4 июля.
Канон мученику Иулиану Египетскому
![мученику Иулиану Египетскому мученику Иулиану Египетскому](img_i/010.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 1:
Све́тлыя по́стничества по́двиги,/ ра́дуяся, поне́сл еси́, Иулиа́не Богоблаже́нне, с преподо́бною Васили́ссою,/ и страда́ния до́бльственно претерпе́л еси́/ с честны́ми твои́ми сострада́льцы,/ с ни́миже моли́ Христа́ Бо́га/ спасти́ся душа́м на́шим.
Кано́н, гла́с 8.
Пе́снь 1.
Ирмос: Колесницегони́теля фарао́ня погрузи́/ чудотворя́й иногда́/ Моисе́йский жезл крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ пе́снь Бо́гови воспева́юща.
Припев: Святы́й му́чениче Иулиа́не, моли́ Бо́га о нас.
Дости́гнув к твое́й па́мяти, преподо́бнострада́льче,/ дви́жу устне́ мои́ к пе́нию,/ ты же сло́во ми да́ждь твои́ми к Бо́гу моли́твами/ и страда́вших с тобо́ю, всеблаже́нне.
Припев: Святы́й му́чениче Иулиа́не, моли́ Бо́га о нас.
Раче́нием чистоты́ одержи́м, Иулиа́не,/ де́вствовати наста́вил еси́ Васили́ссу,/ и, окормле́нием Боже́ственным житие́ безсупру́жных избра́вшее/ мно́жеству тех наста́вники и, спаси́телие бы́сте.
Припев: Святы́й му́чениче Иулиа́не, моли́ Бо́га о нас.
Род, и бога́тство, и наслажде́ние плотско́е любве́ ра́ди Христо́вы презре́в/ и, взем, преподо́бне, крест,/ с блаже́нною неве́стою твое́ю мона́шествовал еси́ боголе́пно.
Сла́ва Отцу́ и Сы́ну и Свято́му Ду́ху:
Я́ко крин сладково́нный и я́ко ши́пок,/ процвели́ есте́ во цве́тнице Боже́ственнаго поще́ния, Иулиа́не и Васили́ссо,/ облагоуха́юще притека́ющия к вам, всехва́льнии.
И ны́не и при́сно и во ве́ки веко́в. Ами́нь.
Богородичен: Неискусобра́чно Христа́ родила́ еси́,/ И́же по нас и нас ра́ди восприя́вша естество́, Пречи́стая,/ и неизме́нна по обои́м пребы́вша,/ Его́же моли́ дарова́ти ми грехо́в и искуше́ний избавле́ние.
Пе́снь 3.
Ирмос: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко не́сть свят, па́че Тебе́, Еди́не Человеколю́бче.
Припев: Святы́й му́чениче Иулиа́не, моли́ Бо́га о нас.
И́же му́дре вся устроя́я, Сло́во,/ и земны́я ко спасе́нию направля́я,/ от земли́ преставля́ет тя, Васили́ссо,/ и вся духо́вныя се́стры твоя́/ пре́жде лю́таго на христиа́ны гоне́ния.
Припев: Святы́й му́чениче Иулиа́не, моли́ Бо́га о нас.
Я́ко удобре́нная и Богоуго́дная де́ва,/ духо́вная же ма́ти и води́тельница дев,/ с те́ми златови́дными кри́лы чистоты́ и любве́ Боже́ственныя/ к Небе́сным возлете́ла ес
Сла́ва Отцу́ и Сы́ну и Свято́му Ду́ху:
По́стничествовав пе́рвее во оби́тели,/ во́ждь был еси́, Иулиа́не, тьмы́ и́ноков,/ и́хже приве́л еси́ Христу́, пострада́вших огне́м,/ та́же и сам му́ки претерпе́л еси́, утвержда́я ве́рныя.
И ны́не и при́сно и во ве́ки веко́в. Ами́нь.
Богородичен: Мы́сленная показа́лася еси́ две́рь/ И́же с высоты́ восто́ка су́щим на земли́ я́вльшася, Де́во:/ Тобо́ю бо к нам Сло́во прии́де,/ во е́же спасти́ вся от безслове́сия, Богоневе́стная.
Седа́лен, гла́с 4:
Я́ко многосве́тлое со́лнце с луно́ю посреде́ многочи́сленных звезд,/ та́ко Иулиа́н с Васили́ссою среди́ мно́жества преподо́бных свои́х,/ блиста́ющии благода́тию на Небеси́,/ иде́же е́сть всех веселя́щихся жили́ще.
Ин седа́лен, глас 5.
Пятостру́нную гу́сль Свята́го Ду́ха,/ тве́рдыя страстоте́рпцы но́выя благода́ти,/ восхва́лим, ве́рнии, Боже́ственнаго Иулиа́на, свяще́ннаго Анто́ния,/ Ке́лсия с Мариони́ллою и тве́рдаго Анастаси́я,/ моля́щияся ко Го́споду о чту́щих святу́ю па́мять их.
Сла́ва, и ны́не, богоро́дичен, гла́с то́йже:
Не премолчи́м при́сно, Богоро́дице Де́во,/ благода́рственно воспева́ти от се́рдца Твоя́ ми́лости, Влады́чице, раби́ Твои́, вопию́щи и глаго́лющи:/ Пресвята́я Де́во, предвари́ и изба́ви нас от враг ви́димых и неви́димых,/ и от ну́жды и вся́каго преще́ния,/ Ты бо еси́ на́ше заступле́ние.
Пе́снь 4.
Ирмос: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.
Припев: Святы́й му́чениче Иулиа́не, моли́ Бо́га о нас.
Оби́тель твоя́, Иулиа́не, сожже́на бы́вши, храни́те сла́дкая пе́ния,/ и слы́шавших та целя́ше неду́ги в показа́ние дел твои́х,/ в воспомина́ние же богособра́ннаго со́нма сожже́нных.
Припев: Святы́й му́чениче Иулиа́не, моли́ Бо́га о нас.
Вери́гами отягче́на и поруга́ема узре́в тя, Келси́й/ отверза́ет зе́ницы души́ своея́:/ ви́дит бо тя, свя́те, А́нгелы окружа́ема и венча́ема, и воззва́:/ си́ле Твое́й сла́ва, Человеколю́бче.
Сла́ва Отцу́ и Сы́ну и Свято́му Ду́ху:
С тобо́ю, Иулиа́не, Келси́й восхоте́в страда́ти и умре́ти,/ оте́ческое отри́ну нече́стие и му́ченик Христо́в яви́ся,/ ма́тере своея́ Мариони́ллы сопребыва́нием наслажда́яся.
И ны́не и при́сно и во ве́ки веко́в. Ами́нь.
Богородичен: Су́щим на земли́ уподо́бився Небе́сный,/ небе́сны сих соде́ла/ и, пострада́в естество́м страда́тельным,/ Боже́ственнаго безстра́стия прича́стие дарова́,/ Сего́ у́бо Ро́ждшую сла́вим.
Пе́снь 5
Ирмос: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя е́сть чужда́я тьма́, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.
Припев: Святы́й му́чениче Иулиа́не, моли́ Бо́га о нас.
Исцели́л еси́, Иулиа́не, сло́вом слепа́го,/ е́же не возмого́ша соде́яти и́дольстии жрецы́,/ мучи́тель у́бо, обезгла́вив прозре́вша,/ тебе́ предаде́ ины́м лю́тым му́кам.
Припев: Святы́й му́чениче Иулиа́не, моли́ Бо́га о нас.
Заключе́ния и бие́ний я́звы претерпе́в,/ ди́вен и Богоно́сен показа́лся еси́, досточу́дне./ Маркиа́н же, хотя́ победи́ти твое́ благодерзнове́ние,/ посра́млен яви́ся, я́ко на Бо́га вражду́яй.
Припев: Святы́й му́чениче Иулиа́не, моли́ Бо́га о нас.
О, мно́гаго твоего́, Иулиа́не, к Бо́гу дерзнове́ния:/ твое́ю моли́твою ме́ртвый возстае́т,/ и́же ба́нею пакибытия́ возрожде́н, Анаста́сий именова́ся,/ сын вои́стинну воскресе́ния сый.
Сла́ва Отцу́ и Сы́ну и Свято́му Ду́ху:
Ко Христу́ огне́м любве́ пали́ми, сора́довахуся страстоте́рпцы,/ преда́ли бы́вше огню́ за благоче́стие и невреди́мы сохра́ншеся,/ Го́спода госпо́дствующих прославля́ху.
И ны́не и при́сно и во ве́ки веко́в. Ами́нь.
Богородичен: Ра́дость ми́ру роди́вшая, Присноде́во,/ души́ моея́ уны́ние отжени́ и напра́ви мое́ помышле́ние твори́ти Боже́ственная,/ да ра́достным се́рдцем сла́влю Тя, Богора́дованная.
Пе́снь 6.
Ирмос: Очи́сти мя, Спа́се,/ мно́га бо беззако́ния моя́,/ низ глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.
Припев: Святы́й му́чениче Иулиа́не, моли́ Бо́га о нас.
Седмочи́сленный ублажи́м лик ца́рских отроко́в,/ боже́ственне совокупля́емь с пресви́тером Анто́нием,/ я́ко низложи́ша враги́ и сла́ву прия́ша му́ченичества.
Припев: Святы́й му́чениче Иулиа́не, моли́ Бо́га о нас.
Седмери́ца ю́ных испове́дник, Анто́нием окормля́ема, с двадеся́тицею во́инов,/ непоро́чныя же́ртвы, нас ра́ди поже́ршемуся Христу́ приведо́шася,/ Его́ ра́ди усе́чени бы́вше.
Сла́ва Отцу́ и Сы́ну и Свято́му Ду́ху:
Твое́ю моли́твою, Иулиа́не, и су́щих с тобо́ю/ храм и́дольский паде́ся ве́сь/ и бы́вшии в нем погибо́ша,/ проседшаяся же земля́, изверга́ющи о́гнь, пожига́ше пога́ны.
И ны́не и при́сно и во ве́ки веко́в. Ами́нь.
Богородичен: Рабы́ Твоя́, Христе́, уще́дри, воспева́ющия Тя,/ Твоея́ Пречи́стыя Ма́тере мольба́ми, я́ко Благоутро́бен,/ и преподо́бных и му́ченик предста́тельством.
Конда́к, гла́с 8:
И́же в преподо́бных и му́ченицех/ пресла́внаго Иулиа́на и сподви́жников его́/ любо́вию па́мять почита́ем дне́сь,/ я́ко просла́вивших Го́спода Боже́ственными де́лы/ и просла́вленных Го́сподом Боже́ственными чудесы́,/ и́хже пе́сньми увенча́им, зову́ще:/ ра́дуйтеся, во́ини Христо́вы непобеди́мии.
Икос:
А́нгел во пло́ти, Иулиа́не, был еси́ на земли́,/ по́стничеством воскриле́н и страда́льчеством укра́шен./ Отону́дуже возбужда́еши вопи́ти:/ ра́дуйся, прозябе́ние честно́е Ливи́и:/ ра́дуйся, свети́льниче благоче́стия./ Ра́дуйся, мона́шествующих с Васили́ссою преиму́щий;/ ра́дуйся, страда́вших с тобо́ю наста́вниче./ Ра́дуйся, я́ко приобщи́лся еси́ страсте́м Христо́вым;/ ра́дуйся, я́ко, с таи́нники Твои́ми пострада́в, обре́л еси́ неконча́емый живо́т./ Ра́дуйтеся, Анто́ние и Анастаси́е блаже́ннии;/ ра́дуйтеся, Мариони́лло и Келси́е сла́внии./ Ра́дуйтеся, пятери́це му́ченик прехва́льная;/ ра́дуйтеся, А́нгелом равностоя́тели./ Ра́дуйтеся, небожи́телие венцено́снии;/ ра́дуйтеся, сла́вы Бо́жией светоза́рнии зри́телие./ Ра́дуйтеся, во́ини Христо́вы непобеди́мии.
Пе́снь 7.
Ирмос: Бо́жия снизхожде́ния/ о́гнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.
Припев: Святы́й му́чениче Иулиа́не, моли́ Бо́га о нас.
Небе́снаго утеше́ния сподо́бишася страда́льцы, бы́вше в заключе́нии:/ предста́ша бо им сожже́ннии му́ченицы и Васили́сса с со́нмом дев, пою́ще:/ благослове́н еси́, Бо́же оте́ц на́ших.
Припев: Святы́й му́чениче Иулиа́не, моли́ Бо́га о нас.
Посреде́ со́нма неве́рных вы огня́ претерпе́сте му́ку/ и главны́я ко́жи содра́ние/ и оче́с лю́те лише́ни бы́сте, страда́льцы вседо́блии, пою́ще:/ благослове́н еси́, Бо́же оте́ц на́ших.
Сла́ва Отцу́ и Сы́ну и Свято́му Ду́ху:
Я́ве на по́прищи бра́вшеся со зверьми́,/ соблюдо́стеся невреди́ми от тех,/ и, во главы́ усече́ни, ду́ши своя́ преда́сте Христу́, пою́ще:/ благослове́н еси́, Бо́же оте́ц на́ших.
И ны́не и при́сно и во ве́ки веко́в. Ами́нь.
Богородичен: Де́во Всечестна́я, от страсте́й безче́стия изба́ви мя,/ да ра́достно зову́ Ти:/ ра́дуйся, чистоты́ черто́же;/ ра́дуйся, сокро́вище де́вства;/ ра́дуйся, вмести́лище свято́е отце́в Бо́га.
Пе́снь 8.
Ирмос: Седмери́цею пе́щь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Припев: Святы́й му́чениче Иулиа́не, моли́ Бо́га о нас.
Да мно́гое воздая́ние на Небеси́ получи́ши,/ му́ки мно́жайшия претерпе́л еси́, Иулиа́не,/ четвери́цу сострада́льцев прии́м,/ с ни́миже тече́ние сла́вно сконча́в,/ сла́виши Христа́ во ве́ки.
Припев: Святы́й му́чениче Иулиа́не, моли́ Бо́га о нас.
И́хже, я́ко беззако́нных, умертви́ша,/ сих па́че просла́ви И́же сла́вы Госпо́дь,/ неве́рныя же погуби́ трус и град,/ и иге́мон, изъяде́н червьми́, и́здше,/ му́чеником лику́ющим и пою́щим Христа́ во ве́ки.
Сла́ва Отцу́ и Сы́ну и Свято́му Ду́ху:
Чуде́с де́йство даде́ся тебе́, Иулиа́не,/ и вене́ц нетле́ния прия́л еси́ от руки́ Влады́чни,/ я́ко му́ченик и я́ко наста́вник мона́шествующих,/ с те́ми превознося́ Его́ во ве́ки.
И ны́не и при́сно и во ве́ки веко́в. Ами́нь.
Богородичен: Преизоби́лием бла́гости ту́не мя поми́луй, Влады́чице,/ Я́же благоутро́бия Исто́чник ро́ждшая:/ ми́лости бо досто́йное не и́мам что принести́ Тебе́,/ благословля́емой во ве́ки.
Песнь 9
Ирмос: Ужасе́ся о сем Не́бо/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бы́сть простра́ннейшее Небе́с/ Тем Тя, Богоро́дицу,/ А́нгелов и челове́к чинонача́лия велича́ют.
Припев: Святы́й му́чениче Иулиа́не, моли́ Бо́га о нас.
Потреби́тели пре́лести и побо́рники Боже́ственныя ве́ры,/ церко́вныя столпы́ и тве́рдыя адама́нты,/ Христо́вы ору́жники, ве́рою страстоте́рпцы в пе́снех да почту́тся.
Припев: Святы́й му́чениче Иулиа́не, моли́ Бо́га о нас.
Анто́ния пресви́тера со Анаста́сием воспева́ю,/ и с Келси́ем Мариони́ллу, и с ни́ми чу́днаго Иулиа́на,/ лобыза́я с ве́рою честны́й о́браз их.
Сла́ва Отцу́ и Сы́ну и Свято́му Ду́ху:
Не преста́й моли́тися с таи́нники твои́ми, Иулиа́не, о нас,/ соверша́ющих святу́ю па́мять ва́шу,/ и целе́бным моще́м ва́шим покланя́ющимся, всеблаже́ннии.
И ны́не и при́сно и во ве́ки веко́в. Ами́нь.
Богородичен: Во утро́бу, Христе́ Спа́се мой, деви́ческую всели́вся,/ яви́лся еси́ ми́ру Твоему́/ и обеща́лся еси́ всегда́ бы́ти с рабы́ Твои́ми,/ моли́твами у́бо Ро́ждшия Тя мир ста́ду Твоему́ да́руй.
Свети́лен:
По́стничествовав пе́рвее,/ спо́стники твоя́ приве́л еси́ Христу́, Богоблаже́нне,/ страда́льчествовав же по́слежде,/ сострада́льцы твоя́ показа́л еси́ венцено́сны,/ с ни́миже, Иулиа́не, бу́ди хода́тай о нас ко Го́споду.
Сла́ва, и ны́не, Богородичен:
Держа́вным Твои́м покро́вом, Чи́стая,/ нас, рабо́в Твои́х, сохраня́й всегда́ от наве́т вра́жиих неврежде́нных./ Тя бо еди́ну стяжа́хом прибе́жище в напа́стех.
Молитва
О святы́й уго́дниче Бо́жий, му́чениче Иулиа́не! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![мученику Иулиану Египетскому мученику Иулиану Египетскому](img_b/010.jpg)