30 июля.
Канон преподобному Иринарху, игумену Соловецкому.
![преподобному Иринарху, игумену Соловецкому преподобному Иринарху, игумену Соловецкому](img_i/106.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 4:
По́стническое по Бо́зе житие́ возлюби́в,/ вся плотска́я мудрова́ния ду́ху покори́л еси́/ и воздержа́нием стра́сти умертви́л еси́,/ во труде́х, и бде́ниих, и моли́твах о́браз быв доброде́тели,/ тем мона́шескаго жития́ наста́вник показа́лся еси́,/ о́тче преподо́бне Ирина́рше./ Моли́ Христа́ Бо́га спасти́ся душа́м на́шим.
Тропа́рь, гла́с 8:
Бо́дростию ума́ жизнь твою́ управля́я,/ прилежа́нием Бо́га взыску́я,/ отону́дуже и ста́ду мона́хов предста́тель показа́лся еси́,/ и, благода́ть прие́м цели́ти ду́ши и телеса́/ приходя́щим с ве́рою к честно́му гро́бу твоему́,/ Ирина́рше, о́тче наш,/ моли́ Христа́ Бо́га спасти́ся душа́м на́шим.
Кано́н. Гла́с 4.
Пе́снь 1.
Ирмос: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.
Припев: Преподо́бне о́тче Ирина́рше, моли́ Бо́га о нас.
Отве́рзи, Го́споди, уста́ моя́ на похвалу́ уго́дника Твоего́, преподо́бнаго Ирина́рха,/ его́же благоволи́л еси́ поста́вити нача́льника мона́хом во оби́тели Солове́цстей,/ пасти́ ста́до Твое́ во сла́ву и́мене Твоего́ свята́го.
Припев: Преподо́бне о́тче Ирина́рше, моли́ Бо́га о нас.
Испо́лнен любве́ Боже́ственныя был еси́, преподо́бне, па́че всех,/ сего́ ра́ди па́стырь поста́влен был еси́ Христо́ву ста́ду,/ е́же упа́сл еси́ му́дре на па́жити животворя́щих Госпо́дних за́поведей.
Сла́ва Отцу́ и Сы́ну и Свято́му Ду́ху:
Тяготу́ нача́льства восприе́м,/ сло́вом и де́лом поуча́л еси́ бра́тию твою́, о́тче, указу́я пути́ спаси́тельныя,/ и́миже сам ше́ствовал еси́ от земны́х к Небе́сным.
И ны́не и при́сно и во ве́ки веко́в. Ами́нь.
Богородичен: Без се́мене О́тчею во́лею от Боже́ственнаго Ду́ха/ заче́нши во чре́ве Твое́м, Пречи́стая,/ родила́ еси́ Сы́на и Бо́га,/ те́мже Тя я́ко Де́ву и Ма́терь, ве́рнии, велича́ем.
Пе́снь 3.
Ирмос: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.
Припев: Преподо́бне о́тче Ирина́рше, моли́ Бо́га о нас.
Возмуще́ния мо́ря жите́йскаго избега́я,/ в пусты́ню всели́лся еси́, блаже́нне Ирина́рше,/ и в ней ти́хое приста́нище, ра́дуяся, обре́л еси́.
Припев: Преподо́бне о́тче Ирина́рше, моли́ Бо́га о нас.
Свобо́ден быв жите́йских попече́ний,/ день и нощь в зако́не Госпо́дни поуча́лся еси́, Богому́дре,/ плоть твою́ ду́хови покоря́я и проти́ву страсте́й воздержа́нием подвиза́яся.
Сла́ва Отцу́ и Сы́ну и Свято́му Ду́ху:
Моли́твою непреста́нною, я́ко копие́м, низложи́л еси́ враги́ неви́димыя/ и, я́ко победи́тель, венча́лся еси́ от Бо́га,/ на такову́ю брань тя укрепи́вшаго, пресла́вне Ирина́рше.
И ны́не и при́сно и во ве́ки веко́в. Ами́нь.
Богородичен: Ве́дуще Тя и́стинную Бо́жию Ма́терь,/ Всенепоро́чная Де́во, благоче́стно пропове́даем,/ я́ко Тобо́ю Зижди́тель нас, земноро́дных, с Небе́сными си́лами совокупи́.
Седа́лен, гла́с 6.
Благи́ми нра́вы украша́яся,/ я́ко А́нгел пребыва́л еси́ на земли́, о́тче преподо́бне,/ Го́рняя вы́ну му́дрствуяй, до́лу же влеку́щая презира́яй;/ те́мже путеводи́тель ко спасе́нию мно́гим был еси́/ и по сме́рти прия́л еси́ благода́ть от Бо́га/ в мо́ри бе́дствующим помога́ти и погиба́ющия спаса́ти./ Приле́жно моли́ся о нас, обурева́емых грехи́ мно́гими,/ спасти́ся душа́м на́шим.
Сла́ва, и ны́не, Богородичен:
Милосе́рдия две́ри отве́рзи нам, Благослове́нная Богоро́дице,/ наде́ющиися на Тя, да не поги́бнем,/ но да изба́вимся Тобо́ю от бед:/ Ты бо еси́ спасе́ние ро́да христиа́нскаго.
Пе́снь 4.
Ирмос: Седя́й в Сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.
Припев: Преподо́бне о́тче Ирина́рше, моли́ Бо́га о нас.
Оте́чество твое́, я́коже дре́вле Авраа́м пра́отец, оста́вил еси́/ и, земно́е стра́нствие сконча́в,/ во обетова́нную зе́млю Го́рняго Иерусали́ма ра́достно вшел еси́, Ирина́рше преподо́бне.
Припев: Преподо́бне о́тче Ирина́рше, моли́ Бо́га о нас.
Послуша́ния до́брый рачи́тель был еси́, блаже́нне,/ со вся́ким смире́нием и терпе́нием тружда́яся с бра́тиею/ и сих доброде́телей о́браз всем быва́я,/ те́мже мона́шествующих вождь яви́лся еси́.
Сла́ва Отцу́ и Сы́ну и Свято́му Ду́ху:
Чистоты́ ра́ди жития́ твоего́ прича́стник Боже́ственныя благода́ти был еси́,/ и, то́ю просвеща́емь, вся мы́сленныя прило́ги бесо́в от души́ твоея́ отгна́л еси́,/ и вене́ц сла́вы прия́л еси́ от Бо́га.
И ны́не и при́сно и во ве́ки веко́в. Ами́нь.
Богородичен: В прегреше́ния безчи́сленная впадо́х, окая́нный,/ искуша́емь от враг неви́димых, к Тебе́ взыва́ю, Богома́ти:/ по́мощи ми ру́ку простри́/ и от наси́лия бесо́вскаго изба́ви ду́шу мою́.
Пе́снь 5
Ирмос: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.
Припев: Преподо́бне о́тче Ирина́рше, моли́ Бо́га о нас.
Вся стра́сти душе́вныя и теле́сныя по́стническими по́двиги потреби́в,/ безстра́стия дости́гл еси́, преподо́бне,/ и равноа́нгельное житие́ показа́л еси́.
Припев: Преподо́бне о́тче Ирина́рше, моли́ Бо́га о нас.
Те́ло твое́ посто́м, и бде́нием, и труды́ удруча́я,/ ду́шу твою́ очи́стил еси́ от вся́кия скве́рны/ и сосу́д избра́нный Ду́ха Пресвята́го яви́лся еси́, Ирина́рше Богоприя́тне.
Сла́ва Отцу́ и Сы́ну и Свято́му Ду́ху:
Еди́ному Бо́гу ве́доми по́двизи и труди́ твои́ и вну́тренняя боре́ния,/ я́же подъя́л еси́ спасе́ния ра́ди души́ твоея́,/ те́мже Ве́дый та́йная воздаде́ тебе́ я́ве.
И ны́не и при́сно и во ве́ки веко́в. Ами́нь.
Богородичен: Иму́ще Тя сте́ну необори́мую и град прибе́жища, Всепе́тая Богоро́дице,/ и Твои́м заступле́нием при́сно спаса́еми,/ по до́лгу Тя вси благоче́стно велича́ем.
Пе́снь 6.
Ирмос: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.
Припев: Преподо́бне о́тче Ирина́рше, моли́ Бо́га о нас.
Дар прозре́ния яви́л еси́, преподо́бне о́тче,/ прорица́я о сконча́нии живота́ твоего́, и о прее́мнице твое́м,/ и о иму́щих бы́ти нестрое́ниих во оби́тели по кончи́не твое́й.
Припев: Преподо́бне о́тче Ирина́рше, моли́ Бо́га о нас.
А́ще и чрез все вре́мя жития́ твоего́ в па́мяти сме́ртней поуча́лся еси́, блаже́нне,/ но на конце́ дний твои́х в безмо́лвие отше́л еси́,/ да та́мо наипа́че о сме́ртнем часе́ помышля́еши.
Сла́ва Отцу́ и Сы́ну и Свято́му Ду́ху:
Кончи́ною благо́ю сконча́л еси́ вре́менное житие́ твое́/ и на ве́чный поко́й ра́достно преше́л еси́,/ иде́же с ли́ки святы́х прославля́ешися/ и мо́лишися о нас, Ирина́рше приснопа́мятне.
И ны́не и при́сно и во ве́ки веко́в. Ами́нь.
Богородичен: Ра́дуйся, Пречи́стая Де́во;/ ра́дуйся, ми́ру утвержде́ние;/ ра́дуйся, я́ко родила́ еси́ Сы́на, всех Бо́га./ Того́ моли́, Богороди́тельнице, спасти́ся душа́м на́шим.
Конда́к, гла́с 8.
Чистото́ю душе́вною Боже́ственныя благода́ти да́ры стяжа́в,/ блаже́нную жизнь соверши́л еси́,/ и путь ко спасе́нию всем указа́л еси́,/ и богому́дрый нача́льник мона́хов яви́лся еси́./ Те́мже име́я дерзнове́ние ко Святе́й Тро́ице,/ помина́й нас, чту́щих па́мять твою́, да зове́м ти:/ ра́дуйся, преподо́бне Ирина́рше, мона́шествующих похвало́.
Икос:
Да ликовству́ет днесь благочести́вых собра́ние в свяще́нней па́мяти преподо́бнаго отца́ на́шего Ирина́рха,/ честно́е успе́ние его́ в пе́снех воспева́юще и взыва́юще ему́ такова́я:/ ра́дуйся, и́ноческих по́двигов ревни́телю;/ ра́дуйся, безмо́лвнаго жития́ люби́телю./ Ра́дуйся, посто́м и моли́твою всю си́лу вра́жию низложи́вый;/ ра́дуйся, равноа́нгельно на земли́ пожи́вый./ Ра́дуйся, бе́дственно пла́вающим в мо́ри явля́яся, и́мя твое́ извести́вый;/ ра́дуйся, труд их оби́льною лови́твою удовли́вый./ Ра́дуйся, пусты́ни Солове́цкия Небе́сное насажде́ние;/ ра́дуйся, преподо́бне Ирина́рше, мона́шествующих похвало́.
Пе́снь 7.
Ирмос: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.
Припев: Преподо́бне о́тче Ирина́рше, моли́ Бо́га о нас.
Си́лою Христо́вою вооружи́вся, преподо́бне,/ стра́шен яви́лся еси́ бесо́м и над страстьми́ воцари́лся еси́./ Те́мже Ца́рствия Христо́ва насле́дник яви́лся еси́, вопия́:/ Бо́же, благослове́н еси́.
Припев: Преподо́бне о́тче Ирина́рше, моли́ Бо́га о нас.
Вои́стинну, я́ко сна упокое́ние смерть твоя́ бысть, Богоблаже́нне,/ е́юже разреши́лся еси́ соу́зов плотски́х/ и преше́л еси́ к нетле́нней и присносу́щней жи́зни, ра́достно поя́:/ Бо́же, благослове́н еси́.
Сла́ва Отцу́ и Сы́ну и Свято́му Ду́ху:
Со́бранное тобо́ю слове́сное ста́до весели́тся днесь в ле́тней па́мяти твое́й,/ предстоя́ще честны́м моще́м твои́м, о́тче Ирина́рше, и пою́ще песнь:/ Бо́же, благослове́н еси́.
И ны́не и при́сно и во ве́ки веко́в. Ами́нь.
Богородичен: Пла́менем любве́ Боже́ственныя согре́й, Пречи́стая, хла́дное се́рдце мое́,/ я́ко да ро́ждшемуся от Тебе́ Спа́су душ на́ших досто́йно воспева́ю:/ Бо́же, благослове́н еси́.
Пе́снь 8.
Ирмос: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.
Припев: Преподо́бне о́тче Ирина́рше, моли́ Бо́га о нас.
По́двигом до́брым подвиза́лся еси́ на земли́,/ сего́ ра́ди сла́вою венча́лся еси́ на Небеси́,/ ли́ку преподо́бных сочета́вся, блаже́нне Ирина́рше, моли́твенниче о душа́х на́ших.
Припев: Преподо́бне о́тче Ирина́рше, моли́ Бо́га о нас.
Даде́ся тебе́ благода́ть моли́тися за ны, преподо́бне,/ те́мже святу́ю па́мять твою́ пра́зднующе и к ра́це моще́й твои́х припа́дающе,/ грехо́в разреше́ние моли́твами твои́ми прие́млем.
Сла́ва Отцу́ и Сы́ну и Свято́му Ду́ху:
В со́нных виде́ниих явля́яся скорбя́щим о разлуче́нии твое́м ученико́м твои́м,/ утеша́л еси́ их, глаго́ля,/ я́ко обре́л еси́ благода́ть у Бо́га и в жи́зни блаже́нней пребыва́еши.
И ны́не и при́сно и во ве́ки веко́в. Ами́нь.
Богородичен: А́нгелов Святе́йшая яви́лася еси́, Влады́чице,/ я́ко на Него́же ти́и зре́ти не мо́гут,/ Ты Сего́ родила́ еси́ и я́ко Младе́нца на руку́ Твое́ю носи́ла еси́./ Его́же моли́ о нас, чту́щих Тя, я́ко Ма́терь Бо́га на́шего.
Песнь 9
Ирмос: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная, Богоро́дице,/ Чи́стая Присноде́во.
Припев: Преподо́бне о́тче Ирина́рше, моли́ Бо́га о нас.
Бу́ри ве́тряней со сне́гом в ле́те бы́ти предсказа́л еси́,/ в наказа́ние Бо́жие за грехи́ бра́тии,/ запове́дая игу́мену моле́бная пе́ния соверша́ти/ и со кресты́ хожде́ние во избавле́ние от бе́дствия такова́го.
Припев: Преподо́бне о́тче Ирина́рше, моли́ Бо́га о нас.
Егда́ воспе́ша бра́тия надгро́бное пе́ние на ме́сте погребе́ния твоего́,/ а́бие сту́день в теплоту́ преложи́ся и дождь оби́лен излия́ся,/ моли́твами твои́ми, преподо́бне.
Сла́ва Отцу́ и Сы́ну и Свято́му Ду́ху:
Та́ко по кончи́не твое́й чудотве́рец показа́лся еси́, о́тче Ирина́рше,/ и яви́л еси́, я́ко ве́лие дерзнове́ние и́маши у Бо́га моли́тися за ны,/ чту́щия досто́йно святу́ю па́мять твою́.
И ны́не и при́сно и во ве́ки веко́в. Ами́нь.
Богородичен: Моли́твами уго́дника Твоего́/ поми́луй нас, недосто́йных раб Твои́х, о Госпоже́ Богоро́дице,/ и от всех злых свободи́, и Ца́рствия Небе́снаго сподо́би,/ да вку́пе со преподо́бным Ирина́рхом во ве́ки Тя велича́ем.
Свети́лен.
Столп доброде́телей яви́лся еси́, о́тче Богому́дре Ирина́рше,/ и оби́тели преподо́бных Зоси́мы и Савва́тия сла́ва и украше́ние;/ те́мже с ни́ми ку́пно предстоя́ Святе́й Тро́ице,/ помина́й нас, чад твои́х, почита́ющих честну́ю па́мять твою́.
Богородичен: Тя Предста́тельницу вси иму́ще, гре́шнии, о Пресвята́я Де́во,/ мо́лим Ти ся, ма́терними Твои́ми моли́твами/ благопремени́тельна сотвори́ти нам Сы́на Твоего́/ в день пра́веднаго воздая́ния кому́ждо по дело́м Его́.
Моли́тва
О преподо́бне о́тче Ирина́рше, уго́дниче Бо́жий и моли́твенниче о душа́х на́ших! Услы́ши нас, ны́не моля́щихся тебе́, я́ко иму́щему дерзнове́ние ко Го́споду, да пода́ст нам вся, я́же на по́льзу в сем житии́ на́шем и во уготовле́ние к ве́чному животу́. Бу́ди нам наста́вник в духо́внем жи́тельстве, ути́шитель бу́ри страсте́й, помо́щник в ско́рбех и засту́пник от враг неви́димых, борю́щих ны, да и мы, богоуго́дно преше́дше по́прище сея́ жи́зни, бу́дем насле́дницы Ца́рствия Небе́снаго и сподо́бимся вку́пе с тобо́ю сла́вити Отца́, и Сы́на, и Свята́го Ду́ха во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![преподобному Иринарху, игумену Соловецкому преподобному Иринарху, игумену Соловецкому](img_b/106.jpg)