9 июля.

Канон преподобному Давид Солунскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

В тебе́, о́тче, изве́стно спасе́ся, е́же по о́бразу: прии́м бо кре́ст, после́довал еси́ Христу́, и де́я, учи́л еси́ презира́ти у́бо пло́ть, прехо́дит бо, прилежа́ти же о души́, ве́щи безсме́ртней; те́мже и со Ангелы сра́дуется, преподо́бне Дави́де, ду́х тво́й.

Кано́н. Гла́с 5.

Пе́снь 1.

Ирмос: Коня́ и вса́дника в мо́ре Чермно́е сокруша́яй бра́ни, мы́шцею высо́кою, Христо́с истрясе́, Изра́иля же спасе́, побе́дную пе́снь пою́ща.

Припев: Преподо́бне о́тче Дави́де, моли́ Бо́га о нас.

Пе́сньми светоно́сную и боже́ственную па́мять твою́, соше́дшеся, почти́м, Дави́де преблаже́нне, све́та позна́вше тя́ и дне́, преподо́бне, насле́дника Боже́ственным Ду́хом.

Припев: Преподо́бне о́тче Дави́де, моли́ Бо́га о нас.

Уды умертви́в, о́тче, на земли́ теле́сныя, жи́знь все́льшуюся в се́рдцы име́л еси́, Христа́, умори́вшаго диа́вола си́лу, умертви́вшаго челове́чество.

Сла́ва Отцу́ и Сы́ну и Свято́му Ду́ху:

Зако́ном Влады́ки повину́яся, преподо́бне, кре́ст тво́й на ра́мо взя́л еси́ и, стопа́м Сего́ после́дуя, ты́ низложи́л еси́ возноше́ния льсти́ваго, смиря́яся.

И ны́не и при́сно и во ве́ки веко́в. Ами́нь.

Богородичен: Яви́лася еси́ укра́шена добро́тою доброде́телей и Христа́ кра́снаго, Де́во, породила́ еси́, челове́ки украси́вшаго кра́сными добро́тами Божества́, Присноде́во.

Пе́снь 3.

Ирмос: Водрузи́вый на ничесо́мже зе́млю повеле́нием Твои́м, и пове́сивши неодержи́мо тяготе́ющую, на недви́жимем, Христе́, ка́мени за́поведей Твои́х, Це́рковь Твою́ утверди́, Еди́не Бла́же и Человеколю́бче.

Припев: Преподо́бне о́тче Дави́де, моли́ Бо́га о нас.

Увяди́в воздержа́нием добро́ту теле́сную, зари́ прия́т Боже́ственнаго Ду́ха и безстра́стия светоза́рными облиста́л еси́ луча́ми и исцеле́ний дарова́нии, о́тче, проро́ку тезоимени́те.

Припев: Преподо́бне о́тче Дави́де, моли́ Бо́га о нас.

Святы́х после́дуя житию́, пребога́те, ве́сь освяти́лся еси́ боже́ственными дея́нии. Те́мже освяща́еши та́йно ве́рою свято́е соверша́ющия твое́ торжество́, о́тче богоно́се всеблаже́нне.

Сла́ва Отцу́ и Сы́ну и Свято́му Ду́ху:

Успи́в сла́сти теле́сныя, преподо́бне, моли́твами, и бде́нии, и по́двиги, о́тче, в ми́ре вои́стинну усну́в, почи́л еси́. Те́мже тя́ неусы́пна стяжа́хом храни́теля, любо́вию чту́щии тя́.

И ны́не и при́сно и во ве́ки веко́в. Ами́нь.

Богородичен: Ангелов честне́йши яви́лася еси́, ро́ждши те́х, Де́во, Созда́теля. Те́м молю́ Тя, Чи́стая: освяти́ у́м мо́й и се́рдце просвети́, о́блак страсте́й отгоня́щи.

Седа́лен, гла́с 8.

Воздержа́нием стра́сти плотски́я души́ повину́в, о́тче му́дре, яви́лся еси́, блаже́нне, с те́лом Ангел: се́нь же водрузи́л еси́, я́ко пти́ца благопе́снива на садо́вне дре́ве, на высоту́ у́м впери́л еси́. Те́мже чуде́с де́йством обога́щся, преше́л еси́ ко Го́споду, Его́же от младе́нства вожделе́л еси́, Дави́де пресла́вне, моли́ Христа́ Бо́га грехо́в оставле́ние пода́ти чту́щим тя́.

Сла́ва, и ны́не, Богородичен:

В напа́сти многоплете́нныя впа́д от вра́г ви́димых и неви́димых, бу́рею одержи́мь безчи́сленных согреше́ний мои́х, и я́ко к те́плому заступле́нию и покро́ву моему́, Чи́стая, ко приста́нищу притека́ю Твоея́ бла́гости. Те́мже, Пречи́стая, из Тебе́ Воплоще́нному безсе́менно моли́ся приле́жно о все́х рабе́х Твои́х, непреста́нно моля́щих Ти ся, Богоро́дице Пречи́стая, моля́щи Его́ при́сно согреше́ний оставле́ние дарова́ти воспева́ющим досто́йно сла́ву Твою́.

Пе́снь 4.

Ирмос: Боже́ственное Твое́ разуме́в истоща́ние прозорли́во, Авваку́м, Христе́, со тре́петом вопия́ше Тебе́: во спасе́ние люде́й Твои́х, спасти́ пома́занныя Твоя́ прише́л еси́.

Припев: Преподо́бне о́тче Дави́де, моли́ Бо́га о нас.

Глаго́лов живото́чных Ду́ха послу́шав, сла́ное жития́ оста́вль мо́ре и ка́плями сле́з страсте́й изсуши́л еси́ пото́ки.

Припев: Преподо́бне о́тче Дави́де, моли́ Бо́га о нас.

Ра́зума и благода́ти испо́лнен бы́в, о́тче Дави́де, в безмо́лвии поиска́л еси́ Благоде́теля все́х и Сего́ сия́ния получи́л еси́.

Сла́ва Отцу́ и Сы́ну и Свято́му Ду́ху:

Житие́ твое́ ну́ждею естества́ све́тло показа́в и соде́йствием Ду́ха, от ну́жд зло́бных челове́ки изба́вил еси́, преподо́бне.

И ны́не и при́сно и во ве́ки веко́в. Ами́нь.

Богородичен: Пое́м Тя́, Всепе́тая Влады́чице, Препе́таго Бо́га несказа́нно ро́ждшую и ли́ки Ангельския несравни́тельно добро́тою преше́дшую.

Пе́снь 5

Ирмос: Одея́йся све́том, я́ко ри́зою, к Тебе́ у́тренюю и Тебе́ зову́: ду́шу мою́ просвети́ омраче́нную, Христе́, я́ко Еди́н Благоутро́бен.

Припев: Преподо́бне о́тче Дави́де, моли́ Бо́га о нас.

Просте́р твои́ о́чи и помышле́ния ко Иже на дре́ве Просте́ршемуся, на садо́вне дре́ве претерпе́л еси́, зно́ем пожига́емь, о́тче, и сту́дению померза́емь.

Припев: Преподо́бне о́тче Дави́де, моли́ Бо́га о нас.

Ве́сь молниезра́чен яви́лся еси́, преподо́бне, о́гнь дла́ньми, Дави́де, держа́ и ца́рствующаго кадя́ чу́дным, всеблаже́нне, кажде́нием.

Припев: Преподо́бне о́тче Дави́де, моли́ Бо́га о нас.

Ны́не не в гада́ниих, ниже́ мечта́нием Боже́ственную добро́ту зри́ши, всеблаже́нне, лице́м же, преподо́бне, к лицу́ па́че, разре́шшимся зерца́лом.

Сла́ва Отцу́ и Сы́ну и Свято́му Ду́ху:

Гре́зн прекра́сен боже́ственнаго, Дави́де преподо́бне, виногра́да яви́лся еси́, источа́я вино́ умиле́ния от пия́нства, о́тче, страсте́й объюроде́вшим.

И ны́не и при́сно и во ве́ки веко́в. Ами́нь.

Богородичен: Напра́ви жи́знь мою́ и движе́ния у́мная, Богороди́тельнице, к боже́ственному хоте́нию из Тебе́ неизрече́нно к на́м Прише́дшаго.

Пе́снь 6.

Ирмос: Неи́стовствующееся бу́рею душетле́нною, Влады́ко Христе́, страсте́й мо́ре укроти́ и от тли́ возведи́ мя, я́ко Благоутро́бен.

Припев: Преподо́бне о́тче Дави́де, моли́ Бо́га о нас.

Хра́м Боже́ственнаго Ду́ха позна́лся еси́, преподо́бне Дави́де, в ма́ле хра́мине затворе́н и те́сною простра́нную искупу́я.

Припев: Преподо́бне о́тче Дави́де, моли́ Бо́га о нас.

Зако́ном Влады́ки преклони́л еси́, о́тче, твою́ ду́шу, и све́та испо́лнен бы́л еси́, и прии́мник дарова́ний Ду́ха.

Сла́ва Отцу́ и Сы́ну и Свято́му Ду́ху:

Чудесы́ житие́ твое́, богоно́се о́тче, вои́стинну укра́шено конце́м яви́ся. Те́мже ве́рно восхваля́ем тя́.

И ны́не и при́сно и во ве́ки веко́в. Ами́нь.

Богородичен: От чи́стых крове́й Твои́х истка́ся пло́ть, па́че естества́, Созда́вшему челове́ка, Богоро́дице. Те́мже досто́йно пое́м Тя́.

Конда́к, гла́с 1.

Са́д присноцвету́щь, доброде́телей плоды́ принося́й, яви́лся еси́ на садо́вне дре́ве, я́ко благопе́снивая пти́ца; ра́й же па́че, жи́зни дре́во, Го́спода, в се́рдцы твое́м прие́м, я́ко возде́лав, богому́дре, и́мже пита́еши на́с благода́тию; при́сно моли́ о на́с, Дави́де всеблаже́нне.

Икос:

Сласте́й мои́х пе́щь вжига́ет ми́ ве́чный пла́мень, преподо́бне Дави́де, погаси́ моли́твами твои́ми, я́коже многотеку́щими слеза́ми твои́ми, вже́г у́глие любве́, блаже́нне, Зижди́теля моего́, я́коже дре́вле в руку́ твое́ю носи́в, я́ко же́ртву, и царя́ удиви́л еси́, я́ко да пою́ тебе́, светоно́сче, Дави́де всеблаже́нне.

Пе́снь 7.

Ирмос: Превозноси́мый отце́в Госпо́дь, пла́мень угаси́, о́троки ороси́, согла́сно пою́щия: Бо́же, благослове́н еси́.

Припев: Преподо́бне о́тче Дави́де, моли́ Бо́га о нас.

Стоя́л еси́ неукло́нно на ве́твех са́да, преподо́бне, напое́нии сле́з твои́х ча́сто напоя́я и поя́ немо́лчно: Бо́же, благослове́н еси́.

Припев: Преподо́бне о́тче Дави́де, моли́ Бо́га о нас.

Все́ твое́ жела́ние к Бо́гу просте́рл еси́, все́ се́рдце твое́ прия́телище сотвори́л еси́ боже́ственных дарова́ний, богоно́се, воспева́я: Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Тя́, светови́дна, о́тче, бы́вша, у́глие держа́ща в руку́, я́ко ви́де ца́рь, удиви́ся и нога́м твои́м поклони́ся.

И ны́не и при́сно и во ве́ки веко́в. Ами́нь.

Богородичен: Разреши́ся Рождество́м Твои́м кля́тва челове́ча, еди́на Всеблагослове́нная, те́мже Тя́ славосло́вим, я́ко Благода́тную, Богоро́дице, во ве́ки.

Пе́снь 8.

Ирмос: Тебе́, Вседе́телю, в пещи́ о́троцы, всеми́рный ли́к спле́тше, поя́ху: дела́ вся́кая, Го́спода по́йте и превозноси́те во вся́ ве́ки.

Припев: Преподо́бне о́тче Дави́де, моли́ Бо́га о нас.

Утро разу́мное су́щим во тме́ яви́лся еси́ жития́, блаже́нне, све́т разуме́ния все́м озаря́я, любо́вию тя́ чту́щим и превознося́щим Христа́ во вся́ ве́ки.

Припев: Преподо́бне о́тче Дави́де, моли́ Бо́га о нас.

Бы́л еси́ пра́в, и смире́н, и кро́ток, Дави́да тезоимени́таго изобража́я ве́рно. Те́мже с ни́м зе́млю кро́тких, о́тче, насле́довал еси́ во вся́ ве́ки.

Сла́ва Отцу́ и Сы́ну и Свято́му Ду́ху:

Богосия́нен мона́шествующих сто́лп, Дави́де блаже́нный, проро́к боже́ствен други́й яви́лся еси́, бу́дущая предглаго́ля боже́ственная явле́ния Ду́ха Боже́ственнаго.

И ны́не и при́сно и во ве́ки веко́в. Ами́нь.

Богородичен: Тя́, добро́ту Иа́ковлю, Де́во, Бо́г Юже возлюби́, Юже избра́, вси́ я́ко еди́ну Благослове́нную песносло́вим во вся́ ве́ки.

Песнь 9

Ирмос: Иса́ие, лику́й, Де́ва име́ во чре́ве и роди́ Сы́на Емману́ила, Бо́га же и Челове́ка, Восто́к и́мя Ему́, Его́же велича́юще, Де́ву ублажа́ем.

Припев: Преподо́бне о́тче Дави́де, моли́ Бо́га о нас.

Свяще́нное торжество́, соше́дшеся дне́сь, ве́рнии, соверши́м, свяще́ннаго вси́ отца́, воздержа́нием возсия́вшаго и себе́ всего́ Бо́гу освяти́вшаго житие́м соверше́ния.

Припев: Преподо́бне о́тче Дави́де, моли́ Бо́га о нас.

Якоже дре́во насади́лся еси́ на вода́х, преподо́бне, то́ки духо́вных доброде́телей нося́ плоды́, на садо́вне же дре́ве водрузи́в, я́ко оре́л, о́тче, гнездо́, к небе́сным тво́й у́м впери́л еси́.

Припев: Преподо́бне о́тче Дави́де, моли́ Бо́га о нас.

Тво́й проро́чески узре́в, Дави́де, исхо́д, провозглаша́еши си́й лю́дем, егда́ посыла́емь, е́же на ни́х поста́вил еси́, му́дре, ца́рствующаго мно́гое негодова́ние.

Сла́ва Отцу́ и Сы́ну и Свято́му Ду́ху:

Свята́я па́мять твоя́ освяща́ет дне́сь на́с, творя́щих сию́ ве́рно, преподо́бне Дави́де: свя́то бо препроводи́л еси́ твою́, свя́те, жи́знь и по успе́нии ра́дуешися со святы́ми при́сно.

И ны́не и при́сно и во ве́ки веко́в. Ами́нь.

Богородичен: Светоно́сну две́рь Тя́ предзря́ше Иезеки́иль, е́юже про́йде Све́т и́стинный, Христо́с, Бо́г на́ш, Его́же приле́жно моли́, Чи́стая, покая́ния ми́ две́ри отве́рсти, молю́ся.

Свети́лен.

Мирска́го весе́лия, я́ко от скве́рны, уклони́лся еси́, и, неяде́нием пло́ть увяди́в, обнови́л еси́ души́ кре́пость, преподо́бне, и сла́вою обогати́лся еси́ небе́сною, сла́вне. Те́мже моля́ не преста́й о на́с Го́спода.

Богородичен:

Вои́стинну Богоро́дицу Тя́ испове́дуем, Влады́чице, Тобо́ю спа́сшиися: и́бо Го́спода неизрече́нно родила́ еси́, разо́ршаго Кресто́м сме́рть, к Себе́ же привле́кша преподо́бных собо́ры. С ни́миже Тя́ восхваля́ем, Де́во.

Молитва

О свяще́нная главо́, преподо́бне о́тче, преблаже́нне а́вво Дави́де, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.