3 июля.
Канон священномученику Мефодию, епископу Патарскому, иже Оригенову ересь попали.
![Священномученику Мефодию, епископу Патарскому Священномученику Мефодию, епископу Патарскому](img_i/007.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 1:
Кро́вь твоя́, му́дре, та́йно вопие́т от земли́, я́коже Авелева к Бо́гу, богому́дре святи́телю Мефо́дие, я́сно пропове́давый Бо́жие вочелове́чение. Те́мже и посрами́л еси́ Ориге́нову ле́сть, и преста́вился еси́ в небе́сный черто́г. Моли́ Христа́ Бо́га, да спасе́т ду́ши на́ша.
Кано́н, гла́с 7.
Пе́снь 1.
Ирмос: Ма́нием Твои́м на земны́й о́браз преложи́ся пре́жде удоборазлива́емое водно́е естество́, Го́споди. Те́мже немо́кренно пешеше́ствовав Изра́иль, пое́т Тебе́ пе́снь побе́дную.
Припев: Священному́чениче Мефо́дие, моли́ Бо́га о нас.
Стези́ ско́рыя, к Бо́гу мя́ нося́щия, показу́я прехо́д, священнотаи́нниче, научи́, я́ко да безконе́чную улучу́ жи́знь моли́твами твои́ми, сла́вне.
Припев: Священному́чениче Мефо́дие, моли́ Бо́га о нас.
Облиста́л еси́ светоно́сно во Христо́ве Це́ркви, сугу́быми сия́я, священноявле́нне, благода́тьми. Те́мже сугу́быми тя́ венцы́ священноле́пно Христо́с венча́.
Припев: Священному́чениче Мефо́дие, моли́ Бо́га о нас.
Венце́м муче́ния, свяще́нства же ма́стию, блаже́нне, украша́емь, обои́ми просия́л еси́. Те́мже и́стинное и богови́дное насле́дие получи́л еси́.
Сла́ва Отцу́ и Сы́ну и Свято́му Ду́ху:
Яко непоро́чна же́ртва, и свяще́нна Влады́це, и жива́, и одушевле́нна священноде́йствовася, сла́вне, те́мже же́ртвеннику небе́сному прия́т бы́л еси́, Мефо́дие.
И ны́не и при́сно и во ве́ки веко́в. Ами́нь.
Богородичен: Изба́вителя челове́ческаго ро́да, и Свободи́теля, и Спа́са Христа́ на́м родила́ еси́, Де́во Ма́ти Чи́стая. Те́мже, я́ве Тя́ ве́дуще Хода́таицу живота́ ве́чнаго, сла́вим.
Пе́снь 3.
Ирмос: В нача́ле небеса́ всеси́льным Сло́вом Твои́м утверже́й, Го́споди Спа́се, и Вседе́тельным и Бо́жиим Ду́хом всю́ си́лу и́х, на недви́жимем мя́ ка́мени испове́дания Твоего́ утверди́.
Припев: Священному́чениче Мефо́дие, моли́ Бо́га о нас.
Распала́ющуся ви́дев Ориге́нову пре́лесть, я́ко сы́й изря́ден па́стырь, Боже́ственным огне́м ско́ро попали́л еси́ всю́ о́наго мглу́, блиста́ющую лучу́ вже́г прему́дрости твоея́, богоприя́тне.
Припев: Священному́чениче Мефо́дие, моли́ Бо́га о нас.
Де́вство честно́е и чистоты́ добро́ту иску́сом, сла́вне, навы́к, прему́дростию твое́ю и слове́с благода́тию все́х си́х добро́ту показу́еши, богому́дре, и ве́чнующую све́тлость.
Припев: Священному́чениче Мефо́дие, моли́ Бо́га о нас.
Твои́х слове́с мо́лния, и ра́зума труба́, и уче́ний благонаро́читое веща́ние во всю́ зе́млю изы́де, преподо́бне, вся́ зову́щи ве́рныя к прича́стию, преблаже́нне, небе́сных наслажде́ний.
Сла́ва Отцу́ и Сы́ну и Свято́му Ду́ху:
Крепча́йшею пи́щею духо́вных напое́ний насы́щшеся, прему́дре, твои́х и́стинною пи́щею о́ною наслажда́ются, пребыва́ющею, приснотеку́щею не мимохо́дно и расту́щею прича́стником.
И ны́не и при́сно и во ве́ки веко́в. Ами́нь.
Богородичен: С боже́ственным Гаврии́лом, благослове́нная Де́во, Тебе́, ра́дуйся, зове́м при́сно: ра́дости бо на́м вина́ была́ еси́ и весе́лия и́стиннаго, Изба́вителя и Спа́са все́х пло́тию ро́ждши.
Седа́лен, гла́с 4.
Же́ртвенник красе́н се́рдце твое́ сотвори́л еси́, безкро́вны, священноде́йственне, прине́сл еси́ же́ртвы Бо́гу, пострада́в же кре́пко и поже́рся, прине́слся еси́ же́ртва, Мефо́дие, на́с ра́ди Поже́ршемуся. Его́же приле́жно моли́ при́сно вся́ спасти́, любо́вию пою́щия тя́.
Сла́ва, и ны́не, Богородичен:
Нечи́стых помысло́в мои́х мно́жество и безме́стных мы́слей обурева́ния кто́ изрещи́ мо́жет, Всенепоро́чная? Настоя́ния же безпло́тных вра́г мои́х кто́ испове́сть и си́х зло́бу? Но Твое́ю мольбо́ю, Блага́я, си́х мне́ все́х избавле́ние да́руй.
Пе́снь 4.
Ирмос: Отча не́дра не оста́вль и соше́д на зе́млю, Христе́ Бо́же, та́йну услы́шах смотре́ния Твоего́ и просла́вих Тя́, еди́не Человеколю́бче.
Припев: Священному́чениче Мефо́дие, моли́ Бо́га о нас.
К доброде́телей высоте́, му́ченически сконча́вся, восте́кл еси́, великодаро́вное воздая́ние священноде́йствия твоего́ прие́м, преблаже́нне.
Припев: Священному́чениче Мефо́дие, моли́ Бо́га о нас.
Престо́л име́я святи́тельский, свяще́нную же жи́знь стяжа́в, правосла́вную пропове́дал еси́ ве́ру, всече́стне, и научи́л еси́ твое́ ста́до.
Сла́ва Отцу́ и Сы́ну и Свято́му Ду́ху:
Сла́дость душеполе́зная твои́х уче́ний, я́ко исто́чник, происхо́дит, прича́стники веселя́ и услажда́я душе́вная на́ша чу́вства.
И ны́не и при́сно и во ве́ки веко́в. Ами́нь.
Богородичен: Оте́ческих не́др не отсту́пль и от Де́вы вопло́щся, Христе́ Бо́же, сохрани́ ста́до Твое́, строе́ния Твоего́ покланя́ющееся боже́ственным образо́м.
Пе́снь 5
Ирмос: Го́споди Бо́же мо́й, от но́щи у́треневав, Тебе́ молю́ся: пода́ждь ми́ оставле́ние прегреше́ний мои́х и к све́ту Твои́х повеле́ний пути́ моя́ напра́ви, молю́ся.
Припев: Священному́чениче Мефо́дие, моли́ Бо́га о нас.
Ме́ртвостию живоно́сною обле́клся еси́, о́тче, пре́жде сконча́ния твоего́ и, мече́м усе́чен муче́ния твоего́, к жи́зни многосугу́бней преста́вился еси́, сла́вне, лу́чшей.
Припев: Священному́чениче Мефо́дие, моли́ Бо́га о нас.
Таи́нниче неизрече́нных и о́бщниче вы́шняго ликостоя́ния, любо́вию чту́щия тя́ спаси́, пресла́вне, искуше́ний лю́тых наи́тия разоря́я моли́твами твои́ми.
Припев: Священному́чениче Мефо́дие, моли́ Бо́га о нас.
Име́я ко Влады́це дерзнове́ние, о́тче, Его́же и стра́сти усе́рдно поревнова́л еси́ по́двиги твои́ми, ве́рным боже́ственный ми́р и тишину́ испроси́, прему́дре.
Сла́ва Отцу́ и Сы́ну и Свято́му Ду́ху:
Пе́рвее священноде́йствовал еси́ Агнца Бо́жия, грехи́ ми́ра взе́млющаго, последи́ же, закала́емь, слове́сна и жива́ же́ртва Сему́ прине́слея еси́, о́тче Мефо́дие.
И ны́не и при́сно и во ве́ки веко́в. Ами́нь.
Богородичен: Чи́стая Богоро́дице, мою́ ду́шу омраче́нную, прия́телище су́щи неразори́маго Све́та и хра́м Боже́ственныя зари́, све́том Твои́м просвети́, молю́ся.
Пе́снь 6.
Ирмос: Пла́вающаго в молве́ жите́йских попече́ний, с корабле́м потопля́ема грехи́ и душетле́нному зве́рю примета́ема, я́ко Ио́на, Христе́, вопию́ Ти́: из смертоно́сныя глубины́ возведи́ мя́.
Припев: Священному́чениче Мефо́дие, моли́ Бо́га о нас.
Дрема́ния ве́ждам и очи́ма твои́ма сна́, преблаже́нне, не да́л еси́, до́ндеже все́х страсте́й себе́ свободи́л еси́, и вмести́телен хра́м соде́лал еси́ зарелу́чней мо́лнии Ду́ха.
Припев: Священному́чениче Мефо́дие, моли́ Бо́га о нас.
Ве́сь боже́ственному и богови́дному сия́нию, богому́дре, соединя́яся, боже́ственнаго свяще́нства пра́вило бы́л еси́ и к Бо́гу хода́тай яви́лся еси́ все́й Це́ркви ве́рных, Мефо́дие.
Сла́ва Отцу́ и Сы́ну и Свято́му Ду́ху:
К све́тлому житию́ све́тлостное совоку́плься су́щих открове́ние, богоглаго́ливе, све́тлаго свети́льника ми́ру тя́ показа́, ерети́ческое глумле́ние и безбо́жия тму́ отгоня́ща.
И ны́не и при́сно и во ве́ки веко́в. Ами́нь.
Богородичен: Цари́цу все́х бы́вших Тя́ ве́дяще, Бо́га бо родила́ еси́, Богома́ти, от не сущи́х вся́ сотво́ршаго, ра́достное песносло́вие со Ангелом Гаврии́лом Тебе́ зове́м.
Конда́к, гла́с 4.
Священнотаи́нник Святы́я Тро́ицы, и я́же па́че ума́ повеле́ний боже́ственных пропове́дник, и правосла́вным утвержде́ние бы́л еси́, Мефо́дие, злосла́вныя обличи́л еси́ смы́слы, правове́рия ра́ди кро́вию твое́ю священному́ченик я́влься, и, Христу́ со Ангелы предстоя́, моли́ спасти́ся на́м.
Пе́снь 7.
Ирмос: В пе́щь о́гненную вве́ржени, преподо́бнии о́троцы о́гнь в ро́су преложи́ша, воспева́нием си́це вопию́ще: благослове́н еси́, Го́споди Бо́же оте́ц на́ших.
Припев: Священному́чениче Мефо́дие, моли́ Бо́га о нас.
Освяще́н, богому́дре, и му́чеником и́стины све́тло сия́я кро́вию, с ни́ми Влады́це пое́ши непреста́нно: благослове́н еси́, Го́споди Бо́же оте́ц на́ших.
Припев: Священному́чениче Мефо́дие, моли́ Бо́га о нас.
Утвержде́н ве́рою, и́дольский угаси́л еси́ пла́мень то́ки святы́х крове́й твои́х, му́чениче, си́це взыва́я: благослове́н еси́, Го́споди Бо́же оте́ц на́ших.
Сла́ва Отцу́ и Сы́ну и Свято́му Ду́ху:
Науче́н Боже́ственным виде́нием превы́шним, у́м прему́дро уясни́л еси́, с ве́рно пою́щими, о́тче, взыва́я: благослове́н еси́, Го́споди Бо́же оте́ц на́ших.
И ны́не и при́сно и во ве́ки веко́в. Ами́нь.
Богородичен: Песносло́вием сла́вит Твое́ Рождество́ вся́ тва́рь, Бо́га, Де́во, ве́дящи, и, че́стно покланя́ющися, Тому́ зове́т: благослове́н еси́, Го́споди Бо́же оте́ц на́ших.
Пе́снь 8.
Ирмос: Еди́наго Безнача́льнаго Царя́ Сла́вы, Его́же благословя́т небе́сныя си́лы и трепе́щут чи́ни Ангельстии, по́йте, свяще́нницы, лю́дие, превозноси́те Его́ во ве́ки.
Припев: Священному́чениче Мефо́дие, моли́ Бо́га о нас.
Тя́, Неви́димаго, я́ко ви́де, терпя́ше мучи́телей ра́ны богому́дрый и венце́м увязе́ся, поя́: по́йте, свяще́нницы, лю́дие, превозноси́те Его́ во ве́ки.
Припев: Священному́чениче Мефо́дие, моли́ Бо́га о нас.
Непрее́млемое Христо́во Ца́рство све́тло жела́я, святи́телю, сие́ тебе́ исхода́тайствовавшу пра́вою стезе́ю, зовы́й Христу́: лю́дие, превозноси́те Его́ во ве́ки.
Припев: Священному́чениче Мефо́дие, моли́ Бо́га о нас.
Многосугу́бну Христо́с тебе́ подаде́ твои́м трудо́м мзду́, богоно́се, мы́сль преходя́щую вся́ку, пою́щу благоче́стно Того́ Ца́рство во вся́ ве́ки.
Сла́ва Отцу́ и Сы́ну и Свято́му Ду́ху:
Уче́ний пучи́ну, и скрижа́ль наказа́ний, и зре́ния высо́каго сокро́вище тя́ зна́ем, и чу́вств престо́л, пою́ще благоче́стно Христа́ Царя́ во вся́ ве́ки.
И ны́не и при́сно и во ве́ки веко́в. Ами́нь.
Богородичен: Ра́бски, Пречи́стая, Тебе́ прихожду́ ве́рою, заче́ншая все́х Влады́ку: ны́не спаси́ мя гоне́ния и бе́д, пою́ща благоче́стно Бо́га, воплоще́ннаго из Тебе́, Богороди́тельнице.
Песнь 9
Ирмос: Ма́ти Бо́жия и Де́ва, ро́ждшая и де́вствующая па́ки, не естества́ де́ло, но Бо́жия снизхожде́ния, те́м, я́ко Еди́ну, Бо́жиих чуде́с сподо́бльшуюся, Тя́ при́сно велича́ем.
Припев: Священному́чениче Мефо́дие, моли́ Бо́га о нас.
Всегда́ Христа́ моли́, богоблаже́нне о́тче, ересе́й уста́вити е́же на ны́ кова́рства и ны́нешний мра́к от среды́ отжени́, я́ко бо святи́тель си́лен моли́твенник бы́л еси́.
Припев: Священному́чениче Мефо́дие, моли́ Бо́га о нас.
От земли́ к небе́сней жи́зни преста́вился еси́, служе́ния твоего́ по́честь прие́м и страда́ния, иде́же жи́зни нетле́нныя прича́стник бы́в, ве́чно бы́ти со Христо́м сподо́бился еси́.
Припев: Священному́чениче Мефо́дие, моли́ Бо́га о нас.
Дре́ва жи́зненнаго пло́д объя́л еси́, безсме́ртныя, преблаже́нне, жи́зни, челове́ком Первонача́льника приобре́т, Его́же ра́дости наслажда́яся бога́тно, о пою́щих тя́ ве́рою моли́ся.
Сла́ва Отцу́ и Сы́ну и Свято́му Ду́ху:
Ве́сь у́м простира́я, преподо́бне, бла́гостию жития́, Христо́ва зре́ния и кра́снаго весе́лия сподо́бился еси́, я́ко священному́ченик и сказа́тель благоче́стия и побо́рник.
И ны́не и при́сно и во ве́ки веко́в. Ами́нь.
Богородичен: Зако́на но́ваго ковче́г нарица́ем Тя́ и богоначерта́нную скрижа́ль, в не́йже Сло́во написа́ся Бо́жие, Челове́к бы́в, за е́же спасти́ ми́р от ле́сти, обра́дованная Богоро́дице Всепе́тая.
Молитва
О пречестна́я и свяще́нная главо́ и благода́ти Свята́го Ду́ха испо́лненная, Спа́сово со Отце́м обита́лище, вели́кий архиере́е, те́плый наш засту́пниче, священному́чениче Мефо́дие, предстоя́ у Престо́ла всех Царя́ и наслажда́яся све́та единосу́щныя Тро́ицы и херуви́мски со А́нгелы возглаша́я песнь трисвяту́ю, вели́кое же и неизсле́дованное дерзнове́ние име́я ко всеми́лостивому Влады́це, моли́ спасти́ся па́ствы Христо́вы лю́дем, благостоя́ние святы́х церкве́й утверди́: архиере́и благоле́пием святи́тельства украси́, мона́шествующыя к по́двигом до́браго тече́ния укрепи́, ца́рствующий град и вся гра́ды и страны до́бре сохрани́, и ве́ру святу́ю непоро́чну соблюсти́ умоли́, мир весь предста́тельством твои́м умири́, от гла́да и па́губы изба́ви ны, и от нападе́ния иноплеме́нных сохрани́, ста́рыя уте́ши, ю́ныя наста́ви, безу́мныя умудри́, вдови́цы поми́луй, си́роты заступи́, младе́нцы возрасти́, пле́нных возврати́, немощству́ющыя и моля́щияся тебе́ от всех напа́стей и бед хода́тайством твои́м свободи́: моли́ о нас Всеще́драго и Человеколюби́ваго Христа́ Бо́га на́шего, да и в день Стра́шнаго Прише́ствия Его́ от шу́ияго стоя́ния изба́вит нас, и ра́дости святы́х прича́стники сотвори́т со все́ми святы́ми во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Священномученику Мефодию, епископу Патарскому Священномученику Мефодию, епископу Патарскому](img_b/007.jpg)