11 июня.

Канон святому блаженному Иоанну, Христа ради юродивому, Устюжскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 5:

Нагото́ю теле́сною и терпе́нием обнажи́л еси́ вра́жия кова́рствия, облича́я неподо́бное его́ дея́ние, зе́льне стражда́ со́лнечный ва́р и ну́ждныя вели́кия сту́дени мра́за, и огня́ не чу́л еси́, Бо́жиею по́мощию покрыва́емь, Иоа́нне прему́дре, моли́ о ве́рою творя́щих па́мять твою́ че́стно и усе́рдно притека́ющих к ра́це моще́й твои́х, изба́витися от бе́д и паде́ния избежа́ти.

Кано́н свята́го. Гла́с 4.

Пе́снь 1.

Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Припев: Блаже́нне о́тче Иоа́нне, моли́ Бо́га о нас.

Прича́стием, е́же к Бо́гу, преподо́бне, бы́л еси́ све́т и к Нему́ отлучи́лся еси́, Иоа́нне блаже́нне, жела́ний кра́йних, благи́х наде́жд твои́х, о́тче, исполне́ние прия́л еси́.

Припев: Блаже́нне о́тче Иоа́нне, моли́ Бо́га о нас.

Жела́нием су́щим к Бо́гу распала́емь, ми́р оста́вил еси́ и Спу́тника обре́л еси́, Христа́, о́тче Иоа́нне сла́вне, с Ни́мже стезю́ проше́л еси́ спаси́тельную, ра́дуяся.

Сла́ва Отцу́ и Сы́ну и Свято́му Ду́ху:

Обогати́тися и́миже, ника́коже искуша́емыми, возжела́в, бога́тство, и сла́ву вре́менную, му́дре, и пи́щу мимотеку́щую, мирско́е достоя́ние доблему́дренне отри́нул еси́.

И ны́не и при́сно и во ве́ки веко́в. Ами́нь.

Богородичен: Кра́сную, избра́нную, всечестну́ю и непоро́чную разуме́в Тя́, Бо́жие Сло́во всели́ся в Тя́ и, ро́ждся из Тебе́, сы́ны сотвори́ благода́тию, Богоро́дицу чту́щия Тя́.

Пе́снь 3.

Ирмос: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Припев: Блаже́нне о́тче Иоа́нне, моли́ Бо́га о нас.

Усе́рдно мы́слей совлече́ся дея́нием, побежда́я вра́жия полки́ боже́ственным посо́бием Ду́ха.

Припев: Блаже́нне о́тче Иоа́нне, моли́ Бо́га о нас.

Ра́нами боже́ственными, и воздержа́нием, и бие́нием страсте́й мирски́х, о́тче Иоа́нне, избе́гл еси́.

Сла́ва Отцу́ и Сы́ну и Свято́му Ду́ху:

Умори́ша врага́ по́стницы Твои́, Иису́се, умерщвле́ния ра́достно, Влады́ко, Твоего́ живоно́снаго возжеле́вше.

И ны́не и при́сно и во ве́ки веко́в. Ами́нь.

Богородичен: Избавля́ющи челове́ки преслуша́ния и лю́таго паде́ния, всему́ вино́внаго, Чи́стая и Всенепоро́чная, родила́ еси́.

Седа́лен, гла́с 5:

Сла́ва Отцу́ и Сы́ну и Свято́му Ду́ху:

Согла́сием боже́ственным озаря́емь, в пути́ веду́щия боже́ственным сия́нием ходи́в ве́рно, о́тче пра́ведне Иоа́нне, враго́в отбе́г прило́гов, сы́н же све́та и дне́ яви́лся еси́, Иоа́нне богоблаже́нне.

Сла́ва, и ны́не, Богородичен:

Ма́ти Бо́жия Пречи́стая, гра́д христиа́нский изба́ви и лю́ди Твоя́, обы́чно зову́щия, проти́витися враго́м и го́рдым мы́слем посо́бствуй, да вопие́м Ти́: ра́дуйся, Благослове́нная.

Пе́снь 4.

Ирмос: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Припев: Блаже́нне о́тче Иоа́нне, моли́ Бо́га о нас.

Соедини́вся к стези́ пра́ведне и богоно́сне, в боже́ственный гра́д вше́л еси́, преподо́бне Иоа́нне, спаси́тельным сия́нием обогати́вся.

Припев: Блаже́нне о́тче Иоа́нне, моли́ Бо́га о нас.

Единообра́зен, преподо́бне Иоа́нне, смы́слом богоно́сным, блаже́нне, бы́в, боже́ственными повестьми́ и боже́ственною оде́ждею оде́ялся еси́.

Сла́ва Отцу́ и Сы́ну и Свято́му Ду́ху:

Се́рдце твое́, скрижа́ль очище́ну, Свята́го Ду́ха благода́ть обре́тши, о́тче, написа́ соверше́нно безстра́стие, ве́ру и любо́вь нелицеме́рну.

И ны́не и при́сно и во ве́ки веко́в. Ами́нь.

Богородичен: Седя́й на престо́ле превознесе́нне херуви́мстем, я́ко престо́л, Тя́ име́я, на руку́ Твое́ю почи́, Мари́е Богоневе́сто, пресла́вный Бо́г.

Пе́снь 5

Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Припев: Блаже́нне о́тче Иоа́нне, моли́ Бо́га о нас.

Пресве́тлую зарю́ прии́м, Иоа́нне, я́ко со́лнце, яви́лся еси́, бесо́вскую тму́ отгоня́я, достоблаже́нне.

Припев: Блаже́нне о́тче Иоа́нне, моли́ Бо́га о нас.

Твои́м жела́нием, Христе́, окрили́вся, блаже́нный Иоа́нн жела́ние теле́сное, я́коже изгре́бие мирско́е, му́дре оттрясе́.

Сла́ва Отцу́ и Сы́ну и Свято́му Ду́ху:

Си́лою боже́ственною ду́шу укрепи́в, в ми́р го́рний всели́лся еси́, свободи́вся страсте́й, о́тче богому́дре Иоа́нне.

И ны́не и при́сно и во ве́ки веко́в. Ами́нь.

Богородичен: Рече́ния проро́к соверши́шася: Де́ва роди́ Бо́га Сло́ва, вы́ше естества́ и сло́ва пребы́вши Де́вою.

Пе́снь 6.

Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Припев: Блаже́нне о́тче Иоа́нне, моли́ Бо́га о нас.

Ум тво́й ве́сь к Бо́гу простира́я, непреста́нными поуче́нии, плотски́я любве́ не пощаде́л еси́, благи́м хода́тайством, Иоа́нне, присвое́ния.

Припев: Блаже́нне о́тче Иоа́нне, моли́ Бо́га о нас.

Ни скве́рныя вражды́ прия́т, блаже́нне, посреди́ тебе́ ми́ра живу́щу, чи́стыми же па́че мольба́ми очища́еши скве́рны душе́вныя притека́ющих к ра́це моще́й твои́х.

Сла́ва Отцу́ и Сы́ну и Свято́му Ду́ху:

Ты́, плотски́х мудрова́ний вы́шши по́мысл име́я, не уязви́лся еси́, посреди́ же́н обнажа́емь: безстра́стия бо оде́ждею, Иоа́нне, обле́клся еси́.

И ны́не и при́сно и во ве́ки веко́в. Ами́нь.

Богородичен: Усты́, и по́мыслом, и се́рдцем, Пречи́стая, Тя́, Богоро́дицу, пропове́даю: Тобо́ю бо Бо́гу примири́хомся, отринове́ннии преступле́нием пе́рвее пра́отца.

Конда́к, гла́с 8:

Вы́шния красоты́ жела́я, ни́жния сла́дости теле́сное яде́ние тща́тельно оста́вил еси́, нестяжа́нием су́етнаго ми́ра возлюби́л еси́ Ангельское житие́, преходя́ сконча́вся, Иоа́нне блаже́нне, с ни́миже моли́ Христа́ Бо́га непреста́нно о все́х на́с.

Икос:

Ка́ко возмогу́ гре́шный и скве́рный а́з, вку́пе душе́ю и те́лом, исписа́ти су́щее во пло́ти равноа́нгельное житие́ твое́ и пресла́вная чудеса́, а́ще у́бо мно́зи прему́дрии не дости́гнут испове́дати мно́гаго твоего́ терпе́ния, и смире́ния, и те́плыя ко Христу́ любве́? Но оба́че наде́яся на твое́ беззло́бие, о блаже́нне, си́це вопию́ ти: ра́дуйся, пресве́тлая звездо́, от ю́га возсия́вшая и к восто́ку прише́дшая; ра́дуйся, возненави́девый оте́ческую любо́вь, Христа́ же еди́наго, над все́ми су́щаго Бо́га, все́м се́рдцем возлюби́вый и Тому́ невозвра́тным жела́нием после́довавый; ра́дуйся, бу́йственное и юро́дственное, е́же по апо́столу, жи́тельство избра́вый; ра́дуйся, премени́вый тле́нная и настоя́щая наде́ждею бу́дущих бла́г; ра́дуйся, дре́внему Иову уподо́бивыйся терпе́нием; ра́дуйся, страстоте́рпче Христо́в непобеди́мый, при́сно победи́вый диа́вола твои́м смире́нием; ра́дуйся, я́ко дре́вний о́н Ла́зарь ни́щий, почива́я ны́не в ло́нех Авраа́млих; ра́дуйся, и́же по отше́ствии ми́ра сего́ су́щим в беда́х и искуше́ниих гото́в обрета́яйся предста́тель и засту́пник гра́ду на́шему Устюгу; ра́дуйся, везде́ призыва́ющия тя́ бы́стро предваря́яй; ра́дуйся, богому́дре Иоа́нне.

Пе́снь 7.

Ирмос: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Припев: Блаже́нне о́тче Иоа́нне, моли́ Бо́га о нас.

Содержи́мь сы́й ко Христу́, преподо́бне о́тче Иоа́нне, боже́ственною любо́вию други́х спасти́, и́хже ра́достно спа́сл и изба́вил еси́, вопия́: благослове́н Бо́г оте́ц на́ших.

Припев: Блаже́нне о́тче Иоа́нне, моли́ Бо́га о нас.

С небесе́ тебе́ пода́нную, о́тче Иоа́нне, прии́м пи́щу, се́ю препита́в все́х, благопоко́рно прие́млющих твоя́ повеле́ния, и́миже до́лу влеку́щий гре́х оставля́ху, блаже́нне.

Сла́ва Отцу́ и Сы́ну и Свято́му Ду́ху:

После́довав оте́ческим преда́нием, о́тче Иоа́нне му́дре, па́губу отри́нути запове́дал еси́, зовы́й Бо́гу: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богородичен: Вы́шняго освяще́нное Боже́ственное селе́ние, ра́дуйся: Тобо́ю бо даде́ся ра́дость, Богоро́дице, зову́щим: благослове́на Ты́ в жена́х еси́, Всенепоро́чная Влады́чице.

Пе́снь 8.

Ирмос: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Припев: Блаже́нне о́тче Иоа́нне, моли́ Бо́га о нас.

Всесве́тлая звезда́, су́щих в тиме́нии страсте́й приводя́ к животу́, твори́ти боже́ственныя за́поведи и нечи́стыя целому́дренно жи́ти, отго́ниши лю́тыя неду́ги, вопия́: благослови́те, по́йте и превозноси́те Его́ во ве́ки.

Припев: Блаже́нне о́тче Иоа́нне, моли́ Бо́га о нас.

Ты́ це́л умо́м в кро́ве чу́дных, му́дре, мно́гих улови́л еси́ юро́дствовати Го́спода ра́ди, ве́дый наруга́емь бы́ти, вопия́, честне́йший Иоа́нне блаже́нне: благослови́те, по́йте и превозноси́те Его́ во ве́ки.

Сла́ва Отцу́ и Сы́ну и Свято́му Ду́ху:

Соверше́н еди́н свои́х су́щих сла́вяй Госпо́дь, прославля́я тя́, преподо́бне, ко гро́бу твоему́ притека́ющия исцеля́ет, светлослове́ньми зову́щия: благослови́те, по́йте и превозноси́те Его́ во ве́ки.

И ны́не и при́сно и во ве́ки веко́в. Ами́нь.

Богородичен: Избавля́яй на́с возсия́ из Тебе́ Госпо́дь, Де́во Чи́стая, Его́же моли́, Влады́чице, просвети́ти пою́щия Тя́ и обстоя́ния на́с изба́вити, пою́щих: благослови́те, по́йте и превозноси́те Его́ во ве́ки.

Песнь 9

Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Припев: Блаже́нне о́тче Иоа́нне, моли́ Бо́га о нас.

Все́м се́рдцем Тро́ице усе́рдно предложи́вся, и́же от Нея́ лучу́ богоде́льно прии́м, светови́ден бы́в, со Ангелы лику́еши.

Припев: Блаже́нне о́тче Иоа́нне, моли́ Бо́га о нас.

Жела́нием боже́ственным приедини́вся и воздержа́нием просве́щся, ча́емых ве́чных бла́г во прича́стии бы́в, богоблаже́нне Иоа́нне, и наслажде́нии.

Сла́ва Отцу́ и Сы́ну и Свято́му Ду́ху:

Твоя́ боле́зни и по́ты во вселе́нней сла́вятся, ты́ же небе́сною сла́вою пита́яся, Иоа́нне, на́с непреста́нно помина́й.

И ны́не и при́сно и во ве́ки веко́в. Ами́нь.

Богородичен: Спаси́ мя, все́х ро́ждши Изба́вителя и Благоде́теля, разори́вши души́ моея́ о́блак, Све́та о́блаче, Свята́я Влады́чице, си́льна соде́лай на стра́сти, борю́щия мя́.

Свети́лен:

Сове́та удали́лся еси́, бе́гая, нечести́вых сожи́тельства, Христу́ же, над все́ми Бо́гу на́шему, непоро́чным житие́м угоди́л еси́, Иоа́нне, Его́же ны́не моли́ о на́с, рабе́х твои́х, ве́рою пра́зднующих всечестну́ю па́мять твою́, богому́дре Иоа́нне.

Богородичен:

Му́дрость Ипоста́сную, и Сло́во Пресу́щное, и Врача́ все́х поро́ждши, Де́во, стру́пы и я́звы души́ моея́ исцели́, лю́тыя и многовре́менныя, и уста́ви се́рдца моего́ страстна́я помышле́ния.

Молитва блаженному Иоанну, Христа ради юродивому, Устюжскому чудотворцу

О, святы́й блаже́нный Иоа́нне! Припа́дающе, смире́нно мо́лимтися: приими́ на́ше ма́лое моле́ние и умоли́ Всеми́лостиваго Го́спода Бо́га на́шего, да проба́вит ми́лость Свою́ нам, гре́шным, и да да́рует нам вся, я́же к животу́ и ко спасе́нию благопотре́бная. О уго́дниче Христо́в! а́ще и зело́ недосто́йни есмы́, оба́че ду́хом сокруше́нным и се́рдцем смире́нным па́ки припа́дающе, мо́лимтися: предста́тельством твои́м ко Го́споду сохрани́ страну́ на́шу, да́руя ей на вся враги́ побе́ду и одоле́ние, град твой У́стюг и вся гра́ды и ве́си Росси́йския соблюди́ от вся́каго зла и от вся́кия напа́сти, губи́тельства, гла́да, тру́са, пото́па, огня́, меча́, наше́ствия иноплеме́нников и междоусо́бныя бра́ни, от вся́кия боле́зни и от вся́каго обстоя́ния, да всегда́ пое́м и велича́ем всесвято́е и великоле́пое и́мя Бо́жие и твое́ ми́лостивое о нас предста́тельство, во ве́ки веко́в. Ами́нь.