2 июля.
2 июля
Канон первый преподобному Варлааму Пинежскому, Важецкому
![Канон преподобному Варлааму Пинежскому, Важецкому Канон преподобному Варлааму Пинежскому, Важецкому](img_i/083.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 3:
И́же к доброде́телем прилежа́нием взыгра́ния пло́ти обузда́л еси́,/ благи́ми нра́вы ду́шу свою́ украси́в,/ от земны́х Христу́ превозведе́ ум свой,/ тем от Него́ исцеле́нием струя́ незави́стна яви́ся,/ притека́ющим ве́рою к тебе́ и любе́зно зову́щим:/ Варлаа́ме, о́тче наш,/ моли́ Христа́ Бо́га,/ да спасе́т ду́ши на́ша.
Кано́н, гла́с 1:
Пе́снь 1.
Ирмос: Твоя́ победи́тельная десни́ца/ боголе́пно в кре́пости просла́вися:/ та бо, Безсме́ртне,/ я́ко всемогу́щая проти́вныя сотре́,/ изра́ильтяном пу́ть глубины́ новосоде́лавшая.
Припев: Преподо́бне о́тче Варлаа́ме, моли́ Бо́га о нас.
Творя́й пресла́вная, Христе́, и ди́вная,/ очи́стив мно́гая моя́ согреше́ния,/ осия́й в души́ мое́й свет ра́зума моли́твами уго́дника Твоего́ Варлаа́ма,/ да в па́мять его́ принесу́ духо́вную пе́снь.
Припев: Преподо́бне о́тче Варлаа́ме, моли́ Бо́га о нас.
Твои́х даро́в исправле́нии ве́сь мир обогати́ся,/ от присносу́щнаго исто́чника моще́й твои́х/ прие́млюще духо́вная от неду́г исцеле́ния,/ те́мже ра́достною душе́ю, блаже́нне, тя почита́ем.
Сла́ва Отцу́ и Сы́ну и Свято́му Ду́ху:
Твоя́ моли́твы взыдо́ша, о́тче, на Не́бо,/ две́ри ра́йския отверзо́ша ти,/ Престо́лу Госпо́дню предста́виша тя,/ иде́же с ли́ки святы́х А́нгел сла́виши Тро́ицу Несозда́нную.
И ны́не и при́сно и во ве́ки веко́в. Ами́нь.
Богородичен: Воспое́м, вси ве́рнии, Преди́вную Де́ву,/ Христа́, Присносу́щнаго Живота́, вселе́нней возсия́вшу/ и ра́дости вся́кия мир испо́лнившу.
Пе́снь 3.
Ирмос: Да утверди́тся се́рдце мое́ в во́ли Твое́й, Христе́ Бо́же,/ И́же над вода́ми Не́бо утвержде́й второ́е/ и основа́вый на вода́х зе́млю, Всеси́льне.
Припев: Преподо́бне о́тче Варлаа́ме, моли́ Бо́га о нас.
Да вкорени́тся в тя зача́ло прему́дрости – страх Госпо́день,/ хра́мы Бо́жия премно́ги созида́л еси́,/ к ни́щим ми́лование неща́дно име́л еси́/ и сего́ ра́ди в нерукотворе́нных хра́мех при́сно ра́дуешися.
Припев: Преподо́бне о́тче Варлаа́ме, моли́ Бо́га о нас.
Непрело́жно рабо́тати Бо́гови возжела́л еси́,/ всю свою́ плотску́ю во́лю до конца́ умертви́л еси́/ и, я́ко А́нгел быв, а́нгельскую жи́знь, блаже́нне, насле́дова.
Сла́ва Отцу́ и Сы́ну и Свято́му Ду́ху:
Не восхоте́, блаже́нне, земны́я сла́вы,/ но со Христо́м бы́ти изво́лив,/ дом и сро́дник свои́х оста́вил еси́,/ тем ны́не со А́нгелы на Небесе́х ликовству́еши.
И ны́не и при́сно и во ве́ки веко́в. Ами́нь.
Богородичен: Зна́юще, благоче́стно пропове́даем Тя вои́стинну Бо́жию Ма́терь,/ Тобо́ю нам Созда́тель прибли́житися сподо́би.
Седа́лен, гла́с 8:
Скоромину́щее жития́ сего́ и тле́ющее бога́тство, я́ко прах, вмени́л еси́,/ на духо́вную жи́знь преложи́л себе́ и, на враги́ боре́ние поста́вив,/ взыгра́ния пло́ти умертви́л еси́,/ всем я́ко Боже́ствен быв, от Бо́га обогати́ся пресла́вных чуде́с дарова́нием,/ Его́же моли́, Варлаа́ме, грехо́в оставле́ние дарова́ти нам,/ чту́щим любо́вию святу́ю па́мять твою́.
Сла́ва и ны́не, богоро́дичен, гла́с то́йже:
Предста́тельнице ве́рным, Богороди́тельнице,/ скорбя́щим ра́досте, пла́чущим Уте́шительнице,/ И́же от Тебе́ ро́ждшагося. Бо́га па́че естества́, Влады́чице, моли́/ изба́вити настоя́щих зол и бу́дущих мук/ и́же Тебе́, Богоро́дицу, и́стинно испове́дающих.
Пе́снь 4.
Ирмос: Ду́хом прови́дя, проро́че Авваку́ме, Словесе́ воплоще́ние,/ пропове́дал еси́, вопия́:/ внегда́ прибли́житися ле́том – позна́ешися,/ внегда́ приити́ вре́мени – пока́жешися,/ Сла́ва си́ле Твое́й, Го́споди.
Припев: Преподо́бне о́тче Варлаа́ме, моли́ Бо́га о нас.
Огне́м любве́ Бо́жия распали́вся, о́тче,/ я́ко добр купе́ц, вся своя́ оста́вив,/ в чужи́х страна́х прише́льствова, взыску́я Бо́га,/ Его́же обре́т, искупи́л еси́ Ца́рство Небе́сное.
Припев: Преподо́бне о́тче Варлаа́ме, моли́ Бо́га о нас.
Проразуме́в бу́дущая, я́ко настоя́щая,/ не пощаде́ пло́ти своея́ во умерщвле́ние по́мысла,/ но, враг быв телеси́ своему́,/ вмести́лище бы́сть Свято́му Ду́ху.
Сла́ва Отцу́ и Сы́ну и Свято́му Ду́ху:
Воздержа́нием кра́йним пло́ть умертви́в,/ ду́шу свою́ оживи́л еси́./ Тем я́ко к жи́зни рачи́тель прия́т Небе́сное Ца́рство.
И ны́не и при́сно и во ве́ки веко́в. Ами́нь.
Богородичен: Неизрече́нно зачала́ еси́, Богоневе́сто, Спа́са и Го́спода,/ избавля́ющаго нас от лю́тых,/ и́же Тя вои́стинну призыва́ющих.
Пе́снь 5
Ирмос: Просвети́вый сия́нием прише́ствия Твоего́, Христе́,/ и освети́вый Кресто́м Твои́м ми́ра концы́,/ сердца́ просвети́ све́том Твоего́ Богоразу́мия/ правосла́вно пою́щих Тя.
Припев: Преподо́бне о́тче Варлаа́ме, моли́ Бо́га о нас.
Провозсия́вшему на Кресте́ нас ра́ди во́лею, блаже́нне, я́ко после́дова,/ со страстьми́ и похотьми́ распе́н себе́ ми́рови,/ тем, я́ко вне ми́ра быв, свет ми́ру был еси́.
Припев: Преподо́бне о́тче Варлаа́ме, моли́ Бо́га о нас.
Я́ко Богопросвеще́нный рачи́тель святы́х,/ во и́мя Госпо́дня ученика́ прече́стен дом воздви́гл еси́,/ в не́мже тобо́ю Бог при́сно сла́вим е́сть.
Сла́ва Отцу́ и Сы́ну и Свято́му Ду́ху:
Невестоводи́тель благоприя́тен бы́сть, о́тче:/ и́ноков ду́ши, я́ко неве́сты чи́сты, Бо́гови приведе́,/ с ни́миже о нас моли́ся непреста́нно.
И ны́не и при́сно и во ве́ки веко́в. Ами́нь.
Богородичен: Поро́ждшая Свет, И́же от Отца́ пре́жде век возсия́вшаго,/ просвети́ ду́шу мою́, грехо́вным мра́ком омраче́нную,/ да при́сно сла́влю Твою́ бла́гость.
Пе́снь 6.
Ирмос: Обы́де нас после́дняя бе́здна,/ не́сть избавля́яй,/ вмени́хомся, я́ко о́вцы заколе́ния,/ спаси́ лю́ди Твоя́, Бо́же наш,/ Ты бо кре́пость немощствующих и исправле́ние.
Припев: Преподо́бне о́тче Варлаа́ме, моли́ Бо́га о нас.
В бе́здну щедро́т Бо́жиих пове́рг себе́, Богому́дре,/ жите́йских молв пучи́ну препла́вая, духо́вными ве́тры обурева́ем,/ на он пу́ть бу́дущаго ве́ка, блаже́нне, всели́лся еси́.
Припев: Преподо́бне о́тче Варлаа́ме, моли́ Бо́га о нас.
Боже́ственною укрепля́емь си́лою,/ вся кова́рства лука́ваго победи́л еси́,/ тем, я́ко окрила́тев умо́м,/ ду́хом на Не́бо возлете́л еси́, чу́дне.
Сла́ва Отцу́ и Сы́ну и Свято́му Ду́ху:
Благонра́вие твое́ душе́вное и незло́бивое мудрова́ние/ и́ноков ду́ши к Бо́гу приведе́,/ и́хже, я́ко оте́ц чадолюби́вый, посеща́ти не оста́ви.
И ны́не и при́сно и во ве́ки веко́в. Ами́нь.
Богородичен: Глас Арха́нгелов вопие́м Ти, Влады́чице Богоро́дице:/ ра́дуйся, Две́ре Бо́жия непроходи́мая;/ ра́дуйся, О́блаче, е́же Пра́вды Со́лнце нам возсия́.
Конда́к, гла́с 8:
Я́ко звезда́ светоза́рная,/ от Вели́каго Новагра́да прише́д,/ в чужи́х, я́ко в за́падных страна́х, за́йде,/ от восто́к чуде́с, я́ко со́лнце, возсия́,/ те́мже, и́же во тьме́ и се́ни сме́ртней, в неду́зех лежа́щий,/ свет исцеле́ния от Тебе́ прие́млюще,/ с на́ми, ча́ды твои́ми, непреста́нно вопию́т ти:/ ра́дуйся, Богому́дре Варлаа́ме, о́тче наш.
Икос:
Христо́вых повеле́ний послу́шатель быв нело́жный,/ непоро́чным житие́м твои́м святы́х А́нгел удиви́л еси́,/ те́мже и мы, зря́ще прему́дрых твои́х трудо́в исправле́ния, ра́достне вопие́м ти:/ ра́дуйся, чи́стый сосу́де Свята́го Ду́ха;/ ра́дуйся, А́нгелов собесе́дниче и бесо́в прогони́телю;/ ра́дуйся, сто́лпе пресве́тлый и свети́ло целому́дрия;/ ра́дуйся, похвало́ оте́честву твоему́ и Вели́кому Новугра́ду;/ ра́дуйся, я́ко моли́твами твои́ми сопроти́вныя побежда́ются;/ ра́дуйся, ве́рным лю́дем похвало́ и утвержде́ние./ Те́мже моли́твами твои́ми сохрани́ ны от враг ненаве́тны, да зове́м ти:/ ра́дуйся, Богому́дре Варлаа́ме, о́тче наш.
Пе́снь 7.
Ирмос: Тебе́, у́мную, Богоро́дице, пе́щь,/ разсмотря́ем, ве́рнии,/ я́коже бо о́троки спасе́ три Превозноси́мый,/ мир обнови́, во чре́ве Твое́м всеце́л,/ хва́льный отце́в Бог и препросла́влен.
Припев: Преподо́бне о́тче Варлаа́ме, моли́ Бо́га о нас.
Тебе́, Го́сподеви моли́тву творя́щу/ и Пречи́стую Его́ Ма́терь со слеза́ми моля́щу,/ глас А́нгельский с Небе́с слы́шан бы́сть,/ показу́ющ ти, блаже́нне, Бо́жие на ме́сте сем благоволе́ние.
Припев: Преподо́бне о́тче Варлаа́ме, моли́ Бо́га о нас.
В поще́ниих непрекло́нное, во искуше́ниих неосла́бное,/ в терпе́ниих неотсту́пное име́л еси́ стяжа́ние,/ тем нетле́нными венцы́ от Бо́га венча́лся еси́.
Сла́ва Отцу́ и Сы́ну и Свято́му Ду́ху:
Непреста́нно моли́, Варлаа́ме о́тче наш, о ста́де свое́м,/ его́же трудолю́бно собра́л еси́,/ и спаси́ и́же тя на моли́тву призыва́ющих и плоды́ принося́щих любо́вию.
И ны́не и при́сно и во ве́ки веко́в. Ами́нь.
Богородичен: Ка́пля благоче́стная, Я́же от Тебе́ Ро́ждшаяся,/ мир освяти́, Богоро́дице Де́во,/ ка́плю ми ми́лости источи́,/ освяща́ющи ду́ши и помышле́ния земны́х.
Пе́снь 8.
Ирмос: В пещи́ о́троцы Изра́илевы,/ я́коже в горни́ле,/ добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода/ и превозноси́те во вся ве́ки.
Припев: Преподо́бне о́тче Варлаа́ме, моли́ Бо́га о нас.
В пещи́ искуше́ния, я́ко зла́то, искуси́вся, о́тче,/ чистоте́ храни́тель бы́сть,/ с не́ю же Бо́га узре́в, со А́нгелы ликовству́еши.
Припев: Преподо́бне о́тче Варлаа́ме, моли́ Бо́га о нас.
Со́весть твоя́, о́тче, зерца́ло бы́сть бу́дущих,/ тем, земны́х возгнуша́вся, на Небе́сная потща́лся еси́,/ и́хже получи́в, помина́й пою́щих тя.
Сла́ва Отцу́ и Сы́ну и Свято́му Ду́ху:
Ни́щих ми́лованием и странноприя́тием неоску́дным Авраа́му в ло́но дости́гл еси́,/ от Боже́ственных же сокро́вищ исто́чник чуде́с, о́тче, излива́еши.
И ны́не и при́сно и во ве́ки веко́в. Ами́нь.
Богородичен: Еди́на су́щи Блага́я,/ Преблаго́е Сло́во умоли́ приле́жно/ настоя́щаго гне́ва и паде́ния всем изба́вится, Богоро́дице Чи́стая, мо́лимся.
Песнь 9
Ирмос: О́браз чи́стаго рождества́ Твоего́/ огнепали́мая купина́ показа́ неопа́льная;/ и ны́не на нас напа́стей свире́пеющую угаси́ти, мо́лимся, пе́щь,/ да Тя, Богоро́дице,/ непреста́нно велича́ем.
Припев: Преподо́бне о́тче Варлаа́ме, моли́ Бо́га о нас.
Ум свой поста́вил еси́ влады́ку, облада́юща по́мыслы,/ тем, я́ко царя́ страсте́м, Христо́с венча́л тя е́сть нетле́нным дарова́нием,/ пресели́вшуся от земны́х на Небе́сная.
Припев: Преподо́бне о́тче Варлаа́ме, моли́ Бо́га о нас.
Блаже́нство нетле́нно прия́т,/ я́ко а́нгельское поживе́ житие́, о земны́х небре́г,/ к Го́рним преста́вися, Варлаа́ме,/ предста́тель к Бо́гу бу́ди о нас, тя блажа́щих.
Сла́ва Отцу́ и Сы́ну и Свято́му Ду́ху:
И́же твою́ па́мять усе́рдно творя́щим,/ настоя́щих бед, о́тче, изба́ви и бу́дущих изми́ мук,/ да тя, я́ко те́пла засту́пника, ублажа́ем при́сно.
И ны́не и при́сно и во ве́ки веко́в. Ами́нь.
Богородичен: Спа́са Изба́вителя, Бо́га всех и Го́спода, ро́ждши,/ нам пло́тию прибли́жившагося,/ спаси́, Пречи́стая, призыва́ющих Тя от бед, Влады́чице.
Свети́лен:
Све́том Христо́вым по вселе́нней просия́в, я́ко со́лнце,/ чудесы́ ве́сь мир просвеща́еши,/ тем, я́ко Христо́в во́ин непобеди́м,/ безпло́тных враго́в ополче́ния до́блественне низложи́л еси́,/ на Небесе́х мзду прия́т трудо́в свои́х, Варлаа́ме о́тче наш,/ Христа́ моли́ спасти́ся душа́м пою́щих тя.
Сла́ва и ны́не, Богородичен:
Прему́дрость соста́вную, и Сло́во Присносу́щное,/ и Врача́ всем – Христа́ ро́ждши, Де́во,/ гное́ния и я́звы души́ моея́ исцели́ лю́тыя и многовре́дныя/ и се́рдца моего́ уста́ви стра́стныя помышле́ния.
Моли́тва
О святи́телю о́тче наш Иоа́нне, па́стырю до́брый и тайнови́дче душ челове́ческих! Ны́не у Престо́ла Бо́жия за нас мо́лишися, я́коже и сам посме́ртне изре́кл еси́: «А́ще и умро́х, но жив есмь». Умоли́ всеще́драго Бо́га проще́ние нам во гресе́х дарова́ти, да бо́дренно воспря́нем, и Бо́гу возопие́м о дарова́нии нам ду́ха смире́ния, стра́ха Бо́жия и благоче́стия во вся́ческих путе́х жи́зни на́шея, я́ко ми́лостивый сиропита́тель и иску́сный наста́вник на земли́ быв, ны́не бу́ди нам путеводи́тель и в сму́тах церко́вных Христо́во вразумле́ние. Услы́ши стена́ние смяте́нных ю́ношей на́шего лихоле́тия, обурева́емых беснова́нием вселука́вым, и при́зри на уны́ние изнемога́ющих па́стырей от утесне́ния тлетво́рнаго ду́ха ми́ра сего́ и томя́щихся в нераде́нии пра́здном и ускори́ на моли́тву, сле́зно вопие́м ти, о те́плый моли́твенниче; посети́ нас си́рых, по всему́ лицу́ вселе́нныя разсе́янных и во оте́чествии су́щих, во тьме страсте́й блужда́ющих, но сла́бою любо́вию ко све́ту Христо́ву влеку́щихся и жду́щих твоего́ оте́ческаго наставле́ния, да благоче́стию навы́кнем и насле́дницы Ца́рствия Небе́снаго яви́мся, иде́же ты пребыва́еши со все́ми святы́ми, сла́вяще Го́спода на́шего Иису́са Христа́, Ему́же честь и держа́ва, ны́не и при́сно и во ве́ки веко́в. Ами́нь.
Моли́тва 2
О святи́телю чу́дне Иоа́нне, толи́ко распространи́л еси́ се́рдце свое́, я́ко нете́сно вмеща́ется в нем мно́жество почита́ющих тя челове́к от разли́чных племе́н и наро́дов! При́зри на убо́жество слове́с на́ших, оба́че от любве́ тебе́ приноси́мое, и помози́ нам, уго́дниче Бо́жий, поне́ отны́не очища́ти себе́ от вся́кия скве́рны пло́ти и ду́ха, рабо́тающе Го́сподеви со стра́хом и ра́дующеся Ему́ с тре́петом. И что возда́мы тебе́ за ра́дость о́ную, ю́же ощути́хом, зря́ще в хра́ме святе́м мо́щи твоя́ святы́я и прославля́юще па́мять твою́; вои́стину, не и́мамы, чим возда́ти, то́чию а́ще на́чнем себе́ исправля́ти, быва́юще но́ви вме́сто ве́тхих. Сея́ благода́ти обновле́ния бу́ди нам хода́тай, свя́те Иоа́нне, помози́ нам в не́мощех, исцели́ боле́зни, уврачу́й стра́сти моли́твами твои́ми; преста́вленный же от сего́ вре́меннаго во ино́е жити́е ве́чное, в не́же наста́ви тя Пречи́стая Влады́чица, Одиги́трия разсе́яния ру́сскаго, чудотво́рною Свое́ю ико́ною Коренно́ю-Ку́рскою, Ея́же спу́тник ты яви́лся еси́ в день преставле́ния своего́, ра́дуешися ны́не в ли́це святы́х, сла́вящих Еди́наго в Тро́ице сла́вимаго Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Канон преподобному Варлааму Пинежскому, Важецкому Канон преподобному Варлааму Пинежскому, Важецкому](img_b/083.jpg)