11 июня

Канон святителю Луке, исповеднику, архиепископу Симферопольскому и Крымскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, глас 1:

Возвести́телю пути́ спаси́тельнаго,/ испове́дниче непоколеби́мый,/ и́стинный храни́телю оте́ческих преда́ний,/ Правосла́вия наста́вниче,/ Кры́мския земли́ архипа́стырю,/ врачу́ богому́дрый, святи́телю Луко́,/ Христа́ Спа́са непреста́нно моли́,/ дарова́ти душа́м на́шим ве́лию ми́лость.

Кано́н святи́телю. Глас 8.

Песнь 1

Ирмос: Ди́вному Бо́гу вели́чия принесе́м/ и великоле́пно с на́ми,/ да воспое́т земля́ и не́бо/ я́сно сла́ву Его́.

Припев: Святи́телю о́тче Луко́, моли́ Бо́га о нас.

Во дни гоне́ний тя́жких на Це́рковь Ру́сскую/ свяще́нный сан во гра́де Ташке́нте небоя́зненно прия́л еси́, блаже́нне Луко́,/ и отсту́пники, нововведе́ния льсти́вая вводя́щия, му́жественне облича́л еси́,/ принося́ вели́чие Бо́гу и воспева́я сла́ву Его́.

Припев: Святи́телю о́тче Луко́, моли́ Бо́га о нас.

Яви́лся еси́ па́стве твое́й, испове́дниче Христо́в,/ столп непоколеби́мый и защи́тник кре́пкий,/ боля́щим исцеле́ние, скорбя́щим утеше́ние,/ Бо́га велича́я и воспева́я сла́ву Его́.

Сла́ва Отцу́ и Сы́ну и Свято́му Ду́ху:

Вседержи́теля и Го́спода о нас моли́, святи́телю Луко́,/ дарова́ти нам оставле́ние прегреше́ний,/ да с тобо́ю ди́внаго Бо́га возвели́чим и воспое́м сла́ву Его́.

И ны́не и при́сно и во ве́ки веко́в. Ами́нь.

Богородичен: Тя призыва́ющим, Богороди́тельнице Пречи́стая,/ яви́лася еси́ спаси́тельное приста́нище и покро́в./ Те́мже любо́вию зове́м Ти:/ Влады́чице, спаси́ ны/ и научи́ ди́вному Бо́гу вели́чия приноси́ти и воспева́ти сла́ву Его́.

Песнь 3

Ирмос: Уподо́би мя, Христе́, у́мно горе́ Сио́нстей,/ возвы́сивый и утверди́вый в наде́жди о Тебе́/ и иска́павый ро́су благода́ти,/ Человеколю́бче.

Припев: Святи́телю о́тче Луко́, моли́ Бо́га о нас.

Егда́ в Сиби́рскую зе́млю изгна́н был еси́, святи́телю,/  тогда́ мно́гия гра́ды ея́ апо́стольскими труды́ просвети́л еси́/ и, теле́сныя неду́ги врачу́я,/ о лю́дех Бо́гу моли́лся еси́,/ да источи́т на них ро́су благода́ти Своея́, я́ко Человеколю́бец. 

Припев: Святи́телю о́тче Луко́, моли́ Бо́га о нас.

Руко́ю твое́ю святи́тельскою о́чи слепы́м исцели́л еси́, врачу́ преди́вный,/ та́же и ду́ши их Све́том Христо́вым просвети́л еси́, моля́ся,/ да источи́т на них Госпо́дь ро́су благода́ти Своея́, я́ко Человеколю́бец.

Сла́ва Отцу́ и Сы́ну и Свято́му Ду́ху:

Твои́ми поуче́нии, святи́телю Луко́,/ я́ко до́брый па́стырь, указа́л еси́ лю́дем путь в Ца́рство Небе́сное./ Сего́ ра́ди сла́вою от Бо́га увенча́лся еси́,/ Его́же моли́, да низпо́слет и нам ро́су благода́ти Своея́, я́ко Человеколю́бец.

И ны́не и при́сно и во ве́ки веко́в. Ами́нь.

Богородичен: Люби́ти у́бо Тя, Пречи́стая Богома́ти, и пе́сньми прославля́ти/ науча́ет нас вели́кий Арха́нгел,/ сего́ ра́ди вопие́м Ти, Богоневе́сто:/ ра́дуйся, Благода́тная, Госпо́дь с Тобо́ю;/ ра́дуйся, Ра́досте А́нгелов и всех челове́ков.

Седа́лен, глас 8:

О́чи серде́чнеи ко Го́споду вы́ну име́я,/ испове́дник дерзнове́нный ве́ры Христо́вы яви́лся еси́, о́тче Луко́,/ и, си́лою слове́с боже́ственных полки́ безбо́жных отгоня́я,/ Кры́мскую па́ству му́дре упа́сл еси́./ Те́мже по кончи́не в Небе́сныя оби́тели со сла́вою водвори́лся еси́, святи́телю блаже́нне./ Моли́ Христа́ Бо́га грехо́в оставле́ние дарова́ти/ чту́щим всечестну́ю па́мять твою́.

Сла́ва, и ны́не, Богородичен:

Тя Приста́нище и Сте́ну,/ Прибе́жище и Наде́жду,/ Покро́в и Заступле́ние те́плое и́мамы,/ к Тебе́ притека́ем и вопие́м приле́жно:/ спаси́, Богоро́дице, упова́ющия на Тя/ и от прегреше́ний изба́ви.

Песнь 4

Ирмос: Всел еси́ на ко́ни, апо́столи Твоя́, Го́споди,/ и прия́л еси́ рука́ма Твои́ма узды́ их,/ и спасе́ние бысть ежде́ние Твое́/ ве́рно пою́щим:/ сла́ва си́ле Твое́й, Го́споди.

Припев: Святи́телю о́тче Луко́, моли́ Бо́га о нас.

Ю́же стяжа́л еси́ честно́ю Твое́ю Кро́вию,/ Це́рковь Твою́, Христе́, утверди́ и напра́ви на путь ми́ра,/ та́ко воздыха́л еси́, святи́телю о́тче Луко́,/ преподо́бнеи твои́ ру́це горе́ воздева́я.

Припев: Святи́телю о́тче Луко́, моли́ Бо́га о нас.

Любо́вь Христо́ву в денноно́щных труде́х твои́х яви́л еси́, святи́телю:/ неду́жных безме́здно врачу́я,/ вдов и си́рых ми́лостивно пита́я,/ согреша́ющих кро́тко вразумля́я,/ уныва́ющих и отчаява́емых оте́чески утеша́я,/ о ни́хже и Же́ртву безкро́вную благогове́йно Бо́гу принося́.

Сла́ва Отцу́ и Сы́ну и Свято́му Ду́ху:

Ни глад, ни мраз, ни темни́чная заключе́ния,/ ни безче́стия, ни му́ки, ни са́мая смерть/ возмого́ша разлучи́ти тя, святи́телю, от любве́ Христо́вы,/ ты бо, во изгна́нии сый и преде́лы земли́ Ру́сския обходя́,/ лю́дем ея́ о́браз па́стыря до́браго яви́л еси́/ и, я́ко столп непоколеби́мый пребыва́я,/ испове́дник ве́рен наре́клся еси́.

И ны́не и при́сно и во ве́ки веко́в. Ами́нь.

Богородичен: Кре́пость на́ша Ты еси́, Пречи́стая Богома́ти,/ Твои́ми бо мольба́ми изба́вихомся вси от страсте́й и бед,/ обстоя́ний и неду́гов многообра́зных, Спа́су Христу́ зову́ще:/ сла́ва си́ле Твое́й, Го́споди.

Пе́снь 5

Ирмос: Повеле́ния Твоя́ просвеще́нием, Христе́ Бо́же,/ я́ко Благ, показа́л еси́,/ зане́, Светода́вче,/ от но́щи у́тренююще, сла́ву возсыла́ем.

Припев: Святи́телю о́тче Луко́, моли́ Бо́га о нас.

Еди́ницу в Тро́ице, Триипоста́сное Божество́,/ богосло́вил еси́, Луко́ блаже́нне,/ и триеди́ный соста́в челове́ческаго естества́/ писа́нии твои́ми изъясни́л еси́.

Припев: Святи́телю о́тче Луко́, моли́ Бо́га о нас.

Егда́ испыта́ние ра́тное прии́де на зе́млю на́шу,/ тогда́ ты, святи́телю, во враче́бнице гра́да Красноя́рска, враче́бное иску́сство прилага́я,/ мно́гия во́ины от неисце́льных ран исцели́л еси́ и к жи́зни возврати́л еси́.

Сла́ва Отцу́ и Сы́ну и Свято́му Ду́ху:

Словеса́ похва́льная приими́ ны́не от нас, недосто́йных чад твои́х, святи́телю Луко́,/ и моли́ Христа́ Бо́га,/ да изба́вит нас шу́ияго стоя́ния/ и сподо́бит Небе́снаго Ца́рствия Своего́.

И ны́не и при́сно и во ве́ки веко́в. Ами́нь.

Богородичен: Еди́на Чи́стая, Богороди́тельнице,/ не пре́зри моле́ний раб Твои́х,/ но уго́дника Твоего́ ра́ди/ принеси́ сия́ ко престо́лу Сы́на Твоего́,/ да спасе́т ду́ши на́ша.

Песнь 6

Ирмос: Отве́ргл мя еси́/ во глубины́ се́рдца морска́го,/ и ви́дех чудеса́ Твоя́, Го́споди.

Припев: Святи́телю о́тче Луко́, моли́ Бо́га о нас.

Раздава́я после́дняя твоя́ и попече́ние о неиму́щих име́я,/ сироты́ и вдо́выя с любо́вию пита́л еси́,/ Ми́лостивому Спа́су подража́я.

Припев: Святи́телю о́тче Луко́, моли́ Бо́га о нас.

Ду́хом ве́ры пламене́я,/ и́стинное благоче́стие ве́рным явля́л еси́, святи́телю Луко́,/ и, иере́и до́бре назира́я,/ к де́ланию па́стырскому тех наставля́л еси́.

Сла́ва Отцу́ и Сы́ну и Свято́му Ду́ху:

Не отре́клся еси́ креста́ Госпо́дня/ во многотру́днем житии́ твое́м, архиере́ю Бо́жий,/ и ны́не архипа́стырем на́шим моли́твами твои́ми помози́,/ да пра́во пра́вят сло́во Боже́ственныя И́стины.

И ны́не и при́сно и во ве́ки веко́в. Ами́нь.

Богородичен: Отрокови́це Богоизбра́нная, Де́во Мари́е,/ восхваля́ем Тя вси и ве́рно взыва́ем:/ моле́ние на́ше приими́ и проше́ния ско́ро испо́лни.

Конда́к, глас 1:

Я́ко звезда́ всесве́тлая,/ в нощи́ безбо́жия доброде́тельми просия́л еси́/ и, от гони́телей мно́го пострада́в,/ непоколеби́м ве́рою пребы́л еси́,/ враче́бною же му́дростию укра́шен,/ мно́гия лю́ди исцели́л еси́./ Сего́ ра́ди с любо́вию вопие́м ти:/ ра́дуйся, добропобе́дный испове́дниче,/ ра́дуйся, о́тче святи́телю Луко́,/ ра́дуйся, земли́ Ру́сския похвало́ и утвержде́ние.

И́кос:

Испове́данием тве́рдым Бо́га просла́вив,/ се́ятель духо́вных доброде́телей яви́лся еси́, Луко́ прехва́льне,/ и, я́ко архипа́стырь и учи́тель благоче́стия,/ нече́стия ре́вностный искорени́тель показа́лся еси́,/  жи́знь же в по́двизех и труде́х мно́гих  соверши́в,/ вене́ц неувяда́емый от Го́спода прия́л еси́./ Сего́ ра́ди с любо́вию вопие́м ти:/ ра́дуйся, добропобе́дный испове́дниче,/ ра́дуйся, о́тче святи́телю Луко́,/ ра́дуйся, земли́ Ру́сския похвало́ и утвержде́ние.

Песнь 7

Ирмос: В нача́ле зе́млю основа́вый/ и Небеса́ сло́вом утверди́вый,/ благослове́н еси́ во ве́ки, Го́споди, Бо́же оте́ц на́ших.

Припев: Святи́телю о́тче Луко́, моли́ Бо́га о нас.

Ева́нгельски Христу́ после́довав, о́тче Луко́,/ еле́ем любве́ врачева́л еси́ лю́ди стра́ждущия и боля́щия/ и, сло́во Бо́жие возвеща́я, святи́тельски потруди́лся еси́,/ да прославля́ют ве́рная ча́да Сотво́ршаго вся Го́спода, воспева́юще:/ благослове́н еси́ во ве́ки, Бо́же оте́ц на́ших.

Припев: Святи́телю о́тче Луко́, моли́ Бо́га о нас.

Па́стырь до́брый слове́сному ста́ду твоему́ был еси́, святи́телю Луко́,/ ду́шу твою́ за него́ при́сно положи́ти гото́вый./ Те́мже яви́лся еси́ оби́димым засту́пник непреобори́мый,/ пра́вды Бо́жия ревни́тель неустраши́мый,/ си́льных ми́ра сего́ кро́ткий обличи́тель, Го́споду воспева́я:/ благослове́н еси́ во ве́ки, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Ра́довахуся лю́дие гра́да Симферо́поля,/ зря́ще тя, о́тче Луко́, све́тлостию са́на святи́тельскаго облече́на/ и престо́лу благода́ти Бо́жия в моли́тве предстоя́ща./ Ты же, по апо́столу, вся всем быв,/ мно́гия ко Христу́ приве́л еси́,/ и́же ны́не Го́спода прославля́ют:/ благослове́н еси́ во ве́ки, Бо́же оте́ц на́ших.

И ны́не и при́сно и во ве́ки веко́в. Ами́нь.

Богородичен: Ра́дости Пода́тельнице, Богороди́тельнице Пречи́стая,/ ве́рою сла́вящия и от души́ пою́щия Тя ра́дости неизрече́нныя испо́лни/ и Све́та Невече́рняго сподо́би, Де́во Богоблагода́тная.

Песнь 8

Ирмос: Покрыва́яй вода́ми превы́спренняя Своя́,/ полага́яй мо́рю преде́л песо́к/ и содержа́й вся,/ Тя пое́т со́лнце, Тя сла́вит луна́,/ Тебе́ прино́сит песнь вся тварь,/ я́ко Соде́телю всех во ве́ки.

Припев: Святи́телю о́тче Луко́, моли́ Бо́га о нас.

И́мя твое́, святи́телю Луко́,/ я́коже благоуха́ние рая́ Бо́жия по всей земли́ прославля́ется,/ услажда́я сердца́ ве́рующих/ и призыва́я благода́рне воспева́ти Соде́теля всех во ве́ки.

Припев: Святи́телю о́тче Луко́, моли́ Бо́га о нас.

Ны́не Престо́лу Бо́жию предстоя́,/ мо́лишися о лю́дех, тя призыва́ющих,/ на моли́тву же твою́ с ве́рою упова́ющих/ и благодаря́щих Соде́теля всех во ве́ки.

Сла́ва Отцу́ и Сы́ну и Свято́му Ду́ху:

О, иера́рше богому́дре,/ ты, тече́ние жи́зни до́бре соверши́в,/ ве́ру Христо́ву в гоне́ниих и страда́ниих до́бре сохрани́л еси́,/ сего́ ра́ди ны́не вене́ц небе́сный от Пода́теля жи́зни обре́л еси́,/ ра́дуяся и воспева́я освяща́ющаго Соде́теля всех во ве́ки.

И ны́не и при́сно и во ве́ки веко́в. Ами́нь.

Богородичен: Шед путе́м за́поведей Сы́на Твоего́, Богома́ти,/ весь род челове́ческий Твои́м Рождество́м от пра́отеческаго паде́ния воста́/ и кля́твы прама́терния изба́вися,/ воспева́я Соде́теля всех во ве́ки.

Песнь 9

Ирмос: Благослове́н Госпо́дь, Бог Изра́илев,/ воздви́гнувый рог спасе́ния нам/ в дому́ Дави́дове, о́трока Своего́,/ в ни́хже посети́ нас Восто́к с высоты́/ и напра́вил ны есть на путь ми́ра.

Припев: Святи́телю о́тче Луко́, моли́ Бо́га о нас.

Ева́нгелие Христо́во пропове́дав, богому́дре святи́телю,/ служе́ние Бо́жие на земли́ страда́льчески соверши́л еси́/ и, прия́тия Святы́х Та́ин Христо́вых сподо́блься,/ о Бо́зе ми́рно почи́л еси́.

Припев: Святи́телю о́тче Луко́, моли́ Бо́га о нас.

Ны́не с Вы́шними во́инствы моли́, уго́дниче Христо́в, Человеколю́бца Бо́га,/ дарова́ти притека́ющим к тебе́/ оставле́ние грехо́в и жития́ исправле́ние.

Сла́ва Отцу́ и Сы́ну и Свято́му Ду́ху:

И по сме́рти, я́ко жив сый,/ благода́тию Бо́жиею с на́ми пребыва́еши, святи́телю Луко́, испове́дниче до́брый,/ укрепля́я нас тве́рдо стоя́ти в Правосла́вней ве́ре/ и в доброде́тельней жи́зни наставля́я.

И ны́не и при́сно и во ве́ки веко́в. Ами́нь.

Богородичен: Е́же ра́дуйся, со арха́нгелом зове́м Ти, Чи́стая,/ я́ко Царя́ Небе́снаго родила́ еси́, Де́во Богоро́дице, и мо́лим Тя:/ изба́ви ны, рабы́ Твоя́, от ве́чныя сме́рти.

Свети́лен:

Свети́льник ве́ры и испове́дник тве́рдый яви́лся еси́, Луко́ пресла́вне./ Пло́тию, а́ще и почи́л еси́,/ но ду́хом в Ца́рствии невече́рнем со Христо́м пребыва́еши/ и при́сно мо́лишися Ему́ о всех,/ ве́рою и любо́вию тя почита́ющих.

Сла́ва, и ны́не, Богородичен:

Вы́шних чинонача́лий Превы́шшая су́щи,/ нас, ни́жних, не оста́ви, Пречи́стая  Влады́чице,/ но при́сно с на́ми бу́ди/ и от вся́ких наве́тов вра́жиих свободи́.

Стихи́ры, глас 4:

Красу́йся и лику́й, гра́де Симферо́полю,/ торжеству́йте, вси правосла́внии,/ зря́ще честны́я мо́щи врачева́теля безме́зднаго,/ источа́ющия исцеле́ния чу́дная/ всем, притека́ющим к ним с ве́рою/ и воспева́ющим Христа́ Жизнода́вца,/ подаю́щаго нам мир и ве́лию ми́лость.

Во хра́ме Святы́я Тро́ицы,/ иде́же лежа́т ны́не мо́щи твоя́,/ преблаже́нне Луко́ святи́телю,/ исцеле́ния подаю́тся всем челове́ком,/ ве́рою притека́ющим к ра́це твое́й./ Те́мже и мы усе́рдно мо́лим тя:/ моли́ Триипоста́снаго Бо́га/ дарова́ти нам мир и ве́лию ми́лость.

Весели́ся и торжеству́й земле́ Ру́сская,/ иму́щи пред Бо́гом моли́твенника те́пла,/ и́же, я́ко и́стинный па́стырь Христо́в,/ по́двиг страда́ния и испове́дничества в преде́лех твои́х соверши́./ Ны́не же в Небе́сней сла́ве Христу́ предстои́т/ и, взира́я на неизрече́нную Его́ добро́ту,/ прося́щим подае́т теле́сное здра́вие/ и мо́лит дарова́ти душа́м на́шим/ мир и ве́лию ми́лость.

Сла́ва, глас 8:

Святи́телю о́тче Луко́,/ ты, ева́нгельски Христа́ возлюби́в,/ Его́ Боже́ственное и́го и крест испове́дничества на ра́мена подъя́л еси́/ и, я́ко ле́гкое бре́мя, поне́сл еси́,/ архипа́стырский же по́двиг до́бре соверши́в,/ Ца́рствия Небе́снаго дости́гл еси́./ Те́мже Го́спода сла́вы моли́,/ дарова́ти нам мир и ве́лию ми́лость.

И ны́не, Богоро́дичен, глас то́йже:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

Моли́тва

О, святи́телю Луко́, испове́дниче и уго́дниче Христо́в! Услы́ши нас, гре́шных, со умиле́нием припа́дающих к ра́це честны́х и многоцеле́бных моще́й твои́х, и принеси́ моли́тву на́шу к Ми́лостивому Человеколю́бцу Бо́гу, Ему́же ты ны́не со все́ми святы́ми предстои́ши. Испроси́ у Христа́ Бо́га на́шего, коему́ждо дар благопотре́бен и вся, я́же ко спасе́нию поле́зная, да утверди́т ны в ве́ре Правосла́вней и благоче́стии, я́ко изба́вльшеся от ко́зней лука́ваго, избе́гнем вся́кия вражды́, нестрое́ний, ересе́й и раско́лов.

О, цели́телю преди́вный и врачу́ безме́здный! Уврачу́й благода́тию, да́нной тебе́ от Бо́га, я́звы душ и теле́с на́ших, да не неисцеле́ни оты́дем из сей жи́зни вре́менней, но да чи́сти и непоро́чни предста́нем Престо́лу Бо́жию, прославля́юще Отца́, и Сы́на, и Свята́го Ду́ха, во ве́ки веко́в. Ами́нь.