече́ния укрепи́, град Москву́ и вся гра́ды и страны́ до́бре сохрани́ и ве́ру святу́ю непоро́чну соблюсти́ умоли́. Мир весь умири́, от гла́да и па́губы изба́ви ны и от нападе́ния иноплеме́нных сохрани́, ста́рыя уте́ши, ю́ныя накажи́, безу́мныя умудри́, вдови́цы поми́луй, сироты́ заступи́, младе́нцы возрасти́, плене́нныя возврати́, немощству́ющия исцели́ и везде́ те́пле призыва́ющих тя и с ве́рою притека́ющих к тебе́ и усе́рдно припа́дающих и моля́щихся от вся́ких напа́стей и бед хода́тайством твои́м свободи́. Моли́ о нас Всеще́драго и Человеколюби́ваго Христа́ Бо́га на́шего, да и в день стра́шнаго прише́ствия Его́ шу́ияго стоя́ния изба́вит ны и ра́дости святы́х прича́стники сотвори́т со все́ми святы́ми во ве́ки. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Святителю Никифору, патриарху Константинопольскому Святителю Никифору, патриарху Константинопольскому](img_b/041.jpg)