4 июля.

Канон преподобной Анастасии, матере святителя Саввы, первого архиепископа и учителя Сербскаго

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Доброде́тельми бога́тая, кро́тостию и благоче́стием украше́нная, возсия́ла еси́ чистото́ю жития́ твоего́, сего́ ра́ди Благи́й Бо́г благослови́ тя́ ма́ти свети́льника ро́да бы́ти, те́мже вопие́м ти́: ра́дуйся, преподо́бная ма́ти Анастаси́е.

Велича́ние:

Ублажа́ем тя́, преподо́бная ма́ти Анастаси́е, и чте́м святу́ю па́мять твою́: ты́ бо мо́лиши за на́с Христа́ Бо́га на́шего.

Кано́н преподо́бныя, гла́с 5.

Пе́снь 1.

Ирмос: Христо́с яви́ся на земли́, изба́вивый ро́д на́ш от идолонеи́стовства, Тому́ Еди́ному пои́м, я́ко просла́вися.

Припев: Преподо́бная ма́ти Анастаси́е, моли́ Бо́га о нас.

Мо́лниями Ду́ха осия́емая, те́мныя о́блаки души́ моея́ разреши́, у́м же мо́й озари́ и устне́ к пе́нию тебе́ хвали́ти отве́рзи.

Припев: Преподо́бная ма́ти Анастаси́е, моли́ Бо́га о нас.

Ангела ро́ду се́рбскому родила́ еси́, и́бо и́стинную любо́вь к Бо́гу име́ла еси́, благолюби́вая Анастаси́е, те́мже и ублажа́ем тя́ с любо́вию.

Сла́ва Отцу́ и Сы́ну и Свято́му Ду́ху:

То́й и́стинно лю́бит Бо́га, и́же за́поведи Его́ соблюда́ет; ты́ же се́ испо́лнила еси́, сего́ ра́ди боголюби́вую тя́ хва́лим и велича́ем.

И ны́не и при́сно и во ве́ки веко́в. Ами́нь.

Богородичен: Предста́тельство и покро́в жи́зни моея́ бу́ди ми́, Богороди́тельнице Чи́стая, вся́ бо мо́жеши, я́ко си́льнаго в кре́пости Христа́ ро́ждши, Богоблаже́нная.

Пе́снь 3.

Ирмос: Утверди́ ны, Бо́же, Твое́ю си́лою, и низложи́ ерети́ческая шата́ния, и вознеси́ ро́г на́ш.

Припев: Преподо́бная ма́ти Анастаси́е, моли́ Бо́га о нас.

Егда́ заключи́ся утро́ба твоя́, я́коже иногда́ Ли́и, возскорбе́ла еси́ и к Бо́гу взыва́ла еси́, прося́щи еще́ ча́до му́жескаго по́ла.

Припев: Преподо́бная ма́ти Анастаси́е, моли́ Бо́га о нас.

Ро́ждшееся от тебе́ ве́лию сла́ву принесе́ тебе́, преподо́бная ма́ти Анастаси́е, сего́ ра́ди сла́вим тя́ и велича́ем.

Сла́ва Отцу́ и Сы́ну и Свято́му Ду́ху:

Аще и жена́ Симео́нова была́ еси́, но во все́х за́поведех без поро́ка ходи́ла еси́, те́мже и уподо́билася еси́ му́дрым де́вам.

И ны́не и при́сно и во ве́ки веко́в. Ами́нь.

Богородичен: Ро́ждши Благоде́теля все́х, до́брых Вино́внаго, прегреше́ний мои́х мглу́ разреши́ и здра́вие моли́твами Твои́ми пода́ждь ми́.

Седа́лен, гла́с 4:

Образ была́ еси́ смире́ния, чистоты́ и целому́дрия мно́гих вина́, украша́ема му́дростию и смире́нием, ра́зумом и разсужде́нием и ине́ми кра́сными дарова́нии, те́мже мо́лим тя́: моли́ Христа́ Бо́га, да украси́т и на́с си́ми доброде́тельми.

Сла́ва, и ны́не, богоро́дичен, гла́с то́йже:

Твое́ пое́м благоутро́бие, Всенепоро́чная, Тобо́ю бо позна́хом неопи́санное Сло́во Бо́жие, Единоро́днаго Сы́на Вседержи́телева, и вопие́м Ти́, Чи́стая: ра́дуйся, Благослове́нная Богоро́дице, упова́ние ду́ш на́ших.

Пе́снь 4.

Ирмос: Услы́шах, Го́споди, слу́х Тво́й и убоя́хся, разуме́х смотре́ние Твое́ и просла́вих Тя́, Еди́не Человеколю́бче.

Припев: Преподо́бная ма́ти Анастаси́е, моли́ Бо́га о нас.

Науче́на Бо́гом, ты́ была́ еси́ лу́чшая учи́тельница сы́ну твоему́, и́же, науче́н тобо́ю, бы́сть и́стинный учи́тель ро́да своего́.

Припев: Преподо́бная ма́ти Анастаси́е, моли́ Бо́га о нас.

Анастаси́е преподо́бная, моли́ Христа́ Бо́га на́шего, да вси́, наде́ющиися На́нь, получи́м живо́т ве́чный.

Сла́ва Отцу́ и Сы́ну и Свято́му Ду́ху:

Сра́дуются дне́сь на́м вся́ преподо́бныя и пра́ведныя, де́вы же и жены́ до́блествовавшия, воспева́юще с на́ми честно́е твое́ преставле́ние.

И ны́не и при́сно и во ве́ки веко́в. Ами́нь.

Богородичен: Ангельстии чи́ни пою́т Тя́ непреста́нно, Богоро́дице Де́во, ро́ждшую без отца́ Собезнача́льное Сло́во Отчее, о чу́до! осене́нием Свята́го Ду́ха.

Пе́снь 5

Ирмос: Све́те Истинный, Христе́ Бо́же, к Тебе́ у́тренюет ду́х мо́й от но́щи, яви́ на мя́ лице́ Твое́.

Припев: Преподо́бная ма́ти Анастаси́е, моли́ Бо́га о нас.

Ты́ Бо́гом возлю́блена еси́, ма́ти Анастаси́е, Его́же моли́ о на́с: да и мы́ возлю́бим Бо́га и возлю́блены бу́дем от Него́.

Припев: Преподо́бная ма́ти Анастаси́е, моли́ Бо́га о нас.

Агница Христо́ва житие́м была́ еси́, кро́тостию и смире́нием ду́шу твою́ украси́вши, те́мже тя́ Христо́с в нетле́нныя черто́ги прия́т.

Сла́ва Отцу́ и Сы́ну и Свято́му Ду́ху:

Саму́ю себе́ устро́ивши, я́ко чи́стое зерца́ло Боже́ственных разуме́ний, проявля́ла еси́ благонра́вие, кро́тость и смире́ние.

И ны́не и при́сно и во ве́ки веко́в. Ами́нь.

Богородичен: Милосе́рдия Твоего́ бе́здну пода́ждь ми́ призыва́ющу, я́же Благосе́рдаго ро́ждши, и спаси́ все́х, пою́щих Тя́.

Пе́снь 6.

Ирмос: От ки́та проро́ка изба́вил еси́, мене́ же из глубины́ грехо́в возведи́, Го́споди, и спаси́ мя.

Припев: Преподо́бная ма́ти Анастаси́е, моли́ Бо́га о нас.

Иису́с Человеколю́бец, ви́дя твое́ благослове́нное души́ мудрова́ние, венце́м сла́вы увязе́ тя.

Припев: Преподо́бная ма́ти Анастаси́е, моли́ Бо́га о нас.

Юне́йший сы́н тво́й, любо́вию твое́ю води́мый, Влады́чнею же си́лою утвержда́емь, прия́телище Трисо́лнечнаго Све́та показа́ся.

Сла́ва Отцу́ и Сы́ну и Свято́му Ду́ху:

Лю́дие, ве́дяще тя́ в за́поведех Госпо́дних ходи́вшую и благода́тию Его́ оправда́нную, достоблаже́нная Анастаси́е, досто́йно сла́вят па́мять твою́.

И ны́не и при́сно и во ве́ки веко́в. Ами́нь.

Богородичен: Из чре́ва Твоего́, Чи́стая, про́йде Плотоно́сец, обле́кся, Всенепоро́чный, кроме́ греха́ во всего́ челове́ка, Его́же моли́ ве́рою Тя́ чту́щия спасти́.

Конда́к, гла́с 4:

Во благослове́ннем бра́це пожи́вши, нескве́рно удержа́ла еси́ зако́нно целому́дрие, ча́да же твоя́ кро́тко учи́ла еси́ па́че все́х Христа́ люби́ти, Ему́же ны́не предстоя́щи и моля́щися, помяни́ и на́с, вопию́щих ти́: ра́дуйся, преподо́бная ма́ти Анастаси́е.

Икос:

Егда́ утро́ба твоя́ заключи́ся, я́коже Ли́и иногда́, возскорбе́ли есте́ о́ба супру́га и, возжеле́вше еще́ еди́ное благослове́нное ча́до, в нощне́й моли́тве наедине́ со слеза́ми взыва́ли есте́ к Бо́гу си́це: Влады́ко, Бо́же Вседержи́телю, послу́шавый дре́вле Авраа́ма и Са́рру и про́чих пра́ведников, моли́вшихся Тебе́ о ча́дех, услы́ши и на́с, гре́шных рабо́в Твои́х, да́руй на́м по Твое́й бла́гости име́ти еще́ ча́до му́жескаго по́ла, е́же бу́дет на́м уте́ха и же́зл в ста́рости на́шей, и се́ ны́не полага́ем обе́т — по детозача́тии се́м отлучи́тися от бра́чнаго обще́ния и до конца́ жи́зни в чистоте́ теле́сней сохрани́тися. Уви́дев Госпо́дь серде́ц ва́ших чистоту́ и по моли́тве ва́шей дарова́ ва́м сы́на, его́же вы нареко́сте Ра́стко, во и́ноцех же Са́вва, и́же бы́сть пе́рвый просвети́тель ро́да се́рбскаго. Те́мже вопие́м ти́: ра́дуйся, преподо́бная ма́ти Анастаси́е.

Пе́снь 7.

Ирмос: Благослове́н еси́, Бо́же, ви́дяй бе́здны и на престо́ле сла́вы седя́й, препе́тый и пресла́вный.

Припев: Преподо́бная ма́ти Анастаси́е, моли́ Бо́га о нас.

Юность свою́ чи́сту сы́н тво́й дарова́ Христу́, сле́дуя твоя́ богому́драя увеща́ния, и на́с научи́ пе́ти: благослове́н еси́, Бо́же, препе́тый и пресла́вный.

Припев: Преподо́бная ма́ти Анастаси́е, моли́ Бо́га о нас.

Благодари́ти Бо́га научи́ на́с, богому́драя ма́ти Анастаси́е, да вси́ со умиле́нием взыва́ем: благослове́н еси́, Бо́же, препе́тый и пресла́вный.

Сла́ва Отцу́ и Сы́ну и Свято́му Ду́ху:

Ору́жием честна́го креста́ вооружи́вшися, оста́вила еси́ жития́ мяте́ж и молвы́ убежа́ла еси́, моли́твами и поще́нием, жела́нием упражня́ющися и пою́щи: благослове́н еси́, Бо́же, препе́тый и пресла́вный.

И ны́не и при́сно и во ве́ки веко́в. Ами́нь.

Богородичен: Разуме́вше прозорли́выма очи́ма, проро́цы Тя́ я́ве провозвести́ша, хотя́щу бы́ти Ма́терь Вседе́теля и все́х Влады́ки, те́мже Тя́, Всепе́тая, Богоро́дицу испове́дуем.

Пе́снь 8.

Ирмос: Творца́ тва́ри, Его́же ужаса́ются Ангели, по́йте, лю́дие, и превозноси́те во вся́ ве́ки.

Припев: Преподо́бная ма́ти Анастаси́е, моли́ Бо́га о нас.

Ве́рных мы́сли озаря́ет све́тлый де́нь пра́здника твоего́, и просвеща́ет всю́ зе́млю, и науча́ет пе́ти: Творца́ тва́ри по́йте и превозноси́те во вся́ ве́ки.

Припев: Преподо́бная ма́ти Анастаси́е, моли́ Бо́га о нас.

Иису́су Го́споду принесла́ еси́ же́ртву благоприя́тну прозя́бшаго из ложе́сн твои́х свети́льника ве́рным, усе́рдно взыва́ющи: Творца́ тва́ри по́йте и превозноси́те во вся́ ве́ки.

Сла́ва Отцу́ и Сы́ну и Свято́му Ду́ху:

Юже сла́ву приобрела́ еси́, Анастаси́е, мо́ли и о на́с улучи́ти ю́, ве́рою вопию́щим с тобо́ю: Творца́ тва́ри по́йте и превозноси́те во вся́ ве́ки.

И ны́не и при́сно и во ве́ки веко́в. Ами́нь.

Богородичен: Красе́н добро́тою па́че все́х Пло́д чре́ва Твоего́, Богоро́дице Де́во, Ты́ бо родила́ еси́ Бо́га воплоще́нна, я́вльшася за е́же спасти́ челове́ка, те́мже Тя́ вси́ велича́ем.

Песнь 9

Ирмос: Тя́, Блаже́нную в жена́х, Благослове́нную Бо́гом, челове́ческий ро́д, пе́сньми велича́ем.

Припев: Преподо́бная ма́ти Анастаси́е, моли́ Бо́га о нас.

Прозябе́ние твое́ бы́сть на́м сто́лп о́гненный, честна́я ма́ти Анастаси́е, просвеща́я на́с и очища́я от вся́каго те́мнаго неразу́мия, те́м тя́ вси́ пе́сньми велича́ем.

Припев: Преподо́бная ма́ти Анастаси́е, моли́ Бо́га о нас.

Оте́честву своему́ дарова́ла еси́ и́стинна просвети́теля, Святы́я Горы́ кра́сное воспита́ние, ве́рным же все́м утвержде́ние, сте́ну и забра́ло, те́м тя́ вси́ пе́сньми велича́ем.

Сла́ва Отцу́ и Сы́ну и Свято́му Ду́ху:

Юне́йшаго сы́на гла́с послу́шавши, совлекла́ еси́ ца́рскую ри́зу, в безстра́стия же оде́жду оде́ялася еси́ и Жениху́ Христу́ чи́сто обручи́лася еси́. Те́м тя́ ве́сь се́рбский ро́д пе́сньми велича́ет.

И ны́не и при́сно и во ве́ки веко́в. Ами́нь.

Богородичен: Облак Сло́ва Ты́ еси́, Всечи́стая, и свеща́ со́лнечная, колесни́ца многоце́нная, деви́ческое возвыше́ние, гора́ ту́чная и усыре́нная, Пресвята́я Де́во Господоимени́тая.

Свети́лен:

Све́том Христо́вым озаря́ема, свяще́нное отроча́ породила́ еси́, е́же бы́сть свети́льник ро́ду се́рбскому, с ни́мже при́сно моли́ о спасе́нии ро́да на́шего.

Сла́ва, и ны́не, Богородичен:

Све́тлое проро́ческое сбытие́, апо́стольская похвало́, всего́ ми́ра вожделе́нная Помо́щнице, просвети́ на́с, рабы́ Твоя́, небе́сным сия́нием.

Молитва

О свята́я, преподо́бная ма́ти Анастаси́е. По́двигом до́брым подвиза́вшися на земли́, восприя́ла еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́щи Престо́лу Бо́жию, приими́ моле́ния на́ша и ко всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.