14 июня.
Канон преподобному Агапиту Печерскому, врачу безмездному.
![Преподобному Агапиту Печерскому, врачу безмездному Преподобному Агапиту Печерскому, врачу безмездному](img_i/037.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 5:
Богоно́снаго Анто́ния ревну́я смиренному́дрию, а́ки не́киим врачевство́м — зе́лием сне́дным, исцеля́л еси́ боля́щия, преподо́бне Ага́пите, те́м и врача́ неве́рна уве́рив, наста́вил еси́ на пу́ть спасе́ния. Уврачу́й и на́ша боле́зни и моли́ся Го́сподеви о воспева́ющих тя́.
Велича́ние:
Ублажа́ем тя́, преподо́бне о́тче Ага́пите, и чте́м святу́ю па́мять твою́, наста́вниче мона́хов и собесе́дниче Ангелов.
Кано́н преподо́бнаго, гла́с 6.
Пе́снь 1.
Ирмос: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.
Припев: Преподо́бне о́тче Ага́пите, моли́ Бо́га о нас.
Яко нема́го дре́вле прикоснове́нием устро́ил еси́ пра́во глаго́лати, си́це и мне́, Христе́, мо́й язы́к разреши́, у́м отве́рзи, да принесу́ в па́мять уго́дника Твоего́ хвале́ние, любо́вию пою́щи.
Припев: Преподо́бне о́тче Ага́пите, моли́ Бо́га о нас.
Не могу́ воспе́ти я́сно благода́ти твоея́, преподо́бне, а́ще не ты́ моли́твами твои́ми пода́си мне́ по́мощь, да просла́влю Влады́ку, да́вшаго тебе́ благода́ть исцеле́ний, во хвале́нии пою́щи.
Припев: Преподо́бне о́тче Ага́пите, моли́ Бо́га о нас.
По предуве́дению воззва́н бы́л еси́, свя́те, в сле́д Влады́ки своего́ ше́ствовати и, Тому́ после́дуя, вся́ кра́сная ми́ра оста́вль, любо́вию прише́л еси́ к вели́кому Анто́нию и с ни́м пожи́л еси́, непреста́нное хвале́ние Бо́гу пою́щи.
Сла́ва Отцу́ и Сы́ну и Свято́му Ду́ху:
Земно́му Ангелу и небе́сному челове́ку после́дуя, и са́м Ангельское житие́ стяжа́л еси́, о́тче преподо́бне. Те́м твоя́ исправле́ния почита́ем и прославля́ем все́х Влады́ку, о тебе́ пе́снь Ему́ пою́ще.
И ны́не и при́сно и во ве́ки веко́в. Ами́нь.
Богородичен: От земны́х и небе́сных си́л сла́вимая, Присноде́во, в дне́шний де́нь хвале́ние Тебе́ дерза́ющих приноси́ти, от все́х прило́гов сохраня́й, да вы́ну Тя́ воспое́м, Обра́дованная.
Пе́снь 3.
Ирмос: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.
Припев: Преподо́бне о́тче Ага́пите, моли́ Бо́га о нас.
Во мно́гих ле́тех мно́жайшия проше́л еси́ труды́, Ага́пите, подвиза́яся во бде́нии и поще́нии, до́ндеже единонра́вен показа́лся еси́ наста́внику своему́ и от него́ утверди́лся еси́ на ка́мени тве́рдаго жития́.
Припев: Преподо́бне о́тче Ага́пите, моли́ Бо́га о нас.
Ничто́же и́но, то́кмо нищету́ име́я, обнища́вшему на́с ра́ди Христу́ после́довал еси́, о́тче, и, Того́ за́поведи храня́, служи́л еси́ больны́м, посеща́я, и упокоева́я, и здра́вие те́м моли́твою свое́ю подава́я.
Припев: Преподо́бне о́тче Ага́пите, моли́ Бо́га о нас.
С преподо́бным жи́тельствуя, стяжа́л еси́ преподо́бство, достохва́льне Ага́пите, и исцеле́ния даро́в сподо́бился еси́, я́ко моли́твою и зе́лием сне́дным здра́вие подава́л еси́ боля́щим, те́мже и вра́чь наре́клся еси́ безме́здный.
Сла́ва Отцу́ и Сы́ну и Свято́му Ду́ху:
Просла́вил еси́ Бо́га во удесе́х твои́х, преподо́бне, те́мже и Бо́г тя́ просла́ви благода́тию исцеле́ния, и́мже и на́ша неду́ги уврачу́й душе́вныя и теле́сныя, да утверди́мся на ка́мени испове́дания Бо́жия.
И ны́не и при́сно и во ве́ки веко́в. Ами́нь.
Богородичен: Израсти́вшая живо́тное Дре́во, того́ плодо́м на́с, умерщвле́нных греха́ми, оживи́ и да́руй на́м, Ма́ти Чи́стая, кре́пкое бла́гости Твоея́ испове́дание.
Седа́лен, гла́с 4:
Яко ту́не прие́мый от Бо́га да́р исцеле́ния, стра́ждущим исцеле́ние ту́не подае́ши, с ве́рою к тебе́ притека́ющим. Те́мже и мы́, кла́няющеся ра́це моще́й твои́х, о́тче преподо́бне, про́сим прия́ти от тебе́ неду́гом на́шим исцеле́ние.
Сла́ва, и ны́не, Богородичен:
К Твоему́ благоутро́бию в ско́рбех притека́юще, мо́лимся, Всенепоро́чная: пода́ждь преподо́бнаго Твоего́ ра́ди на́м, неду́ги одержи́мым, ско́рое исцеле́ние.
Пе́снь 4.
Ирмос: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.
Припев: Преподо́бне о́тче Ага́пите, моли́ Бо́га о нас.
Бу́ия ми́ра сего́ Христо́с избра́, да прему́дрыя посрами́т, е́же и на тебе́ сбы́стся, о́тче всеблаже́нне: благода́тию бо, а не хи́тростию прему́драго посрами́л еси́ врача́. Те́м тя́ сла́вим, о Го́споде пра́зднующи.
Припев: Преподо́бне о́тче Ага́пите, моли́ Бо́га о нас.
Прельсти́ся, и́же пе́рвее больны́х прельща́ше, извеща́я и́м де́нь и ча́с сме́рти, ему́же ты́ поноси́в, преподо́бне, боля́щаго исцели́л еси́ моли́твою и зе́лием сне́дным, ре́к: да́ждь сла́ву Бо́гу, иму́щему клю́чь живота́ и сме́рти.
Припев: Преподо́бне о́тче Ага́пите, моли́ Бо́га о нас.
За́висти стрело́ю злочести́вый армени́н уя́звен, поноша́ше ти́, свя́те, и, посла́в на сме́рть осужде́ннаго, повеле́ пред тобо́ю умертви́ти бы́лием смертоно́сным. Но ты́ сего́ моли́твою и зе́лием исцели́в, посрами́л еси́ еретика́, хотя́щаго тя́ посрами́ти.
Сла́ва Отцу́ и Сы́ну и Свято́му Ду́ху:
Претыка́ющемуся, да́нная ти́ благода́ть бы́сть паде́ние, преблаже́нне, наипа́че бо на тя́ вооружи́вся злочести́вый армени́н, наусти́ да́ти тебе́ отра́ву, но ты́, и сме́ртно испи́в, невреди́мь бы́л еси́, я́ко Бо́жия благода́ть сохрани́ тя к бо́льшему чудоде́йствию.
И ны́не и при́сно и во ве́ки веко́в. Ами́нь.
Богородичен: Ра́дуйся, сосу́де, носи́вший мѵ́ро, исцели́вшее ро́д челове́ческий; я́дом мя́ грехо́вным умерщвле́нна оживи́, да про́чее вре́мя це́л поживу́, Тя́, Де́во, восхваля́ющи.
Пе́снь 5
Ирмос: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.
Припев: Преподо́бне о́тче Ага́пите, моли́ Бо́га о нас.
От Бо́га благода́ть исцеле́ния прие́мь, исцели́л еси́ кня́зя, и́же а́ще и врачу́емь бе́ от армени́на, но не получа́ше отра́ды, твоего́ же зе́лия вкуси́в, от неду́га изба́вися.
Припев: Преподо́бне о́тче Ага́пите, моли́ Бо́га о нас.
Зри́те, и́ночествующии, и доброде́тельному терпе́нию богоно́снаго отца́ почуди́теся, ка́ко со отрече́нием ми́ра во́ли своея́ отрече́ся, и не изы́де никогда́же вне́ вра́т монасты́рских, е́же ви́дяще, сему́ поревну́йте.
Припев: Преподо́бне о́тче Ага́пите, моли́ Бо́га о нас.
Еди́ну любо́вь ко все́м иму́щи, а не на лице́ зря́щи, а́ще кня́зь, а́ще про́ст к тебе́ прихожда́ше, преподо́бне, все́м приходя́щим подава́л еси́ исцеле́ние ту́не, еди́наго ища́ возме́здия от Бо́га.
Сла́ва Отцу́ и Сы́ну и Свято́му Ду́ху:
Прие́мь кня́зь тобо́ю исцеле́ние, всеблаже́нне, уразуме́, я́ко и́стинен ра́б Бо́жий еси́, и ви́дети тя́ жела́ше, те́мже прии́де к тебе́ с да́ры. Ты́ же, Еди́наго име́я Бо́га, ничто́же от те́х даро́в восхоте́л еси́ прия́ти.
И ны́не и при́сно и во ве́ки веко́в. Ами́нь.
Богородичен: Хва́лим Тя́, Пречи́стая Де́во, я́ко отверза́еши на́м две́ри ми́лости Твоея́ и подае́ши все́м незави́стный исто́чник исцеле́ния, от я́да грехо́внаго избавля́ющий.
Пе́снь 6.
Ирмос: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.
Припев: Преподо́бне о́тче Ага́пите, моли́ Бо́га о нас.
Вся́ тле́нная ми́ра сего́ оста́вив, принесе́нное зла́то изве́ргл еси́, блаже́нне, пред враты́ ке́ллии своея́, изверга́я вку́пе любоиме́ннаго врага́ и стира́я душегу́бную того́ главу́.
Припев: Преподо́бне о́тче Ага́пите, моли́ Бо́га о нас.
Еди́н би́сер стяжа́в многоце́нный — Иису́са, вся́ во уме́ты вмени́л еси́, свя́те, и те́м купи́л еси́ себе́ селе́ние в небе́сных, е́же и мы́ получи́ти мо́лимся твои́ми, о́тче, моли́твами.
Припев: Преподо́бне о́тче Ага́пите, моли́ Бо́га о нас.
Мно́гими ле́ты постя́ся, изнемо́гл еси́ те́лом, преподо́бне, но ду́хом пребы́л еси́ кре́пок, а́ки сто́лп, вся́ наноси́мая терпя́ и благодаря́ Бо́га, к Нему́ взыва́л еси́: возведи́ от тли́ живо́т мо́й, Многоми́лостиве.
Сла́ва Отцу́ и Сы́ну и Свято́му Ду́ху:
Те́лом боле́знуя, ду́хом бра́лся еси́ с злочести́вым армени́ном, и́же по трие́х дне́х сме́рть тебе́ провозвеща́ше, сего́ ты́, блаже́нне, одоле́л еси́, по трие́х ме́сяцех отше́ствие свое́ к Бо́гу возвеща́я.
И ны́не и при́сно и во ве́ки веко́в. Ами́нь.
Богородичен: Во Твое́ чре́во, Пренепоро́чная Де́во, все́льшееся Сло́во, ро́д челове́ческий в небе́сных дво́рех всели́. Умоли́ Того́ от тле́ния мя́ сея́ жи́зни пресели́ти, иде́же пото́ком сла́дости пита́ются святи́и.
Конда́к, гла́с 6:
Вра́ч сы́й изря́ден, чу́дне, явля́я несумне́нную твою́ ве́ру, облича́я же армени́ново неве́рие и приводя́ его́ к благоче́стию, себе́, бли́з сме́рти бы́вшу, испроси́л еси́ от Бо́га продолже́ние живота́ и, си́м чу́дом того́ уве́рив, приве́л еси́ Христо́ви, Ему́же в весе́лии предстоя́, моли́ся о на́с, преподо́бне.
Икос:
Ангелов подража́теля и безпло́тных си́л собесе́дника, Ангельскими язы́ки подоба́ет ублажи́ти тя́, преподо́бне, оба́че приими́, а́ще и от челове́ческих бре́нных усте́н, сию́ достодо́лжную тебе́ похвалу́: ра́дуйся, преподо́бне, во все́х за́поведех Госпо́дних пра́во ходи́вый; ра́дуйся, богоно́сне, и́го благо́е и ле́гкое на ра́менах твои́х носи́вый. Ра́дуйся, в моли́тве преуспе́вый; ра́дуйся, пеще́рною тесното́ю простра́нства небе́снаго дости́гнувый. Ра́дуйся, равноа́нгельно во пло́ти пожи́вый; ра́дуйся, нетле́нием благода́тным просла́вленный. Ра́дуйся, чудотворе́ния да́ром обогаще́нный; ра́дуйся, целе́бниче вся́ких неду́гов. Ра́дуйся, помо́щниче в беда́х и напа́стех; ра́дуйся, Анто́ния богоно́снаго подража́телю. Ра́дуйся, Феодо́сия богому́драго после́дователю; ра́дуйся, Ага́пите, моли́твенниче о душа́х на́ших.
Пе́снь 7.
Ирмос: Росода́тельну у́бо пе́щь соде́ла Ангел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.
Припев: Преподо́бне о́тче Ага́пите, моли́ Бо́га о нас.
Дарова́ние имы́й свы́ше неду́ги исцеля́ти, преподо́бне, боля́ща мя́ небреже́нием благи́х дея́ний уврачу́й, я́коже иногда́ принесе́ннаго в неду́зе уврачева́л еси́, моли́твою пода́в тому́ здра́вие и воспе́в: благослове́н Бо́г оте́ц на́ших.
Припев: Преподо́бне о́тче Ага́пите, моли́ Бо́га о нас.
Чудоде́йствуя святы́ми, тва́ри Созда́тель внеза́пу поста́ви тя́ здра́ва пред злочести́вым, и́же ви́дев, удиви́ся ско́рому твоему́ от боле́зни в здра́вие премене́нию. Му́чима мя́ я́звами сту́дных де́л, во измене́ние исправле́ния приведи́ твои́м, о́тче, свы́ше посеще́нием, да пою́: благослове́н Бо́г оте́ц на́ших.
Припев: Преподо́бне о́тче Ага́пите, моли́ Бо́га о нас.
Боле́знь твоя́ и зе́лие сне́дно пону́ди испове́сти врача́ свое́ злоче́стие, его́же укори́л еси́, я́ко дерзну́ осяза́ти святу́ю твою́ ру́ку; се́ дерза́ю и а́з к тебе́, о́тче, приступи́ти, но молю́ тя: не отри́ни мя́ в ну́ждах мои́х, да пою́: благослове́н Бо́г оте́ц на́ших.
Сла́ва Отцу́ и Сы́ну и Свято́му Ду́ху:
Трудо́в свои́х собра́в плоды́ с весе́лием, а́ки до́бр земледе́лец, блаже́нною кончи́ною отше́л еси́ к го́рним, прия́ти от Христа́ Бо́га дая́ние и прия́л еси́ от Него́ неконча́емую ра́дость, многочу́дне Ага́пите.
И ны́не и при́сно и во ве́ки веко́в. Ами́нь.
Богородичен: К Твоему́ приста́нищу прибега́ем, Богоневе́стная Де́во, носи́ми жите́йских страсте́й волна́ми, я́же Ты́ укроти́, да воспое́м Тебе́: ра́дуйся, приста́нище жите́йских пла́ваний.
Пе́снь 8.
Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.
Припев: Преподо́бне о́тче Ага́пите, моли́ Бо́га о нас.
Вра́чь бы́л еси́, о́тче, преди́вен, теле́сныя боле́зни врачу́я, в жи́зни се́й живы́й те́лом, по кончи́не же твое́й душе́вное врачевство́ подава́я, я́коже сие́ на армени́не яви́л еси́, души́ того́ да́в цельбу́ и ко благоче́стию наказа́ние.
Припев: Преподо́бне о́тче Ага́пите, моли́ Бо́га о нас.
Ви́дев тя́, свя́те, армени́н в виде́нии чу́дном, испове́да я́сно, я́ко свя́т еси́ и преподо́бен, и в ве́ру из неве́рия прело́жся, бы́сть и́нок твои́м направле́нием, его́же и на́с не лиши́, пою́щих Го́спода во ве́ки.
Припев: Преподо́бне о́тче Ага́пите, моли́ Бо́га о нас.
Мно́гое имы́й дарова́ние, чудоде́йствовал еси́, исцеля́я боля́щих, ны́не же, сподо́бивыйся бо́льших дарова́ний, приложи́ пла́стырь на ра́ны души́ моея́, да, получи́в осла́бу, превозношу́ Го́спода во ве́ки.
Сла́ва Отцу́ и Сы́ну и Свято́му Ду́ху:
Из пламенови́днаго све́та святы́м струи́ благода́ти подая́й, Христе́ Бо́же, паля́щия мя́ стра́сти угаси́ щедро́т Твои́х росо́ю, разгоня́я тму́ страсте́й. Се́ бо преподо́бный мо́лит с на́ми Тебе́, Го́спода, превозноси́маго от все́х во ве́ки.
И ны́не и при́сно и во ве́ки веко́в. Ами́нь.
Богородичен: Просвети́вшая ми́р пречи́стым Рождество́м Твои́м, мра́к злодея́ния моего́ разжени́, излива́я мне́ на благотворе́ние щедро́т Твои́х бога́тую ми́лость, да превозношу́ Тя, Ма́терь Бо́жию, во ве́ки.
Песнь 9
Ирмос: Бо́га челове́ком невозмо́жно ви́дети, на Него́же не сме́ют чи́ни Ангельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.
Припев: Преподо́бне о́тче Ага́пите, моли́ Бо́га о нас.
Богодарова́ннаго целе́бника лю́дие иму́ще, никто́же да гряде́т к су́етным враче́м, и́же име́ние и здра́вие врежда́ют, но тре́буяй с ве́рою да гряде́т к ра́це богоно́снаго отца́ и ту́не прии́мет исцеле́ние.
Припев: Преподо́бне о́тче Ага́пите, моли́ Бо́га о нас.
Мы́сленныя ура́ниша ны́ разбо́йницы ны́не, неисце́льныя у́бо иму́ще я́звы, несумне́нно к многочуде́сней припа́даем ра́це твое́й, преподо́бне, и про́сим: пода́ждь цельбу́ тре́бующим, да вси́ тя хва́лим и велича́ем.
Припев: Преподо́бне о́тче Ага́пите, моли́ Бо́га о нас.
В го́рняя душе́ю возше́д, во всесветя́щияся черто́ги, оста́вил еси́, преблаже́нне, ра́ку моще́й свои́х в пеще́ре; и́мже покланя́ющеся, про́сим: пода́ждь неду́гом на́шим исцеле́ние, да тя́ пе́сньми велича́ем.
Сла́ва Отцу́ и Сы́ну и Свято́му Ду́ху:
По́мощи от тебе́ в не́мощех прося́щих не пре́зри, но посеще́нием твои́м да́ждь душе́вное вку́пе и теле́сное исцеле́ние, преблаже́нне Ага́пите, я́ко сы́й вра́чь преизя́щный, да вы́ну тя́ велича́ем.
И ны́не и при́сно и во ве́ки веко́в. Ами́нь.
Богородичен: По́мощи от Тебе́ тре́бующих не пре́зри, Де́во, но подава́й с ве́рою к Тебе́ притека́ющим: Ты́ бо еси́ исто́чник цельба́м неоску́ден, да Тя́ с небе́сными си́лами при́сно велича́ем.
Свети́лен:
Тле́нная ми́ра оста́вив и нетле́нная сподо́бився прия́ти, потща́лся еси́ ху́ждшая на лу́чшая премени́ти, обнища́в любоиме́нием стра́стным, но обогати́вся дарова́нием исцеле́ний, и на́м сия́ пода́й, дне́сь па́мять твою́ почита́ющим, всеблаже́нне Ага́пите.
Сла́ва, и ны́не, Богородичен:
Спа́сшиися Тобо́ю, Чи́стую Тя́ Ма́терь испове́дуем: родила́ бо еси́ Того́, Иже Кресто́м разруши́ сме́рть, и, возше́д на высоту́, вся́ привлече́ к Себе́, и на́м дарова́ ве́лию ми́лость.
Молитва преподобному Агапиту Печерскому, врачу безмездному
О, всеблаже́нне Агапи́те, земны́й А́нгеле и Небе́сный челове́че! Припа́даем к тебе́ с ве́рою и любо́вию и мо́лим ти ся приле́жно: яви́ нам смире́нным и гре́шным свято́е свое́ заступле́ние; се бо грех ра́ди на́ших не и́мамы свобо́дны чад Бо́жиих проси́ти о потре́бах на́ших Го́спода и Влады́ку на́шего, но тебе́, моли́твенника благоприя́тнаго, к Нему́ предлага́ем и про́сим тя со усе́рдием мно́гим: испроси́ нам от бла́гости Его́ благопотре́бная дары́ душа́м и телесе́м на́шим, ве́ру пра́ву, любо́вь ко всем нелицеме́рну, в злострада́ниих терпе́ние, тя́жкими боле́знями одержи́мым — от неду́гов исцеле́ние, под бре́менем скорбе́й и напа́стей неудобоноси́мых падаю́щих и жития́ своего́ отча́явшихся твои́ми моли́твами получи́ти ско́рое облегче́ние и избавле́ние. Не забу́ди, блаже́нне о́тче, и оби́тель сию́ святу́ю, при́сно тя чту́щую, но соблюди́ ю́ и всех живу́щих и подвиза́ющихся в ней и на поклоне́ние в ню приходя́щих невреди́мыми от искуше́ний диа́вольских и вся́каго зла. Егда́ же приспе́ет на́ше от вре́меннаго сего́ жития́ отше́ствие, и к ве́чности преселе́ние, не лиши́ нас по́мощи твоея́ Небе́сныя, но моли́твами твои́ми всех нас приведи́ в приста́нище спасе́ния и насле́дники яви́ нас бы́ти всесве́тлаго Ца́рствия Христо́ва, да пое́м и сла́вим неизрече́нныя щедро́ты Человеколю́бца Бо́га Отца́ и Сы́на и Свята́го Ду́ха и твое́ вку́пе с преподо́бными Анто́нием и Феодо́сием оте́ческое зaступле́ние во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Преподобному Агапиту Печерскому, врачу безмездному Преподобному Агапиту Печерскому, врачу безмездному](img_b/037.jpg)