27 июля.

Канон мученикам Кирику и Иулитте.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь му́чеником, гла́с 4:

Му́ченицы Твои́, Го́споди, во страда́ниих свои́х венцы́ прия́ша нетле́нныя от Тебе́, Бо́га на́шего: иму́ще бо кре́пость Твою́, мучи́телей низложи́ша, сокруши́ша и де́монов немощны́я де́рзости; те́х моли́твами спаси́ ду́ши на́ша.

Кано́н му́чеников, гла́с 8.

Пе́снь 1.

Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припев: Святи́и му́ченицы, моли́те Бо́га о нас.

Пропове́давше Сло́ва, от Отца́ я́ве рожде́на, воплоще́на же от Ма́тере, свиде́тели Сего́ страсте́й страстьми́ и сме́ртию бы́сте.

Припев: Святи́и му́ченицы, моли́те Бо́га о нас.

Сла́вная му́ченица, я́ко светоза́рная луна́, совоку́пльшися с со́лнцем, из нея́ рожде́нным Ки́риком, всю́ тва́рь чуде́сными заря́ми просвеща́ют.

Припев: Святи́и му́ченицы, моли́те Бо́га о нас.

Теку́щими измени́ла еси́, я́же ника́коже дви́жима, му́ченице, и, на рука́х твоего́ сы́на нося́щи, с си́м беззако́нных и диа́волю ле́сть омрачи́ла еси́.

Сла́ва Отцу́ и Сы́ну и Свято́му Ду́ху:

Су́щи от ро́да сла́вна, муче́нием же и страда́нии многови́дными, му́ченице Иули́тто, Царя́ безсме́ртнаго дщи́ была́ еси́.

И ны́не и при́сно и во ве́ки веко́в. Ами́нь.

Богородичен: Упраздни́ся сме́рть Тебе́ ра́ди, и а́дово жа́ло потреби́ся, Ма́ти Чи́стая: Ты́ бо безсме́ртнаго Влады́ку, умерщвле́на пло́тию, родила́ еси́.

Пе́снь 3.

Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Припев: Святи́и му́ченицы, моли́те Бо́га о нас.

Небе́сных черто́гов и светоза́рнаго поко́я, ве́чнующия же сла́вы сподо́бистеся, му́ченицы сла́внии, диа́воля жа́ла боле́зньми страда́ния потре́бльше.

Припев: Святи́и му́ченицы, моли́те Бо́га о нас.

Птене́ц я́ко красе́н, голуби́це целому́дренней се́й подо́бился еси́, льсти́вому проти́вяся, сла́вне Ки́риче, льсти́вно присту́пльшу и укра́сти тща́щуся тя́ непобеди́маго.

Сла́ва Отцу́ и Сы́ну и Свято́му Ду́ху:

Го́рдаго зми́я, на не́бо положи́вша уста́ и зе́млю потреби́ти хва́лящагося, младе́нец незло́бив кре́стным всеору́жием до конца́ низложи́ и потреби́.

И ны́не и при́сно и во ве́ки веко́в. Ами́нь.

Богородичен: Не истощи́в не́др Оте́ческих, Пречи́стая, Сло́во, вся́ осуществова́вшее, во Твою́, Пренепоро́чная, утро́бу всели́ся, и пло́ть непреме́нна бы́сть, и челове́ки обожи́ Пресу́щественный.

Та́же седа́лен, гла́с 4.

Тезоиме́нно, страда́льче, пропове́дник яви́лся еси́ и́стинен, пострада́в с ма́терию, Ки́риче сла́вне Христо́в, благоче́стия тече́ние сконча́в, и бы́л еси́ на́м му́жество ве́ры, попра́в вра́жию всю́ си́лу, и с небесе́ прия́л еси́ вене́ц с ма́терию твое́ю, сла́вне. Христа́ моли́те спасти́ся все́м, творя́щим па́мять ва́шу.

Сла́ва И ны́не, Богородичен:

Треволне́нии страстны́ми безсо́вестный а́з обурева́емь, Чи́стая, призыва́ю Тя́ те́пле, да не пре́зриши мене́, окая́ннаго, поги́бнути, бе́здну милосе́рдия ро́ждши, ра́зве бо Тебе́, наде́жды не и́мам. Да не враго́м у́бо обра́дование и сме́х, наде́явся на Тя́, явлю́ся, и́бо мо́жеши, ели́ко хо́щеши, я́ко Ма́ти су́щи все́х Бо́га.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Святи́и му́ченицы, моли́те Бо́га о нас.

Младе́нствуя те́лом, и соверше́нным, му́чениче, умо́м злонача́льнаго низложи́л еси́, лука́вство злосотво́ршаго.

Припев: Святи́и му́ченицы, моли́те Бо́га о нас.

Яко плодови́та лоза́, му́ченице Иули́тто, гро́зд израсти́ла еси́, до́бляго вои́стинну Ки́рика, муче́ния сла́дость иска́пающа.

Сла́ва Отцу́ и Сы́ну и Свято́му Ду́ху:

Ми́лостивно взира́ющи, я́коже а́гница на а́гнца му́ченика, Иули́тта досточу́дная, закала́ема усе́рдно.

И ны́не и при́сно и во ве́ки веко́в. Ами́нь.

Богородичен: Зако́ны естества́, Пречи́стая, па́че естества́ в рождестве́ Твое́м изменя́ются: Соде́теля бо па́че ума́ и сло́ва породила́ еси́.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Святи́и му́ченицы, моли́те Бо́га о нас.

Терза́ему, богому́драя, ра́нами те́лу твоему́, и раздробля́ему, тле́ния дебельство́ совлекла́ еси́, во оде́жду же облекла́ся еси́, ю́же от Де́вы Единоро́дный, пло́ть поне́с, челове́ки обожи́в, облече́.

Припев: Святи́и му́ченицы, моли́те Бо́га о нас.

Обнажи́лася еси́ те́лом, му́ченице всесла́вная, преоби́девши плотски́й сту́д, и врага́, Еву обнажи́вшаго, Иули́тто, дре́вле, терпели́вно вмужи́вшися, в ве́чный сту́д оде́яла еси́.

Сла́ва Отцу́ и Сы́ну и Свято́му Ду́ху:

Во главу́ усе́чена бы́вши, главу́ зми́я, му́ченице, сокруши́ла еси́, лише́на бы́вши бога́тства, небе́сное бога́тство насле́довала еси́, недви́жимое прии́мши Ца́рство со все́ми му́ченики, прехва́льная.

И ны́не и при́сно и во ве́ки веко́в. Ами́нь.

Богородичен: Бо́жие Бо́г Сло́во пло́ть прия́т, мы́сленну и одушевле́ну, от Тебе́, Пречи́стая, и за милосе́рдие бы́сть Челове́к, и обожи́ мя, преступле́нием отринове́на, Его́же моли́ спасти́ вся́ческая.

Пе́снь 6.

Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя.

Припев: Святи́и му́ченицы, моли́те Бо́га о нас.

Преплы́вше безме́рных му́к, прехва́льнии, непостоя́нную во́ду кре́стным окормле́нием и ко приста́нищу ти́хому я́ве доидо́ша, погрузи́вше фарао́на неви́димаго кро́вными струя́ми.

Припев: Святи́и му́ченицы, моли́те Бо́га о нас.

Игра́ет Икони́йский гра́д, тебе́ воспита́вый, и краси́тся па́мятию твое́ю честно́ю Та́рс, Иули́тто: муче́ние бо в то́м сконча́ла еси́ с сы́ном твои́м и венце́в побе́ды сподо́билася еси́.

Сла́ва Отцу́ и Сы́ну и Свято́му Ду́ху:

Презре́ла еси́ многоплете́нныя му́ки, и го́рлица прекра́сная яви́лася еси́, со птенце́м возлете́вши и над все́ми возвы́сившися сетьми́ зми́я, всехва́льная, и во оби́телех небе́сных прему́дро почи́ла еси́.

И ны́не и при́сно и во ве́ки веко́в. Ами́нь.

Богородичен: Кореносека́тельным серпо́м Твоея́ моли́твы посецы́, Отрокови́це, лука́вая помышле́ния души́ моея́ и плодоно́сну покажи́, молю́ся, все́х бо Соде́теля, Бо́га и Спа́са, родила́ еси́.

Конда́к му́чеников, гла́с 4.

Во объя́тиях нося́щи христому́ченица Иули́тта Ки́рика, на по́двизе му́жески веселя́щися, взыва́ше: Христо́с е́сть му́чеников похвала́.

Икос:

Ум мо́й просвети́, Христе́, све́том за́поведей Твои́х, я́ко да возмогу́ воспе́ти святы́я и по́двиги изрещи́. Ки́й же язы́к изглаго́лати возмо́жет страда́ния, я́же претерпе́ша? Те́м припа́даю Тебе́, Человеколю́бче: оставле́ние пода́ждь души́ мое́й окая́нней, да́руй ми́ вре́мя покая́ния, на се́ бо во́лею восприя́л еси́ пло́ть, да вся́ на живо́т возведе́ши, его́же страда́льцы получи́вше, непреста́нно пою́т: Христо́с е́сть му́чеников похвала́.

Пе́снь 7.

Ирмос: Отроцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Припев: Святи́и му́ченицы, моли́те Бо́га о нас.

Па́лицами сокруша́ет твое́ те́ло беззако́нный, богому́драя Иули́тто, по́мысла кре́пость ника́коже подви́же: же́зл бо си́лы — Кре́ст Христо́в держа́ла еси́.

Припев: Святи́и му́ченицы, моли́те Бо́га о нас.

Ту́чами кро́вных наводне́ний погаси́ша о́гнь безбо́жия Христо́вы страда́льцы, зову́ще усе́рдно: благослове́н еси́, Го́споди Бо́же, во ве́ки.

Сла́ва Отцу́ и Сы́ну и Свято́му Ду́ху:

Нося́щи на руку́, му́ченице, его́же родила́ еси́, предста́ла суди́щу и сугу́б до́брый сконча́ла еси́ по́двиг, вопию́щи: благослове́н еси́, Го́споди Бо́же, во ве́ки.

И ны́не и при́сно и во ве́ки веко́в. Ами́нь.

Богородичен: Глаго́лом Твои́м после́дующе, блажи́м Тя́, ро́ди вси́, Отрокови́це, Блаже́ннаго Бо́га Ма́терь я́вльшуюся, в Него́ ве́рующия блаже́нны соде́лавшаго.

Пе́снь 8.

Ирмос: Победи́тели мучи́теля и пла́мене благода́тию Твое́ю бы́вше, за́поведем Твои́м зело́ прилежа́ще, о́троцы вопия́ху: благослови́те, вся́ дела́ Госпо́дня, Го́спода.

Припев: Святи́и му́ченицы, моли́те Бо́га о нас.

Све́тлыя зве́зды, я́же на тве́рди церко́вней неле́стно водрузи́вшеся и зе́млю чудесы́ просве́щше, благоче́стно чту́тся от все́х дне́сь, песносло́вящих Христа́ во ве́ки.

Припев: Святи́и му́ченицы, моли́те Бо́га о нас.

Якоже нова́ ве́твь ко́рене богонасажде́нна су́щи, богому́драя, честна́го твоего́ сы́на нося́щи, увяди́ла еси́ нече́стия сады́, вопию́щи с ни́м и глаго́лющи: Тя́ превозно́сим, Христе́, во ве́ки.

Сла́ва Отцу́ и Сы́ну и Свято́му Ду́ху:

Якоже тельца́ ю́на, ю́ница су́щи прекра́сна, Иули́тто, но́сищи Ки́рика сла́внаго, же́ртву жи́ву от Де́вы Агнцу возсия́вшему и заколе́ному за кра́йнее милосе́рдие.

И ны́не и при́сно и во ве́ки веко́в. Ами́нь.

Богородичен: Вопло́щся Сло́во от пречи́стых Твои́х крове́й, Отрокови́це, прини́кшия к безслове́сным плотски́м страсте́м позна́нием Боже́ственным обожи́, Чи́стая, Его́же превозно́сим во вся́ ве́ки.

Песнь 9

Ирмос: Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от деви́ческаго чре́ва бы́в Челове́к. Те́мже Пречи́стую Богоро́дицу, ве́рнии, велича́ем.

Припев: Святи́и му́ченицы, моли́те Бо́га о нас.

Исцеле́ние приноша́ет ра́ка сла́вных страда́лец, благода́тию Боже́ственнаго Ду́ха напая́емая: прииди́те, почерпи́те, и освяти́те ду́ши, и от неду́г очи́ститеся, мучениколю́бцы, Да́теля до́брых велича́юще.

Припев: Святи́и му́ченицы, моли́те Бо́га о нас.

Якоже ши́пок, му́ченическими прозябо́сте удо́лии, всеблаже́ннии, я́коже кри́н благово́нен, я́ко рая́ боже́ственное прозябе́ние, мѵ́рно я́ко вои́стинну иска́пающе украше́ние, и ве́рных ду́ши благово́нием та́йным веселите́.

Припев: Святи́и му́ченицы, моли́те Бо́га о нас.

Ра́нами му́ченическими украси́стеся, добропобе́днии му́ченицы, и Ангелом я́ве уподо́бльшеся, Бо́гу предстоите́, побе́дным венце́м све́тло обложе́ни и чту́щим ва́с очище́ние грехо́в прося́ще.

Сла́ва Отцу́ и Сы́ну и Свято́му Ду́ху:

Му́ченица, я́коже а́гница, я́ко а́гнца сы́на своего́ нося́щи, посреде́ волко́в невре́дно про́йде и в небе́сную огра́ду всели́ся; при́сно си́х моли́твами, Го́споди, спаси́ ны́, те́х свяще́нную па́мять чту́щия.

И ны́не и при́сно и во ве́ки веко́в. Ами́нь.

Богородичен: Просвети́, две́ре Све́та, ослепле́нную ду́шу мою́ страстьми́, и злы́ми по́мыслы омраче́нную, и бе́дствующую, и изми́ мя́ от напа́стей, и бе́д, и скорбе́й, да сла́влю Тя́, упова́ние ве́рных и утвержде́ние.

Свети́лен, му́чеников.

Ра́дуйся, красу́йся и лику́й, све́тло торжеству́я, Икони́йский гра́де, я́ко из тебе́ возсия́ша два́ свети́льника прему́дра, Иули́тта сла́вная и богому́дрый Ки́рик, зако́нно бо пострада́вше, вене́ц прия́ша сла́вы.

Молитва

Святи́и му́ченицы Иули́тто и Ки́риче! При́зрите с Небе́снаго черто́га на тре́бующих ва́шей по́мощи и не отве́ргните проше́ний на́ших; но я́ко при́снии благоде́тели и хода́таи на́ши, моли́те Христа́ Бо́га, да человеколюби́в и многоми́лостив сый, сохрани́т нас от вся́каго лю́таго обстоя́ния: от тру́са, пото́па, огня́, меча́, наше́ствия иноплеме́нников и междоусо́бныя бра́ни. Да не осу́дит нас гре́шных по беззако́ниям на́шим, и да не во зло обрати́м блага́я, да́руемая нам от всеще́драго Бо́га, но во сла́ву свята́го и́мени Его́ и в прославле́ние кре́пкаго ва́шего заступле́ния. Да моли́твами ва́шими даст нам Госпо́дь мир по́мыслов, воздержа́ние от па́губных страсте́й и от вся́кия скве́рны; и да укрепи́т во всем ми́ре Свою́ еди́ну Святу́ю, Собо́рную и Апо́стольскую Це́рковь, ю́же стяжа́л есть честно́ю Свое́ю кро́вию. Моли́теся приле́жно, святи́и му́ченицы, да утверди́т Христо́с Бог во Святе́й Свое́й Правосла́вной Це́ркви живы́й дух пра́выя ве́ры и благоче́стия; да вси чле́ны ея́, чи́стии от суему́дрия и суеве́рия, ду́хом и и́стиною покланя́ются Ему́ и усе́рдно пеку́тся о соблюде́нии Его́ за́поведей; да мы вси в ми́ре и благоче́стии поживе́м в настоя́щем ве́це и дости́гнем блаже́нныя ве́чныя жи́зни на Небеси́, благода́тию Го́спода на́шего Иису́са Христа́, Ему́же подоба́ет вся́кая сла́ва, честь и держа́ва со Отце́м и Святы́м Ду́хом, ны́не и при́сно и во ве́ки веко́в. Ами́нь.