13 июня.

Канон святому мученику Ермею.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Му́ченик Тво́й, Го́споди, Ерме́й во страда́нии свое́м вене́ц прия́т нетле́нный от Тебе́, Бо́га на́шего: име́яй бо кре́пость Твою́, мучи́телей низложи́, сокруши́ и де́монов немощны́я де́рзости. Того́ моли́твами спаси́ ду́ши на́ша.

Кано́н, гла́с 8.

Пе́снь 1.

Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припев: Святы́й му́чениче Ерме́е, моли́ Бо́га о нас.

Звезда́, сия́ющая боже́ственным све́том, муче́ния сия́нием позна́н бы́л еси́, све́тло вся́ озаря́я, ве́рою чи́стою тя́, Ерме́е, чту́щия.

Припев: Святы́й му́чениче Ерме́е, моли́ Бо́га о нас.

Вы́ну воззре́нием, е́же к Бо́гу, вся́ презре́в, я́же в житии́, му́чениче му́дре, в му́ченическия вше́л еси́ по́двиги и врага́ держа́вно победи́л еси́.

Припев: Святы́й му́чениче Ерме́е, моли́ Бо́га о нас.

Красе́н виде́нием и душе́ю сы́й, Ерме́е, вво́инился еси́ Царю́ Небе́сному и Сего́, му́чениче, до конца́ враги́ смири́л еси́.

Сла́ва Отцу́ и Сы́ну и Свято́му Ду́ху:

Не поже́р и́долом, блаже́нне, твоя́ исторго́ша зу́бы, че́люсти мы́сленных сокруши́л еси́ льво́в и побе́ды оде́ялся венце́м неувяда́ющим.

И ны́не и при́сно и во ве́ки веко́в. Ами́нь.

Богородичен: Свята́я Де́во, Ма́ти Христо́ва, му́чеников сла́ва и Ангелов ра́досте, с ни́ми моли́ Сы́на Твоего́ уще́дрити и спасти́ рабы́ Твоя́.

Пе́снь 3.

Ирмос: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й.

Припев: Святы́й му́чениче Ерме́е, моли́ Бо́га о нас.

Украше́ние бы́л еси́ страда́льцев, му́дре, благода́тию богосия́нною. Те́мже, и́же в ми́ре, благоче́стно тя́ почита́ем.

Припев: Святы́й му́чениче Ерме́е, моли́ Бо́га о нас.

Хвалу́ Бо́гу на́шему, че́люстем твои́м сокруша́емым, му́чениче му́дре, тя́ укре́пльшему, благода́рно воспева́л еси́.

Сла́ва Отцу́ и Сы́ну и Свято́му Ду́ху:

Си́лою Боже́ственнаго Ду́ха ты́ укрепля́емь, прему́дре, си́льнаго, ра́дуяся, в зло́бе смири́л еси́ зми́я.

И ны́не и при́сно и во ве́ки веко́в. Ами́нь.

Богородичен: Усты́ и язы́ком испове́даю Тя́, Бо́га пресвяты́й хра́м, Пречи́стая, сего́ ра́ди вся́каго изба́ви мя́ озлобле́ния.

Седа́лен, гла́с 4.

Низло́жь враго́в возноше́ния, я́ко во́ин си́лен Влады́чень, побе́дный вене́ц прия́л еси́. Те́мже восхваля́ем тя́, я́ко до́бля страда́льца, ве́рою творя́ще твою́ всепра́зднственную па́мять, в не́йже моли́ спасти́ся на́м вся́кия ну́жды, Ерме́е многострада́льне.

Сла́ва, и ны́не, Богородичен:

По Бо́зе во Тво́й, Богоро́дице, прибега́ю смире́нный покро́в боже́ственный, припа́дая, молю́ся: поми́луй, Пречи́стая, я́ко превзыдо́ша главу́ мою́ греси́, и бою́ся, Влады́чице, му́ки, и трепе́щу. Моле́ние сотвори́, Чи́стая, к Сы́ну Твоему́ от си́х изба́вити мя́.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Святы́й му́чениче Ерме́е, моли́ Бо́га о нас.

То́ки крове́й твои́х многобо́жия о́гнь погаси́ша, ве́рным же роса́ яви́шася, страстоте́рпче му́чениче досточу́дне.

Припев: Святы́й му́чениче Ерме́е, моли́ Бо́га о нас.

Тро́ическою благода́тию, му́чениче, ороша́емь, пребыва́еши неопали́мь, посреди́ пла́мене стоя́ три́ дни́, всесла́вне.

Сла́ва Отцу́ и Сы́ну и Свято́му Ду́ху:

Ли́к небе́сных си́л свы́ше смотря́ше до́блесть, и по́двиг твои́х кре́пости, страда́льче Ерме́е, дивя́ся.

И ны́не и при́сно и во ве́ки веко́в. Ами́нь.

Богородичен: Препе́тая Влады́чице, во святы́х почива́ющаго па́че сло́ва родила́ еси́, сего́ ра́ди Тя́ пе́сньми почита́ем.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Святы́й му́чениче Ерме́е, моли́ Бо́га о нас.

Сокруша́емь те́лом, му́чениче пресла́вне, мно́гими му́ками сокруше́ние соде́лал еси́ в поги́бель истука́нным благода́тию, сего́ ра́ди все́х благочести́вых благода́тию Боже́ственною исцеля́еши душе́вная сокруше́ния.

Припев: Святы́й му́чениче Ерме́е, моли́ Бо́га о нас.

Го́рькими отра́вы, му́чениче, напое́н пребыва́еши невреди́мь, во изве́стну ве́ру призыва́я си́х Пода́теля, претворя́ема твои́м све́тлым чудоде́йством к муче́ния красоте́ пресве́тло.

Сла́ва Отцу́ и Сы́ну и Свято́му Ду́ху:

Ника́коже уклони́лся еси́ стоя́ния лу́чшаго, блаже́нне, укрепля́ющаго тя́, и утвержда́юща, и исправля́юща по́двиги вся́, е́же к нему́ бы́вшее, прозря́ нра́ва простото́ю.

И ны́не и при́сно и во ве́ки веко́в. Ами́нь.

Богородичен: Мы́сленный Тя́ све́щник дре́вле проро́к ви́де Ду́хом, иму́щь, Отрокови́це, свещу́, Христа́ Го́спода, све́том неизрече́нным вся́ ны́ просвеща́юща, ве́рно Тя́ чту́щия, Пренепоро́чная.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Святы́й му́чениче Ерме́е, моли́ Бо́га о нас.

Всеце́ло к Бо́гу, всеблаже́нне, име́я жела́ние, боле́зни и терза́ния боже́ственнаго твоего́ телесе́, я́коже ино́му стра́ждущу, терпе́л еси́, ра́дуяся, венца́ прозира́я.

Припев: Святы́й му́чениче Ерме́е, моли́ Бо́га о нас.

Претерпе́л еси́ кре́пко жи́л твои́х отъя́тие, Ерме́е, му́чениче Христо́в, врага́ многоко́зненнаго жи́лы истерза́я благода́тию и му́жеству вся́кому о́браз явля́яся.

Сла́ва Отцу́ и Сы́ну и Свято́му Ду́ху:

Изощре́н огне́м Христо́вы любве́, я́ко обою́ду о́стр вои́стинну бы́л еси́ ме́чь во́инства безбо́жная, я́ко тве́рд ору́жник, посека́я явле́нно.

И ны́не и при́сно и во ве́ки веко́в. Ами́нь.

Богородичен: Пита́еши боголе́пно ма́нием вся́ Пита́ющаго, рука́ми держи́ши, Всенепоро́чная Влады́чице, вся́ Содержа́щаго, сего́ ра́ди Тя́, ве́рнии, по до́лгу сла́вим.

Конда́к, гла́с 6.

Иже по Христе́ усе́рдно подвиза́вся, в седи́нах до́блих му́жество стяжа́, му́чениче Ерме́е, беззако́нных злоумышле́ния попра́в Христо́вою си́лою, от чаро́вных напое́ний невреди́мь пребы́сть, зовы́й: Бо́г е́сть со мно́ю, и никто́же на мя́.

Пе́снь 7.

Ирмос: От Иуде́и доше́дше, о́троцы в Вавило́не иногда́ ве́рою Тро́ическою пла́мень пе́щный попра́ша пою́ще: отцев Бо́же, благослове́н еси́.

Припев: Святы́й му́чениче Ерме́е, моли́ Бо́га о нас.

К Бо́гу зря́, могу́щему спасти́, ума́ пра́востию, претерпе́л еси́ боле́зни, Ерме́е, до́бляго твоего́ те́ла, воспева́я: оте́ц на́ших Бо́же, благослове́н еси́.

Припев: Святы́й му́чениче Ерме́е, моли́ Бо́га о нас.

Кропле́нием твои́х крове́й о́гнь угаси́л еси́ безбо́жия, в пла́мень же вше́д, не опали́лся еси́ отню́д, воспева́я, пребога́те: оте́ц на́ших Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Блажи́т тя́ вся́ка це́рковь, зря́щи до́блести твоя́, благода́ть же чуде́с и побе́дныя по́чести, я́же подаде́ тебе́ Госпо́дь, му́чениче Ерме́е му́дре, све́тло подвиза́вшуся.

И ны́не и при́сно и во ве́ки веко́в. Ами́нь.

Богородичен: Украси́лася еси́, Де́во добро́тою, кра́снаго Христа́ ро́ждши, на́м уподо́бльшася и вся́ сокруше́нныя к жи́зни возве́дша. Те́мже ве́рно Тя́ всегда́ сла́вим в пе́снех.

Пе́снь 8.

Ирмос: Победи́тели мучи́теля и пла́мене благода́тию Твое́ю бы́вше, за́поведем Твои́м зело́ прилежа́ще, о́троцы вопия́ху: благослови́те, вся́ дела́ Госпо́дня, Го́спода.

Припев: Святы́й му́чениче Ерме́е, моли́ Бо́га о нас.

Беззако́нных веле́ние, зако́ном укрепля́емь и́стинным, страда́льче Ерме́е, ра́дуяся, преоби́дел еси́: и по́двиги вели́кими, блаже́нне, терпя́, прия́л еси́ я́же в вы́шних жили́ща во ве́ки.

Припев: Святы́й му́чениче Ерме́е, моли́ Бо́га о нас.

Не ужаса́юся вся́каго боле́зней веле́ния пребыва́ема, ни принесу́ че́сти не су́щим бого́м, — взыва́л еси́, всеблаже́нне, — еди́наго то́кмо чту́ Иису́са Го́спода, при Понти́йстем Пила́те распе́ншагося.

Сла́ва Отцу́ и Сы́ну и Свято́му Ду́ху:

Пожре́тися ше́л еси́, я́ко овча́ незло́биво, му́чениче Ерме́е, за Поже́ршагося на́с ра́ди, я́ко овча́те, и же́ртвы ме́рзкия вся́ от земли́ отъе́мшаго, те́мже во хвале́нии досто́йно тя́ пое́м.

И ны́не и при́сно и во ве́ки веко́в. Ами́нь.

Богородичен: Яви́лася еси́ ши́рши небе́с, вмести́вшая Бо́га во утро́бе, Его́же при́сно моли́ утесня́ющаго мя́ ны́не греха́ изба́вити, Де́во, я́ко да, просте́рся де́лы благоче́стия, ве́рно Тя́ ублажа́ю.

Песнь 9

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Припев: Святы́й му́чениче Ерме́е, моли́ Бо́га о нас.

Ви́дети сподо́бился еси́, разреши́вся от пло́ти, страстоте́рпче прехва́льне, блага́я, я́же тебе́ угото́ва Бо́г и с тобо́ю пострада́вшим и низло́жшим лука́ваго. С ни́миже на́м спасти́ся Го́спода моли́, му́чениче Ерме́е достохва́льне.

Припев: Святы́й му́чениче Ерме́е, моли́ Бо́га о нас.

Красе́н тво́й ви́д и пре́жде твоего́ страда́ния, красне́йши яви́ся, му́дре по по́двизех чу́дных, Ангельскою све́тлостию укра́шен, сла́вне. Те́мже и к кра́сным восте́кл еси́ черто́гом, побе́дными венцы́ удобре́н.

Припев: Святы́й му́чениче Ерме́е, моли́ Бо́га о нас.

Во́инство преоби́дел еси́ земно́е, Царю́ Небе́сному во́инствуеши, му́чениче му́дре, Его́же си́лою кре́пкою де́монския полки́ вся́ потреби́л еси́ держа́вно и побе́дными венцы́ зако́нно увя́злся еси́, о на́с моли́ всегда́.

Сла́ва Отцу́ и Сы́ну и Свято́му Ду́ху:

Па́мять твоя́ наста́ светоза́рная, на́ша мы́сли просвеща́ющи луча́ми по́двиг твои́х тве́рдых, в не́йже мо́лим тя́: име́яй дерзнове́ние ко Христу́, моли́ непреста́нно улучи́ти на́м ми́лость в де́нь Су́дный.

И ны́не и при́сно и во ве́ки веко́в. Ами́нь.

Богородичен: Обо́лкся в мя́, про́йде из Тебе́ Бо́г, нетле́ния облече́ мя оде́ждою, злы́м нра́вом обна́жшася боже́ственныя оде́жды, Богороди́тельнице Влады́чице, все́х челове́ков прибе́жище, му́чеников венцено́сных утвержде́ние и стена́ и Ангелов ра́дование.

Молитва

О святы́й уго́дниче Бо́жий, му́чениче Ерме́е! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.