Шрифт

11 июня.

Канон преподобномученице Феодосии деве.

Святой преподобномученице Феодосии деве
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Доброде́тель благоприя́тно, му́ченице, пости́гла еси́, Христо́во прия́телище бы́сть чи́стое и Свята́го Ду́ха до́м возлю́блен; отню́дуже посрами́ла еси́ врага́, борю́щаго ро́д челове́ческий, до́бре страда́вшая, и посе́кла еси́ Копрони́ма, Феодо́сие, мече́м ве́ры, и к черто́гу небе́сному преста́вилася еси́, ра́дующися. Тебе́ ве́рою чту́щим при́сно проси́ ве́лия ми́лости.

Кано́н. Гла́с 4.

Пе́снь 1.

Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Припев: Святая преподобномученице Феодо́сие, моли́ Бо́га о нас.

Бо́г тебе́, Феодо́сие, бы́сть пу́ть страда́ния, на Кре́ст во́лею возше́дый, низложи́в мучи́теля, я́коже пти́це, наруга́тися, от му́ченик соде́ла.

Припев: Святая преподобномученице Феодо́сие, моли́ Бо́га о нас.

Благомо́щно, Феодо́сие всечестна́я, на земли́ разрази́ла еси́ нача́льника пре́лести, кре́пко пострада́вши, прехва́льная, и сла́вы вене́ц я́ко победоно́сица, му́ченице, прия́ла еси́.

Сла́ва Отцу́ и Сы́ну и Свято́му Ду́ху:

Дре́вле велехва́льство име́вый, ны́не низложи́ся, твоему́ терпе́нию, му́ченице, прирази́вся: Креста́ бо си́лу восприе́мши, посрами́ла еси́ безме́рно того́ шата́ющася.

И ны́не и при́сно и во ве́ки веко́в. Ами́нь.

Богородичен: Лука́вно прельсти́ мя́ зми́й, взя́т плене́на, обожи́тися жела́ние ми́ вло́жь; Тобо́ю же, Пречи́стая, призва́н бы́в, обожи́хся непреме́нно вои́стинну.

Пе́снь 3.

Ирмос: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Припев: Святая преподобномученице Феодо́сие, моли́ Бо́га о нас.

Жела́ние Боже́ственное, Феодо́сие, тя́ че́стну показа́ неве́сту, Христо́ву му́ченицу, Того́ Кре́ст возлюби́вшую.

Припев: Святая преподобномученице Феодо́сие, моли́ Бо́га о нас.

Пло́ти тлетво́рное оста́вльши, о честна́я, промышле́ние, Животворя́щим Ду́хом живе́ши, Феодо́сие пресла́вная.

Сла́ва Отцу́ и Сы́ну и Свято́му Ду́ху:

Уврачу́й мо́й у́м, богодарова́нною твое́ю, честна́я, благода́тию, и ду́шу, страстьми́ разсла́бленную, исцели́.

И ны́не и при́сно и во ве́ки веко́в. Ами́нь.

Богородичен: Возста́вила еси́, о Чи́стая, па́дший мо́й зра́к, ро́ждши Нача́льника, Влады́чице, все́х на́с воскресе́ния.

Седа́лен, гла́с 8.

Крове́й твои́х струя́ми всю́ кре́пость лука́ваго диа́вола я́ко вои́стинну погрузи́вши, сла́вная, прешла́ еси́ невре́дно му́к всевели́кую пучи́ну и в земли́ святе́й я́ве всели́лася еси́, по́честь трудо́в досто́йно прие́мши, черто́га вхо́да небе́снаго сподо́билася еси́, Феодо́сие прехва́льная. Моли́ Христа́ Бо́га грехо́в оставле́ние пода́ти чту́щим любо́вию святу́ю па́мять твою́.

Сла́ва, и ны́не, Богородичен:

Небе́сную две́рь и киво́т, всесвяту́ю го́ру, све́тлый о́блак воспои́м, неопали́мую купину́, слове́сный ра́й, Евы воззва́ние, вселе́нныя всея́ вели́кое сокро́вище, я́ко спасе́ние в Не́й соде́лася ми́рови и оставле́ние дре́вних согреше́ний. Сего́ ра́ди вопие́м Ей: моли́ся Сы́ну Твоему́ прегреше́ний оставле́ние дарова́ти, благоче́стно покланя́ющимся всесвято́му Рождеству́ Твоему́.

Пе́снь 4.

Ирмос: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Припев: Святая преподобномученице Феодо́сие, моли́ Бо́га о нас.

Шата́яся, мучи́тель ра́нами устраши́ти кре́пость твоего́ терпе́ния хотя́ше окая́нный: ты́ же, прехва́льная, — сла́ва Бо́гу моему́! — взыва́ла еси́.

Припев: Святая преподобномученице Феодо́сие, моли́ Бо́га о нас.

Богода́нным и боже́ственным именова́нием проуве́денно обогати́лася еси́, му́ченице страстоно́сице: да́ние бо была́ еси́ Бо́жие, на́с веселя́щее, ве́рою тя́ и любо́вию почита́ющия.

Сла́ва Отцу́ и Сы́ну и Свято́му Ду́ху:

Укра́шенною, богому́драя Феодо́сие, му́ченическою кро́вию твое́ю, омоче́ною оде́яна оде́ждею, — теку́ во сле́д Тебе́, — любо́вию Жениху́ твоему́ взыва́ла еси́.

И ны́не и при́сно и во ве́ки веко́в. Ами́нь.

Богородичен: Воплоще́нно Сло́во, Чи́стая Де́во, боголе́пно родила́ еси́ и пребыва́еши Де́ва. Те́мже немо́лчными гла́сы, — ра́дуйся! — Тебе́, Влады́чице, ве́рою несумне́нною взыва́ем.

Пе́снь 5

Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Припев: Святая преподобномученице Феодо́сие, моли́ Бо́га о нас.

Миро излия́вшееся, Христа́ возлю́бльши, отрокови́це, богому́дренно после́довала еси́ Сему́, пе́сньми сла́вящи.

Припев: Святая преподобномученице Феодо́сие, моли́ Бо́га о нас.

Ве́чную жи́знь вре́менною измени́ла е́сть, кро́вию ма́лою небе́сное Ца́рство му́ченица насле́дова.

Сла́ва Отцу́ и Сы́ну и Свято́му Ду́ху:

Источа́ют, я́ко исто́чницы, му́ченическия мо́щи цельбы́ неду́гующим и душе́вныя неду́ги ве́рою исцеля́ют.

И ны́не и при́сно и во ве́ки веко́в. Ами́нь.

Богородичен: Кто́ мо́жет Твое́ сказа́ти та́инство, Всенепоро́чная? Зижди́теля бо, невмести́маго все́ми, во чре́ве Твое́м вмести́ла еси́.

Пе́снь 6.

Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Припев: Святая преподобномученице Феодо́сие, моли́ Бо́га о нас.

По Тебе́ со тща́нием сме́рть приима́ше Феодо́сия му́ченица, преще́ния мучи́телей не убоя́вшися, Твое́й стра́сти уподо́бися, Христе́, во́льней. [Дважды.]

Сла́ва Отцу́ и Сы́ну и Свято́му Ду́ху:

Удо́бно Кресто́м Твои́м жены́ укрепи́вшеся, главы́ змие́в, я́коже предре́кл еси́, Спа́се, попира́ют, Твое́ю любо́вию уязвля́емы и Боже́ственным Твои́м жела́нием.

И ны́не и при́сно и во ве́ки веко́в. Ами́нь.

Богородичен: Всю́ Тя́, Голуби́цу соверше́ну и предо́бру, издале́ча обре́т, кри́н и удо́льный цве́т, о Богома́ти, Жени́х мы́сленный в Тя́ всели́ся.

Конда́к, гла́с 2.

Труда́ми живо́т нетру́дный дости́гла еси́, кро́вию же Копрони́ма удави́ла еси́, му́ченице, скве́рнаго врага́ Христо́вы Це́ркве, всеблаже́нная Феодо́сие, и с вы́шними ра́дуешися во́инствы, чту́щия па́мять твою́ покрыва́ющи.

Пе́снь 7.

Ирмос: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Припев: Святая преподобномученице Феодо́сие, моли́ Бо́га о нас.

Тя́, богода́нными укра́шену, му́ченице, добро́тами, ве́рою зря́ще, пе́сньми све́тло Жениху́ твоему́ взыва́ем: благослове́н еси́ в хра́ме сла́вы Твоея́, Го́споди. [Дважды.]

Сла́ва Отцу́ и Сы́ну и Свято́му Ду́ху:

С де́вами свещено́сицами в небе́сный, му́ченице, ны́не черто́г, ра́дующися, со Христо́м возшла́ еси́, взыва́ющи: благослове́н еси́ в хра́ме сла́вы Твоея́, Го́споди.

И ны́не и при́сно и во ве́ки веко́в. Ами́нь.

Богородичен: На престо́ле превознесе́нне седя́й, престо́л Тя́ на земли́, Де́во, богоподо́бен обре́т, почи́л е́сть: благослове́на Ты́ в жена́х еси́, Пренепоро́чная Влады́чице.

Пе́снь 8.

Ирмос: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Припев: Святая преподобномученице Феодо́сие, моли́ Бо́га о нас.

Разреши́вшися соу́з плотски́х, Феодо́сие честна́я, возлете́ла еси́, ра́дующися, к светообра́зному черто́гу, неве́стнически лику́ющи, и муче́ния червле́нною кро́вию блеща́щися, и вопию́щи: благослови́те, вся́ дела́ Госпо́дня, Го́спода.

Припев: Святая преподобномученице Феодо́сие, моли́ Бо́га о нас.

В черто́зе небе́снем жи́ти сподо́билася еси́ све́тло, Феодо́сие честна́я, ве́чнующее благосла́вие обре́тши, всеприснопа́мятная, и му́жества твоего́ плодо́м вои́стинну обогати́вшися, вопию́щи: благослови́те, вся́ дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Украси́лася еси́ тезоимени́тством я́ве, Феодо́сие честна́я: Бо́жие бо да́ние на́м изря́дно даде́ся, всему́драя, даро́в па́че ума́ воздаю́щи ре́ки, ве́рою пою́щим: благослови́те, вся́ дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богородичен: Вои́стинну ро́ждши Бо́га, вои́стинну Пречи́стая Ма́ти нарекла́ся еси́ Бо́гу, и́стинно нося́щи, по ко́емждо рожде́нии, Богоиме́нство. Те́мже Тя́, ве́рнии, сла́вим, Богоро́дицу, богому́дренно, Всенепоро́чная Влады́чице.

Песнь 9

Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Припев: Святая преподобномученице Феодо́сие, моли́ Бо́га о нас.

Разреши́ плени́цы согреше́ний благоче́стно тя́ воспева́ющих твои́ми мольба́ми, богому́драя Феодо́сие, му́ченице прехва́льная, Бо́гу Вседержи́телю, предстоя́щи, всечестна́я.

Припев: Святая преподобномученице Феодо́сие, моли́ Бо́га о нас.

Евы прама́тере жела́ние худо́жно прия́т, воззре́нием к Бо́гу обоже́на и бы́вши Боже́ственным прича́стием бо́г. Те́мже тя́, всеблаже́нная Феодо́сие, велича́ем.

Сла́ва Отцу́ и Сы́ну и Свято́му Ду́ху:

Ве́сь сла́дость е́сть тво́й Жени́х, страстоте́рпице, ве́сь душе́вное утеше́ние, Феодо́сие му́ченице, Христо́с, Его́же ны́не наслажда́ющися, твои́ми моли́твами на́с помина́й.

И ны́не и при́сно и во ве́ки веко́в. Ами́нь.

Богородичен: Пло́тию приити́ восхоте́в, украси́вый вся́ сло́вом в Тя́ всели́ся, еди́ну, Святе́йшу все́х, обре́т, и Богоро́дицу показа́ и́стинную, Ма́ти Де́во.

Молитва

О свята́я, преподобномученице Феодо́сие. По́двигом до́брым подвиза́вшися на земли́, восприя́ла еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́щи Престо́лу Бо́жию, приими́ моле́ния на́ша и ко всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.

Святой преподобномученице Феодосии деве