2 июля.

[В субботу, ближайшую к 2-му числу.]

Канон святителю Иоанну, Архиепископу Шанхайскому и Сан-Францисскому, чудотворцу.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 5:

Попече́ние твое́ о па́стве в стра́нствии ея́, / се́ проо́браз и моли́тв твои́х, за ми́р ве́сь при́сно возноси́мых: / та́ко ве́руем, позна́в любо́вь твою́, святи́телю и чудотво́рче Иоа́нне! / Ве́сь от Бо́га освяще́н священноде́йствием пречи́стых Та́ин, / и́миже са́м при́сно укрепля́ем, / поспеша́л еси́ ко стра́ждущим, цели́телю отра́днейший. / Поспеши́ и ны́не в по́мощь на́м, все́м се́рдцем чту́щим тя́.

Ин тропа́рь, гла́с 1:

Святи́тельства да́р приумно́жил еси́, / сло́ва пропове́данием апо́столом поревнова́в, / бде́нием же, посто́м и моли́твою с преподо́бными вмени́лся еси́, / клевету́ и поноше́ния с кро́тостию прие́мля. / Сего́ ра́ди Христо́с тя́ просла́ви чудесы́, / и́хже оби́льно излива́еши на все́х с ве́рою притека́ющих к тебе́: / и ны́не спаса́й на́с моли́твами твои́ми, / Иоа́нне досточу́дне, святи́телю Христо́в.

Велича́ние:

Велича́ем тя́, святи́телю о́тче Иоа́нне, и чте́м святу́ю па́мять твою́, ты́ бо мо́лиши за на́с Христа́ Бо́га на́шего.

Стихи́ра, гла́с 6:

Ра́дуются дне́сь правосла́вных собо́ри, и лику́юще све́тло, велича́ют свети́льника но́вого, дре́вним святи́телем равносия́тельна, на коне́ц веко́в возсия́вшаго ми́ру и земны́я вся́ концы́ просвети́вшаго, Иоа́нна пречу́дного, преподо́бным спо́стника и святи́телем собесе́дника, испове́дником ра́вного кре́постию и безме́здным цели́телем вене́ц и украше́ние, при́но моля́щася о душа́х на́ших.

Кано́н святи́теля, гла́с 4:

Пе́снь 1.

Ирмос: Мо́ря чермну́ю пучи́ну, невла́жными стопа́ми, дре́вний пешеше́ствовав Изра́иль, крестообра́зныма Моисе́овыма рука́ма, Амали́кову си́лу в пусты́ни победи́л е́сть.

Припев: Святи́телю о́тче Иоа́нне, моли́ Бо́га о нас.

Бла́го е́сть воспева́ти уго́дники Бо́жия, в и́хже ли́це на́м ра́достне све́тит святы́й Иоа́нн, утеша́я, врачу́я его́ призыва́ющия, и науча́я на́с о́бразом многотру́днаго жития́ своего́ ревнова́ти о по́мощи су́щим в беда́х.

Припев: Святи́телю о́тче Иоа́нне, моли́ Бо́га о нас.

О, жела́ние се́рдца боголюби́вого! Возжела́л еси́ еще́ в во́зрасте де́тищном и́стины бы́ти побо́рник. Та́ко бо плени́ша тя́ по́вести о непощади́вших жи́зни своя́ за пра́вду Бо́жию мно́жества ди́вных святы́х.

Сла́ва Отцу́ и Сы́ну и Свято́му Ду́ху:

Привре́менно недоуме́нен бы́л еси́, е́же каковы́й пу́ть, во́инский или́ гражда́нский себе́ избра́ти. Но зре́яше в души́ твое́й крепча́йша мы́сль: всего́ себе́ преда́ти на служе́ние святе́й Це́ркви Христо́вой.

И ны́не и при́сно и во ве́ки веко́в. Ами́нь.

Богородичен: Мы́ о Тебе́ хва́лимся, Богоро́дице, и к Бо́гу Тя́ и́мамы непосты́дное предста́тельство, простри́ ру́ку Твою́ необори́мую и сокруши́ враги́ на́ша, низпосли́ Твои́м рабо́м по́мощь от Свята́го.

Пе́снь 3.

Ирмос: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Припев: Святи́телю о́тче Иоа́нне, моли́ Бо́га о нас.

С весе́лием соверша́ем па́мять твою́, архипа́стырю на́ш и наста́вниче, покланя́емся честны́м и нетле́нным моще́м твои́м, прося́ше моли́тв твои́х.

Припев: Святи́телю о́тче Иоа́нне, моли́ Бо́га о нас.

Восприя́л еси́ о́браз Ангельский, и обо́лкся во вся́ ору́жия Бо́жия, ополчи́вся еси́ проти́ву духо́в зло́бы поднебе́сных, побежда́я и́х.

Сла́ва Отцу́ и Сы́ну и Свято́му Ду́ху:

Не дава́л еси́ сна́ дово́льна очесе́м твои́м, не возле́гл еси́ на о́др во е́же почи́ти, уподо́бився отце́м дре́влим, о подви́жниче!

И ны́не и при́сно и во ве́ки веко́в. Ами́нь.

Богородичен: Ра́й жи́зни су́щи, Богоро́дице, сме́рти грехо́вныя и страсте́й многообра́зных изба́ви мя́ вско́ре.

Седа́лен, гла́с 4:

Моли́тва твоя́, о́тче Иоа́нне, а́ки сто́лп о́гненный до небе́с досяга́яй яви́ся, путеводя́щ Изра́иля но́ваго в жите́йстем стра́нствии, сего́ ра́ди чту́щим тя́ терпе́ние да́руй и благодаре́ние Го́споду в сердца́х насади́, да не я́коже ропотницы́ о́ныя, еги́петских мя́с рачи́телие, осу́димся, но да сподо́бимся земли́ Обетова́нныя нетле́нных бла́г наслади́тися.

Сла́ва и ны́не, богоро́дичен, гла́с то́йже:

Утвержде́ние на́м еси́, Богома́ти, и свяще́нное прибе́жище вла́ющимся прило́ги вра́жиими, Тобо́ю же покрыва́еми, проще́ние грехо́в и дерзнове́ние ко Го́споду обрета́ем.

Пе́снь 4.

Ирмос: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Припев: Святи́телю о́тче Иоа́нне, моли́ Бо́га о нас.

Мно́жества росси́йских архипа́стырей наста́вник, зарубе́жныя же Це́ркве начина́тель, са́м сы́й ревни́тель мона́шеского жития́, тя́, свя́те Иоа́нне, чу́дом на́ших дне́й именова́ и в по́двизех крепкостоя́тельна.

Припев: Святи́телю о́тче Иоа́нне, моли́ Бо́га о нас.

Аще хо́щете, лю́дие, свята́го жи́ва ви́дети, во гра́д Би́толь поспеша́йте, зри́те та́мо отца́ Иоа́нна! — Та́ко се́рбский имени́тый архипа́стырь изрече́, нра́вом же и де́лы Иоа́нновыми восхище́нный.

Сла́ва Отцу́ и Сы́ну и Свято́му Ду́ху:

Юношы карпатору́сстии, се́рбския богосло́вии пито́мцы, о тебе́ с вели́ким умиле́нием повествова́ху, о твое́м к себе́ непощаде́нии и к ни́м любве́, е́же ка́ко осеня́л еси́ и́х кре́стным зна́мением, ходя́ между́ спя́щими, поко́й и́х соблюда́я.

И ны́не и при́сно и во ве́ки веко́в. Ами́нь.

Богородичен: Пречи́стая Ма́ти Го́спода на́шего и Де́во, ми́лующая и гре́шнейших рабо́в Свои́х, я́ко милосе́рдия сокро́вищница пребога́тая, обнови́ на́с, безме́рно обнища́вших, все́х скорбя́щих Засту́пнице и Ра́досте!

Пе́снь 5

Ирмос: Ты́, Го́споди мо́й, Све́т в ми́р прише́л еси́, Све́т Святы́й, обраща́яй из мра́чна неве́дения, ве́рою воспева́ющия Тя́.

Припев: Святи́телю о́тче Иоа́нне, моли́ Бо́га о нас.

Подража́тель и́стинный Христо́в бы́л еси́, святи́телю, ду́шу полага́яй за па́ству свою́, и предста́л еси́ Пастыренача́льнику непосты́дно.

Припев: Святи́телю о́тче Иоа́нне, моли́ Бо́га о нас.

Исцеле́ний да́р даде́ся ти́ еще́ во пресви́терстве, приумно́жил еси́ его́ во дни́ святи́тельства и усоверша́еши в ино́м и ве́чном житии́.

Сла́ва Отцу́ и Сы́ну и Свято́му Ду́ху:

Преподо́бному Нау́му бы́л еси́ соде́йственник во исцеле́ниих, со ико́ною его́ свято́ю посеща́я до́мы челове́ков стра́ждущих.

И ны́не и при́сно и во ве́ки веко́в. Ами́нь.

Богородичен: Богоро́дице Де́во, вселе́нныя блага́я Помо́щнице, Цели́тельнице ду́ш и теле́с на́ших, услы́ши на́с и в де́нь се́й моля́щихся Тебе́.

Пе́снь 6.

Ирмос: Возопи́, прообразу́я погребе́ние тридне́вное, проро́к Ио́на, в ки́те моля́ся: от тли́ изба́ви мя́, Иису́се, Царю́ си́л.

Припев: Святи́телю о́тче Иоа́нне, моли́ Бо́га о нас.

Прииди́те, восхва́лим Богоро́дице хра́м воздви́гшаго, самого́ же все́м скорбя́щим ра́дость и хра́м Ду́ха Свята́го бы́вшаго.

Припев: Святи́телю о́тче Иоа́нне, моли́ Бо́га о нас.

Поспеша́л еси́ и в до́мы стра́ждущих и в пала́ты больни́чныя к неду́гующим, о ни́хже сказа́ ти́ Госпо́дь, я́ко Пречи́стых Та́ин Его́ препода́тель.

Сла́ва Отцу́ и Сы́ну и Свято́му Ду́ху:

Ты́ боля́щим младе́нцем яви́лся еси́ здра́вия хода́тай, святы́й Иоа́нне, ско́рбь роди́тельских ду́ш пременя́я на ра́дость, и все́м во́зрастом ты́ показа́лся еси́ вожделе́нный помо́щник.

И ны́не и при́сно и во ве́ки веко́в. Ами́нь.

Богородичен: Оте́чества правосла́вного лиши́хомся, Влады́чице, внегда́ во́лны гне́ва Госпо́дня над ни́м проидо́ша, зане́ храни́телие су́етных и ло́жных соде́яхомся, внегда́ же скончава́тися душа́м на́шим, Го́спода помяну́хом, да прии́дет к Нему́ Тобо́ю на́ша моли́тва и пе́ние.

Конда́к, гла́с 4:

Христу́ пастыренача́льнику после́довав, во святи́телех изря́днейший яви́лся еси́, спа́сл бо еси́ о́вцы своя́ от губи́тельства безбо́жных, приста́нище ми́рное те́м учреди́в, и попече́ние непреста́нное о па́стве име́я, врачева́л еси́ и́х неду́ги душе́вныя же и теле́сныя, и ны́не о на́с к твои́м честны́м моще́м припа́дющих, моли́ Христа́ Бо́га, о́тче Иоа́нне, в ми́ре спасти́ся душа́м на́шим.

Икос:

Небеса́ ны́не с на́ми ра́дуются и ли́цы святы́х прие́млют но́вое и пресла́вное украше́ние: апо́столы пропове́дника всеми́рнаго целу́ют, му́ченицы дре́внии восхваля́ют ди́вно просла́вльшаго па́мять и́х, святи́телие собесе́дуют ра́вному в словеси́ и прему́дрости, бде́нному же подви́жнику преподо́бнии дивя́тся, ца́рие святи́и ди́внаго моли́твенника о возстановле́нии ца́рства правосла́внаго почита́ют, безсре́бренницы с цели́телем безме́здным мзду́ нетле́нную и недели́мую разделя́ют, ели́ко всесла́вно бы́сть служе́ние твое́, о́тче Иоа́нне, та́ко и венце́в тебе́ исплете́ся мно́жество, но моли́ся ку́пно с ли́ки святы́х ко Христу́ Бо́гу от на́с, к честны́м моще́м твои́м припа́дающих, в ми́ре спасти́ся душа́м на́шим.

Пе́снь 7.

Ирмос: В пещи́ Авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Припев: Святи́телю о́тче Иоа́нне, моли́ Бо́га о нас.

Сы́на све́та и дне́ благода́ть вои́стину тя́ соде́ла: на вся́к бо де́нь святы́ми Та́йнами укрепля́ем и обожа́ем, утверди́л еси́ в Го́споде се́рдце твое́.

Припев: Святи́телю о́тче Иоа́нне, моли́ Бо́га о нас.

Ми́лостивым предста́тельством твои́м ве́рныя и неве́рныя спаса́хуся и да́ры благода́тныя приима́ху, ты́ же, да́руя незави́стно исцеле́ния, во тьме́ пре́лести не оставля́еши пребыва́ти заблу́ждшия, но еди́ного Царя́ сла́вы учи́ши правосла́вно воспева́ти во вся́ ве́ки.

Сла́ва Отцу́ и Сы́ну и Свято́му Ду́ху:

По́мощь и утеше́ние изгна́нным лю́дем свои́м ди́вно сотвори́ Госпо́дь, дарова́в на́м тя́ засту́пника, святи́телю Иоа́нне, но и ны́не покры́й на́с от вра́г на́ших неви́димых и из руки́ все́х, ненави́дящих на́с.

И ны́не и при́сно и во ве́ки веко́в. Ами́нь.

Богородичен: Отцы́ на́ши согреши́ша и пре́дани бы́ша в ру́ки враго́в беззако́нных и лука́внейших па́че всея́ земли́, что́ у́бо сотвори́м, Влады́чице, согреше́ния роди́тельская непреста́нно умножа́юще, и ка́ко ко́зней лю́тых избе́гнем, а́ще не ты́ засту́пиши ка́ющияся и спасе́ния тре́бующия.

Пе́снь 8.

Ирмос: Ру́це распросте́р Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели о́троцы, взыва́юще: благослови́те вся́ дела́ Госпо́дня Го́спода.

Припев: Святи́телю о́тче Иоа́нне, моли́ Бо́га о нас.

Се́рдце твое́ распространи́ся ко все́м, любо́вию моля́щимтися, Иоа́нне святи́телю, помина́ющим по́двиг всего́ многотру́дного жития́ твоего́, безболе́зненное же и ле́гкое преставле́ние твое́, Одиги́трии Пречи́стыя ве́рный служи́телю.

Припев: Святи́телю о́тче Иоа́нне, моли́ Бо́га о нас.

Ничто́же возмо́же препя́ти ти́, посеща́ющу в больни́це ча́д твои́х, па́стырю до́брый, ни до́ждь, ни бу́ря, ни тьма́ нощна́я, иногда́ никому́же зуву́щу, ду́хом предви́дя ну́жду и́х, Го́споду поспе́шствующу и указу́ющу, да вси́ просла́вят Бо́га оте́ц на́ших.

Сла́ва Отцу́ и Сы́ну и Свято́му Ду́ху:

Егда́ ца́рства правосла́вная на земли́ падо́ша и забве́нию пре́дана бы́ша, не преста́л еси́ побе́ды проси́ти царе́м благове́рным в дре́вних пе́снех неизме́нно, я́ко те́х держа́ва то́чию благослове́нна е́сть от Бо́га оте́ц на́ших.

И ны́не и при́сно и во ве́ки веко́в. Ами́нь.

Богородичен: Вели́чит душа́ Твоя́, Влады́чице, Го́спода на́шего и ра́дуется ду́х Тво́й о Бо́зе Спа́се и Сы́не Твое́м. И ка́ко сме́ли бы́хом мы́ воспева́ти пе́снь Твою́, а́ще не бы́ благоволи́ла Сама́ проро́чески рещи́, я́ко ублажа́т Мя́ вси́ ро́ди.

Песнь 9

Ирмос: Кам́ень нерукосе́чный от несеко́мыя горы́, Тебе́, Де́во, краеуго́льный отсече́ся, Христо́с, совокупи́вый разстоя́щаяся естества́. Те́м веселя́щеся, Тя́, Богоро́дице, велича́ем.

Припев: Святи́телю о́тче Иоа́нне, моли́ Бо́га о нас.

Поспеша́я ко стра́ждущим, при́сно ду́шу твою́ за о́вцы твоя́ полага́л еси́, те́мже и чудотворе́ний да́р тебе́ даде́ся, моли́твами бо твои́ми немощству́ющии препоя́сашася си́лою, и ни́щии доброде́телию от гно́ища страсте́й воздвиго́шася.

Припев: Святи́телю о́тче Иоа́нне, моли́ Бо́га о нас.

Заре́ю све́тлою лю́дем па́ствы твоея́ просия́л еси́, о́тче Иоа́нне, внегда́ смути́тися душа́м и́х в годи́ну Бо́жия гне́ва, но помяну́л е́сть Госпо́дь ми́лость Свою́ и смире́нныя уте́ши тобо́ю.

Сла́ва Отцу́ и Сы́ну и Свято́му Ду́ху:

К ца́рству Бо́жию пути́ на́ша напра́ви, послужи́вый ему́ преподо́бием и пра́вдою вся́ дни́ живота́ твоего́, наста́ви ра́зум люде́й твои́х ко спасе́нию и просвети́ во тьме́ и се́ни сме́ртней седя́щия, о́тче блаже́нне Иоа́нне, да ра́достно пою́ще, соверша́ем па́мять твою́.

И ны́не и при́сно и во ве́ки веко́в. Ами́нь.

Богородичен: Наста́ви но́ги на́ша на пу́ть ми́рен, Всечи́стая Влады́чице, ми́р и́стинный к челове́ком приве́дшая, Сы́на Твоего́, Кресто́м вражду́ упраздни́вшаго и дре́вняго супоста́та побе́дно низложи́вшаго.

Свети́лен:

Аще и умро́х пло́тию, но жи́в е́смь, не скорби́те, лю́дие, — си́це по преставле́нии твое́м возвести́л еси́, све́том та́инственным просвеща́я тя́ пою́щия, о́тче Иоа́нне, святи́телю преди́вный.

Сла́ва и ны́не, Богородичен:

О Тебе́, Богоро́дице Де́во, святи́и вси́ пра́зднующе ра́дуются, и на Тя́ упова́ем мы́ раби́ Твои́ многогре́шнии, зову́ще: весели́ся и ра́дуйся, Ма́ти Христа́ Вседержи́теля.

Моли́тва 1

О святи́телю о́тче наш Иоа́нне, па́стырю до́брый и тайнови́дче душ челове́ческих! Ны́не у Престо́ла Бо́жия за нас мо́лишися, я́коже и сам посме́ртне изре́кл еси́: «А́ще и умро́х, но жив есмь». Умоли́ всеще́драго Бо́га проще́ние нам во гресе́х дарова́ти, да бо́дренно воспря́нем, и Бо́гу возопие́м о дарова́нии нам ду́ха смире́ния, стра́ха Бо́жия и благоче́стия во вся́ческих путе́х жи́зни на́шея, я́ко ми́лостивый сиропита́тель и иску́сный наста́вник на земли́ быв, ны́не бу́ди нам путеводи́тель и в сму́тах церко́вных Христо́во вразумле́ние. Услы́ши стена́ние смяте́нных ю́ношей на́шего лихоле́тия, обурева́емых беснова́нием вселука́вым, и при́зри на уны́ние изнемога́ющих па́стырей от утесне́ния тлетво́рнаго ду́ха ми́ра сего́ и томя́щихся в нераде́нии пра́здном и ускори́ на моли́тву, сле́зно вопие́м ти, о те́плый моли́твенниче; посети́ нас си́рых, по всему́ лицу́ вселе́нныя разсе́янных и во оте́чествии су́щих, во тьме страсте́й блужда́ющих, но сла́бою любо́вию ко све́ту Христо́ву влеку́щихся и жду́щих твоего́ оте́ческаго наставле́ния, да благоче́стию навы́кнем и насле́дницы Ца́рствия Небе́снаго яви́мся, иде́же ты пребыва́еши со все́ми святы́ми, сла́вяще Го́спода на́шего Иису́са Христа́, Ему́же честь и держа́ва, ны́не и при́сно и во ве́ки веко́в. Ами́нь.

Моли́тва 2

О святи́телю чу́дне Иоа́нне, толи́ко распространи́л еси́ се́рдце свое́, я́ко нете́сно вмеща́ется в нем мно́жество почита́ющих тя челове́к от разли́чных племе́н и наро́дов! При́зри на убо́жество слове́с на́ших, оба́че от любве́ тебе́ приноси́мое, и помози́ нам, уго́дниче Бо́жий, поне́ отны́не очища́ти себе́ от вся́кия скве́рны пло́ти и ду́ха, рабо́тающе Го́сподеви со стра́хом и ра́дующеся Ему́ с тре́петом. И что возда́мы тебе́ за ра́дость о́ную, ю́же ощути́хом, зря́ще в хра́ме святе́м мо́щи твоя́ святы́я и прославля́юще па́мять твою́; вои́стину, не и́мамы, чим возда́ти, то́чию а́ще на́чнем себе́ исправля́ти, быва́юще но́ви вме́сто ве́тхих. Сея́ благода́ти обновле́ния бу́ди нам хода́тай, свя́те Иоа́нне, помози́ нам в не́мощех, исцели́ боле́зни, уврачу́й стра́сти моли́твами твои́ми; преста́вленный же от сего́ вре́меннаго во ино́е жити́е ве́чное, в не́же наста́ви тя Пречи́стая Влады́чица, Одиги́трия разсе́яния ру́сскаго, чудотво́рною Свое́ю ико́ною Коренно́ю-Ку́рскою, Ея́же спу́тник ты яви́лся еси́ в день преставле́ния своего́, ра́дуешися ны́не в ли́це святы́х, сла́вящих Еди́наго в Тро́ице сла́вимаго Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.