Шрифт

14 июня.

Канон мученику Иустину Философу и другому мученику Иустину, и иже с ними

мученику Иустину Философу, и другому мученика Иустину
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Му́ченицы Твои́, Го́споди, во страда́ниих свои́х венцы́ прия́ша нетле́нныя от Тебе́, Бо́га на́шего: иму́ще бо кре́пость Твою́, мучи́телей низложи́ша, сокруши́ша и де́монов немощны́я де́рзости; те́х моли́твами спаси́ ду́ши на́ша.

Кано́н, гла́с 2.

Пе́снь 1.

Ирмос: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися.

Припев: Святи́и му́ченицы, моли́те Бо́га о нас.

Му́ченическими укра́шени светлостьми́, чи́стому предстоите́, му́ченицы, престо́лу Влады́ки все́х, на́ших согреше́ний разреше́ние подаю́ще.

Припев: Святи́и му́ченицы, моли́те Бо́га о нас.

Благочести́вии и́стины побо́рницы, пред мучи́тельским суди́щем подви́гшеся единому́дренно, низложи́ша пре́лесть диа́волю си́лою духо́вною.

Сла́ва Отцу́ и Сы́ну и Свято́му Ду́ху:

Ра́нами, и я́звами, и скорбьми́ благозва́ннии искупи́ша великому́ченицы Христо́во Ца́рство, в не́мже венцено́сцы ны́не живу́т.

И ны́не и при́сно и во ве́ки веко́в. Ами́нь.

Богородичен: Ущедря́я Твои́х ру́к созда́ние, в ми́лости Бога́тый, во утро́бу всели́лся еси́ Неискусому́жныя Де́вы и Сию́ Предста́тельницу на́м показа́л еси́.

Пе́снь 3.

Ирмос: Утверди́ на́с в Тебе́, Го́споди, дре́вом умерщвле́й гре́х, и стра́х Тво́й всади́ в сердца́ на́с, пою́щих Тя́.

Припев: Святи́и му́ченицы, моли́те Бо́га о нас.

Утвержде́ние Христа́ в се́рдцы твое́м нося́, му́жески сопроти́вился еси́, Иусти́не, истяза́ющему, беззако́нновати пребеззако́нно тебе́ веля́щему.

Припев: Святи́и му́ченицы, моли́те Бо́га о нас.

Ли́к богосия́нен, во́инство богоизбра́нное святы́х му́ченик, святы́й собо́р собра́вся ны́не, победи́ враги́ безпло́тныя с те́лом.

Сла́ва Отцу́ и Сы́ну и Свято́му Ду́ху:

Те́ло ра́нам веледу́шнии преда́вше, ра́довахуся, прозря́ще ве́чное наслажде́ние, и бу́дущую сла́ву, и све́тлость.

И ны́не и при́сно и во ве́ки веко́в. Ами́нь.

Богородичен: Облаки души́ моея́ разори́, Со́лнца сла́вы ле́гкий о́блаче, и у́м мо́й све́том наста́ви, почерне́нием зло́бы омраче́нный.

Седа́лен, гла́с 5.

Иусти́н и Харито́н, Пео́н, Еве́лпист, Хари́та, и Иера́кс, и Валериа́н, свети́льницы све́тлии, озаря́ющии концы́ земны́я луча́ми подвиго́в свои́х, велегла́сно да восхва́лятся ве́рою, Христу́ молящеся спасти́ся на́м.

Сла́ва, и ны́не, Богородичен:

Те́плая Предста́тельнице и непобеди́мая, упова́ние изве́стное и непосты́дное, стено́, и покро́ве, и приста́нище прибега́ющим к Тебе́, Присноде́во Чи́стая, Сы́на Твоего́ и Бо́га моли́ со Ангелы умире́ние да́ти ми́рови, и спасе́ние, и ве́лию ми́лость.

Пе́снь 4.

Ирмос: Услы́шах, Го́споди, слу́х Твоего́ смотре́ния, и просла́вих Тя́, Еди́не Человеколю́бче.

Припев: Святи́и му́ченицы, моли́те Бо́га о нас.

Иусти́на, и Харито́на, и Хари́ты, и Пео́на страда́нием Ангельстии чи́нове удиви́шася.

Припев: Святи́и му́ченицы, моли́те Бо́га о нас.

Сокруша́ема телеса́ ра́нами боже́ственное исхода́тайствоваша до́блим блаже́нство.

Сла́ва Отцу́ и Сы́ну и Свято́му Ду́ху:

Якоже мы́сленное у́глие, боже́ственным огне́м попали́сте ле́сть и свети́ла ми́ра, му́ченицы, яви́стеся.

Еве́лписта, Иера́кса, непрекло́нных му́ченик му́жеству тмы́ кня́зи убоя́шася.

И ны́не и при́сно и во ве́ки веко́в. Ами́нь.

Богородичен: Иже о́гнь Божества́ во утро́бе, Де́во, прие́мшая, огня́ мя́ изба́ви и му́ки.

Пе́снь 5

Ирмос: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем.

Припев: Святи́и му́ченицы, моли́те Бо́га о нас.

Ду́ха Боже́ственнаго испо́лнився, лука́вствия лю́тыя ду́хи тече́нии крове́й твои́х, му́чениче Иусти́не, удави́л еси́, блаже́нне, пострада́в кре́пко.

Припев: Святи́и му́ченицы, моли́те Бо́га о нас.

Благода́ти тезоимени́тая, благода́ти Бо́жия испо́лнена бы́сть, и, же́нскую забы́вши я́ве не́мощь, пострада́ зако́нно, и сла́ву получи́.

Сла́ва Отцу́ и Сы́ну и Свято́му Ду́ху:

Облагода́тив ду́шу испове́дании свяще́нными, притупи́л еси́ ве́тхаго врага́ зло́бу, Харито́не страда́льне, боже́ственных страстоте́рпец честно́е удобре́ние.

И ны́не и при́сно и во ве́ки веко́в. Ами́нь.

Богородичен: Яже Спа́са Христа́, уподо́бльшася земны́м, ро́ждшая, премно́жеством бога́тства милосе́рдия, Того́, я́ко Бо́га, Чи́стая, моли́ спасти́ рабы́ Твоя́.

Пе́снь 6.

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Припев: Святи́и му́ченицы, моли́те Бо́га о нас.

Иусти́на и Харито́на, Пео́на и Валериа́на, Хари́ты же, и Иера́кса, и Еве́лписта вси́ пресве́тлую па́мять просла́вим.

Припев: Святи́и му́ченицы, моли́те Бо́га о нас.

Безво́лненно муче́ния пучи́ну боже́ственным правле́нием проидо́сте, му́ченицы, и ко приста́нищу благоути́шному Христо́ва Ца́рства доидо́сте.

Сла́ва Отцу́ и Сы́ну и Свято́му Ду́ху:

Якоже неле́стныя зве́зды, сия́юще Це́ркви честны́м утвержде́нием, вселе́нную всю́ светосия́нием страда́ния просвеща́ете.

И ны́не и при́сно и во ве́ки веко́в. Ами́нь.

Богородичен: Безме́рнаго окамене́ния изба́ви мя́, одержи́маго мно́гими согреше́нии, Богороди́тельнице Влады́чице, и гее́нскому огню́ подлежа́щаго.

Конда́к, гла́с 2:

Прему́дростию боже́ственных твои́х слове́с, Иусти́не, Це́рковь Бо́жия вся́ украси́вшися, жития́ твоего́ све́тлостию ми́р освеща́ет, излия́ния же ра́ди кро́ве вене́ц прие́м и со Ангелы предстоя́ Христу́, моли́ непреста́нно о все́х на́с.

Пе́снь 7.

Ирмос: Те́лу злато́му прему́дрыя де́ти не послужи́ша, и в пла́мень са́ми поидо́ша, и бо́ги и́х обруга́ша, среди́ пла́мене возопи́ша и ороси́ я́ Ангел: услы́шася уже́ у́ст ва́ших моли́тва.

Припев: Святи́и му́ченицы, моли́те Бо́га о нас.

Пре́лести глубину́ крове́й реко́ю изсуши́сте, то́ки чуде́с источи́сте, угаша́юще у́глие, му́ченицы, лю́тых страсте́й вопию́щим всегда́: благослове́н Бо́г оте́ц на́ших.

Припев: Святи́и му́ченицы, моли́те Бо́га о нас.

Божества́ огне́м любве́, му́дрии, ве́щь зло́бы доблему́дренно попали́сте и, я́ко огнесия́нни, возсия́вше, все́х вопию́щих сердца́ благоче́стно просвети́сте: благослове́н Бо́г оте́ц на́ших.

Сла́ва Отцу́ и Сы́ну и Свято́му Ду́ху:

Му́дростию Бо́жиею Иусти́н му́дрый укра́шен, е́ллинское обуи́ мудрова́ние благода́тию, уве́рив покланя́тися Тро́ице и правосла́вно зва́ти: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богородичен: Де́во Честна́я, Неискусобра́чная, Чи́стая, Благослове́нная, низпа́дающих исправле́ние, согреша́ющих проще́ние, спаси́ мя, блу́днаго, спаси́ Сы́ну Твоему́ зову́ща: благослове́н Бо́г оте́ц на́ших.

Пе́снь 8.

Ирмос: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки.

Припев: Святи́и му́ченицы, моли́те Бо́га о нас.

Якоже в пещи́ о́гненней, в му́ках терпели́вно искуси́вшеся, страстоте́рпцы Госпо́дни, па́че зла́та вои́стинну боже́ственно, вопию́ще, облиста́сте: Христа́ превозно́сим во вся́ ве́ки.

Припев: Святи́и му́ченицы, моли́те Бо́га о нас.

Со Иусти́ном му́дрым да воспое́тся Хари́та, и Харито́н, и Пео́н, и Иера́кс вели́кий с Валериа́ном, страда́нием ле́сть отгна́вшии и Ангельским лико́м совоку́пльшиися.

Сла́ва Отцу́ и Сы́ну и Свято́му Ду́ху:

К ве́чней жи́зни ведо́ми, му́дрии, доблему́дренно вы́и мечу́ единомы́слием души́ вси́ преклони́сте, му́ченицы, я́ко же́ртвы, Бо́гу приве́дшеся.

И ны́не и при́сно и во ве́ки веко́в. Ами́нь.

Богородичен: Живота́ су́щи исто́чник, я́ко во́ду жи́зни поро́ждши, ду́шу мою́, иста́явшую грехо́вным пла́менем, Де́во Богоро́дице, напо́й, да Тя́ сла́влю во вся́ ве́ки.

Песнь 9

Ирмос: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем.

Припев: Святи́и му́ченицы, моли́те Бо́га о нас.

Боже́ственною сия́юще сла́вою, сту́день пре́лести разруши́сте, до́блии страда́льцы, и о́бщницы бы́сте свяще́нных страсте́й пло́ть прии́мшаго на́с ра́ди, с Ни́м ве́чно на небесе́х ра́дуетеся.

Припев: Святи́и му́ченицы, моли́те Бо́га о нас.

Иусти́нове му́дрости, и Хари́ты му́жеству, и Харито́нове де́рзости вои́стинну, Пео́ны же и Иера́кса до́блим подвиго́м и Валериа́на к лю́тым мно́гому терпе́нию и Ангели чуди́шася.

Сла́ва Отцу́ и Сы́ну и Свято́му Ду́ху:

Якоже на колесни́цу боже́ственную все́дше сла́вно, кро́вию ва́шею к небеси́ ра́достно востеко́сте и руко́ю живоно́сною побе́дныя прия́сте, му́дрии, венцы́, непреста́нно о на́с моля́щеся.

И ны́не и при́сно и во ве́ки веко́в. Ами́нь.

Богородичен: Неискусому́жно Сло́во па́че сло́ва ро́ждшая, Де́во Неискусобра́чная, Чи́стая, напа́стей изми́ на́с, и вся́ких бе́д, и вре́да душетле́нна, и страсте́й, и ве́чнующаго пла́мене, и осужде́ния.

Молитва

Святи́и му́ченицы Христовы! При́зрите с Небе́снаго черто́га на тре́бующих ва́шей по́мощи и не отве́ргните проше́ний на́ших; но я́ко при́снии благоде́тели и хода́таи на́ши, моли́те Христа́ Бо́га, да человеколюби́в и многоми́лостив сый, сохрани́т нас от вся́каго лю́таго обстоя́ния: от тру́са, пото́па, огня́, меча́, наше́ствия иноплеме́нников и междоусо́бныя бра́ни. Да не осу́дит нас гре́шных по беззако́ниям на́шим, и да не во зло обрати́м блага́я, да́руемая нам от всеще́драго Бо́га, но во сла́ву свята́го и́мени Его́ и в прославле́ние кре́пкаго ва́шего заступле́ния. Да моли́твами ва́шими даст нам Госпо́дь мир по́мыслов, воздержа́ние от па́губных страсте́й и от вся́кия скве́рны; и да укрепи́т во всем ми́ре Свою́ еди́ну Святу́ю, Собо́рную и Апо́стольскую Це́рковь, ю́же стяжа́л есть честно́ю Свое́ю кро́вию. Моли́теся приле́жно, святи́и му́ченицы, да утверди́т Христо́с Бог во Святе́й Свое́й Правосла́вной Це́ркви живы́й дух пра́выя ве́ры и благоче́стия; да вси чле́ны ея́, чи́стии от суему́дрия и суеве́рия, ду́хом и и́стиною покланя́ются Ему́ и усе́рдно пеку́тся о соблюде́нии Его́ за́поведей; да мы вси в ми́ре и благоче́стии поживе́м в настоя́щем ве́це и дости́гнем блаже́нныя ве́чныя жи́зни на Небеси́, благода́тию Го́спода на́шего Иису́са Христа́, Ему́же подоба́ет вся́кая сла́ва, честь и держа́ва со Отце́м и Святы́м Ду́хом, ны́не и при́сно и во ве́ки веко́в. Ами́нь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.

мученику Иустину Философу, и другому мученика Иустину