8 июля.

Канон чудотворцам Муромским князю Петру, во иноцех Давиду, и княгине Февронии, во инокинях Евфросинии.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

Яко благочести́ваго ко́рене пречестна́я о́трасль бы́л еси́, до́бре во благоче́стии пожи́в, блаже́нне Пе́тре, та́ко и с супру́жницею твое́ю, прему́дрою Февро́ниею, в ми́ре Бо́гу угоди́вше и преподо́бных житию́ сподо́бистеся. С ни́миже моли́теся Го́сподеви сохрани́ти без вре́да оте́чество ва́ше, да ва́с непреста́нно почита́ем.

Величание

Ублажа́ем ва́с, святи́и чудотво́рцы Пе́тре и Февро́ние, и чте́м святу́ю па́мять ва́шу, вы́ бо мо́лите за ны́ Христа́, Бо́га на́шего.

Други́й кано́н, гла́с 1.

Пе́снь 1.

Ирмос: Пе́снь побе́дную пои́м вси́ Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися.

Припев: Святи́и благовернии чудотво́рцы Пе́тре и Февро́ние, моли́те Бо́га о нас.

Благочести́ваго и венцено́снаго Петра́ вку́пе с Февро́ниею, соше́дшеся, по достоя́нию восхва́лим, чуде́с пода́теля оби́льных и спаса́ющаго ду́ши на́ша.

Припев: Святи́и благовернии чудотво́рцы Пе́тре и Февро́ние, моли́те Бо́га о нас.

Пе́сньми и пе́ньми духо́вными восхва́лим блаже́нных вку́пе, си́це глаго́люще: ра́дуйтеся, прехва́льнии, оте́честву ва́шему пресве́тлии свети́льницы и тве́рдии засту́пницы.

Сла́ва Отцу́ и Сы́ну и Свято́му Ду́ху:

Аще и на коне́ц ле́т новопросвеще́нная Росси́йская земля́ си́х блаже́нных израсти́, но дре́вних че́сти сподо́бишася: дарова́ния бо чуде́с оби́льно подаю́т приходя́щим к ни́м.

И ны́не и при́сно и во ве́ки веко́в. Ами́нь.

Богородичен: Ума́ моего́, Всенепоро́чная, омраче́ния све́том Твои́м отжени́ и тмы́ изба́ви мя́ ве́чнующия, я́ко да пою́ вели́чия Твоя́.

Пе́снь 3.

Ирмос: Да утверди́тся се́рдце мое́ в во́ли Твое́й, Христе́ Бо́же, и́же над вода́ми не́бо утвержде́й второ́е и основа́вый на вода́х зе́млю, Всеси́льне.

Припев: Святи́и благовернии чудотво́рцы Пе́тре и Февро́ние, моли́те Бо́га о нас.

Тебе́ в чудесе́х сла́вна Росси́йским страна́м показа́ Бо́г, Пе́тре преблаже́нне, и украси́ тя́ небе́сными дарми́. Того́ ны́не моли́ поми́ловати все́х на́с.

Припев: Святи́и благовернии чудотво́рцы Пе́тре и Февро́ние, моли́те Бо́га о нас.

Свети́льницы пресве́тлии, я́коже со́лнце второ́е, сия́юще, на́с озари́те, соверша́ющих па́мять ва́шу, преблаже́ннии Пе́тре и Февро́ние.

Сла́ва Отцу́ и Сы́ну и Свято́му Ду́ху:

Весе́лия хода́тай наста́ на́м, светоно́сный де́нь Петра́ и Февро́нии прему́дрых, и́же ве́рою воспева́ющим и́х да́руют ве́лию ми́лость.

И ны́не и при́сно и во ве́ки веко́в. Ами́нь.

Богородичен: Изба́ви на́с от все́х напа́стей и от мно́гих собла́зн зми́евых и тмы́, Всенепоро́чная, Яже Све́т поро́ждшая на́м невече́рний.

Седа́лен, гла́с 4:

Благослове́нному и светоно́сному торжеству́, я́коже со́лнцу возсия́вшу, Петра́ и Февро́нии, во все́м ми́ре, к ни́мже стеце́мся, ве́рнии, и непреста́нно вопие́м си́це: а́ще и преидо́сте от земли́, пресла́внии, но на́с не отлучи́стеся и та́мо со Ангелы Тро́ице предстоите́, Юже моли́те спасти́ ду́ши на́ша.

Сла́ва, и ны́не, Богородичен:

Сло́во Отчее, Христа́ Бо́га на́шего, от Тебе́ воплоти́вшагося, позна́хом, Богоро́дице Де́во, еди́на Чи́стая, еди́на Благослове́нная. Те́м непреста́нно Тя́, воспева́юще, велича́ем.

Пе́снь 4.

Ирмос: Ду́хом прови́дя, проро́че Авваку́ме, Словесе́ воплоще́ние, пропове́дал еси́, вопия́: внегда́ прибли́житися ле́том, позна́ешися, внегда́ приити́ вре́мени, пока́жешися. Сла́ва си́ле Твое́й, Го́споди.

Припев: Святи́и благовернии чудотво́рцы Пе́тре и Февро́ние, моли́те Бо́га о нас.

Зми́я у́бо иногда́ уби́в, блаже́нне, коне́чней того́ па́губе пре́дал еси́, та́ко и ны́не, Пе́тре, оте́чество твое́ сохраня́й ненаве́тно вку́пе с Февро́ниею моли́твами твои́ми.

Припев: Святи́и благовернии чудотво́рцы Пе́тре и Февро́ние, моли́те Бо́га о нас.

Заре́ю трисо́лнечныя благода́ти сия́я све́тлый ва́ш пра́здник, блаже́ннии, страстна́го омраче́ния бесо́вскаго избавля́йте творя́щих ве́рою па́мять ва́шу.

Сла́ва Отцу́ и Сы́ну и Свято́му Ду́ху:

Дне́сь де́нь святы́й пра́здничный мона́хов созыва́ет стада́ на весе́лие и трапе́зу духо́вную и на пи́щу нетле́нныя жи́зни и боже́ственнаго наслажде́ния чудотво́рцев.

И ны́не и при́сно и во ве́ки веко́в. Ами́нь.

Богородичен: Разуме́в проро́к Ду́хом Бо́жиим, го́ру Тя́ приосене́нную преднаписа́, Чи́стая; иста́явшую зно́ем мно́гих прегреше́ний ду́шу мою́ прохлади́ хода́тайством Твои́м, Де́во, еди́на бо Ты́ челове́ком исправле́ние.

Пе́снь 5

Ирмос: Све́тлый на́м возсия́й Све́т Присносу́щный, у́тренюющим о судьба́х за́поведей Твои́х, Влады́ко Человеколю́бче, Христе́, Бо́же на́ш.

Припев: Святи́и благовернии чудотво́рцы Пе́тре и Февро́ние, моли́те Бо́га о нас.

О, предо́брая дво́ице! О, пресве́тлая свети́ла! О, благосопряже́ние; еди́н све́т во двою́ телесе́ су́щ! О, свети́льницы блази́и своему́ житию́ бы́вше! Яре́м бо Госпо́день взе́мше, Тому́ от души́ после́довасте ве́рою.

Припев: Святи́и благовернии чудотво́рцы Пе́тре и Февро́ние, моли́те Бо́га о нас.

Досточу́дная и пресла́вная па́мять ва́ша возсия́ в Росси́йстей земли́, блаже́ннии, и ра́достно ве́рных весели́т собо́р, и́скренно ва́с в пе́снех, святи́и, сла́вящих.

Сла́ва Отцу́ и Сы́ну и Свято́му Ду́ху:

Цари́ и свяще́нницы, кня́зи и вельмо́жи, и ста́рцы со ю́нотами, и вся́к во́зраст, све́тло предыгра́йте, па́мять пресла́вных Петра́ и Февро́нии в пе́снех велича́юще.

И ны́не и при́сно и во ве́ки веко́в. Ами́нь.

Богородичен: Светообра́зный Христо́в хра́м, Отрокови́це, моли́твами Твои́ми Отцу́ и Сы́ну и Свято́му Ду́ху и на́с хра́мы сотвори́, преподо́бныя содева́ющи, Пречи́стая.

Пе́снь 6.

Ирмос: Проро́ка Ио́ну подража́я, вопию́: живо́т мо́й, Бла́же, свободи́ из тли́, и спаси́ мя, Спа́се ми́ра, зову́ща: сла́ва Тебе́.

Припев: Святи́и благовернии чудотво́рцы Пе́тре и Февро́ние, моли́те Бо́га о нас.

От прече́стна ко́рене израсте́ ве́твь пресла́вная, и, благоче́стно на земли́ пожи́в, Пе́тре, прия́телище чи́сто Ду́ха Свята́го бы́л еси́: просвеща́й пою́щих ны́не па́мять твою́.

Припев: Святи́и благовернии чудотво́рцы Пе́тре и Февро́ние, моли́те Бо́га о нас.

Весе́лия дне́сь испо́лнися Росси́йская земля́, в наро́читый де́нь пра́здника ва́шего, пресла́внии чудотво́рцы, и, пою́щи, си́це глаго́лет: моли́те Христа́ сохрани́ти оте́чество ва́ше от язы́ка чужда́го.

Сла́ва Отцу́ и Сы́ну и Свято́му Ду́ху:

Сиро́т и вдови́ц засту́пницы, и в беда́х необори́мии помо́щницы, и все́х притека́ющих к ва́м приста́нище небу́рное, и неле́стное ути́шие су́щих во гресе́х.

И ны́не и при́сно и во ве́ки веко́в. Ами́нь.

Богородичен: Вели́чия Тебе́, Чи́стая, сотвори́ Христо́с Бо́г на́ш, Его́же моли́ при́сно возвели́чити и в на́с бога́тую Его́ ми́лость, Пренепоро́чная Влады́чице.

Конда́к, гла́с 8.

Ми́ра сего́ княже́ние и сла́ву вре́менну помышля́я, сего́ ра́ди благоче́стно в ми́ре пожи́л еси́, Пе́тре, ку́пно и с супру́жницею твое́ю прему́дрою Февро́ниею, ми́лостынею и моли́твами Бо́гу угоди́вше. Те́мже, и по сме́рти неразлу́чно во гро́бе лежа́ще, исцеле́ние неви́димо подава́ете, и ны́не Христу́ моли́теся сохрани́ти гра́д же и лю́ди, и́же ва́с сла́вящих.

Икос:

Уясни́ язы́к мо́й, Спа́се, и умили́ се́рдце мое́, разшири́ уста́ моя́ и напо́лни Ду́ха и прему́дрости, да и́миже возглаго́лю и воспою́ си́це Твоя́ чудотво́рцы: ра́дуйся, Пе́тре блаже́нне с прехва́льною Февро́ниею вку́пе; ра́дуйтеся, земли́ Росси́йстей засту́пницы и князе́м правосла́вным помо́щницы; ра́дуйтеся, оте́честву ва́шему храни́тели и гра́ду на́шему утвержде́ние. О, пречестна́я дво́ице и благо́е сопряже́ние, Христу́ моли́теся сохрани́ти гра́д и лю́ди, и́же ва́с сла́вящих.

Пе́снь 7.

Ирмос: Отроцы, благоче́стию совоспита́ни, злочести́ваго веле́ния небре́гше, о́гненнаго преще́ния не убоя́шася, но, посреди́ пла́мене стоя́ще, поя́ху: отце́в Бо́же, благослове́н еси́.

Припев: Святи́и благовернии чудотво́рцы Пе́тре и Февро́ние, моли́те Бо́га о нас.

Во все́х страна́х про́йде веща́ние, я́ко гра́ду Му́рому яви́шася чудотво́рцы пресла́внии, да́рующе мно́жество исцеле́ний все́м, приходя́щим к ни́м и ве́рою пою́щим и́х.

Припев: Святи́и благовернии чудотво́рцы Пе́тре и Февро́ние, моли́те Бо́га о нас.

Се́ ны́не стеко́шася от все́х градо́в и стра́н вси́ ца́рие и свяще́нницы, и кня́зи и вельмо́жи, бога́тии и убо́зии, вси́ ра́дующеся вку́пе, хвалу́ возда́ти ва́м, богоблаже́ннии.

Сла́ва Отцу́ и Сы́ну и Свято́му Ду́ху:

Чудесы́ у́бо твои́ми, я́ко цве́т, процве́л еси́, пресла́вне Пе́тре, я́коже рече́ проро́к: пра́ведник, я́ко фи́никс, процвете́т. Сего́ ра́ди вси́ тя́ ны́не сла́вим, блаже́нне.

И ны́не и при́сно и во ве́ки веко́в. Ами́нь.

Богородичен: Тебе́, Всесвята́я Чи́стая, раби́ Твои́, всегда́ во дни́ и в нощи́ мо́лим сокруше́нною мы́слию, прося́ще избавле́ние пода́ти грехо́в на́ших Твои́ми моли́твами.

Пе́снь 8.

Ирмос: Его́же ужаса́ются Ангели и вся́ во́инства, я́ко Творца́ и Го́спода, по́йте, свяще́нницы, просла́вите, о́троцы, благослови́те, лю́дие, и превозноси́те во вся́ ве́ки.

Припев: Святи́и благовернии чудотво́рцы Пе́тре и Февро́ние, моли́те Бо́га о нас.

Ангельстии чи́нове хва́лят ва́с, пресла́внии, и челове́честии ро́ди пою́т непреста́нно, творя́ще ве́рно па́мять ва́шу.

Припев: Святи́и благовернии чудотво́рцы Пе́тре и Февро́ние, моли́те Бо́га о нас.

Досто́йными похвала́ми воспе́ти пресла́вныя чудотво́рцы у́м и смы́сл да́руй ми́, Христе́ Бо́же, я́ко да пою́, ра́дуяся, па́мять и́х.

Сла́ва Отцу́ и Сы́ну и Свято́му Ду́ху:

Побе́да имени́та вои́стинну ве́рным лю́дем, в беда́х кре́пцыи помо́щницы яви́шася, Пе́тр ку́пно с Февро́ниею.

И ны́не и при́сно и во ве́ки веко́в. Ами́нь.

Богородичен: Уврачу́й, Пречи́стая, стра́сти се́рдца моего́, ро́ждшая все́х Царя́ Бо́га, и пра́ведных ча́сти яви́ мя прича́стника, Богоро́дице Де́во, Христа́, Сы́на Твоего́, умоли́вши.

Песнь 9

Ирмос: Светоно́сный о́блак, в о́ньже все́х Влады́ка, я́ко до́ждь с небесе́ на руно́, сни́де и воплоти́ся на́с ра́ди, бы́в Челове́к, Безнача́льный, велича́ем вси́ я́ко Ма́терь Бо́га на́шего Чи́стую.

Припев: Святи́и благовернии чудотво́рцы Пе́тре и Февро́ние, моли́те Бо́га о нас.

Красе́н душе́ю и те́лом и благоче́стием сия́я, сла́вне Пе́тре, боже́ственнаго испо́лнен ра́зума и прему́дрости, орга́н Свята́го Ду́ха бы́л еси́, по смерти у́бо к безсме́ртней жи́зни и неконча́емому блаже́нству преше́л еси́, ра́дуяся.

Припев: Святи́и благовернии чудотво́рцы Пе́тре и Февро́ние, моли́те Бо́га о нас.

Яко у́тро, я́ко де́нь све́тлый, ва́ш пра́здник яви́ся, сла́внии, а́ки струя́, происхо́дит от ра́ки ва́шея исцеле́ний вся́ких и ве́рных сердца́ напоя́ет, любо́вию ва́с почита́ющих.

Сла́ва Отцу́ и Сы́ну и Свято́му Ду́ху:

Вели́к щи́т и вели́ка кре́пость земли́ Росси́йстей обре́лся еси́, блаже́нне Пе́тре вку́пе с Февро́ниею, похвале́ние и сла́ва во все́х язы́цех, и ны́не мо́лим вы́ сохрани́ти оте́чество ва́ше от ва́рварскаго нахожде́ния.

И ны́не и при́сно и во ве́ки веко́в. Ами́нь.

Богородичен: Яже Све́т ро́ждшая боже́ственный, омраче́ннаго мя́ все́ми прило́ги лука́ваго, и во уны́нии живу́щаго, и прогневля́ющаго Бо́га, Всенепоро́чная, просвети́ и наста́ви к до́брым дело́м, я́ко вина́ все́х благи́х.

Свети́лен.

Иже благоче́стно пра́зднующим па́мять ва́шу, богоблаже́ннии Пе́тре и Февро́ние, вку́пе ми́рно пожи́вше и благоче́стно, моли́те Христа́ грехо́в оставле́ние дарова́ти рабо́м ва́шим.

Сла́ва, и ны́не, Богородичен:

Пресвята́я Богоро́дице, упова́ние на́ше и похвало́, Тя́ еди́ну ве́дуще, ве́рою покланя́ющеся, мо́лим: ра́дуйся, Неискусобра́чная Свята́я Мари́е, покро́ве и огражде́ние на́ше и помо́щница су́щим в беда́х. Моли́ Христа́, Сы́на Твоего́, за рабы́ Твоя́, на Тя́ бо наде́емся.

Стихи́ры, гла́с 2.

Яко вели́кое со́лнце, / вселе́нней все́й / яви́стеся, блаже́ннии, / чудесы́ просвеща́юще ве́сь ми́р, / те́мже, соше́дшеся, вси́ воспое́м ва́с.

Сти́х: Честна́ пред Го́сподем / сме́рть преподо́бных Его́.

Све́том сия́я / Боже́ственныя благода́ти, / пресве́тлый ва́ш пра́здник ра́достен все́м, / его́же, ра́дующеся, / и́скренно вси́ восхва́лим.

Сти́х: Что́ возда́м Го́сподеви о все́х, / я́же воздаде́ ми?

Прииди́те, му́ромстии наро́ди, / вели́цыи и ма́лии, / восхва́лим в ва́с пре́жде ца́рствовавшия, / те́плыя предста́тели, / но́выя чудотво́рцы, Петра́ и Февро́нию.

Сла́ва, гла́с 8. Самогла́сен:

Ра́дуйся и весели́ся о Го́споде, гра́де Му́роме, и све́тло торжеству́й и лику́й, це́рковь Бо́жия, в не́йже лежи́т честно́е сокро́вище, пресла́вных но́вых чудотво́рцев Петра́ благочести́ваго и Февро́нии прему́дрыя, сокро́вище дра́го и ковче́г пресла́вен, телеса́, чудеса́ точа́щая все́м, притека́ющим с ве́рою. Сего́ ра́ди прииди́те, вси́ лю́дие, соше́дшеся, ве́рнии, поклони́мся святы́м. Тецы́те, собра́вшеся, и псало́мски восплещи́те рука́ми, и, лику́юще, ра́дуйтеся, и, веселя́щеся, си́це глаго́лите: ра́дуйтеся, пресла́внии чудотво́рцы, Пе́тре блаже́нне и Февро́ние богому́драя, гра́да бо на́шего утвержде́ние и на́с, ве́рных, спасе́ние. И ны́не, в па́мяти ва́шей, испроси́те у Христа́ дарова́ти душа́м на́шим ми́р и ве́лию ми́лость.

И ны́не, Богородичен:

Безневе́стная Де́во, Яже Бо́га неизрече́нно заче́нши пло́тию, Ма́ти Бо́га Вы́шняго, Твои́х рабо́в мольбы́ приими́, Всенепоро́чная, все́м подаю́щи очище́ние прегреше́ний, ны́не на́ша моле́ния прие́млющи, моли́ спасти́ся все́м на́м.

Молитва святым благоверным князю Петру и княгине Февронии, Муромским

О велицыи угодницы Божии и предивнии чудотворцы благовернии княже Петре и княгине Февроние, града Мурома предстатели и хранители, и о всех нас усерднии ко Господу молитвенницы! К вам прибегаем и вам молимся с упованием крепким: принесите за нас грешных святыя молитвы ваша ко Господу Богу и испросите нам у благости Его вся благопотребная душам и телесем нашим: веру праву, надежду благу, любовь нелицемерну, благочестие непоколебимое, в добрых делех преуспеяние, мира умирение, земли плодоносие, воздуха благорастворение, душам и телесем здравие и вечное спасение. Исходатайствуйте у Царя Небеснаго: верных рабов Его, в скорби и печали день и нощь вопиющих к Нему, многоболезный вопль да услышит и да изведет от погибели живот наш. Испросите Церкви святей и всей державе Российстей мир, тишину и благоустроение, и всем нам житие благополучное и добрую христианскую кончину. Оградите отечество ваше, град Муром, и вся грады Российския от всякаго зла и вся правоверныя люди, к вам приходящия и мощем покланяющияся, осените благодатным действом благоприятных молитв ваших, и вся прошения их во благо исполните. Ей, чудотворцы святии! Не презрите молитв наших, со умилением вам возносимых, но будите о нас приснии предстатели ко Господу и сподобите нас помощию вашею святою спасение вечное получити и Царствие Небесное унаследовати; да славословим неизреченное человеколюбие Отца, и Сына, и Святаго Духа, в Троице покланяемаго Бога, во веки веков. Аминь.