2 июля.

Канон святителю Иову, первому Патриарху Московскому и всея Руси

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 5:

Правосла́вия побо́рниче,/ ве́ры Христо́вы испове́дниче,/ первоиера́рше Це́ркве Ру́сския,/ святи́телю о́тче И́ове,/ за ны Христа́ Бо́га моли́,/ ве́ру оте́ческую утверди́ти,/ грехо́в оставле́ние нам дарова́ти/ и пода́ти ми́ру ве́лию ми́лость.

Ин тропарь, глас 3:

Да торжеству́ет Це́рковь Христо́ва/ и да ра́дуется град Москва́,/ я́ко возсия́ свети́льник земли́ Росси́йския,/ во испове́дании И́стины непоколеби́мый И́ов Патриа́рх,/ его́же моли́твами, Го́споди,/ вся собла́зны ми́ра сего́ и е́реси искорени́,/ лю́ди во благоче́стии наста́ви/ и утверди́ в Правосла́вии.

Канон святаго, глас 8.

Песнь 1

Ирмос: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́ пешехо́дца спасе́,/ пе́снь Бо́гови воспева́юща.

Припев: Святи́телю о́тче И́ове, моли́ Бо́га о нас.

По́мощь да́ждь ми, Христе́ Бо́же,/ с любо́вию просла́вити иера́рха богому́драго, И́ова всеблаже́ннаго,/ зе́млю Ру́сскую в Правосла́вней ве́ре утвержда́юща/ и лю́ди ея́ к го́рнему Иерусали́му путево́дствующа.

Припев: Святи́телю о́тче И́ове, моли́ Бо́га о нас.

В дре́внем гра́де Ста́рице ро́ждшуся ти, блаже́нне Иоа́нне,/ я́ко благода́ти тезоимени́та нареко́ша тя роди́телие,/ от ни́хже христиа́нскому благоче́стию навы́кл еси́./ Сего́ ра́ди вои́стину благода́ть во избы́тце излия́ся на тя, святи́телю.

Сла́ва Отцу́ и Сы́ну и Свято́му Ду́ху:

Христу́ рабо́тати пла́менне вожделе́в,/ о́браз и́ноческаго жития́ суете́ мирсте́й предпоче́л еси́, блаже́нне,/ те́мже и оби́тель Пресвяты́я Богоро́дицы я́ко ме́сто по́двигов твои́х избра́л еси́.

И ны́не и при́сно и во ве́ки веко́в. Ами́нь.

Богородичен: Ма́ти Бо́жия Пречи́стая,/ при́зри све́тлым όком Твои́м на лю́ди Росси́йския/ и, я́коже во дни святи́теля И́ова Патриа́рха,/ всем посо́бствуй, о Благода́тная.

Песнь 3

Ирмос: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Припев: Святи́телю о́тче И́ове, моли́ Бо́га о нас.

Госпо́дни за́поведи усе́рдно исполня́я/ и послуша́ние доброразсу́дное ста́рцу показу́я,/ угото́вал есй, όтче И́ове, ду́шу твою́ во оби́тель Ду́ху Свято́му,/ Его́же стяжа́ти и нас моли́твами твои́ми сподо́би.

Припев: Святи́телю о́тче И́ове, моли́ Бо́га о нас.

Ревни́тель и́ноческих трудо́в и по́двигов во оби́тели быв,/ зва́ния мона́шескаго удосто́ился еси́, блаже́нне,/ в не́мже и́менем И́ова нарече́н,/ дре́внему пра́веднику тезоимени́т и подо́бен де́лом яви́лся еси́.

Сла́ва Отцу́ и Сы́ну и Свято́му Ду́ху:

И́нока предо́бра, в де́лех послуша́ния утвержде́нна,/ восхваля́ем тя усе́рдно, преподо́бне И́ове пресла́вне.

И ны́не и при́сно и во ве́ки веко́в. Ами́нь.

Богородичен: Ма́ти Бо́жия, и́ноческий чин возлюби́вшая,/ в не́мже и вели́кия свети́льники яви́вшая,/ умоле́на бу́ди смире́нием сих, моли́твами и труды́.

Седален, глас 1:

Па́стыря моли́твенна, учи́тельна, благоразсу́дна/ яви́ тя Влады́ка Христо́с./ Те́мже мо́лимся ти, свя́те И́ове,/ сподо́би нас дар моли́твы, ума́ просвеще́ние/ от Го́спода сла́вы прия́ти.

Слава, и ныне, Богородичен:

Засту́пница ми́лостивая нам бу́ди/ во вся дни живота́ на́шего, Пречи́стая Де́во,/ на Тя бо наде́жду возлага́ем,/ да не поги́бнем, гре́шнии раби́ Твои́.

Песнь 4

Ирмос: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Припев: Святи́телю о́тче И́ове, моли́ Бо́га о нас.

Мно́гими ле́ты во оби́тели тружда́ющуся ти, преподо́бне,/ и и́ноческия обе́ты усе́рдно исполня́ющу,/ призре́ Госпо́дь на тя с высоты́ святы́я Своея́/ и игу́мена оби́тели тя поста́ви,/ к служе́нию вя́щшему предуготовля́я Тя.

Припев: Святи́телю о́тче И́ове, моли́ Бо́га о нас.

Кро́тость, смире́ние, милосе́рдие и любы́/ су́ть тве́рдая основа́ния твоего́ по́двига и́ноческаго, свя́те./ Си́ми изря́дно сия́я,/ богому́дрый игу́мен яви́лся еси́.

Сла́ва Отцу́ и Сы́ну и Свято́му Ду́ху:

Доброде́тельми мно́гими укра́шен,/ вои́стину добр и́ноком наста́вник показа́лся еси́, о́тче,/ путеводствуя сих сло́вом и де́лом./ Те́мже нас, в доброде́телех убогих,/ твоими моли́твами к Ца́рствию Небе́сному упра́ви.

И ны́не и при́сно и во ве́ки веко́в. Ами́нь.

Богородичен: В дни нестрое́ний и ско́рби,/ егда́ подви́жется ве́ра и упова́ние христиа́н,/ неотсту́пною защи́тою Твое́ю/ соблюди́ расточе́нныя о́вцы ста́да Сы́на Твоего́, Пречи́стая.

Пе́снь 5

Ирмос: Вску́ю мя отри́нул еси́/ от лица́ Твоего́, Све́те незаходи́мый,/ и покры́ла мя е́сть чужда́я тьма́, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.

Припев: Святи́телю о́тче И́ове, моли́ Бо́га о нас.

Возвели́чил еси́, Го́споди, Це́рковь Росси́йскую,/ введя́ сию́ в чин Патриа́рший/ избра́нием пе́рваго Патриа́рха Росси́йскаго, свята́го И́ова достосла́внаго,/ его́же с любо́вию воспева́ем.

Припев: Святи́телю о́тче И́ове, моли́ Бо́га о нас.

Изволе́нием Бо́жиим первосвяти́тель Росси́йския Це́ркве поста́влен бе,/ преподо́бне о́тче И́ове,/ те́мже и досто́йное украше́ние и сла́ва тоя́ яви́лся еси́.

Сла́ва Отцу́ и Сы́ну и Свято́му Ду́ху:

Возра́довася па́ства Росси́йская,/ ви́дящи тя досто́йна первосвяти́теля,/ вои́стину отца́ ми́лостиваго и печа́льника изря́днаго.

И ны́не и при́сно и во ве́ки веко́в. Ами́нь.

Богородичен: Ма́ти Бо́жия!/ Избра́нник Твой вои́стину бе святи́тель И́ов,/ я́ко, еще́ ему́ о́троку су́щу,/ во оби́тели Твоего́ Успе́ния, я́же в Ста́рице, благоче́стию навы́че,/ та́кожде и в хра́ме Твоего́ Успе́ния гра́да Москвы/ Патриа́ршаго са́на удосто́ися.

Песнь 6

Ирмос: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Припев: Святи́телю о́тче И́ове, моли́ Бо́га о нас.

Мно́ги по́двиги ко просвеще́нию инове́рных люде́й земли́ Ру́сския/ подъя́л еси́, свя́те И́ове,/ и́стине Христо́вой сих науча́я/ и в доброде́телех укрепля́я.

Припев: Святи́телю о́тче И́ове, моли́ Бо́га о нас.

Возвесели́теся дне́сь, зе́мли Каза́нския, Астраха́нския и Сиби́рския,/ име́юще своего́ изря́днаго ревни́теля благове́стия/ и усе́рднаго предста́теля пред Бо́гом, И́ова всеблаже́ннаго.

Сла́ва Отцу́ и Сы́ну и Свято́му Ду́ху:

Ликовству́йте ны́не, преде́лы Каре́льския и ины́я страны́ полу́нощныя,/ почита́юще святи́теля И́ова,/ кла́сы ве́ры Правосла́вныя в вас возрасти́вшаго.

И ны́не и при́сно и во ве́ки веко́в. Ами́нь.

Богородичен: Обогати́ся земля́ Росси́йская/ явле́нием честны́х ико́н Твои́х, Пресвята́я Де́во,/ И́ову святи́тельствующу,/ и ны́не проба́ви ми́лость Твою́ почита́ющим их.

Кондак, глас 7:

В годи́ну лю́тых искуше́ний/ многострада́льному И́ову подо́бяся,/ в же́ртву жи́ву и непоро́чну/ себе́ Христу́ прине́сл еси́,/ обрати́в па́ству к покая́нию,/ терпели́ве И́ове святи́телю,/ моли́ и нам за вся благодари́ти Го́спода/ и всегда́ воздава́ти/ сла́ву Бо́гови.

Песнь 7

Ирмос: О́троцы евре́йстии в пещи́/ попра́ша пла́мень дерзнове́нно/ и на ро́су о́гнь преложи́ша, вопию́ще:/ благослове́н еси́, Го́споди Бо́же, во ве́ки.

Припев: Святи́телю о́тче И́ове, моли́ Бо́га о нас.

Всеве́дец Госпо́дь предугото́ва тя, первосвяти́телю,/ я́ко стра́жа неусы́пна земли́ Ру́сския во времена́ сму́тная,/ во е́же сохрани́ти ве́ру пра́вую и благоче́стие, подвиза́я всех взыва́ти:/ благослове́н еси́, Бо́же оте́ц на́ших.

Припев: Святи́телю о́тче И́ове, моли́ Бо́га о нас.

Ре́вностию о ве́ре распаля́ем и любо́вию к оте́честву горя́,/ самозва́ннаго лжеца́ и изме́нника небоя́зненно обличи́л есй, святи́телю,/ ве́рныя же научи́л еси́ взыва́ти:/ благослове́н еси́, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

О нра́вах до́брых и благоче́стии во кли́рицех и миря́нех при́сно ревну́я, блаже́нне,/ повеле́л еси́ мно́гия свяще́нныя кни́ги печа́тати,/ да сло́во Бо́жие всех дости́гнет./ Те́мже и нас, соверша́ющих па́мять твою́, во благоче́стии утверди́, во е́же пе́ти:/ благослове́н еси́, Бо́же оте́ц на́ших.

И ны́не и при́сно и во ве́ки веко́в. Ами́нь.

Богородичен: Не устраши́ тебе́, святи́телю, я́рость вра́жия,/ егда́ изме́нницы нечести́вии, я́ко зве́рие ди́вии,/ совлеко́ша с тебе́ ри́зы свяще́нныя./ Ты же, боле́знуя се́рдцем о па́стве свое́й, взыва́л еси:/ спаси́ и утверди́ Правосла́вие, Влады́чице Богоро́дице,/ благослове́нная во ве́ки.

Песнь 8

Ирмос: На горе́ святе́й просла́вльшася/ и в купине́ огнем Присноде́вы Моисе́ови та́йну я́вльшаго,/ Го́спода по́йте/ и превозноси́те во вся ве́ки.

Припев: Святи́телю о́тче И́ове, моли́ Бо́га о нас.

Острозре́нный ра́зум,/ благозву́чен глас, па́че сла́вия,/ красоту́ добро́тную и ина́я дарова́ния/ даде́ ти, святи́телю, Влады́ка Госпо́дь./ Вои́стину сосу́д избра́н,/ запечатле́н Бо́жиими дарова́ньми, яви́лся еси́.

Припев: Святи́телю о́тче И́ове, моли́ Бо́га о нас.

Страда́льцу дре́внему/ не то́чию тезоимени́т быв, о́тче преподо́бне,/ но и ве́рностию Го́споду, та́кожде и испове́данием ве́ры/ подо́бник изря́дный тому́ яви́лся еси́.

Сла́ва Отцу́ и Сы́ну и Свято́му Ду́ху:

Был еси́ вои́стину оте́ц и богомо́лец люде́й твои́х,/ от напа́стей сих заступа́яй,/ сего́ ра́ди и́мя твое́ просла́вися/ во всем оте́честве Росси́йстем, блаже́нне И́ове.

И ны́не и при́сно и во ве́ки веко́в. Ами́нь.

Богородичен: Ма́ти Бо́жия Пречи́стая,/ ско́рби при́сных рабо́в Твои́х ве́си,/ по́мощь незри́мую и тве́рдую нам низпосли́ моли́твами избра́нника Твоего́,/ первосвяти́теля Росси́йскаго, И́ова достосла́внаго.

Песнь 9

Ирмос: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют.

Припев: Святи́телю о́тче И́ове, моли́ Бо́га о нас.

За́поведь Госпо́дню о милосе́рдии/ до́бре испо́лнил еси́, святи́телю./ Сего́ ра́ди о всех приходя́щих к тебе́/ милосе́рдовал еси́ изря́дно.

Припев: Святи́телю о́тче И́ове, моли́ Бо́га о нас.

Хра́ми Бо́жии во мно́зех граде́х/ тобо́ю, святи́телю, поста́влени бы́ша,/ украша́ющии и освяща́ющии зе́млю Ру́сскую,/ в ни́хже и дне́сь безкро́вная же́ртва о всех и за вся прино́сится Влады́це.

Сла́ва Отцу́ и Сы́ну и Свято́му Ду́ху:

Богому́драго святи́теля и до́браго де́лателя на ни́ве Госпо́дней/ ве́мы тя, свя́те И́ове,/ те́мже и служе́ние твое́ высо́кое велича́ем.

И ны́не и при́сно и во ве́ки веко́в. Ами́нь.

Богородичен: Ты еси́ прибе́жище на́ше, Богора́дованная Влады́чице,/ лю́дие бо Росси́йстии и́мут Тя Путеводи́тельницу ко спасе́нию/ и словесы́ святи́теля И́ова взыва́ют:/ Ма́ти Бо́жия, спаси́ Правосла́вие.

Светилен:

Пе́рвенствуяй в Патриа́рсех Росси́йских,/ И́ове, пречу́дне о́тче наш,/ Ты испове́дник ве́ры Правосла́вныя тверд и непоколеби́м яви́лся есй./ Те́мже мо́лим Тя:/ Це́рковь и страну́ Росси́йскую укрепи́ и па́ству твою́ поми́луй.

Слава, и ныне, Богородичен:

К Тебе́ простира́ем моле́бныя ру́це, Влады́чице,/ всех нас огради́/ моли́тв ра́ди и предста́тельством первоиера́рха Росси́йскаго И́ова,/ пресла́внаго отца́ на́шего.

Молитва

О пресла́вне о́тче наш И́ове, пе́рвенец во Патриа́рсех Росси́йских и ве́рный испове́дниче Христо́в! Во дни святи́тельства твоего́ му́дро Це́рковь Росси́йскую пасл еси́, лю́ди просвеща́я и утвержда́я сло́вом Христо́вы ве́ры, хра́мы и оби́тели созида́я, та́же Це́рковь Росси́йскую укрепля́я от мо́ря до мо́ря и да́же до грани́ц Сиби́рских. Тверд муж и испове́дник Правосла́вныя ве́ры яви́лся еси́, о́тче, во времена́ попуще́ния Бо́жия, та́же поруга́ние и изгна́ние подъе́м, во оби́тели пусты́нней, иде́же и чин и́ноческий прия́л еси́, ду́шу твою́ в ру́це Бо́жии све́тло пре́дал еси́. Не преста́й, свя́тче Бо́жий, первосвяти́телю Христо́в, лю́ди земли́ твоея́ укрепля́ти ве́ру Правосла́вную кре́пко держа́ти и во смире́нии пребыва́ти. Град сто́льный Москву́ сохрани́ и от нахожде́ния лю́тых изба́ви. О святи́телю прети́хий и прему́дрый! Сподо́би и нас све́тлости ра́ди жития́ твоего́ смиренному́дрию поуча́тися, да та́ко живу́ще, ми́рный коне́ц сподо́бимся прия́ти и Ца́рствие Христа́ Сы́на Бо́жия получи́ти сла́вными и ми́лостивыми моли́твами твои́ми. Ами́нь.