29 июля.

Канон священномученику Афиногену и десяти ученикам его.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 4:

И нpа́вом пpича́стник,/ и пpесто́лом наме́стник апо́столом быв,/ дея́ние обpе́л еси́, Богодухнове́нне,/ в виде́ния восхо́д,/ сего́ pа́ди сло́во и́стины испpавля́я,/ и ве́pы pа́ди постpада́л еси́ да́же до кpо́ве,/ священному́чениче Афиноге́не,/ моли́ Хpиста́ Бо́га// спасти́ся душа́м на́шим.

Кано́н. Гла́с 8.

Пе́снь 1.

Ирмос: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.

Припев: Священному́чениче Афиноге́не, моли́ Бо́га о нас.

С чи́нми небе́сными ны́не лику́я, достосла́вне святи́телю и му́чениче, пою́щия тя́ ве́рою спаса́й.

Припев: Священному́чениче Афиноге́не, моли́ Бо́га о нас.

Зако́ны Влады́чними собо́р наставля́емь честны́й Христо́вых страда́лец, беззако́нных сове́ты разори́сте.

Сла́ва Отцу́ и Сы́ну и Свято́му Ду́ху:

Якоже непоро́чно заколе́ние, ве́сь соже́гся, богоблаже́нне, огне́м му́к приве́лся еси́ к Бо́гу ве́ры ра́ди.

И ны́не и при́сно и во ве́ки веко́в. Ами́нь.

Богородичен: Пло́ть бы́вшаго от Твои́х крове́й, Неискусобра́чная, Преве́чное Сло́во па́че ума́ же и сло́ва родила́ еси́.

Пе́снь 3.

Ирмос: Утверди́ на́ш у́м и сердца́, небеса́ сло́вом утвержде́й, во е́же пе́ти и сла́вити Тя́, во спасе́ние ду́ш на́ших.

Припев: Священному́чениче Афиноге́не, моли́ Бо́га о нас.

Разори́в вра́жия лю́тая кова́рства к Бо́гу неразори́мою любо́вию, Афиноге́н, му́ченик и святи́тель, со ученики́ сла́вы сподо́бися.

Припев: Священному́чениче Афиноге́не, моли́ Бо́га о нас.

Притупи́ша врагу́ стре́лы и жа́ла терпели́вным противле́нием боже́ственнии и озаря́ют все́х мы́сли светолу́чными свои́ми сия́нии.

Сла́ва Отцу́ и Сы́ну и Свято́му Ду́ху:

Просте́р, тве́рдым реме́нем безу́мный стру́жает неща́дно, ураня́я непреста́нно, но не поколеба́ си́х по́мысла, е́же па́че сло́ва тве́рдость.

И ны́не и при́сно и во ве́ки веко́в. Ами́нь.

Богородичен: Херуви́мов и серафи́мов превы́шши яви́лася еси́, Богоро́дице: Ты́ бо еди́на прия́ла еси́ Невмести́маго Бо́га в Твое́м чре́ве, Нескве́рная. Те́мже Тя́, ве́рнии вси́, пе́сньми, Чи́стая, ублажа́ем.

Седа́лен, гла́с 4.

Воздержа́нием пе́рвее предочи́стив ду́шу, страда́нием второ́е и соверше́нным умо́м Бо́гу угоди́л еси́, святи́тель и му́ченик бы́в, богоно́се. Собо́р же приве́л еси́ учени́к Влады́це, с ни́миже о на́с моли́ся приле́жно, сла́вне.

Сла́ва, и ны́не, Богородичен:

Чи́стая, Всенепоро́чная и Неискусому́жная, Яже еди́на Безле́тнаго Сы́на и Сло́ва Бо́жия в ле́то ро́ждши, Сего́ со святы́ми и честны́ми патриа́рхи и му́ченики, и проро́ки, и преподо́бными моли́ дарова́ти на́м очище́ние и ве́лию ми́лость.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Священному́чениче Афиноге́не, моли́ Бо́га о нас.

Ума́ вся́каго превы́шши боже́ственными мечта́еми восхожде́нии, плотски́х не убоя́шася го́рьких ра́н, богому́дрии.

Припев: Священному́чениче Афиноге́не, моли́ Бо́га о нас.

Христопропове́дник богоприя́тен и священному́ченик непоро́чен бы́в, сподо́бися Афиноге́н Боже́ственныя благода́ти.

Сла́ва Отцу́ и Сы́ну и Свято́му Ду́ху:

Вети́йствующе му́ченицы воплоще́ние Сло́ва, претерпе́сте ра́ны и сме́рть, к безсме́ртию преше́дше.

И ны́не и при́сно и во ве́ки веко́в. Ами́нь.

Богородичен: Равноси́льна, сопресто́льна Роди́телю, Пресу́щнаго воплоти́ла еси́, Пренепоро́чная, земны́м за милосе́рдие приобщи́вшагося.

Пе́снь 5

Ирмос: Утренююще, вопие́м Ти́: Го́споди, спаси́ ны, Ты́ бо еси Бо́г на́ш, ра́зве Тебе́, ино́го не ве́мы.

Припев: Священному́чениче Афиноге́не, моли́ Бо́га о нас.

Загради́в безстра́стием мудрова́ние пло́ти твоея́, стра́сть изобрази́л еси́ Безстра́стнаго, досточу́дне.

Припев: Священному́чениче Афиноге́не, моли́ Бо́га о нас.

Боже́ственными предповеле́нии приведе́ Влады́це ученико́в ли́к Афиноге́н сла́вный.

Сла́ва Отцу́ и Сы́ну и Свято́му Ду́ху:

Све́тлу сотвори́ па́мять твою́, му́чениче, Светода́вец, исполня́я проше́ния твоя́ к те́м, и́же ве́рою тебе́ притека́ющим.

И ны́не и при́сно и во ве́ки веко́в. Ами́нь.

Богородичен: Ма́терь и Де́ву ве́дуще Тя́, Пресвята́я, согла́сно почита́ем и благоче́стно ублажа́ем.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Священному́чениче Афиноге́не, моли́ Бо́га о нас.

Благозва́ние му́ченическое Афиноге́н получи́, и с ни́м ученико́в ли́к венча́ся, пости́вся пе́рвее и де́монския побе́ждь ко́зни.

Припев: Священному́чениче Афиноге́не, моли́ Бо́га о нас.

Све́тлу содева́ет твою́ честну́ю па́мять Влады́ка Христо́с, исполня́я твоя́ я́же к Нему́ моле́ния, блаже́нне: се́ бо еле́нь свое́ тебе́ исча́дие приво́дит Боже́ственным манове́нием.

Сла́ва Отцу́ и Сы́ну и Свято́му Ду́ху:

Ра́й мы́сленный яви́лся еси́, достосла́вне, и́же дре́во жи́зни посреди́ име́я, и боже́ственных цвето́в благово́нием вся́ благоуха́еши я́сне.

И ны́не и при́сно и во ве́ки веко́в. Ами́нь.

Богородичен: Яко мы́сленный ковче́г, Законода́вца носи́ла еси́, я́ко све́щник светоза́рен, Све́т породила́ еси́, я́ко ко́рень ненапое́н, жи́зни гро́зд, Богоро́дице, прозябла́ еси́.

Конда́к, гла́с 4.

Влады́чню рече́нию после́довав, я́ко па́стырь изря́дный ду́шу твою́ положи́л еси́ за Христо́вы о́вцы, священному́чениче Афиноге́не, сего́ ра́ди восхваля́ем тя́ и с тобо́ю десяти́цу учени́к твои́х, и́же пострада́ша, стра́хом Бо́жиим и твои́м уче́нием наставля́еми. Те́м угоди́вших Влады́ка венча́ ва́с живонача́льною десни́цею, Его́же о все́х на́с моли́те.

Пе́снь 7.

Ирмос: Халде́йская пе́щь, огне́м распаля́емая, ороша́шеся Ду́хом, Бо́жиим предстоя́нием, о́троцы поя́ху: благослове́н еси́, Бо́же оте́ц на́ших.

Припев: Священному́чениче Афиноге́не, моли́ Бо́га о нас.

То́ками крове́й твои́х пре́лести угаси́в пла́мень, огне́м по́двиг твои́х попали́л еси́ ве́щь зло́бы, блаже́нне, — благослове́н, — вопия́, — Бо́г оте́ц на́ших.

Припев: Священному́чениче Афиноге́не, моли́ Бо́га о нас.

Пло́ти взыгра́ния воздержа́ния боле́зньми и пре́лести служе́ния кро́вными ту́чами потре́бльше, му́ченицы, я́ко во́ини Христо́вы, да восхва́лятся.

Сла́ва Отцу́ и Сы́ну и Свято́му Ду́ху:

Гла́в отсече́нием беззако́нных повеле́нием, и пло́ти строга́нием, и многообра́зными му́ками, я́ко столпи́ непрекло́нни, не поколеба́стеся, преподобному́ченицы.

И ны́не и при́сно и во ве́ки веко́в. Ами́нь.

Богородичен: Изба́вльшеся, Пренепоро́чная, Тебе́ ра́ди пе́рваго прароди́тельнаго паде́ния, — ра́дуйся, — Тебе́ вопие́м и ве́рою сла́вим Тобо́ю на́с от тли́ Изба́вльшаго.

Пе́снь 8.

Ирмос: Богоглаго́ливии о́троцы в пещи́, со огне́м пла́мень попира́юще, поя́ху: благослови́те, дела́ Госпо́дня, Го́спода.

Припев: Священному́чениче Афиноге́не, моли́ Бо́га о нас.

Взира́я к Боже́ственным светозаре́нием, и́дольския ле́сти Афиноге́н разори́ глубо́кую тму́, и све́т бы́л е́сть.

Припев: Священному́чениче Афиноге́не, моли́ Бо́га о нас.

Ангельский ли́к и му́ченик, святи́телей и преподо́бных в па́мяти веселя́тся честны́х страстоте́рпец, сла́вяще Го́спода.

Сла́ва Отцу́ и Сы́ну и Свято́му Ду́ху:

Приче́лся еси́ му́ченическим стадо́м со ученики́ десятьми́, на муче́ние иды́й, святи́телю, с ни́миже тя́ ве́рно ублажа́ем.

И ны́не и при́сно и во ве́ки веко́в. Ами́нь.

Богородичен: Его́же породила́ еси́ Сло́ва па́че сло́ва, Богороди́тельнице Мари́е, о на́с моли́, ве́рно Тя́ пою́щих и ублажа́ющих, Пречи́стая.

Песнь 9

Ирмос: Проявле́нное на горе́ законополо́жнику во огни́ и купине́, Рождество́ Присноде́вы, в на́ше ве́рных спасе́ние, пе́сньми немо́лчными велича́ем.

Припев: Священному́чениче Афиноге́не, моли́ Бо́га о нас.

Се́ светоза́рный де́нь дне́сь му́ченик, облиста́ющь благода́тию и Боже́ственными светлостьми́ озаря́ющь ве́рных сердца́, прииди́те, просвеще́ние почерпе́м.

Припев: Священному́чениче Афиноге́не, моли́ Бо́га о нас.

Якоже приноше́ния чи́стая и непоро́чнии а́гнцы, приведо́стеся, му́ченицы, на́с ра́ди Закла́вшемуся, от Него́ венцы́ побе́ды, я́ко от Подвигополо́жника, прие́мше.

Сла́ва Отцу́ и Сы́ну и Свято́му Ду́ху:

Ка́плют сла́дость твоя́, страда́льче, боле́зни и го́ресть вся́ку страсте́й отго́нят, ве́рою хра́му твоему́ притека́ющим и па́мять твою́ пра́зднующим спаси́тельную.

И ны́не и при́сно и во ве́ки веко́в. Ами́нь.

Богородичен: Но́сиши на руку́ Бо́га, нося́щаго вся́ческая, пита́еши Пита́теля, Чи́стая, на́м уподо́бльшася, Его́же моли́ лю́дем Твои́м дарова́ти все́х лю́тых избавле́ние.

Молитва

О пречестна́я и свяще́нная главо́ и благода́ти Свята́го Ду́ха испо́лненная, Спа́сово со Отце́м обита́лище, вели́кий архиере́е, те́плый наш засту́пниче, священному́чениче Афиноге́не, предстоя́ у Престо́ла всех Царя́ и наслажда́яся све́та единосу́щныя Тро́ицы и херуви́мски со А́нгелы возглаша́я песнь трисвяту́ю, вели́кое же и неизсле́дованное дерзнове́ние име́я ко всеми́лостивому Влады́це, моли́ спасти́ся па́ствы Христо́вы лю́дем, благостоя́ние святы́х церкве́й утверди́: архиере́и благоле́пием святи́тельства украси́, мона́шествующыя к по́двигом до́браго тече́ния укрепи́, ца́рствующий град и вся гра́ды и страны до́бре сохрани́, и ве́ру святу́ю непоро́чну соблюсти́ умоли́, мир весь предста́тельством твои́м умири́, от гла́да и па́губы изба́ви ны, и от нападе́ния иноплеме́нных сохрани́, ста́рыя уте́ши, ю́ныя наста́ви, безу́мныя умудри́, вдови́цы поми́луй, си́роты заступи́, младе́нцы возрасти́, пле́нных возврати́, немощству́ющыя и моля́щияся тебе́ от всех напа́стей и бед хода́тайством твои́м свободи́: моли́ о нас Всеще́драго и Человеколюби́ваго Христа́ Бо́га на́шего, да и в день Стра́шнаго Прише́ствия Его́ от шу́ияго стоя́ния изба́вит нас, и ра́дости святы́х прича́стники сотвори́т со все́ми святы́ми во ве́ки веко́в. Ами́нь.