8 июля.

Канон святой преподобномученице Февронии.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь святы́я, гла́с 4:

Агница Твоя́, Иису́се, Февро́ния, зове́т ве́лиим гла́сом: Тебе́, Женише́ мо́й, люблю́, и Тебе́ и́щущи, страда́льчествую, и сраспина́юся, и спогреба́юся креще́нию Твоему́, и стражду́ Тебе́ ра́ди, я́ко да ца́рствую в Тебе́, и умира́ю за Тя́, да и живу́ с Тобо́ю; но, я́ко же́ртву непоро́чную, приими́ мя, с любо́вию поже́ршуюся Тебе́; тоя́ моли́твами, я́ко Ми́лостив, спаси́ ду́ши на́ша.

Кано́н святой, гла́с 8.

Пе́снь 1.

Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припев: Святая му́ченице Февро́ние, моли́ Бо́га о нас.

Побо́рнице сла́вы Христо́вы, пода́ждь ми́ благода́ть, Февро́ние, и просвеще́ние твое́ восхвали́ти светоно́сное ра́достно, чи́стая, торжество́.

Припев: Святая му́ченице Февро́ние, моли́ Бо́га о нас.

Поуче́нием сме́ртным вы́ну просвеща́ющи, му́ченице Февро́ние, твою́ ду́шу, возшла́ еси́ к высоте́ муче́ния, томле́ньми прине́сшися Христу́.

Сла́ва Отцу́ и Сы́ну и Свято́му Ду́ху:

Обно́вльши боле́зньми воздержа́ния ни́ву, му́ченице, се́рдца твоего́ я́сно, муче́ний прия́ла еси́ венцы́, страда́льчески Бо́гу на́шему пою́щи.

И ны́не и при́сно и во ве́ки веко́в. Ами́нь.

Богородичен: Ма́нием вся́ содева́яй из Тебе́, Богома́ти, воплоти́ся, Его́же благоче́стно жела́ющи, отрокови́ца Февро́ния му́ченически Тому́ приведе́ся.

Пе́снь 3.

Ирмос: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й.

Припев: Святая му́ченице Февро́ние, моли́ Бо́га о нас.

Укрепи́лася еси́ Ду́хом низложи́ти свире́пство, пресла́вная, мучи́тельское и многобо́жие, Февро́ние, безбо́жное.

Припев: Святая му́ченице Февро́ние, моли́ Бо́га о нас.

Ты́ ны́не утверди́л еси́ держа́вною руко́ю, Влады́ко, му́ченически подвиза́вшуюся Февро́нию сла́вную.

Сла́ва Отцу́ и Сы́ну и Свято́му Ду́ху:

Те́ло твое́, секо́мо за Христа́, чи́стая всему́драя, му́ченически, тебе́ рая́ соде́ла наслажде́ние.

И ны́не и при́сно и во ве́ки веко́в. Ами́нь.

Богородичен: Обре́те Тя́ по́мощь, Бо́жию Ма́терь, Пречи́стая, сла́вная му́ченица Февро́ния, и мучи́теля посрами́ла е́сть.

Седа́лен святы́я, гла́с 8.

Ду́шу связа́вши любо́вию Христо́вою, тле́нная же и вре́менная, му́ченице му́драя, забве́нием премину́ла еси́, я́ко Словесе́ учени́ца: по́стнически пе́рвее стра́сти умертви́вши, страда́льчески второ́е льсти́ваго посрами́ла еси́. Те́мже и Зижди́теля сугу́бу дерзнове́нию сподо́билася еси́, сла́вная, я́ко Того́ послу́шавши, Февро́ние пребога́тая, моли́ Христа́ Бо́га, согреше́ний оставле́ние дарова́ти чту́щим любо́вию святу́ю па́мять твою́.

Сла́ва, и ны́не, Богородичен:

Яко Всенепоро́чная Неве́сто Творцу́, я́ко неискусому́жная Ма́ти Изба́вителю, прия́телище я́ко су́щи Уте́шителя, Препе́тая, беззако́нию мя́ су́ща скве́рное оби́телище и бесо́м игра́лище в ра́зуме бы́вша, потщи́ся от те́х злоде́йства мя́ изба́вити и све́тлое жили́ще доброде́телей соверши́, Светоно́сная, Нетле́нная, отжени́ о́блак страсте́й и Вы́шняго прича́стия сподо́би и Све́та невече́рняго моли́твами Твои́ми.

Пе́снь 4.

Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Припев: Святая му́ченице Февро́ние, моли́ Бо́га о нас.

Поро́ка в тебе́ отню́д не́сть, всехва́льная Февро́ние, ты́ бо по обоему́, Изба́вителю твоему́ и Рачи́телю вожделе́нному благоугоди́ти потща́лася еси́, воздержа́тельными боле́зньми, му́ченическими страда́ньми украше́нная, богому́драя, пребога́тая.

Припев: Святая му́ченице Февро́ние, моли́ Бо́га о нас.

От млады́х, му́ченице, ногте́й вожделе́ла еси́ любы́ Исто́чника приснотеку́щаго, вожделе́ннаго все́м слове́сным, Его́же насы́щшися, муче́ния боле́зни претерпе́ла еси́, огне́м опаля́ема и удо́в лише́на, Февро́ние, де́в похвало́.

Сла́ва Отцу́ и Сы́ну и Свято́му Ду́ху:

Словесы́ Бо́жиими воспи́тана, богому́драя, жела́ющим сло́во спаси́тельное свяще́нных кни́г свяще́нно вруча́ющи, боже́ственне, му́ченице, просте́рла еси́ и уче́ния мзду́ прия́ла еси́, му́ченик сла́вою обогати́вшися.

И ны́не и при́сно и во ве́ки веко́в. Ами́нь.

Богородичен: Две́рь Све́та все́м яви́лася еси́, Всенепоро́чная, су́щим во тме́ Све́т неопи́санный, опи́сан пло́тию Христа́, пра́веднаго Со́лнца, возблиста́вши, Его́же ны́не луча́ми Февро́ния укрепи́вшися, му́ченик сла́ву притяжа́.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Святая му́ченице Февро́ние, моли́ Бо́га о нас.

Украси́ся порфи́рою, му́ченице, из крове́й твои́х истка́нною тебе́, обнажи́ся те́лом, и страсте́й оде́жду отве́ргла еси́, пред суди́щем ста́вши мучи́телей, о Февро́ние, Христо́ве подо́бящися наготе́.

Припев: Святая му́ченице Февро́ние, моли́ Бо́га о нас.

Разже́гшися, му́ченице, любо́вию Жениха́ твоего́ мы́сленнаго и распа́льшися Сего́ добро́тами нетле́нными, претерпе́ла еси́ усече́ние ру́к и я́звенныя боле́зни, Февро́ние, му́чениц похвало́.

Сла́ва Отцу́ и Сы́ну и Свято́му Ду́ху:

То́ки твои́х крове́й многобо́жия пла́мень угаси́ша, твои́ же зу́бы искорене́ннии всю́ исторго́ша и́дольскую ле́сть и пи́щу тебе́, Февро́ние, ве́чныя красоты́ соде́лаша.

И ны́не и при́сно и во ве́ки веко́в. Ами́нь.

Богородичен: Твои́ но́зе, усе́кшеся, боже́ственных му́ченик стезе́ю ше́ствоваша и к Ро́ждшемуся от Де́вы Святы́я преидо́ша, ходя́ще ра́достно в раи́, Февро́ние де́во, Богоневе́сто.

Пе́снь 6.

Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя.

Припев: Святая му́ченице Февро́ние, моли́ Бо́га о нас.

Сели́на злочести́ваго безбо́жное и го́рдое низложи́ся суровство́ Бо́жиим е́же о все́х промышле́нием, взыска́вшим кро́вь твою́, сла́вная, и спасе́ся твои́м терпе́нием боже́ственный Лисима́х.

Сла́ва Отцу́ и Сы́ну и Свято́му Ду́ху:

Свети́льник богосия́нен тя́ показа́, му́драя и богоно́сная Врие́ни, уче́нии наста́вльши, отрокови́це, и наде́жды ника́коже погреши́: предста́ви бо тя́ Христу́, Февро́ние, неве́сту нескве́рну.

И ны́не и при́сно и во ве́ки веко́в. Ами́нь.

Богородичен: Одушевле́нный Влады́ки черто́г, и́же све́тлыми де́вства заря́ми светови́дно, я́ко кри́н, сия́я посреди́ терно́внаго смеше́ния, Пречи́стая и Боголе́пная Богоро́дица Де́ва сла́вится.

Конда́к святы́я, гла́с 6.

Женише́ мо́й, сладча́йший Христе́, — взыва́ше Февро́ния, — не тру́дно ми́ тещи́ во сле́д Тебе́, и́бо сла́дость любве́ Твоея́ ду́шу мою́ наде́ждею впери́ и красота́ ми́лости Твоея́ се́рдце мое́ услади́ испи́ти ча́шу страда́ний по Тебе́, да досто́йну мя́ в черто́зе с му́дрыми де́вами ликовствова́ти о Тебе́ сопричте́ши. Те́мже, преподо́бная страстоте́рпице, почита́юще по́двиги трудо́в твои́х, мо́лим тя́: моли́ не затвори́тися и на́м черто́га две́рем.

Пе́снь 7.

Ирмос: Отроцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Припев: Святая му́ченице Февро́ние, моли́ Бо́га о нас.

Струи́ то́чиши исцеле́ний притека́ющим ве́рою к твоему́ гро́бу, Февро́ние, и Жениху́ твоему́ вопию́щим: благослове́н еси́, Го́споди Бо́же, во ве́ки.

Сла́ва Отцу́ и Сы́ну и Свято́му Ду́ху:

О, до́брыя твоея́ ку́пли! Го́рстию кро́ве, богому́драя, измени́ла еси́ Ца́рствие Бо́жие, всехва́льная, вопию́щи: благослове́н еси́, Го́споди Бо́же, во ве́ки.

И ны́не и при́сно и во ве́ки веко́в. Ами́нь.

Богородичен: С ли́ки деви́ческими лику́еши, досточу́дная Февро́ние де́во, Де́ве Богома́тери вопию́щи: благослове́н, Пречи́стая, Пло́д Твоего́ чре́ва.

Пе́снь 8.

Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Святая му́ченице Февро́ние, моли́ Бо́га о нас.

Светоявле́нна па́мять твоя́, Февро́ние, соверша́ется ны́не, светови́дными мо́лниями блиста́ющи: Све́ту бо прибли́жися и светоно́сна бы́сть, Светотво́рцу и Светода́телю вопию́щи: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Святая му́ченице Февро́ние, моли́ Бо́га о нас.

Удивле́нна была́ еси́ пе́рвее воздержа́нии, прехва́льная, и му́ченически украси́лася еси́ по́слежде, во сле́д бо потекла́ еси́ Рачи́теля, отрокови́це све́тлая. Оба сосца́ твоя́, бла́ги па́че вина́, уре́зани бы́вше, Февро́ние, за благоче́стие, воня́ же твои́х арома́т ве́рныя благоуха́ет.

Сла́ва Отцу́ и Сы́ну и Свято́му Ду́ху:

Отягче́н прегреше́ньми, Февро́ние всехва́льная, и треволне́нии страсте́й преклоне́н, прибега́ю к покро́ву твоему́, обои́х разреше́ние ища́й. Но, я́ко чу́дная и избра́нная Влады́це, вопию́ща не пре́зри, но твои́ми мя́ моли́твами исхити́, де́во, от плени́ц душетле́нных.

И ны́не и при́сно и во ве́ки веко́в. Ами́нь.

Богородичен: Вети́йствующии язы́цы Тя́ воспе́ти не мо́гут, о Богороди́тельнице, Мари́е Богоневе́сто: Бо́га бо родила́ еси́, над все́ми су́щаго, Отрокови́це Чи́стая, от деви́ческаго неискусобра́чнаго чре́ва. Ему́же ны́не Февро́ния, пою́щи, взыва́ет: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Песнь 9

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Припев: Святая му́ченице Февро́ние, моли́ Бо́га о нас.

Боже́ственная Влады́ки голуби́це, позлаще́нна све́тлостию де́вства, те́ло просве́щши поще́нием, позлаще́нна крилы́ златови́дными блиста́нии твоего́ испове́дания и божественных твои́х крове́й, тя́ пою́щия просвети́.

Припев: Святая му́ченице Февро́ние, моли́ Бо́га о нас.

Уму бесе́довавши наги́м умо́м, Февро́ние богому́драя, попра́ла еси́ жела́ния до конца́, и кончи́ну блаже́нную получи́ти сподо́билася еси́, и ны́не ца́рствуеши со Христо́м, све́тло с твои́м Женихо́м в неизрече́нных черто́зех в весе́лии пребыва́ющи.

Сла́ва Отцу́ и Сы́ну и Свято́му Ду́ху:

Исцеле́ния источа́еши, я́ко ре́ки, ве́рою притека́ющим ко твое́й честне́й ра́це, Февро́ние богови́дная, де́вства сто́лп, цве́т естества́ красе́н, дщи́ Царе́ва, я́же вну́трь иму́щи боже́ственныя сла́вы блаже́нство.

И ны́не и при́сно и во ве́ки веко́в. Ами́нь.

Богородичен: Испра́вила еси́, Де́во, же́н поползе́ние, Сло́ва ро́ждши, горе́ воздви́жущаго низпа́дшия, я́ко Блага́, и держа́внаго си́л, Его́же, Февро́ния сла́вная, вожделе́вши усе́рдно: в сле́д Тебе́ потеку́, ра́дующися, — возопи́ла е́сть.

Молитва

О свята́я, му́ченице Февро́ние. По́двигом до́брым подвиза́вшися на земли́, восприя́ла еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́щи Престо́лу Бо́жию, приими́ моле́ния на́ша и ко всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.