29 июля.

Канон святым чудотворцам и святителям Московским и всея России.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, глас 3:

Пречестна́я версто́, Бо́гом возлю́бленная,/ отцы́ преблаже́ннии, правосла́вию наста́вницы,/ в Небе́сныя оби́тели, я́ко на колесни́це, доброде́тельми взыдо́сте,/ те́плии засту́пницы Ру́сския земли́/ и всем ве́рным стено́ и утвержде́ние,/ Христу́ моли́теся/ дарова́ти нам ве́лию ми́лость.

Кано́н. Гла́с 8.

Пе́снь 1.

Ирмос: Песнь возсле́м, лю́дие,/ чу́дному Бо́гу на́шему,/ свободи́вшему Изра́иля от рабо́ты,/ песнь побе́дную пою́ще и вопию́ще,/ пои́м Тебе́, Еди́ному Влады́це.

Припе́в: Вси святи́и чудотво́рцы Росси́йстии, моли́те Бо́га о нас.

Вси пе́сньми духо́вными/ и́же посто́м просия́вшия Боже́ственныя отцы́ воспои́м согла́сно,/ и́хже изнесе́ Росси́йская земля́, вся́ко ме́сто, град и страна́.

Припе́в: Вси святи́и чудотво́рцы Росси́йстии, моли́те Бо́га о нас.

Ра́дуйся и красу́йся ду́хом, равноапо́стольне кня́же Влади́мире,/ изря́дно ве́тви богоса́дныя ко Христу́ принесы́й,/ благоизря́дный плод, Бори́са сла́внаго и Гле́ба благочести́ваго./ С ни́миже, предстоя́, у Престо́ла Христо́ва, моли́ся о нас.

Припе́в: Вси святи́и чудотво́рцы Росси́йстии, моли́те Бо́га о нас.

Днесь А́нгели ра́дуются на Небесе́х,/ во све́тлую память твою́ святу́ю, Влади́мире:/ спасл бо еси́ всех от вся́каго лука́вствия/ и жертв бесо́вских лю́ди и град изба́ви.

Припе́в: Вси святи́и чудотво́рцы Росси́йстии, моли́те Бо́га о нас.

Ра́дуйся, мона́хов пе́рвый наста́вниче, Анто́ние прекра́снейший, Ки́евская сла́во./ Ра́дуйся, держа́во безмо́лвию, Феодо́сие а́нгеле./ Диони́сий духоно́сный с Ни́коном сла́вным/ пе́сньми да почту́тся.

Припе́в: Вси святи́и чудотво́рцы Росси́йстии, моли́те Бо́га о нас.

Житие́м богодухнове́нным вои́стинну рай яви́стеся Христо́ве Це́ркви, блаже́ннии отцы́,/ вси по и́мени, о нас ко Го́споду моли́тву сотвори́те.

Сла́ва Отцу́ и Сы́ну и Свято́му Ду́ху:

Тро́ичен: Тро́ице Неразде́льная, Еди́нице Вседе́тельная,/ О́тче и Сы́не и Святы́й Ду́ше,/ Ты Бог мой, и Госпо́дь, и Свет,/ Тебе́ воспева́ю и Тебе́ кла́няюся.

И ны́не и при́сно и во ве́ки веко́в. Ами́нь.

Богородичен: Ра́дуйся, пресвяты́й хра́ме, руно́ Богоно́сное,/ запечатле́нный исто́чниче, безсме́ртия струе́./ Ста́до Твое́, Владычице, сохрани́ от всех борю́щих невое́вано.

Пе́снь 3.

Ирмос: Несть свят, я́ко Госпо́дь,/ и несть пра́веден, я́ко Бог наш,/ Его́же пое́т вся тварь:/ несть пра́веден, па́че Тебе́, Го́споди.

Припе́в: Вси святи́и чудотво́рцы Росси́йстии, моли́те Бо́га о нас.

В други́й рай входя́ще, доброде́телей чу́дных оте́ц,/ сих вкуси́м присноживо́тнаго дарова́ния,/ одушевле́нныя пи́щи, восхваля́юще их.

Припе́в: Вси святи́и чудотво́рцы Росси́йстии, моли́те Бо́га о нас.

Благоуха́ния ны́не исполня́емся,/ я́ко в рай други́й теку́ще богонасажде́нный доброде́телей,/ я́же в воздержа́ниих и слеза́х процвето́ша святи́и чудотво́рцы Росси́йстии,/ разли́чныя плоды́ принося́ще жития́,/ те́мже Бо́гу присво́ишася.

Припе́в: Вси святи́и чудотво́рцы Росси́йстии, моли́те Бо́га о нас.

Пе́сньми свяще́нными восхва́лим вели́каго Се́ргия,/ и́же в Ра́донежстей пусты́ни све́тло пости́вшагося,/ свети́льника многосве́тлаго всей вселе́нней,/ его́же моли́твами вси спаса́емся.

Припе́в: Вси святи́и чудотво́рцы Росси́йстии, моли́те Бо́га о нас.

Варлаа́м, Новугра́ду сла́ва и похвала́, днесь да похва́лится,/ и́же в чудесе́х мно́гих, де́лом же и сло́вом, показа́ нам чуде́с све́тлость,/ нача́льник мона́хов и утвержде́ние ве́ры.

Припе́в: Вси святи́и чудотво́рцы Росси́йстии, моли́те Бо́га о нас.

Да почте́н бу́дет Евфи́мий, све́тлая звезда́,/ Су́ждальский свети́льник, и́же де́лы и чудесы́ облиста́вый до конца́,/ уго́дник Христо́в, свети́ло неугаси́мое,/ прибега́ющим покро́в и заступле́ние.

Припе́в: Вси святи́и чудотво́рцы Росси́йстии, моли́те Бо́га о нас.

Вели́кий Кири́лл Белоезе́рский пти́чие житие́ поживе́, я́ко А́нгел,/ и, а́ки дре́внии отцы́, Са́вва Освяще́нный, житие́м яви́ся свети́льник пусты́нный/ и утвержде́ние и́ноков и учи́тель изя́щный.

Сла́ва Отцу́ и Сы́ну и Свято́му Ду́ху:

Тро́ичен: Триеди́наго Естества́ пою́ Ли́ца соста́вна,/ нерожде́нна Отца́, Сы́на рожде́нна и Ду́ха Свята́го Безнача́льна,/ Ца́рство и Божество́ Еди́но.

И ны́не и при́сно и во ве́ки веко́в. Ами́нь.

Богородичен: Чи́стая – Отроча́ ражда́еши, Де́ва – млеко́м дои́ши./ Ка́ко вку́пе обоя́ де́йствуеши, ро́ждши?/ Бог есть Соде́явый, не изыщи́ мене́, е́же ка́ко.

Седа́лен, гла́с 8.

Анто́ниеву кро́тость, и чистоту́ Феодо́сия вели́каго, и чу́днаго Диони́сия по́двиги,/ Се́ргия, сла́внаго в по́стницех, и Евфи́мия, кро́ткаго в разсужде́ниих,/ и про́чих Боже́ственных оте́ц чудеса́, ве́рнии, просла́вим./ И почти́м вку́пе Евфроси́нию Су́ждальскую, жены́ Богому́дрыя воспои́м и согла́сно вопие́м:/ вси святи́и, моли́те Христа́ Бо́га грехо́в оставле́ние дарова́ти/ чту́щим любо́вию святу́ю па́мять ва́шу.

Сла́ва, и ны́не, Богородичен:

Небе́сную дверь и ковче́г, всесвяту́ю го́ру, све́тлый о́блак воспои́м,/ неопали́мую купину́, слове́сный рай, Е́вино свобожде́ние,/ вселе́нныя всея́ вели́кое сокро́вище,/ я́ко спасе́ние в нем соде́лася ми́ру и оставле́ние дре́вних согреше́ний./ Те́мже и вопие́м Ей:/ моли́ Христа́ Бо́га прегреше́ний оставле́ние дарова́ти/ благоче́стно покланя́ющимся пресвято́му рождеству́ Твоему́.

Пе́снь 4.

Ирмос: Из горы́ приосене́нныя, Сло́ве, проро́к,/ еди́ныя Богоро́дицы,/ хотя́ща воплоти́тися богови́дно усмотри́/ и со стра́ хом славосло́вяше си́лу Твою́.

Припе́в: Вси святи́и чудотво́рцы Росси́йстии, моли́те Бо́га о нас.

Еде́мскаго рая́, прииди́те, ви́дим цве́ты присноживо́тныя,/ богора́сленная зда́ния, отце́в тща́ния,/ и́мже де́латель Госпо́дь.

Припе́в: Вси святи́и чудотво́рцы Росси́йстии, моли́те Бо́га о нас.

Све́тло да похва́лится Дими́трий, Волого́дская сла́ва, отце́в нача́льник,/ Диони́сий, Глуши́цкая похвала́,/ прибега́ющим покро́в и заступле́ние.

Припе́в: Вси святи́и чудотво́рцы Росси́йстии, моли́те Бо́га о нас.

Звезда́м заря́, послуша́ния жизнь лу́чших показа́:/ я́ко два свети́ла, сия́юща нам, Фео́дор и Па́вел Богому́дрии, Росто́вская похвала́,/ житие́м чи́стым Бо́гу присво́ишася.

Припе́в: Вси святи́и чудотво́рцы Росси́йстии, моли́те Бо́га о нас.

Ни́кона пою́, ученика́ вели́каго Се́ргия,/ и Са́вву воспева́ю, и́же во Андро́никове пости́вшагося./ Изря́дно с ни́ми да почте́тся пресла́вный Авраа́мий Смоле́нский.

Припе́в: Вси святи́и чудотво́рцы Росси́йстии, моли́те Бо́га о нас.

В пе́снех да похва́лится Зоси́ма,/ пости́выйся в Солове́цстем о́строве изря́дно./ С ним да почте́тся Савва́тий, си́лою Христо́вою ору́жия бесо́в сте́рший.

Припе́в: Вси святи́и чудотво́рцы Росси́йстии, моли́те Бо́га о нас.

Све́тло да похва́лится свети́лом свети́льник, Косма́ Влади́мирский, и́же на Я́хроме;/ достодо́лжно да почте́тся Мака́рий Каля́зинский;/ Пафну́тий Бо́ровский, Алекса́ндр Ошеве́нский с ни́ми да пою́тся гла́сы.

Сла́ва Отцу́ и Сы́ну и Свято́му Ду́ху:

Тро́ичен: Умови́дно несеко́мо Существо́ единора́сленное в Тро́ицу простира́юще,/ Еди́наго Бо́га испове́даем над все́ми/ и Соста́вы Три пропове́даем.

И ны́не и при́сно и во ве́ки веко́в. Ами́нь.

Богоро́дичен: Ра́дуйся, Бо́жие простра́нное вмести́лище,/ ра́дуйся, ковче́же Но́ваго Заве́та./ Ра́дуйся, ру́чко, из нея́же Ма́нна Небе́сная да́стся всем челове́ком.

Пе́снь 5

Ирмос: Страсте́й мя мглы,/ я́ко от глубо́кия но́щи, избавля́яй,/ у́треневати сподо́би дух мой, молю́ся,/ во све́те дне повеле́ний Твои́х, Христе́.

Припе́в: Вси святи́и чудотво́рцы Росси́йстии, моли́те Бо́га о нас.

Чу́дни вси честни́и отцы́,/ и́хже Боже́ственная страда́ния, и́хже чудеса́, и́хже исцеле́ния./ Кто па́че сих показа́ зна́мением кре́пость?

Припе́в: Вси святи́и чудотво́рцы Росси́йстии, моли́те Бо́га о нас.

Не́бо четвертосве́тлое яви́ся на земли́ дво́ица сия́:/ Ники́та Переясла́вский тезоимени́тый, и́же на столпе́,/ честь доброде́телем Авраа́мий Росто́вский.

Припе́в: Вси святи́и чудотво́рцы Росси́йстии, моли́те Бо́га о нас.

Фео́дор преподо́бный, князь Яросла́вский,/ с сыно́ма свои́ма доброде́тельми блиста́яся, просвеща́ет нас./ Мака́рия же У́нженскаго кто досто́йно просла́вит от земны́х?

Припе́в: Вси святи́и чудотво́рцы Росси́йстии, моли́те Бо́га о нас.

Посреди́ звезд а́ки со́лнце,/ и́мже бе нача́льник, Анто́ний облиста́ и Ефре́м чу́дный./ С ни́миже озаря́ет нас и Са́вва Ви́шерский со Алекса́ндром Сви́рским.

Припе́в: Вси святи́и чудотво́рцы Росси́йстии, моли́те Бо́га о нас.

Всечестно́е сокро́вище Боже́ственных даро́в и дом прему́дрости,/ Михаи́л Кло́пский и Нико́ла блаже́нный, юро́дивый,/ да похва́лятся а́нгельски.

Припе́в: Вси святи́и чудотво́рцы Росси́йстии, моли́те Бо́га о нас.

Всечестны́й Па́вел Обно́рский вку́пе со Стефа́ном Ма́хрищским,/ Макси́м же юро́дивый и Васи́лий Блаже́нный Моско́вский, Иси́дор Росто́вский юро́дивый/ равноа́нгельски да похва́лятся.

Припе́в: Вси святи́и чудотво́рцы Росси́йстии, моли́те Бо́га о нас.

Хвалю́ Мефо́диева блага́я дела́./ Высото́ю жития́ небе́снаго бысть Алекса́ндр Не́вский дом прему́дрости и гора́ разу́мная./ С ни́мже да восхва́лится Петр Му́ромский, свети́льник Боже́ственный.

Сла́ва Отцу́ и Сы́ну и Свято́му Ду́ху:

Тро́ичен: Соста́вы Треми́, а́ще естество́м Еди́но, Божество́ есть,/ в Него́же крести́хомся и Еди́ному слу́жим:/ Оте́ц бо Безнача́льный, и Сло́во, и Дух Единосу́щный.

И ны́не и при́сно и во ве́ки веко́в. Ами́нь.

Богородичен: Ра́дуйся, ми́ру сла́во, Богоро́дице Мари́е Всепе́тая,/ ра́дуйся, глави́зно Боже́ственнаго соедине́ния/ Сы́на Бо́жия к челове́ком, Чи́стая.

Пе́снь 6.

Ирмос: Содержи́ма мя, приими́, Человеколю́бче, грехи мно́гими,/ и припа́дающа щедро́там Твои́м,/ я́ко проро́ка, Го́споди, и спаси́ мя.

Прииди́те, вни́дем в клеть душе́вную, Го́споду моли́твы воздаю́ще и вопию́ще:/ О́тче, И́же еси́ на Небесе́х, до́лги на́ша осла́би и оста́ви/ святы́х Твои́х моли́твами, Еди́н бо еси́ Милосе́рд.

Припе́в: Вси святи́и чудотво́рцы Росси́йстии, моли́те Бо́га о нас.

Увы́ мне, кто бу́ду и что соде́ю, грехи́ содева́я/ и Влады́ки не устраша́яся, несмы́сленный!/ Сего́ ра́ди пре́жде Суда́ вопию́ Ти, Милосе́рде Го́споди:/ святы́х Твои́х моли́твами спаси́ мя.

Припе́в: Вси святи́и чудотво́рцы Росси́йстии, моли́те Бо́га о нас.

Свято́е и сла́вное оте́ц мно́жество помя́нутое,/ изба́вите от бед и́же ве́рою творя́щих па́мять ва́шу.

Сла́ва Отцу́ и Сы́ну и Свято́му Ду́ху:

Тро́ичен: Тя, Тро́ице Пребезнача́льная и Боже́ственная Еди́нице,/ Свет и Све́ты пою́, Живо́т и Животы́,/ и Ум, и Сло́во, Дух же Святы́й,/ Свята́го Еди́наго Бо́га.

И ны́не и при́сно и во ве́ки веко́в. Ами́нь.

Богородичен: Из ко́рене Иессе́я прорасте́ Цвет жи́зни,/ взыгра́й, пра́деде,/ от Чи́стыя Отрокови́цы Христо́с Бог, спаса́яй мир.

Конда́к, гла́с 8.

Я́ко благоче́стия пропове́дники/ и нече́стия обузда́тели, Го́споди,/ Богоно́сных собо́р уясни́л еси́,/ Ру́сскую зе́млю озаря́я тех моли́твами, в ми́ре соверше́нне./ И Тебе́ сла́вящия и велича́ющия сохрани́,/ пою́щия Ти: аллилу́ия.

И́кос:

На кра́сная воззре́в по́мыслом, ви́дя быва́емая,/ изме́рив тех боле́зни, жизнь челове́ком окаля́х./ Вас же еди́ных ублажи́м, и́же до́брою че́стию избра́вших,/ е́же жела́ти Христа́, и пребыва́ти с Ним,/ и пе́ти при́сно со проро́ком Дави́дом: аллилу́ия.

Пе́снь 7.

Ирмос: На по́ле Деи́ре/ иногда́ мучи́тель пещь поста́ви на муче́ние Богоно́сных,/ в не́йже три о́троки песносло́вяху Еди́наго Бо́га,/ тро́ично воспева́ху, глаго́люще:/ отце́в Бо́же, благослове́н еси́.

Припе́в: Вси святи́и чудотво́рцы Росси́йстии, моли́те Бо́га о нас.

Прииди́те, принесе́м песнь по до́лгу жена́м, преподо́бно пожи́вшим и равноа́нгельно,/ и́хже моли́твами, воззове́м,/ Бо́же, спаси́ всех нас.

Припе́в: Вси святи́и чудотво́рцы Росси́йстии, моли́те Бо́га о нас.

Дверь све́та всем яви́ся, всенепоро́чная О́льго, су́щим во тьме хода́таица спасе́нию,/ укрепи́ вся позна́ти Бо́га и́стиннаго,/ и Богоизбра́нных сла́ву притяжа́ла еси́.

Припе́в: Вси святи́и чудотво́рцы Росси́йстии, моли́те Бо́га о нас.

Страстоно́сице Евфроси́ние, звезда́ яви́ся Су́ждалю/ и, а́ки со́лнце, доброде́тельми облиста́ющи Росси́йския земли́ концы́, пребога́тая.

Припе́в: Вси святи́и чудотво́рцы Росси́йстии, моли́те Бо́га о нас.

Словесы́ Бо́жиими воспита́на, Богому́драя Евфроси́ние По́лоцкая,/ жела́ющи спасе́нное сло́во, свяще́нных книг науче́ния мзду прия́ла еси́,/ Богоизбра́нных сла́вою обогати́вшися.

Припе́в: Вси святи́и чудотво́рцы Росси́йстии, моли́те Бо́га о нас.

Воздержа́ния о́браз, целому́дрия душе́вный вид ве́рным яви́ся,/ хва́лящим твою́ па́мять свяще́нную, Февро́ние.

Сла́ва Отцу́ и Сы́ну и Свято́му Ду́ху:

Тро́ичен: Тро́йчески Еди́ницу воспои́м,/ соедине́нну Естество́м, Соста́вы разделя́ющуся,/ Та есть Госпо́дь Бог Оте́ц.

И ны́не и при́сно и во ве́ки веко́в. Ами́нь.

Богородичен: Ра́дуйся, Мари́е Богоро́дице Де́во./ Ра́дуйся, престо́ле Госпо́день./ Ра́дуйся, ле́ствице, я́же челове́ческий род горе́ возве́дши от земли́ ко Христу́ Бо́гу.

Пе́снь 8.

Ирмос: Победи́тели мучи́теля и пла́мене/ благода́тию Твое́ю бы́вше,/ за́поведем Твои́м зело́ прилежа́ще,/ о́троцы вопия́ху:/ благослови́те, вся дела́ Госпо́дня, Го́спода.

Припе́в: Вси святи́и чудотво́рцы Росси́йстии, моли́те Бо́га о нас.

Па́стыри и му́дрыя учи́тели, святи́тели Христо́вы Це́ркве со преподо́бными/ вси возвели́чим, взыва́юще:/ Го́спода по́йте и превозноси́те Его́ во ве́ки.

Припе́в: Вси святи́и чудотво́рцы Росси́йстии, моли́те Бо́га о нас.

Вели́кий во святы́х Петр, Моско́вский и всея́ Росси́и чудотво́рец,/ да почте́н бу́дет, я́ко небе́сный таи́нник./ Алекси́й пребога́тый, а́ки гора́, яви́ся ве́ры тве́рдость.

Припе́в: Вси святи́и чудотво́рцы Росси́йстии, моли́те Бо́га о нас.

Ио́на, и Киприя́н, и Макси́м Влади́мирский,/ Богоно́сцы вои́стинну, а́ки апо́столи, свяще́нницы Госпо́дни,/ да воспою́тся с Фо́тием и Фили́ппом, Боже́ственнии свети́льницы.

Припе́в: Вси святи́и чудотво́рцы Росси́йстии, моли́те Бо́га о нас.

Лео́нтий, ве́ры ка́мень и основа́ние, победи́ вся́ку лесть и спасе́ челове́ки,/ Богоблаже́нный святи́тель, пропове́дник Христо́в и гра́ду Росто́ву учи́тель.

Припе́в: Вси святи́и чудотво́рцы Росси́йстии, моли́те Бо́га о нас.

Иса́ия Боже́ственный, Иа́ков Боже́ственный же и Богоно́сный Игна́тий,/ Боже́ственнии свети́льницы, да пою́тся,/ святи́тели Росто́ву и учи́тели.

Припе́в: Вси святи́и чудотво́рцы Росси́йстии, моли́те Бо́га о нас.

Иоа́нну и Фео́дору сла́ва, Су́ждальским свети́льником./ С ни́ми же да пою́тся Ники́та, Иоа́нн и Евфи́мий Брада́тый,/ Новгоро́дстии Боже́ственнии свети́льницы живо́тнии.

Сла́ва Отцу́ и Сы́ну и Свято́му Ду́ху:

Тро́ичен: Еди́ницу Существо́м, пою́ Тя,/ Тро́ицы Ли́ца чту,/ О́тче, и Сы́не, и Ду́ше Пресвяты́й,/ и Безнача́льную Держа́ву Твоего́ Ца́рствия сла́влю во ве́ки.

И ны́не и при́сно и во ве́ки веко́в. Ами́нь.

Богородичен: Ты гора́ Бо́жия яви́ся, Богоро́дице,/ в ню́же Христо́с всели́ся и Боже́ственный храм соде́ла пою́щим:/ Го́спода по́йте и превозноси́те Его́ во ве́ки.

Песнь 9

Ирмос: Проявле́нное на горе́ закононоло́жнику во огни́ и купине́/ Рождество́ Присноде́вы/ в на́ше, ве́рных, спасе́ние/ пе́сньми немо́лчными велича́ем.

Припе́в: Вси святи́и чудотво́рцы Росси́йстии, моли́те Бо́га о нас.

От врага́ братоуби́йцы убие́ние прия́вшии, святи́и му́ченицы Бори́се и Гле́бе,/ све́том Боже́ственных страда́ний свети́ла яви́стеся,/ и на́ши просвети́те чу́вства.

Припе́в: Вси святи́и чудотво́рцы Росси́йстии, моли́те Бо́га о нас.

Прехва́льный му́чениче кня́же Михаи́ле с до́блим боля́рином Фео́дором,/ от нечести́ваго пострада́вше, му́ченическими кровьми́ венча́стеся,/ свети́ла яви́стеся Черни́гову.

Припе́в: Вси святи́и чудотво́рцы Росси́йстии, моли́те Бо́га о нас.

Укрепи́вшеся си́лою Бо́жиею, му́чеником сла́во, Мерку́рие и Авраа́мие,/ стяжа́сте Христа́, кре́пкаго Побо́рника на мучи́теля,/ я́ко непобеди́мии.

Припе́в: Вси святи́и чудотво́рцы Росси́йстии, моли́те Бо́га о нас.

Преподо́бнии отцы́, святи́тели Госпо́дни, и святи́и му́ченицы,/ и жены́ преподо́бныя, и вси пра́ведницы неимено́ваннии,/ моли́те спасти́ся душа́м на́шим.

Сла́ва Отцу́ и Сы́ну и Свято́му Ду́ху:

Тро́ичен: Тро́ице Свята́я, Неразде́льная Существо́м,/ Единоца́рственная над все́ми, Единонача́льная,/ О́тче, и Сы́не, и Святы́й Ду́ше,/ при́сно рабы́ Своя́ спаса́й.

И ны́не и при́сно и во ве́ки веко́в. Ами́нь.

Богородичен: Ра́дуйся, пала́то всех Царя́,/ ра́дуйся, я́ко Ца́рствие Небе́сное Тобо́ю отве́рзеся су́щим на земли́, Ма́ти Де́во,/ и е́же со А́нгелы селе́ние.

Свети́лен:

В пе́снех восхва́лим и́же посто́м просия́вшия/ преподо́бныя учи́тели и таи́нники Боже́ственнаго Сло́ва с жена́ми святы́ми,/ Христа́ просла́вим, И́же сих возлюби́вшаго и помо́щники нам да́вша во вре́мя ско́рби.

Сла́ва, и ны́не, Богоро́дичен:

Боже́ственное очисти́лище, ковче́г всезлаты́й,/ Богоро́дицу Мари́ю, прииди́те, ве́рнии, соше́дшеся, ублажи́м./ Припаде́м, воспла́чемся, приле́жно возопие́м:/ Богоро́дице Всепе́тая, преподо́бных моли́твами помози́ рабо́м Свои́м.

Молитва

О, всехвальные святители Христовы и чудотворцы Петре, Алексие, Ионо, Ермогене и Филиппе! Приимите сие малое моление от нас грешных, к вам прибегающих, и теплым вашим предстательством умолите Господа и Бога нашего Иисуса Христа, яко да, призрев на ны милостивно, дарует нам согрешений наших вольных и невольных прощение, и по велицей Своей милости избавит нас от бед, печалей, скорби и болезней душевных и телесных, обдержащих нас; да подаст земли плодоносие, и вся, яже на пользу настоящаго жития нашего потребная; да дарует нам скончати житие сие привременное в покаянии, и да сподобит нас грешных и недостойных Небеснаго Царствия Своего, со всеми святыми славити Его безконечное милосердие, со Безначальным Его Отцем и Святым и Животворящим Его Духом, во веки веков. Аминь.