Шрифт

12 июня.

Канон преподобному Исаакию Далматскому

Преподобному Исаакию, игумену обители Далматския
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь преподобным Исаакию, Далмату и Фавсту Далматским, глас 4

Бо́же оте́ц на́ших,/ творя́й при́сно с на́ми по Твое́й кро́тости,/ не отста́ви ми́лость Твою́ от нас,/ но моли́твами их// в ми́ре упра́ви живо́т наш.

Кано́н, гла́с 8.

Пе́снь 1.

Ирмос: Изра́иля от рабо́ты изба́вил еси́, Го́споди, десни́цею Твое́ю держа́вною, я́ко о́наго спа́сл еси́, ны́не на́с спаси́.

Припев: Преподо́бне о́тче Исаа́кие, моли́ Бо́га о нас.

От пусты́нных преде́л прини́кнув, преподо́бне, собра́ние е́реси расплени́в, свя́те, утверди́л еси́ ве́ру Христо́ву.

Припев: Преподо́бне о́тче Исаа́кие, моли́ Бо́га о нас.

Дави́дски пред цари́, сла́вне, глаго́ля, никогда́же постыде́лся еси́, Христо́ву хотя́ Це́рковь утверди́ти.

Сла́ва Отцу́ и Сы́ну и Свято́му Ду́ху:

В ти́не пре́лести, приве́ргся, прехва́льне, я́ко би́сер, просия́л еси́, заре́ю Ду́ха уясня́емь, сла́вне.

И ны́не и при́сно и во ве́ки веко́в. Ами́нь.

Богородичен: Во утро́бе заче́нши безле́тнаго, Пречи́стая, от Отца́ рожде́нна Сы́на, младе́нца Сего́, непоро́чная Де́во, породила́ еси́.

Пе́снь 3.

Ирмос: Утверди́ на́ш у́м и сердца́, небеса́ сло́вом утвержде́й, во е́же пе́ти и сла́вити Тя́, во спасе́ние ду́ш на́ших.

Припев: Преподо́бне о́тче Исаа́кие, моли́ Бо́га о нас.

Труба́ слове́сна Ду́ха яви́лся еси́, о́тче, вся́ созыва́ющи, я́коже на бра́нь, вра́жиим ополче́нием проти́ву ста́ти по́мощию Спа́са Христа́.

Припев: Преподо́бне о́тче Исаа́кие, моли́ Бо́га о нас.

Ле́ствица мы́сленная показа́лся еси́, богоно́се, к ца́рству веду́щи вы́шнему восходя́щия ве́рою, уче́нии твои́ми утвержда́емы в Ду́се.

Сла́ва Отцу́ и Сы́ну и Свято́му Ду́ху:

Гора́ и́стинно я́вствовался еси́ уче́ния, богоно́се, любо́вию Влады́ки, ко Христо́ве Це́ркви вся́ собира́я, сопряже́нныя доброде́тельми к Нему́.

И ны́не и при́сно и во ве́ки веко́в. Ами́нь.

Богородичен: Ма́ти и́стинно показа́лася еси́, о Де́во, Емману́ила ро́ждши, Бо́га Сло́ва, Его́же моля́щи не преста́й, безму́жная Неве́сто, благослове́нная Богоро́дице Чи́стая.

Седа́лен, гла́с 4.

Тучено́сный о́блак духо́вный яви́лся еси́, преблаже́нне, су́щим на земли́, напая́я, я́ко бразду́, ве́рных сердца́: обте́к же концы́ боже́ственными словесы́ твои́ми, до́ждь уче́ний источи́л еси́, прему́дре, те́мже, я́ко пото́ки, все́х сердца́ благово́ние Ду́ха богому́дренно израсти́л еси́, богоно́се Исаа́кие, моли́ Христа́ Бо́га грехо́в оставле́ние пода́ти чту́щим любо́вию святу́ю па́мять твою́.

Сла́ва, и ны́не, Богородичен:

Яко Всенепоро́чная Неве́ста Творцу́, я́ко Неискусому́жная Ма́ти Изба́вителя, прия́телище я́ко су́щи Уте́шителя, Препе́тая, беззако́нию мя́ су́ща скве́рное оби́телище и бесо́м игра́лище в ра́зуме бы́вша, потщи́ся от те́х злоде́йства мя́ изба́вити и све́тлое жили́ще доброде́телей соверши́, Светоно́сная Нетле́нная, отжени́ о́блак страсте́й и вы́шняго прича́стия сподо́би и Све́та невече́рняго моли́твами Твои́ми.

Пе́снь 4.

Ирмос: Услы́шах слу́х си́лы Твоея́, и возвесели́ся се́рдце мое́ о Го́споде.

Припев: Преподо́бне о́тче Исаа́кие, моли́ Бо́га о нас.

Ангелоподо́бно на земли́ показа́л еси́ житие́, лику́еши с небе́сными си́лами.

Припев: Преподо́бне о́тче Исаа́кие, моли́ Бо́га о нас.

Пе́рвее ты́ мона́хов настоя́тель бы́в, из пусты́ни, богому́дре, су́щим во гра́де о́браз показа́лся еси́, сла́вне.

Сла́ва Отцу́ и Сы́ну и Свято́му Ду́ху:

Па́мять твоя́ вои́стинну ны́не, Исаа́кие о́тче, весели́т сердца́ пою́щих тя́.

И ны́не и при́сно и во ве́ки веко́в. Ами́нь.

Богородичен: Богоро́дице, и ны́не, я́ко при́сно, от вра́г беззако́нных моли́твами Твои́ми свободи́ рабы́ Твоя́.

Пе́снь 5

Ирмос: От но́щи неве́дения богове́дением просвети́вый концы́, просвети́ мя у́тром человеколю́бия Твоего́, Го́споди.

Припев: Преподо́бне о́тче Исаа́кие, моли́ Бо́га о нас.

От пусты́ни вои́стинну, я́коже звезда́ светла́, возсия́л еси́ и ерети́ческую но́щь уче́нии твои́ми отгна́л еси́.

Припев: Преподо́бне о́тче Исаа́кие, моли́ Бо́га о нас.

Бразды́ удержа́в коня́ Уа́лентова, прехва́льне, ско́тский ра́зум обличи́л еси́, я́ве посрами́в его́.

Сла́ва Отцу́ и Сы́ну и Свято́му Ду́ху:

Главу́ твою́, о́тче, же́злием положи́л еси́ ураня́тися, мы́сленно ве́ры твоея́ главу́ держа́, Христа́ Бо́га.

И ны́не и при́сно и во ве́ки веко́в. Ами́нь.

Богородичен: Херуви́м я́вльшися честне́йши, Де́во Всепе́тая, моли́ Сы́на Твоего́ спасти́ ду́ши пою́щих Тя́.

Пе́снь 6.

Ирмос: Ри́зу мне́ пода́ждь све́тлу, одея́йся све́том, я́ко ри́зою, Многоми́лостиве Христе́ Бо́же на́ш.

Припев: Преподо́бне о́тче Исаа́кие, моли́ Бо́га о нас.

Проре́кл еси́ Уа́ленту, му́дре, ме́рзкую сме́рть проразуме́нием ду́ха и яви́лся еси́ вои́стинну проро́к сла́вен.

Припев: Преподо́бне о́тче Исаа́кие, моли́ Бо́га о нас.

Лопа́тою ве́ры ве́рных, я́ко пшени́цу, собра́л еси́, Уа́лента, я́ко пле́вы в пле́внице, запали́л еси́ моли́твами твои́ми, му́дре.

Сла́ва Отцу́ и Сы́ну и Свято́му Ду́ху:

Угла́дил еси́ скрижа́ли серде́чныя ве́рою послу́шающих тебе́, богому́дре Исаа́кие, начерта́в на ни́х правосла́вия о́браз.

И ны́не и при́сно и во ве́ки веко́в. Ами́нь.

Богородичен: Яже еди́на сло́вом пло́тию Сло́во ро́ждши, изба́ви, мо́лимся, сете́й вра́жиих ду́ши на́ша.

Конда́к, гла́с 8.

Яко уго́дник Бо́жий ве́рный, по Христо́ве Це́ркви ре́вностию разже́гся, бразды́ Уа́лентовы удержа́в, проро́чески тому́ о затворе́нии Це́ркве па́губную сме́рть предре́кл еси́, преподо́бне. Те́мже при́сно моли́ о на́с, чту́щих тя́, Исаа́кие преподо́бне.

Пе́снь 7.

Ирмос: В нача́ле зе́млю основа́вый и небеса́ сло́вом утверди́вый, благослове́н еси́ во ве́ки, Го́споди Бо́же оте́ц на́ших.

Припев: Преподо́бне о́тче Исаа́кие, моли́ Бо́га о нас.

Пода́вый преподо́бному Твоему́ сло́во обличи́тельно к мучи́телеве зло́бе, благослове́н еси́ во ве́ки, Го́споди Бо́же оте́ц на́ших.

Припев: Преподо́бне о́тче Исаа́кие, моли́ Бо́га о нас.

Во све́тлей пра́ведных сла́вно оби́тели водворя́яся, о́тче, вопие́ши Зижди́телю: благослове́н еси́ во ве́ки, Го́споди Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Отче честны́й, Спа́су моли́ся о на́с немо́лчно, не престая́, изба́витися вся́кия беды́ и неотъе́млемыя жи́зни улучи́ти ста́ду твоему́.

И ны́не и при́сно и во ве́ки веко́в. Ами́нь.

Богородичен: Иже во утро́бу Де́вы всели́выйся и в не́й Ада́ма назда́вый, благослове́н еси́ во ве́ки, Го́споди Бо́же оте́ц на́ших.

Пе́снь 8.

Ирмос: Безнача́льнаго Царя́ сла́вы, Его́же трепе́щут небе́сныя си́лы, по́йте, свяще́нницы, лю́дие, превозноси́те во вся́ ве́ки.

Припев: Преподо́бне о́тче Исаа́кие, моли́ Бо́га о нас.

Показа́вшаго правосла́вныя ве́ры побо́рника, Исаа́кия, вси́ по́йте, свяще́ннии, лю́дие, превозноси́те во вся́ ве́ки.

Припев: Преподо́бне о́тче Исаа́кие, моли́ Бо́га о нас.

Яко овча́ слове́сное, от пусты́ни прише́л еси́, отгоня́ зве́ри от ста́да Христо́ва, водворя́тися в ме́стех пусты́х прогоня́.

Сла́ва Отцу́ и Сы́ну и Свято́му Ду́ху:

Не убоя́лся еси́ Уа́лентовы, о́тче, лю́тыя и злы́я я́рости кро́тостию души́, де́йствоваше бо в тебе́ Ду́х Истины.

И ны́не и при́сно и во ве́ки веко́в. Ами́нь.

Богородичен: Жи́зни из Тебе́ отсече́ся Ка́мень, я́коже пи́шет, без руки́ челове́чи, Пресвята́я Чи́стая, Бо́г, благоволи́вый в Тя́ всели́тися.

Песнь 9

Ирмос: Тя́, Богоро́дицу, Ма́терь Све́та, в пе́снех велича́ем.

Припев: Преподо́бне о́тче Исаа́кие, моли́ Бо́га о нас.

Сокруши́л еси́ си́лы безбо́жных держа́вно кре́постию Боже́ственнаго Ду́ха.

Припев: Преподо́бне о́тче Исаа́кие, моли́ Бо́га о нас.

Разруши́л еси́ сою́зы, ве́ры сою́зом, ересе́й полки́.

Сла́ва Отцу́ и Сы́ну и Свято́му Ду́ху:

Исаа́кие богому́дре, помина́я к Бо́гу не преста́й, е́же спасти́ на́с.

И ны́не и при́сно и во ве́ки веко́в. Ами́нь.

Богородичен: Рождество́ Твое́, Де́во, е́же в печа́лех рожде́ние Евы претвори́.

Молитва

О свяще́нная главо́, преподо́бне о́тче, преблаже́нне а́вво Исаа́кие, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.

Преподобному Исаакию, игумену обители Далматския