7 июля.

Канон третий Рождество честнаго славнаго Пророка, Предтечи и Крестителя Иоанна.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Проро́че и Предте́че прише́ствия Христо́ва, досто́йно восхвали́ти тя́ недоуме́ем мы́, любо́вию чту́щии тя́: непло́дство бо ро́ждшия и о́тчее безгла́сие разреши́ся сла́вным и честны́м твои́м рождество́м, и воплоще́ние Сы́на Бо́жия ми́рови пропове́дуется.

Кано́н Предте́чи, гла́с 8.

Пе́снь 1.

Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припев: Крестителю Спасов Иоа́нне, моли́ Бо́га о нас.

Ангела небе́сна име́в, боже́ственнаго своего́ рождества́ прозна́менающа, сла́вне, зе́мен Ангел яви́лся еси́ и небе́сный челове́к, Предте́че.

Припев: Крестителю Спасов Иоа́нне, моли́ Бо́га о нас.

Высото́ю жития́ па́че есте́ственна не́бо яви́лся еси́ и тве́рдь слове́сная, Христа́ у́бо, я́коже со́лнце, посреде́, доброде́тели же, я́коже зве́зды, стяжа́в.

Сла́ва Отцу́ и Сы́ну и Свято́му Ду́ху:

Честна́ сме́рть твоя́, му́дре, пред Го́сподем, поже́ршимся на́с ра́ди: и му́жеский по́л, я́ко а́гнец слове́сен, носи́мь.

И ны́не и при́сно и во ве́ки веко́в. Ами́нь.

Богородичен: В Тя́ все́лься, Изба́витель изгна́, Отрокови́це, все́льшийся в мя́ многосле́зный вои́стинну гре́х и рая́ жи́теля показа́.

Пе́снь 3.

Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Припев: Крестителю Спасов Иоа́нне, моли́ Бо́га о нас.

Непло́днаго чре́ва многоцве́тное прозябе́ние, непло́дную ду́шу мою́ покажи́ многопло́дну до́брыми прозябе́нии, я́коже виногра́д расту́щь, доброде́телей точа́щь сла́дкое гро́здие.

Припев: Крестителю Спасов Иоа́нне, моли́ Бо́га о нас.

Свяще́ннаго вои́стинну ко́рене и чи́ста се́мене священноро́дная прозябе́ кра́сная ве́твь, и прозя́бшаго Христа́, от Иессе́я боже́ственнаго ко́рене живоно́сное прозябе́ние, блаже́нне, крести́л еси́.

Сла́ва Отцу́ и Сы́ну и Свято́му Ду́ху:

Стена́ния немо́лчна, и ча́сты сле́зы, и сокруше́но се́рдце, и ду́х смире́н да́ждь ми́, прехва́льне, и се́тованен пла́чь, и тепло́ умиле́ние, и боле́знь пребы́тну.

И ны́не и при́сно и во ве́ки веко́в. Ами́нь.

Богородичен: От земноро́дна прозя́бши ко́рене, Чи́стая Влады́чице, присноцвету́щее и кра́сное прозябе́ние естества́, Христа́ прозябла́ еси́, Божества́ цве́т: Ааро́нов бо же́зл вообража́ше Тя́.

Седа́лен, гла́с 8.

Заха́риин пло́д, непло́дныя цве́т роди́ся дне́сь на́м от обеща́ния, честны́й Иоа́нн, Предте́ча Госпо́день, игра́я же во утро́бе ма́терни, пропове́дует и пре́жде рождества́ Соде́теля все́х. Се́й показа́ неизрече́нное Бо́жие и спаси́тельное явле́ние, сего́ вси́ почита́ем.

Сла́ва, и ны́не, Богородичен:

Яко Всенепоро́чная Неве́сто Творцу́, я́ко неискусому́жная Ма́ти Изба́вителю, прия́телище я́ко су́щи Уте́шителя, Препе́тая, беззако́нию мя́ су́ща скве́рное оби́телище и бесо́м игра́лище в ра́зуме бы́вша, потщи́ся от те́х злоде́йства мя́ изба́вити и све́тлое жили́ще доброде́телей соверши́, Светоно́сная, Нетле́нная, отжени́ о́блак страсте́й и Вы́шняго прича́стия сподо́би и Све́та невече́рняго моли́твами Твои́ми.

Пе́снь 4.

Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Припев: Крестителю Спасов Иоа́нне, моли́ Бо́га о нас.

Не довле́ют уста́ челове́ча восхвали́ти тя́, его́же уста́ Христо́ва похвали́ша, сла́дкая и медото́чная, и жи́зни испо́лнь су́щая, и сло́во все́м да́рующая. Оба́че приими́ мое́ пе́ние, ве́дый любо́вь, и са́мое то́ моле́ние, и́бо неизбе́жно.

Припев: Крестителю Спасов Иоа́нне, моли́ Бо́га о нас.

Чи́стое яви́ся се́рдце твое́, Предте́че, мироположе́ние Свята́го Ду́ха, благоуха́ющее доброде́тели, кадя́щее ра́зум, сладя́щее благодея́ния. Блаже́нни у́бо ели́цы чи́стии се́рдцем, Бо́га бо ти́и, рече́, у́зрят.

Припев: Крестителю Спасов Иоа́нне, моли́ Бо́га о нас.

Посече́ние секи́ры при ко́рени приближа́ется, и свиде́тельствуется, я́ко вся́ко дре́во, не творя́щее плода́ добра́, се́чивом посека́ется и вве́ржется во о́гнь гее́нский. Те́мже трепещи́, душе́ моя́, и плоды́ покая́ния принеси́.

Сла́ва Отцу́ и Сы́ну и Свято́му Ду́ху:

Яко име́я на небесе́х житие́, прия́т гра́д, иму́щь основа́ния незы́блемая, гра́да бо зде́ не вожделе́л еси́, пребыва́ющий же Иерусали́м, я́ве свобо́дный, ма́терь Па́влову, Вы́шний Сио́н.

И ны́не и при́сно и во ве́ки веко́в. Ами́нь.

Богородичен: Ве́ра тепла́ пове́дуется, а не сказа́ние стра́шнаго, Отрокови́це, та́инства Твоего́: смотря́емо бо то́, ника́коже сказа́нно е́сть, и зри́мо — непости́жно, с Тобо́ю бо ми́мо тека́ет, и постиза́емо отбега́ет, и, явля́яся, ма́ло что́ открыва́ется.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Крестителю Спасов Иоа́нне, моли́ Бо́га о нас.

Вети́йствующий язы́к, любому́дренно гремя́щих словеса́, и глаго́л си́лы, и число́м, и заве́том теку́щии, и пле́щущее высокогла́сие ра́зум восхвали́ти тя́ досто́йно не мо́гут.

Припев: Крестителю Спасов Иоа́нне, моли́ Бо́га о нас.

Тучено́сен о́блак, до́ждь кропя́щь разуме́ний, и иста́явшия неразу́мия пла́менем и исчеза́ющия прохлажда́ющ росо́ю, просте́рта Христо́с тя́ показа́, Предте́че.

Припев: Крестителю Спасов Иоа́нне, моли́ Бо́га о нас.

Да́ры нетле́нными, и благодея́нии боже́ственными, и дарова́нии обогати́ мя, обнища́вшаго и наготу́юща от доброде́тели вся́кия, и твои́м покро́вом оде́й мя́ спаси́тельным, я́коже боже́ственною ри́зою.

Сла́ва Отцу́ и Сы́ну и Свято́му Ду́ху:

Скве́рныя мы́сли и тлетво́рная помышле́ния израсти́вши, душа́ моя́, блаже́нне, страсте́й те́рнием оляде́: е́юже ве́щию разгоре́вшися, твои́х моли́тв огне́м очи́щь, стра́х Бо́жий в не́й все́й.

И ны́не и при́сно и во ве́ки веко́в. Ами́нь.

Богородичен: Господоимени́тая Де́во, гра́д нарече́на Царя́ Христа́, веселу́емый устремле́нии мы́сленныя реки́, иде́же е́сть все́х веселя́щихся жили́ще, окая́нную мою́ ду́шу учини́.

Пе́снь 6.

Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя.

Припев: Крестителю Спасов Иоа́нне, моли́ Бо́га о нас.

Яко безпло́тен, Крести́телю, и невеще́ствен, поуча́яся безсме́ртию невеще́ственных, в ме́ртвенней и ве́щней пло́ти твое́й любому́дрием же коне́чным украси́лся еси́, постя́ся, и бы́л еси́ Ангельскому и челове́ческому существу́ соприча́стник.

Припев: Крестителю Спасов Иоа́нне, моли́ Бо́га о нас.

Пресве́тло во звезда́х со́лнце, во времена́х же сладча́йша весна́, все́м же святы́х собо́ру ты́ я́коже звезда́м надлежи́ши со́лнце неразсу́дным вели́чеством, по вся́кому обога́щся естеству́.

Сла́ва Отцу́ и Сы́ну и Свято́му Ду́ху:

Вели́кий христиа́н засту́пниче, те́плый гре́шников уте́шителю, небе́снаго Ца́рствия вити́я, вво́дниче в боже́ственное Креще́ние, пропове́дниче покая́ния, покая́ния мя́ о́бразы утверди́.

И ны́не и при́сно и во ве́ки веко́в. Ами́нь.

Богородичен: Ты́ ле́ствица еси́, небеси́ равна́, Влады́чице, от земли́ до небесе́ просте́рта, Ты́ вои́стинну непроходи́мая две́рь, па́че же всезлата́я ру́чка и мо́ст, возводя́щь, к небеси́ и жи́зни восхо́ды отверза́ющь.

Конда́к Предте́чи, гла́с 3.

Пре́жде непло́ды, дне́сь Христо́ва Предте́чу ражда́ет, и то́й е́сть исполне́ние вся́каго проро́чества: Его́же бо проро́цы пропове́даша, на Сего́ во Иорда́не ру́ку положи́в, яви́ся Бо́жия Сло́ва проро́к, пропове́дник, вку́пе и Предте́ча.

Икос:

Иису́са Христа́, и́стиннаго Бо́га на́шего, Иса́ия иногда́ и проро́цы вси́ во о́бразех ви́деша и се́нех, но се́й бо́лий си́х бы́сть проро́к, я́коже пи́шет: Бо́га бо Сло́ва, Его́же прорече́, ви́де во пло́ти и осяза́, и пре́жде рожде́ния провозвеща́ет игра́нии свои́ми всему́ ми́ру ра́дость, я́ко пе́рвее яви́ся Сло́ва прише́ствия проро́к и пропове́дник, вку́пе и Предте́ча.

Пе́снь 7.

Ирмос: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Припев: Крестителю Спасов Иоа́нне, моли́ Бо́га о нас.

Проро́ков ве́рх, апо́столов печа́ть и по́стников нача́ло, соверше́ние пра́ведных, утвержде́ние му́чеников тя́ Христо́с, блаже́нне, показа́, и́стинная Глава́ всея́ Це́ркве.

Припев: Крестителю Спасов Иоа́нне, моли́ Бо́га о нас.

Из чре́ва ма́терня испо́лнился еси́ Свята́го Ду́ха, Предте́че, и сике́ра и вина́ не пи́л еси́, я́коже рече́ отцу́ твоему́ Ангел. Те́мже наре́клся еси́ вели́к пред Бо́гом.

Сла́ва Отцу́ и Сы́ну и Свято́му Ду́ху:

Крести́вый челове́ки во огни́ Святы́м Ду́хом пе́рвее огне́м гее́нским то́кмо крести́т по́слежде Тому́ неве́рующия, и́же го́рькаго креще́ния, Крести́телю, изба́ви мя́.

И ны́не и при́сно и во ве́ки веко́в. Ами́нь.

Богородичен: Ру́чка безду́шная дре́вле Тя́ одушевле́нну ру́чку сказа́ше, Влады́чице, жи́зни бо ма́нну носи́вши, Христа́, сме́рти го́ресть отъе́млющаго, и́стинную сла́дость и просвеще́ние ми́ру.

Пе́снь 8.

Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Крестителю Спасов Иоа́нне, моли́ Бо́га о нас.

Во́ду сла́дку напои́тельну непокори́вым и неразу́мным источи́ лю́дем изра́ильтеским жезла́ уязвле́нием ка́мень немо́кренный, и тве́рдый, и несеко́мый; от непло́дных же и безча́дных чре́сл на́м истече́ река́ исцеле́ний.

Припев: Крестителю Спасов Иоа́нне, моли́ Бо́га о нас.

С похвала́ми, проро́че, творя́т па́мять твою́ собо́р пра́ведных, проро́к сосло́вие, му́ченик во́инства и по́стник составле́ние, чи́нове преподо́бных и святы́х все́х: па́мять бо пра́ведных вои́стинну с похвала́ми.

Сла́ва Отцу́ и Сы́ну и Свято́му Ду́ху:

Не́бо одушевле́нное, доброде́тельми, я́ко звезда́ми, украше́нное, златосия́нное и златоза́рное со́лнце, све́щник благода́ти, сокро́вище Ду́ха, Ца́рствия вели́кий пропове́дник, вити́я богодохнове́нный, громогла́сный язы́к, труба́ вели́кая, Предте́ча да воспое́тся.

И ны́не и при́сно и во ве́ки веко́в. Ами́нь.

Богородичен: Стра́нна и ди́вна ужа́сна пове́дания странноле́пнаго и пресла́внаго Рождества́ Твоего́, Мари́е Всепе́тая: Го́спода бо сла́вы, Ему́же херуви́ми и серафи́ми предстоя́т, еди́наго от Тро́ицы неслия́нно, непрело́жно родила́ еси́ без се́мене, из Тебе́ воплоще́нна.

Песнь 9

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Припев: Крестителю Спасов Иоа́нне, моли́ Бо́га о нас.

Се́ тебе́, влады́це моему́ и те́плому души́ моея́ засту́пнику, худо́е сие́ принесо́х приноше́ние, ра́бское служе́ние, блаже́нне, благоразу́мно исполня́я, е́же вонми́, возлю́бль нра́в пе́рвее де́л и пре́жде да́ра произволе́ние.

Припев: Крестителю Спасов Иоа́нне, моли́ Бо́га о нас.

Нечи́стыми устна́ми и скве́рными Пречи́стыя Де́вы всечи́стаго тя́ сро́дника, блаже́нне, молю́, нечи́стый и скве́рный и окаля́нный сластьми́: омы́й те́ло, очи́сти ду́х и ду́шу мою́ освяти́.

Сла́ва Отцу́ и Сы́ну и Свято́му Ду́ху:

Черто́га небе́снаго таи́нниче, Жениха́ Христа́ дру́же и́скренний, стоя́й и гла́с слы́ша ра́достный Женихо́в досто́йный, покажи́ блага́го гла́са и мене́ со благослове́нными насле́дника Ца́рствия, Бо́гу зову́щу в насле́дие.

И ны́не и при́сно и во ве́ки веко́в. Ами́нь.

Богородичен: Пречи́стая Де́во, Ма́ти Бо́жия невеще́ственно паля́щаго Угля, ве́щь душа́м одушевле́нна, клеща́ серафи́мская и пламеноно́сный престо́ле носи́маго херуви́мы, ве́щь души́ моея́ огне́м невеще́ственным попали́ и негаси́маго огня́ изба́ви мя́.

Свети́лен.

Предте́чево дне́сь радостотво́рное рожде́ние се́тование реши́т о́тча безгла́сия и ро́ждшия непло́дство, возвеща́ет же настоя́щую ра́дость и весе́лие. Те́мже и вся́ тва́рь све́тло то́е пра́зднует.

Сла́ва, и ны́не, Богородичен:

Прему́дрость Ипоста́сную, и Сло́во пресу́щное, и Врача́ ду́ш и теле́с ро́ждшая, гное́ния и ра́ны души́ моея́ исцели́, лю́тыя и вре́менныя, и се́рдца моего́ уста́ви боле́зни, Де́во.

Стихи́ры, гла́с 2:

Иже от проро́ка проро́ка и непло́дныя прозябе́ние, в рожде́нных жена́ми превы́шша все́х, пусты́ннаго граждани́на, Иоа́нна сла́внаго псалмы́ и пе́ньми и пе́сньми духо́вными восхва́лим, вопию́ще к нему́: Крести́телю Спа́сов и Предте́че, я́ко име́я дерзнове́ние, в честне́м твое́м рождестве́ умоли́ Христа́ дарова́ти ми́р ми́ру и душа́м на́шим ве́лию ми́лость.

Сла́ва И ны́не, богоро́дичен.

Дре́ву кре́стному Тя́, Иису́се, пригвожде́на зря́щи, Неискусобра́чная, пла́чущи, глаго́лаше: Ча́до сла́дкое, почто́ оста́вил еси́ Мене́, ро́ждшую Тя́, еди́ну, Све́те непристу́пный, Пребезнача́льнаго Отца́? Потщи́ся и просла́вися, я́ко да сла́ву получа́т Боже́ственную, и́же Боже́ственныя стра́сти Твоя́ сла́вящии.

Молитва на Рождество Иоанна Предтечи

Святы́й Предте́че и Крести́телю Христо́в Иоа́нне! Пропове́дник сы́й покая́ния, ка́ющихся не пре́зри на́с, но моли́ся ко Влады́це Христу́ за на́с, недосто́йных рабо́в, уны́лых, немощны́х, во мно́гия грехи́ впа́дших. Сме́рти у́бо ча́ем, о гресе́х же на́ших николи́же поболе́хом и о Ца́рствии Небе́снем не попеко́хомся: но не пре́зри на́с, Крести́телю Христо́в, честны́й Предте́че, бо́лий рожде́нных все́х, по́стником и пусты́нником наста́вниче, чистоты́ учи́телю и бли́жний дру́же Христо́в. Тя мо́лим, к тебе́ прибега́ем: не отри́ни на́с, прося́щих твоего́ заступле́ния, обнови́ ду́ши на́ша покая́нием, е́же е́сть второ́е креще́ние: твои́м хода́тайством пре́д Го́сподем испроси́ на́м очище́ние грехо́в. Уста́ недосто́йная вопию́т к тебе́, и душа́ смире́нная мо́лится, се́рдце сокруше́нное из глубины́ воздыха́ет: простри́ пречи́стую твою́ десни́цу и защити́ на́с от вра́г ви́димых и неви́димых. Ей, Го́споди Иису́се Христе́! Моли́твами свята́го Иоа́нна Крести́теля Твоего́, изря́днее же Пречи́стыя Твоея́ Ма́тери, Влады́чицы на́шея Богоро́дицы, спаси́ на́с, гре́шных рабо́в Твои́х, ка́ющихся о гресе́х. Ты́ бо еси́ Бо́г ка́ющихся, и на Тя́, Спаси́теля, возлага́ем наде́жду, сла́вяще Пресвято́е и́мя Твое́, со Безнача́льным Твои́м Отце́м, и со Пресвяты́м и Благи́м и Животворя́щим Твои́м Ду́хом, ны́не и при́сно и во ве́ки веко́в. Ами́нь.